ᠤᠶᠠᠩᠭᠠ ᠶ᠋ᠢᠨ ᠬᠡᠯᠲᠡᠰ - ᠰᠠᠢᠨᠴᠤᠭᠠ Уянгын хэлтэс - Сайнцогоо
303ᠤᠶᠠᠩᠭᠠ ᠶ᠋ᠢᠨ ᠬᠡᠯᠲᠡᠰ
–– ᠭᠤᠴᠢᠨ ᠵᠢᠯ ᠳ᠋ᠡᠬᠢ ᠨᠤᠲᠤᠭ ᠤ᠋ᠨ ᠬᠤᠪᠢᠷᠠᠯ
ᠨᠢᠭᠡ ᠂ ᠰᠢᠯᠦᠭ
ᠬᠠᠷᠢᠶᠠᠵᠤ ᠬᠠᠪᠢᠷᠤᠮᠠᠷ ᠪᠤᠬᠢᠨᠢᠳᠤᠵᠤ ᠪᠠᠢᠭᠰᠠ ᠨᠢᠭᠡᠨ ᠦᠶᠡ ᠶ᠋ᠢᠨ ᠰᠡᠳᠬᠢᠯ ᠮᠢᠨᠢ ᠬᠠᠷᠢᠨ ᠥᠨᠥᠳᠥᠷ ᠰᠢᠯᠦᠭᠯᠡᠬᠦ ᠴᠦ᠍ ᠶᠦ᠍ᠮ᠂ ᠮᠠᠭᠲᠠᠬᠤ ᠴᠤ᠌ ᠶᠤᠮ ᠃
ᠠ! ᠮᠥᠨ ᠳᠠ ᠬᠥᠭᠡᠷᠦᠬᠦᠢ ᠂ ᠰᠢᠪᠠᠵᠤ ᠪᠠᠢᠭᠰᠠᠨ ᠥᠷᠭᠡᠰᠦ ᠬᠠᠳᠠᠭᠠᠰᠤ ᠬᠣᠪᠬᠣᠷᠠᠭᠰᠠᠨ ᠠ᠋ᠴᠠ ᠂ ᠰᠢᠭᠢᠳᠴᠦ ᠪᠠᠢᠭᠰᠠᠨ ᠥᠳᠥ ᠬᠦᠷᠢᠳ ᠤᠰᠠᠳᠤᠭᠰᠠᠨ ᠠ᠋ᠴᠠ ᠂ ᠰᠢᠯᠦᠭ ᠢ᠋ᠶ᠋ᠡᠷ ᠲᠡᠷᠡ ᠳᠣᠭᠳᠣᠯᠤᠨ ᠂ ᠮᠠᠭᠲᠠᠭᠠᠯ ᠢ᠋ᠶ᠋ᠠᠷ ᠲᠡᠷᠡ ᠬᠥᠪᠬᠡᠯᠵᠡᠨᠡ ᠃
ᠰᠢᠯᠦᠭ ᠂ ᠮᠠᠭᠲᠠᠭᠠᠯ ᠭᠡᠭᠰᠡᠭᠡᠷ ᠯᠡ ᠲᠠ ᠪᠣᠳᠣᠵᠤ ᠮᠠᠭᠠᠳ — ᠴᠡᠭᠡᠨ ᠳ᠋ᠧᠩ ᠭᠡᠷᠡᠯᠲᠦᠭᠰᠡᠨ ᠴᠢᠮᠡᠭ ᠵᠠᠰᠠᠯ ᠢ᠋ᠶ᠋ᠠᠷ ᠮᠢᠷᠠᠯᠵᠠᠭᠰᠠᠨ᠂ ᠠᠭᠤᠳᠠᠮ ᠲᠠᠩᠬᠢᠮ ᠳ᠋ᠤ᠌ ᠶᠤᠮ ᠤᠤ ? ᠠᠷᠪᠠᠨ ᠬᠠᠨᠠ ᠲᠠᠢ ᠥᠷᠥᠭᠡᠨ ᠳ᠋ᠦ᠍ ᠶᠦ᠍ᠮ ᠦᠦ ? ᠰᠠᠮᠪᠠᠢ ᠬᠠᠳᠠᠭ ᠢ᠋ᠶ᠋ᠠᠨ ᠳᠡᠭᠡᠷᠡ ᠡᠷᠭᠦᠴᠢᠭᠡᠳ ᠰᠠᠷᠬᠤᠳ ᠰᠦ ᠪᠡᠨ ᠳᠦᠭᠦᠷᠡᠩ ᠭᠡᠮᠨᠡᠭᠡᠳ ᠂ ᠤᠷᠤᠰᠲᠠᠯᠠ ᠤᠩᠰᠢᠵᠤ ᠂ ᠤᠶᠠᠷᠠᠲᠠᠯᠠ ᠡᠭᠡᠰᠢᠭᠯᠡᠭᠡ ᠳᠡ ᠃
ᠦᠭᠡᠢ ᠂ ᠮᠠᠨ ᠤ᠋ ᠰᠢᠯᠦᠭ ᠪᠣᠳᠣᠯ ᠠ᠋ᠴᠠ ᠤᠷᠭᠤᠭᠰᠠᠨ ᠬᠡᠢᠰᠪᠦᠷᠢᠯᠡᠯ ᠪᠢᠰᠢ ᠂ ᠮᠠᠨ ᠤ᠋ ᠮᠠᠭᠲᠠᠭᠠᠯ ᠪᠣᠳᠣᠭ ᠢ᠋ᠶ᠋ᠠᠷ ᠪᠢᠴᠢᠭᠳᠡᠭᠰᠡᠨ ᠲᠠᠭᠠᠮᠠᠭᠯᠠᠯ ᠪᠢᠰᠢ ᠃ ᠬᠡᠢᠰᠪᠦᠷᠢᠯᠡᠯ ᠪᠠ ᠲᠠᠭᠠᠮᠠᠭᠯᠠᠯ ᠨᠢ ᠪᠠᠢᠬᠤ ᠴᠤ᠌ ᠶᠣᠰᠣᠲᠠᠢ ᠂ ᠪᠠᠢᠳᠠᠭ ᠴᠤ᠌ ᠶᠤᠮ ᠂ ᠭᠡᠲᠡᠯᠡ ᠮᠢᠨᠦ ᠬᠡᠯᠡᠵᠦ ᠪᠠᠢᠭᠠ ᠰᠢᠯᠦᠭ᠂ ᠮᠠᠭᠲᠠᠭᠠᠯ ᠤ᠋ᠨ ᠳᠣᠲᠣᠷᠠᠬᠢ ᠮᠠᠭᠲᠠᠭᠠᠯ — ᠵᠢᠩᠬᠢᠨᠢ ᠪᠠ ᠦᠨᠡᠨ ᠃
ᠡᠩ ᠲᠡᠢ ᠴᠠᠭᠠᠰᠤ ᠲᠦᠮᠡᠨ ᠬᠠᠭᠤᠳᠠᠰᠤ ᠪᠠᠢᠭᠰᠠᠨ ᠴᠤ᠌ ᠲᠡᠭᠦᠨ ᠢ᠋ ᠬᠡᠷᠬᠢᠨ ᠪᠠᠭᠲᠠᠭᠠᠬᠤ ᠪᠣᠢ ᠳᠠ᠂ ᠡᠷᠳᠡᠨᠢ ᠲᠡᠢ ᠪᠣᠳᠣᠭ ᠪᠣᠮᠠᠨ ᠯᠣᠩᠬᠣ ᠪᠠᠢᠭᠰᠠᠨ ᠴᠤ᠌ ᠲᠡᠭᠦᠨ ᠢ᠋ ᠬᠡᠷᠬᠢᠨ ᠪᠢᠴᠢᠬᠦ ᠪᠣᠢ ᠳᠠ ᠃ ᠲᠡᠭᠦᠨ ᠢ᠋ ᠵᠥᠪᠬᠡᠨ ᠪᠥᠮᠪᠥᠷᠴᠡᠭ ᠳᠡᠯᠡᠬᠡᠢ ᠬᠥᠪᠡᠭᠡ ᠦᠭᠡᠢ ᠳ᠋ᠡᠭᠡᠨ ᠪᠠᠭᠲᠠᠭᠠᠵᠤ ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠬᠢᠵᠠᠭᠠᠷ ᠦᠭᠡᠢ ᠳ᠋ᠡᠭᠡᠨ ᠳᠠᠭᠠᠭᠠᠵᠠᠢ ᠃
ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠦ᠍ ᠳᠠ ᠬᠠᠷᠢᠨ ᠬᠠᠴᠢᠷᠬᠠᠵᠤ ᠮᠠᠭᠠᠳ ᠃ ᠭᠡᠲᠡᠯᠡ ᠡᠨᠡ ᠪᠣᠯ ᠦᠨᠡᠨ ᠪᠠ ᠵᠢᠩᠬᠢᠨᠢ ᠃ ᠲᠠ ᠪᠣᠳᠣᠯ ᠳᠠ ᠃ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ ᠤᠤ ? ᠲᠡᠭᠡᠪᠡᠯ ᠲᠠᠨ ᠠ᠋ᠴᠠ ᠠᠰᠠᠭᠤᠶᠠ ᠄ ᠦᠵᠡᠭᠡᠳ ᠵᠠᠪᠳᠤᠪᠠᠤ ? ᠰᠣᠨᠢᠷᠬᠠᠭᠠᠳ ᠪᠠᠷᠠᠪᠠᠤ ? ᠪᠠᠬᠠᠷᠤᠭᠠᠳ ᠬᠠᠨᠤᠪᠠᠤ ? ᠭᠠᠢᠬᠠᠭᠠᠳ ᠣᠯᠪᠠᠤ ? ᠣᠷᠴᠢᠨ ᠲᠣᠭᠣᠷᠢᠨ ᠳ᠋ᠠᠭᠠᠨ ᠪᠡᠶᠡᠯᠡᠵᠦ ᠪᠠᠢᠭᠠ ᠶ᠋ᠢ ᠂ ᠪᠦᠲᠦᠵᠦ ᠪᠠᠢᠭᠠ ᠶ᠋ᠢ ᠣᠢᠷᠠ ᠬᠣᠯᠠ ᠳ᠋ᠠᠭᠠᠨ ᠴᠣᠯᠭᠣᠷᠠᠵᠤ ᠪᠠᠢᠭᠠ ᠶ᠋ᠢ ᠴᠣᠭᠴᠠᠯᠠᠭᠳᠠᠵᠤ ᠪᠠᠢᠭᠠ ᠶ᠋ᠢ ᠁
ᠠᠬᠠᠢ ! ᠶᠠᠭ ᠲᠡᠷᠡ ᠴᠢᠨᠢ ᠂ ᠶᠠᠭ ᠲᠡᠷᠡ ᠴᠢᠨᠢ ᠳᠠᠷᠤᠢ ᠮᠠᠨ ᠤ᠋ ᠰᠢᠯᠦᠭ ᠦ᠋ᠨ ᠨᠢᠭᠡᠨ ᠳᠤᠰᠤᠯ ᠤᠰᠤ ᠂ ᠮᠠᠨ ᠤ᠋ ᠮᠠᠭᠲᠠᠭᠠᠯ ᠤ᠋ᠨ ᠬᠠᠭᠠᠰ ᠬᠡᠯᠲᠡᠷᠬᠡᠢ ᠬᠠᠢᠷ ᠰᠢᠦ ! ᠬᠡᠷᠪᠡ ᠪᠢᠳᠡ ᠰᠢᠯᠦᠭ ᠢ᠋ᠶ᠋ᠡᠨ ᠨᠡᠯᠦᠭᠡᠷ ᠭᠦᠨ ᠳᠠᠯᠠᠢ ᠲᠠᠢ ᠠᠳᠠᠯᠢᠳᠬᠠᠪᠠᠯ ᠂ ᠬᠡᠷᠪᠡ ᠪᠢᠳᠡ ᠮᠠᠭᠲᠠᠭᠠᠯ ᠢ᠋ᠶ᠋ᠠᠨ ᠲᠡᠨᠢᠭᠡᠷ ᠠᠭᠤᠳᠠᠮ ᠭᠠᠵᠠᠷ ᠲᠠᠢ ᠵᠦᠢᠷᠯᠡᠪᠡᠯ ᠁
