ᠤᠳᠠᠨ ᠨᠠᠭᠤᠷ - ᠪᠥᠬᠡᠳᠡᠯᠭᠡᠷ Удан нуур - Бөхдэлгэр
297ᠤᠳᠠᠨ ᠨᠠᠭᠤᠷ
ᠥᠷᠯᠥᠭᠡ
ᠤᠳᠠᠨ ᠪᠦᠰᠡᠯᠡᠭᠦᠷ ᠲᠡᠢ ᠴᠡᠩᠬᠡᠷ ᠨᠠᠭᠤᠷ ᠃
ᠦᠷ ᠦ᠋ᠨ ᠤᠯᠠᠪᠢᠷ ᠲᠤᠶᠠᠭᠠ ᠰᠤᠪᠤᠷᠠᠨ ᠢᠷᠡᠭᠡᠳ ᠤᠳᠠᠨ ᠤ᠋ ᠵᠤᠵᠠᠭᠠᠨ ᠨᠠᠪᠴᠢᠰ ᠢ᠋ ᠦᠨᠦᠰᠴᠦ ᠂ ᠨᠠᠭᠤᠷ ᠤ᠋ᠨ ᠬᠥᠩᠭᠡᠨ ᠳᠣᠯᠭᠢᠶᠠ ᠲᠠᠢ ᠰᠢᠪᠡᠨᠡᠯᠴᠡᠨᠡ ᠃ ᠴᠡᠩᠬᠡᠷ ᠨᠠᠭᠤᠷ ᠤ᠋ᠨ ᠤᠰᠤ ᠲᠤᠩᠭᠠᠯᠠᠭ ᠢᠷᠣᠭᠠᠷ ᠠ᠋ᠴᠠ ᠪᠠᠨ ᠭᠡᠷᠡᠯᠲᠦᠨ ᠤᠯᠠᠯᠵᠠᠵᠤ ᠬᠡᠭᠡᠨᠴᠢᠷ ᠬᠡᠦᠬᠡᠨ ᠦ᠌ ᠱᠠ ᠠᠯᠴᠢᠭᠤᠷ ᠢ᠋ ᠲᠣᠯᠢᠳᠠᠭᠰᠠᠨ ᠠᠪᠤᠷᠭᠤ ᠲᠣᠯᠢ ᠮᠡᠲᠦ ᠳᠣᠨᠣᠯᠵᠠᠨᠠ ᠃
ᠤᠳᠠᠨ ᠤ᠋ ᠳᠦᠷᠢ ᠪᠠᠢᠳᠠᠯ ᠤᠰᠤᠨ ᠳ᠋ᠤ᠌ ᠲᠤᠰᠤᠨᠠ ᠃ ᠦᠵᠡᠬᠦᠯᠡ ᠂ ᠤᠳᠠ ᠮᠣᠳᠣᠳ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠲᠣᠮᠣ ᠪᠣᠯᠵᠤ ᠳᠡᠭᠡᠭᠰᠢ ᠪᠡᠨ ᠠᠭᠠᠷ ᠲᠤ᠌ ᠴᠣᠷᠣᠢᠭᠰᠠᠨ ᠰᠠᠯᠠᠭᠠ ᠨᠤᠭᠤᠳ ᠨᠢ ᠬᠥᠬᠡ ᠣᠭᠲᠠᠷᠭᠤᠢ ᠶ᠋ᠢᠨ ᠴᠡᠩᠬᠡᠷ ᠮᠠᠨᠳᠠᠯ ᠢ᠋ ᠲᠡᠮᠦᠯᠦᠨ ᠳᠡᠭᠡᠳᠦ ᠲᠡᠭᠷᠢ ᠶ᠋ᠢᠨ ᠵᠣᠯ ᠵᠢᠷᠭᠠᠯ ᠂ ᠠᠯᠤᠰ ᠣᠷᠴᠢᠯᠠᠩ ᠤ᠋ᠨ ᠭᠤᠸᠠ ᠰᠠᠢᠬᠠᠨ ᠢ᠋ ᠲᠡᠮᠡᠴᠡᠬᠦ ᠠᠳᠠᠯᠢ ᠃ᠳᠣᠷᠣᠭᠰᠢ ᠪᠠᠨ ᠣᠰᠤᠨᠠ ᠲᠤᠰᠤᠭᠰᠠᠨ ᠰᠠᠯᠠᠭᠠ ᠨᠤᠭᠤᠳ ᠨᠢ ᠲᠤᠩᠭᠠᠯᠠᠭ ᠤᠰᠤᠨ ᠤ᠋ ᠪᠣᠯᠣᠷ ᠢᠷᠣᠭᠠᠷ ᠢ᠋ ᠲᠡᠮᠡᠴᠡᠨ ᠰᠤᠪᠤᠳ ᠱ᠌ᠢᠷᠦ ᠶ᠋ᠢ ᠡᠷᠢᠨ ᠲᠡᠭᠦᠵᠦ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠶ᠋ᠢ ᠳᠠᠯᠠᠯᠤᠨ ᠳᠠᠭᠤᠳᠠᠬᠤ ᠠᠳᠠᠯᠢ!
