ᠭᠡᠷᠡᠯ ᠳ᠋ᠦ᠍ ᠲᠡᠮᠡᠦᠯᠦᠭᠴᠢᠳ - ᠪᠥᠬᠡᠳᠡᠯᠭᠡᠷ Гэрэлд тэмүүлэгчид - Бөхдэлгэр
284ᠭᠡᠷᠡᠯ ᠳ᠋ᠦ᠍ ᠲᠡᠮᠡᠦᠯᠦᠭᠴᠢᠳ
– ᠨᠤᠲᠤᠭ ᠤ᠋ᠨ ᠳᠠᠭᠤᠤ
ᠭᠡᠷᠡᠯ ᠳ᠋ᠦ᠍ ᠲᠡᠮᠡᠦᠯᠦᠭᠴᠢᠳ
ᠬᠥᠷᠥᠰᠥᠲᠦ ᠭᠠᠵᠠᠷ ᠭᠡᠨᠡᠳᠲᠡ ᠴᠥᠮᠥᠷᠡᠭᠡᠳ ᠣᠷᠣᠴᠢᠬᠠᠭᠰᠠᠨ ᠭᠡᠵᠦ ᠦᠦ ?
ᠬᠥᠬᠡ ᠲᠡᠭᠷᠢ ᠭᠡᠨᠡᠳᠲᠡ ᠲᠠᠯᠠ ᠴᠢᠷᠠᠢ ᠪᠠᠨ ᠳᠠᠯᠳᠠᠯᠠᠴᠢᠬᠪᠠᠣ ?
ᠭᠦᠨ ᠭᠣᠣ ᠃ᠬᠥᠷᠥᠰᠥᠲᠦ ᠭᠠᠵᠠᠷ ᠤ᠋ᠨ ᠡᠪᠴᠢᠭᠦᠨ ᠬᠥᠨᠳᠡᠢ ᠰᠢᠭ ᠭᠦᠨ ᠭᠣᠣ ᠃ ᠬᠥᠬᠡ ᠲᠡᠭᠷᠢ ᠶ᠋ᠢᠨ ᠬᠣᠷᠮᠣᠢ ᠶ᠋ᠢᠨ ᠬᠤᠨᠢᠶᠠᠰᠤ ᠰᠢᠭ᠋ ᠭᠦᠨ ᠭᠣᠣ ᠃
ᠭᠦᠨ ᠭᠣᠣ ᠳᠣᠲᠣᠷᠠ ᠠ᠋ᠴᠠ ᠳᠡᠭᠡᠭᠰᠢ ᠬᠠᠷᠠᠪᠠᠯ ᠣᠭᠲᠠᠷᠭᠤᠢ ᠨᠠᠪ ᠨᠠᠷᠢᠬᠠᠨ – ᠰᠠᠯᠬᠢᠨ ᠳ᠋ᠤ᠌ ᠬᠦᠪᠬᠦᠯᠵᠡᠬᠦ ᠰᠣᠯᠣᠩᠭᠠ ᠶ᠋ᠢᠨ ᠲᠤᠤᠵᠠ ᠠᠳᠠᠯᠢ ! ᠳᠣᠷᠣᠭᠰᠢ ᠬᠠᠷᠠᠪᠠᠯ ᠭᠣᠷᠣᠬᠠ ᠬᠥᠪ ᠭᠦᠶᠦᠭᠡᠨ – ᠠᠯᠠᠭᠠᠨ ᠳ᠋ᠤ᠌ ᠠᠯᠳᠠᠯᠠᠬᠤ ᠮᠥᠩᠭᠥᠨ ᠬᠠᠳᠠᠭ ᠠᠳᠠᠯᠢ – ᠵᠡᠭᠦᠨᠰᠢ ᠬᠠᠷᠠᠪᠠᠯ ᠠᠰᠬᠠ ᠬᠠᠳᠠ – ᠬᠠᠴᠠᠷ ᠤᠷᠤᠭᠤ ᠬᠠᠢᠪᠠᠭᠠᠳ ᠤᠨᠠᠮᠠᠷ! ᠪᠠᠷᠠᠭᠤᠨᠰᠢ ᠬᠠᠷᠠᠪᠠᠯ ᠡᠭᠴᠡ ᠡᠷᠭᠢ – ᠲᠣᠯᠣᠭᠠᠢ ᠤᠷᠤᠭᠤ ᠨᠤᠷᠠᠭᠠᠳ ᠪᠠᠭᠤᠮᠠᠷ !ᠣᠷᠣᠭᠰᠢ ᠬᠠᠷᠠᠪᠠᠯ ᠮᠤᠷᠤᠢ ᠰᠠᠷᠤᠢ – ᠪᠡᠶᠡ ᠪᠡᠨ ᠮᠤᠰᠬᠢᠷᠠᠯᠳᠤᠭᠤᠯᠤᠭᠰᠠᠨ ᠡᠷᠢᠶᠡᠨ ᠮᠣᠭᠠᠢ ᠠᠳᠠᠯᠢ – ᠬᠣᠢᠰᠢ ᠬᠠᠷᠠᠪᠠᠯ ᠰᠣᠨᠣᠰ ᠳᠣᠨᠤᠰ – ᠬᠦᠵᠦᠭᠦᠦ ᠪᠡᠨ ᠰᠤᠩᠭᠠᠭᠰᠠᠨ ᠴᠣᠬᠣᠷ ᠠᠨᠠᠰᠢ ᠮᠡᠲᠦ !