ᠬᠣᠶᠠᠷ ᠂ ᠵᠢᠷᠤᠭ
ᠪᠠᠢᠭᠠᠯᠢ ᠪᠠᠭᠰᠢ ᠂ ᠨᠣᠢᠷᠮᠤᠭᠯᠠᠭᠰᠠᠨ ᠳᠡᠨᠳᠡᠷᠢᠬᠦ ᠤᠷᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠨᠲᠠᠩᠬᠠᠢ ᠪᠠᠷ ᠢ᠋ᠶ᠋ᠠᠨ ᠠᠳᠬᠤᠵᠤ ᠂ ᠰᠤᠭᠤᠨᠠᠭᠳᠠᠨ ᠢᠵᠠᠮᠠᠭᠲᠤᠭᠰᠠᠨ ᠮᠠᠨᠤᠬᠤᠨ ᠭᠡᠭᠡ ᠶ᠋ᠢ ᠳᠠᠪᠠᠯᠭᠠᠯᠠᠨ ᠳᠣᠯᠭᠢᠶᠠᠯᠠᠭᠰᠠᠨ ᠨᠣᠮᠢᠨ ᠠᠷ ᠲᠠᠢ ᠰᠠᠶᠢ ᠵᠣᠯᠭᠠᠭᠤᠯᠤᠨ ᠂ ᠠᠷᠠᠢᠬᠠᠨ ᠳᠤᠷᠠᠢᠯᠭᠠᠲᠠᠯᠠ ᠂ ᠠᠯᠢ ᠨᠢᠭᠡᠨ ᠠᠪᠤᠷᠭᠤ ᠵᠢᠷᠤᠭᠴᠢᠨ ᠢ᠋ ᠨᠢ ᠪᠤᠤ ᠮᠡᠳᠡ ᠂ ᠳᠠᠳᠮᠠᠭᠠᠢ ᠪᠢᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠱᠠᠯᠠᠪᠬᠠᠨ ᠱᠤᠳᠤᠷᠴᠤ ᠂ ᠪᠠᠢᠭᠠᠯᠢ ᠪᠠᠭᠰᠢ ᠶ᠋ᠢᠨ ᠵᠢᠷᠤᠭᠰᠠᠨ ᠤᠯᠠᠭᠠᠨ ᠪᠠ ᠨᠣᠭᠣᠭᠠᠨ ᠤ᠋ ᠵᠠᠪᠰᠠᠷ ᠲᠤ᠌ ᠨᠢᠭᠡᠨ ᠵᠤᠷᠪᠤᠰ ᠭᠣᠶᠣ ᠪᠣᠳᠣᠭ ᠢ᠋ ᠬᠠᠶᠠᠨ ᠂ ᠨᠢᠭᠡᠨ ᠱᠤᠭᠤᠮ ᠂ ᠭᠣᠶᠣ ᠪᠤᠯᠠᠭᠮᠠᠯ ᠢ᠋ ᠣᠷᠬᠢᠯᠠ ᠃
ᠲᠡᠭᠦᠨ ᠦ᠌ ᠥᠩᠭᠡ ᠨᠢ ᠲᠠᠨᠠ ᠴᠠᠭᠠᠨ ᠂ ᠲᠤᠩ ᠴᠠᠭᠠᠨ ᠂ ᠬᠠᠰ ᠴᠠᠭᠠᠨ ᠂ ᠴᠠᠰᠤ ᠴᠠᠭᠠᠨ ᠲᠡᠷᠡ ᠬᠣᠯᠠ ᠠ᠋ᠴᠠ ᠣᠢᠷᠠᠲᠤᠨ ᠂ ᠪᠠᠭᠠ ᠠ᠋ᠴᠠ ᠶᠡᠬᠡᠳᠦᠨ ᠴᠥᠭᠡᠨ ᠡᠴᠡ ᠤᠯᠠᠳᠠᠨᠠ ᠃ ᠲᠡᠷᠡ ᠬᠡᠰᠡᠭ ᠲᠡᠭᠡᠨ ᠡᠷᠦᠬᠡᠯᠡᠭᠰᠡᠨ ᠱᠠᠭᠠ ᠰᠢᠭ᠋ ᠪᠤᠲᠠᠷᠠᠨ ᠲᠡᠨᠢᠷᠡᠵᠦ᠂ ᠵᠠᠷᠢᠮ ᠳ᠋ᠠᠭᠠᠨ ᠰᠢᠨᠡᠳ ᠦ᠋ᠨ ᠰᠠᠷᠠ ᠰᠢᠭ᠋ ᠬᠠᠪᠢᠷᠭᠠᠯᠠᠨ ᠢᠷᠠᠢᠨᠠ ᠁
ᠰᠤᠪᠤᠳ ᠴᠤ᠌ ᠶᠤᠮ ᠤᠤ? ᠡᠦᠲᠦ ᠴᠦ᠍ ᠶᠦ᠍ᠮ ᠦᠦ? ᠬᠥᠪᠥᠩ ᠴᠦ᠍ ᠶᠦ᠍ᠮ ᠦᠦ? ᠡᠭᠦᠯᠡ ᠴᠦ᠍ ᠶᠦ᠍ᠮ ᠦᠦ? ᠭᠢᠯᠲᠠᠭᠠᠨᠠᠨ ᠬᠡᠷᠡᠯᠳᠦᠬᠦ ᠥᠩᠭᠡ ᠪᠡᠷ ᠨᠢ ᠰᠤᠪᠤᠳ ᠴᠤ᠌ ᠶᠤᠮ ᠤᠤ ᠭᠡᠮᠡᠷ ᠃ ᠭᠡᠲᠡᠯᠡ ᠂ ᠰᠤᠪᠤᠳ ᠵᠥᠪᠬᠡᠨ ᠠᠯᠠᠭᠠᠨ ᠳᠡᠭᠡᠷᠡ ᠯᠡ ᠪᠥᠮᠪᠥᠷᠢᠬᠦ ᠡᠴᠡ ᠪᠢᠰᠢ ᠂ ᠬᠡᠷᠬᠢᠨ ᠠᠲᠠᠷ ᠢ᠋ ᠪᠦᠷᠬᠦᠨ ᠲᠠᠯᠠ ᠶ᠋ᠢ ᠳᠦᠭᠦᠷᠭᠡᠬᠦ ᠠᠵᠠᠢ᠃ ᠭᠢᠯᠠᠭᠠᠨᠠᠨ ᠠᠭᠰᠠᠢᠬᠤ ᠣᠯᠠᠨ ᠢ᠋ᠶ᠋ᠠᠷ ᠨᠢ ᠣᠳᠣ ᠴᠤ᠌ ᠶᠤᠮ ᠤᠤ ᠭᠡᠮᠡᠷ ᠂ ᠭᠡᠲᠡᠯᠡ ᠣᠳᠣ ᠵᠥᠪᠬᠡᠨ ᠣᠷᠴᠢᠯᠠᠩ ᠤ᠋ᠨ ᠬᠥᠪ ᠲᠦ᠍ ᠠᠨᠢᠪᠴᠢᠨ ᠂ ᠣᠭᠲᠠᠷᠭᠤᠢ ᠶ᠋ᠢᠨ ᠴᠡᠭᠡᠯ ᠳ᠋ᠦ᠍ ᠵᠢᠭᠳᠡᠷᠡᠬᠦ ᠡᠴᠡ ᠪᠢᠰᠢ ᠬᠡᠷᠬᠢᠨ ᠰᠢᠯᠢ ᠳ᠋ᠦ᠍ ᠡᠨᠡᠭᠰᠢᠨ ᠭᠣᠪᠢ ᠳ᠋ᠤ᠌ ᠢᠳᠡᠭᠡᠰᠢᠬᠦ ᠠᠵᠠᠢ᠃ ᠭᠠᠵᠠᠷ ᠪᠢᠯᠬᠠᠨ ᠬᠥᠭᠡᠷᠬᠦ ᠪᠡᠷ ᠨᠢ ᠬᠥᠪᠥᠩ ᠴᠦ᠍ ᠶᠦ᠍ᠮ ᠦᠦ ᠭᠡᠮᠡᠷ ᠂ ᠭᠡᠲᠡᠯᠡ ᠬᠥᠪᠥᠩ ᠬᠡᠳᠦᠢᠪᠡᠷ ᠬᠥᠷᠥᠰᠥᠨ ᠡᠴᠡ ᠬᠦᠪᠦᠷᠡᠨ ᠂ ᠰᠢᠷᠣᠢ ᠠ᠋ᠴᠠ ᠰᠣᠶᠣᠭᠠᠯᠠᠳᠠᠭ ᠴᠤ᠌ ᠤᠮᠠᠷᠠᠲᠤ ᠣᠷᠣᠨ ᠤ᠋ ᠨᠠᠮᠤᠷ ᠤ᠋ᠨ ᠬᠢᠷᠠᠭᠤ ᠂ ᠡᠪᠦᠯ ᠦ᠋ᠨ ᠰᠢᠭᠤᠷᠭᠠ ᠶ᠋ᠢ ᠬᠡᠷᠬᠢᠨ ᠲᠤᠭᠤᠯᠬᠤ ᠠᠵᠠᠢ ᠃ ᠭᠠᠯᠪᠠ ᠶ᠋ᠢ ᠬᠥᠰᠢᠭᠡᠯᠡᠨ ᠴᠠᠢᠵᠠᠯᠠᠬᠤ ᠪᠠᠷ ᠨᠢ ᠡᠭᠦᠯᠡ ᠴᠦ᠍ ᠶᠦ᠍ᠮ ᠦᠦ ᠭᠡᠮᠡᠷ ᠂ ᠭᠡᠲᠡᠯᠡ ᠡᠭᠦᠯᠡ ᠬᠡᠳᠦᠢᠪᠡᠷ ᠬᠠᠷᠠᠬᠤ ᠳ᠋ᠤ᠌ ᠨᠡᠯᠦᠭᠡᠷ ᠂ ᠦᠵᠡᠬᠦ ᠳ᠋ᠦ᠍ ᠳᠡᠯᠭᠡᠷ ᠴᠦ᠍ ᠲᠠᠩᠰᠤᠭ ᠵᠢᠷᠭᠠᠯ ᠤ᠋ᠨ ᠠᠮᠢᠯᠠᠯ ᠤ᠋ᠨ ᠪᠡᠯᠭᠡ ᠂ ᠦᠷᠡᠵᠢᠯ ᠦ᠋ᠨ ᠣᠨᠳᠣᠷᠣᠭᠠ ᠬᠡᠷᠬᠢᠨ ᠪᠠᠢᠬᠤ ᠠᠵᠠᠢ ᠃
ᠮᠡᠯᠡᠷᠡᠨ ᠲᠣᠭᠲᠠᠭᠰᠠᠨ ᠰᠣᠨᠢᠭᠤᠴᠢ ᠬᠠᠷᠠᠴᠠ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠬᠤ ᠳ᠋ᠤ᠌ ᠂ ᠮᠠᠨᠠᠷᠠᠨ ᠭᠠᠢᠬᠠᠭᠰᠠᠨ ᠰᠢᠷᠭᠠᠴᠢ ᠰᠡᠳᠬᠢᠯ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ ᠪᠠᠢᠬᠤ ᠳ᠋ᠤ᠌ ᠂ ᠰᠣᠨᠣᠷ ᠴᠢᠬᠢᠨ ᠦ᠌ ᠰᠡᠷᠡᠭᠴᠢ ᠬᠡᠩᠭᠡᠷᠭᠡ ᠶ᠋ᠢ ᠬᠥᠪᠰᠢᠯᠡ — ᠯᠢᠩᠪᠦ ᠶ᠋ᠢᠨ ᠣᠷᠬᠢᠯᠭᠠ ᠂ ᠳᠠᠭᠤᠤ ᠶ᠋ᠢᠨ ᠬᠠᠩᠭᠢᠨᠠᠭᠠ ᠃ ᠯᠢᠩᠪᠦ ᠶ᠋ᠢᠨ ᠣᠷᠭᠢᠯᠭᠠ ᠪᠠᠷ ᠴᠢᠨᠳᠠᠭᠠᠨ ᠬᠠᠯᠢᠶᠠ ᠠᠶᠠᠷᠬᠠᠨ ᠨᠡᠭᠦᠵᠦ ᠂ ᠳᠠᠭᠤᠤ ᠶ᠋ᠢᠨ ᠬᠠᠩᠭᠢᠨᠠᠭᠠ ᠪᠠᠷ ᠮᠢᠨᠳᠠᠰᠤᠨ ᠳᠣᠯᠭᠢᠶᠠ ᠬᠥᠭᠡᠰᠦᠷᠡᠨ ᠴᠠᠯᠭᠢᠨᠠ ᠁
ᠠ ᠂ ᠪᠢ ᠮᠡᠳᠡᠯᠡ ᠂ ᠪᠦᠷ ᠮᠡᠳᠡᠯᠡ ᠠᠪᠤᠷᠭᠤ ᠵᠢᠷᠤᠭᠴᠢ ᠶ᠋ᠢ ᠨᠢ ᠃
ᠠ ! ᠪᠢ ᠮᠡᠳᠡᠯᠡ ᠂ ᠪᠦᠷ ᠴᠦ᠍ ᠮᠡᠳᠡᠯᠡ — ᠦᠨᠡᠨᠴᠢ ᠵᠢᠷᠦᠬᠡ ᠪᠣᠳᠣᠭ ᠢ᠋ ᠨᠢ ᠲᠠᠯᠪᠢᠵᠤ ᠂ ᠠᠵᠢᠯᠴᠢ ᠭᠠᠷ ᠰᠢᠷ ᠢ᠋ ᠨᠢ ᠰᠠᠭᠤᠯᠭᠠᠵᠠᠢ᠃ ᠶᠠᠭᠠᠬᠢᠭᠰᠠᠨ ᠢᠳᠡᠷᠡᠭᠦᠨ ᠂ ᠶᠠᠭᠠᠬᠢᠭᠰᠠᠨ ᠪᠠᠳᠠᠷᠠᠭᠤᠨ ᠂ ᠶᠠᠭᠠᠬᠢᠭᠰᠠᠨ ᠥᠷᠨᠢᠭᠦᠨ ᠂ ᠶᠠᠭᠠᠬᠢᠭᠰᠠᠨ ᠳᠡᠭᠵᠢᠭᠦᠨ ᠵᠢᠷᠤᠭ ᠪᠣᠢ ᠃ ᠭᠡᠲᠡᠯᠡ ᠲᠡᠷᠡ ᠨᠢ ᠡᠷᠡᠯᠬᠡᠭ ᠮᠠᠯᠴᠢᠳ ᠤ᠋ᠨ ᠠᠶᠤᠤᠯᠢᠬᠠᠢ ᠴᠡᠭᠡᠵᠢᠨ ᠳ᠋ᠦ᠍ ᠪᠠᠳᠠᠷᠠᠨ ᠳᠡᠯᠭᠡᠷᠡᠭᠰᠡᠨ ᠂ ᠮᠢᠩᠭᠠᠨ ᠪᠤᠲᠠ ᠂ ᠲᠦᠮᠡᠨ ᠪᠠᠭᠴᠠ ᠥᠨᠢᠷ ᠴᠡᠴᠡᠭ ᠦ᠋ᠨ ᠳᠤᠮᠳᠠᠬᠢ ᠨᠢᠭᠡᠨ ᠳᠡᠯᠪᠢ ᠂ ᠬᠠᠭᠠᠰ ᠭᠡᠰᠡᠷ ᠦ᠋ᠨ ᠲᠡᠳᠦᠢᠯᠡ᠁
ᠭᠤᠷᠪᠠ ᠂ ᠪᠣᠷᠣᠭᠠᠨ
ᠭᠠᠯ ᠬᠣᠷᠯᠣ ᠠᠭᠠᠭᠢᠮᠠ ᠢᠯᠴᠢ ᠪᠡᠷ ᠴᠣᠷᠭᠢᠭᠠᠳ ᠂ ᠭᠠᠩ ᠤ᠋ᠨ ᠲᠡᠭᠷᠢ ᠪᠠᠭᠠᠭᠢᠮᠠ ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠲᠥᠭᠡᠨᠡᠭᠡᠳ ᠂ ᠰᠡᠪᠰᠡᠭᠡᠷ ᠬᠣᠮᠣᠯ ᠤᠲᠤᠭᠠ ᠮᠠᠨᠠᠷᠠᠬᠤ ᠳ᠋ᠤ᠌ ᠬᠦᠷᠴᠡᠢ ᠂ ᠰᠡᠷᠪᠡᠭᠡᠷ ᠨᠣᠭᠣᠭᠠ ᠭᠠᠯ ᠬᠠᠯᠳᠠᠬᠤ ᠳ᠋ᠤ᠌ ᠲᠤᠯᠵᠠᠢ᠃
ᠬᠠ ᠂ ᠬᠠ ᠂ ᠠᠷᠠᠵᠠ ᠶ᠋ᠢᠨ ᠰᠠᠴᠤᠯ ᠂ ᠠᠷᠠᠵᠠ ᠶ᠋ᠢᠨ ᠦᠨᠦᠷ ᠦ᠋ᠨ ᠬᠢᠨᠢ ᠬᠠᠷᠢᠭᠤ ᠳ᠋ᠤ᠌ ᠳᠤᠰᠤᠯ ᠴᠤ᠌ ᠪᠢᠲᠡᠭᠡᠢ ᠬᠠᠢᠷᠠᠯᠠᠶᠠ ᠃ ᠢᠷᠭᠡ ᠶ᠋ᠢᠨ ᠰᠢᠭᠦᠰᠦ ᠂ ᠢᠳᠡᠭᠡᠨ ᠦ᠌ ᠳᠡᠭᠡᠵᠢ ᠶ᠋ᠢᠨ ᠬᠢᠨᠢ ᠪᠠᠷᠢᠭᠤ ᠳ᠋ᠤ᠌ ᠴᠢᠭᠢᠭ ᠴᠦ᠍ ᠪᠢᠲᠡᠭᠡᠢ ᠬᠦᠷᠲᠡᠭᠡᠶᠡ ᠰᠠᠪᠳᠠᠭ ᠨᠠᠪᠳᠠᠭ ᠬᠣᠶᠠᠷ ᠤ᠋ᠨ ᠰᠠᠭᠰᠠᠭᠤ ᠠᠵᠢᠭ ᠨᠢ ᠬᠥᠳᠡᠯᠵᠦ ᠂ ᠦᠯᠦ ᠲᠣᠭᠣᠮᠰᠠᠷᠯᠠᠭᠰᠠᠨ ᠨᠢᠳᠦ ᠪᠡᠷ ᠲᠡᠷᠲᠡᠭᠡ ᠲᠠᠯᠠ ᠶ᠋ᠢ ᠨᠢᠭᠡ ᠰᠢᠷᠪᠢᠭᠰᠡᠨ ᠢ᠋ᠶ᠋ᠡᠨ ᠨᠡᠩ ᠴᠦ᠍ ᠣᠮᠣᠭᠰᠢᠨ ᠲᠤᠩ ᠴᠤ᠌ ᠪᠠᠶᠠᠷᠯᠠᠯᠠ᠃
–– ᠲᠠᠬᠢᠯᠭᠠ ᠲᠠᠯᠪᠢᠬᠤ ᠪᠠᠷ ᠠᠢᠰᠤᠢ ᠬᠥ ᠂ ᠮᠥᠷᠭᠥᠯ ᠬᠢᠬᠦ ᠪᠡᠷ ᠢᠷᠡᠯᠡ ᠬᠥ᠂ ᠡᠷᠭᠦᠭᠡᠳ ᠪᠠᠢᠬᠤ ᠨᠢ ᠶᠠᠭᠤ ᠶᠤᠮ ᠪᠣᠯ᠂ ᠳᠠᠯᠠᠯᠤᠭᠠᠳ ᠪᠠᠢᠬᠤ ᠨᠢ ᠶᠠᠭᠤ ᠶᠤᠮ ᠪᠣᠯ ᠃ ᠥᠨᠴᠥᠭ ᠬᠥᠪᠡᠭᠡ ᠨᠢ ᠦᠯᠦ ᠬᠠᠷᠠᠭᠳᠠᠬᠤ ᠰᠠᠮᠪᠠᠢ ᠴᠢ ᠶᠦ᠍ᠮ ᠦᠦ ? ᠬᠠᠳᠠᠭ ᠴᠤ᠌ ᠶᠤᠮ ᠤᠤ ? ᠦᠵᠦᠭᠦᠷ ᠬᠢᠵᠠᠭᠠᠷ ᠨᠢ ᠦᠯᠦ ᠢᠯᠭᠠᠷᠠᠬᠤ ᠱᠠ ᠴᠤ᠌ ᠶᠤᠮ ᠤᠤ ? ᠭᠬᠢᠪ ᠴᠦ᠍ ᠶᠦ᠍ᠮ ᠦᠦ ? ᠠᠢ ᠬᠠᠷᠠᠯᠠ ᠂ ᠶᠠᠭᠤ ᠪᠠᠨ ᠴᠤ᠌ ᠠᠯᠳᠠᠷᠠ ᠂ ᠠᠪᠴᠤ ᠯᠠ ᠪᠠᠢᠭᠠᠳ ᠮᠡᠳᠡᠶᠡ᠃ ᠰᠠᠪᠳᠠᠭ ᠨᠠᠪᠲᠠᠭ ᠬᠣᠶᠠᠷ ᠤ᠋ᠨ ᠠᠪᠯᠢᠭᠠᠴᠢ ᠰᠠᠨᠠᠭᠠ ᠨᠢ ᠪᠤᠷᠭᠢᠵᠤ ᠂ ᠬᠣᠪᠳᠣᠭ ᠰᠡᠳᠬᠢᠯ ᠨᠢ ᠪᠤᠷᠭᠢᠵᠤ ᠂ ᠠᠯᠠᠭᠠ ᠪᠠᠨ ᠰᠠᠶᠢ ᠰᠠᠷᠪᠠᠢᠲᠠᠯᠠ ᠂ ᠰᠡᠷᠢᠭᠦᠦ ᠲᠡᠳᠡᠨ ᠮᠥᠯᠢᠭᠦᠦ ᠣᠷᠬᠢᠭᠠᠳ ᠯᠠ ᠁
ᠬᠠᠮᠢᠭᠠ ᠠ᠋ᠴᠠ ᠢᠷᠡᠭᠰᠡᠨ ᠬᠠᠳᠠᠭ ᠰᠠᠮᠪᠠᠢ ᠂ ᠭᠬᠢᠪ ᠱᠠ ᠪᠣᠢ ᠂ ᠬᠠᠷᠢᠨ ᠲᠡᠷᠡ ᠨᠢ ᠰᠢᠷᠬᠡᠭ ᠨᠠᠷᠢᠨ ᠰᠢᠯ ᠰᠦᠯᠵᠢᠶᠡ ᠂ ᠮᠥᠬᠥᠯᠢᠭ ᠵᠢᠵᠢᠭ ᠪᠣᠯᠣᠷ ᠬᠡᠯᠬᠢᠶᠡ –– ᠨᠠᠮᠢᠷᠭᠠ ᠬᠤᠷᠠ ᠶ᠋ᠢᠨ ᠨᠢᠭᠡᠨ ᠬᠥᠭ ᠰᠢᠪᠡᠷᠡᠭᠡ ᠰᠢᠦ ᠂ ᠨᠠᠮᠤᠭᠤᠨ ᠪᠣᠷᠣᠭᠠ ᠶ᠋ᠢᠨ ᠨᠢᠭᠡᠨ ᠬᠥᠭ ᠵᠦᠰᠡᠷᠡᠭᠡ ᠰᠢᠦ ᠃ ᠲᠡᠷᠡ ᠱᠠᠭᠢᠲᠠᠯᠠ ᠪᠠᠭᠤᠨ ᠂ ᠲᠤᠨᠤᠷᠠᠲᠠᠯᠠ ᠤᠷᠤᠰᠤᠨᠠ ᠂ ᠲᠠᠯᠠ ᠳ᠋ᠤ᠌ ᠂ ᠰᠢᠯᠢ ᠳ᠋ᠦ᠍ ᠂ ᠭᠣᠪᠢ ᠳ᠋ᠤ᠌ ᠂ ᠬᠥᠨᠳᠡᠢ ᠳ᠋ᠦ᠍᠁᠁