ᠤᠯᠠᠭᠠᠨ ᠪᠥᠴᠡᠲᠡᠨ ᠳ᠋ᠠᠮᠪᠠ᠂ ᠤᠯᠠᠪᠢᠷ ᠲᠤᠶᠠᠭᠠ ᠲᠠᠢ ᠤᠷᠤᠯᠳᠤᠨ ᠪᠣᠰᠤᠭᠠᠳ ᠤᠳᠠᠨ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠢᠷᠡᠯᠡ ᠃ ᠤᠳᠠᠨ ᠤ᠋ ᠰᠠᠯᠠᠭᠠᠨ ᠳ᠋ᠤ᠌ ᠵᠢᠷᠤᠭ ᠤ᠋ᠨ ᠵᠢᠶᠠᠰᠠ ᠪᠠᠨ ᠲᠠᠯᠪᠢᠭᠠᠳ ᠲᠡᠷᠡ ᠂ ᠥᠩᠭᠡᠲᠦ ᠪᠣᠳᠣᠭ ᠲᠠᠭᠠᠨ ᠪᠢᠷ ᠢᠳᠡᠭᠦᠯᠦᠨ ᠤᠳᠠᠨ ᠳ᠋ᠤ᠌ ᠴᠡᠩᠬᠡᠷᠯᠡᠬᠦ ᠲᠤᠩᠭᠠᠯᠠᠭ ᠨᠠᠭᠤᠷ ᠂ ᠤᠰᠤᠨ ᠳ᠋ᠤ᠌ ᠵᠢᠷᠪᠢᠯᠵᠡᠬᠦ ᠤᠳᠠᠨ ᠤ᠋ ᠰᠡᠭᠦᠳᠡᠷ ᠢ᠋ ᠵᠢᠷᠤᠨᠠ ᠃ ᠠᠮᠢᠳᠤᠷᠠᠯ ᠳ᠋ᠤ᠌ ᠲᠣᠩᠭᠣᠷᠤᠤ ᠶᠠᠭᠤᠮᠠ ᠠᠳᠠᠭ ᠮᠠᠭᠤᠬᠠᠢ ᠪᠣᠯᠪᠠᠴᠤ ᠤᠰᠤᠨ ᠳ᠋ᠤ᠌ ᠵᠢᠷᠪᠢᠯᠵᠡᠬᠦ ᠤᠳᠠᠨ ᠤ᠋ ᠲᠣᠩᠭᠣᠷᠤᠤ ᠰᠡᠭᠦᠳᠡᠷ ᠲᠤᠢᠯ ᠤ᠋ᠨ ᠭᠤᠸᠠ ᠰᠠᠢᠬᠠᠨ ! ᠳ᠋ᠠᠮᠪᠠ ᠶ᠋ᠢᠨ ᠵᠢᠷᠤᠭ ᠤ᠋ᠨ ᠵᠢᠶᠠᠰᠠ ᠳᠡᠭᠡᠷᠡ ᠂ ᠠᠮᠢᠳᠤᠷᠠᠯ ᠤ᠋ᠨ ᠭᠤᠸᠠ ᠰᠠᠢᠬᠠᠨ ᠂ ᠪᠠᠢᠭᠠᠯᠢ ᠶ᠋ᠢᠨ ᠭᠤᠸᠠ ᠰᠠᠢᠬᠠᠨ ᠂ ᠰᠡᠳᠬᠢᠯ ᠦ᠋ᠨ ᠭᠤᠸᠠ ᠰᠠᠢᠬᠠᠨ ᠵᠡᠷᠭᠡᠪᠡᠷ ᠦᠯᠡᠳᠡᠨᠡ᠃
ᠪᠣᠯᠵᠣᠮᠣᠷ ᠤᠳᠠᠨ ᠤ᠋ ᠰᠠᠯᠠᠭᠠᠨ ᠠ᠋ᠴᠠ ᠥᠩᠭᠡᠢᠨ ᠦᠵᠡᠨᠡ ᠃ ᠱᠠᠭᠠᠵᠠᠭᠠᠢ ᠱᠠᠭᠰᠢᠭᠰᠠᠭᠠᠷ ᠰᠡᠭᠦᠯ ᠢ᠋ᠶ᠋ᠡᠨ ᠬᠠᠢᠴᠢᠯᠠᠨ ᠨᠢᠰᠦᠨ ᠡᠦᠲᠦᠨᠡ ᠃
ᠦᠳᠡ
ᠨᠠᠷᠠᠨ ᠤ᠋ ᠰᠢᠵᠢᠷ ᠠᠯᠲᠠᠨ ᠭᠡᠷᠡᠯ ᠨᠠᠭᠤᠷ ᠤ᠋ᠨ ᠤᠰᠤ ᠶ᠋ᠢ ᠨᠡᠪᠲᠡ ᠭᠡᠢᠭᠦᠯᠪᠡ ᠃ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠂ ᠵᠢᠷᠪᠢᠯᠵᠡᠭᠰᠡᠨ ᠤᠳᠠᠨ ᠤ᠋ ᠮᠥᠴᠢᠷ ᠢ᠋ᠶ᠋ᠡᠷ ᠬᠠᠶᠠ ᠰᠦᠯᠵᠢᠨ ᠂ ᠭᠢᠯᠲᠠᠭᠠᠨᠠᠭᠰᠠᠨ ᠢᠷᠣᠭᠠᠷ ᠤ᠋ᠨ ᠴᠢᠯᠠᠭᠤ ᠶ᠋ᠢ ᠬᠠᠶᠠ ᠦᠨᠦᠰᠴᠦ ᠂ ᠮᠥᠩᠭᠥᠨ ᠴᠡᠴᠡᠭ ᠦ᠋ᠨ ᠬᠡᠯᠲᠡᠰ ᠮᠡᠲᠦ ᠳᠣᠯᠭᠢᠶᠠ ᠶ᠋ᠢ ᠢᠷᠠᠯᠵᠠᠭᠤᠯᠤᠨᠠ᠃
ᠤᠳᠠᠨ ᠤ᠋ ᠳᠤᠮᠳᠠ ᠪᠤᠭᠤᠷᠤᠯ ᠰᠠᠬᠠᠯ ᠲᠠᠢ ᠡᠪᠦᠭᠡᠨ ᠰᠠᠭᠤᠭᠠᠳ ᠤᠰᠤᠨ ᠳ᠋ᠤ᠌ ᠴᠠᠢᠪᠤᠷ ᠤᠲᠠᠰᠤᠨ ᠭᠥᠬᠢ ᠪᠡᠨ ᠵᠢᠷᠪᠢᠯᠵᠡᠭᠦᠯᠦᠨᠡ ᠡᠪᠦᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠴᠠᠢᠷ ᠤ᠋ᠨ ᠰᠠᠭᠤᠯᠠᠭᠠ ᠂ ᠨᠤᠭᠤᠯᠤᠭᠠ ᠲᠠᠢ ᠲᠡᠮᠳᠡᠭᠯᠡᠯ ᠬᠠᠷᠠᠭᠳᠠᠨᠠ ᠃
《ᠡᠪᠦᠭᠡ ᠠ᠋ ᠂ ᠣᠯᠠᠨ ᠵᠢᠭᠠᠰᠤ ᠪᠠᠷᠢᠴᠢᠬᠠᠪᠠᠤ ? 》ᠭᠡᠵᠦ ᠤᠯᠠᠭᠠᠨ ᠪᠥᠴᠡᠲᠡᠨ ᠳ᠋ᠠᠮᠪᠠ ᠰᠢᠷᠠ ᠪᠣᠭᠴᠣ ᠪᠠᠨ ᠡᠭᠦᠷᠦᠨ ᠰᠡᠭᠰᠡᠯᠵᠡᠨ ᠭᠦᠶᠦᠭᠰᠡᠭᠡᠷ ᠢᠷᠡᠯᠡ ᠃ ᠴᠠᠢᠷ ᠤ᠋ᠨ ᠰᠠᠭᠤᠯᠠᠭᠠ ᠨᠢ ᠬᠣᠪ ᠬᠣᠭᠣᠰᠣᠨ ᠠᠲᠠᠯᠠ ᠲᠡᠮᠳᠡᠭᠯᠡᠯ ᠦ᠋ᠨ ᠳᠡᠪᠲᠡᠷ ᠨᠢ ᠲᠥᠪ ᠳᠦᠭᠦᠷᠡᠩ ᠦᠰᠦᠭ ᠲᠡᠢ ᠃