ᠠᠯᠲᠠᠨ ᠨᠠᠷᠠᠨ ᠤ᠋ ᠰᠢᠵᠢᠷ ᠭᠡᠷᠡᠯ ᠨᠠᠪ ᠨᠠᠷᠢᠬᠠᠨ ᠣᠭᠲᠠᠷᠭᠤᠢ ᠠ᠋ᠴᠠ ᠳᠣᠭᠣᠭᠰᠢᠯᠠᠨ ᠭᠦᠨ ᠭᠣᠣ ᠤᠷᠤᠭᠤ ᠂ ᠭᠦᠶᠦᠭᠡᠨ ᠪᠤᠯᠠᠭ ᠵᠦᠭ ᠵᠤᠷᠪᠤᠰᠯᠠᠨ ᠪᠠᠭᠤᠨᠠ ᠃
ᠨᠣᠮᠢᠨ ᠰᠢᠭᠤᠢ ᠶ᠋ᠢᠨ ᠢᠭᠴᠢᠷᠠᠭᠰᠠᠨ ᠮᠣᠳᠣᠳ ᠭᠦᠨ ᠬᠠᠷᠠᠩᠭᠤᠢ ᠭᠣᠣ ᠠ᠋ᠴᠠ ᠳᠡᠭᠡᠭᠰᠢᠯᠡᠨ ᠬᠥᠬᠡ ᠣᠭᠲᠠᠷᠭᠤᠢ ᠥᠭᠡᠳᠡ ᠂ ᠨᠠᠷᠠᠨ ᠭᠡᠷᠡᠯ ᠲᠡᠰᠢ ᠲᠡᠮᠡᠦᠯᠦᠨ ᠤᠷᠭᠤᠨᠠ ᠃ ᠳᠡᠯᠭᠡᠭᠰᠡᠨ ᠨᠠᠪᠴᠢ ᠨᠢ ᠭᠡᠷᠡᠯ ᠵᠦᠭ ᠂ ᠰᠤᠨᠤᠯᠵᠠᠭᠰᠠᠨ ᠰᠠᠯᠠᠭᠠ ᠨᠢ ᠭᠡᠷᠡᠯ ᠵᠦᠭ ᠂ ᠰᠤᠭᠳᠠᠢᠭᠰᠠᠨ ᠪᠡᠶᠡ ᠨᠢ ᠭᠡᠷᠡᠯ ᠵᠦᠭ ᠂ ᠭᠦᠷᠪᠡᠯᠵᠡᠭᠰᠡᠨ ᠦᠨᠳᠦᠰᠦ ᠨᠢ ᠴᠦ᠍ ᠭᠡᠷᠡᠯ ᠵᠦᠭ !
ᠬᠥᠮᠥᠷᠢᠭᠰᠡᠨ ᠲᠣᠭᠣᠭᠠ ᠰᠢᠭ᠋ ᠬᠠᠷᠠᠩᠭᠤᠢ ᠰᠥᠨᠢ ᠳᠠᠷᠤᠨ ᠢᠷᠡᠬᠦ ᠳ᠋ᠦ᠍ ᠡᠳᠦᠷ ᠦ᠋ᠨ ᠮᠠᠷᠭᠠᠰᠢ ᠮᠠᠨᠳᠤᠬᠤ ᠨᠠᠷᠠᠨ ᠳ᠋ᠤ᠌ ᠲᠡᠮᠡᠦᠯᠦᠨ ᠮᠣᠳᠣᠳ ᠮᠥᠨ ᠯᠡ ᠣᠭᠲᠠᠷᠭᠤᠢ ᠥᠭᠡᠳᠡ !
ᠬᠠᠷᠠ ᠬᠥᠰᠢᠭᠡ ᠰᠢᠭ ᠵᠤᠵᠠᠭᠠᠨ ᠡᠭᠦᠯᠡ ᠨᠡᠲᠦᠢᠨ ᠢᠷᠡᠬᠦ ᠳ᠋ᠦ᠍ ᠡᠭᠦᠯᠡᠨ ᠴᠠᠭᠠᠨᠠ ᠭᠢᠯᠠᠯᠵᠠᠬᠤ ᠭᠡᠷᠡᠯ ᠳ᠋ᠦ᠍ ᠲᠡᠮᠡᠦᠯᠦᠨ ᠮᠣᠳᠣᠳ ᠮᠥᠨ ᠯᠡ ᠣᠭᠲᠠᠷᠭᠤᠢ ᠥᠭᠡᠳᠡ !
ᠲᠣᠭᠰᠢᠨ ᠮᠥᠨᠳᠥᠷ ᠰᠠᠯᠪᠠᠷᠠᠲᠠᠯᠠ ᠴᠣᠬᠢᠯᠪᠠᠴᠤ ᠨᠣᠭᠣᠭᠠᠨ ᠨᠠᠪᠴᠢ ᠮᠥᠨ ᠯᠡ ᠭᠡᠷᠡᠯ ᠳ᠋ᠦ᠍ ᠲᠡᠮᠡᠦᠯᠦᠨ ᠳᠡᠭᠡᠭᠰᠢ ᠠᠷᠪᠠᠢᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ!
ᠴᠠᠰᠤ ᠰᠢᠭᠤᠷᠭᠠ ᠳᠠᠭᠵᠢᠲᠠᠯᠠ ᠴᠡᠴᠡᠷᠡᠭᠦᠯᠪᠡᠴᠦ ᠰᠠᠯᠠᠭᠠ ᠮᠥᠴᠢᠷ ᠮᠥᠨ ᠯᠡ ᠭᠡᠷᠡᠯ ᠳ᠋ᠦ᠍ ᠲᠡᠮᠡᠦᠯᠦᠨ ᠳᠡᠭᠡᠭᠰᠢ ᠰᠠᠷᠪᠠᠢᠭᠰᠠᠨ ᠶᠠᠩᠵᠤ ᠪᠠᠷ ᠢᠶᠡᠨ!
