ᠨᠢᠮᠠ ᠶᠢᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ - 2 Нямын задгай шүлгүүд - 2
243ᠨᠢᠮᠠ ᠶᠢᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ - 2
ᠭᠡᠷᠡᠯ ᠰᠡᠭᠦᠳᠡᠷ ᠬᠣᠶᠠᠷ
ᠬᠥᠮᠦᠨ ᠠᠮᠢᠲᠠᠨ ᠳ᠋ᠤ᠌ ᠲᠤᠰᠠ ᠬᠦᠷᠭᠡᠨᠡ ᠯᠡ ᠭᠡᠵᠦ ᠮᠤᠩᠭᠠᠨᠢᠵᠤ ᠶᠠᠪᠤᠭᠠ ᠭᠡᠮ ᠴᠦ᠍ ᠦᠭᠡᠢ᠂ ᠬᠣᠣᠷ ᠴᠤ᠌ ᠦᠭᠡᠢ ᠨᠢᠩᠵᠢ ᠶ᠋ᠢᠨ ᠰᠡᠳᠬᠢᠯ ᠦ᠋ᠨ ᠴᠠᠭᠠᠨ ᠮᠥᠷ ᠲᠡᠢ ᠭᠡᠷᠡᠯ ᠦ᠋ᠨ ᠬᠣᠢᠨᠠ ᠠ᠋ᠴᠠ ᠰᠡᠭᠦᠯᠲᠡᠨ ᠳᠠᠭᠠᠳᠠᠭ ᠨᠢ ᠰᠡᠭᠦᠳᠡᠷ ᠃
ᠰᠠᠢᠬᠠᠨ ᠪᠦᠬᠦᠨ ᠢ᠋ ᠵᠠᠯᠭᠢᠬᠤ ᠶ᠋ᠢ ᠯᠡ ᠪᠣᠳᠣᠭᠠᠳ ᠰᠢᠩᠰᠢᠳᠡᠭ ᠰᠡᠭᠦᠳᠡᠷ ᠰᠢᠭ ᠡᠢᠮᠦ ᠮᠠᠭᠤ ᠰᠠᠨᠠᠭᠠ ᠂ ᠬᠠᠷᠠ ᠳᠣᠲᠣᠷ ᠲᠠᠢ ᠶᠠᠭᠤᠮᠠ ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍ ᠥᠭᠡᠷᠡ ᠨᠢᠭᠡᠴᠦ᠍ ᠦᠭᠡᠢ ᠃
ᠬᠡᠷᠡᠮ ᠦ᠋ᠨ ᠠᠷᠤ ᠂ ᠭᠡᠷ ᠦ᠋ᠨ ᠪᠤᠯᠤᠩ
ᠬᠡᠭᠡᠷᠡ ᠲᠠᠯᠠ ᠂ ᠬᠠᠳᠠ ᠴᠢᠯᠠᠭᠤ ᠂ ᠠᠭᠤᠨ ᠤᠰᠤ ᠁
ᠬᠠᠮᠢᠭᠠ ᠶᠠᠭᠤ ᠪᠠᠢᠪᠠᠯ ᠲᠡᠭᠦᠨ ᠦ᠌ ᠳᠠᠯᠳᠠ ᠠ᠋ᠴᠠ ᠳᠠᠭᠠᠵᠤ ᠯᠠ ᠪᠠᠢᠳᠠᠭ᠂ ᠭᠡᠲᠡᠵᠦ ᠯᠡ ᠪᠠᠢᠳᠠᠭ ᠃
ᠲᠡᠭᠡᠭᠡᠳ ᠡᠳᠦᠷᠵᠢᠨ ᠳᠠᠭᠠᠵᠤ ᠭᠡᠲᠡᠪᠡᠴᠦ ᠶᠠᠭᠤ ᠴᠤ᠌ ᠣᠯᠬᠤ ᠦᠭᠡᠢ
ᠲᠡᠭᠷᠢ ᠶ᠋ᠢᠨ ᠲᠦᠮᠡᠨ ᠨᠢᠳᠦᠨ ᠦ᠌ ᠳᠣᠣᠷᠠ ᠬᠢᠨᠠᠯᠲᠠ ᠬᠦᠯᠢᠶᠡᠨ ᠨᠢᠭᠡ ᠨᠢᠭᠡ ᠰᠥᠨᠢ ᠪᠡᠷ ᠫᠡᠯᠪᠡᠢᠨ ᠬᠠᠷᠠᠯᠠᠵᠤ ᠬᠡᠪᠲᠡᠨᠡ ᠃