ᠬᠠᠨᠤᠲᠠᠯᠠ ᠤᠮᠳᠠᠯᠠᠭᠰᠠᠨ ᠨᠠᠪᠴᠢ ᠨᠠᠬᠢᠶᠠ ᠲᠣᠯᠣᠭᠠᠢ ᠳᠣᠬᠢᠯᠵᠠᠨ ᠮᠦᠰᠢᠶᠡᠬᠦ ᠳ᠋ᠦ᠍ ᠂ ᠬᠠᠯᠠᠰᠲᠠᠯᠠ ᠪᠠᠯᠭᠤᠭᠰᠠᠨ ᠮᠠᠯ ᠰᠦᠷᠦᠭ ᠤᠷᠤᠭᠤᠯ ᠰᠡᠭᠰᠦᠷᠦᠨ ᠲᠣᠭᠯᠠᠨᠠ ᠲᠡᠭᠡᠯᠭᠦᠢ ᠳᠡ ᠂ ᠲᠡᠭᠦᠨ ᠦ᠌ ᠰᠠᠳᠠᠷᠠᠭᠠᠨ ᠳ᠋ᠤ᠌ ᠥᠰᠦᠯᠲᠡ ᠤᠷᠭᠤᠴᠠ ᠶ᠋ᠢᠨ ᠢᠪᠡᠭᠡᠯ ᠲᠡᠢ ᠡᠴᠡ ᠂ ᠲᠡᠭᠦᠨ ᠴᠢᠳᠬᠤᠯ ᠳ᠋ᠤ᠌ ᠲᠠᠷᠭᠤ ᠬᠦᠴᠦ ᠶ᠋ᠢᠨ ᠢᠪᠢᠯᠦᠯ ᠲᠠᠢ ᠠ᠋ᠴᠠ ᠃
《 ᠬᠤᠷᠠ ᠶ᠋ᠢᠨ ᠡᠬᠢ ᠨᠢ ᠬᠠᠮᠢᠭᠠ ᠪᠣᠢ ᠂ ᠪᠣᠷᠣᠭᠠᠨ ᠰᠤᠷᠪᠤᠯᠵᠢ ᠨᠢ ᠶᠠᠭᠤ ᠪᠣᠢ 》–– ᠡᠷᠳᠡᠮᠲᠡᠨ ᠴᠢᠳᠠᠯᠲᠠᠨ ᠤ᠋ ᠡᠮᠦᠨᠡ ᠡᠪᠦᠳᠦᠭ ᠨᠤᠭᠤᠯᠬᠤ ᠶ᠋ᠢ ᠬᠢᠴᠢᠶᠡᠭᠰᠡᠨ ᠂ ᠨᠠᠪᠲᠠᠭ ᠰᠠᠪᠳᠠᠭ ᠬᠣᠶᠠᠷ ᠢᠨᠠᠭᠰᠢ ᠴᠢᠨᠠᠭᠰᠢ ᠬᠠᠷᠠᠪᠠᠯ ᠄
ᠳᠡᠭᠡᠷᠡ ᠡᠴᠡ ᠢᠷᠡᠭᠰᠡᠨ ᠴᠦ᠍ ᠪᠢᠰᠢ ᠂ ᠳᠡᠷᠭᠡᠳᠡ ᠡᠴᠡ ᠨᠢ ᠰᠠᠴᠤᠭᠰᠠᠨ ᠪᠠᠢᠵᠠᠢ ᠂ ᠠᠭᠠᠷ ᠠ᠋ᠴᠠ ᠪᠠᠭᠤᠭᠰᠠᠨ ᠴᠤ᠌ ᠪᠢᠰᠢ ᠂ ᠠᠲᠠᠷ ᠠ᠋ᠴᠠ ᠰᠦᠷᠴᠢᠭᠰᠡᠨ ᠪᠠᠢᠵᠠᠢ ᠃
–– ᠠ ᠄ 《 ᠨᠠᠷᠠ ᠲᠠᠢ ᠪᠠᠢᠭᠠᠳ ᠪᠣᠷᠣᠭᠠᠨ ᠲᠠᠢ 》 ᠭᠡᠳᠡᠭ ᠨᠢ ᠨᠠᠭᠠᠳᠤᠮ ᠴᠤ᠌ ᠪᠢᠰᠢ ᠂ ᠱᠤᠭᠤᠳᠡᠮ ᠴᠦ᠍ ᠪᠢᠰᠢ ᠂ ᠨᠢᠴᠤᠭᠠᠮᠠᠷ ᠴᠤ᠌ ᠪᠢᠰᠢ ᠂ ᠪᠤᠷᠤᠭᠤᠰᠢᠶᠠᠮᠠᠷ ᠴᠤ᠌ ᠪᠢᠰᠢ᠃ ᠨᠠᠷᠠᠯᠢᠭ ᠶᠢᠷᠲᠢᠨᠴᠦ ᠳ᠋ᠦ᠍ ᠲᠡᠷᠡ ᠶᠡᠷᠦᠨᠢ ᠵᠦᠢ ᠂ ᠨᠠᠢᠷᠰᠠᠭ ᠴᠠᠭ ᠲᠤ᠌ ᠲᠡᠷᠡ ᠶᠡᠷᠦᠨᠢ ᠶᠣᠰᠣ᠃
ᠳᠥᠷᠪᠡ ᠂ ᠡᠦᠲᠦ
ᠲᠡᠭᠷᠢ ᠶ᠋ᠢᠨ ᠣᠶᠣᠳᠠᠯ ᠭᠠᠵᠠᠷ ᠳᠡᠭᠡᠷᠡ ᠪᠠᠭᠤᠴᠢᠬᠠᠪᠠᠤ ! ᠲᠡᠭᠷᠢ ᠶ᠋ᠢᠨ ᠣᠶᠣᠳᠠᠯ ᠳᠡᠭᠡᠷᠡ ᠪᠢ ᠭᠠᠷᠴᠢᠬᠠᠪᠠᠤ ? ᠨᠢᠳᠦ ᠳᠦᠭᠦᠷᠡᠩ ᠡᠦᠲᠦ ᠠ᠋ ᠂ ᠬᠠᠷᠠᠭᠠ ᠳᠦᠭᠦᠷᠡᠩ ᠡᠦᠲᠦ ᠠ᠋᠃
ᠡᠦᠲᠦ ᠠ᠋! ᠡᠦᠲᠦ –– ᠪᠠᠶᠠᠷ ᠤ᠋ᠨ ᠡᠳᠦᠷ ᠲᠠᠭᠠᠷᠠᠭᠰᠠᠨ ᠪᠣᠯ ᠪᠠᠭᠴᠠᠲᠤ ᠴᠣᠮᠣᠷᠯᠢᠭ ᠤ᠋ᠨ ᠮᠥᠩᠭᠥᠨ ᠳᠡᠯᠪᠢ ᠭᠡᠬᠦ ᠰᠠᠨ ᠂ ᠨᠠᠢᠷ ᠤ᠋ᠨ ᠰᠥᠨᠢ ᠲᠣᠬᠢᠶᠠᠯᠳᠤᠭᠰᠠᠨ ᠪᠣᠯ ᠪᠡᠯᠭᠡᠲᠦ ᠴᠡᠴᠡᠭ ᠦ᠋ᠨ ᠠᠯᠲᠠᠨ ᠭᠡᠰᠡᠷ ᠭᠡᠬᠦ ᠰᠠᠨ᠃ ᠡᠦᠲᠦ ᠂ ᠤᠯᠠᠭᠠᠨ ᠴᠤ᠌ ᠪᠣᠢ ᠂ ᠨᠣᠭᠣᠭᠠᠨ ᠴᠤ᠌ ᠪᠣᠢ ᠂ ᠬᠥᠬᠡ ᠴᠦ᠍ ᠪᠣᠢ ᠂ ᠰᠢᠷᠠ ᠴᠤ᠌ ᠪᠣᠢ ᠂ ᠥᠩᠭᠡ ᠪᠦᠷᠢ ᠶ᠋ᠢᠨ ᠡᠦᠲᠦ ᠂ ᠡᠮᠦᠨᠡ ᠴᠦ᠍ ᠪᠣᠢ᠂ ᠬᠣᠢᠨᠠ ᠴᠤ᠌ ᠪᠣᠢ ᠂ ᠳᠡᠭᠡᠷᠡ ᠴᠦ᠍ ᠪᠣᠢ ᠂ ᠳᠣᠣᠷᠠ ᠴᠤ᠌ ᠂ ᠪᠣᠢ ᠂ ᠵᠦᠭ ᠪᠦᠬᠦᠨ ᠳ᠋ᠦ᠍ ᠃ ᠡᠦᠲᠦᠨ ᠭᠠᠷᠠᠭ ᠲᠤ᠌ ᠪᠢ ᠢᠩᠭᠢᠭᠡᠳ ᠬᠦᠪᠦᠬᠦ ᠨᠢ ᠦᠦ ? ᠡᠦᠲᠦᠨ ᠰᠦᠷᠦᠭ ᠲᠦ᠍ ᠪᠢ ᠢᠩᠭᠢᠭᠡᠳ ᠲᠥᠭᠡᠷᠢᠬᠦ ᠨᠢ ᠦᠦ ? ᠡᠦᠲᠦᠨ ᠳᠠᠯᠠᠢ ᠳ᠋ᠤ᠌ ᠪᠢ ᠢᠩᠭᠢᠭᠡᠳ ᠱᠤᠩᠪᠠᠬᠤ ᠨᠢ ᠦᠦ ? ᠡᠦᠲᠦᠨ ᠣᠷᠴᠢᠯᠠᠩ ᠳ᠋ᠤ᠌ ᠪᠢ ᠢᠩᠭᠢᠭᠡᠳ ᠲᠡᠨᠦᠬᠦ ᠨᠢ ᠦᠦ ? ᠵᠢᠭᠦᠷ ᠤᠷᠭᠤᠵᠤ ᠨᠢᠰᠦᠭᠡ ᠦᠭᠡᠢ ᠡᠴᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠪᠠᠢᠮᠠᠷ ᠯᠠ ᠶᠤᠮ ᠳᠠ ᠂ ᠵᠡᠭᠦᠳᠦ ᠮᠠᠨᠠᠵᠤ ᠤᠨᠲᠠᠭᠠ ᠦᠭᠡᠢ ᠡᠴᠡ ᠦᠨᠡᠨ ᠯᠡ ᠪᠠᠢᠮᠠᠷ ᠶᠤᠮ ᠳᠠ ᠃
᠁ ᠁
ᠲᠡᠭᠷᠢ ᠶ᠋ᠢᠨ ᠣᠶᠣᠳᠠᠯ ᠭᠠᠵᠠᠷ ᠳᠡᠭᠡᠷᠡ ᠪᠠᠭᠤᠭᠠ ᠦᠭᠡᠢ ᠂ ᠲᠡᠭᠷᠢ ᠶ᠋ᠢᠨ ᠣᠶᠣᠳᠠᠯ ᠳᠡᠭᠡᠷᠡ ᠪᠢ ᠴᠦ᠍ ᠭᠠᠷᠤᠭᠠ ᠦᠭᠡᠢ ᠃ ᠭᠡᠲᠡᠯᠡ ᠪᠢ ᠡᠦᠲᠦᠨ ᠳᠤᠮᠳᠠᠭᠤᠷ ᠠᠶᠠᠯᠠᠭᠰᠠᠭᠠᠷ ᠁᠁᠃
