ᠵᠢᠷᠮᠦᠰᠦᠨ ᠮᠠᠨᠠᠨ 〈 6 〉 - ᠲ ᠂ ᠭᠣᠮᠪᠣᠵᠠᠪ Жирэмсэн манан 〈 6 〉 - Т ᠂ Гомбожав
226ᠵᠢᠷᠮᠦᠰᠦᠨ ᠮᠠᠨᠠᠨ - 6
ᠥᠴᠥᠭᠡᠳᠦᠷ ᠦᠨ ᠪᠣᠷᠣᠭᠠᠨ
ᠥᠨᠥᠳᠥᠷ ᠦᠨ ᠬᠠᠶ᠋ᠢᠷᠠ ᠶᠢ ᠠᠷᠭᠠᠳᠠᠬᠤ ᠭᠡᠵᠤ
ᠥᠴᠥᠭᠡᠳᠦᠷ ᠦᠨ ᠪᠣᠷᠣᠭᠠᠨ ᠢᠴᠢᠮᠡᠲᠡᠬᠡᠢ ᠱᠠᠭᠢᠨᠠ
ᠨᠢᠮᠬᠡᠨ ᠳ᠋ᠡᠭᠡᠨ ᠢᠴᠢᠵᠤ ᠴᠢᠳᠠᠬᠤ
ᠡᠭᠦᠯᠡᠰ᠂ ᠥᠨᠳᠥᠷ ᠳᠡᠰᠢ ᠠᠨᠢᠪᠴᠢᠨ
ᠨᠢᠯᠪᠤᠰᠤ ᠪᠠᠨ ᠨᠢᠭᠤᠵᠤ ᠴᠢᠳᠠᠬᠤ ᠦᠭᠡᠢ
ᠡᠪᠦᠭᠡᠳ ᠦᠨ ᠴᠢᠷᠠᠢ ᠤᠶᠠᠬᠠᠨ ᠵᠦᠰᠡᠷᠡᠨᠡ
ᠠᠷᠭᠠᠳᠠᠯ ᠳᠠᠭᠠᠭᠠᠭᠠ ᠦᠭᠡᠢ ᠵᠥᠭᠡᠯᠡᠬᠡᠨ ᠮᠤᠷᠤᠶ᠋ᠢᠭᠰᠠᠨ
ᠦᠬᠡᠷ ᠦᠨ ᠡᠪᠡᠷ
ᠥᠪᠡᠷ ᠦᠨ ᠡᠰᠡᠷᠤᠡ ᠭᠢᠬᠡᠳ
ᠨᠠᠳᠠ ᠤᠷᠤᠭᠤ ᠰᠢᠪᠦᠭᠡᠷᠡᠵᠤ ᠢᠷᠡᠨᠡ
ᠬᠣᠯᠠ ᠶᠢᠨ ᠵᠡᠷᠭᠡᠯᠭᠡᠨ ᠠᠵᠢᠵᠤ
ᠬᠤᠩᠭᠤᠷ ᠢᠶ᠋ᠠᠨ ᠦᠯᠦᠰᠭᠦᠯᠡᠩ ᠥᠳᠡᠭᠰᠡᠨ ᠪᠥᠰᠡᠬᠥᠢ
ᠬᠣᠨᠣᠭ ᠪᠣᠯᠭᠠᠨ ᠮᠢᠨᠤ ᠵᠢᠷᠦᠬᠡ ᠪᠡᠷ ᠤᠬᠢᠯᠠᠨᠠ
ᠶᠠᠰᠤ ᠶᠠᠰᠤ ᠪᠠᠨ ᠠᠳᠬᠤᠵᠤ ᠤᠨᠠᠭᠰᠠᠨ ᠬᠣᠶᠠᠷ ᠡᠷᠡ ᠶᠢᠨ
ᠶᠠᠮᠠᠷ ᠴᠦ᠍ ᠭᠡᠷᠢᠶᠡᠰ ᠦᠭᠡᠢ
ᠬᠡᠭᠦᠷ ᠢ ᠮᠠᠨᠠᠬᠤ ᠦᠭᠡᠢ ᠭᠡᠵᠤ
ᠨᠠᠳᠠ ᠤᠷᠤᠭᠤ ᠳᠤᠲᠠᠭᠠᠬᠤ ᠭᠡᠤᠭᠡᠳ
ᠲᠡᠮᠡᠭᠡᠨ ᠲᠠᠪᠠᠭ ᠰᠢᠲᠠᠵᠤ ᠤᠨᠠᠬᠤ
ᠲᠡᠤᠬᠡ ᠶᠢᠨ ᠭᠠᠩ ᠲᠠᠢ ᠢᠷᠡᠨᠡ