ᠨᠠᠷᠠ ᠭᠠᠷᠬᠤ ᠦᠶᠡ ᠳ᠋ᠦ᠍ ᠪᠣᠰᠴᠤ ᠦᠵᠡᠪᠡᠯ᠂
ᠥᠨᠥᠬᠢ ᠰᠡᠭᠦᠳᠡᠷ ᠭᠡᠷᠡᠯ ᠦ᠋ᠨ ᠠᠪᠤᠷᠭᠤ ᠱᠦᠭᠦᠷ ᠲᠦ᠍ ᠰᠡᠭ ᠪᠣᠯᠲᠠᠯᠠ ᠱᠦᠭᠦᠷᠳᠡᠭᠳᠡᠵᠦ ᠬᠠᠮᠢᠭᠠ ᠶᠠᠭᠤᠨ ᠤ᠋ ᠠᠷᠤ ᠳ᠋ᠤ᠌ ᠨᠢᠭᠤᠭᠳᠠᠵᠤ ᠪᠠᠢᠭᠰᠠᠨ ᠪᠣᠯ ᠲᠡᠨᠳᠡ ᠡᠴᠡ ᠪᠡᠨ ᠲᠠᠭᠤᠭᠳᠠᠵᠤ ᠡᠦᠲᠦᠨᠡ ᠃
ᠬᠠᠷᠠ ᠰᠠᠨᠠᠭᠠ ᠭᠠᠷᠭᠠᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠡᠭᠦᠳᠡᠷ ᠬᠡᠵᠢᠶᠡᠳᠡ ᠲᠠᠭᠤᠭᠳᠠᠨᠠ ᠃
ᠴᠠᠭᠠᠨ ᠮᠥᠷ ᠲᠡᠢ ᠶᠠᠪᠤᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠡᠷᠡᠯ ᠲᠠᠩᠳᠠ ᠳᠤᠯᠠᠢᠨᠠ ᠁
ᠠᠪᠤᠭᠠᠢ ᠮᠢᠨᠢ
ᠬᠥᠮᠦᠨ ᠦ᠌ ᠤᠷᠢᠳᠤᠭᠤᠷ ᠤᠯᠠᠩ ᠲᠤᠯᠩ ᠪᠥᠮᠪᠥᠷᠢᠭᠰᠡᠭᠡᠷ ᠂
ᠬᠠᠷᠭᠤᠯᠳᠤᠭᠰᠠᠨ ᠪᠦᠬᠦᠨ ᠢ᠋ ᠬᠠᠷᠠᠩᠭᠤᠢ ᠳ᠋ᠤ᠌ ᠲᠥᠭᠡᠷᠢᠭᠦᠯᠳᠡᠭ ᠬᠥᠯ ᠤᠯᠠ ᠦᠭᠡᠢ ᠬᠥᠬᠡ ᠭᠡᠷᠡᠯ ᠢ᠋ ᠠᠩᠬᠠᠨ ᠳ᠋ᠠᠭᠠᠨ ᠠᠯᠪᠢᠨ ᠴᠢᠳᠬᠥᠷ ᠭᠡᠵᠦ ᠮᠠᠨᠠᠢᠬᠢᠨ ᠳ᠋ᠤ᠌ ᠨᠡᠷᠡᠯᠡᠳᠡᠭ ᠪᠠᠢᠭᠰᠠᠨ ᠶᠤᠮ ᠃
ᠡᠦᠲᠦ ᠬᠥᠮᠦᠨ ᠬᠣᠢᠭᠤᠷ ᠭᠣᠷ ᠱᠣᠷ ᠪᠥᠮᠪᠥᠷᠢᠭᠰᠡᠭᠡᠷ
ᠬᠠᠮᠤᠭ ᠣᠯᠠᠨ ᠢ᠋ ᠬᠠᠷᠠ ᠡᠳᠦᠷ ᠢ᠋ᠶ᠋ᠡᠷ ᠲᠥᠭᠡᠷᠢᠭᠦᠯᠳᠡᠭ ᠣᠷᠣᠨ ᠲᠣᠷᠤᠨ ᠦᠭᠡᠢ ᠬᠡᠢ ᠴᠤᠤᠷᠬᠠᠯ ᠢ᠋ ᠴᠣᠬᠣᠮ ᠶᠠᠭᠤ ᠭᠡᠵᠦ ᠳᠠᠭᠤᠳᠠᠪᠠᠯ ᠵᠣᠬᠢᠯᠲᠠᠢ ᠪᠣᠢ ?