ᠭᠦᠨ ᠭᠣᠣ ᠠ᠋ᠴᠠ ᠦᠵᠡᠭᠳᠡᠬᠦ ᠣᠭᠲᠠᠷᠭᠤᠢ ᠨᠢᠪ ᠨᠠᠷᠢᠬᠠᠨ ᠲᠤᠯᠠᠳᠠ ᠣᠭᠲᠠᠷᠭᠤᠢ ᠳ᠋ᠤ᠌ ᠣᠢᠷᠠᠲᠤᠬᠤ ᠶ᠋ᠢ ᠮᠣᠳᠣᠳ ᠠᠮᠢ ᠨᠠᠰᠤᠨ ᠤ᠋ ᠪᠠᠨ ᠲᠦᠷᠦᠭᠦᠦ ᠴᠡᠩᠭᠡᠯ ᠪᠣᠯᠭᠠᠵᠤ ᠡᠪᠦᠯ ᠵᠤᠨ ᠦᠭᠡᠢ ᠲᠡᠮᠡᠦᠯᠡᠨᠡ ᠃
ᠭᠦᠨ ᠭᠣᠣ ᠳ᠋ᠤ᠌ ᠲᠤᠰᠬᠤ ᠭᠡᠷᠡᠯ ᠴᠥᠪ ᠴᠥᠭᠡᠨ ᠤᠴᠢᠷ ᠠ᠋ᠴᠠ ᠭᠡᠷᠡᠯ ᠬᠦᠷᠲᠡᠬᠦ ᠶ᠋ᠢ ᠮᠣᠳᠣᠳ ᠠᠮᠢ ᠨᠠᠰᠤᠨ ᠤ᠋ ᠪᠠᠨ ᠲᠦᠷᠦᠭᠦᠦ ᠱᠠᠭᠠᠷᠳᠠᠯᠭᠠ ᠪᠣᠯᠭᠠᠵᠤ ᠡᠳᠦᠷ ᠰᠥᠨᠢ ᠦᠭᠡᠢ ᠲᠡᠮᠡᠦᠯᠡᠨᠡ ᠃
ᠲᠡᠢᠮᠦ ᠡᠴᠡ ᠮᠣᠳᠣᠳ ᠤ᠋ᠨ ᠰᠠᠯᠠᠭᠠ ᠨᠢ ᠠᠪ ᠠᠰᠬᠠᠨ ᠂ ᠡᠰᠢ ᠨᠢ ᠰᠢᠪ ᠰᠢᠯᠤᠭᠤᠨ ᠂ ᠬᠥᠷᠥᠰᠥᠲᠦ ᠭᠠᠵᠠᠷ ᠬᠥᠬᠡ ᠣᠭᠲᠠᠷᠭᠤᠢ ᠶ᠋ᠢ ᠲᠤᠯᠭᠠᠭᠤᠷᠢᠯᠠᠭᠰᠠᠨ ᠨᠢᠷᠤᠭᠤ ᠪᠠᠭᠠᠨᠠ ᠭᠡᠮᠡᠷ !
ᠠᠭᠤᠯᠠᠨ ᠣᠷᠣᠢ ᠳ᠋ᠤ᠌ ᠤᠷᠭᠤᠭᠰᠠᠨ ᠮᠣᠳᠣᠳ ᠬᠥᠬᠡ ᠣᠭᠲᠠᠷᠭᠤᠢ ᠶ᠋ᠢᠨ ᠡᠪᠦᠷ ᠲᠦ᠍ ᠪᠦᠪᠡᠢᠯᠡᠭᠳᠡᠵᠦ ᠪᠠᠢᠪᠠᠴᠤ ᠵᠠᠭᠤᠨ ᠲᠡᠰᠢ ᠪᠤᠲᠠᠯᠠᠨᠠ ᠃
ᠲᠠᠯᠠ ᠶ᠋ᠢᠨ ᠬᠥᠪᠡᠭᠡᠨ ᠦ᠌ ᠤᠷᠭᠤᠭᠰᠠᠨ ᠮᠣᠳᠣᠳ ᠨᠠᠷᠠᠨ ᠭᠡᠷᠡᠯ ᠦ᠋ᠨ ᠠᠯᠠᠭᠠᠨ ᠳ᠋ᠤ᠌ ᠡᠩᠬᠦᠷᠡᠢᠯᠡᠭᠳᠡᠵᠦ ᠪᠠᠢᠭᠰᠠᠨ ᠴᠤ᠌ ᠳᠠᠯᠠᠨ ᠮᠤᠰᠢᠭᠠᠢ ᠰᠠᠷᠪᠠᠢᠨᠠ᠃
ᠬᠠᠷᠢᠨ ᠬᠠᠷᠠᠩᠭᠤᠢ ᠭᠣᠣ ᠠ᠋ᠴᠠ ᠤᠷᠭᠤᠭᠰᠠᠨ ᠮᠣᠳᠣᠳ ᠦᠷᠰᠦᠯᠳᠦᠭᠡᠨ ᠮᠥᠷᠥᠢᠴᠡᠭᠡᠨ ᠳᠤᠮᠳᠠ ᠤᠷᠤᠯᠳᠤᠨ ᠥᠰᠦᠭᠰᠡᠭᠡᠷ ! ᠬᠠᠨᠢᠲᠠᠨ ᠠ᠋ᠴᠠ ᠪᠠᠨ ᠬᠣᠴᠣᠷᠪᠠᠯ ᠬᠥᠬᠡ ᠣᠭᠲᠠᠷᠭᠤᠢ ᠠ᠋ᠴᠠ ᠭᠡᠭᠡᠭᠳᠡᠬᠦ ᠲᠤᠯᠠᠳᠠ ᠠᠳᠠ ᠢᠮᠠᠭᠠᠨ ᠰᠠᠬᠠᠯ ᠰᠢᠭ᠋ ᠪᠤᠲᠠ ᠂ ᠬᠣᠨᠢᠨ ᠰᠡᠭᠦᠯ ᠰᠢᠭ ᠪᠣᠷᠣᠯᠵᠠᠭᠠᠨᠠ ᠠᠯᠠᠭᠠ ᠃ ᠨᠠᠢᠵᠢ ᠠ᠋ᠴᠠ ᠪᠠᠨ ᠬᠣᠴᠣᠷᠪᠠᠯ ᠨᠠᠷᠠᠨ ᠭᠡᠷᠡᠯ ᠡᠴᠡ ᠭᠡᠭᠡᠭᠳᠡᠬᠦ ᠲᠤᠯᠠᠳᠠ ᠠᠳᠠ ᠪᠥᠭᠲᠥᠷ ᠬᠥᠭᠰᠢᠨ ᠰᠢᠭ ᠨᠤᠭᠳᠤᠢᠭ᠍ᠰᠡᠡ ᠰᠠᠯᠠᠭᠠ ᠂ ᠬᠥᠯᠴᠥᠭᠦᠦ ᠰᠣᠭᠲᠣᠭᠤ ᠰᠢᠭ᠋ ᠬᠠᠢᠪᠠᠯᠵᠠᠭᠰᠠᠨ ᠨᠠᠮᠠᠭᠠ ᠠᠯᠠᠭᠠ ᠃
ᠪᠠᠭᠠᠨᠠ ᠲᠤᠯᠭᠠᠭᠤᠷᠢ ᠴᠢᠨᠢ ᠪᠡᠷᠬᠡ ᠣᠷᠴᠢᠨ ᠳ᠋ᠤ᠌ ᠮᠥᠷᠥᠢᠴᠡᠭᠡᠨ ᠤᠷᠤᠯᠳᠤᠭᠠᠨ ᠳᠤᠮᠳᠠ ᠯᠠ ᠤᠷᠭᠤᠵᠤ ᠪᠤᠵᠠᠭᠠᠢᠷᠠᠳᠠᠭ ᠶᠤᠮ ᠪᠠᠢᠨᠠ ᠰᠢᠦ!
ᠰᠡᠭᠦᠳᠡᠷ ᠲᠦ᠍ ᠤᠨᠲᠠᠭᠴᠢᠳ
ᠬᠠᠳᠠᠨ ᠤ᠋ ᠨᠡᠲᠦᠢᠭᠰᠡᠨ ᠰᠡᠭᠦᠳᠡᠷ ᠂ ᠡᠷᠭᠢ ᠶ᠋ᠢᠨ ᠨᠡᠲᠦᠢᠭᠰᠡᠨ ᠰᠡᠭᠦᠳᠡᠷ ᠂ ᠨᠠᠷᠠᠰᠤᠨ ᠤ᠋ ᠨᠡᠲᠦᠢᠭᠰᠡᠨ ᠰᠡᠭᠦᠳᠡᠷ ᠂ ᠴᠠᠷᠠᠰᠤᠨ ᠤ᠋ ᠨᠡᠲᠦᠢᠭᠰᠡᠨ ᠰᠡᠭᠦᠳᠡᠷ ᠨᠡᠢᠯᠡᠵᠦ ᠨᠠᠪᠲᠠᠷᠠᠰᠢ ᠦᠭᠡᠢ ᠪᠠᠷᠠᠭᠠᠨ ᠬᠥᠰᠢᠭᠡ ᠪᠣᠯᠵᠤ ᠭᠦᠨ ᠭᠣᠣ ᠶ᠋ᠢ ᠪᠦᠲᠡᠭᠡᠪᠡ ᠃
ᠭᠦᠨ ᠭᠣᠣ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠡᠳᠦᠷ ᠴᠦ᠍ ᠰᠥᠨᠢ ᠰᠢᠭ ᠬᠠᠪ ᠬᠠᠷᠠᠩᠭᠤᠢ ᠣᠭᠲᠠᠷᠭᠤᠢ ᠴᠤ᠌ ᠦᠵᠡᠭᠳᠡᠬᠦ ᠦᠭᠡᠢ ᠂ ᠡᠦᠲᠦ ᠴᠦ᠍ ᠦᠵᠡᠭᠳᠡᠬᠦ ᠦᠭᠡᠢ ᠂ ᠭᠡᠷᠡᠯ ᠴᠦ᠍ ᠨᠡᠪᠲᠡᠷᠡᠬᠦ ᠦᠭᠡᠢ ᠂ ᠲᠤᠶᠠᠭᠠ ᠴᠤ᠌ ᠨᠡᠪᠲᠡᠷᠡᠬᠦ ᠦᠭᠡᠢ!
ᠭᠦᠨ ᠭᠣᠣ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠡᠪᠦᠯ ᠴᠦ᠍ ᠵᠤᠨ ᠰᠢᠭ᠋ ᠲᠣᠪ ᠳᠤᠯᠠᠭᠠᠬᠠᠨ ᠃ ᠡᠬᠡ ᠶ᠋ᠢᠨ ᠤᠷᠤᠭᠤᠯ ᠰᠢᠭ᠋ ᠂ ᠡᠴᠢᠭᠡ ᠶ᠋ᠢᠨ ᠡᠪᠦᠷ ᠰᠢᠭ ᠂ ᠬᠠᠯᠠᠭᠤᠨ ᠬᠥᠯᠡᠮᠵᠢ ᠰᠢᠭ ᠂ ᠪᠦᠯᠢᠶᠡᠨ ᠷᠠᠰᠢᠶᠠᠨ ᠰᠢᠭ᠋ !
ᠭᠦᠨ ᠭᠣᠣ ᠶ᠋ᠢᠨ ᠬᠠᠪ ᠬᠠᠷᠠᠩᠭᠤᠢ ᠂ ᠲᠣᠪ ᠳᠤᠯᠠᠭᠠᠨ ᠢᠷᠣᠭᠠᠷ ᠲᠤ᠌ ᠡᠪᠦᠭᠡᠷᠡᠵᠦ ᠤᠨᠠᠭᠰᠠᠨ ᠮᠣᠳᠣᠳ ᠤᠨᠲᠠᠨᠠ ᠃ ᠬᠠᠶᠠᠭᠰᠠᠨ ᠰᠠᠯᠠᠭᠠ ᠪᠠᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠂ ᠬᠤᠪᠠᠬᠠᠢᠷᠠᠭᠰᠠᠨ ᠪᠡᠶᠡ ᠪᠡᠨ ᠲᠣᠭᠲᠠᠭᠠᠵᠤ ᠶᠠᠳᠠᠨ ᠂ ᠰᠠᠯᠬᠢ ᠰᠢᠭᠤᠷᠭᠠᠨ ᠳ᠋ᠤ᠌ ᠨᠠᠢᠭᠤᠵᠤ ᠲᠠᠢᠭᠤᠭᠰᠠᠭᠠᠷ ᠴᠠᠰᠤ ᠮᠥᠨᠳᠥᠷ ᠲᠦ᠍ ᠭᠠᠩᠬᠤᠨ ᠰᠠᠵᠢᠯᠠᠭᠰᠠᠭᠠᠷ ᠨᠠᠷᠠᠨ ᠭᠡᠷᠡᠯ ᠂ ᠬᠥᠬᠡ ᠣᠭᠲᠠᠷᠭᠤᠢ ᠶ᠋ᠢ ᠡᠴᠦᠰ ᠦ᠋ᠨ ᠤᠳᠠᠭᠠ ᠭᠤᠨᠢᠶᠠᠯᠲᠠᠢ ᠪᠠᠷ ᠬᠠᠷᠠᠭᠠᠳ ᠬᠡᠵᠢᠶᠡ ᠶᠠᠭᠠᠬᠢᠵᠤ ᠣᠢᠴᠢᠨ ᠤᠨᠠᠭᠰᠠᠨ ᠢ᠋ ᠪᠤᠤ ᠮᠡᠳᠡ ᠲᠡᠳᠡᠨ ᠦ᠌ ᠵᠠᠯᠠᠭᠤ ᠨᠠᠰᠤᠨ ᠤ᠋ ᠭᠢᠯᠠᠷᠠᠭᠰᠠᠨ ᠲᠡᠦᠬᠡ ᠶ᠋ᠢ ᠰᠠᠯᠬᠢ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠡᠭᠦᠯᠡ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠂ ᠭᠠᠭᠴᠠᠬᠦ ᠭᠤᠷᠴᠢᠭᠢᠨᠠᠬᠤ ᠭᠣᠷᠣᠬᠠ ᠶ᠋ᠢᠨ ᠬᠥᠩᠭᠡᠨ ᠳᠣᠯᠭᠢᠶᠠᠨ ᠯᠠ ᠮᠡᠳᠡᠨᠡ ᠃ᠲᠡᠳᠡᠨ ᠦ᠌ ᠬᠢᠵᠠᠭᠠᠷ ᠦᠭᠡᠢ ᠤᠷᠲᠤ ᠵᠡᠭᠦᠳᠦ ᠶ᠋ᠢ ᠪᠣᠯᠵᠣᠮᠣᠷ ᠦᠢᠮᠡᠭᠦᠯᠬᠦ ᠦᠭᠡᠢ ᠂ ᠬᠥᠬᠥᠭᠡ ᠴᠦ᠍ ᠦᠢᠮᠡᠭᠦᠯᠬᠦ ᠦᠭᠡᠢ ᠂ ᠭᠠᠭᠴᠠᠬᠦ ᠰᠢᠪᠡᠷᠡᠭᠰᠡᠨ ᠬᠤᠷᠠ ᠶ᠋ᠢᠨ ᠵᠥᠭᠡᠯᠡᠨ ᠦᠨᠦᠰᠦᠯᠲᠡ ᠯᠡ ᠦᠢᠮᠡᠭᠦᠯᠦᠨᠡ ᠃
ᠭᠤᠷᠴᠢᠭᠢᠨᠠᠬᠤ ᠭᠣᠷᠣᠬᠠ ᠶ᠋ᠢᠨ ᠬᠥᠩᠭᠡᠨ ᠳᠣᠯᠭᠢᠶᠠᠨ ᠡᠪᠦᠯ ᠵᠤᠨ ᠦᠭᠡᠢ ᠢᠯᠪᠢᠭᠰᠡᠭᠡᠷ ᠡᠪᠦᠭᠡᠨ ᠮᠣᠳᠣᠨ ᠤ᠋ ᠡᠭᠡᠨᠡᠭᠲᠡ ᠶ᠋ᠢᠨ ᠬᠦᠰᠡᠯ ᠰᠡᠳᠬᠢᠯᠭᠡ ᠶ᠋ᠢ ᠰᠡᠷᠢᠭᠡᠭᠡᠪᠡ ᠃
ᠱᠢᠪᠡᠷᠡᠭᠰᠡᠨ ᠬᠤᠷᠠ ᠶ᠋ᠢᠨ ᠵᠥᠭᠡᠯᠡᠨ ᠦᠨᠦᠰᠦᠯᠲᠡ ᠡᠳᠦᠷ ᠰᠥᠨᠢ ᠦᠭᠡᠢ ᠦᠢᠮᠡᠭᠦᠯᠦᠭᠰᠡᠭᠡᠷ ᠦᠦᠮᠡᠯ ᠮᠣᠳᠣᠨ ᠤ᠋ ᠥᠨᠢᠳᠡ ᠶ᠋ᠢᠨ ᠨᠣᠢᠷ ᠵᠡᠭᠦᠳᠦ ᠶ᠋ᠢ ᠰᠡᠷᠢᠭᠡᠪᠡ᠃
ᠡᠪᠦᠭᠡᠨ ᠮᠣᠳᠣᠨ ᠤ᠋ ᠰᠠᠬᠠᠯ ᠰᠦᠶᠦᠭᠡ ᠨᠢ ᠠᠷᠪᠠᠯᠵᠠᠨ ᠬᠥᠳᠡᠯᠵᠦ ᠬᠠᠰ ᠴᠠᠭᠠᠨ ᠂ ᠴᠠᠰᠤ ᠴᠠᠭᠠᠨ ᠦᠷᠡᠰ ᠲᠥᠯᠵᠢᠯᠡ ᠃ ᠲᠡᠷᠡ ᠪᠣᠯ ᠬᠠᠰ ᠴᠠᠭᠠᠨ ᠂ ᠴᠠᠰᠤ ᠴᠠᠭᠠᠨ ᠮᠥᠭᠥ ᠮᠥᠨ ! ᠦᠦᠮᠡᠯ ᠮᠣᠳᠣᠨ ᠤ᠋ ᠬᠠᠯᠢᠰᠤ ᠡᠰᠢ ᠨᠢ ᠣᠪᠣᠯᠵᠠᠨ ᠬᠥᠳᠡᠯᠵᠦ ᠭᠠᠪ ᠰᠢᠷᠠ ᠂ ᠠᠯᠲᠠᠨ ᠰᠢᠷᠠ ᠰᠣᠶᠣᠭᠠ ᠲᠦᠯᠬᠢᠯᠡᠯᠡ ᠃ ᠲᠡᠷᠡ ᠪᠣᠯ ᠭᠠᠪ ᠰᠢᠷᠠ ᠂ ᠠᠯᠲᠠᠨ ᠰᠢᠷᠠ ᠮᠥᠭᠥ ᠮᠥᠨ ! ᠬᠠᠷᠠᠯᠠᠭᠰᠠᠨ ᠬᠠᠯᠢᠰᠤ ᠨᠢ ᠠᠮᠲᠠᠲᠤ ᠮᠥᠭᠥ ᠶ᠋ᠢᠨ ᠮᠠᠯᠠᠭᠠ ᠪᠣᠯᠵᠤ ᠪᠣᠷᠣᠯᠠᠭᠰᠠᠨ ᠡᠰᠢ ᠨᠢ ᠠᠮᠲᠠᠲᠤ ᠮᠥᠭᠥ ᠶ᠋ᠢᠨ ᠪᠡᠶᠡ ᠪᠣᠯᠪᠠ ᠃ᠢᠯᠵᠠᠷᠠᠮᠠᠯ ᠨᠠᠪᠴᠢ ᠨᠢ ᠠᠮᠲᠠᠲᠤ ᠮᠥᠭᠥ ᠳ᠋ᠦ᠍ ᠦᠨᠦᠷ ᠨᠡᠮᠡᠵᠦ ᠂ ᠦᠦᠮᠡᠯ ᠰᠠᠯᠠᠭᠠ ᠨᠢ ᠠᠮᠲᠠᠲᠤ ᠮᠥᠭᠥ ᠳ᠋ᠦ᠍ ᠰᠢᠮᠡ ᠪᠣᠯᠪᠠ ᠠᠮᠲᠠᠲᠤ ᠮᠥᠭᠥ ᠂ ᠰᠢᠮᠡᠲᠦ ᠮᠥᠭᠥ ᠴᠢᠨᠢ ᠡᠪᠦᠭᠡᠷᠡᠭᠰᠡᠨ ᠮᠣᠳᠣ ᠂ ᠦᠦᠮᠡᠯ ᠮᠣᠳᠣᠨ ᠠ᠋ᠴᠠ ᠪᠠᠭᠯᠠᠷᠠᠨ ᠤᠷᠭᠤᠯᠠ ᠦᠦᠮᠡᠯ ᠮᠣᠳᠣ ᠦᠮᠡᠬᠡᠢ ᠡᠴᠡ ᠦᠮᠡᠬᠡᠢ ᠭᠡᠬᠦᠯᠡ ᠤᠷᠭᠤᠮᠠᠯ ᠮᠥᠭᠥ ᠠᠩᠬᠢᠯᠤᠮᠠᠯ ᠠ᠋ᠴᠠ ᠠᠩᠬᠢᠯᠤᠮᠠᠯ !
ᠡᠪᠦᠭᠡᠨ ᠮᠣᠳᠣᠴᠢᠨ ᠂ ᠰᠠᠭᠰᠤ ᠲᠣᠬᠣᠢᠯᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠰᠢᠪᠲᠤᠷᠠᠨ ᠮᠥᠭᠥ ᠲᠡᠭᠦᠨᠡ ᠃ ᠲᠡᠷᠡ ᠦᠦᠮᠡᠯ ᠮᠤᠳᠤᠨᠠ ᠦᠷᠡ ᠰᠠᠴᠤᠵᠤ ᠠᠮᠢᠵᠢᠷᠠᠯ ᠤ᠋ᠨ ᠬᠦᠰᠡᠯ ᠢ᠋ ᠨᠢ ᠰᠡᠷᠭᠦᠭᠡᠨ ᠠᠮᠲᠠᠲᠤ ᠮᠥᠭᠥ ᠤᠷᠭᠤᠭᠤᠯᠬᠤ ᠶ᠋ᠢᠨ ᠬᠠᠮᠲᠤᠳᠠ ᠥᠪᠡᠷᠦᠨ ᠢ᠋ᠶ᠋ᠡᠨ ᠠᠮᠢᠳᠤᠷᠠᠯ ᠤ᠋ᠨ ᠬᠦᠰᠡᠯ ᠢ᠋ᠶ᠋ᠡᠨ ᠣᠪᠣᠯᠵᠠᠭᠤᠯᠤᠨ ᠤᠷᠢ ᠵᠠᠯᠠᠭᠤ ᠶ᠋ᠢᠨ ᠴᠣᠭ ᠢ᠋ᠶ᠋ᠠᠨ ᠪᠠᠳᠠᠷᠠᠭᠤᠯᠪᠠ ᠃
ᠠᠮᠢᠳᠤᠷᠠᠯ ᠤ᠋ᠨ ᠬᠦᠰᠡᠯ ᠣᠷᠭᠢᠯᠵᠤ ᠠᠮᠢᠵᠢᠷᠠᠯ ᠤ᠋ᠨ ᠲᠡᠮᠡᠦᠯᠡᠯ ᠪᠠᠳᠠᠷᠠᠵᠤ ᠯᠠ ᠪᠠᠢᠪᠠᠯ ᠡᠪᠦᠭᠡᠨ ᠮᠣᠳᠣᠨ ᠳ᠋ᠤ᠌ ᠴᠤᠤ ᠰᠢᠨᠡ ᠰᠣᠶᠣᠭᠠ ᠴᠤᠬᠤᠢᠵᠤ ᠂ ᠦᠦᠮᠡᠯ ᠰᠠᠯᠠᠭᠠᠨ ᠳ᠋ᠤ᠌ ᠴᠤ᠌ ᠠᠩᠬᠢᠯᠤᠮᠠᠯ ᠦᠷᠡᠰ ᠪᠣᠯᠪᠠᠰᠤᠷᠠᠨᠠ ᠰᠢᠦ ᠳᠧ !
ᠬᠠᠢᠷᠠ ᠶ᠋ᠢᠨ ᠵᠢᠷᠭᠢᠭᠡ ᠨᠠᠢᠷ ᠤ᠋ᠨ ᠰᠢᠪᠡᠨᠡᠭᠡ
ᠠᠯᠠᠭ ᠰᠢᠪᠠᠭᠤᠨ ᠤ᠋ ᠬᠠᠢᠷᠠ ᠶ᠋ᠢᠨ ᠵᠢᠷᠭᠢᠭᠡ
ᠨᠣᠮᠢᠨ ᠨᠠᠪᠴᠢᠰ ᠤ᠋ᠨ ᠨᠠᠢᠷ ᠤ᠋ᠨ ᠰᠢᠪᠡᠨᠡᠭᠡ ᠃
ᠨᠠᠷᠠᠨ ᠤ᠋ ᠭᠡᠷᠡᠯ ᠲᠡᠢ ᠬᠠᠮᠲᠤᠪᠠᠷ ᠠᠯᠠᠭ ᠰᠢᠪᠠᠭᠤ ᠨᠢᠰᠦᠨ ᠢᠷᠡᠭᠰᠡᠨ ᠡᠴᠡ ᠨᠠᠰᠢ ᠂ ᠨᠣᠮᠢᠨ ᠨᠠᠪᠴᠢᠰ ᠲᠤ᠌ ᠬᠠᠢᠷᠠ ᠪᠠᠨ ᠰᠠᠴᠤᠨ ᠵᠢᠷᠭᠢᠭᠰᠡᠭᠡᠷ !
ᠦᠷ ᠦ᠋ᠨ ᠲᠤᠶᠠᠭᠠ ᠲᠠᠢ ᠵᠡᠷᠭᠡᠪᠡᠷ ᠨᠣᠮᠢᠨ ᠨᠠᠪᠴᠢᠰ ᠨᠣᠢᠷ ᠠ᠋ᠴᠠ ᠰᠡᠷᠢᠭᠰᠡᠨ ᠡᠴᠡ ᠨᠡᠰᠢ ᠂ ᠠᠯᠠᠭ ᠰᠢᠪᠠᠭᠤᠨ ᠳ᠋ᠤ᠌ ᠨᠠᠢᠷ ᠤ᠋ᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠰᠢᠪᠡᠨᠡᠭᠰᠡᠭᠡᠷ !
