ᠮᠣᠩᠭᠣᠯ- ᠴᠣᠢᠨᠣᠮ-ᠲ ᠲᠦᠪᠰᠢᠠᠠᠮᠤᠭᠤᠯᠠᠩМонгол-чойном-т түвшигмгалан-т түвшинамгалан
1437ᠮᠣᠩᠭᠣᠯ- ᠲ ᠲᠦᠪᠰᠢᠠᠠᠮᠤᠭᠤᠯᠠᠩ
ᠷ ᠴᠣᠢᠨᠣᠮ
ᠮᠣᠩᠭᠣᠯ ᠭᠡᠳᠡᠭ
ᠵᠣᠷᠢᠭᠲᠠᠨ ᠡᠷᠡᠴᠦᠳ ᠨᠢ
ᠵᠣᠳᠣᠭᠣᠨ ᠳᠡᠭᠡᠷᠡ ᠥᠰᠴᠦ
ᠵᠣᠭᠰᠣᠭᠠ ᠪᠠᠷ ᠢᠶᠠᠨ ᠨᠥᠭᠴᠢᠳᠡᠭ
ᠵᠣᠷᠢᠮᠠᠭ ᠰᠠᠢᠬᠠᠨ ᠡᠬᠡ ᠣᠷᠣᠨ!
ᠮᠣᠩᠭᠣᠯ ᠭᠡᠳᠡᠭ
ᠰᠠᠷᠠᠨ ᠭᠤᠸᠠ
ᠰᠠᠭᠠᠯᠢᠴᠢᠨ ᠥᠬᠢᠳ ᠨᠢ
ᠰᠠᠯᠬᠢᠨ ᠳᠤ ᠪᠣᠷᠣᠯᠠᠭᠰᠠᠨ
ᠰᠠᠢᠬᠠᠨ ᠡᠬᠡ ᠣᠷᠣᠨ!
ᠮᠣᠩᠭᠣᠯ ᠭᠡᠳᠡᠭ
ᠲᠩᠷᠢ ᠨᠢ ᠴᠡᠯᠮᠡᠭ
ᠲᠡᠭᠰᠢ ᠲᠠᠯᠠ ᠨᠢ ᠴᠡᠯᠡᠭᠡᠷ
ᠲᠡᠨᠳᠡ ᠰᠠᠭᠤᠭᠴᠢᠳ ᠨᠢ ᠴᠡᠮᠴᠡᠭᠡᠷ
ᠲᠢᠪ ᠳᠡᠯᠡᠬᠡᠢ ᠳᠦ ᠬᠣᠣᠰ ᠦᠭᠡᠢ ᠰᠠᠢᠬᠠᠨ ᠡᠬᠡ ᠣᠷᠣᠨ!
ᠮᠣᠩᠭᠣᠯ ᠭᠡᠳᠡᠭ
ᠠᠭᠤᠯᠠ ᠨᠢ ᠥᠨᠳᠦᠷ
ᠤᠷᠭᠤᠴᠠ ᠨᠢ ᠥᠳᠬᠡᠨ
ᠤᠷᠤᠰᠬᠠᠯ ᠨᠢ ᠲᠤᠩᠭᠠᠯᠠᠭ
ᠠᠭᠤᠵᠢᠮ ᠰᠠᠢᠬᠠᠨ ᠡᠬᠡ ᠣᠷᠣᠨ!
ᠮᠣᠩᠭᠣᠯ ᠤᠨ ᠳᠠᠭᠤᠤ ᠭᠡᠪᠡᠯ
ᠮᠣᠲ᠋ᠣᠷ ᠤᠨ ᠳᠠᠭᠤ ᠪᠢᠰᠢ ᠡ!
ᠮᠣᠷᠢᠲᠠᠨ ᠵᠠᠯᠠᠭᠤᠰ ᠢ ᠤᠶᠠᠷᠠᠭᠠᠭᠰᠠᠨ
ᠮᠣᠢᠯ ᠬᠠᠷᠠ ᠨᠢᠳᠦᠲᠡᠨ ᠨᠦᠭᠦᠳ ᠤᠨ ᠳᠠᠭᠤᠤ ᠶᠢ ᠮᠣᠩᠭᠣᠯ ᠭᠡᠳᠡᠭ ᠶᠤᠮ
ᠮᠣᠩᠭᠣᠯ ᠤᠨ ᠳᠤᠷᠠᠰᠬᠠᠯ ᠭᠡᠪᠡᠯ
ᠮᠥᠩᠭᠥᠨ ᠪᠣᠷᠣᠨᠵᠠ ᠲᠠᠢ ᠴᠤᠬᠤᠢ ᠶᠢᠨ ᠪᠠᠷᠢᠮᠠᠯ ᠪᠢᠰᠢ ᠡ!
ᠮᠥᠷ ᠨᠢ ᠪᠠᠯᠠᠷᠠᠭᠠ ᠦᠭᠡᠢ ᠴᠤᠪᠤᠭᠠᠨ ᠤ ᠵᠠᠮ ᠳᠡᠭᠡᠷᠡ
ᠮᠥᠩᠬᠡᠵᠢᠨ ᠦᠯᠡᠳᠡᠭᠰᠡᠨ ᠬᠦᠮᠦᠨ ᠴᠢᠯᠠᠭᠤ ᠶᠢ ᠬᠡᠯᠡᠳᠡᠭ ᠶᠤᠮ
ᠡᠬᠡ ᠣᠷᠣᠨ ᠤ ᠮᠢᠨᠢ ᠠᠭᠤᠵᠢᠮ ᠳᠤ ᠨᠢᠳᠦ ᠪᠡᠨ ᠪᠡᠯᠴᠢᠭᠡᠬᠦ ᠭᠡᠵᠦ
ᠢᠰᠡᠭᠡᠢ ᠭᠡᠷ ᠤᠨ ᠮᠢᠨᠢ ᠬᠣᠢᠮᠣᠷ ᠲᠤ ᠢᠳᠡᠭᠡ ᠵᠣᠭᠣᠭᠯᠠᠬᠤ ᠭᠡᠵᠦ
ᠡᠷᠲᠡᠨ ᠤ ᠧᠦ᠋ᠷᠣᠫᠠ ᠶᠢᠨ ᠡᠷᠡᠲᠡᠢ᠂ ᠵᠣᠷᠢᠭᠲᠠᠢ ᠵᠢᠭᠤᠯᠴᠢᠳ
ᠡᠯᠡᠰᠦᠨ ᠴᠥᠯ ᠢᠶᠠᠷ ᠨᠢ ᠠᠩᠭᠠᠵᠤ ᠶᠠᠪᠤᠭᠰᠠᠨ ᠮᠥᠷ ᠪᠤᠢ
ᠬᠥᠮᠦᠨ ᠦᠭᠡᠢ ᠶᠤᠮ ᠰᠢᠭ ᠥᠩᠭᠡᠢᠭᠰᠡᠨ ᠮᠠᠨᠵᠤ ᠳᠠᠢᠴᠢᠨ ᠤᠯᠤᠰ ᠤᠨ
ᠬᠦᠷᠢᠶᠡ ᠨᠢ ᠪᠢᠲᠡᠭᠦᠦ ᠬᠠᠷᠠ ᠬᠢᠯᠢᠩ ᠮᠠᠯᠠᠭᠠᠢ
ᠬᠥᠯᠥᠭ ᠮᠣᠷᠢᠨ ᠤ ᠲᠣᠭᠣᠰᠣᠨ ᠳᠤᠮᠳᠠ ᠲᠣᠯᠣᠭᠠᠢ ᠲᠠᠢ ᠪᠠᠨ
ᠬᠢᠯᠢ ᠶᠢᠨ ᠣᠪᠣᠭᠠᠨ ᠤ ᠪᠡᠯ ᠳᠦ ᠥᠩᠬᠥᠷᠢᠵᠦ ᠤᠨᠠᠭᠰᠠᠨ ᠮᠥᠷ ᠪᠤᠢ