ᠬᠠᠷᠢᠭᠤᠯᠵᠤ ᠠᠯᠢ ᠳᠠ ᠨᠠᠳᠠ
ᠬᠤᠯᠮᠠᠯᠵᠠᠵᠤ ᠪᠤᠤ ᠠᠭᠠᠰᠢᠯᠠ ᠳᠠ ᠠᠪᠤᠭᠠᠢ ᠮᠢᠨᠢ !
ᠨᠠᠪᠴᠢ ᠴᠡᠴᠡᠭ ᠦ᠋ᠨ ᠪᠠᠷᠠ
ᠨᠠᠳᠠ ᠲᠠᠢ ᠴᠣᠭ ᠨᠢᠭᠡ ᠵᠤᠨ ᠨᠠᠭᠠᠳᠤᠭᠰᠠᠨ
ᠨᠠᠪᠴᠢ ᠴᠡᠴᠡᠭ ᠬᠣᠶᠠᠷ
ᠨᠠᠮᠤᠷ ᠤ᠋ᠨ ᠠᠯᠲᠠᠨ ᠳᠠᠪᠠᠭᠠ ᠶ᠋ᠢ ᠳᠠᠪᠠᠭᠠᠳ ᠯᠠ ᠣᠷᠣᠮᠠᠭᠴᠠ ᠳᠠᠬᠢᠵᠤ ᠶᠠᠭ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ ᠃
ᠡᠦᠲᠦ ᠠᠯᠢ ᠳᠠᠪᠠᠭᠠ ᠪᠠᠷ
ᠤᠯᠠᠢᠵᠤ ᠨᠣᠭᠣᠭᠠᠷᠠᠭᠰᠠᠭᠠᠷ ᠬᠠᠷᠢᠵᠤ ᠢᠷᠡᠳᠡᠭ ᠪᠣᠯ ᠲᠠ ᠮᠠᠨ ᠤ᠋ ᠬᠣᠶᠠᠷ ?