ᠠᠯᠤᠰ ᠤ᠋ᠨ ᠠᠭᠤᠯᠠᠨ ᠳ᠋ᠤ᠌ ᠰᠢᠨᠡ ᠮᠥᠴᠢᠷ ᠤᠷᠭᠤᠵᠤ ᠪᠠᠢᠭᠠ ᠶ᠋ᠢ ᠂ ᠠᠭᠠᠷ ᠤ᠋ᠨ ᠮᠠᠨᠳᠠᠯ ᠳ᠋ᠤ᠌ ᠬᠤᠷᠠ ᠶ᠋ᠢᠨ ᠡᠭᠦᠯᠡᠰ ᠰᠠᠴᠤᠭᠯᠠᠵᠤ ᠪᠠᠢᠭᠠ ᠶ᠋ᠢ ᠂ ᠠᠩᠬᠢᠯᠤᠮᠠᠯ ᠴᠡᠴᠡᠭ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡ ᠪᠡᠷ ᠰᠣᠯᠣᠩᠭᠠᠷᠠᠵᠤ ᠪᠠᠢᠭᠠ ᠶ᠋ᠢ ᠂ ᠠᠳᠤᠭᠤ ᠮᠠᠯ ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠠᠯᠠᠭᠷᠠᠵᠣ ᠪᠠᠢᠭᠠ ᠶ᠋ᠢ ᠠᠯᠠᠭ ᠰᠢᠪᠠᠭᠤᠨ ᠤ᠋ ᠬᠠᠢᠷᠠ ᠶ᠋ᠢᠨ ᠵᠢᠷᠭᠢᠭᠡ ᠮᠡᠳᠡᠭᠦᠯᠵᠦ ᠪᠠᠢᠨᠠ !
ᠬᠠᠷᠠᠩᠭᠤᠢ ᠭᠣᠣ ᠳ᠋ᠤ᠌ ᠠᠮᠢᠵᠢᠷᠠᠯ ᠤ᠋ᠨ ᠦᠨᠳᠦᠰᠦ ᠬᠠᠳᠬᠤᠵᠤ ᠪᠠᠢᠭᠠ ᠶ᠋ᠢ ᠂ ᠬᠠᠷᠠ ᠬᠥᠷᠥᠰᠥᠨ ᠡᠴᠡ ᠡᠰᠡᠨᠢᠯ ᠦ᠋ᠨ ᠪᠤᠯᠠᠭ ᠣᠷᠭᠢᠯᠵᠤ ᠪᠠᠢᠭᠠ ᠶ᠋ᠢ ᠂ ᠬᠣᠣᠷᠲᠤ ᠮᠣᠭᠠᠢ ᠬᠠᠳᠠ ᠥᠭᠡᠳᠡ ᠭᠣᠷᠣᠯᠵᠠᠵᠤ ᠪᠠᠢᠭᠠ ᠶ᠋ᠢ ᠂ ᠬᠣᠷᠣᠬᠠᠢ ᠰᠢᠪᠡᠵᠢ ᠰᠠᠯᠠᠭᠠᠨ ᠳᠣᠣᠷᠠ ᠳᠠᠯᠳᠠᠯᠠᠵᠤ ᠪᠠᠢᠭᠠ ᠶ᠋ᠢ ᠨᠣᠮᠢᠨ ᠨᠠᠪᠴᠢᠨ ᠤ᠋ ᠨᠠᠢᠷ ᠤ᠋ᠨ ᠰᠢᠪᠡᠨᠡᠭᠡ ᠰᠣᠨᠣᠷᠳᠠᠭᠤᠯᠵᠤ ᠪᠠᠢᠨᠠ!
ᠠᠯᠠᠭ ᠰᠢᠪᠠᠭᠤᠨ ᠤ᠋ ᠬᠠᠢᠷᠠ ᠶ᠋ᠢᠨ ᠵᠢᠷᠭᠢᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠭᠠᠷ ᠨᠣᠭᠣᠭᠠᠨ ᠨᠠᠪᠴᠢᠰ ᠪᠡᠶᠡᠰᠦᠨ ᠰᠡᠷᠪᠡᠯᠵᠡᠵᠦ ᠭᠡᠷᠡᠯ ᠲᠤᠶᠠᠭᠠ ᠶ᠋ᠢᠨ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠰᠠᠵᠢᠯᠠᠨ ᠰᠠᠯᠬᠢ ᠨᠠᠭᠠᠷ ᠢ᠋ ᠢᠨᠢᠶᠡᠲᠡᠯᠡ ᠪᠥᠵᠢᠭᠯᠡᠨᠡ ᠃
ᠨᠣᠮᠢᠨ ᠨᠠᠪᠴᠢᠨ ᠤ᠋ ᠰᠢᠪᠡᠨᠡᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠭᠠᠷ ᠠᠯᠠᠭ ᠰᠢᠪᠠᠭᠤᠳ ᠬᠥᠭᠰᠡᠨ ᠬᠥᠭᠵᠢᠵᠦ ᠰᠣᠯᠣᠩᠭᠠ ᠡᠭᠦᠯᠡ ᠶ᠋ᠢᠨ ᠵᠢᠭᠦᠷ ᠢ᠋ᠶ᠋ᠡᠨ ᠬᠠᠢᠴᠢᠯᠠᠨ ᠲᠡᠭᠷᠢ ᠣᠭᠲᠠᠷᠭᠤᠢ ᠶ᠋ᠢ ᠨᠠᠮᠠᠯᠵᠠᠲᠠᠯᠠ ᠳᠣᠩᠭᠣᠳᠤᠨᠠ ᠃