ᠡᠨᠡ ᠴᠢᠨᠢ ᠡᠵᠡᠨ ᠲᠡᠢ᠂ ᠡᠵᠡᠨ ᠨᠢ ᠡᠷᠡ ᠲᠡᠢ ᠴᠢᠳᠠᠯ ᠲᠠᠢ
ᠡᠷᠲᠡᠨ ᠡᠴᠡ ᠪᠡᠨ ᠡᠴᠢᠭᠡ ᠲᠡᠢ᠂ ᠡᠪᠦᠭᠡ ᠲᠡᠢ᠂
ᠬᠠᠳᠠᠨ ᠳᠡᠭᠡᠷᠡ ᠪᠡᠨ ᠪᠢᠴᠢᠭ ᠲᠡᠢ ᠬᠠᠳᠠᠭ ᠤᠨ ᠳᠡᠭᠡᠷᠡ ᠪᠡᠨ ᠢᠷᠦᠭᠡᠯ ᠲᠡᠢ᠂
ᠬᠠᠮᠢᠭᠠ ᠨᠢ ᠴᠤ᠌ ᠮᠣᠩᠭᠣᠯ ᠯᠠ ᠭᠡᠳᠡᠭ ᠨᠡᠷᠡ ᠲᠡᠢ ᠬᠠᠨᠠᠭᠠᠷ ᠡᠬᠡ ᠣᠷᠣᠨ ᠰᠢᠦ
ᠪᠥᠮᠪᠥᠷᠴᠡᠭ ᠮᠢᠨᠢ ᠴᠢ᠂ ᠬᠣᠶᠠᠷ ᠬᠥᠮᠦᠨ ᠢᠶᠠᠷ ᠬᠥᠲᠦᠯᠦᠭᠦᠯᠦᠭᠰᠡᠨ
ᠪᠥᠭᠡᠷᠡ ᠠᠯᠠᠭ ᠦᠨᠢᠶᠡ ᠰᠢᠭ ᠭᠠᠢᠬᠠᠩᠬᠠᠨ ᠵᠣᠭᠰᠣᠬᠤ ᠳᠤ ᠪᠠᠨ
ᠪᠦᠬᠦᠩ ᠲᠦᠷᠭᠡᠨ ᠭᠦᠶᠦᠳᠡᠯ ᠲᠡᠢ ᠵᠢᠵᠢᠭ ᠮᠣᠷᠢ ᠪᠠᠨ ᠰᠣᠢᠵᠤ
ᠪᠥᠬᠥᠰᠢ ᠦᠭᠡᠢ ᠭᠠᠯ ᠤᠨ ᠳᠡᠷᠭᠡᠳᠡ ᠬᠦᠷᠡᠯ ᠨᠢᠭᠤᠷ ᠨᠢ ᠭᠡᠢᠵᠦ
ᠪᠥᠭᠡ ᠮᠥᠷᠭᠥᠯ ᠤᠨ ᠠᠶᠠ ᠠᠴᠠ ᠬᠦᠴᠦᠲᠦ ᠢᠯᠳᠦ ᠪᠡᠨ ᠳᠠᠯᠠᠢᠭᠰᠠᠨ
ᠪᠥᠨᠲᠥᠭᠡᠷ ᠲᠣᠯᠣᠭᠠᠢᠲᠤ ᠮᠣᠩᠭᠣᠯ ᠬᠦᠮᠦᠨ ᠤ ᠲᠤᠬᠠᠢ ᠰᠣᠨᠣᠰᠤᠭᠰᠠᠨ ᠤᠤ
ᠠᠬᠤᠢ ᠪᠠᠶᠠᠨ ᠪᠠᠢᠭᠠᠯᠢ ᠳᠤ ᠪᠠᠨ ᠡᠵᠡᠨ ᠬᠦᠮᠦᠨ ᠰᠢᠭ ᠰᠡᠯᠡᠭᠦᠴᠡᠵᠦ
ᠠᠭᠠᠷ ᠤᠰᠤᠨ ᠤ ᠲᠤᠩᠭᠠᠯᠠᠭ ᠳᠤ ᠪᠠᠨ ᠡᠷᠡᠭᠦᠯ ᠴᠢᠭᠢᠷᠠᠭ ᠥᠰᠴᠠᠭᠡᠵᠦ
ᠠᠯᠲᠠᠨ ᠲᠠᠯᠠ ᠶᠢ ᠠᠯᠳᠠᠯᠠᠭᠰᠠᠨ ᠤᠷᠲᠤ ᠶᠢᠨ ᠳᠠᠭᠤᠤ ᠪᠠᠨ ᠵᠣᠬᠢᠶᠠᠵᠤ
ᠠᠶᠤᠯᠲᠤ ᠪᠡᠷᠬᠡ ᠶᠢ ᠳᠠᠯᠳᠠᠯᠠᠭᠰᠠᠨ ᠤᠷᠢᠳᠤ ᠶᠢᠨ ᠲᠡᠦᠬᠡ ᠪᠡᠨ ᠪᠦᠲᠦᠭᠡᠵᠦ
ᠠᠷᠠᠨᠵᠠᠯ ᠤᠯᠠᠭᠠᠨ ᠭᠠᠯ ᠤᠨ ᠱᠠᠰᠢᠷᠯᠠᠵᠤ ᠪᠠᠢᠭᠠ ᠳᠥᠯᠥ ᠰᠢᠭ
ᠠᠰᠠᠨ ᠳᠦᠷᠡᠯᠵᠡᠭᠰᠡᠨ ᠰᠡᠳᠬᠢᠯ ᠲᠡᠢ ᠨᠡᠭᠦᠲᠡᠯᠴᠢᠨ ᠣᠮᠤᠭ ᠢ ᠲᠤᠭᠤᠯᠤᠭᠰᠠᠨ ᠤᠤ
ᠠᠷᠪᠠᠨ ᠪᠠᠷᠠ ᠶᠢᠨ ᠭᠠᠵᠠᠷ ᠠᠴᠠ ᠤᠷᠤᠯᠳᠤᠬᠤ ᠮᠣᠷᠢᠳ ᠤᠨ ᠲᠤᠭᠤᠷᠠᠢ
ᠠᠯᠳᠠᠯᠠᠨ ᠲᠠᠯᠪᠢᠬᠤ ᠰᠤᠮᠤᠨ ᠤ ᠣᠨᠣᠭᠠ ᠲᠠᠭᠤᠳᠠᠬᠤ ᠴᠤᠤᠷᠠᠢ
ᠠᠭᠠᠷᠤ ᠽᠠᠨᠳᠠᠨ ᠬᠠᠰᠢᠯᠭᠠᠨ ᠠᠴᠠ ᠨᠢᠰᠬᠦ ᠰᠤᠮᠤᠨ ᠤ ᠤᠤᠬᠠᠢ
ᠠᠰᠠᠷ ᠤᠨ ᠡᠮᠦᠨᠡ ᠳᠡᠪᠢᠬᠦ ᠬᠦᠴᠦᠲᠦ ᠪᠥᠬᠡ ᠶᠢᠨ ᠭᠤᠩᠰᠢᠨ
ᠠᠯᠠᠭ ᠯᠢᠮᠪᠦ ᠲᠡᠢ ᠬᠣᠷᠰᠢᠬᠤ ᠬᠣᠨᠢᠴᠢᠨ ᠪᠦᠰᠡᠭᠦᠢ ᠶᠢᠨ ᠬᠣᠭᠣᠯᠠᠢ
ᠠᠢᠷᠠᠭ ᠤᠨ ᠰᠦᠩ ᠤᠨ ᠳᠡᠷᠭᠡᠳᠡᠬᠢ ᠬᠤᠸᠠ ᠳᠡᠮᠪᠡᠭᠡ ᠶᠢ ᠰᠣᠨᠣᠰᠤᠭᠰᠠᠨ ᠤᠤ
ᠦᠭᠡᠢ ᠪᠢᠵᠡ ᠳ᠋ᠡ! ᠪᠥᠮᠪᠥᠷᠴᠡᠭ ᠮᠢᠨᠢ!ᠪᠥᠮᠪᠥᠷᠴᠡᠭ ᠮᠢᠨᠢ!