ᠨᠤᠲᠤᠭ ᠨᠣᠰᠤ ᠪᠠᠨ
ᠨᠠᠪᠴᠢ ᠴᠡᠴᠡᠭ ᠪᠢᠳᠡ ᠭᠤᠷᠪᠠᠭᠤᠯᠠ ᠪᠠᠨ ᠴᠢᠮᠡᠵᠦ ᠳᠠᠭᠤᠯᠠᠵᠤ ᠲᠣᠭᠯᠠᠬᠤ ᠶᠤᠮᠰᠠᠨ ᠁
ᠪᠡᠶᠡ ᠪᠡᠨ ᠳᠠᠬᠢᠵᠤ ᠭᠠᠢᠬᠠᠭᠤᠯᠤᠨᠠ ᠤᠤ
ᠬᠤᠰᠤᠨ ᠣᠢ ᠶ᠋ᠢᠨ ᠳᠣᠭᠤᠤᠷ
ᠬᠥᠷᠥᠰᠥ ᠨᠠᠭᠠᠯᠳᠤᠨ ᠠᠵᠤ ᠲᠥᠷᠥᠵᠦ ᠶᠠᠪᠤᠭᠠ ᠬᠥᠪᠳᠥ ᠵᠢᠭᠠᠬᠠᠨ ᠪᠣᠯᠪᠠᠴᠤ᠂
ᠲᠣᠯᠣᠭᠠᠢ ᠰᠢᠭᠢᠷᠡ ᠪᠦᠷᠢᠨ
ᠲᠠᠪᠤᠨ ᠴᠣᠯᠠ ᠪᠦᠲᠦᠨ ᠠᠮᠢ ᠲᠠᠢ ᠭᠣᠣᠯ ᠲᠠᠢ ᠶᠠᠭᠤᠮᠠ ᠶᠤᠮ ᠃
ᠭᠡᠷᠡᠯ ᠴᠢᠭᠢᠭ ᠬᠠᠮᠢᠭᠠ ᠪᠠᠢᠪᠠᠯ ᠲᠡᠨᠳᠡ ᠣᠴᠢᠵᠤ ᠭᠡᠷ ᠡᠷᠦᠬᠡ ᠪᠡᠨ ᠪᠣᠰᠬᠠᠨᠠ ᠃
ᠤᠨᠠᠬᠤ ᠨᠠᠷᠠ ᠲᠣᠰᠤᠭᠠᠳ ᠯᠠ ᠭᠠᠷᠬᠤ ᠬᠣᠭᠣᠷᠣᠨᠳᠣ
ᠤᠷᠭᠤᠵᠤ ᠬᠥᠬᠡᠷᠡᠬᠦ ᠭᠡᠷᠡᠯ ᠦ᠋ᠨ ᠰᠢᠮᠡ ᠲᠡᠵᠢᠭᠡᠯ ᠢ᠋ᠶ᠋ᠡᠨ ᠤᠳᠠᠬᠤ ᠴᠤ᠌ ᠦᠭᠡᠢ ᠣᠯᠤᠭᠠᠳ ᠯᠠ ᠠᠮᠵᠢᠴᠢᠳᠠᠭ ᠬᠤᠷᠴᠠ ᠱᠠᠯᠠᠮᠠᠭ ᠵᠠᠩ ᠲᠠᠢ ᠃
ᠠᠮᠵᠢ ᠠᠮᠵᠢᠭᠰᠠᠭᠠᠷ ᠯᠠ ᠤᠴᠢᠷ ᠦᠭᠡᠢ ᠪᠠᠶᠠᠰᠳᠠᠭ ᠰᠠᠢᠬᠠᠨ ᠠᠭᠠᠯᠢ ᠲᠠᠢ ᠠᠢᠯ ᠰᠢᠦ ᠃
ᠵᠢᠭᠠᠬᠠᠨ ᠬᠥᠪᠳᠥ ᠨᠦ᠍ᠭᠦᠳ ᠡᠨᠡ ᠣᠷᠣᠢ ᠮᠥᠨ ᠯᠡ ᠣᠢ ᠶ᠋ᠢᠨ ᠵᠠᠪᠰᠠᠷ ᠠ᠋ᠴᠠ ᠭᠡᠷᠡᠯ ᠭᠡᠭᠡ ᠶ᠋ᠢᠨ ᠢᠳᠡᠰᠢ ᠤᠤᠭᠤᠰᠢ ᠪᠠᠨ ᠣᠯᠵᠤ ᠠᠪᠤᠭᠠᠳ ᠶᠡᠬᠡ ᠪᠠᠶᠠᠷᠯᠠᠨ ᠬᠥᠭᠡᠷᠦᠯᠳᠦᠵᠡᠭᠡᠯᠡ ᠃
ᠬᠥᠭᠰᠢᠨ ᠪᠤᠭᠤᠷᠤᠯ