ᠥᠴᠥᠭᠡᠳᠦᠷ ᠦᠨ ᠪᠣᠷᠣᠭᠠᠨ᠂ ᠨᠠᠮᠠᠢ᠍ᠢ
ᠦᠷᠭᠡᠨ ᠰᠠᠬᠠᠷᠠ ᠶᠢᠨ ᠡᠯᠡᠰᠦ ᠤᠷᠤᠭᠤ
ᠡᠳᠦᠷᠵᠢᠨ ᠴᠦᠯᠡᠵᠤ ᠱᠠᠭᠢᠨᠠ ᠡ
ᠲᠠᠨᠢᠯ ᠳᠠᠰᠤᠯ ᠤᠴᠢᠷ ᠤᠳ
ᠲᠠᠨᠢᠯ ᠪᠤᠰᠤ ᠤᠴᠢᠷ ᠤᠨ ᠴᠠᠭᠠᠨᠠ
ᠲᠠᠯᠠ ᠨᠢ
ᠲᠠᠨᠢᠯ ᠳᠠᠰᠤᠯ ᠵᠢᠰᠦ ᠴᠢᠷᠠᠢ ᠶᠤᠮ
ᠮᠢᠨᠤ ᠨᠢᠳᠦᠨ ᠦ
ᠲᠠᠷᠢᠬᠢ ᠪᠠᠨ ᠬᠠᠷᠠᠭᠰᠠᠨ ᠭᠡᠰᠡᠭ ᠨᠢ ᠪᠣᠯ
ᠬᠣᠯᠠ ᠶᠢ ᠠᠵᠢᠬᠤ ᠳᠤᠷᠠᠨ ᠪᠢᠯᠡ
ᠥᠨᠳᠥᠷ ᠲᠡᠰᠢ ᠦᠭᠰᠦᠭᠡᠨ ᠬᠠᠯᠢᠰᠬᠠᠭᠰᠠᠨ ᠮᠢᠨᠤ
ᠥᠷᠥᠭᠡᠰᠦᠨ ᠭᠦᠬᠡ ᠴᠢᠯᠠᠭᠤ ᠶᠢ
ᠦᠢ ᠤᠯᠠᠨ ᠮᠠᠭᠠᠳ ᠦᠭᠡᠢ ᠳᠠᠲᠠᠵᠤ ᠤᠨᠠᠭᠠᠬᠤ
ᠡᠨᠡ ᠪᠣᠯ
ᠡᠬᠡ ᠭᠠᠵᠠᠷ ᠤᠨ ᠳᠠᠲᠠᠬᠤ ᠭᠥᠴᠥᠨ ᠦ ᠳᠠᠰᠤᠯᠬᠠᠨ ᠡᠨᠳᠡᠭᠦᠷᠡᠯ ᠶᠤᠮ
ᠥᠷᠥᠭᠡᠯ ᠤᠷᠤᠭᠤ
ᠡᠪᠦᠷ ᠠᠭᠤᠲᠠᠯᠤᠨ ᠡᠶᠡᠯᠰᠡᠭ ᠨᠢᠰᠬᠡᠭᠰᠡᠨ ᠮᠢᠨᠤ ᠳᠠᠭᠲᠠᠭᠠᠳ ᠢ
ᠡᠬᠡᠭᠥᠯᠥᠯ ᠦᠭᠡᠢ ᠠᠯᠠᠵᠤ᠂ ᠱᠥᠯᠥ᠍ ᠶᠢ ᠨᠢ ᠤᠤᠭᠤᠬᠤ ᠪᠤᠶᠤ
ᠵᠠᠬᠠ ᠳᠡᠯᠭᠢᠭᠥᠷ ᠲᠦ ᠠᠪᠠᠴᠢᠵᠤ
ᠥᠨᠳᠥᠷ ᠦᠨᠡ ᠪᠡᠷ ᠠᠷᠠᠯᠵᠢᠬᠤ ᠪᠣᠯ
ᠲᠠᠷᠭᠤᠯᠠᠬᠤ ᠳᠤᠳᠤᠮ ᠢᠶ᠋ᠠᠨ ᠬᠣᠪᠳᠣᠭᠰᠢᠬᠤ ᠨᠠᠢᠵᠢ ᠶᠤᠮ
ᠡᠷᠡ ᠬᠠᠳᠠᠨ ᠪᠡᠶᠡ ᠶᠢᠨ ᠮᠢᠨᠢ ᠰᠡᠭᠦᠳᠡᠷ ᠢ
ᠡᠷᠬᠡ ᠮᠡᠳᠡᠭᠦᠯᠦᠯ ᠦᠭᠡᠢ
ᠳᠡᠭᠡᠭᠦᠷ ᠬᠠᠷᠠᠭᠰᠠᠨ ᠳ᠋ᠸᠩ ᠦᠳ ᠦᠨ ᠭᠡᠷᠡᠯ
ᠬᠠᠶᠠ ᠬᠠᠶᠠ ᠡᠪᠬᠡᠵᠤ ᠵᠢᠵᠢᠭᠷᠡᠭᠦᠯᠦᠨ