ᠦᠶᠡ ᠴᠠᠭ ᠤᠨ ᠰᠢᠭᠤᠷᠭᠠᠨ ᠳᠤ ᠴᠡᠴᠡᠷᠡᠨ ᠳᠠᠭᠵᠢᠨ ᠡᠷᠭᠢᠵᠦ
ᠦᠬᠡᠷ ᠫᠤᠤ ᠶᠢᠨ ᠳᠠᠭᠤᠨ ᠳᠤ ᠴᠢᠬᠢᠨ ᠤ ᠬᠢᠨᠢ ᠬᠡᠩᠭᠡᠷᠭᠡ ᠬᠠᠭᠠᠷᠠᠵᠤ
ᠦᠢᠮᠡᠭᠡᠨ ᠶᠡᠬᠡᠲᠡᠢ ᠧᠦ᠋ᠷᠣᠫᠠ ᠶᠢᠨ ᠦᠭᠡᠨ ᠳᠦ ᠬᠠᠶᠠ ᠬᠠᠭᠤᠷᠲᠠᠵᠤ
ᠦᠰᠦᠷᠦᠨ ᠳᠡᠭᠳᠡᠬᠦ ᠫᠤᠤᠵᠢᠩ ᠤᠨ ᠦᠨᠡᠰᠦᠨ ᠳᠦ ᠬᠠᠶᠠ ᠪᠤᠯᠠᠭᠤᠯᠵᠤ
ᠦᠢᠯᠡ ᠶᠢᠨ ᠦᠷᠡ ᠲᠡᠢ ᠪᠥᠮᠪᠥᠷᠴᠡᠭ ᠮᠢᠨᠢ ᠡᠷᠭᠢᠵᠦ ᠬᠥᠷᠪᠡᠵᠦ ᠪᠠᠢᠨᠠ ᠤᠤ ᠳ᠋ᠠ
ᠲᠡᠭᠡᠪᠡᠯ ᠮᠣᠩᠭᠣᠯ ᠤᠨ ᠲᠤᠬᠠᠢ ᠰᠣᠨᠣᠰ!
ᠲᠡᠷᠡ ᠴᠢᠨᠢ ᠡᠨᠳᠡ ᠪᠠᠢᠨᠠ
ᠲᠡᠨᠢᠭᠡᠷᠬᠡᠨ ᠲᠠᠯᠠ ᠠ᠋ᠴᠠ ᠨᠢ ᠤᠷᠭᠤᠵᠤ ᠲᠦᠷᠦᠭᠰᠡᠨ
ᠲᠡᠨᠡᠭᠬᠡᠨ ᠬᠦᠦ ᠨᠢ ᠰᠢᠯᠦᠭᠯᠡᠬᠦ ᠭᠡᠵᠦ ᠪᠠᠢᠨᠠ᠂ ᠰᠣᠨᠣᠰ!
ᠠᠷᠠᠳ ᠲᠦᠮᠡᠨ ᠲᠡᠦᠬᠡ ᠬᠣᠶᠠᠷ ᠢᠶᠠᠨ
ᠠᠯᠳᠠᠩᠬᠠᠨ ᠥᠯᠥᠭᠡᠢ ᠨᠤᠲᠤᠭ ᠢᠶᠠᠨ
ᠠᠯᠳᠠᠷᠰᠢᠭᠤᠯᠤᠨ ᠮᠠᠭᠲᠠᠬᠤ ᠭᠡᠵᠦ
ᠠᠯᠠᠭ ᠦᠷᠡ ᠨᠢ ᠪᠣᠯᠵᠤ ᠲᠥᠷᠥᠯᠡ ᠪᠢ
ᠰᠣᠯᠣᠭᠠᠢ ᠪᠤᠷᠤᠭᠤ ᠦᠭᠡ ᠨᠤᠭᠦᠳ ᠢᠶᠠᠷ ᠲᠥᠷᠥ ᠶ᠋ᠢ ᠪᠠᠷᠢᠳᠠᠭ ᠴᠤᠤᠷᠬᠠᠯ
ᠰᠣᠨᠢᠨ ᠰᠤᠷᠪᠤᠯᠵᠢᠯᠠᠭᠴᠢ ᠪᠦᠬᠦᠨ ᠤ ᠦᠢᠯᠡᠰ ᠮᠠᠭᠲᠠᠳᠠᠭ ᠦᠭᠡᠰ
ᠰᠣᠬᠣᠷ ᠤᠯᠠᠭᠠᠨ ᠵᠣᠭᠣᠰᠤᠨ ᠤ ᠴᠤ᠌ ᠦᠨᠡ ᠦᠭᠡᠢ ᠪᠠᠢᠬᠤ ᠳᠤ ᠪᠢᠳᠡ
ᠰᠣᠭᠣᠲᠣᠩ ᠴᠢᠬᠢᠲᠡᠢ ᠮᠣᠷᠢᠳ ᠢᠶᠠᠷ ᠢᠶᠠᠨ ᠲᠡᠩᠭᠢᠰ ᠳᠠᠯᠠᠢ ᠶᠢ ᠬᠠᠷᠠᠢᠵᠤ
ᠰᠣᠶᠣᠮᠪᠣ ᠦᠰᠦᠭ ᠲᠡᠢ ᠲᠤᠭ ᠢᠶᠠᠷ ᠢᠶᠠᠨ ᠳᠠᠶᠠᠩ ᠳᠡᠯᠡᠬᠡᠢ ᠶᠢ ᠰᠡᠷᠡᠭᠡᠵᠦ
ᠰᠣᠩᠭᠢᠨᠠ ᠶᠢᠨ ᠰᠣᠶᠣᠭᠠ ᠬᠡᠯᠪᠡᠷᠢᠳᠦ ᠡᠪᠡᠷ ᠨᠤᠮᠤ ᠪᠠᠨ ᠭᠠᠢᠬᠠᠭᠤᠯᠤᠭᠰᠠᠨ ᠶᠤᠮ
ᠬᠣᠵᠢᠮ ᠨᠢ ᠲᠡᠷᠡ ᠨᠤᠮᠤᠨ ᠤ ᠬᠥᠪᠴᠢ᠂ ᠬᠦᠴᠦ ᠶᠢ ᠨᠢ ᠬᠡᠮᠵᠢᠵᠦ
ᠬᠣᠯᠠ ᠶᠢᠨ ᠬᠣᠯᠠ ᠳᠤ ᠲᠤᠰᠬᠤ ᠰᠤᠮᠤ ᠶᠠᠭᠤ ᠶ᠋ᠢ ᠨᠢ ᠰᠢᠨᠵᠢᠵᠦ
ᠬᠣᠢᠲᠤ ᠣᠷᠣᠨ ᠤ ᠮᠡᠷᠭᠡᠨ ᠴᠠᠯ ᠪᠤᠭᠤᠷᠤᠯ ᠴᠢᠶᠦᠯᠺᠦᠸᠰᠺᠢ
ᠬᠣᠷᠢᠨ ᠬᠡᠳᠦᠨ ᠵᠢᠯ ᠤᠨ ᠴᠤᠤᠲᠤ ᠠᠵᠢᠯ ᠢᠶᠠᠨ ᠦᠯᠡᠳᠡᠭᠡᠵᠦ
ᠬᠣᠯᠪᠣᠭᠠᠲᠤ ᠣᠷᠣᠰ ᠤᠯᠤᠰ ᠲᠡᠭᠦᠨ ᠤ ᠭᠡᠷᠢᠶᠡᠰ ᠢ ᠪᠡᠶᠡᠯᠡᠭᠦᠯᠵᠦ
