ᠨᠢᠮᠠ ᠶᠢᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ - 1 Нямын задгай шүлгүүд - 1
246ᠨᠢᠮᠠ ᠶᠢᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ - 1
ᠬᠠᠮᠤᠭ ᠤ᠋ᠨ ᠶᠡᠬᠡ ᠪᠠᠶᠠᠨ
᠁ᠦᠷᠡ ᠵᠢᠮᠢᠰ ᠦ᠋ᠨ ᠠᠷᠪᠢᠨ
ᠡᠵᠡᠨ ᠲᠣᠯᠣᠭᠠᠢ ᠶ᠋ᠢᠨ ᠣᠯᠠᠨ
ᠡᠬᠡᠰᠢᠭ ᠳᠠᠭᠤᠤ ᠶ᠋ᠢᠨ ᠦᠯᠡᠮᠵᠢ
ᠡᠨᠡᠷᠢᠯ ᠬᠠᠢᠷᠠ ᠶ᠋ᠢᠨ ᠵᠤᠵᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠠᠮᠢᠳᠤᠷᠠᠯ ᠢ᠋ ᠳᠠᠪᠠᠬᠤ ᠪᠠᠶᠠᠨ ᠭᠡᠵᠦ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠥᠭᠡᠷᠡ ᠨᠢᠭᠡᠴᠦ ᠦᠭᠡᠢ ᠃
ᠬᠥᠯ ᠢ᠋ᠶ᠋ᠡᠨ ᠬᠠᠵᠠᠭᠠᠢ ᠭᠢᠰᠬᠢᠬᠦ ᠦᠭᠡᠢ
ᠬᠥᠯᠥᠰᠥ ᠤᠷᠤᠰᠬᠠᠬᠤ ᠠ᠋ᠴᠠ ᠪᠠᠨ ᠠᠶᠤᠬᠤ ᠦᠭᠡᠢ ᠯᠡ ᠪᠣᠯ ᠂
ᠬᠦᠰᠡᠭᠰᠡᠨ ᠪᠦᠬᠦᠨ ᠢ᠋ᠶ᠋ᠡᠨ ᠪᠦᠷ ᠲᠡᠭᠦᠨ ᠡᠴᠡ ᠣᠯᠵᠤ ᠪᠣᠯᠤᠨᠠ!
ᠠᠮᠢᠳᠤᠷᠠᠯ
ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠬᠠᠮᠤᠭ ᠤ᠋ᠨ ᠬᠠᠷᠠᠮᠴᠢ ᠪᠠᠶᠠᠨ ᠭᠡᠪᠡᠯ ᠠᠮᠢᠳᠤᠷᠠᠯ ᠮᠥᠨ ᠃
ᠬᠠᠮᠤᠭ ᠤ᠋ᠨ ᠬᠠᠮᠤᠭ ᠤ᠋ᠨ ᠠᠮᠢᠨᠴᠢᠷ ᠦᠭᠡᠢ ᠪᠠᠶᠠᠨ ᠭᠡᠪᠡᠯ ᠪᠠᠰᠠᠴᠤ ᠠᠮᠢᠳᠤᠷᠠᠯ ᠮᠥᠨ ᠃
ᠶᠠᠭᠠᠬᠢᠭᠠᠳ ᠲᠡᠷᠡ ᠪᠣᠢ ?
ᠠᠯᠵᠠᠭᠤᠷᠠᠵᠤ ᠰᠠᠭᠤᠭᠴᠢᠳ ᠲᠤ᠌ ᠠᠯᠠᠭᠠᠨ ᠴᠢᠨᠡᠭᠡᠨ ᠠᠰᠢᠭ ᠴᠤ᠌ ᠬᠦᠷᠲᠡᠭᠡᠳᠡᠭ ᠦᠭᠡᠢ ᠃
ᠠᠵᠢᠯᠰᠠᠭ ᠵᠢᠳᠬᠦᠭᠴᠢᠳ ᠲᠦ᠍ ᠠᠮᠢᠳᠤ ᠡᠷᠳᠡᠨᠢ ᠪᠡᠨ ᠴᠦ᠍ ᠬᠠᠷᠠᠮᠠᠯᠲᠠᠭ ᠦᠭᠡᠢ ᠥᠭᠳᠡᠭ ᠶᠦ᠍ᠮ ᠰᠢᠦ ᠲᠡᠷᠡ ᠴᠢᠨᠢ !
ᠨᠣᠭᠣᠭᠠᠨ ᠤᠯᠠᠭᠠᠨ ᠨᠠᠰᠤᠨ ᠤ᠋ ᠰᠠᠢᠬᠠᠨ
ᠨᠠᠷᠠ ᠭᠡᠵᠦ ᠮᠠᠨᠳᠤᠭᠠᠳ ᠭᠡᠷᠡᠯ ᠢ᠋ᠶ᠋ᠡᠨ ᠬᠦᠷᠭᠡᠭᠰᠡᠨ ᠯᠡ ᠴᠠᠭ ᠲᠤ᠌
ᠨᠠᠪᠴᠢ ᠪᠢ ᠴᠦ᠍ ᠨᠣᠭᠣᠭᠠᠷᠠᠵᠤ ᠴᠢᠳᠠᠨᠠ ᠂
ᠴᠡᠴᠡᠭ ᠴᠢ ᠴᠦ᠍ ᠤᠯᠠᠯᠵᠠᠵᠤ ᠴᠢᠳᠠᠨᠠ ᠃
ᠨᠣᠭᠣᠭᠠᠨ ᠤᠯᠠᠭᠠᠨ ᠨᠠᠰᠤᠨ ᠤ᠋ ᠰᠠᠢᠬᠠᠨ ᠢ᠋
ᠨᠠᠷᠠᠯᠢᠭ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠲᠠᠯᠠ ᠳᠤᠮᠳᠠ ᠠ᠋ᠴᠠ ᠣᠯᠤᠭᠰᠠᠨ ᠰᠢᠦ ᠃
ᠬᠡᠵᠢᠶᠡ ᠴᠦ᠍ ᠪᠣᠯᠤᠭ ᠂
ᠨᠢᠭᠡ ᠪᠤᠲᠠᠨ ᠳ᠋ᠤ᠌ ᠤᠷᠭᠤᠵᠤ ᠨᠢᠭᠡᠯᠡ ᠰᠠᠯᠠᠭᠠᠨ ᠳ᠋ᠤ᠌ ᠳᠡᠯᠭᠡᠷᠡᠶᠡ ᠃
ᠲᠡᠭᠡᠴᠢᠪᠡᠯ ᠴᠢ ᠪᠢᠳᠡ ᠬᠣᠶᠠᠷ
ᠡᠨᠳᠡ ᠠ᠋ᠴᠠ ᠪᠠᠨ ᠶᠠᠭᠠᠬᠢᠪᠠᠴᠤ ᠬᠣᠯᠠᠳᠠᠬᠤ ᠦᠭᠡᠢ ᠂
ᠦᠰᠦᠨ ᠪᠣᠢᠵᠢᠵᠤ ᠡᠷᠡᠰᠢᠵᠦ ᠶᠠᠪᠤᠭᠠ ᠡᠵᠡᠨ ᠦ᠌ ᠪᠡᠨ
ᠳᠣᠪᠲᠣᠯᠤᠭᠠᠳ ᠭᠠᠷᠬᠤ ᠶ᠋ᠢ ᠨᠢ ᠦᠵᠡᠴᠢᠨᠡ
ᠳᠠᠭᠤᠯᠠᠭᠠᠳ ᠢᠷᠡᠬᠦ ᠶ᠋ᠢ ᠨᠢ ᠴᠦ᠍ ᠰᠣᠨᠣᠰᠴᠢᠨᠠ ᠁
ᠮᠢᠨᠦ ᠨᠤᠲᠤᠭ ᠤ᠋ᠨ ᠰᠠᠷᠠ
ᠤᠨᠠᠭᠰᠠᠨ ᠰᠢᠷᠣᠢ ᠮᠢᠨᠦ ᠨᠤᠲᠤᠭ ᠶᠠᠭᠤ ᠨᠢ ᠮᠠᠭᠤ ᠪᠣᠢ ?!
ᠠᠭᠤᠯᠠ ᠤᠰᠤ ᠪᠠᠷ ᠲᠡᠨᠳᠡᠬᠢ ᠡᠴᠡ ᠴᠢᠨᠢ ᠳᠤᠲᠠᠬᠤ ᠦᠭᠡᠢ ᠭᠣᠶᠣᠮᠰᠣᠭ ᠃
ᠤᠭ ᠦᠨᠳᠦᠰᠦ ᠠᠳᠠ ᠨᠡᠩ ᠪᠠᠲᠤ ᠃
ᠣᠨ ᠣᠨ ᠳ᠋ᠤ᠌ ᠤᠷᠭᠤᠵᠤ ᠨᠣᠭᠣᠭᠠᠷᠠᠵᠤ ᠴᠡᠴᠡᠭᠯᠡᠭᠰᠡᠭᠡᠷ ᠯᠡ ᠪᠠᠢᠨᠠ ᠃
ᠣᠷᠣᠢ ᠳᠡᠭᠡᠷᠡᠬᠢ ᠰᠠᠷᠠ ᠨᠢ ᠭᠡᠬᠦ ᠳ᠋ᠦ᠍ ᠲᠠᠨ ᠤ᠋ ᠬᠢ ᠡᠴᠡ ᠳᠣᠣᠷᠠ ᠦᠭᠡᠢ ᠲᠡᠷᠭᠡᠯ ᠃
ᠲᠡᠷᠭᠡᠯ ᠰᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠪᠢ ᠪᠣᠢᠵᠢᠭᠰᠠᠨ ––
ᠲᠥᠷᠥᠭᠰᠡᠨ ᠡᠮᠡᠭᠡ ᠮᠢᠨᠢ ᠲᠡᠭᠦᠨ ᠦ᠌ ᠳᠣᠣᠷᠠ ᠦᠯᠢᠭᠡᠷ ᠢ᠋ᠶ᠋ᠡᠷ ᠨᠠᠮᠠᠢ ᠲᠡᠵᠢᠭᠡᠭᠰᠡᠨ ᠁
ᠲᠡᠭᠡᠬᠦ ᠪᠡᠷ ᠢ᠋ᠶ᠋ᠡᠨ ᠪᠢ ᠲᠦᠮᠡᠨ ᠭᠠᠵᠠᠷ ᠬᠣᠯᠠᠳᠠᠪᠠᠴᠤ
ᠲᠤᠵᠢ ᠶ᠋ᠢᠨ ᠠᠭᠤᠯᠠ ᠶ᠋ᠢᠨ ᠣᠷᠭᠢᠯ ᠳ᠋ᠤ᠌ ᠳᠡᠭᠳᠡᠳᠡᠭ ᠰᠠᠷᠠ ᠪᠠᠨ ᠬᠡᠵᠢᠶᠡᠳᠡ ᠮᠠᠷᠲᠠᠬᠤ ᠦᠭᠡᠢ ᠶᠠᠪᠤᠳᠠᠭ ᠃
ᠭᠡᠷᠡᠯ ᠳ᠋ᠦ᠍ᠨᠢ ᠭᠡᠢᠭᠦᠯᠦᠭᠳᠡᠭᠰᠡᠨ ᠨᠢᠭᠡ ᠴᠢᠮᠬᠢ ᠰᠢᠷᠣᠢ ᠳᠡᠭᠡᠷᠡ ᠨᠢ ᠴᠦ᠍ ᠪᠤᠵᠠᠷ ᠬᠢᠮᠤᠰᠤ ᠪᠤᠤ ᠬᠥᠷᠥᠭ ᠭᠡᠵᠦ ᠯᠡ ᠰᠠᠨᠠᠳᠠᠭ ᠪᠢᠯᠡ ᠃
ᠰᠠᠷᠠ ᠲᠡᠷᠭᠡᠯ ᠪᠣᠯ ᠰᠡᠳᠬᠢᠯ ᠪᠠᠰᠠ ᠳᠦᠭᠦᠷᠡᠩ !
ᠵᠢᠷᠭᠠᠯ
ᠵᠢᠪᠠᠷ ᠰᠠᠯᠬᠢ ᠬᠠᠮᠢᠭᠠ ᠠ᠋ᠴᠠ ᠭᠠᠷᠪᠠᠴᠤ ᠳᠠᠭᠠᠭᠠᠳ ᠯᠠ ᠳᠡᠷᠪᠡᠯᠵᠡᠳᠡᠭ ᠬᠥᠯ ᠬᠥᠩᠭᠡᠨ ᠂ ᠬᠥᠨᠳᠡᠢ ᠬᠣᠭᠣᠰᠣᠨ ᠥᠳᠥ ᠰᠥᠳᠦᠨ ᠦ᠌ ᠨᠣᠣᠯᠣᠷ ᠪᠣᠯᠬᠤ ᠶ᠋ᠢ ᠪᠢ ᠬᠦᠰᠡᠬᠦ ᠦᠭᠡᠢ ᠃
ᠵᠢᠭᠠᠬᠠᠨ ᠴᠤ᠌ ᠭᠡᠰᠡᠨ ᠡᠰᠢ ᠲᠡᠢ ᠂ ᠮᠣᠳᠣ ᠲᠠᠢ ᠨᠠᠪᠴᠢ ᠪᠣᠯᠪᠠᠯ ᠪᠣᠯᠴᠢᠨᠡ ᠃
ᠢᠩᠭᠢᠴᠢᠬᠡᠪᠡᠯ ᠲᠠᠰᠤᠷᠠᠵᠤ ᠤᠨᠠᠪᠠᠴᠤ
ᠦᠨᠳᠦᠰᠦᠨ ᠳᠡᠷᠭᠡᠳᠡ ᠪᠡᠨ ᠤᠨᠲᠠᠵᠤ ᠬᠡᠪᠲᠡᠬᠦ ᠵᠠᠶᠠᠭᠠ ᠲᠠᠢ ᠪᠢᠰᠢ ᠦᠦ?
ᠳᠠᠬᠢᠭᠠᠳ ᠬᠡᠯᠡᠪᠡᠯ ᠳᠡᠯᠡᠬᠡᠢ ᠭᠡᠴᠦ ᠠᠭᠤᠵᠢᠮ ᠃
ᠳᠡᠯᠭᠡᠷᠡᠬᠦ ᠬᠠᠪᠤᠷ ᠲᠤ᠌ ᠳᠤᠷᠠᠲᠠᠢ ᠡᠴᠢᠭᠡ ᠡᠬᠡ ᠦᠷᠡ ᠬᠡᠦᠬᠡᠳ ᠮᠤᠩ ᠦᠭᠡᠢ ᠣᠯᠠᠨ ᠃
ᠴᠡᠴᠡᠭ ᠬᠤᠸᠠᠷ ᠰᠣᠨᠢᠷᠬᠠᠨᠠ ᠭᠡᠳ ᠴᠤᠪᠤᠷᠠᠯᠳᠤᠵᠤ ᠢᠷᠡᠬᠦ ᠨᠢ ᠴᠦ᠍ ᠠᠷᠪᠢᠨ ᠃
ᠵᠠᠳᠠᠷᠠᠬᠤ ᠴᠡᠴᠡᠭ ᠦ᠋ᠨ ᠳᠡᠪᠢᠰᠬᠡᠷ ᠪᠣᠯᠵᠤ ᠨᠣᠭᠣᠭᠠᠷᠠᠭᠠᠳ ᠵᠤᠭᠠᠴᠠᠵᠤ ᠢᠷᠡᠭᠰᠡᠨ ᠲᠡᠷᠡ ᠠᠷᠪᠢᠨ ᠢ᠋ ᠪᠠᠶᠠᠰᠬᠠᠵᠤ ᠶᠠᠪᠤᠬᠤ ᠨᠢ ᠨᠠᠳᠠ ᠲᠡᠷᠡ ᠴᠢᠨᠢ ᠵᠢᠷᠭᠠᠯ !
ᠠᠯᠢ ᠨᠢ ᠪᠣᠯᠪᠠᠯ ᠲᠠᠭᠠᠷᠠᠬᠤ ᠪᠣᠢ ?
ᠬᠠᠢᠷᠠ ᠭᠡᠵᠦ ᠵᠢᠷᠦᠬᠡᠨ ᠳ᠋ᠦ᠍ ᠡᠬᠢ ᠲᠡᠢ
ᠬᠡᠨ ᠳ᠋ᠦ᠍ ᠴᠦ᠍ ᠪᠦᠷ ᠪᠠᠢᠳᠠᠭ ᠤᠨᠳᠤᠷᠤᠮᠠᠯ ᠃
ᠠᠯᠢ ᠲᠣᠬᠢᠲᠠᠢ ᠴᠠᠭ ᠬᠥᠭ ᠢ᠋ᠶ᠋ᠡᠨ ᠣᠯᠤᠭᠰᠠᠭᠠᠷ ᠯᠠ
ᠬᠠᠯᠭᠢᠯᠠᠨᠠ ᠭᠡᠪᠡᠯ ᠬᠠᠯᠬᠢᠯᠠᠴᠢᠨᠡ
ᠴᠠᠯᠭᠢᠯᠠᠨᠠ ᠭᠡᠪᠡᠯ ᠴᠠᠯᠭᠢᠯᠠᠴᠢᠨᠡ
ᠬᠠᠯᠠᠨᠠ ᠭᠡᠪᠡᠯ ᠬᠠᠯᠠᠴᠢᠨᠡ
ᠪᠤᠴᠠᠯᠤᠨᠠ ᠭᠡᠪᠡᠯ ᠪᠣᠴᠠᠯᠴᠢᠨᠡ ᠃
ᠭᠡᠪᠡᠴᠦ ᠲᠡᠭᠦᠨ ᠳ᠋ᠦ᠍ ᠣᠷᠣᠭᠠ ᠰᠠᠷᠠᠯ ᠰᠢᠬ
ᠬᠠᠯᠢᠰᠬᠢᠵᠦ ᠨᠠᠳᠬᠤᠬᠤ
ᠣᠢᠵᠤ ᠡᠢᠯᠬᠦ ᠰᠢᠷᠦᠭᠦᠨ ᠵᠠᠩ ᠲᠠᠢ ᠲᠤᠯᠠ
ᠪᠣᠭᠣᠯ ᠨᠢ ᠪᠣᠯᠵᠤ ᠪᠥᠬᠥᠯᠵᠡᠨ ᠶᠠᠪᠤᠬᠤ ᠬᠥᠮᠦᠨ ᠴᠦ᠍ ᠪᠠᠢᠨᠠ ᠃
ᠡᠵᠡᠨ ᠨᠢ ᠪᠣᠯᠵᠤ ᠭᠡᠳᠡᠯᠵᠡᠨ ᠶᠠᠪᠤᠬᠤ ᠬᠥᠮᠦᠨ ᠴᠦ᠍ ᠪᠠᠢᠨᠠ ᠃
ᠰᠡᠳᠬᠢᠯ ᠦ᠋ᠨ ᠬᠠᠢᠷᠠ ᠪᠠᠨ ᠨᠢᠭᠡᠨᠲᠡ ᠪᠤᠴᠠᠯᠭᠠᠭᠰᠠᠨ ᠳᠡᠭᠦᠦ ᠮᠢᠨᠢ ᠴᠢ ᠬᠡᠯᠡᠪᠡᠯ ᠂
ᠡᠨᠡ ᠬᠣᠶᠠᠷ ᠤ᠋ᠨ ᠠᠯᠢ ᠨᠢ ᠪᠣᠯᠪᠠᠯ ᠲᠠᠭᠠᠷᠠᠨᠠ ᠪᠣᠢ ?
ᠰᠢᠭᠦᠳᠡᠷᠢ ᠶ᠋ᠢᠨ ᠳᠤᠰᠤᠯ ᠬᠡᠯᠡᠵᠦ ᠪᠠᠢᠨᠠ᠁ ᠁
ᠬᠥᠬᠡ ᠳᠠᠯᠠᠢ ᠶ᠋ᠢᠨ ᠳᠡᠷᠭᠡᠳᠡ ᠪᠣᠯ ᠳᠤᠰᠤᠯ ᠲᠡᠳᠦᠢ ᠵᠢᠭᠠᠬᠠᠨ ᠭᠡᠳ
ᠬᠠᠯᠳᠠᠵᠤ ᠴᠢ ᠦᠵᠡᠬᠦ ᠦᠭᠡᠢ ᠦᠦ?
