ᠠᠯᠠᠱᠠᠨ ᠨᠤᠲᠤᠭ ᠤ᠋ᠨ ᠡᠪᠦᠯ - ᠡᠨᠡᠷᠢᠯᠲᠦ Алшан нутгийн өвөл - Энэрэлт
271ᠠᠯᠠᠱᠠᠨ ᠨᠤᠲᠤᠭ ᠤ᠋ᠨ ᠡᠪᠦᠯ
ᠮᠥᠩᠭᠥᠨ ᠡᠪᠦᠯ
ᠡᠩ ᠦᠭᠡᠢ ᠥᠷᠭᠡᠨ ᠠᠯᠠᠱᠠᠨ ᠳ᠋ᠤ᠌ ᠄
ᠬᠥᠷ ᠴᠠᠰᠤ ᠲᠠᠢ ᠮᠥᠩᠭᠥᠨ ᠡᠪᠦᠯ ᠢᠷᠡᠵᠡᠢ ᠃
ᠬᠦᠢᠲᠡᠨ ᠰᠠᠯᠬᠢ ᠲᠠᠢ ᠲᠡᠰᠬᠢᠮᠡ ᠡᠪᠦᠯ ᠢᠷᠡᠵᠡᠢ ᠃ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠴᠠᠰᠤ ᠨᠥᠮᠥᠷᠦᠭᠡᠳ ᠴᠠᠪ ᠴᠠᠭᠠᠨ ᠃ ᠤᠷᠭᠤᠭᠠ ᠨᠠᠷᠠᠰᠤ ᠰᠠᠯᠬᠢ ᠰᠥᠷᠦᠭᠡᠳ ᠨᠣᠪ ᠨᠣᠭᠣᠭᠠᠨ ᠃
ᠨᠠᠷᠠᠨ ᠮᠠᠨᠳᠤᠬᠤ ᠦᠶᠡ ᠪᠡᠷ ᠨᠠᠢ᠍ᠮᠠᠨ ᠵᠣᠪᠬᠢᠰ ᠢ᠋ ᠠᠵᠢᠭᠯᠠᠪᠠᠯ ᠄
ᠡᠪᠦᠯᠵᠢᠶᠡᠨ ᠳ᠋ᠡᠭᠡᠨ ᠣᠷᠣᠭᠰᠠᠨ ᠠᠢᠯ ᠤ᠋ᠳ ᠤ᠋ᠨ ᠦᠵᠡᠮᠵᠢ ᠪᠠᠢᠳᠠᠯ ᠲᠣᠳᠣᠷᠠᠨᠠ ᠃
ᠰᠢᠯᠢ ᠶ᠋ᠢᠨ ᠳᠡᠭᠡᠭᠦᠷ ᠰᠢᠷᠡᠭᠡ ᠪᠦᠬᠦ ᠲᠡᠢ ᠲᠡᠮᠡᠭᠡᠳ ᠢᠳᠡᠰᠢᠯᠡᠨᠡ ᠃ ᠠᠩᠬᠠ ᠠᠵᠢᠭᠯᠠᠬᠤ ᠳ᠋ᠤ᠌ ᠰᠢᠷᠭᠠᠯ ᠠᠭᠤᠯᠠᠰ ᠣᠪᠣᠯᠵᠠᠨ ᠬᠥᠳᠡᠯᠬᠦ ᠴᠦ᠍ ᠶᠦ᠍ᠮ ᠰᠢᠭ ᠃ ᠬᠥᠨᠳᠡᠢ ᠶ᠋ᠢᠨ ᠳᠣᠲᠣᠷᠠ ᠬᠣᠨᠢᠨ ᠰᠦᠷᠦᠭ ᠪᠡᠯᠴᠢᠨᠡ ᠃ ᠬᠥᠪᠥᠩ ᠡᠭᠦᠯᠡᠰ ᠬᠡᠰᠡᠭᠯᠡᠨ ᠨᠡᠭᠦᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠬᠠᠷᠠᠭᠳᠠᠨᠠ ᠃
ᠰᠢᠨᠡ ᠪᠦᠷᠢᠶᠡᠰᠦ ᠲᠡᠢ ᠴᠠᠭᠠᠨ ᠭᠡᠷ ᠂ ᠰᠢᠨᠡᠳᠬᠡᠨ ᠵᠠᠰᠠᠭᠰᠠᠨ ᠬᠠᠰᠢᠶᠠ ᠰᠠᠷᠠᠪᠴᠢ ᠂ ᠤᠭ᠍ᠶᠦᠨ ᠨᠣᠭᠣᠭᠠᠨ ᠡᠪᠡᠰᠦᠨ ᠣᠪᠣᠭᠠ ᠂ ᠰᠠᠯᠬᠢᠨ ᠲᠡᠭᠡᠷᠮᠡ ᠲᠡᠢ ᠴᠢᠷᠭᠠ ᠬᠤᠳᠳᠤᠭ ᠁