《 ᠡᠪᠦᠭᠡ ᠠ᠋! 》 ᠭᠡᠳ ᠪᠢᠴᠢᠬᠠᠨ ᠳ᠋ᠠᠮᠪᠠ ᠭᠠᠢᠬᠠᠰᠢᠷᠠᠨ ᠪᠤᠭᠤᠷᠤᠯ ᠰᠠᠬᠠᠯ ᠢ᠋ ᠨᠢ ᠬᠠᠷᠠᠨᠠ ᠂ ᠪᠣᠯᠣᠷ ᠤᠰᠤ ᠶ᠋ᠢ ᠬᠠᠷᠠᠨᠠ ᠃
ᠪᠣᠯᠣᠷ ᠤᠰᠤᠨ ᠳ᠋ᠤ᠌ ᠪᠤᠭᠤᠷᠤᠯ ᠰᠠᠬᠠᠯ ᠰᠡᠷᠪᠡᠯᠵᠡᠯᠡ ᠄ ᠬᠦᠦ ᠮᠢᠨᠢ ! ᠡᠪᠦᠭᠡ ᠴᠢᠨᠢ ᠪᠢ ᠴᠡᠩᠬᠡᠷ ᠨᠠᠭᠤᠷ ᠤ᠋ᠨ ᠲᠠᠷᠭᠤᠨ ᠵᠢᠭᠠᠰᠤ ᠶ᠋ᠢ ᠭᠣᠬᠠᠳᠠᠵᠤ ᠪᠠᠢᠭᠠ ᠪᠢᠰᠢ᠂ ᠬᠠᠷᠢᠨ ᠨᠠᠰᠤᠨ ᠤ᠋ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠦᠨᠡᠲᠦ ᠰᠤᠪᠤᠳ ᠢ᠋ ᠱᠦᠭᠦᠵᠦ ᠪᠠᠢᠨᠠ ᠰᠢᠦ ! ᠬᠦᠦ ᠮᠢᠨᠢ ᠦᠵᠡ! ᠨᠠᠭᠤᠷ ᠤ᠋ᠨ ᠤᠰᠤᠨ ᠳ᠋ᠤ᠌ ᠭᠡᠭᠡᠨ ᠭᠡᠷᠡᠯ ᠂ ᠬᠠᠷᠠᠩᠭᠤᠢ ᠰᠡᠭᠦᠳᠡᠷ ᠂ ᠤᠳᠠᠨ ᠮᠥᠴᠢᠷ᠂ ᠡᠭᠦᠯᠡᠨ ᠬᠡᠯᠲᠡᠰ ᠴᠥᠮ ᠲᠣᠰᠴᠤ ᠪᠣᠢ ᠃ ᠡᠪᠦᠭᠡ ᠶ᠋ᠢᠨ ᠴᠢᠨᠢ ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ ᠳ᠋ᠤ᠌ ᠭᠡᠭᠡᠨ ᠭᠡᠷᠡᠯ ᠂ ᠬᠠᠷᠠᠩᠭᠤᠢ ᠰᠡᠭᠦᠳᠡᠷ᠂ ᠰᠠᠯᠬᠢ ᠰᠢᠭᠤᠷᠭᠠ ᠂ ᠮᠥᠨᠳᠥᠷ ᠬᠢᠷᠠᠭᠤ ᠪᠦᠷ ᠤᠴᠠᠷᠠᠵᠤ ᠥᠩᠭᠡᠷᠡᠭᠰᠡᠨ ᠰᠢᠦ ᠬᠦᠦ ᠮᠢᠨᠢ ᠂ ᠠᠮᠢᠳᠤᠷᠠᠯ ᠠ᠋ᠴᠠ ᠱᠦᠭᠦᠭᠰᠡᠨ ᠦᠨᠡᠲᠦ ᠰᠤᠪᠤᠳ ᠢ᠋ᠶ᠋ᠠᠨ ᠴᠠᠢᠷ ᠤ᠋ᠨ ᠰᠠᠭᠤᠯᠠᠭᠠᠨ ᠳ᠋ᠤ᠌ ᠬᠢᠬᠦ ᠪᠢᠰᠢ ᠂ ᠬᠠᠷᠢᠨ ᠴᠡᠭᠡᠵᠢ ᠵᠢᠷᠦᠬᠡᠨ ᠳ᠋ᠦ᠍ ᠴᠢᠨᠢ ᠰᠢᠭᠢᠳᠬᠡᠵᠦ ᠥᠭᠭᠦᠨᠡ! ᠵᠢᠭᠠᠰᠤᠨ ᠮᠢᠬᠠ ᠨᠢᠭᠡ ᠴᠠᠭ ᠭᠡᠳᠡᠰᠦ ᠬᠣᠳᠣᠭᠣᠳᠣ ᠶ᠋ᠢ ᠴᠢᠨᠢ ᠳᠦᠭᠦᠷᠭᠡᠨᠡ ᠭᠡᠬᠦᠯᠡ ᠠᠮᠢᠳᠤᠷᠠᠯ ᠤ᠋ᠨ ᠰᠤᠪᠤᠳ ᠨᠢᠭᠡ ᠨᠠᠰᠤᠨ ᠳ᠋ᠤ᠌ ᠣᠶᠤᠨ ᠲᠠᠷᠢᠬᠢ ᠶ᠋ᠢ ᠴᠢᠨᠢ ᠴᠢᠮᠡᠭᠯᠡᠨᠡ ! ᠤᠯᠠᠭᠠᠨ ᠪᠥᠴᠡᠲᠡᠨ ᠳ᠋ᠠᠮᠪᠠ ᠶ᠋ᠢᠨ ᠨᠢᠳᠦ ᠨᠢ ᠲᠣᠷᠮᠣᠯᠵᠠᠨ ᠴᠢᠷᠠᠢ ᠨᠢ ᠬᠡᠷᠡᠯᠳᠦᠵᠦ ᠡᠪᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠪᠦᠷ ᠲᠦ᠍ ᠰᠠᠭᠤᠵᠤ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠬᠠᠷᠠᠴᠠ ᠂ ᠪᠤᠲᠠᠷᠠᠭᠰᠠᠨ ᠰᠠᠬᠠᠯ ᠢ᠋ ᠨᠢ ᠬᠠᠷᠠᠨᠠ ᠃ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠬᠠᠷᠠᠴᠠ ᠂ ᠪᠤᠲᠠᠷᠠᠭᠰᠠᠨ ᠰᠠᠬᠠᠯ ᠂ ᠲᠣᠷᠮᠣᠯᠵᠠᠭᠰᠠᠨ ᠨᠢᠳᠦ ᠂ ᠤᠯᠠᠪᠠᠯᠵᠠᠭᠰᠠᠨ ᠴᠡᠷᠡᠢ ᠵᠡᠷᠭᠡᠪᠡᠷ ᠤᠳᠠᠨ ᠨᠠᠭᠤᠷ ᠲᠤ᠌ ᠲᠤᠰᠬᠤ ᠳ᠋ᠤ᠌ ᠡᠪᠦᠭᠡᠨ ᠴᠦ᠍ ᠵᠠᠯᠠᠭᠤ ᠪᠣᠯᠴᠢᠬᠠᠭᠰᠠᠨ ᠮᠡᠲᠦ ᠂ ᠣᠮᠪᠣᠯᠣ ᠨᠢ ᠴᠦ᠍ ᠥᠭᠡᠯᠡᠢ ᠪᠣᠯᠴᠢᠬᠠᠭᠰᠠᠨ ᠰᠢᠭ᠋!