ᠬᠣᠲᠠᠯᠠ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠭᠠᠭᠠᠷᠢᠨ ᠬᠦᠦ ᠪᠡᠨ ᠮᠠᠨᠳᠤᠭᠤᠯᠤᠭᠰᠠᠨ ᠶᠤᠮ
ᠮᠣᠩᠭᠣᠯ ᠭᠡᠵᠦ
ᠪᠠᠢᠭᠰᠠᠨ ᠴᠤ᠌ ᠶᠤᠮ ᠤᠤ ᠪᠠᠢᠭᠠ ᠴᠤ᠌ ᠶᠤᠮ ᠤᠤ
ᠪᠠᠢᠬᠤ ᠴᠤ᠌ ᠶᠤᠮ ᠤᠤ ᠭᠡᠵᠦ ᠪᠠᠷᠠᠭᠤᠨ ᠤ ᠬᠢᠨᠢ ᠶᠠᠷᠢᠳᠠᠭ᠂ ᠣᠢᠯᠠᠭᠠᠳᠠᠭ
ᠲᠡᠭᠡᠪᠡᠯ ᠲᠡᠷᠡ ᠮᠣᠩᠭᠣᠯ ᠭᠡᠳᠡᠭ ᠴᠢᠨᠢ
ᠪᠠᠢᠭᠰᠠᠨ ᠶᠤᠮ᠂ ᠪᠠᠢᠭᠠ ᠶᠤᠮ
ᠪᠠᠢᠯᠭᠠᠬᠤ ᠴᠤ᠌ ᠭᠡᠵᠦ ᠪᠢᠳᠡ ᠪᠠᠢᠭᠤᠯᠤᠭᠰᠠᠨ ᠶᠤᠮ
ᠪᠠᠢᠭᠤᠯᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠬᠠᠳᠤᠭᠤᠯᠤᠭᠰᠠᠨ ᠶᠤᠮ
ᠪᠠᠢᠬᠤ ᠪᠠᠢᠬᠤ ᠳᠠᠭᠠᠨ ᠪᠠᠷᠤᠭ ᠤᠨ ᠲᠠ ᠨᠠᠷ ᠰᠢᠭ᠋ ᠪᠢᠰᠢ
ᠪᠠᠭᠠᠲᠤᠷ ᠤᠳ ᠪᠠᠢᠭᠰᠠᠨ ᠶᠤᠮ
ᠪᠠᠭᠠᠲᠤᠷ ᠤᠳ ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠦ
ᠨᠠᠷᠠ ᠰᠠᠯᠬᠢᠨ ᠳᠤ ᠣᠩᠭᠣᠭᠰᠠᠨ ᠨᠡᠭᠦᠳᠡᠯᠴᠢᠨ ᠣᠮᠤᠭ ᠤᠨ ᠴᠤᠪᠤᠭᠠᠨ ᠠᠴᠠ
ᠨᠠᠰᠤ ᠵᠠᠯᠠᠭᠤ ᠪᠠᠭᠠᠲᠤᠷ ᠤᠳ ᠮᠣᠳᠣᠨ ᠳᠡᠭᠦᠵᠢᠩ ᠳᠦ ᠲᠣᠷᠨᠢᠵᠤ
ᠨᠠᠩᠭᠢᠶᠠᠳ ᠤᠯᠤᠰ ᠤᠨ ᠬᠡᠷᠡᠮ ᠢ ᠥᠳᠥ ᠲᠡᠢ ᠰᠤᠮᠤ ᠰᠢᠭ᠋ ᠳᠠᠪᠠᠵᠤ
ᠨᠠᠪᠴᠢᠨ ᠬᠡᠯᠪᠡᠷᠢᠲᠦ ᠰᠤᠮᠤ ᠪᠠᠷ ᠥᠷᠥᠨᠡ ᠳᠣᠷᠣᠨᠠ ᠶᠢ ᠵᠥᠭᠡᠭᠡᠵᠦ
ᠨᠠᠢ᠍ᠮᠠᠨ ᠲᠦᠮᠡᠨ ᠰᠡᠯᠢᠭᠦᠷᠲᠡᠢ ᠬᠥᠯᠭᠡ ᠣᠩᠭᠣᠴᠠ ᠳᠠᠷᠬᠠᠯᠠᠵᠤ
ᠨᠠᠷᠠᠨ ᠤᠯᠤᠰ ᠤᠨ ᠬᠢᠯᠢ ᠤᠷᠤᠭᠤ ᠰᠡᠯᠢᠵᠦ ᠶᠠᠪᠤᠭᠰᠠᠨ ᠲᠡᠦᠬᠡ ᠲᠡᠢ
ᠠᠯᠲᠠᠨ ᠰᠢᠷᠠᠮᠠᠯ ᠲᠣᠨᠣᠭ ᠲᠠᠢ ᠽᠠᠨᠳᠠᠨ ᠰᠠᠭᠤᠳᠠᠯ ᠳᠤ ᠨᠠᠯᠠᠢᠵᠤ
ᠠᠷᠪᠠᠨ ᠴᠠᠭᠠᠨ ᠬᠤᠷᠤᠭᠤᠨ ᠳᠠᠭᠠᠨ ᠸᠴᠢᠷ ᠠᠯᠮᠠᠰ ᠭᠢᠯᠠᠯᠵᠠᠭᠤᠯᠤᠭᠰᠠᠨ
ᠠᠷᠠᠪ ᠤᠨ ᠱᠠᠭ ᠤᠨ ᠡᠮᠦᠨᠡ ᠳᠡᠯᠡᠬᠡᠢ ᠪᠥᠬᠥᠯᠵᠡᠵᠦ ᠪᠠᠢᠬᠤ ᠳᠤ
ᠠᠷᠠᠰᠤᠨ ᠴᠠᠮᠴᠠᠨ ᠳᠡᠭᠡᠷᠡ ᠪᠡᠨ ᠪᠤᠯᠠᠭᠠᠨ ᠳᠡᠪᠡᠯ ᠪᠥᠭᠲᠥᠷᠢᠵᠦ
ᠠᠷᠭᠢᠯ ᠪᠠᠳᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠢᠯᠳᠦ ᠶᠢᠨ ᠪᠠᠷᠢᠭᠤᠯ ᠠᠳᠬᠤᠭᠠᠳ
ᠠᠩᠴᠢᠨ ᠮᠠᠯᠴᠢᠨ ᠤ ᠪᠠᠭᠠᠲᠤᠷ ᠬᠦᠦ ᠠᠷᠴᠢᠭᠠᠳ ᠥᠩᠭᠡᠷᠡᠭᠰᠡᠨ ᠲᠡᠦᠬᠡ ᠲᠡᠢ᠃
ᠨᠠᠢ᠍ᠮᠠᠨ ᠵᠠᠭᠤᠨ ᠤ ᠡᠮᠦᠨᠡᠬᠢ ᠰᠤᠤᠲᠤ ᠮᠣᠩᠭᠣᠯ ᠬᠦᠮᠦᠨ ᠲᠡᠷᠡ
ᠨᠠᠷᠢᠨ ᠰᠢᠷᠢᠨ ᠭᠦᠯᠢᠮ ᠳᠡᠭᠡᠷᠡ ᠭᠠᠩ ᠳᠥᠷᠥᠭᠡ ᠵᠢᠭᠢᠵᠦ
ᠨᠠᠮᠬᠠᠨ ᠴᠢᠭᠢᠷᠠᠭ ᠮᠣᠷᠢᠳ ᠤᠨ ᠢᠶᠠᠨ ᠬᠤᠷ ᠳᠡᠯ ᠤᠨ ᠳᠡᠭᠡᠷᠡ ᠪᠦᠬᠦᠢᠵᠦ
ᠨᠠᠷᠠᠨ ᠰᠢᠩᠭᠡᠬᠦ ᠵᠦᠭ ᠤᠷᠤᠭᠤ ᠰᠤᠷ ᠤᠨ ᠪᠤᠭᠤᠢᠯᠢ ᠰᠢᠳᠡᠵᠦ
ᠨᠠᠮᠲᠠᠷ ᠲᠡᠦᠬᠡ ᠲᠡᠢ ᠫᠠᠷᠢᠰ ᠤᠨ ᠠᠯᠲᠠᠨ ᠴᠠᠮᠬᠠᠭ ᠢ ᠤᠷᠭᠠᠯᠠᠵᠤ
ᠨᠠᠭᠠᠰᠢ ᠴᠠᠭᠠᠰᠢ ᠨᠢ ᠭᠠᠩᠬᠤᠭᠤᠯᠤᠨ ᠲᠠᠲᠠᠵᠤ ᠶᠠᠪᠤᠭᠰᠠᠨ ᠤᠳᠠᠭᠠ ᠲᠠᠢ
ᠵᠠᠰᠠᠭ ᠤᠨ ᠰᠦᠷ ᠭᠡᠳᠡᠭ ᠢ ᠳᠡᠯᠡᠬᠡᠢ ᠲᠡᠭᠡᠵᠤ ᠣᠢᠯᠠᠭᠠᠭᠰᠠᠨ ᠶᠤᠮ
ᠵᠠᠷᠯᠢᠭ ᠲᠤᠰᠢᠶᠠᠯ ᠭᠡᠳᠡᠭ ᠢ ᠧᠦ᠋ᠷᠣᠫᠠ ᠲᠡᠭᠡᠵᠤ ᠤᠬᠠᠭᠠᠷᠠᠭᠰᠠᠨ ᠶᠤᠮ
ᠵᠢᠭᠠᠰᠤ ᠶᠡᠬᠡᠲᠡᠢ ᠬᠡᠷᠦᠯᠦᠨ ᠤ ᠵᠠᠮᠠᠭ ᠲᠤ ᠬᠠᠲᠠᠭᠠᠭᠰᠠᠨ ᠰᠡᠯᠡᠮᠡ
ᠵᠠᠷᠬᠠᠢ ᠬᠣᠲᠠ ᠶᠢᠨ ᠢᠯᠳᠦ ᠶᠢ ᠬᠤᠭᠤ ᠴᠣᠬᠢᠬᠤ ᠶᠢ ᠦᠵᠡᠭᠰᠡᠨ ᠶᠤᠮ
ᠵᠠᠯᠠᠭᠤ ᠪᠠᠭᠠᠲᠤᠷ ᠲᠡᠮᠦᠵᠢᠨ ᠤ ᠰᠠᠨᠠᠭᠰᠠᠨ ᠰᠠᠨᠠᠭᠠ ᠲᠡᠭᠡᠵᠦ
ᠽᠠᠮᠪᠤᠲᠢᠪ ᠤᠨ ᠡᠯᠢᠭᠡᠨ ᠳᠡᠭᠡᠷᠡ ᠬᠦᠮᠦᠨ ᠴᠢᠯᠠᠭᠤ ᠪᠣᠯᠵᠤ ᠦᠯᠡᠳᠡᠭᠰᠡᠨ ᠶᠤᠮ
ᠮᠣᠩᠭᠣᠯ ᠢᠩᠭᠢᠵᠦ
ᠮᠣᠷᠢ ᠲᠠᠢ ᠪᠠᠨ᠂ ᠨᠤᠮᠤ ᠲᠠᠢ ᠪᠠᠨ
ᠬᠥᠰᠢᠶᠡ ᠲᠡᠢ ᠪᠡᠨ᠂ ᠴᠢᠯᠠᠭᠤ ᠲᠠᠢ ᠪᠠᠨ
ᠬᠥᠨᠳᠡᠰᠢ ᠦᠭᠡᠢ ᠲᠡᠷᠡ ᠡᠷᠬᠡ ᠲᠡᠢ ᠪᠡᠨ
ᠬᠥᠳᠡᠯᠦᠰᠢ ᠦᠭᠡᠢ ᠪᠠᠲᠤ ᠵᠣᠷᠢᠭ ᠲᠠᠢ ᠪᠠᠨ
ᠬᠥᠪᠴᠢᠨ ᠳᠡᠯᠡᠬᠡᠢ ᠳᠡᠭᠡᠷᠡ ᠬᠥᠯ ᠳᠡᠭᠡᠷᠡ ᠪᠡᠨ ᠪᠠᠲᠤ ᠵᠣᠭᠰᠣᠵᠤ ᠦᠯᠡᠳᠡᠭᠰᠡᠨ ᠶᠤᠮ
ᠣᠪ ᠲᠠᠢ ᠮᠠᠨᠵᠤ ᠰᠢᠭ᠋ ᠦᠬᠢᠳ ᠢᠶᠠᠨ ᠬᠤᠳᠠᠯᠳᠤᠵᠤ
ᠣᠷᠣᠰ ᠣᠷᠣᠨ ᠰᠢᠭ᠋ ᠨᠡᠢᠰᠯᠡᠯ ᠢᠶᠠᠨ ᠭᠠᠯᠳᠠᠭᠤᠯᠵᠤ
ᠲᠡᠷᠲᠡᠭᠡᠬᠢ ᠠᠮᠧᠷᠢᠺᠠ ᠰᠢᠭ᠋ ᠲᠡᠨᠡᠭ ᠤᠳ ᠢ ᠲᠣᠷᠬᠢᠷᠠᠵᠤ
ᠲᠡᠭᠡᠵᠦ ᠲᠡᠭᠦᠰᠦᠭᠡ ᠦᠭᠡᠢ ᠡ᠂ ᠪᠢᠳᠡ!
