ᠠᠮᠢᠲᠠᠳ ᠤᠨ ᠤᠴᠢᠷ (ᠮᠦᠴᠡᠯᠭᠡ ᠰᠢᠯᠦᠭ ) - ᠮ ᠂ ᠠᠰᠠᠷ Амьтдын учир (мөчлөг шүлэг ) - М ᠂ Асар
225ᠠᠮᠢᠲᠠᠳ ᠤᠨ ᠤᠴᠢᠷ (ᠮᠦᠴᠡᠯᠭᠡ ᠰᠢᠯᠦᠭ )
ᠰᠠᠮᠵᠠ
– ᠲᠠ ᠲᠡᠭᠡᠵᠦ ᠦᠵᠡᠳᠡᠭ ᠪᠢ ᠢᠩᠭᠢᠵᠦ ᠪᠣᠳᠣᠳᠠᠭ
1
ᠬᠥᠭᠡᠷᠦᠬᠦᠢ ᠰᠠᠮᠵᠠ ᠂ ᠦᠢᠯᠡ ᠲᠡᠢ ᠴᠦ᠍ ᠠᠮᠢᠲᠠᠨ ᠃
ᠡᠷᠲᠡ ᠴᠠᠭ ᠲᠤ᠌ ᠨᠢᠭᠡ ᠯᠡ ᠪᠡᠴᠢᠨ ᠲᠣᠯᠣᠭᠠᠢ ᠳ᠋ᠠᠭᠠᠨ ᠴᠠᠭᠠᠷᠢᠭ ᠬᠢᠯᠭᠡᠭᠰᠡᠨ ᠡᠴᠡ ᠂ ᠡᠳᠦᠭᠡ ᠪᠣᠯᠬᠤ ᠳ᠋ᠤ᠌ ᠬᠡᠴᠢᠨᠡᠨ ᠰᠠᠮᠵᠠᠨ ᠤ᠋ ᠬᠦᠵᠦᠭᠦᠨ ᠳ᠋ᠦ᠍ ᠭᠢᠨᠵᠢ ᠣᠷᠣᠪᠠ᠃
ᠬᠥᠭᠡᠷᠦᠬᠦᠢ ᠰᠠᠮᠵᠠ ᠬᠦᠢᠲᠡᠨ ᠲᠡᠮᠦᠷ ᠭᠢᠨᠵᠢ ᠶ᠋ᠢ ᠭᠠᠷ ᠤ᠋ᠨ ᠣᠷᠣ – ᠬᠠ ᠪᠠᠷ ᠢᠶᠠᠨ ᠬᠠᠶᠠ ᠬᠠᠶᠠ ᠮᠠᠭᠠᠵᠢᠵᠤ ᠮᠠᠯᠲᠠᠨᠠ ᠃
ᠲᠡᠭᠡᠶᠡ ᠯᠡ ᠂ ᠲᠡᠯᠴᠢᠯᠡᠬᠦ ᠲᠡᠳᠦᠢ ᠲᠠᠯᠠᠭᠠᠷ ᠬᠡᠷᠡᠭ ᠃ ᠲᠡᠭᠦᠨ ᠢ᠋ ᠲᠡᠷᠡ ᠲᠠᠰᠤᠳᠠᠵᠤ ᠳᠡᠢᠯᠬᠦ ᠡᠴᠡ ᠬᠣᠯᠠᠳᠠᠭᠠᠳ ᠂ ᠲᠠᠶᠠᠭᠳᠠᠵᠤ ᠴᠢᠳᠠᠬᠤ ᠠ᠋ᠴᠠ ᠠᠩᠭᠢᠵᠢᠷᠠᠵᠠᠢ ᠃
ᠬᠥᠮᠦᠨ ᠪᠢᠰᠢ ᠰᠠᠮᠵᠠ ᠶᠤᠮ ᠪᠣᠯᠬᠣᠷ ᠂ ᠬᠥᠭᠡᠷᠦᠬᠦᠢ ᠲᠡᠭᠦᠨ ᠦ᠌ ᠰᠠᠨᠠᠨ ᠰᠠᠨᠠᠨ ᠲᠡᠭᠡᠬᠦ ᠨᠢ ᠵᠥᠪ ᠴᠦ᠍ ᠶᠦ᠍ᠮ ᠪᠣᠯᠪᠠᠤ?
2
ᠬᠡᠯᠲᠡᠷᠬᠡᠢ ᠬᠠᠷᠠᠩᠭᠠ ᠶ᠋ᠢᠨ ᠳᠠᠭᠤᠨ ᠂ ᠰᠡᠮᠡᠷᠬᠡᠢ ᠲᠠᠰᠢᠭᠤᠷ ᠤ᠋ᠨ ᠳᠣᠬᠢᠯᠲᠠ ᠪᠠᠷ ᠂ ᠦᠢᠯᠡ ᠲᠡᠢ ᠰᠠᠮᠵᠠ ᠦᠬᠡᠷ ᠴᠠᠮ ᠤ᠋ᠨ ᠪᠠᠭᠠᠰᠢ ᠪᠠᠨ ᠭᠠᠷᠭᠠᠵᠤ ᠡᠬᠢᠯᠡᠯᠡ ᠃
ᠡᠰᠢ ᠳᠠᠰᠢ ᠦᠰᠦᠷᠴᠦ ᠂ ᠳᠡᠭᠡᠭᠰᠢ ᠳᠣᠭᠣᠭᠰᠢ ᠲᠣᠩᠭᠣᠴᠠᠨ ᠬᠥᠯᠥᠰᠥ ᠤᠰᠤ ᠪᠠᠨ ᠰᠢᠪᠬᠠᠵᠤ ᠂ ᠬᠥᠯ ᠨᠢᠷᠤᠭᠤ ᠪᠠᠨ ᠬᠥᠰᠢᠭᠡᠭᠰᠡᠨ ᠦ᠌ ᠬᠠᠷᠢᠭᠤ ᠂ ᠰᠠᠮᠵᠠᠨ ᠤ᠋ ᠠᠯᠠᠭᠠᠨ ᠳ᠋ᠤ᠌ ᠬᠣᠷᠣᠬᠠᠢ ᠲᠠᠢ ᠬᠡᠳᠦᠬᠡᠨ ᠴᠢᠪᠠᠭᠠ᠂ ᠡᠵᠡᠨ ᠦ᠌ ᠡᠪᠦᠷ ᠲᠦ᠍ ᠡᠪᠬᠡᠭᠡᠲᠡᠢ ᠪᠠᠬᠠᠨ ᠵᠣᠭᠣᠰ᠃
ᠭᠡᠶᠡ ᠯᠡ ᠂ ᠰᠠᠮᠵᠠ ᠪᠠᠰᠠ ᠣᠯᠬᠤ ᠪᠠᠨ ᠣᠯᠵᠤ ᠭᠡᠮᠡᠨ ᠴᠢᠪᠠᠭᠠ ᠶ᠋ᠢ ᠠᠮᠠᠨ ᠳ᠋ᠠᠭᠠᠨ ᠬᠢᠴᠢᠭᠡᠳ ᠴᠢᠨᠠᠳᠤᠬᠢ ᠵᠣᠭᠣᠰ ᠢ᠋ ᠣᠢᠰᠢᠶᠠᠮᠠᠷ᠃
ᠴᠠᠭᠠᠰᠤᠨ ᠳ᠋ᠤ᠌ ᠣᠷᠣᠬᠤ ᠪᠠᠷ ᠴᠢᠪᠠᠭᠠ ᠨᠢ ