ᠨᠠᠷᠠ ᠰᠠᠷᠠ ᠬᠣᠶᠠᠷ - ᠮ ᠂ ᠠᠰᠠᠷ Нар сар хоёр - М ᠂ Асар ᠰᠢᠯᠦᠭ ᠢᠷᠠᠭᠤ ᠨᠠᠢᠷᠠᠭ

  1. ᠲᠡᠷᠢᠭᠦᠨ ᠨᠢᠭᠤᠷ >
  2. ᠨᠡᠪᠲᠡᠷᠡᠭᠦᠯᠭᠡ >
  3. ᠨᠠᠷᠠ ᠰᠠᠷᠠ ᠬᠣᠶᠠᠷ - ᠮ ᠂ ᠠᠰᠠᠷ Нар сар хоёр - М ᠂ Асар

ᠨᠠᠷᠠ ᠰᠠᠷᠠ ᠬᠣᠶᠠᠷ - ᠮ ᠂ ᠠᠰᠠᠷ Нар сар хоёр - М ᠂ Асар

ᠠᠩᠭᠢᠯᠠᠯ：ᠰᠢᠯᠦᠭ ᠢᠷᠠᠭᠤ ᠨᠠᠢᠷᠠᠭ
2023-05-26

265

ᠨᠠᠷᠠ ᠰᠠᠷᠠ ᠬᠣᠶᠠᠷ

             
                   –– ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠬᠡᠯᠡ ᠪᠢᠴᠢᠭ ᠦ᠋ᠨ ᠲᠣᠰᠠᠬᠠᠢ ᠮᠡᠷᠭᠡᠵᠢᠯ ᠦ᠋ᠨ 
                         ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠤᠭᠳᠠᠭᠰᠠᠨ ᠭᠤᠴᠢᠨ ᠵᠢᠯ ᠦ᠋ᠨ ᠣᠢ ᠪᠠᠷ 
     