ᠬᠡᠨ ᠬᠠᠯᠳᠠᠪᠠᠯ ᠲᠡᠭᠦᠨ ᠲᠡᠢ
ᠬᠠᠮᠤᠭ ᠪᠡᠶᠡ ᠪᠡᠨ ᠬᠠᠮᠬᠠᠷᠠᠲᠠᠯᠠ ᠦᠵᠡᠯᠴᠡᠬᠦ
ᠬᠠᠯᠠᠭᠤᠨ ᠴᠢᠰᠤ ᠪᠠᠨ ᠨᠡᠯᠦᠢᠲᠡᠯᠡ ᠤᠷᠤᠰᠬᠠᠬᠤ ᠵᠣᠷᠢᠭ ᠨᠠᠳᠠ ᠪᠠᠢᠨᠠ !
ᠦᠳᠡᠰᠢ ᠪᠣᠯᠪᠠᠯ ᠨᠠᠪᠴᠢᠨ ᠳᠡᠭᠡᠷᠡ ᠨᠣᠢᠷ ᠠᠪᠤᠭᠠᠳ ᠂
ᠥᠷᠯᠥᠭᠡ ᠪᠣᠰᠪᠠᠯ ᠨᠠᠷᠠᠨ ᠲᠡᠭᠷᠢ ᠪᠡᠷ ᠴᠢᠮᠠ ᠠ᠋ᠴᠠ ᠬᠣᠯᠠ ᠠᠶᠠᠯᠠᠳᠠᠭ ᠰᠢᠦ ᠪᠢ ᠃
ᠢᠩᠭᠢᠬᠦ ᠳ᠋ᠦ᠍ ᠬᠠᠷᠢᠨ ᠴᠢ ᠨᠠᠮᠠᠶ᠋ᠢ
ᠤᠨᠠᠴᠢᠯᠠ ᠭᠡᠵᠦ ᠬᠡᠯᠡᠳᠡᠭ ᠂
ᠠᠷᠢᠯᠴᠢᠯᠠ ᠭᠡᠵᠦ ᠪᠠᠶᠠᠰᠳᠠᠭ ᠁
ᠨᠠᠪᠴᠢᠨ ᠳ᠋ᠤ᠌ ᠬᠣᠨᠣᠭ ᠲᠠᠢ ᠮᠢᠨᠦ ᠪᠢᠴᠢᠬᠠᠨ ᠴᠡᠭᠡᠵᠢᠨ ᠳᠣᠲᠣᠷᠠ
ᠰᠠᠷᠠᠨ ᠪᠥᠮᠪᠥᠷᠴᠡᠭ ᠬᠠᠨᠢ ᠪᠣᠯᠵᠤ ᠳᠤᠯᠠᠢᠳᠠᠭ
ᠡᠦᠲᠦᠨ ᠭᠠᠷᠠᠭ ᠴᠢ ᠪᠦᠷ ᠢᠷᠡᠭᠡᠳ ᠭᠢᠯᠠᠯᠵᠠᠳᠠᠭ ᠃
ᠠᠰᠠᠷ ᠲᠤ᠌ ᠣᠷᠣ ᠲᠠᠢ ᠠᠪᠤᠭᠠᠢ ᠴᠢᠨᠦ ᠵᠡᠭᠦᠳᠦᠨ ᠳ᠋ᠦ᠍ ᠂
ᠤᠨᠲᠠᠵᠤ ᠪᠠᠢᠭᠠ ᠠᠪᠠᠭᠠᠢ ᠶ᠋ᠢ ᠴᠢᠨᠢ ᠭᠠᠷᠭᠠᠪᠠᠯ ᠥᠭᠡᠷᠡ ᠶᠠᠭᠤ ᠶᠠᠭᠤ ᠬᠠᠨᠢ ᠪᠣᠯᠵᠤ ᠢᠷᠡᠳᠡᠭ ᠪᠣᠢ ?