ᠦᠳᠡᠰᠢ
ᠠᠭᠤᠳᠠᠮ ᠣᠭᠲᠠᠷᠭᠤᠢ ᠳ᠋ᠤ᠌ ᠡᠦᠲᠦᠨ ᠰᠦᠷᠦᠭ ᠲᠦᠭᠡᠪᠡ ᠃
ᠵᠠᠷᠢᠮ ᠨᠢ ᠴᠤᠪᠤᠷᠠᠯᠳᠤᠨ ᠠᠶᠠᠯᠠᠬᠤ ᠴᠤ᠌ ᠶᠤᠮᠰᠢᠭ ᠂ ᠲᠣᠭᠯᠠᠬᠤ ᠴᠤ᠌ ᠶᠤᠮᠰᠢᠭ ᠂ ᠵᠠᠷᠢᠮ ᠨᠢ ᠪᠠᠭᠯᠠᠷᠠᠨ ᠬᠡᠯᠡᠯᠴᠡᠬᠦ ᠶᠤᠮᠰᠢᠭ ᠂ ᠨᠠᠷᠭᠢᠬᠤ ᠴᠤ᠌ ᠶᠤᠮᠰᠢᠭ ᠂ ᠵᠠᠷᠢᠮ ᠨᠢ ᠬᠠᠶᠠ ᠪᠠᠯᠠᠷᠠᠨ ᠬᠠᠶᠠ ᠲᠣᠳᠣᠷᠠᠵᠤ ᠨᠢᠭᠤᠯᠴᠠ ᠨᠠᠭᠠᠳᠬᠤ ᠬᠡᠦᠬᠡᠳ ᠭᠡᠮᠡᠷ ᠂ᠵᠠᠷᠢᠮ ᠨᠢ ᠬᠠᠶᠠ ᠳᠡᠭᠳᠡᠨ ᠬᠠᠶᠠ ᠲᠤᠨᠵᠤ ᠤᠰᠤᠨ ᠳ᠋ᠤ᠌ ᠤᠮᠪᠠᠬᠤ ᠪᠠᠭᠠᠴᠤᠤᠯ ᠭᠡᠮᠡᠷ !