ᠬᠡᠦᠬᠡᠳ ᠨᠢᠯᠬᠠᠰ ᠦᠭᠡᠢ ᠪᠦᠭᠦᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ
ᠬᠥᠬᠡ ᠠᠯᠴᠢᠭᠤᠷ ᠰᠠᠵᠢᠨ ᠪᠥᠵᠢᠭᠯᠡᠵᠦ ᠪᠠᠢᠲᠠᠯᠠ᠂
《 ᠲᠦᠢ! ᠲᠤᠰᠠ ᠬᠦᠷᠭᠡᠵᠦ ᠵᠠᠪᠰᠠᠷ ᠲᠠᠯᠪᠢᠵᠤ ᠦᠭᠭᠦᠭᠰᠡᠨ ᠦᠭᠡᠢ ᠪᠣᠯ ᠂ ᠲᠠᠨ ᠤ᠋ ᠮᠡᠲᠦ ᠶ᠋ᠢᠨ ᠠᠮᠢᠲᠠᠳ ᠳᠤᠬᠤ ᠪᠠᠨ ᠣᠯᠵᠤ ᠳᠣᠩᠬᠣᠯᠵᠠᠬᠤ ᠪᠣᠢ︕ 》 ᠭᠡᠵᠦ ᠥᠨᠳᠥᠷ ᠥᠨᠳᠥᠷ ᠬᠤᠰᠤ ᠥᠩᠭᠡᠢᠵᠦ ᠢᠷᠡᠭᠡᠳ ᠬᠡᠯᠡᠵᠡᠢ ᠃ ᠲᠤᠰᠠ ᠬᠢᠭᠰᠡᠨ ᠳ᠋ᠡᠭᠡᠨ ᠪᠡᠶᠡ ᠪᠡᠨ ᠭᠠᠢᠬᠠᠭᠤᠯᠬᠤ ᠰᠠᠨᠠᠭᠠ ᠲᠠᠢ ᠃ ᠴᠢᠩᠭᠢᠲᠡᠯᠡ ᠳᠣᠣᠷᠠ ᠠ᠋ᠴᠠ ᠨᠢ ᠄
《 ᠴᠢᠭᠢᠭ ᠨᠣᠢᠲᠠᠨ ᠢ᠋ ᠪᠦᠷᠬᠦᠵᠦ
ᠴᠡᠭᠬᠢᠵᠤ ᠠᠳᠠ ᠠᠮᠢᠳᠤᠷᠠᠭᠠ ᠦᠭᠡᠢ ᠪᠣᠯ ᠡᠰᠢ ᠦᠨᠳᠦᠰᠦᠨ ᠦ᠌ ᠴᠢᠨᠢ ᠦᠬᠦᠰᠢᠷᠡᠵᠦ ᠬᠠᠲᠠᠬᠤ ᠶ᠋ᠢ ᠴᠣᠬᠣᠮ ᠨᠢᠭᠡ ᠰᠠᠢᠨ ᠦᠵᠡᠨᠡ ᠳᠡ!》 ᠭᠡᠵᠦ ᠵᠢᠭᠠᠬᠠᠨ ᠬᠥᠪᠳᠥ ᠨᠦ᠍ᠭᠦᠳ ᠵᠡᠷᠭᠡᠪᠡᠷ ᠥᠨᠳᠡᠢᠵᠦ ᠬᠡᠯᠡᠪᠡ ᠭᠡᠨᠡ ᠃
ᠥᠩᠭᠡᠢᠭᠰᠡᠨ ᠬᠤᠰᠤ ᠢᠩᠭᠢᠭᠡᠳ ᠴᠠᠰᠢ ᠨᠢ ᠲᠠᠭ ᠪᠣᠯᠪᠠ ᠃
ᠪᠤᠰᠤᠳ ᠤ᠋ᠨ ᠰᠠᠢᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠬᠤᠰᠤ ᠴᠢ ᠳᠠᠬᠢᠭᠠᠳ ᠪᠡᠶᠡ ᠪᠡᠨ ᠭᠠᠢᠬᠠᠭᠤᠯᠤᠨᠠ ᠤᠤ?