            1 
      ᠡᠩ ᠳᠡᠯᠡᠬᠡᠢ ᠳ᠋ᠦ᠍ ᠄ 
      ᠬᠥᠬᠥᠭᠦᠯᠵᠦ ᠥᠰᠬᠡᠭᠰᠡᠨ ᠡᠬᠡ ᠶ᠋ᠢᠨ ᠠᠴᠢ ᠳᠠᠯᠠᠢ  
      ᠬᠥᠮᠦᠵᠢᠭᠦᠯᠵᠦ ᠰᠤᠷᠭᠠᠭᠰᠠᠨ ᠪᠠᠭᠰᠢ ᠶ᠋ᠢᠨ ᠠᠯᠳᠠᠷ ᠰᠦᠮᠪᠦᠷ 
      ᠨᠠᠳᠠᠳᠤ ᠂ ᠴᠢᠮᠠᠲᠤ ᠨᠢᠭᠡ ᠯᠡ ᠠᠳᠠᠯᠢ ᠃ 
            2
      ᠦᠷ᠎ᠡ ᠭᠡᠵᠦ ᠵᠢᠷᠦᠬᠡ᠃ 
      ᠦᠷ᠎ᠡ ᠳ᠋ᠡᠭᠡᠨ ᠭᠡᠪᠡᠯ ᠡᠬᠡ ᠶ᠋ᠢᠨ ᠴᠠᠭᠠᠨ ᠰᠦ ᠬᠠᠷᠠᠮ ᠦᠭᠡᠢ ᠢᠪᠢᠯᠳᠡᠭ ᠃  
      ᠰᠦ ᠨᠢ ᠰᠢᠷᠭᠢᠪᠡᠴᠦ ᠰᠡᠳᠬᠢᠯ ᠨᠢ ᠰᠢᠷᠭᠢᠬᠦ ᠦᠭᠡᠢ ᠂ ᠬᠠᠢᠷ᠎ᠠ ᠶ᠋ᠢᠨ ᠪᠤᠯᠠᠭ ᠨᠢ ᠡᠭᠦᠷᠢᠳᠡ ᠦᠷ᠎ᠡ ᠳ᠋ᠡᠭᠡᠨ ᠣᠨᠳᠣᠷᠣᠨ᠎ᠠ ᠃ 
            3
      ᠱᠠᠪᠢ ᠭᠡᠵᠦ ᠦᠷ᠎ᠡ᠃ 
      ᠱᠠᠪᠢ ᠳ᠋ᠠᠭᠠᠨ ᠭᠡᠪᠡᠯ ᠪᠠᠭᠰᠢ ᠬᠥᠮᠦᠨ ᠡᠷᠳᠡᠮ ᠴᠢᠳᠠᠪᠤᠷᠢ ᠪᠠᠨ ᠬᠠᠷᠠᠮ ᠦᠭᠡᠢ ᠠᠭᠤᠳᠠᠯᠳᠠᠭ ᠃ 
      ᠡᠷᠳᠡᠮ ᠨᠢ ᠵᠢᠷᠭᠠᠪᠠᠴᠤ ᠦᠨᠳᠦᠰᠦ ᠨᠢ  ᠲᠠᠰᠤᠷᠠᠬᠤ ᠦᠭᠡᠢ ᠂ ᠡᠷᠳᠡᠨᠢ ᠶ᠋ᠢᠨ ᠵᠢᠯᠣᠭᠣ ᠨᠢ ᠬᠡᠵᠢᠶᠡᠳᠡ ᠱᠠᠪᠢ ᠪᠠᠨ ᠬᠥᠳᠡᠯᠦᠨ᠎ᠡ ᠃ 
            4
      ᠪᠢᠷ᠎ᠠ ᠰᠠᠢᠲᠠᠢ  ᠡᠵᠢ ᠶ᠋ᠢᠨ ᠦᠷ᠎ᠡ ᠂ ᠨᠠᠢᠷ ᠤ᠋ᠨ ᠲᠠᠯᠠᠪᠠᠢ ᠳ᠋ᠤ᠌ ᠣᠷᠣᠢᠯᠠᠵᠤ ᠂ ᠡᠬᠡ ᠶ᠋ᠢᠨ ᠠᠴᠢ ᠶ᠋ᠢ ᠭᠠᠢᠬᠠᠭᠤᠯᠤᠨ᠎ᠠ ᠃ 
      ᠪᠢᠯᠢᠭ ᠰᠠᠢᠲᠠᠢ ᠪᠠᠭᠰᠢ ᠶ᠋ᠢᠨ ᠱᠠᠪᠢ ᠂ ᠲᠥᠷᠥ ᠶ᠋ᠢᠨ ᠰᠢᠯᠭᠠᠯᠲᠠ ᠳ᠋ᠤ᠌ ᠲᠥᠷᠥᠭᠦᠯᠵᠦ ᠂ ᠪᠠᠭᠰᠢ ᠶ᠋ᠢᠨ ᠠᠯᠳᠠᠷ ᠢ᠋ ᠮᠠᠨᠳᠤᠭᠤᠯᠤᠨ᠎ᠠ ᠃ 
            5
      ᠡᠬᠡ ᠬᠥᠮᠦᠨ ᠂ ᠦᠷ᠎ᠡ ᠳ᠋ᠡᠭᠡᠨ ᠠᠴᠢ ᠶ᠋ᠢᠨ ᠳᠠᠯᠠᠢ ᠶ᠋ᠢ ᠨᠡᠯᠦᠢᠯᠭᠡᠭᠰᠡᠨ ᠴᠦ᠍ ᠂ 
      ᠪᠠᠭᠰᠢ ᠬᠥᠮᠦᠨ ᠂ ᠱᠠᠪᠢ ᠳ᠋ᠠᠭᠠᠨ ᠡᠷᠳᠡᠮ ᠦ᠋ᠨ ᠰᠦᠮᠪᠦᠷ ᠢ᠋ ᠰᠡᠬᠦᠢᠯᠭᠡᠭᠰᠡᠨ ᠴᠦ᠍ ᠂ 
      ᠦᠷ᠎ᠡ ᠡᠴᠡ ᠪᠡᠨ ᠂ ᠱᠠᠪᠢ ᠠ᠋ᠴᠠ ᠪᠠᠨ ᠡᠵᠢ ᠪᠠᠭᠰᠢ ᠬᠣᠶᠠᠷ ᠮᠢᠨᠢ ᠶᠠᠭᠤ ᠴᠤ᠌ ᠬᠦᠰᠡᠳᠡᠭ ᠦᠭᠡᠢ ᠃ 
      ᠶᠠᠭᠠᠬᠢᠭᠰᠠᠨ ᠥᠨᠢᠷ ᠬᠠᠢᠷ᠎ᠠ ᠪᠣᠢ ?
      ᠶᠠᠭᠤᠲᠠᠢ ᠥᠭᠭᠢᠶᠡᠮᠦᠷ ᠰᠡᠳᠬᠢᠯ  ᠪᠣᠢ ?
            6
      ᠡᠵᠢ ᠮᠢᠨᠢ ! ᠭᠡᠵᠦ ᠦᠷ᠎ᠡ ᠪᠣᠯᠣᠭᠰᠠᠳ ᠤ᠋ᠨ ᠵᠢᠷᠦᠬᠡ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠠᠯᠤᠰ ᠠ᠋ᠴᠠ ᠡᠬᠡ ᠳ᠋ᠡᠭᠡᠨ ᠯᠡ ᠲᠡᠮᠡᠦᠯᠦᠨ᠎ᠡ ᠃ 
      ᠪᠠᠭᠰᠢ ᠮᠢᠨᠢ ! ᠭᠡᠵᠦ ᠱᠠᠪᠢ ᠪᠣᠯᠣᠭᠰᠠᠳ ᠤ᠋ᠨ ᠲᠡᠷᠢᠭᠦᠨ ᠲᠦᠮᠡᠨ ᠬᠥᠮᠦᠨ ᠦ᠌ ᠳᠣᠲᠣᠷ᠎ᠠ ᠠ᠋ᠴᠠ ᠪᠠᠭᠰᠢ ᠳ᠋ᠠᠭᠠᠨ ᠯᠠ ᠪᠥᠬᠥᠢᠨ᠎ᠡ ᠃ 
            7
      ᠡᠬᠡ ᠪᠡᠨ ᠭᠡᠪᠡᠯ ᠦᠷ᠎ᠡ ᠪᠣᠯᠣᠭᠰᠠᠳ ᠤ᠋ᠨ ᠰᠡᠳᠬᠢᠯ ᠴᠦ᠍ ᠬᠣᠶᠠᠷ ᠦᠭᠡᠢ ᠃ 
      ᠪᠠᠭᠰᠢ ᠪᠠᠨ ᠭᠡᠪᠡᠯ ᠱᠠᠪᠢ ᠪᠣᠯᠣᠭᠰᠠᠳ ᠤ᠋ᠨ ᠰᠠᠨᠠᠭ᠎ᠠ ᠴᠤ᠌ ᠠᠯᠠᠭ ᠦᠭᠡᠢ ᠃ 
      ᠦᠷ᠎ᠡ ᠴᠢᠨᠢ ᠂ ᠱᠠᠪᠢ ᠴᠢᠨᠢ ᠂ ᠡᠵᠢ ᠪᠠᠭᠰᠢ ᠬᠣᠶᠠᠷ ᠲᠠᠭᠠᠨ ᠶᠠᠭᠠᠬᠢᠵᠤ ᠬᠠᠷᠢᠭᠤᠯᠳᠠᠭ ᠪᠢᠯᠡ ? ᠶᠠᠭᠤ ᠪᠠᠷᠢᠳᠠᠭ ᠪᠢᠯᠡ ?
            8
      ᠠᠴᠢ ᠲᠡᠭᠦᠰ ᠡᠵᠢ ᠮᠢᠨᠢ ᠠ᠋ !
      ᠨᠠᠷᠠ ᠶ᠋ᠢ ᠦᠷ᠎ᠡ ᠴᠢᠨᠢ ᠲᠠᠨ ᠳ᠋ᠠᠭᠠᠨ ᠡᠷᠭᠦᠶ᠎ᠡ ᠃ ᠡᠵᠢ ᠮᠢᠨᠢ ᠡᠷᠡᠭᠡᠯᠵᠡᠯ ᠦᠭᠡᠢ ᠪᠡᠷ ᠲᠣᠭᠲᠠᠭᠠᠭᠠᠳ ᠠᠪᠬᠤ ᠪᠣᠯᠪᠠᠤ ᠃ 
            9 
      ᠠᠯᠳᠠᠷ ᠬᠦᠨᠳᠦᠲᠦ ᠪᠠᠭᠰᠢ ᠮᠢᠨᠢ ᠠ᠋ ᠃
      ᠰᠠᠷᠠ ᠶ᠋ᠢ ᠱᠠᠪᠢ ᠴᠢᠨᠢ ᠲᠠᠨ ᠳ᠋ᠠᠭᠠᠨ ᠪᠠᠷᠢᠶ᠎ᠠ᠃ 
      ᠪᠠᠭᠰᠢ ᠮᠢᠨᠢ ᠲᠠᠲᠠᠭᠠᠯᠵᠠᠯ ᠦᠭᠡᠢ ᠪᠡᠷ ᠲᠣᠰᠤᠭᠠᠳ ᠠᠪᠬᠤ ᠪᠣᠯᠪᠠᠤ ᠃  