ᠬᠥᠬᠡ ᠣᠭᠲᠠᠷᠭᠤᠢ ᠶ᠋ᠢᠨ ᠡᠦᠲᠦᠨ ᠰᠦᠷᠦᠭ ᠠ᠋ ᠂ ᠲᠠᠨᠤᠰ ᠭᠡᠷᠡᠯᠲᠦ ᠰᠡᠭᠦᠳᠡᠷ ᠢ᠋ᠶ᠋ᠡᠨ ᠤᠳᠠᠨ ᠨᠠᠭᠤᠷ ᠲᠤ᠌ ᠲᠤᠰᠬᠠᠪᠠᠤ? ᠤᠳᠠᠨ ᠨᠠᠭᠤᠷ ᠲᠤ᠌ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠲᠦᠭᠡᠪᠡ ᠃
ᠤᠯᠠᠭᠠᠨ ᠳ᠋ᠧᠩ ᠂ ᠨᠣᠭᠣᠭᠠᠨ ᠳ᠋ᠧᠩ ᠂ ᠴᠡᠭᠡᠨ ᠳ᠋ᠧᠩ ! ᠵᠠᠷᠢᠮ ᠨᠢ ᠵᠢᠷᠪᠢᠯᠵᠡᠭᠰᠡᠨ ᠤᠳᠠᠨ ᠤ᠋ ᠬᠠᠷᠠᠩᠭᠤᠢ ᠮᠥᠴᠢᠷ ᠳᠡᠭᠡᠷᠡ ᠰᠢᠭᠢᠳᠬᠡᠭᠰᠡᠨ ᠰᠤᠪᠤᠳ ᠱ᠌ᠢᠷᠦ ᠮᠡᠲᠦ ᠪᠠᠭᠯᠠᠷᠠᠨᠠ ᠃ ᠵᠠᠷᠢᠮ ᠨᠢ ᠲᠤᠨᠤᠯᠵᠠᠭᠰᠠᠨ ᠨᠠᠭᠤᠷ ᠤ᠋ᠨ ᠢᠷᠣᠭᠠᠷ ᠲᠤ᠌ ᠪᠠᠢᠭᠠ ᠭᠡᠭᠡᠨ ᠲᠣᠯᠢ ᠠᠳᠠᠯᠢ ᠭᠡᠷᠡᠯᠲᠦᠨᠡ ᠃ ᠵᠠᠷᠢᠮ ᠨᠢ ᠣᠶᠤᠨ ᠤ᠋ ᠭᠡᠷᠡᠯ ᠪᠢᠯᠢᠭ ᠦ᠋ᠨ ᠲᠤᠶᠠᠭᠠ ᠶ᠋ᠢ ᠰᠠᠴᠤᠵᠤ᠂ ᠵᠠᠷᠢᠮ ᠨᠢ ᠡᠦᠲᠦᠨ ᠠᠯᠤᠰ ᠣᠭᠲᠠᠷᠭᠤᠢ ᠶ᠋ᠢᠨ ᠴᠠᠭᠠᠨᠠ ᠭᠢᠯᠠᠯᠵᠠᠨᠠ ᠃
ᠤᠯᠠᠭᠠᠨ ᠴᠡᠭᠡᠨ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠠ᠋ ᠂ ᠤᠳᠠᠨ ᠨᠠᠭᠤᠷ ᠤ᠋ᠨ ᠡᠦᠲᠦᠨ ᠰᠦᠷᠦᠭ ᠰᠢᠦ!
ᠤᠯᠠᠭᠠᠨ ᠪᠥᠴᠡᠲᠡᠨ ᠳ᠋ᠠᠮᠪᠠ ᠮᠢᠨᠢ ᠂ ᠴᠢ ᠠᠯᠢ ᠭᠡᠷᠡᠯᠲᠦ ᠡᠦᠲᠦᠨ ᠦ᠌ ᠳᠣᠣᠷᠠ ᠰᠠᠭᠤᠵᠤ ᠪᠠᠢᠭᠠ ᠪᠣᠢ? ᠴᠢᠨᠦ ᠬᠥᠭᠡᠷᠦᠬᠦᠨ ᠰᠡᠭᠦᠳᠡᠷ ᠶᠠᠭᠠᠬᠢᠭᠠᠳ ᠤᠳᠠᠨ ᠨᠠᠭᠤᠷ ᠤ᠋ᠨ ᠪᠣᠯᠣᠷ ᠤᠰᠤᠨ ᠳ᠋ᠤ᠌ ᠲᠤᠰᠬᠤ ᠦᠭᠡᠢ ᠪᠣᠢ?