ᠠᠯᠢᠮᠠ ᠶ᠋ᠢᠨ ᠮᠣᠳᠣ
《ᠠᠵᠢᠯ ᠬᠥᠳᠡᠯᠮᠦᠷᠢ ᠶ᠋ᠢ ᠴᠢ ᠬᠠᠶᠠᠬᠤ ᠦᠭᠡᠢ ᠪᠣᠯ
ᠠᠮᠢᠳᠤᠷᠠᠯ ᠴᠢᠮᠠᠶ᠋ᠢ ᠬᠠᠶᠠᠬᠤ ᠦᠭᠡᠢ 》ᠭᠡᠵᠦ
ᠠᠯᠢᠮᠠ ᠶ᠋ᠢᠨ ᠮᠣᠳᠣ ᠡᠵᠡᠨ ᠳ᠋ᠡᠭᠡᠨ ᠬᠡᠯᠡᠭᠡᠳ ᠪᠥᠵᠢᠭᠯᠡᠨᠡ ᠃
ᠠᠯᠠᠭ ᠪᠣᠯᠵᠣᠮᠣᠷ
《 ᠠᠶᠠᠲᠠᠢ ᠲᠠᠭᠠᠲᠠᠢ ᠠᠮᠢᠰᠬᠤᠭᠠ ᠯᠠ ᠲᠠᠯᠪᠢᠪᠠᠯ
ᠠᠶᠠᠯᠭᠤ ᠪᠠᠷ ᠢ᠋ᠶ᠋ᠠᠨ ᠴᠢᠮᠠᠶ᠋ᠢ ᠳᠦᠭᠦᠷᠭᠡᠨᠡ 》 ᠭᠡᠵᠦ
ᠠᠳᠬᠤ ᠳᠦᠭᠦᠷᠬᠦ ᠦᠭᠡᠢ ᠠᠯᠠᠭ ᠪᠣᠯᠵᠣᠮᠣᠷ ᠴᠤ᠌
ᠠᠭᠠᠷ ᠲᠡᠭᠷᠢ ᠳ᠋ᠦ᠍ ᠳᠠᠭᠤᠯᠠᠵᠤ ᠪᠠᠢᠨᠠ ᠃
ᠠᠪᠤᠭᠠᠢ ᠴᠢ ᠴᠢᠩᠨᠠ ᠁
ᠦᠷᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠴᠢᠷᠮᠠᠢᠨᠠ
ᠨᠠᠷᠠ ᠦᠵᠡᠬᠦ ᠶ᠋ᠢᠨ ᠲᠥᠯᠥᠭᠡ ᠨᠠᠪᠴᠢ ᠴᠢᠷᠮᠠᠢᠨᠠ ᠃
ᠨᠢᠯᠬᠠ ᠦᠷᠡ ᠶ᠋ᠢᠨ ᠲᠥᠯᠥᠭᠡ ᠴᠡᠴᠡᠭ ᠴᠢᠷᠮᠠᠢᠨᠠ ᠃
ᠡᠨᠡ ᠪᠦᠬᠦᠨ ᠦ᠌ ᠲᠥᠯᠥᠭᠡ ᠦᠨᠳᠦᠰᠦ ᠴᠢᠷᠮᠠᠢᠨᠠ ᠃
ᠦᠨᠳᠦᠰᠦ ᠵᠠᠯᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠦᠷᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠴᠢᠷᠮᠠᠢᠨᠠ ᠃
ᠨᠤᠲᠤᠭ ᠮᠢᠨᠢ
ᠬᠥᠨᠳᠡᠯᠡᠨ ᠭᠠᠵᠠᠷ ᠤ᠋ᠨ ᠬᠥᠮᠦᠨ ᠠᠮᠢᠲᠠᠨ ᠳ᠋ᠤ᠌
ᠬᠥᠯ ᠤᠯᠠ ᠶ᠋ᠢᠨ ᠰᠢᠷᠣᠢ ᠪᠣᠯᠪᠠᠴᠤ
ᠬᠦᠦ ᠨᠢ ᠪᠣᠯᠤᠭᠰᠠᠨ ᠨᠠᠳᠠ ᠳ᠋ᠠᠭᠠᠨ ᠪᠣᠯ
ᠬᠠᠯᠠᠭᠤᠬᠠᠨ ᠥᠯᠥᠭᠡᠢ ᠰᠢᠦ ᠨᠤᠲᠤᠭ ᠮᠢᠨᠢ ᠃