ᠡᠨᠡ ᠡᠦᠲᠦ –– ᠭᠡᠷᠡᠯᠳᠡᠨ ᠦ᠌ ᠭᠡᠭᠡᠨ ᠳ᠋ᠦ᠍ ᠬᠡᠷᠡᠯᠳᠦᠳᠡᠭ ᠂ ᠠᠯᠵᠠᠭᠤ ᠡᠦᠲᠦ ᠪᠢᠰᠢ ᠂ ᠭᠡᠷᠡᠯ ᠦᠭᠡᠢ ᠬᠠᠷᠠᠩᠭᠤᠢ ᠶ᠋ᠢ ᠭᠡᠢᠭᠦᠯᠳᠡᠭ ᠠᠵᠢᠯᠴᠢ ᠡᠦᠲᠦ ᠠ᠋ –– ᠲᠤᠶᠠᠭᠠᠲᠠᠨ ᠤ᠋ ᠲᠤᠶᠠᠭᠠᠨ ᠳ᠋ᠤ᠌ ᠲᠤᠶᠠᠭᠠᠯᠠᠳᠠᠭ ᠵᠠᠯᠬᠠᠭᠤ ᠣᠳᠣ ᠪᠢᠰᠢ ᠂ ᠲᠤᠶᠠᠭᠠ ᠦᠭᠡᠢ ᠪᠠᠯᠠᠷ ᠢ᠋ ᠭᠡᠢᠭᠦᠯᠳᠡᠭ ᠵᠢᠷᠭᠠᠯ ᠤ᠋ᠨ ᠡᠦᠲᠦ ᠠ᠋ ᠃ ᠠᠯᠲᠠᠨ ᠭᠡᠷᠡᠯ ᠨᠢ ᠠᠪᠤᠷᠭᠤ ᠪᠠᠷᠢᠯᠭᠠ ᠶ᠋ᠢᠨ ᠪᠣᠯᠣᠳ ᠰᠢᠷᠪᠦᠰᠦᠨ ᠳ᠋ᠦ᠍ ᠴᠣᠷᠭᠢᠨ ᠣᠴᠢᠭᠰᠠᠨ ᠠ᠋ᠴᠠ ᠲᠡᠭᠷᠢ ᠶ᠋ᠢᠨ ᠢᠯᠴᠢ ᠠᠳᠠ ᠬᠤᠷᠠᠵᠤ ᠂ ᠯᠤᠤᠰ ᠤ᠋ᠨ ᠴᠡᠷᠢᠭ ᠠᠳᠠ ᠴᠤᠭᠯᠠᠷᠠᠵᠠᠢ ᠃ ᠠᠯᠲᠠᠨ ᠰᠠᠴᠤᠷᠠᠭ ᠨᠢ ᠰᠦᠷᠯᠢᠭ ᠬᠠᠢᠷᠬᠠᠨ ᠤ᠋ ᠪᠣᠯᠣᠷ ᠮᠠᠨᠳᠠᠯ ᠳ᠋ᠤ᠌ ᠬᠠᠷᠪᠤᠨ ᠬᠦᠷᠦᠭᠰᠡᠨ ᠡᠴᠡ ᠮᠥᠩᠭᠥᠨ ᠮᠣᠭᠠᠢ ᠠᠳᠠ ᠭᠦᠷᠪᠡᠯᠵᠡᠵᠦ ᠂ ᠭᠠᠯ ᠯᠤᠤ ᠠᠳᠠ ᠲᠣᠭᠯᠠᠵᠠᠢ ᠃ ᠠᠯᠲᠠᠨ ᠲᠣᠯᠣᠩ ᠨᠢ ᠡᠭᠡᠷᠡᠮᠡ ᠴᠦᠯ ᠦ᠋ᠨ ᠲᠠᠴᠢᠷ ᠬᠥᠷᠥᠰᠥᠨ ᠳ᠋ᠦ᠍ ᠦᠰᠦᠷᠦᠨ ᠲᠤᠰᠤᠭᠰᠠᠨ ᠠ᠋ᠴᠠ ᠨᠣᠭᠣᠭᠠᠨ ᠨᠠᠷᠠᠰᠤ ᠠᠳᠠ ᠮᠥᠴᠢᠷᠯᠡᠵᠦ ᠂ ᠤᠯᠠᠭᠠᠨ ᠤᠳᠠᠪᠠᠯᠠ ᠠᠳᠠ ᠪᠠᠳᠮᠠᠯᠠᠵᠠᠢ ᠂ ᠠᠯᠲᠠᠨ ᠭᠡᠭᠡ ᠨᠢ ᠪᠠᠶᠠᠨ ᠵᠤᠰᠠᠯᠠᠩ ᠤ᠋ᠨ ᠪᠢᠲᠢᠷᠢᠶᠡᠨ ᠲᠣᠭᠣᠨᠣ ᠪᠠᠷ ᠰᠠᠳᠠᠷᠠᠨ ᠤᠨᠠᠭᠰᠠᠨ ᠠ᠋ᠴᠠ ᠡᠷᠳᠡᠮ ᠦ᠋ᠨ ᠪᠠᠯ ᠠᠳᠠ ᠬᠠᠩᠬᠤᠯᠵᠤ ᠂ ᠮᠡᠳᠡᠯᠭᠡ ᠶ᠋ᠢᠨ ᠷᠠᠰᠢᠶᠠᠨ ᠠᠳᠠ ᠣᠨᠳᠣᠷᠴᠠᠢ᠃
–– ᠡᠦᠲᠦ ᠠ᠋ ᠂ ᠡᠦᠲᠦ ᠂ ᠰᠠᠴᠤᠷᠠᠨ ᠳᠤᠸᠠᠯᠠᠬᠤ ᠠᠷᠢᠭᠤᠨ ᠰᠦᠨᠡᠰᠦ ᠶ᠋ᠢ ᠴᠢᠨᠢ ᠬᠡᠨ ᠣᠯᠭᠣᠵᠤ ᠂ ᠭᠡᠷᠡᠯᠲᠦᠨ ᠲᠤᠨᠤᠷᠠᠬᠤ ᠮᠥᠩᠬᠡ ᠰᠢᠳᠢ ᠶ᠋ᠢ ᠴᠢᠨᠢ ᠬᠡᠨ ᠵᠠᠬᠢᠷᠤᠨᠠᠮ ? ᠰᠣᠨᠣᠰᠤᠭᠠᠴᠢ!
ᠵᠢᠷᠦᠬᠡᠨ ᠴᠡᠴᠡᠭ ᠢ᠋ ᠴᠢᠨᠢ ᠮᠢᠷᠠᠯᠵᠠᠲᠠᠯᠠ ᠳᠡᠯᠭᠡᠷᠡᠭᠦᠯᠬᠦ ᠮᠣᠷᠢᠨ ᠬᠤᠭᠤᠷ ᠤ᠋ᠨ ᠡᠬᠡᠰᠢᠭ ᠢ᠋ ᠃
ᠲᠠᠪᠤ ᠂ ᠵᠡᠭᠦᠳᠦ
《 ᠡᠷᠳᠡᠨᠢ ᠡᠪᠦᠷᠲᠦᠯᠡᠵᠦ ᠢᠷᠡᠨᠡ ᠳᠠ ! ᠬᠠ ᠂ ᠬᠠ 》 ᠪᠠᠯᠠᠷ ᠠᠪᠤ ᠢᠩᠭᠢᠵᠦ ᠬᠦᠩᠭᠢᠨᠡᠲᠡᠯᠡ ᠪᠡᠨ ᠶᠠᠷᠢᠵᠤ ᠬᠠᠳᠠᠭᠠᠨᠠᠲᠠᠯᠠ ᠪᠠᠨ ᠢᠨᠢᠶᠡᠭᠡᠳ ᠨᠣᠢᠷ ᠠ᠋ᠴᠠ ᠪᠠᠨ ᠰᠡᠷᠢᠴᠢᠬᠡᠯᠡ᠃
ᠵᠡᠭᠦᠳᠦᠨ ᠦ᠌ ᠦᠭᠡ ᠂ ᠵᠡᠭᠦᠳᠦᠨ ᠦ᠌ ᠢᠨᠢᠶᠡᠳᠦ ᠃
ᠦᠭᠡ ᠨᠢ ᠲᠡᠢᠮᠦ ᠯᠠ ᠴᠣᠯᠭᠢᠭᠠᠳ ᠂ ᠢᠨᠢᠶᠡᠳᠦ ᠨᠢ ᠲᠡᠢᠮᠦ ᠯᠠ ᠲᠤᠯᠬᠢᠭᠤᠨ ᠂ ᠥᠰᠬᠡᠵᠦ ᠬᠡᠯᠡᠪᠡᠯ ᠠᠭᠤᠯᠠ ᠬᠠᠳᠠ ᠳᠣᠷᠭᠢᠵᠤ ᠳᠦᠰᠬᠡᠵᠦ ᠬᠡᠯᠡᠪᠡᠯ ᠤᠰᠤ ᠮᠥᠷᠡᠨ ᠴᠠᠯᠭᠢᠨᠠ ᠃
《 ᠭᠤᠷᠪᠠᠨ ᠠᠭᠤᠯᠠ 》 ᠰᠠᠭᠤᠷᠢ ᠪᠠᠷ ᠢ᠋ᠶ᠋ᠠᠨ ᠤᠷᠪᠠᠭᠤᠯᠤᠭᠳᠠᠵᠤ ᠂ ᠭᠣᠯᠣᠮᠲᠠ ᠤᠯᠤᠰ ᠲᠤ᠌ ᠬᠠᠪᠤᠷ ᠰᠠᠭᠠᠲᠠᠭᠰᠠᠨ ᠲᠡᠷᠡ ᠦᠶᠡ ᠳ᠋ᠦ᠍ ᠠᠵᠠ ᠵᠢᠷᠭᠠᠯ ᠤ᠋ᠨ ᠠᠷᠢᠭᠤᠨ ᠬᠡᠰᠢᠭ ᠢ᠋ ᠠᠩᠬᠠ ᠳᠡᠭᠡᠵᠢᠯᠡᠭᠡᠳ ᠢᠩᠭᠢᠵᠦ ᠨᠢᠭᠡ ᠢᠨᠢᠶᠡᠵᠦ ᠭᠡᠨᠡ ᠃ 《 ᠳᠥᠷᠪᠡᠨ ᠬᠣᠣᠷᠲᠠᠨ 》 ᠦᠨᠳᠦᠰᠦ ᠪᠡᠷ ᠢ᠋ᠶ᠋ᠡᠨ ᠤᠰᠠᠳᠬᠠᠭᠳᠠᠵᠤ ᠂ ᠲᠦᠪᠰᠢᠷᠡᠯ ᠪᠦᠯᠬᠦᠮᠳᠡᠯ ᠦ᠋ᠨ ᠨᠠᠮᠤᠷ ᠭᠡᠢᠭᠰᠡᠨ ᠲᠡᠷᠡ ᠴᠠᠭ ᠲᠤ᠌ ᠠᠷᠠᠳ ᠢᠷᠭᠡᠳ ᠦ᠋ᠨ ᠠᠷᠢᠭᠤᠨ ᠠᠯᠲᠠᠨ ᠡᠷᠬᠡ ᠪᠡᠨ ᠠᠭᠢᠨ ᠣᠯᠤᠭᠠᠳ ᠢᠩᠭᠢᠵᠦ ᠪᠠᠰᠠ ᠨᠢᠭᠡ ᠢᠨᠢᠶᠡᠵᠦ ᠭᠡᠨᠡ ᠃
ᠲᠡᠭᠡᠪᠡᠯ ᠡᠨᠡ ᠤᠳᠠᠭᠠ ᠨᠢ ?
ᠪᠠᠯᠠᠷ ᠠᠪᠤ ᠂ ᠰᠢᠩᠭᠡᠨ ᠬᠥᠮᠥᠰᠬᠡ ᠪᠡᠨ ᠬᠥᠳᠡᠯᠭᠡᠨ ᠂ ᠡᠮᠰᠢᠭᠡᠷ ᠠᠮᠠ ᠪᠠᠨ ᠠᠩᠰᠠᠢᠯᠭᠠᠬᠤ ᠳ᠋ᠤ᠌ ᠂ ᠪᠠᠳᠠᠷᠠᠨ ᠳᠡᠯᠭᠡᠷᠡᠭᠰᠡᠨ ᠵᠢᠷᠦᠬᠡᠨ ᠴᠡᠴᠡᠭ ᠦ᠋ᠨ ᠬᠢᠨᠢ ᠣᠮᠣᠭᠯᠠᠭᠤᠨ ᠭᠢᠯᠪᠠᠭᠠ ᠂ ᠰᠦᠮᠡᠭᠢ ᠬᠠᠷᠠᠴᠠ ᠠ᠋ᠴᠠ ᠨᠢ ᠴᠤᠬᠤᠯᠵᠠᠨᠠ ᠃
ᠳᠠᠭᠠᠭᠠᠴᠢ ᠳᠠ᠂ ᠳᠠᠭᠠᠭᠠᠴᠢ᠃ ᠡᠪᠦᠭᠡᠨ ᠠᠪᠤ ᠶ᠋ᠢᠨ ᠣᠶᠤᠨ ᠤ᠋ ᠣᠷᠴᠢᠯᠠᠩ ᠳ᠋ᠤ᠌ ᠶᠠᠭᠤ ᠤᠷᠭᠤᠭᠰᠠᠨ ᠢ᠋ ᠂ ᠦᠳᠡᠯᠦᠭᠡ ᠨᠠᠰᠤᠲᠠᠨ ᠤ᠋ ᠪᠢᠯᠢᠭ ᠦ᠋ᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠶᠠᠭᠤ ᠳᠡᠯᠭᠡᠭᠳᠡᠭᠰᠡᠨ ᠢ᠋᠃
《 ᠡᠷᠳᠡᠨᠢ ᠡᠪᠦᠷᠲᠦᠯᠡᠵᠦ ᠬᠠᠷᠢᠨᠠ ᠳᠠ 》 — ᠵᠢᠭᠠᠯ ᠦᠶᠡ ᠶ᠋ᠢᠨ ᠬᠢᠨᠢ ᠬᠦᠰᠡᠯ ᠪᠢᠵᠡ ᠂ ᠵᠠᠯᠠᠭᠤ ᠴᠠᠭ ᠤ᠋ᠨ ᠬᠢᠨᠢ ᠵᠣᠷᠢᠯ ᠪᠢᠵᠡ !
