ᠰᠠᠨᠠᠭᠠ ᠮᠠᠭᠤ ᠶᠠᠪᠤᠨ ᠭᠤᠲᠤᠨᠠ Санаа муу яван гутна
274ᠰᠠᠨᠠᠭᠠ ᠮᠠᠭᠤ ᠶᠠᠪᠤᠨ ᠭᠤᠲᠤᠨᠠ
ᠰᠢᠷᠠ ᠬᠠᠳᠠᠨ ᠠᠶ᠋ᠢᠯ ᠤ᠋ᠨ ᠠᠷᠤ ᠶ᠋ᠢᠨ ᠠᠰᠬᠠ ᠬᠠᠳᠠᠨ ᠤ᠋ ᠡᠩᠭᠡᠷ ᠲᠦ᠍ ᠬᠠᠷᠠᠩᠭᠤᠢ ᠬᠠᠷᠠ᠂ ᠬᠤᠶ᠋ᠢᠬᠤᠷ ᠬᠥᠬᠡ ᠭᠡᠭᠴᠢ ᠬᠣᠶᠠᠷ ᠦᠨᠡᠭᠡ ᠨᠠᠶ᠋ᠢᠵᠠᠯᠠᠨ ᠨᠥᠬᠥᠷᠯᠡᠵᠦ ᠠᠮᠢᠳᠤᠷᠠᠵᠤ ᠪᠠᠶ᠋ᠢᠬᠰᠠᠨ ᠭᠡᠨᠡ᠃
ᠨᠢᠭᠡᠨ ᠡᠳᠦᠷ ᠬᠤᠶ᠋ᠢᠬᠤᠷ ᠬᠥᠬᠡ ᠨᠢ᠄《 ᠬᠠᠷᠠ ᠠᠬᠠ ᠠ᠋᠂ ᠪᠢ ᠴᠢᠮᠠ ᠠ᠋ᠴᠠ ᠥᠴᠦᠬᠡᠨ ᠴᠦ᠍ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠴᠢ ᠦᠭᠡᠢ ᠪᠣᠯ ᠪᠢ ᠨᠢᠭᠡ ᠴᠠᠭ ᠴᠤ᠌ ᠠᠮᠢᠳᠤᠷᠠᠬᠤᠶᠠ ᠪᠡᠷᠬᠡ 》ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍《 ᠮᠡᠷᠭᠡᠨ ᠳᠡᠭᠦᠦ ᠮᠢᠨᠢ ! ᠦᠨᠡᠨ ᠊ᠢ ᠬᠡᠯᠡᠪᠡᠯ ᠪᠢ ᠪᠠᠰᠠ ᠴᠢᠮᠠ ᠠ᠋ᠴᠠ ᠨᠢᠭᠡ ᠮᠥᠴᠡ ᠴᠦ᠍ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ ᠰᠢᠦ᠂ ᠬᠡᠷᠪᠡ ᠴᠢ ᠮᠢᠨᠦ ᠳᠡᠷᠭᠡᠳᠡ ᠦᠭᠡᠢ ᠪᠣᠯ ᠶᠠᠭ ᠬᠦᠢᠰᠦ ᠪᠡᠨ ᠭᠡᠭᠡᠭᠰᠡᠨ ᠰᠢᠭ ᠪᠣᠯᠳᠠᠭ 》 ᠭᠡᠵᠦ ᠬᠠᠷᠠᠩᠭᠤᠢ ᠬᠠᠷᠠ ᠮᠡᠬᠦᠰᠬᠢᠨ ᠶᠣᠰᠣᠯᠠᠵᠤ ᠬᠡᠯᠡᠪᠡ᠃
