ᠤᠶᠠᠬᠠᠨ ᠠᠭᠠᠯᠢᠲᠤ ᠳᠡᠯᠡᠬᠡᠢ - ᠲ ᠂ ᠭᠣᠮᠪᠣᠵᠠᠪ Уяхан аальт дэлхий - Т ᠂ Гомбожав
232ᠤᠶᠠᠬᠠᠨ ᠠᠭᠠᠯᠢᠲᠤ ᠳᠡᠯᠡᠬᠡᠢ
ᠤᠶᠠᠬᠠᠨ ᠠᠭᠠᠯᠢᠲᠤ ᠳᠡᠯᠡᠬᠡᠢ
ᠬᠡᠨ ᠨᠢᠭᠡ ᠶ᠋ᠢ ᠪᠡᠨ ᠰᠠᠨᠠᠵᠤ ᠰᠡᠪᠢᠯᠵᠡᠬᠦ
ᠬᠡᠦᠬᠡᠨ ᠰᠠᠯᠬᠢ
ᠬᠡᠭᠡᠷᠡ ᠲᠠᠯᠠ ᠶ᠋ᠢᠨ ᠮᠢᠨᠢ ᠠᠮᠢᠰᠬᠤᠯ
ᠬᠡᠬᠦᠳᠡᠭ ᠤᠶᠠᠰᠬᠠᠵᠤ ᠰᠡᠩᠭᠢᠨᠡᠨᠡ ᠪᠢᠯᠡ
ᠡᠭᠦᠷᠢᠲᠡ ᠬᠠᠷᠠ ᠦᠯᠦ ᠪᠣᠲᠣᠬᠤ
ᠡᠮᠵᠡᠭᠬᠡᠨ ᠬᠠᠶ᠋ᠢᠷᠠ
ᠡᠩᠬᠦᠷᠡᠢ ᠲᠩᠷᠢ ᠶ᠋ᠢᠨ ᠮᠢᠨᠢ ᠰᠠᠷᠠ
ᠡᠲᠦᠷ ᠡᠲᠦᠷ ᠤᠶ᠋ᠢᠤᠠᠬᠠᠷ ᠠᠷᠭᠠᠲᠠᠵᠤ ᠮᠠᠨᠲᠤᠨᠠ ᠪᠢᠯᠡ
ᠵᠥᠭᠡᠯᠡᠬᠡᠨ ᠤᠨᠠᠵᠤ ᠢᠷᠡᠬᠦ ᠤᠩᠭᠠᠷᠢᠯ ᠳᠦ
ᠵᠢᠷᠦᠬᠡ ᠨᠤᠭᠦᠳ ᠂ ᠲᠤᠵᠢ ᠳᠠᠷᠤᠭᠳᠠᠨ ᠤᠶᠠᠩᠭᠠᠷᠠᠵᠤ
ᠵᠡᠭᠦᠦ ᠶ᠋ᠢᠨ ᠦᠵᠦᠭᠦᠷ
ᠰᠢᠪᠡᠵᠦ ᠣᠴᠢᠬᠤ ᠵᠠᠮ ᠳ᠋ᠠᠭᠠᠨ ᠨᠢᠭᠡ ᠶ᠋ᠢ ᠪᠣᠲᠣᠵᠤ ᠤᠬᠠᠭᠠᠷᠠᠨᠠ
ᠡᠷᠭᠡᠯᠡᠨ ᠶᠠᠷᠢᠬᠰᠠᠨ ᠦᠭᠡ ᠨᠤᠭᠦᠳ ᠪᠣᠯ ᠡᠷᠪᠡᠬᠡᠢ ᠶᠤᠮ
ᠡᠬᠡ ᠭᠠᠵᠠᠷ ᠦ᠋ᠨ ᠬᠠᠮᠤᠭ ᠬᠦᠢᠲᠡᠨ ᠬᠠᠷᠠᠴᠠ
ᠡᠵᠡᠭᠦᠢ ᠶ᠋ᠢᠨ ᠬᠥᠬᠡ ᠴᠢᠯᠠᠭᠤᠳ ᠴᠦ᠍
ᠡᠨᠡ ᠠᠭᠠᠯᠢᠨ ᠳᠦ ᠪᠦᠯᠢᠶᠡᠰᠦᠨ
ᠡᠩᠭᠡᠷ ᠶ᠋ᠢᠡᠨ ᠲᠡᠮᠲᠡᠴᠢᠨ ᠴᠡᠴᠡᠭᠯᠡᠨᠡ
ᠠᠶᠠᠨ ᠳ᠋ᠠᠭᠠᠨ ᠵᠦᠳᠡᠷᠡᠭᠰᠡᠨ ᠨᠠᠷᠠ ᠶ᠋ᠢ
ᠠᠭᠠᠷ ᠳᠦᠭᠦᠷᠡᠩ ᠥᠩᠭᠡᠲᠦ ᠵᠡᠭᠦᠲᠦ ᠪᠡᠷ ᠪᠥᠪᠠᠶ᠋ᠢᠯᠠᠵᠤ
ᠠᠰᠬᠠ ᠮᠠᠨᠠᠭᠰᠠᠨ ᠪᠦᠷᠭᠦᠳ ᠊ᠢ
ᠠᠯᠤᠰ ᠲᠤ ᠮᠢᠷᠠᠯᠵᠠᠬᠤ ᠠᠯᠴᠢᠭᠤᠷ ᠤᠷᠤᠭᠤ
ᠠᠮᠠᠷᠠᠭ ᠵᠠᠢ ᠪᠠᠷ ᠲᠠᠮᠤᠨᠠ ᠪᠢᠯᠡ ᠁
ᠤᠬᠠᠭᠠᠨ ᠬᠠᠶ᠋ᠢᠷᠠ ᠶ᠋ᠢᠨ ᠳᠣᠯᠭᠢᠶᠠ ᠪᠠᠷ ᠶ᠋ᠢᠠᠨ
ᠠᠭᠤᠯᠠᠰ ᠦᠨᠦᠰᠦᠨ ᠳᠣᠭᠳᠣᠯᠬᠤ
ᠤᠶᠠᠬᠠᠨ ᠠᠭᠠᠯᠢᠲᠤ ᠳᠡᠯᠡᠬᠡᠢ ᠮᠢᠨᠢ ᠡ
ᠮᠢᠨᠲᠠᠰᠤᠨ ᠠᠮᠢᠰᠬᠤᠯ
ᠮᠢᠯᠢᠶᠠᠵᠤ ᠢᠷᠡᠬᠦ ᠤᠯᠠᠷᠢᠯ ᠳᠤᠮᠳᠠ ᠴᠢᠨᠢ
ᠮᠢᠩᠬ᠋ᠠ ᠮᠢᠩᠭᠠᠨ ᠡᠷᠡ ᠬᠥᠮᠦᠨ
ᠮᠠᠰᠢ ᠪᠠᠶᠠᠰᠬᠤᠯᠠᠩ ᠵᠢᠷᠭᠠᠵᠤ ᠶᠠᠪᠤᠨᠠ ᠡ
ᠥᠨᠥᠴᠢᠨ ᠭᠤᠸ᠋ᠠ
ᠡᠨᠲᠡ ᠳᠠᠯᠠᠢ ᠠᠯᠠᠬ᠋ᠠ
ᠡᠨᠡᠬᠦ ᠭᠤᠷᠪᠠᠯᠵᠢᠨ ᠬᠣᠶ᠋ᠢᠬ ᠪᠣᠯ
ᠡᠩᠬᠦᠷᠡᠶ᠋ᠢᠯᠡᠯ ᠳᠦ ᠮᠠᠷᠲᠠᠭᠲᠠᠭᠰᠠᠨ ᠭᠠᠵᠠᠷ ᠦ᠋ᠨ ᠥᠭᠡᠲᠡᠰᠦ ᠪᠢᠯᠡ
ᠡᠩᠭᠡᠷ ᠬᠤᠪᠠᠬᠠᠢ ᠢᠴᠢᠩᠭᠦᠷᠡᠯ ᠳᠦ
ᠡᠰᠡ ᠲᠦᠪᠲᠡᠬᠦ
ᠡᠮᠵᠡᠭᠬᠡᠨ ᠳᠣᠭᠳᠣᠯᠤᠯ