ᠤᠲᠤᠭᠠᠨ ᠳᠤᠮᠳᠠ ᠴᠤ᠌ ᠮᠣᠷᠢ ᠲᠠᠢ ᠪᠠᠨ ᠶᠠᠪᠤᠵᠤ
ᠤᠰᠤᠨ ᠳᠤᠮᠳᠠ ᠴᠤ᠌ ᠬᠤᠪᠴᠠᠰᠤ ᠲᠠᠢ ᠪᠠᠨ ᠰᠠᠭᠤᠵᠤ
ᠤᠤᠭᠤᠵᠤ ᠢᠳᠡᠬᠦ ᠳᠡᠬᠡᠨ ᠴᠤ᠌ ᠳᠤᠭᠤᠯᠠᠭᠠ ᠲᠠᠢ ᠪᠠᠨ ᠪᠠᠢᠵᠤ
ᠤᠨᠲᠠᠵᠤ ᠨᠣᠢᠷᠰᠤᠬᠤ ᠳ᠋ᠠᠭᠠᠨ ᠴᠤ᠌ ᠬᠤᠶᠠᠭ ᠲᠠᠢ ᠪᠠᠨ ᠬᠡᠪᠲᠡᠵᠦ
ᠥᠪᠡᠷ ᠤᠨ ᠢᠶᠠᠨ ᠡᠷᠬᠡ ᠶᠢ ᠥᠪᠡᠷᠰᠡᠳ ᠢᠶᠠᠨ
ᠥᠳᠥᠲᠡᠢ ᠰᠤᠮᠤ ᠪᠠᠷ ᠬᠠᠷᠪᠤᠵᠤ ᠣᠯᠤᠭᠰᠠᠨ ᠶᠤᠮ
ᠥᠪᠡᠷᠰᠡᠳ ᠤᠨ ᠢᠶᠠᠨ ᠭᠦᠷᠦᠨ ᠢ ᠥᠪᠡᠷᠰᠡᠳ ᠢᠶᠠᠨ
ᠡᠳᠦᠷ ᠰᠥᠨᠢ ᠦᠭᠡᠢ ᠬᠠᠢᠷᠠᠯᠠᠨ ᠰᠠᠬᠢᠭᠰᠠᠨ ᠶᠤᠮ
ᠡᠨᠡ ᠶᠡᠬᠡ ᠭᠦᠷᠦᠨ ᠤ ᠦᠯᠡᠳᠡᠴᠡ ᠳᠡᠭᠡᠷᠡ
ᠡᠷᠬᠡ ᠴᠢᠯᠦᠭᠡᠨ ᠤ ᠳᠠᠭᠤᠨ ᠲᠥᠭᠡᠷᠢᠵᠦ
ᠡᠬᠢ ᠵᠠᠬᠠ ᠦᠭᠡᠢ ᠦᠢ ᠣᠯᠠᠨ
ᠡᠷᠬᠡ ᠬᠡᠦᠬᠡᠳ ᠰᠢᠭ ᠲᠣᠩᠭᠣᠴᠢᠵᠤ ᠪᠠᠢᠨᠠ
ᠴᠠᠭᠠᠨ ᠪᠠᠷᠢᠯᠭᠠ᠂ ᠤᠯᠠᠭᠠᠨ ᠲᠤᠭ
ᠴᠠᠷᠳᠠᠮᠠᠯ ᠵᠠᠮ ᠂ ᠭᠦᠦᠷ ᠴᠠᠮᠬᠠᠭ
ᠴᠠᠬᠢᠯᠭᠠᠨ ᠬᠦᠴᠦ ᠂ ᠨᠡᠭᠦᠷᠡᠰᠦ᠂ ᠲᠠᠷᠢᠶᠠ
ᠴᠠᠭᠠᠰᠤ ᠬᠠᠷᠠᠨᠳᠠ ᠂ ᠫᠣᠣ ᠴᠣᠭᠣᠷ
ᠠᠦ᠋ᠲ᠋ᠣᠪᠦ᠋ᠰ ᠲᠠᠺᠰᠢ ᠣᠩᠭᠣᠴᠠ ᠴᠤ᠌ ᠭᠡᠬᠦ ᠰᠢᠭ
ᠷᠠᠳᠢᠣ᠋ ᠲᠧᠯᠧᠹᠣᠨ ᠺᠢᠨᠣ᠋ ᠴᠤ᠌ ᠭᠡᠬᠦ ᠰᠢᠭ
ᠠᠳᠠᠭ ᠤᠨ ᠨᠠᠭᠠᠳᠤ ᠵᠠᠬᠠ ᠨᠢ ᠤᠷᠤᠭᠤᠯ ᠤᠨ ᠪᠤᠳᠤᠭ
ᠠᠯᠠᠭ ᠴᠠᠮᠴᠠ ᠡᠷᠢᠶᠡᠨ ᠥᠮᠥᠳᠥ ᠪᠡᠷ ᠭᠣᠶᠣᠯᠠ ᠴᠤ᠌
ᠮᠣᠩᠭᠣᠯ ᠭᠡᠷ ᠲᠤ ᠲᠦᠷᠦᠭᠰᠡᠨ ᠢᠷᠠᠭᠤ ᠨᠠᠢᠷᠠᠭᠴᠢ
ᠮᠣᠷᠢᠨ ᠲᠤᠭᠤᠷᠠᠢ ᠶ᠋ᠢᠨ ᠢᠶᠠᠨ ᠠᠶᠠᠯᠭᠤᠬᠠᠨ ᠲᠥᠪᠡᠷᠭᠡᠨ ᠳᠦ
ᠡᠴᠢᠭᠡ ᠡᠪᠦᠭᠡᠳ ᠤᠨ ᠢᠶᠠᠨ ᠨᠡᠷᠡ ᠶᠢ ᠴᠤ᠌ ᠳᠤᠷᠠᠰᠬᠤ
ᠡᠷᠬᠡ ᠮᠡᠳᠡᠯ ᠦᠭᠡᠢ ᠬᠠᠪᠴᠢᠭᠳᠠᠵᠤ ᠪᠠᠢᠨᠠᠮ
ᠣᠷᠣᠰ ᠣᠷᠣᠨ ᠫᠧᠲ᠋ᠷ ᠬᠠᠭᠠᠨ ᠢ
ᠣᠮᠣᠷᠬᠠᠨ ᠮᠠᠭᠲᠠᠵᠤ ᠪᠠᠢᠨᠠ
ᠮᠣᠰᠺᠸᠠ ᠢ ᠰᠢᠲᠠᠭᠠᠵᠤ ᠳᠠᠭᠤᠰᠤᠭᠰᠠᠨ ᠨᠠᠫᠣᠯᠢᠶᠣᠨ ᠤ
ᠮᠥᠩᠬᠡ ᠶᠢᠨ ᠠᠯᠳᠠᠷ ᠢ ᠳᠠᠭᠤᠯᠠᠵᠤ ᠪᠠᠢᠨᠠ
ᠳᠡᠯᠡᠬᠡᠢ ᠳ᠋ᠠᠬᠢᠨ ᠢᠶᠠᠷ ᠢᠶᠠᠨ