ᠢᠩᠭᠢᠭᠡᠳ ᠬᠣᠶᠠᠭᠤᠯᠠ ᠨᠢᠭᠡ ᠡᠳᠦᠷ ᠠᠶ᠋ᠢᠯ ᠤ᠋ᠨ ᠬᠣᠶᠠᠷ ᠲᠠᠯᠠ ᠪᠠᠷ ᠢᠳᠡᠰᠢ ᠡᠷᠢᠬᠦ ᠪᠡᠷ ᠭᠠᠷᠤᠭᠠᠳ ᠬᠠᠷᠠᠩᠭᠤᠢ ᠬᠠᠷᠠ ᠠᠶ᠋ᠢᠯ ᠤ᠋ᠨ ᠬᠣᠲᠠ ᠶ᠋ᠢᠨ ᠪᠤᠯᠤᠩ ᠳ᠋ᠤ᠌ ᠬᠡᠪᠲᠡᠵᠦ ᠪᠠᠶ᠋ᠢᠲᠠᠯᠠ᠂ ᠲᠡᠷᠡ ᠭᠡᠷ ᠦ᠋ᠨ ᠡᠮᠡᠭᠲᠡᠢ ᠨᠢ ᠨᠢᠭᠡᠨ ᠲᠠᠷᠭᠤᠨ ᠭᠡᠭᠴᠢ ᠲᠠᠬᠢᠶᠠ ᠪᠠᠨ ᠲᠡᠮᠦᠷ ᠤᠲᠠᠰᠤ ᠪᠠᠷ ᠲᠣᠣᠷᠯᠠᠭᠰᠠᠨ ᠰᠠᠭᠰᠤᠨ ᠳ᠋ᠤ᠌ ᠬᠣᠷᠢᠭᠠᠳ ᠡᠭᠦᠳᠡᠨ ᠦ᠌ ᠪᠡᠨ ᠬᠠᠵᠠᠭᠤ ᠳ᠋ᠤ᠌ ᠲᠠᠯᠪᠢᠪᠠ᠃ ᠬᠠᠷᠠᠩᠭᠤᠢ ᠬᠠᠷᠠ ᠦᠵᠡᠭᠡᠳ᠄ ᠵᠠ ᠡᠨᠡ ᠲᠠᠬᠢᠶᠠᠨ ᠳ᠋ᠤ᠌ ᠯᠠ ᠬᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠵᠤ ᠪᠠᠶ᠋ᠢᠲᠠᠯᠠ ᠲᠡᠷᠡ ᠡᠮᠡᠭᠲᠡᠢ ᠪᠠᠰᠠ ᠨᠢᠭᠡᠨ ᠲᠠᠬᠢᠶᠠ ᠪᠠᠨ ᠲᠡᠪᠡᠷᠢᠵᠦ ᠨᠣᠭᠣᠭᠠᠨ ᠤ᠋ ᠪᠠᠨ ᠬᠠᠰᠢᠶᠠᠨ ᠳ᠋ᠤ᠌ ᠣᠷᠣᠪᠠ᠃ ᠬᠠᠷᠠᠩᠭᠤᠢ ᠬᠠᠷᠠ ᠡᠭᠦᠨ ᠊ᠢ ᠦᠵᠡᠭᠡᠳ ᠲᠤᠶ᠋ᠢᠯ ᠢ᠋ᠶ᠋ᠠᠷ ᠪᠠᠶᠠᠷᠯᠠᠵᠤ ᠰᠥᠨᠢ ᠢᠷᠡᠵᠦ ᠢᠳᠡᠬᠦ ᠪᠡᠷ ᠰᠢᠢᠳᠦᠭᠡᠳ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ᠄《 ᠬᠤᠶ᠋ᠢᠬᠤᠷ ᠬᠥᠬᠡ ᠶᠠᠭᠤ ᠭᠡᠵᠦ ᠨᠠᠳᠠ ᠠ᠋ᠴᠠ ᠰᠠᠯᠬᠤᠪ ᠳᠠ᠂ ᠬᠡᠷᠪᠡ ᠲᠡᠷᠡ ᠦᠭᠡᠢ ᠪᠣᠯ ᠪᠢ ᠬᠡᠳᠦᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠢᠳᠡᠬᠦ ᠪᠣᠢ ! 》ᠭᠡᠵᠦ ᠪᠣᠳᠣᠭᠰᠠᠭᠠᠷ ᠬᠠᠷᠢᠪᠠ᠃
ᠬᠤᠶ᠋ᠢᠬᠤᠷ ᠬᠥᠬᠡ ᠲᠡᠷᠡ ᠠᠶ᠋ᠢᠯ ᠤ᠋ᠨ ᠪᠤᠲᠠ ᠪᠤᠷᠭᠠᠰᠤᠨ ᠤ᠋ ᠳᠣᠣᠷᠠ ᠬᠡᠪᠲᠡᠵᠦ ᠪᠠᠶ᠋ᠢᠲᠠᠯᠠ ᠲᠡᠷᠡ ᠡᠮᠡᠭᠲᠡᠢ ᠲᠠᠬᠢᠶᠠ ᠪᠠᠨ ᠨᠢᠭᠡᠨ ᠬᠠᠪᠬᠠ ᠶ᠋ᠢᠨ ᠳᠡᠷᠭᠡᠳᠡ ᠤᠶᠠᠵᠤ ᠲᠠᠯᠪᠢᠭᠰᠠᠨ ᠊ᠢ ᠦᠵᠡᠭᠡᠳ᠄ ᠵᠠ ᠡᠨᠡ ᠴᠢᠨᠢ ᠬᠠᠷᠢᠨ ᠪᠢᠳᠡᠨ ᠊ᠢ ᠬᠣᠣᠷᠯᠠᠨᠠ ᠭᠡᠵᠦ ᠪᠠᠶ᠋ᠢᠬ᠋ᠠ ᠶᠤᠮ ᠪᠠᠶ᠋ᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠤᠷᠮᠠ ᠦᠭᠡᠢ ᠤᠷᠪᠠᠶ᠋ᠢᠬᠰᠠᠭᠠᠷ ᠪᠤᠴᠠᠪᠠ᠃
ᠬᠠᠷᠠᠩᠭᠤᠢ ᠬᠠᠷᠠ᠂ ᠬᠤᠶ᠋ᠢᠬᠤᠷ ᠬᠥᠬᠡ ᠶ᠋ᠢᠨ ᠤᠷᠮᠠ ᠦᠭᠡᠢ ᠢᠷᠡᠭᠰᠡᠨ ᠊ᠢ ᠦᠵᠡᠭᠡᠳ《 ᠳᠡᠭᠦᠦ ᠮᠢᠨᠢ ᠮᠠᠭᠠᠳ ᠥᠯᠥᠰᠦᠭᠰᠡᠨ ᠪᠠᠶ᠋ᠢᠯᠭᠦᠢ᠂ ᠪᠢ ᠴᠢᠮᠠ ᠳ᠋ᠤ᠌ ᠨᠢᠭᠡᠨ ᠪᠠᠶᠠᠷ ᠤ᠋ᠨ ᠤᠴᠢᠷ ᠬᠡᠯᠡᠵᠦ ᠥᠭᠭᠦᠶᠡ ᠃ ᠲᠡᠷᠡ ᠠᠶ᠋ᠢᠯ ᠤ᠋ᠨ ᠡᠭᠦᠳᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠨᠢᠭᠡᠨ ᠲᠠᠷᠭᠤᠨ ᠲᠠᠬᠢᠶᠠ ᠪᠠᠶ᠋ᠢᠨᠠ᠃ ᠴᠢ ᠣᠴᠢᠵᠤ ᠢᠳᠡᠭᠡᠷᠡᠢ ! ᠪᠢ ᠨᠢᠭᠡᠨᠲᠡ ᠴᠠᠳᠤᠭᠰᠠᠨ ᠪᠣᠯᠬᠣᠷ ᠪᠠᠬᠠᠨ ᠨᠣᠶ᠋ᠢᠷ ᠬᠦᠷᠴᠦ ᠪᠠᠶ᠋ᠢᠨᠠ 》ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍《 ᠡᠷᠬᠢᠮ ᠠᠬᠠ ᠶ᠋ᠢᠨ ᠰᠠᠢᠬᠠᠨ ᠰᠠᠨᠠᠭᠠ ᠶ᠋ᠢ ᠬᠡᠵᠢᠶᠡ ᠡᠭᠦᠷᠢᠳᠡ ᠮᠠᠷᠲᠠᠬᠤ ᠦᠭᠡᠢ᠂ ᠪᠢ ᠪᠠᠰᠠ ᠴᠢᠮᠠ ᠳ᠋ᠤ᠌ ᠨᠢᠭᠡᠨ ᠰᠠᠢᠨ ᠤᠴᠢᠷ ᠬᠡᠯᠡᠵᠦ ᠥᠭᠭᠦᠶᠡ ᠂ ᠲᠡᠷᠡ ᠠᠶ᠋ᠢᠯ ᠤ᠋ᠨ ᠨᠣᠭᠣᠭᠠᠨ ᠤ᠋ ᠬᠠᠰᠢᠶᠠᠨ ᠤ᠋ ᠮᠣᠳᠣᠨ ᠤ᠋ ᠢᠷᠣᠭᠠᠷ ᠲᠤ᠌ ᠨᠢᠭᠡᠨ ᠲᠠᠷᠭᠤᠨ ᠲᠠᠬᠢᠶᠠ ᠬᠦᠯᠢᠶᠡᠰᠦ ᠲᠡᠢ ᠪᠠᠶ᠋ᠢᠨᠠ ᠰᠢᠦ 》ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠠᠷᠠᠩᠭᠤᠢ ᠬᠠᠷᠠ ᠬᠡᠯᠡᠬᠦ ᠦᠭᠡ ᠦᠭᠡᠢ ᠪᠠᠶᠠᠷᠯᠠᠭᠠᠳ ᠬᠣᠶᠠᠭᠤᠯᠠ ᠬᠡᠯᠡ ᠪᠡᠨ ᠰᠢᠯᠡᠮᠡᠳᠡᠭᠰᠡᠭᠡᠷ ᠣᠴᠢᠯᠠ᠃ ᠲᠡᠭᠡᠭᠡᠳ ᠬᠠᠷᠠᠩᠭᠤᠢ ᠬᠠᠷᠠ ᠨᠢ ᠬᠠᠪᠬᠠᠨ ᠳ᠋ᠤ᠌ ᠤᠨᠠᠵᠤ᠂ ᠬᠤᠶ᠋ᠢᠬᠤᠷ ᠬᠥᠬᠡ ᠨᠢ ᠤᠷᠠᠬᠠᠨ ᠳ᠋ᠤ᠌ ᠤᠨᠠᠴᠢᠬᠠᠭᠠᠳ᠂ ᠬᠣᠶᠠᠭᠤᠯᠠ ᠨᠢᠭᠡ ᠨᠢ ᠨᠢᠭᠡ ᠪᠡᠨ《 ᠬᠤᠶ᠋ᠢᠬᠤᠷ ᠬᠥᠬᠡ ᠬᠤᠯᠠᠭᠠᠶ᠋ᠢᠴᠢ ᠴᠢ ᠪᠤᠤ ᠶᠠᠭᠠᠷᠠᠵᠤ ᠪᠠᠢ᠂ ᠠᠮᠢ ᠶ᠋ᠢ ᠴᠢᠨᠢ ᠠᠪᠴᠤ ᠠᠷᠠᠰᠤ ᠶ᠋ᠢ ᠴᠢᠨᠢ ᠥᠪᠴᠢᠨᠡ ᠪᠢ 》᠂《 ᠬᠠᠷᠠᠩᠭᠤᠢ ᠬᠠᠷᠠ ᠴᠢ ᠬᠠᠷᠭᠢᠰ ᠮᠠᠭᠤ ᠰᠠᠨᠠᠭᠠ ᠪᠠᠨ ᠦᠵᠡ ! ᠤᠷᠠᠬᠠ ᠠ᠋ᠴᠠ ᠰᠠᠯᠵᠤ ᠭᠠᠷᠪᠠᠯ ᠰᠢᠷᠪᠥᠰᠥ ᠶ᠋ᠢ ᠴᠢᠨᠢ ᠰᠤᠭᠤᠯᠤᠨᠠ ᠪᠢ 》ᠭᠡᠵᠦ ᠬᠠᠷᠢᠶᠠᠯᠳᠤᠵᠤ ᠪᠠᠶ᠋ᠢᠪᠠ᠃
ᠡᠭᠦᠨ ᠊ᠢ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠠᠬᠢ ᠵᠤᠯᠵᠠᠭᠠᠨ ᠵᠠᠷᠠᠭᠠ ᠰᠣᠨᠣᠰᠤᠭᠠᠳ᠄ 《 ᠠᠪᠤ ᠠ᠋᠂ ᠴᠢ ᠰᠣᠨᠣᠰᠤᠭᠰᠠᠨ ᠤᠤ᠂ ᠲᠡᠷᠡ ᠬᠣᠶᠠᠷ ᠦᠨᠡᠭᠡ ᠰᠠᠯᠤᠰᠢ ᠦᠭᠡᠢ ᠰᠠᠶᠢᠨ ᠨᠥᠬᠥᠷ ᠪᠠᠶ᠋ᠢᠭᠠᠳ ᠶᠠᠭᠠᠬᠢᠵᠤ ᠪᠠᠶ᠋ᠢᠬᠤ ᠨᠢ ᠲᠡᠷᠡ ᠪᠣᠢ ? 