ᠥ ᠂ ᠳ᠋ᠠᠮᠪᠠ ᠮᠢᠨᠢ ᠂ ᠮᠥᠩᠭᠥᠨ ᠣᠳᠣᠲᠤ ᠥᠷᠥᠭᠡᠨ ᠳ᠋ᠡᠭᠡᠨ ᠰᠠᠭᠤᠭᠠᠳ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠨ ᠪᠢᠴᠢᠬᠦ ᠨᠢ ᠰᠢᠪ ᠳᠧ! ᠲᠡᠷᠡ ᠣᠳᠣᠲᠤ ᠣᠭᠲᠠᠷᠭᠤᠢ ᠳ᠋ᠤ᠌ ᠬᠦᠷᠦᠭᠡ ᠦᠭᠡᠢ ᠴᠦ᠍ ᠂ ᠤᠳᠠᠨ ᠨᠠᠭᠤᠷ ᠲᠤ᠌ ᠢᠷᠡᠭᠡ ᠦᠭᠡᠢ ᠴᠦ᠍ ᠡᠦᠲᠦᠨ ᠰᠦᠷᠦᠭ ᠨᠢᠳᠦᠨ ᠳ᠋ᠦ᠍ᠨᠢ ᠭᠢᠯᠪᠠᠵᠤ ᠂ ᠤᠳᠠᠨ ᠨᠠᠭᠤᠷ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠮᠡᠯᠮᠡᠯᠵᠡᠵᠦ ᠪᠣᠢ ᠃ᠲᠡᠷᠡ ᠤᠳᠠᠨ ᠨᠠᠭᠤᠷ ᠤ᠋ᠨ ᠥᠷᠯᠥᠭᠡ ᠶ᠋ᠢᠨ ᠥᠩᠭᠡ ᠦᠵᠡᠮᠵᠢ ᠶ᠋ᠢ ᠪᠢᠴᠢᠨᠡ ᠂ ᠤᠳᠠᠨ ᠨᠠᠭᠤᠷ ᠠ᠋ᠴᠠ ᠱᠦᠭᠦᠭᠰᠡᠨ ᠡᠪᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠢᠳᠤᠷᠠᠯ ᠤ᠋ᠨ ᠰᠤᠪᠤᠳ ᠱ᠌ᠢᠷᠦ ᠶ᠋ᠢ ᠲᠡᠮᠳᠡᠭᠯᠡᠨᠡ ᠂ ᠤᠳᠠᠨ ᠨᠠᠭᠤᠷ ᠤ᠋ᠨ ᠦᠳᠡᠰᠢ ᠶ᠋ᠢᠨ ᠣᠳᠣᠨ ᠰᠦᠷᠦᠭ ᠢ᠋ ᠪᠢᠴᠢᠨᠡ ᠂ ᠤᠳᠠᠨ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠦᠯᠡᠳᠡᠭᠰᠡᠨ ᠥᠪᠡᠷᠦᠨ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠡᠬᠢᠨ ᠦ᠌ ᠤᠯᠠ ᠮᠥᠷ ᠢ᠋ ᠪᠢᠴᠢᠨᠡ!
ᠲᠡᠭᠦᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ ᠂ ᠤᠳᠠᠨ ᠨᠠᠭᠤᠷ ᠤ᠋ᠨ ᠥᠷᠯᠥᠭᠡ ᠶ᠋ᠢᠨ ᠲᠤᠶᠠᠭᠠ ᠂ ᠦᠳᠡ ᠶ᠋ᠢᠨ ᠭᠡᠷᠡᠯ ᠂ ᠦᠳᠡᠰᠢ ᠶ᠋ᠢᠨ ᠣᠳᠣᠳ ᠲᠠᠢ ᠬᠠᠮᠲᠤᠪᠠᠷ ᠬᠢᠵᠠᠭᠠᠷ ᠦᠭᠡᠢ ᠠᠯᠤᠰ ᠲᠡᠰᠢ ᠰᠤᠨᠤᠯᠵᠠᠨᠠ !
ᠤᠳᠠᠨ ᠨᠠᠭᠤᠷ ᠲᠤ᠌ ᠰᠢᠷᠭᠢᠬᠦ ᠡᠳᠦᠷ ᠪᠠᠢᠨᠠ ᠭᠡᠬᠦᠯᠡ ᠲᠡᠭᠦᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠬᠦᠰᠡᠯᠡᠩ ᠮᠣᠬᠣᠷᠠᠬᠤ ᠴᠠᠭ ᠠᠯᠠᠭᠠ !
1982 ·10