ᠬᠠᠶᠠ ᠬᠠᠶᠠ ᠲᠡᠯᠡᠵᠤ ᠤᠷᠳᠤᠰᠬᠠᠨ
ᠥᠴᠥᠬᠡᠨ ᠤᠢᠳᠬᠠᠷ ᠢᠶ᠋ᠠᠨ ᠠᠷᠭᠠᠳᠠᠬᠤ ᠳᠤ
ᠮᠢᠨᠤ ᠰᠢᠷᠪᠦᠰᠦ
ᠶᠣᠣᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠡᠪᠡᠳᠬᠦ ᠶᠤᠮ
ᠠᠯᠳᠠᠭᠠ
1
ᠴᠢᠨᠤ ᠭᠠᠷ ᠰᠤᠨᠵᠤ ᠢᠷᠡᠬᠦ ᠳ᠋ᠡᠭᠡᠨ
ᠪᠡᠭᠡᠯᠡᠢ ᠲᠠᠢ ᠪᠠᠢᠭᠰᠠᠨ ᠪᠣᠯᠬᠣᠷ
ᠪᠢ ᠳᠤᠲᠠᠭᠠᠭᠰᠠᠨ ᠶᠤᠮ
ᠪᠡᠭᠡᠯᠡᠢ ᠪᠣᠯ ᠴᠢᠨᠤ ᠠᠯᠳᠠᠭᠠ
ᠪᠡᠶᠡ ᠶᠢ ᠮᠢᠨᠢ ᠳᠤᠲᠠᠭᠠᠯᠭᠠᠵᠤ ᠴᠢᠳᠠᠭᠰᠠᠨ
ᠲᠡᠷᠡ ᠡᠭᠦᠳᠡ
ᠮᠢᠨᠤ ᠠᠯᠳᠠᠭᠠ ᠪᠠᠶ᠋ᠢᠵᠠᠢ
2
ᠦᠳᠡᠰᠢ ᠪᠣᠯᠭᠠᠨ ᠤ ᠬᠠᠪᠢᠷᠭᠠᠨ ᠰᠠᠷᠠ
ᠴᠢᠨᠤ
ᠨᠣᠶ᠋ᠢᠷ ᠠᠯᠳᠠᠬᠤ ᠵᠢᠰᠦ
ᠥᠷᠯᠥᠭᠡ ᠪᠥᠬᠥᠨ ᠦ ᠴᠡᠩᠬᠡᠷ ᠤᠳᠤᠭᠠ
ᠮᠢᠨᠤ
ᠦᠯᠦᠰᠭᠦᠯᠡᠩ ᠬᠣᠨᠣᠭᠰᠠᠨ ᠭᠤᠨᠢᠭ
ᠰᠢᠮᠡᠬᠦ ᠳᠤᠳᠤᠮ ᠢᠶ᠋ᠠᠨ ᠮᠠᠨ ᠤ ᠠᠯᠳᠠᠭᠠ
ᠰᠢᠬᠢᠷ ᠪᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠡ
3
ᠡᠴᠦᠰ ᠲᠡᠬᠡᠨ ᠲᠠᠶ᠋ᠢᠯᠵᠤ ᠴᠢᠳᠠᠭᠰᠠᠨ ᠴᠢᠨᠤ ᠪᠡᠭᠡᠯᠡᠢ
ᠡᠷᠭᠢᠵᠤ ᠬᠠᠷᠠᠬᠤ ᠳᠤ
ᠡᠷᠢᠶᠡᠨ ᠴᠡᠩᠬᠡᠷ ᠠᠯᠴᠢᠭᠤᠷ ᠪᠠᠶ᠋ᠢᠯᠠ
ᠡᠭᠦᠷᠢᠳᠡ ᠬᠠᠭᠠᠯᠳᠠᠳᠠᠢ ᠲᠡᠷᠡ ᠡᠭᠦᠳᠡ
ᠡᠪᠬᠡᠭᠡᠳ ᠢᠷᠡᠬᠦ ᠳᠦ
ᠡᠮᠵᠢᠭ ᠴᠠᠭᠠᠨ ᠪᠥᠱᠥᠭᠦᠷᠬᠡᠯ ᠪᠠᠶ᠋ᠢᠯᠠ
4