ᠳᠤᠯᠠᠭᠠᠨ ᠡᠪᠦᠯᠵᠢᠶᠡᠨ ᠳ᠋ᠡᠭᠡᠨ ᠬᠥᠭᠰᠢᠳ ᠨᠠᠰᠤᠲᠠᠨ ᠨᠢ ᠵᠢᠷᠭᠠᠵᠤ ᠪᠠᠢᠬᠤ ᠳ᠋ᠤ᠌ ᠂ ᠬᠡᠦᠬᠡᠳ ᠪᠠᠭᠠᠴᠤᠳ ᠨᠢ ᠰᠤᠷᠭᠠᠭᠤᠯᠢ ᠪᠠᠨ ᠴᠢᠭᠯᠡᠭᠡᠳ ᠭᠦᠶᠦᠯᠳᠦᠨᠡ ᠃ ᠬᠥᠭᠵᠢᠶᠡᠨᠲᠦ ᠵᠠᠯᠠᠭᠤᠰ ᠨᠢ ᠮᠠᠯ ᠵᠠᠨ ᠲᠠᠭᠤᠭᠠᠳ ᠳᠠᠭᠤᠯᠠᠯᠳᠤᠵᠤ ᠂ ᠡᠪᠦᠯᠵᠢᠶᠡᠨ ᠦ᠌ ᠬᠢᠨ ᠦ᠌ ᠨᠢᠭᠡ ᠡᠳᠦᠷ ᠦ᠋ᠨ ᠪᠠᠶᠠᠰᠬᠤᠯᠠᠩᠲᠤ ᠬᠥᠳᠡᠯᠮᠦᠷᠢ ᠡᠬᠢᠯᠡᠨᠡ ᠃
ᠠᠳᠠ ᠭᠠᠩᠳᠠᠭᠰᠠᠨ ᠪᠣᠯᠪᠠᠴᠤ ᠭᠠᠮᠰᠢᠭ ᠤ᠋ᠨ ᠮᠥᠷ ᠰᠡᠭᠦᠳᠡᠷ ᠬᠠᠷᠠᠭᠳᠠᠬᠤ ᠦᠭᠡᠢ ᠃ ᠭᠠᠭᠴᠠᠬᠦ ᠪᠠᠭᠠᠲᠤᠷ ᠬᠥᠳᠡᠯᠮᠦᠷᠢ ᠶ᠋ᠢᠨ ᠠᠮᠵᠢᠯᠲᠠ ᠢᠯᠠᠯᠲᠠ ᠪᠠᠷ ᠳᠦᠭᠦᠷᠦᠭᠡᠳ ᠂ ᠪᠠᠶᠠᠷ ᠤ᠋ᠨ ᠳᠠᠪᠠᠯᠭᠠᠨ ᠴᠡᠩᠭᠡᠯ ᠦ᠋ᠨ ᠳᠣᠯᠭᠢᠶᠠᠨ ᠰᠣᠯᠢᠪᠴᠢᠨᠠ ᠃
ᠠᠰᠢᠳᠠ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠ ᠠᠮᠢᠯᠠᠯ ᠤ᠋ᠨ ᠢᠯᠴᠢ ᠶ᠋ᠢ ᠪᠠᠳᠠᠷᠠᠭᠤᠯᠵᠤ ᠪᠠᠢᠬᠤ ᠪᠣᠯᠬᠣᠷ ᠡᠩ ᠦᠭᠡᠢ ᠥᠷᠭᠡᠨ ᠠᠯᠠᠱᠠᠨ ᠳ᠋ᠤ᠌ ᠡᠪᠦᠯ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠂ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠬᠠᠪᠤᠷ ᠤ᠋ᠨ ᠤᠯᠠᠷᠢᠯ ᠮᠡᠲᠦ ᠰᠠᠢᠬᠠᠨ ᠰᠠᠨᠠᠭᠳᠠᠨᠠ ᠃