ᠠᠯᠠᠭ ᠰᠢᠪᠠᠭᠤ ᠲᠠᠢ ᠨᠣᠮᠢᠨ ᠨᠠᠪᠴᠢ ᠡᠭᠡᠨᠡᠭᠰᠢᠵᠦ ᠨᠣᠭᠣᠭᠠᠨ ᠨᠠᠪᠴᠢᠨ ᠳ᠋ᠤ᠌ ᠤᠶᠠᠩᠭᠠᠲᠤ ᠰᠢᠪᠠᠭᠤ ᠬᠣᠷᠭᠣᠯᠵᠠᠨᠠ ᠃
ᠨᠠᠢᠷ ᠤ᠋ᠨ ᠰᠢᠪᠡᠨᠡᠭᠡ ᠶ᠋ᠢ ᠨᠢ ᠦᠷᠭᠦᠯᠵᠢᠳᠡ ᠰᠣᠨᠣᠰᠬᠤ ᠶ᠋ᠢᠨ ᠲᠥᠯᠥᠭᠡ ᠠᠯᠠᠭ ᠰᠢᠪᠠᠭᠤ ᠵᠥᠭᠡᠯᠡᠨ ᠡᠭᠦᠷ ᠢ᠋ᠶ᠋ᠡᠨ ᠨᠠᠪᠴᠢᠨ ᠳᠤᠮᠳᠠ ᠵᠠᠰᠠᠯᠠ ᠃ ᠨᠣᠮᠢᠨ ᠨᠠᠪᠴᠢᠰ ᠵᠥᠭᠡᠯᠡᠨ ᠡᠭᠦᠷ ᠢ᠋ ᠨᠢ ᠬᠦᠷᠢᠶᠡᠯᠡᠨ ᠪᠦᠪᠡᠢᠯᠡᠵᠦ ᠬᠠᠷᠠ ᠰᠠᠯᠬᠢ ᠲᠣᠭᠰᠢᠨ ᠪᠣᠷᠣᠭᠠ ᠠ᠋ᠴᠠ ᠬᠠᠮᠠᠭᠠᠯᠠᠨᠠ ᠃ ᠠᠶᠤᠯᠲᠤ ᠠᠷᠢᠶᠠᠲᠠᠨ ᠬᠣᠪᠳᠣᠭ ᠮᠢᠬᠠᠴᠢᠨ ᠠ᠋ᠴᠠ ᠰᠡᠷᠭᠡᠢᠯᠡᠨᠡ᠃
ᠬᠠᠢᠷᠠ ᠶ᠋ᠢᠨ ᠵᠢᠷᠭᠢᠭᠡ ᠶ᠋ᠢ ᠨᠢ ᠥᠨᠢᠳᠡ ᠰᠣᠨᠣᠰᠬᠤ ᠶ᠋ᠢᠨ ᠲᠤᠯᠠᠳᠠ ᠨᠣᠮᠢᠨ ᠨᠠᠪᠴᠢᠰ ᠣᠬ᠌ᠶᠤᠨ ᠰᠢᠭᠦᠷ ᠢ᠋ᠶ᠋ᠡᠨ ᠡᠭᠦᠷ ᠦ᠋ᠨ ᠬᠢᠨᠢ ᠬᠠᠵᠠᠭᠤ ᠳ᠋ᠤ᠌ ᠳᠡᠯᠭᠡᠯᠡ ᠃
ᠠᠯᠠᠭ ᠰᠢᠪᠠᠭᠤᠳ ᠣᠬ᠌ᠶᠤᠨ ᠰᠢᠭᠦᠷ ᠢ᠋ ᠨᠢ ᠡᠩᠬᠦᠷᠡᠢᠯᠡᠨ ᠢᠯᠪᠢᠵᠦ ᠪᠣᠷᠣ ᠬᠣᠷᠣᠬᠠᠢ ᠡᠷᠢᠶᠡᠨ ᠬᠠᠢᠷᠠᠭᠤᠤᠯ ᠢ᠋ ᠨᠢ ᠴᠡᠪᠡᠷᠯᠡᠨᠡ ᠂ ᠭᠡᠨᠡᠨ ᠠᠶᠤᠯ ᠵᠠᠭᠤᠷᠠᠳᠤ ᠶ᠋ᠢᠨ ᠬᠣᠬᠢᠷᠠᠯ ᠠ᠋ᠴᠠ ᠰᠡᠷᠭᠡᠢᠯᠡᠨᠡ ! ᠠᠯᠠᠭ ᠰᠢᠪᠠᠭᠤᠨ ᠡᠩᠬᠦᠷᠡᠢᠯᠡᠯ ᠳᠣᠣᠷᠠ ᠂ ᠨᠣᠮᠢᠨ ᠨᠠᠪᠴᠢᠨ ᠤ᠋ ᠰᠤᠳᠠᠯ ᠰᠢᠷᠪᠥᠰᠥ ᠨᠢ ᠭᠦᠷᠪᠡᠯᠵᠡᠨ ᠦᠶᠡ ᠭᠡᠰᠢᠭᠦᠦ ᠨᠢ ᠲᠡᠨᠢᠢᠵᠦ ᠠᠭᠠᠷ ᠤ᠋ᠨ ᠮᠠᠨᠳᠠᠯ ᠵᠦᠭ ᠰᠡᠷᠪᠡᠯᠵᠡᠨ ᠤᠷᠭᠤᠨᠠ ᠃
ᠨᠣᠮᠢᠨ ᠨᠠᠪᠴᠢᠰ ᠤ᠋ᠨ ᠪᠦᠪᠡᠢᠯᠡᠯ ᠳᠣᠣᠷᠠ ᠂ ᠠᠯᠠᠭ ᠰᠢᠪᠠᠭᠤ ᠠᠩᠭᠠᠬᠠᠢ ᠵᠤᠯᠵᠠᠭᠠ ᠪᠠᠨ ᠨᠠᠪᠴᠢᠨ ᠥᠳᠥ ᠰᠥᠳᠥ ᠪᠡᠨ ᠪᠦᠷᠢᠳᠦᠭᠦᠯᠵᠦ ᠡᠭᠦᠯᠡᠨ ᠴᠢᠯᠥᠭᠡ ᠪᠡᠷ ᠳᠣᠩᠭᠣᠳᠤᠨ ᠨᠢᠰᠦᠨᠡ ᠃
ᠪᠠᠢᠭᠠᠯᠢ ᠶ᠋ᠢᠨ ᠤᠷᠭᠤᠮᠠᠯ ᠠᠮᠢᠲᠠᠨ ᠡᠢᠮᠦ ᠬᠠᠢᠷᠠ ᠨᠠᠢᠷ ᠢ᠋ᠶ᠋ᠠᠷ ᠪᠢᠯᠬᠠᠮᠠ ᠪᠠᠢᠲᠠᠯᠠ ᠬᠥᠮᠦᠨ ᠪᠣᠯᠣᠭᠰᠠᠳ ᠴᠣᠬᠣᠮ ᠶᠠᠭᠤ ᠰᠠᠨᠠᠯᠲᠠᠢ ᠪᠣᠢ? 1983 . 6 123