ᠴᠢ ᠂ ᠡᠨᠲᠡ ᠴᠡᠴᠡᠭᠯᠡᠯᠡ ᠡ
ᠵᠠᠮ ᠦ᠋ᠳ ᠴᠢᠮᠠᠶ᠋ᠢ ᠲᠠᠨᠢᠵᠤ ᠡᠰᠡ ᠴᠢᠲᠠᠨ ᠵᠠᠶ᠋ᠢᠯᠠᠰᠬᠢᠵᠦ
ᠵᠠᠯᠠᠭᠤᠬᠠᠨ ᠰᠡᠤᠠᠬᠢᠯ ᠳ᠋ᠤ᠌ ᠴᠢᠨᠢ ᠤᠶ᠋ᠢᠤᠠᠬᠠᠷ ᠣᠷᠬᠢᠨ ᠥᠩᠭᠡᠷᠡᠨᠡ ᠪᠢᠯᠡ
ᠬᠠᠩᠭᠠᠢ ᠬᠡᠶ᠋ᠢᠬᠦᠮᠡ ᠰᠣᠲᠤᠬᠠᠨ ᠮᠢᠰᠢᠶᠡᠯ ᠴᠢᠨᠢ
ᠬᠠᠨᠢᠰᠴᠤ ᠴᠢᠲᠠᠬᠤ ᠦᠭᠡᠢ
ᠬᠠᠪᠢ ᠲᠥᠰᠦᠷ ᠦ᠋ᠨ ᠴᠢᠨᠢ ᠦᠯᠦ ᠣᠶ᠋ᠢᠯᠠᠭᠠᠬᠤ ᠬᠠᠷᠠᠴᠠ
ᠬᠠᠷᠢᠨ ᠴᠢᠮᠠᠶ᠋ᠢ ᠳᠠᠭᠵᠢᠲᠠᠯᠠ ᠰᠢᠭᠤᠷᠴᠦ ᠢᠷᠡᠨᠡ ᠡ
ᠳᠠᠪᠬᠤᠷ ᠳᠠᠪᠬᠤᠷ ᠥᠯᠥᠨ ᠥᠷᠲᠡᠭᠡ ᠳᠠᠮᠵᠢᠨ
ᠲᠠᠩᠬᠠᠨ ᠴᠠᠮᠴᠠ ᠲᠠᠢ ᠴᠡᠴᠡᠷᠡᠵᠦ ᠢᠷᠡᠬᠦ ᠨᠠᠷᠠᠨ ᠳᠦ
ᠲᠠᠭᠠᠷᠠᠬᠤ ᠳ᠋ᠠᠭᠠᠨ ᠴᠢ ᠴᠢᠯᠠᠭᠤᠵᠢᠪᠠ ᠪᠢᠯᠢᠤ
ᠳᠠᠷᠬᠠᠳ ᠦ᠋ᠨ ᠰᠦᠬᠡ
ᠲᠠᠯᠠᠨ ᠬᠠᠷᠠ ᠶ᠋ᠢᠨ ᠭᠠᠨᠲᠢᠬ
ᠰᠡᠤᠠᠬᠢᠯ ᠊ᠢ ᠴᠢᠨᠢ ᠬᠠᠮᠤᠭ ᠢᠯᠡᠭᠦᠦ ᠮᠡᠳᠡᠳᠡᠭ ᠪᠠᠶ᠋ᠢᠵᠠᠢ ᠡ
ᠮᠥᠨᠭᠬᠡᠯᠡᠭᠳᠡᠭᠰᠡᠨ ᠢᠨᠢᠶᠡᠯ ᠴᠢᠨᠢ
ᠮᠥᠨᠲᠥᠷ ᠰᠥᠷᠦᠨ ᠡᠯᠢᠭᠡ ᠥᠨᠥᠴᠢᠨ ᠴᠡᠴᠡᠭᠯᠡᠵᠦ
ᠮᠥᠷᠡᠨ ᠭᠣᠣᠯ ᠳᠦ ᠤᠷᠤᠰᠬᠠᠵᠤ ᠴᠢᠲᠠᠬᠤ ᠦᠭᠡᠢ ᠭᠤᠨᠢᠬ ᠴᠢᠨᠢ