》ᠭᠡᠰᠡᠨ ᠳ᠋ᠦ᠍ ᠬᠥᠭᠰᠢᠨ ᠵᠠᠷᠠᠭᠠ᠄《 ᠲᠡᠳᠡ ᠪᠣᠯ ᠮᠠᠭᠤ ᠰᠠᠨᠠᠭᠠ ᠲᠠᠢ ᠠᠮᠢᠲᠠᠳ ᠪᠣᠯᠬᠣᠷ ᠦᠨᠡᠨᠴᠢ ᠨᠥᠬᠥᠷ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠶᠦ᠍ᠮ᠃ ᠬᠦᠦ ᠮᠢᠨᠢ ᠮᠡᠳᠡᠵᠦ ᠠᠪᠤᠭᠠᠷᠠᠢ ! 》ᠭᠡᠵᠦ ᠬᠡᠯᠡᠭᠰᠡᠨ ᠭᠡᠨᠡ᠃
ᠢᠷᠡᠯᠲᠡ ᠄
ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ < ᠬᠡᠯᠡ ᠪᠢᠴᠢᠭ > ᠶᠢᠰᠦᠳᠦᠭᠡᠷ ᠳᠡᠪᠲᠡᠷ ※
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠶ᠋ᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠪᠢᠴᠢᠭ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1981 ᠣᠨ ᠤ᠋ 5 ᠰᠠᠷᠠ ᠳ᠋ᠤ᠌ ᠬᠣᠶᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
1984 ᠣᠨ ᠤ᠋ 4 ᠰᠠᠷᠠ ᠳ᠋ᠤ᠌ ᠳᠥᠷᠪᠡᠳᠦᠭᠡᠷ ᠤᠳᠠᠭᠠ ᠶ᠋ᠢᠨ ᠬᠡᠪᠯᠡᠯ ᠡᠴᠡ ᠰᠣᠩᠭᠣᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠣᠳᠣᠨᠬᠤᠸᠠᠷ
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣᠠ ᠂ ᠲᠣ᠋ · ᠨᠠᠨᠳᠢᠨ
2023᠂ 03 ᠂ 24