ᠳᠡᠭᠡᠳᠦᠰ ᠤᠨ ᠢᠶᠠᠨ ᠰᠤᠶᠤᠯ ᠢ ᠤᠰᠠᠳᠬᠠᠭᠰᠠᠨ
ᠳᠡᠭᠡᠷᠡᠮᠴᠢᠨ ᠢᠰᠫᠠᠨᠢ ᠶᠢᠨ ᠦᠯᠡᠳᠡᠭᠳᠡᠯ
ᠺᠦᠪᠠ ᠶᠢ ᠥᠨᠥᠳᠥᠷ ᠮᠠᠭᠲᠠᠵᠤ ᠪᠠᠢᠨᠠ
ᠠᠯᠫᠠ ᠶᠢ ᠳᠠᠪᠠᠵᠤ ᠧᠦ᠋ᠷᠣᠫᠠ ᠤᠷᠤᠭᠤ
ᠠᠲ᠋ᠠᠺᠯᠠᠵᠤ ᠪᠠᠢᠭᠰᠠᠨ ᠰᠦᠸᠣᠷᠣᠸ ᠢ
ᠠᠯᠳᠠᠷ ᠬᠦᠨᠳᠦ ᠶᠢᠨ ᠬᠠᠭᠤᠳᠠᠰᠤᠨ ᠳᠤ
ᠠᠯᠲᠠᠨ ᠦᠰᠦᠭ ᠢᠶᠠᠷ ᠪᠢᠴᠢᠵᠦ ᠪᠠᠢᠨᠠ
ᠲᠡᠭᠡᠪᠡᠯ ᠪᠢᠳᠡ ᠶᠠᠭᠠᠬᠢᠭᠠᠳ
ᠲᠡᠮᠦᠵᠢᠨ ᠢ ᠳᠤᠷᠠᠰᠬᠤ ᠨᠢ ᠪᠢᠲᠡᠭᠡᠢ ᠬᠡᠯᠡ
ᠡᠴᠦᠰ ᠤᠨ ᠡᠴᠦᠰ ᠲᠤ ᠬᠦᠯᠦᠭ ᠮᠣᠷᠢ ᠪᠠᠨ ᠴᠤ᠌
ᠡᠩᠬᠦᠷᠡᠢᠯᠡᠨ ᠳᠠᠭᠤᠯᠠᠬᠤ ᠡᠷᠬᠡ ᠮᠡᠳᠡᠯ ᠦᠭᠡᠢ ᠪᠣᠯᠪᠠ ᠠ᠋᠃
ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ ᠲᠡᠦᠬᠡᠨ ᠳᠦ ᠲᠥᠷᠥ ᠶᠢᠨ ᠨᠢᠷᠤᠭᠤ ᠪᠣᠰᠬᠠᠭᠰᠠᠨ
ᠳᠢᠭᠯᠢᠮ ᠰᠠᠢᠲᠠᠢ ᠴᠡᠷᠢᠭ ᠤᠨ ᠲᠡᠮᠦᠷ ᠡᠩᠨᠡᠭᠡ ᠶᠢ ᠡᠭᠦᠰᠬᠡᠭᠰᠡᠨ
ᠲᠡᠷᠢᠭᠦᠨ ᠵᠠᠩᠵᠤᠨ ᠴᠢᠩᠭᠢᠰ ᠤᠨ ᠮᠡᠨᠳᠦᠯᠡᠵᠦ ᠲᠥᠷᠥᠭᠰᠡᠨ ᠭᠠᠵᠠᠷ
ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠤᠨ ᠲᠣᠭᠯᠠᠵᠤ ᠥᠰᠦᠭᠰᠡᠨ ᠨᠤᠲᠤᠭ
ᠳᠡᠯᠢᠭᠦᠨ ᠪᠣᠯᠳᠣᠭ ᠢ ᠣᠷᠢᠶᠠᠭᠰᠠᠨ ᠤᠨᠤᠨ ᠤ ᠤᠰᠤᠨ ᠰᠢᠷᠭᠢᠭᠡ ᠦᠭᠡᠢ ᠪᠠᠢᠨᠠ
ᠳᠡᠭᠡᠳᠦᠰ ᠤᠳᠤᠮ ᠢᠶᠠᠨ ᠣᠷᠣᠯᠠᠭᠰᠠᠨ ᠣᠪᠣᠭ ᠦᠨᠳᠦᠰᠦ ᠨᠢ ᠤᠰᠠᠳᠤᠭᠠ ᠦᠭᠡᠢ ᠪᠠᠢᠨᠠ
ᠤᠰᠠᠳᠤᠭᠠ ᠦᠭᠡᠢ ᠲᠡᠷᠡ ᠦᠨᠳᠦᠰᠦᠨ ᠦ ᠦᠷᠡ ᠨᠢ ᠪᠣᠯᠤᠭᠰᠠᠨ ᠪᠢ
ᠤᠷᠤᠭ ᠰᠠᠢᠬᠠᠨ ᠮᠣᠩᠭᠣᠯ ᠤᠨ ᠢᠶᠠᠨ ᠠᠯᠳᠠᠷ ᠲᠡᠦᠬᠡ ᠬᠣᠶᠠᠷ ᠢ
ᠠᠭᠤᠷ ᠪᠠᠬᠠᠷᠬᠠᠯ ᠬᠣᠶᠠᠷ ᠢᠶᠠᠷ ᠢᠶᠠᠨ ᠬᠥᠯᠴᠥᠭᠦᠷᠡᠩᠬᠡᠨ ᠳᠠᠭᠤᠯᠠᠵᠤ ᠪᠠᠢᠨᠠ
ᠤᠯᠠᠭᠠᠨ ᠪᠦᠰᠡᠯᠡᠭᠦᠷᠲᠦ ᠮᠠᠯᠠᠭᠠᠢ ᠲᠠᠢ ᠴᠠᠭᠳᠠᠭᠠ ᠨᠠᠷ ᠤᠨ ᠳᠤᠮᠳᠠ ᠠᠴᠠ