           10 
      ᠣᠭᠲᠠᠷᠭᠤᠢ ᠳ᠋ᠤ᠌ ᠡᠦᠲᠦᠨ ᠮᠡᠴᠢᠳ  ᠬᠡᠴᠢᠨᠡᠨ ᠴᠦ᠍ ᠪᠠᠢᠭ ᠂ ᠭᠡᠷᠡᠯ ᠰᠠᠢᠲᠠᠢ ᠨᠢ ᠨᠠᠷᠠ ᠰᠠᠷᠠ ᠬᠣᠶᠠᠷ ᠠ᠋ ᠃
      ᠣᠷᠴᠢᠯᠠᠩ ᠳ᠋ᠤ᠌ ᠠᠯᠳᠠᠷ ᠬᠦᠨᠳᠦᠲᠡᠨ ᠬᠡᠳᠦᠢ ᠴᠦ᠍  ᠪᠠᠢᠭ ᠂ ᠠᠴᠢ ᠶᠡᠬᠡᠲᠡᠢ ᠨᠢ ᠡᠵᠢ ᠪᠠᠭᠰᠢ ᠬᠣᠶᠠᠷ ᠠ᠋ ᠃ 
      ᠦᠷ᠎ᠡ ᠴᠢᠨᠢ ᠂ ᠱᠠᠪᠢ ᠴᠢᠨᠢ ᠂ ᠨᠠᠷᠠ ᠶ᠋ᠢ ᠡᠷᠭᠦᠵᠦ ᠪᠠᠢᠨ᠎ᠠ  ᠂ ᠰᠠᠷᠠ ᠶ᠋ᠢ ᠪᠠᠷᠢᠵᠤ ᠪᠠᠢᠨ᠎ᠠ ᠃ 
      ᠡᠵᠢ ᠮᠢᠨᠢ ᠂ ᠪᠠᠭᠰᠢ ᠮᠢᠨᠢ ᠨᠠᠷᠠᠨ ᠰᠠᠷᠠᠨ ᠠᠯᠳᠠᠷ ᠢ᠋ᠶ᠋ᠠᠨ ᠲᠣᠭᠲᠠᠭᠠᠨ ᠠᠪᠬᠤ ᠪᠣᠯᠲᠤᠭᠠᠢ !  
           11 
      ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠳ᠋ᠦ᠍ ᠄ 
      ᠡᠨᠡ ᠪᠡᠶ᠎ᠡ ᠶ᠋ᠢ ᠲᠥᠷᠥᠭᠦᠯᠦᠭᠰᠡᠨ ᠡᠬᠡ ᠶ᠋ᠢᠨ ᠠᠴᠢ ᠴᠤ᠌ ᠨᠠᠷᠠ᠃
      ᠡᠷᠳᠡᠮ ᠨᠣᠮ ᠳ᠋ᠤ᠌ ᠰᠤᠷᠭᠠᠭᠰᠠᠨ ᠪᠠᠭᠰᠢ ᠶ᠋ᠢᠨ ᠠᠯᠳᠠᠷ ᠴᠤ᠌ ᠰᠠᠷᠠ ᠃ 
      ᠡᠬᠡ ᠶ᠋ᠢᠨ ᠠᠴᠢ ᠂ ᠪᠠᠭᠰᠢ ᠶ᠋ᠢᠨ ᠠᠯᠳᠠᠷ ᠂ ᠦᠷ᠎ᠡ ᠳ᠋ᠡᠭᠡᠨ ᠨᠠᠷᠠ ᠠ᠋  ! ᠱᠠᠪᠢ ᠳ᠋ᠠᠭᠠᠨ ᠰᠠᠷᠠ ᠠ᠋ ᠃  
           12 
      ᠦᠷ᠎ᠡ ᠪᠣᠯᠣᠭᠰᠠᠳ ᠠ᠋ ! 
      ᠱᠠᠪᠢ ᠪᠣᠯᠣᠭᠰᠠᠳ ᠠ᠋ ! 
      ᠬᠥᠭᠰᠢᠨ ᠪᠤᠭᠤᠷᠤᠯ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠴᠢ ᠶ᠋ᠢ ᠡᠭᠦᠷᠢᠳᠡ ᠬᠠᠷᠢᠭᠤᠯᠤᠶ᠎ᠠ ! 
      ᠬᠦᠨᠳᠦᠲᠦ ᠣᠯᠠᠨ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠯᠳᠠᠷ ᠢ᠋ ᠥᠨᠢᠳᠡ ᠳᠤᠷᠠᠰᠤᠶ᠎ᠠ !
                                        1983 . 7 . 6 ᠬᠥᠬᠡᠬᠣᠲᠠ