ᠬᠠᠨᠠᠰᠠ ᠳᠠ᠂ ᠬᠠᠨᠠᠰᠠ . ᠪᠠᠯᠪᠠᠨ ᠢᠷᠡᠬᠦ ᠬᠠᠷᠠ ᠲᠠᠰᠢᠭᠤᠷ ᠯᠠ 《 ᠬᠦᠮᠦᠵᠢᠯᠲᠦ ᠬᠦᠷᠲᠡᠭᠡᠯ 》ᠪᠣᠯᠵᠤ ᠂ ᠪᠢᠴᠢᠯᠡᠨ ᠢᠷᠡᠬᠦ ᠬᠠᠷᠭᠢᠰ ᠲᠠᠮᠤᠯᠠᠯ ᠯᠠ 《 ᠪᠣᠯᠪᠠᠰᠤᠨ ᠣᠷᠴᠢᠨ 》 ᠪᠣᠯᠤᠭᠰᠠᠨ ᠲᠡᠷᠡᠬᠦ ᠠᠮᠢᠳᠤ ᠶ᠋ᠢᠨ ᠲᠠᠮᠤ ᠳ᠋ᠤ᠌ ᠬᠠᠮᠢᠭᠠ ᠠ᠋ᠴᠠ 《 ᠡᠷᠳᠡᠮ 》 ᠭᠡᠰᠡᠨ ᠤᠬᠠᠭᠳᠠᠬᠤᠨ ᠲᠡᠳᠡᠨ ᠦ᠌ ᠲᠠᠷᠢᠬᠢᠨ ᠳ᠋ᠤ᠌ ᠬᠦᠪᠦᠷᠡᠨ ᠂ 《 ᠡᠷᠳᠡᠨᠢ 》 ᠶ᠋ᠢ ᠬᠦᠰᠡᠬᠦ ᠰᠡᠳᠬᠢᠯ ᠂ ᠲᠡᠳᠡᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠰᠣᠶᠣᠭᠠᠯᠠᠬᠤ ᠪᠢᠯᠡ ᠁
ᠣᠨᠢᠰᠣᠭᠠ ᠬᠣᠨᠵᠢᠭᠰᠠᠨ ᠬᠡᠦᠬᠡᠳ ᠰᠢᠭ ᠣᠩᠭᠣᠢᠨ ᠢᠨᠢᠶᠡᠬᠦ ᠪᠠᠯᠠᠷ ᠠᠪᠤ ᠶ᠋ᠢᠨ ᠬᠠᠷᠠᠴᠠ ᠠ᠋ᠴᠠ ᠲᠠᠢᠯᠪᠤᠷᠢ ᠣᠯᠬᠤ ᠪᠠᠷ ᠰᠢᠢᠳᠦᠨ ᠳᠠᠭᠠᠭᠤᠯᠤᠨ ᠬᠠᠷᠠᠪᠠᠯ : ᠠ ! ᠡᠷᠳᠡᠨᠢ ᠡᠪᠦᠷᠲᠦᠯᠡᠬᠦ ᠵᠣᠯᠪᠣᠭᠠᠲᠤ ᠬᠥᠮᠦᠰ ᠨᠢ ᠠᠳᠠ ᠪᠠᠢᠵᠠᠢ — ᠶᠡᠬᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠬᠠᠮᠲᠤ ᠳᠠᠪᠰᠢᠨ ᠂ ᠡᠷᠳᠡᠮ ᠦ᠋ᠨ ᠳᠠᠯᠠᠢ ᠳ᠋ᠤ᠌ ᠴᠣᠭ ᠱᠤᠩᠪᠠᠬᠤ ᠭᠤᠷᠪᠠᠨ ᠠᠴᠢ ᠶ᠋ᠢᠨ ᠬᠢᠨᠢ ᠪᠠᠶᠠᠰᠬᠤᠯᠠᠩᠲᠤ ᠢᠨᠢᠶᠡᠳᠦ ᠰᠢᠯ ᠦ᠋ᠨ ᠴᠠᠭᠠᠨᠠ ᠦᠵᠡᠭᠳᠡᠨ ᠂ ᠪᠣᠯᠣᠷ ᠤ᠋ᠨ ᠴᠠᠭᠠᠨᠠ ᠲᠣᠳᠣᠷᠠᠨᠠ ᠃
ᠪᠠᠶᠠᠷᠯᠠᠭᠤᠱᠢᠲᠠᠢ ᠪᠢᠰᠢᠦ ᠂ ᠪᠠᠬᠠᠳᠤᠭᠤᠱᠢᠲᠠᠢ ᠪᠢᠰᠢᠦ ᠃ ᠡᠭᠡᠯ ᠮᠠᠯᠴᠢᠳ ᠤ᠋ᠨ ᠬᠦᠰᠡᠯ ᠦ᠋ᠨ ᠴᠢᠪᠬᠠᠳᠠᠰᠤ ᠂ ᠡᠷᠢᠯ ᠦ᠋ᠨ ᠬᠥᠭ ᠂ ᠣᠷᠭᠢᠯ ᠥᠭᠡᠳᠡ ᠂ ᠡᠦᠲᠦᠨ ᠥᠭᠡᠳᠡ ᠂ ᠣᠭᠲᠠᠷᠭᠤᠢ ᠥᠭᠡᠳᠡ ᠂ ᠣᠷᠴᠢᠯᠠᠩ ᠥᠭᠡᠳᠡ ᠂ ᠰᠢᠭᠤᠳᠤᠨ ᠵᠦᠭᠯᠡᠭᠰᠡᠨ ᠢ᠋ ᠂ ᠰᠢᠭᠤᠷᠤᠨ ᠨᠢᠰᠦᠭᠰᠡᠨ ᠢ᠋ ᠱᠤᠩᠭᠤᠨ ᠲᠡᠮᠡᠦᠯᠦᠭᠰᠡᠨ ᠢ᠋ ᠂ ᠰᠤᠨᠤᠨ ᠵᠣᠷᠢᠭᠰᠠᠨ ᠢ᠋ ᠃
᠁ ᠢᠩᠭᠢᠮᠡᠨᠵᠢᠨ ᠰᠠᠶᠢ ᠬᠠᠪᠤᠷ ᠨᠢ ᠬᠠᠪᠤᠷ ᠠ᠋ᠴᠠ ᠪᠠᠨ ᠬᠠᠪᠤᠷ ᠪᠣᠯᠵᠤ ᠂ ᠬᠥᠬᠡ ᠨᠢ ᠬᠥᠬᠡ ᠡᠴᠡ ᠪᠡᠨ ᠬᠥᠬᠡ ᠪᠣᠯᠤᠨᠠ ᠃ ᠡᠨᠡ ᠪᠣᠯ ᠮᠠᠨ ᠤ᠋ ᠴᠣᠭ ᠵᠣᠯᠢ᠂ ᠡᠨᠡ ᠪᠣᠯ ᠮᠠᠨ ᠤ᠋ ᠴᠣᠯᠮᠣᠨ ᠭᠡᠭᠡ ᠃
ᠵᠢᠷᠭᠤᠭᠠ ᠂ ᠴᠡᠴᠡᠭ
᠁ ᠴᠡᠴᠡᠭ ᠦ᠋ᠨ ᠳᠠᠪᠠᠯᠭᠠᠨ ᠮᠢᠩᠭᠠᠨ ᠭᠠᠵᠠᠷ ᠦᠷᠭᠦᠯᠵᠢᠯᠡᠨ ᠂ ᠴᠡᠴᠡᠭ ᠦ᠋ᠨ ᠳᠣᠯᠭᠢᠶᠠᠨ ᠲᠦᠮᠡᠨ ᠪᠠᠷᠠ ᠰᠤᠨᠤᠨᠠ ᠁
ᠠ︕ ᠡᠨᠡ ᠪᠣᠯ ᠴᠡᠴᠡᠭ ᠦ᠋ᠨ ᠳᠠᠯᠠᠢ — ᠲᠠᠯᠠ ᠨᠤᠲᠤᠭ ᠂ ᠲᠠᠯᠠ ᠨᠤᠲᠤᠭ — ᠴᠡᠴᠡᠭ ᠦ᠋ᠨ ᠳᠠᠯᠠᠢ ᠃ ᠡᠨᠡ ᠪᠣᠯ ᠴᠡᠴᠡᠭ ᠦ᠋ᠨ ᠥᠯᠥᠭᠡᠢ — ᠲᠠᠯᠠ ᠨᠤᠲᠤᠭ ᠂ ᠲᠠᠯᠠ ᠨᠤᠲᠤᠭ — ᠴᠡᠴᠡᠭ ᠦ᠋ᠨ ᠥᠯᠥᠭᠡᠢ ᠃
ᠠᠯᠠᠭ ᠡᠷᠪᠡᠬᠡᠢ ᠠᠯᠵᠢᠶᠠᠯ ᠢ᠋ ᠲᠡᠪᠴᠢᠨ ᠠᠳᠠ ᠳᠡᠷᠪᠡᠭᠡᠳ ᠢᠷᠡᠵᠡᠢ ᠂ ᠠᠵᠤ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠦᠶᠡ ᠶ᠋ᠢᠨ ᠦᠶᠡ ᠠᠳᠠ ᠡᠷᠬᠢᠯᠡᠬᠦ ᠭᠡᠨᠡ ᠃ ᠠᠵᠢᠯᠴᠢ ᠵᠥᠭᠡᠢ ᠠᠯᠤᠰ ᠢ᠋ ᠡᠪᠬᠡᠨ ᠠᠳᠠ ᠵᠢᠩᠭᠢᠨᠡᠭᠡᠳ ᠢᠷᠡᠵᠡᠢ ᠃ ᠠᠳᠠᠯ ᠦᠢᠯᠡᠰ ᠢ᠋ᠶ᠋ᠡᠨ ᠭᠠᠯᠪᠠ ᠶ᠋ᠢᠨ ᠭᠠᠯᠪᠠ ᠠᠳᠠ ᠴᠣᠭᠴᠠᠯᠠᠬᠤ ᠭᠡᠨᠡ ᠃