ᠤᠳᠤᠮ ᠬᠣᠢᠴᠢ ᠶᠢᠨ ᠦᠷᠡᠰ ᠲᠡᠬᠡᠨ ᠮᠣᠩᠭᠣᠯ ᠰᠡᠳᠬᠢᠯ ᠢᠶᠠᠷ ᠢᠶᠠᠨ ᠬᠦᠷᠭᠡᠬᠦ ᠭᠡᠵᠦ
ᠠᠭᠤᠰᠭᠢᠨ ᠤ ᠪᠠᠨ ᠭᠤᠷᠪᠠᠨ ᠰᠤᠳᠠᠰᠤ ᠶᠢ ᠲᠠᠰᠤᠷᠠᠲᠠᠯᠠ ᠪᠢ ᠳᠠᠭᠤᠯᠠᠨᠠ
ᠮᠠᠭᠲᠠᠨ ᠳᠠᠭᠤᠯᠠᠵᠤ ᠪᠠᠢᠭᠠ ᠮᠢᠨᠦ ᠰᠠᠢᠬᠠᠨ ᠮᠣᠩᠭᠣᠯ
ᠮᠠᠨᠳᠤᠲᠤᠭᠠᠢ ᠪᠠᠷ ᠳᠦᠭᠦᠷᠦᠭᠰᠡᠨ ᠤᠯᠠᠭᠠᠨ ᠯᠣᠽᠦ᠋ᠩ ᠳᠡᠭᠡᠷᠡ ᠪᠠᠢᠬᠤ ᠦᠭᠡᠢ
ᠮᠠᠩᠬᠠᠢᠬᠤ ᠥᠨᠳᠥᠷ ᠪᠠᠷᠢᠯᠭᠠ ᠶᠢᠨ ᠴᠠᠭᠠᠨ ᠲᠠᠩᠬᠢᠮ ᠳᠤ ᠪᠠᠢᠬᠤ ᠦᠭᠡᠢ
ᠮᠠᠰᠢᠨ ᠲᠡᠷᠭᠡ ᠬᠥᠯᠭᠡᠯᠡᠭᠰᠡᠨ ᠫᠠᠯᠢᠲ᠋ᠣ᠋ ᠶᠢᠨ ᠳᠣᠲᠣᠷᠠ ᠪᠠᠢᠬᠤ ᠦᠭᠡᠢ
ᠮᠠᠶᠢᠭ᠋ ᠶᠡᠬᠡᠲᠡᠢ ᠬᠤᠪᠴᠠᠰᠤᠨ ᠳᠤ ᠡᠷᠭᠦᠵᠦ ᠪᠤᠳᠤᠮᠠᠯ ᠲᠣᠯᠣᠭᠠᠢ ᠳᠤ ᠪᠠᠢᠬᠤ ᠦᠭᠡᠢ
ᠮᠠᠷᠱ ᠭᠣᠣᠯᠳᠠᠭᠤ ᠬᠥᠭᠵᠢᠮ ᠳᠦ ᠡᠷᠭᠢᠬᠦ ᠪᠤᠯᠪᠠᠷᠠᠢ ᠬᠥᠯ ᠳᠤ ᠴᠤ᠌ ᠪᠠᠢᠬᠤ ᠦᠭᠡᠢ
ᠦᠨᠡᠨ ᠬᠠᠢᠷᠠ ᠪᠠᠨ ᠥᠭᠭᠦᠭᠰᠡᠨ ᠮᠢᠨᠦ ᠰᠠᠢᠬᠠᠨ ᠮᠣᠩᠭᠣᠯ
ᠦᠳᠡ ᠶᠢᠨ ᠨᠠᠷᠠᠨ ᠳᠤ ᠳᠤᠨᠢᠶᠠᠷᠠᠬᠤ ᠬᠠᠯᠬᠠ ᠶᠢᠨ ᠲᠠᠯᠠ ᠳᠤ ᠪᠤᠢ
ᠦᠵᠡᠰᠬᠦᠯᠡᠩ ᠭᠤᠸᠠ ᠲᠡᠭᠦᠯᠳᠡᠷ ᠮᠣᠩᠭᠣᠯ ᠳᠡᠪᠡᠯ ᠳᠦ ᠪᠤᠢ
ᠦᠶᠡᠯᠵᠡᠬᠦ ᠰᠠᠯᠬᠢᠨ ᠳᠤ ᠳᠡᠷᠪᠡᠬᠦ ᠡᠷᠦᠬᠡᠨ ᠤ ᠣᠭᠣᠰᠣᠷ ᠲᠤ ᠪᠤᠢ
ᠦᠷ ᠤᠨ ᠬᠢᠷᠠᠭᠠᠨ ᠳᠤ ᠰᠤᠨᠤᠯᠵᠠᠬᠤ ᠤᠷᠭᠠᠨ ᠤ ᠦᠵᠦᠭᠦᠷ ᠲᠤ ᠪᠤᠢ
ᠦᠰᠦᠷᠦᠨ ᠳᠡᠭᠳᠡᠬᠦ ᠮᠣᠷᠢᠨ ᠤ ᠳᠥᠷᠪᠡᠨ ᠲᠤᠭᠤᠷᠠᠢ ᠳᠤ ᠪᠤᠢ
ᠡᠭᠦᠨ ᠢ ᠪᠢ ᠳᠠᠭᠤᠯᠠᠬᠤ ᠭᠡᠵᠦ ᠡᠨᠳᠡ ᠠᠷᠭᠠᠯ ᠤᠨ ᠭᠠᠯ ᠤᠨ ᠬᠠᠵᠠᠭᠤ ᠳᠤ
ᠢᠰᠡᠭᠡᠢ ᠭᠡᠷ ᠤᠨ ᠵᠠᠢ ᠳᠤ ᠡᠩᠬᠡᠵᠢᠨ ᠲᠦᠷᠦᠭᠰᠡᠨ ᠶᠤᠮ᠃
ᠠᠷᠭᠠᠯ ᠤᠨ ᠭᠠᠯ ᠲᠦᠯᠡᠭᠰᠡᠨ ᠢᠰᠡᠭᠡᠢ ᠭᠡᠷ ᠤᠨ ᠳᠣᠲᠣᠷᠠ ᠡᠢᠮᠦ
ᠠᠭᠤᠤ ᠵᠠᠩᠰᠢᠯ ᠲᠠᠢ ᠥᠪᠡᠷᠮᠢᠴᠡ ᠦᠨᠳᠦᠰᠦᠲᠡᠨ ᠪᠠᠢᠳᠠᠭ ᠶᠤᠮ
ᠡᠨᠡ ᠪᠣᠯ ᠮᠣᠩᠭᠣᠯ
ᠡᠨᠡᠭᠦᠬᠡᠨ ᠡᠴᠡ ᠬᠣᠢᠰᠢ ᠴᠤ᠌ ᠮᠣᠩᠭᠣᠯ
ᠮᠣᠩᠭᠣᠯ ᠬᠡᠪ ᠢᠶᠠᠷ ᠢᠶᠠᠨ
ᠮᠠᠨᠳᠤᠵᠤ ᠪᠠᠢᠬᠤ ᠪᠣᠯᠤᠨᠠ