ᠮᠥᠩᠭᠥᠨ ᠬᠤᠨᠲᠠᠬ᠋ᠠ ᠳᠦᠪ ᠳᠦᠭᠦᠷᠡᠩ ᠴᠠᠯᠭᠢᠯᠠᠨᠠ ᠪᠢᠯᠡ
ᠡᠨᠡ ᠠᠷᠢᠬᠢᠨ ᠳᠦ ᠡᠷᠡ ᠬᠥᠮᠦᠨ ᠰᠣᠭᠲᠣᠵᠤ ᠤᠨᠠᠨᠠ
ᠡᠲᠦᠷ ᠬᠣᠨᠣᠭ ᠦ᠋ᠨ ᠦᠷᠭᠦᠭᠰᠡᠨ ᠣᠯᠠᠨ ᠰᠢᠪᠠᠭᠤ ᠰᠣᠭᠲᠣᠵᠤ ᠤᠨᠠᠨᠠ ᠡ
ᠡᠭᠦᠯᠡ ᠪᠣᠯ ᠴᠢᠮᠠ ᠠ᠋ᠴᠠ ᠬᠣᠯᠠᠬᠠᠨ ᠣᠷᠣᠰᠢᠬᠤᠢ
ᠦᠲᠡᠰᠢ ᠪᠣᠯᠭᠠᠨ ᠵᠡᠭᠦᠲᠦᠨ ᠳ᠋ᠡᠭᠡᠨ ᠪᠢ
ᠴᠢᠮᠠ ᠳᠦ ᠬᠠᠨᠢᠰᠤᠨ ᠪᠦᠵᠢᠳᠡᠭ ᠪᠢᠯᠡ
ᠴᠢᠲᠠᠯ ᠮᠡᠬᠦᠰᠲᠡᠬᠦ ᠵᠠᠢ
ᠴᠠᠭᠠᠰᠤᠨ ᠳᠡᠭᠡᠷᠡ ᠡᠴᠡ
ᠴᠢ ᠂ ᠨᠠᠲᠠ ᠤᠷᠤᠭᠤ ᠲᠡᠮᠡᠦᠯᠵᠦ ᠢᠷᠡᠨᠡ
ᠭᠠᠵᠠᠷ ᠳᠡᠭᠡᠷᠡ ᠡᠴᠡ
ᠪᠢ ᠴᠢᠮᠠ ᠤᠷᠤᠭᠤ ᠭᠦᠶᠦᠵᠦ ᠣᠴᠢᠨᠠ
ᠶᠠᠭᠤᠲᠠᠢ ᠨᠢᠮᠭᠡᠬᠡᠨ ᠵᠠᠢ ᠶᠤᠮ ᠪᠢᠯᠡ ?
ᠴᠢᠨᠦ ᠂ ᠴᠡᠴᠡᠭ ᠦ᠋ᠨ ᠰᠢᠯᠪᠢ
ᠭᠠᠵᠠᠷ ᠳᠡᠭᠡᠷᠡ ᠪᠠᠭᠤᠵᠤ ᠡᠰᠡ ᠴᠢᠲᠠᠨᠠ
ᠮᠢᠨᠦ ᠂ ᠮᠥᠷᠥᠭᠡᠲᠦᠯᠲᠦ ᠦᠯᠮᠡᠢ
ᠴᠠᠭᠠᠰᠤ ᠨᠡᠪᠲᠡᠯᠦᠨ ᠣᠷᠣᠵᠤ ᠡᠰᠡ ᠲᠠᠶ᠋ᠢᠯᠤᠨᠡ ᠡ ᠁
1989 ᠂12
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠪᠠᠭᠠᠲᠤᠷ
ᠬᠢᠨᠠᠭᠴᠢ ᠄ ᠭᠠᠸᠠ
2023᠂ 5᠂ 28 ᠪ ᠡᠲᠦᠷ