ᠲᠣᠭᠠᠯᠠᠭᠠᠳ ᠪᠠᠷᠠᠬᠤ ᠦᠭᠡᠢ ᠠᠢᠮᠠᠭ ᠢᠵᠠᠭᠤᠷ ᠲᠠᠢ ᠲᠠᠯᠠ ᠶ᠋ᠢᠨ ᠴᠡᠴᠡᠭ ᠳᠣᠲᠣᠷᠠ ᠠ᠋ᠴᠠ ᠂ ᠨᠡᠷᠡᠯᠡᠭᠡᠳ ᠳᠤᠭᠤᠷᠠᠬᠤ ᠦᠭᠡᠢ ᠲᠥᠷᠥᠯ ᠵᠦᠢᠯ ᠲᠡᠢ ᠲᠠᠯᠠ ᠶ᠋ᠢᠨ ᠴᠡᠴᠡᠭ ᠳᠤᠮᠳᠠ ᠠ᠋ᠴᠠ ᠪᠢ ᠦᠵᠡᠯᠡ ᠂ ᠪᠢ ᠬᠠᠷᠠᠯᠠ — ᠡᠭᠡᠭᠡ ᠠᠳᠠᠯᠢ ᠦᠨᠳᠦᠰᠦ ᠲᠡᠢ ᠂ ᠡᠭᠡᠭᠡ ᠠᠳᠠᠯᠢ ᠦᠵᠡᠮᠵᠢ ᠲᠡᠢ ᠂ ᠡᠭᠡᠭᠡ ᠠᠳᠠᠯᠢ ᠨᠠᠬᠢᠶᠠ ᠲᠠᠢ ᠂ ᠡᠭᠡᠭᠡ ᠠᠳᠠᠯᠢ ᠨᠠᠪᠴᠢ ᠲᠠᠢ ᠂ ᠮᠢᠩᠭᠠᠨ ᠮᠢᠩᠭᠠᠨ ᠴᠡᠴᠡᠭ ᠢ᠋ ᠲᠦᠮᠡᠨ ᠲᠦᠮᠡᠨ ᠴᠡᠴᠡᠭ ᠢ᠋ ᠂ ᠲᠡᠷᠡ ᠮᠠᠨᠤᠬᠤ ᠰᠢᠭ᠋ ᠤᠯᠠᠭᠠᠨ ᠂ ᠱ᠌ᠢᠷᠦ ᠰᠢᠭ ᠤᠯᠠᠭᠠᠨ ᠂ ᠭᠠᠯ ᠰᠢᠭ᠋ ᠤᠯᠠᠭᠠᠨ ᠂ ᠨᠠᠷᠠ ᠰᠢᠭ᠋ ᠤᠯᠠᠭᠠᠨ ᠁ ᠁
ᠰᠣᠷᠭᠣᠭ ᠬᠤᠷᠴᠠ ᠭᠡᠪᠡᠯ ᠡᠢᠮᠦ ᠶ᠋ᠢ ᠯᠡ ᠬᠡᠯᠡᠳᠡᠭ ᠪᠠᠢᠬᠤ ᠳᠠ ᠂ ᠰᠣᠳᠣ ᠰᠠᠢᠬᠠᠨ ᠭᠡᠪᠡᠯ ᠡᠢᠮᠦ ᠶ᠋ᠢ ᠯᠡ ᠳᠤᠷᠠᠳᠳᠠᠭ ᠪᠠᠢᠬᠠ ᠳᠠ ᠃ ᠭᠡᠲᠡᠯᠡ ᠲᠡᠭᠦᠨ ᠦ᠌ ᠰᠣᠷᠭᠣᠭ ᠬᠤᠷᠴᠠ ᠪᠠ ᠰᠣᠳᠣ ᠰᠠᠢᠬᠠᠨ ᠨᠢ ᠨᠠᠪᠲᠠᠷᠠᠮᠠ ᠰᠢᠩᠭᠡᠮᠡ ᠠᠩᠬᠢᠯᠤᠮᠠᠯ ᠳ᠋ᠠᠭᠠᠨ ᠯᠠ ᠪᠠᠢᠬᠤ ᠪᠢᠰᠢ ᠂ ᠨᠡᠪᠴᠢᠮᠡ ᠲᠤᠰᠤᠯᠤᠮᠠ ᠡᠩᠭᠡᠰᠬᠡ ᠳ᠋ᠡᠭᠡᠨ ᠯᠡ ᠪᠠᠢᠬᠤ ᠪᠢᠰᠢ ᠂ ᠬᠠᠷᠢᠨ ᠂ ᠦᠨᠡᠨ ᠶᠣᠰᠣᠨ ᠤ᠋ ᠠᠯᠲᠠᠨ ᠳᠡᠯᠪᠢ ᠶ᠋ᠢ ᠨᠡᠭᠡᠭᠡᠳᠡᠭ ᠲᠦ᠍ ᠪᠣᠢ ᠂ ᠣᠶᠤᠨ ᠤᠬᠠᠭᠠᠨ ᠤ᠋ ᠰᠢᠵᠢᠷ ᠴᠣᠮᠣᠷᠯᠢᠭ ᠢ᠋ ᠳᠡᠯᠭᠡᠳᠡᠭ ᠲᠦ᠍ ᠪᠣᠢ ᠃
ᠴᠡᠴᠡᠭ ᠴᠡᠴᠡᠭ ᠡᠴᠡ ᠲᠡᠷᠡ ᠣᠨᠳᠣᠣ ᠪᠠᠢᠳᠠᠭ ᠨᠢ ᠂ ᠨᠠᠷᠠ ᠢᠯᠡᠭᠦᠦ ᠡᠭᠡᠭᠡᠵᠦ ᠦᠦ? ᠪᠣᠯᠪᠠᠰᠤᠨ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠤ᠋ᠨ ᠥᠪ ᠢ᠋ᠶ᠋ᠡᠷ ᠥᠩᠭᠡᠯᠢᠭ ᠬᠥᠷᠥᠰᠥ ᠪᠡᠨ ᠪᠣᠯᠭᠠᠭᠰᠠᠨ ᠠ᠋ᠴᠠ ᠂ ᠪᠣᠮᠠᠨ ᠣᠨ ᠤ᠋ ᠪᠢᠯᠢᠭ ᠦ᠋ᠨ ᠰᠠᠩ ᠢ᠋ᠶ᠋ᠠᠷ ᠥᠭᠭᠢᠶᠡᠮᠦᠷ ᠲᠡᠵᠢᠭᠡᠯ ᠢ᠋ᠶ᠋ᠡᠨ ᠪᠣᠯᠭᠠᠭᠰᠠᠨ ᠠ᠋ᠴᠠ ᠂ ᠡᠨᠡᠷᠢᠯᠲᠦ ᠨᠠᠮ ᠤ᠋ᠨ ᠬᠠᠢᠷᠠ ᠬᠠᠯᠠᠮᠵᠢ ᠶ᠋ᠢᠨ ᠢᠯᠴᠢ ᠳᠤᠯᠠᠭᠠᠨ ᠢ᠋ ᠬᠦᠷᠲᠡᠭᠰᠡᠨ ᠡᠴᠡ ᠂ ᠡᠷᠡᠨ ᠴᠠᠭ ᠤ᠋ᠨ ᠬᠠᠨᠳᠤᠯᠭᠠ ᠳᠡᠮᠵᠢᠯᠭᠡ ᠶ᠋ᠢᠨ ᠢᠳᠡᠷᠬᠡᠭ ᠰᠦᠯᠳᠡ ᠶ᠋ᠢ ᠰᠡᠭᠦᠳᠡᠷᠯᠡᠭᠰᠡᠨ ᠡᠴᠡ ᠡᠨᠡ ᠴᠡᠴᠡᠭ ᠲᠦ᠍ ᠤᠷᠭᠤᠵᠤ ᠳᠡᠭᠵᠢᠬᠦ ᠯᠡ ᠪᠠᠢᠬᠤ ᠠ᠋ᠴᠠ ᠪᠢᠰᠢ ᠂ ᠤᠨᠠᠵᠤ ᠵᠤᠯᠭᠠᠷᠠᠬᠤ ᠪᠠᠢᠳᠠᠭ ᠦᠭᠡᠢ ᠃
ᠨᠥᠬᠥᠳ ᠮᠢᠨᠢ! ᠣᠷᠴᠢᠯᠠᠩ ᠳᠡᠯᠡᠬᠡᠢ ᠶ᠋ᠢᠨ ᠴᠡᠯᠭᠡᠷ ᠠᠭᠤᠳᠠᠮ ᠢ᠋ ᠪᠢᠳᠡ ᠮᠡᠳᠡᠨᠡ ᠃ ᠣᠷᠴᠢᠯᠠᠩ ᠳᠠᠶᠠᠭᠠᠷ ᠴᠡᠴᠡᠭ ᠬᠤᠸᠠᠷ ᠲᠠᠢ ᠶ᠋ᠢ ᠴᠦ᠍ ᠪᠢᠳᠡ ᠮᠡᠳᠡᠨᠡ ᠃ ᠭᠡᠲᠡᠯᠡ ᠡᠨᠡ ᠴᠡᠴᠡᠭ ᠰᠢᠭ ᠬᠠᠪᠤᠷ ᠂ ᠵᠤᠨ ᠂ ᠨᠠᠮᠤᠷ ᠂ ᠡᠪᠦᠯ ᠭᠡᠵᠦ ᠤᠯᠠᠷᠢᠯ ᠢᠯᠭᠠᠳᠠᠭ ᠦᠭᠡᠢ ᠂ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠂ ᠴᠢᠭᠢᠭ ᠂ ᠨᠣᠢᠲᠠᠨ ᠭᠡᠵᠦ ᠨᠥᠬᠥᠴᠡᠯ ᠰᠢᠯᠢᠳᠡᠭ ᠦᠭᠡᠢ ᠪᠠᠳᠠᠷᠠᠨ ᠳᠤᠯᠠᠯᠵᠠᠭᠠᠳ ᠯᠠ ᠪᠠᠢᠳᠠᠭ ᠂ ᠪᠠᠭᠰᠢᠷᠠᠨ ᠤᠯᠠᠯᠵᠠᠭᠠᠳ ᠯᠠ ᠪᠠᠢᠳᠠᠭ ᠂ ᠠᠮᠢᠯᠠᠯ ᠤ᠋ᠨ ᠴᠣᠭ ᠵᠢᠪᠬᠤᠭᠠ ᠲᠠᠢ ᠂ ᠥᠨᠢᠳᠡ ᠶ᠋ᠢᠨ ᠪᠡᠯᠭᠡ ᠰᠤᠪᠢᠨ ᠲᠠᠢ ᠂ ᠠᠰᠢᠳᠠ ᠶ᠋ᠢᠨ ᠬᠦᠰᠡᠯ ᠨᠠᠢᠳᠠᠪᠤᠷᠢ ᠲᠠᠢ ᠂ ᠬᠠᠮᠲᠤ ᠶ᠋ᠢᠨ ᠠᠯᠤᠰ ᠬᠡᠳᠦ ᠲᠡᠢ ᠴᠡᠴᠡᠭ ᠥᠭᠡᠷᠡ ᠪᠠᠢᠨᠠ ᠤᠤ ?
ᠦᠭᠡᠢ ᠂ ᠭᠠᠭᠴᠠ ᠬᠦ᠌ ᠡᠨᠡ ᠯᠡ ᠃
ᠡᠨᠡ ᠪᠣᠯ ᠵᠢᠩᠬᠢᠨᠢ ᠴᠡᠴᠡᠭ ᠂ ᠶᠣᠰᠣᠲᠠᠢ ᠴᠡᠴᠡᠭ ᠂ ᠦᠨᠡᠨ ᠴᠡᠴᠡᠭ ᠂ ᠴᠡᠴᠡᠭ ᠦ᠋ᠨ ᠳᠣᠲᠣᠷᠠᠬᠢ ᠴᠡᠴᠡᠭ ᠂ — ᠲᠠᠯᠠ ᠨᠤᠲᠤᠭ ᠤ᠋ᠨ ᠥᠨᠥᠳᠥᠷ ᠦ᠋ᠨ ᠴᠡᠴᠡᠭ ᠂ ᠲᠠᠯᠠ ᠨᠤᠲᠤᠭ ᠤ᠋ᠨ ᠮᠠᠷᠭᠠᠲᠤᠷ ᠤ᠋ᠨ ᠺᠣᠪᠠᠷᠠᠢᠺ᠂ ᠱᠸᠺᠠᠰᠪᠸᠷ ᠂ ᠸᠸᠨᠴᠢ ᠂ ᠨᠢᠶᠦᠲ᠋ᠥ᠋ᠨ ᠂ ᠳ᠋ᠠᠷᠸᠸᠨ ᠂ ᠮᠢᠴᠥ᠋ᠷᠢᠨ ᠂ ᠠᠢᠨᠰᠲ᠋ᠧᠨ ᠂ ᠹᠸᠨᠳᠤᠹᠸᠨ᠂ ᠴᠧᠨ ᠵᠢᠩ ᠷᠦᠨ ᠂ ᠯᠢ ᠰᠧ ᠭᠤᠸᠠᠩ ᠁
ᠳᠣᠯᠣᠭᠠ ᠂ ᠨᠠᠢᠷ
《 ᠡᠢᠮᠦ ᠭᠠᠵᠠᠷ ᠪᠠᠢᠭᠰᠠᠨ ᠢ᠋ ᠪᠢᠳᠡ ᠶᠠᠭᠠᠬᠢᠭᠠᠳ ᠮᠡᠳᠡᠭᠰᠡᠨ ᠦᠭᠡᠢ ᠪᠣᠢ ? ᠡᠢᠮᠦ ᠭᠠᠵᠠᠷ ᠪᠠᠢᠬᠤ ᠶ᠋ᠢ ᠪᠢᠳᠡ ᠬᠡᠴᠢᠨᠡᠨ ᠴᠦ᠍ ᠬᠦᠰᠡᠪᠡ ᠳᠡ 》 ᠵᠢᠩᠭᠠᠷ ᠪᠠᠭᠠᠲᠤᠷ ᠂ ᠲᠤᠤ ᠶᠤᠸᠠᠨ ᠮᠢᠩ ᠠᠪᠤᠭᠠᠢ ᠂ ᠮᠥᠸᠧᠷ ᠪᠠᠭᠰᠢ ᠶᠠᠷᠢᠯᠴᠠᠭᠰᠠᠭᠠᠷ ᠠᠯᠬᠤᠨᠠ ᠃
— ᠠᠭᠠᠷᠤ ᠂ ᠽᠠᠨᠳᠠᠨ ᠂ ᠠᠨᠬᠤᠸᠠ᠂ ᠲᠠᠨᠬᠤᠸᠠ ᠶ᠋ᠢᠨ ᠰᠡᠩᠭᠢᠨᠡᠮᠡ ᠴᠠᠩᠭᠢᠨᠠᠮᠠ ᠶ᠋ᠢ ᠦᠨᠦᠷᠲᠦᠭᠰᠡᠨ ᠦᠭᠡᠢ ᠴᠦ᠍ ᠂ ᠠᠷᠴᠠ᠂ ᠵᠠᠭ ᠂ ᠠᠭᠢ ᠂ ᠳᠠᠭᠠᠨᠠ ᠶ᠋ᠢᠨ ᠠᠩᠬᠢᠯᠤᠮᠠ ᠬᠠᠩᠬᠤᠯᠤᠮᠠ ᠶ᠋ᠢ ᠦᠨᠦᠰᠦᠯᠡ ᠃
— ᠠᠮᠢᠳᠤ ᠣᠷᠬᠣᠳᠠᠢ ᠂ ᠠᠯᠲᠠᠨ ᠷᠢᠯᠦ ᠶ᠋ᠢᠨ ᠮᠥᠩᠬᠡ ᠶ᠋ᠢᠨ ᠰᠢᠳᠢ ᠶ᠋ᠢ ᠣᠯᠤᠭᠰᠠᠨ ᠦᠭᠡᠢ ᠴᠦ᠍ ᠂ ᠠᠪᠤᠷᠭᠤ ᠨᠠᠷᠠᠰᠤ ᠂ ᠴᠠᠭᠠᠨ ᠤᠯᠢᠶᠠᠰᠤᠨ ᠤ᠋ ᠵᠢᠩᠬᠢᠨᠢ ᠴᠢᠨᠠᠷ ᠢ᠋ ᠬᠦᠷᠲᠡᠯᠡ ᠃
— ᠷᠠᠰᠢᠶᠠᠨᠲᠤ ᠰᠢᠭᠦᠳᠡᠷᠢ ᠂ ᠰᠠᠬᠢᠭᠤᠯᠰᠤᠨ ᠤᠰᠤᠨ ᠤ᠋ ᠪᠠᠯ ᠰᠢᠮᠡ ᠶ᠋ᠢ ᠳᠡᠭᠡᠵᠢᠯᠡᠭᠰᠡᠨ ᠦᠭᠡᠢ ᠴᠦ᠍ ᠂ ᠠᠢᠷᠠᠭ ᠲᠠᠷᠠᠭ ᠂ ᠰᠦ ᠴᠡᠬᠡ ᠶ᠋ᠢᠨ ᠰᠣᠨᠢᠨ ᠰᠡᠪᠡᠭᠦᠨ ᠳ᠋ᠦ᠍ ᠰᠣᠭᠲᠣᠭᠤᠷᠠᠯᠠ ᠃
— ᠡᠷᠳᠡᠨᠢ ᠬᠤᠯᠤ ᠂ ᠬᠤᠪᠢᠯᠭᠠᠨ ᠴᠢᠨᠳᠠᠮᠠᠨᠢ ᠶ᠋ᠢᠨ ᠶᠢᠯᠸᠢ ᠤᠪᠠᠳᠢᠰ ᠢ᠋ ᠬᠠᠷᠠᠭᠰᠠᠨ ᠦᠭᠡᠢ ᠴᠦ᠍ ᠡᠷᠳᠡᠮ ᠰᠣᠶᠣᠯ ᠂ ᠪᠢᠯᠢᠭ ᠣᠶᠤᠨ ᠤ᠋ ᠡᠷᠬᠢᠮ ᠴᠤᠬᠠᠭ ᠢ᠋ ᠲᠠᠨᠢᠯᠠ ᠃
— ᠬᠠ ! ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠪᠠᠷᠢᠯᠭᠠ ᠶᠠᠮᠠᠷ ᠭᠣᠶᠣᠬᠠᠨ ᠠᠰᠠᠷ ᠪᠣᠢ ᠃
— ᠭᠬᠢᠷ ᠦᠭᠡᠢ ᠴᠠᠭᠠᠨ ᠬᠡᠷᠡᠮ ᠨᠢ ᠣᠸ᠋ᠠ ᠪᠠᠷ ᠵᠦᠯᠭᠦᠭᠰᠡᠨ ᠰᠢᠭ ᠂ ᠥ ᠦᠭᠡᠢ ᠠᠰᠬᠠᠨ ᠬᠡᠯᠪᠡᠷᠢ ᠨᠢ ᠱᠣᠣ ᠪᠠᠷ ᠵᠡᠷᠭᠡᠯᠡᠭᠰᠡᠨ ᠰᠢᠭ ᠃ ᠭᠠᠨᠲᠢᠭ ᠬᠡᠷᠡᠰᠬᠡ ᠂ ᠬᠠᠰ ᠤ᠋ᠨ ᠶᠡᠨᠳᠡᠷ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠠ ᠦᠭᠡᠢ ᠴᠦ᠍ ᠂ ᠭᠠᠩᠭᠠᠩ ᠭᠣᠢᠳᠠ ᠪᠠᠷ ᠲᠡᠷᠡ ᠶᠡᠷᠦᠨᠢ ᠳᠤᠲᠠᠮᠠᠭ ᠪᠤᠰᠤ ᠂ ᠱ᠌ᠢᠷᠦᠨ ᠳᠡᠭᠡᠪᠦᠷ ᠂ ᠰᠡᠢᠯᠪᠦᠷᠢᠲᠦ ᠰᠠᠷᠠᠪᠴᠢ ᠂ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠠ ᠦᠭᠡᠢ ᠴᠦ᠍ ᠰᠢᠨᠡ ᠬᠡᠭᠡᠨᠴᠢᠷ ᠢ᠋ᠶ᠋ᠡᠷ ᠲᠡᠷᠡ ᠶᠡᠷᠦᠨᠢ ᠳᠤᠯᠢᠮᠠᠭ ᠪᠤᠰᠤ ᠃ ᠠᠵᠠ ᠵᠢᠷᠭᠠᠯ ᠢ᠋ᠶ᠋ᠠᠨ ᠲᠠᠪᠠᠲᠠᠢ ᠴᠣᠭᠴᠠᠯᠠᠭᠠ ᠂ ᠭᠠᠷᠮᠠᠭᠠᠢ ᠡᠵᠡᠨ ᠨᠢ ᠬᠡᠨ ᠶᠦ᠍ᠮ ᠪᠣᠯ ᠂ ᠠᠳᠠᠯ ᠦᠢᠯᠡᠰ ᠢ᠋ᠶ᠋ᠡᠨ ᠬᠠᠪᠤᠲᠠᠢ ᠪᠣᠰᠬᠠᠭᠠ ᠭᠠᠢᠬᠠᠮᠰᠢᠭᠲᠤ ᠪᠠᠭᠠᠲᠤᠷ ᠨᠢ ᠬᠡᠨ ᠶᠦ᠍ᠮ ᠪᠣᠯ? ᠤᠭᠠᠯᠵᠠᠨ ᠭᠣᠷᠣᠬᠠ ᠶ᠋ᠢᠨ ᠲᠤᠩᠭᠠᠯᠠᠭ ᠰᠢᠪᠡᠨᠡᠭᠡ ᠶ᠋ᠢ ᠴᠢᠩᠨᠠᠨ ᠮᠥᠷᠳᠡᠭᠰᠡᠭᠡᠷ ᠂
ᠤᠷᠠᠨ ᠲᠣᠳᠢ ᠶ᠋ᠢᠨ ᠳᠡᠭᠵᠢᠨ ᠳᠣᠩᠭᠣᠳᠤᠭᠠ ᠶ᠋ᠢ ᠬᠠᠢᠨ ᠳᠠᠭᠠᠭᠰᠠᠭᠠᠷ ᠁
ᠪᠣᠯᠣᠷ ᠡᠭᠦᠳᠡᠨ ᠦ᠌ ᠡᠷᠭᠢᠯᠳᠦᠬᠦ ᠵᠢᠪᠠᠷ ᠢ᠋ ᠰᠠᠶᠢ ᠠᠯᠬᠤᠮᠠᠭᠴᠠ ᠪᠤᠴᠠᠬᠤ ᠶ᠋ᠢᠨ ᠴᠦ᠍ ᠠᠷᠭᠠ ᠦᠭᠡᠢ ᠤᠬᠤᠷᠢᠬᠤ ᠶ᠋ᠢᠨ ᠴᠦ᠍ ᠠᠷᠭᠠ ᠦᠭᠡᠢ᠂ ᠳ᠋ᠧᠩ ᠦ᠋ᠨ ᠳᠠᠯᠠᠢ ᠳ᠋ᠤ᠌ ᠵᠢᠪᠬᠦᠨ ᠴᠡᠴᠡᠭ ᠦ᠋ᠨ ᠳᠠᠯᠠᠢ ᠳ᠋ᠤ᠌ ᠲᠣᠨᠣᠪᠠ ᠃
ᠦᠵᠡ ᠯᠡ ᠳᠡ! ᠲᠠᠩᠬᠢᠮ ᠳᠦᠭᠦᠷᠡᠩ ᠡᠭᠡᠯ ᠠᠷᠠᠳ ᠂ ᠶᠡᠷᠦ ᠶ᠋ᠢᠨ ᠢᠷᠭᠡᠳ ᠂ ᠲᠠᠯᠠᠪᠠᠢ ᠪᠢᠯᠬᠠᠮᠠ ᠡᠩ ᠦ᠋ᠨ ᠮᠠᠯᠴᠢᠳ ᠂ ᠵᠢᠷ ᠦ᠋ᠨ ᠮᠣᠩᠭᠣᠯᠴᠤᠳ ᠃
ᠡᠵᠡᠳ ᠨᠠᠢᠷ ᠲᠠᠭᠠᠨ ᠤᠷᠢᠲᠠᠯᠠ ᠂ ᠵᠣᠴᠢᠳ ᠨᠣᠢᠷ ᠲᠠᠭᠠᠨ ᠡᠭᠡᠵᠡᠢ ᠃
— ᠪᠣᠯᠪᠠᠰᠤᠨ ᠨᠠᠢᠷᠰᠠᠭ ᠪᠤᠮᠪᠠ ᠶ᠋ᠢᠨ ᠣᠷᠣᠨ ᠳ᠋ᠠᠭᠠᠨ ᠪᠢ ᠢᠷᠡᠴᠢᠬᠦ ᠨᠢ ᠦᠦ ?
— ᠲᠤᠭᠤᠷᠪᠢᠵᠤ ᠵᠥᠩᠨᠡᠭᠰᠡᠨ ᠲᠤᠤ ᠶᠤᠸᠠᠨ ᠬᠦᠷᠢᠶᠡᠯᠡᠩ ᠮᠢᠨᠢ ᠠᠳᠠ ᠪᠠᠢᠵᠤ ᠤᠤ?
— ᠣᠨᠴᠣᠭᠣᠢ ᠳᠤᠷᠠᠯᠠᠯᠲᠤ ᠤᠰᠤᠹᠢ ᠭᠦᠷᠦᠨ ᠮᠢᠨᠢ ᠢᠩᠭᠢᠭᠡᠳ ᠪᠡᠶᠡᠯᠡᠬᠦ ᠨᠢ ᠦᠦ ? ᠵᠣᠴᠢᠳ ᠮᠠᠨᠠᠷᠠᠨ ᠭᠠᠢᠬᠠᠲᠠᠯᠠ ᠂ ᠡᠵᠡᠳ ᠮᠡᠳᠡᠨ ᠲᠠᠨᠢᠯᠴᠠᠭᠤᠯᠪᠠ ᠄
ᠬᠦᠨᠳᠦᠲᠦ ᠵᠣᠴᠢᠳ ᠮᠢᠨᠢ ᠪᠢᠲᠡᠭᠡᠢ ᠬᠠᠴᠢᠷᠬᠠ ᠃
ᠬᠦᠯᠢᠭᠡᠯᠵᠡᠵᠦ ᠪᠠᠢᠪᠠᠯ ᠮᠡᠳᠡᠴᠢᠬᠡᠬᠦ ᠶᠦ᠍ᠮ᠃
ᠬᠥᠮᠦᠨ ᠦ᠌ ᠣᠷᠴᠢᠯᠠᠩ ᠪᠦᠲᠦᠭᠡᠯᠴᠢ ᠰᠢᠦ ᠂
ᠬᠦᠰᠡᠯᠡᠩ ᠪᠠᠢᠪᠠᠯ ᠪᠡᠶᠡᠯᠡᠴᠢᠬᠦ ᠶᠦ᠍ᠮ ᠃