ᠭᠠᠭᠴᠠᠬᠦ᠂ ᠲᠡᠷᠡᠬᠦ ᠠᠯᠳᠠᠭᠠ ᠪᠣᠯ
ᠬᠣᠶᠠᠷ ᠠᠭᠤᠯᠠ ᠶᠢᠨ ᠵᠠᠶ᠋ᠢᠴᠢᠯᠠᠵᠤ ᠳᠣᠭᠳᠣᠯᠬᠤ
ᠪᠣᠢ ᠪᠦᠬᠦᠢ ᠠᠭᠤᠯᠭᠠ
ᠬᠠᠷᠢᠵᠤ ᠡᠰᠡ ᠴᠢᠳᠠᠬᠤ ᠣᠨᠢᠰᠤ ᠲᠠᠢ ᠡᠭᠦᠳᠡ ᠪᠢᠯᠡ
ᠪᠠᠳᠢᠷᠴᠢᠨ
ᠵᠠᠮ ᠳᠤᠩ ᠬᠣᠯᠠ
ᠭᠡᠲᠡᠯᠡ᠂ ᠡᠭᠦᠳᠡ ᠪᠥᠬᠥᠨ
ᠴᠢᠮᠠ ᠳᠤ ᠴᠣᠣᠵᠢ ᠲᠠᠢ ᠡ
ᠥᠷᠲᠡᠭᠡᠨ ᠳᠣᠲᠣᠨᠠ
ᠭᠥᠰᠡᠯ ᠦᠨ ᠬᠠᠩᠰᠢ ᠱᠠᠲᠤ ᠦᠭᠰᠦᠨ ᠥᠨᠳᠥᠷᠯᠡᠨᠡ
ᠴᠢ
ᠪᠢᠯᠸᠲ ᠠᠪᠬᠤ ᠵᠣᠭᠣᠰ ᠦᠭᠡᠢ ᠳ᠋ᠡᠭᠡᠨ ᠳᠤᠭᠤᠭᠰᠢ ᠭᠤᠯᠭᠤᠯᠠ
ᠤᠯᠠᠨ ᠦᠩᠭᠡ ᠶᠢᠨ ᠨᠢᠳᠦ
ᠴᠢᠮᠠ ᠶᠢ
ᠴᠢᠩᠭᠠ ᠬᠥᠨᠳᠡᠢ ᠤᠩᠰᠢᠨᠠ
ᠡᠨᠡ᠂ ᠤᠷᠴᠢᠯᠠᠩ ᠲᠠᠨᠢᠬᠤ ᠴᠤᠩᠬᠤ ᠨᠤᠭᠤᠳ ᠢᠶ᠋ᠠᠷ
ᠴᠢ᠂ ᠡᠴᠦᠰ ᠲᠡᠬᠡᠨ
ᠡᠷᠢᠶᠡᠨ ᠬᠤᠷᠤᠠ ᠶᠢ ᠨᠢᠴᠦᠭᠦᠨ ᠲᠠᠨᠢᠭᠠᠳ
ᠡᠷᠭᠢᠮ ᠳᠡᠭᠡᠳᠦ ᠪᠥᠱᠥᠭᠥᠷᠬᠡᠯᠡ
ᠲᠡᠭᠡᠭᠡᠳ
ᠭᠡᠨ ᠳᠦ ᠴᠦ᠍ ᠡᠷᠢᠶᠡ ᠦᠭᠡᠢ ᠶᠠᠷᠢᠬᠤ ᠰᠡᠳᠬᠢᠯ ᠦᠨ ᠥᠭᠡ ᠴᠢᠨᠢ ᠭᠡᠯᠲᠡᠷᠡᠵᠤ
ᠴᠢ᠂ ᠡᠭᠴᠡᠬᠡᠨ ᠤᠷᠭᠤᠬᠤ ᠤᠴᠢᠷ ᠲᠠᠢ
ᠨᠡᠷᠡ ᠪᠡᠷ ᠢᠶ᠋ᠠᠨ
ᠡᠭᠦᠳᠡ ᠳᠠᠷᠠᠭᠠᠯᠠᠨ ᠵᠠᠮ ᠳᠤᠭᠰᠢᠵᠤ ᠶᠠᠪᠤᠯᠠ ᠠ
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠴᠣᠯᠮᠣᠨᠲᠤᠶᠠᠭᠠ
ᠬᠢᠨᠠᠭᠴᠢ ᠄ ᠲᠤᠭᠴᠢ ᠰᠠᠷᠠᠨᠠ
2023 ᠂ 5 ᠂ 25 ᠪ ᠡᠲᠦᠷ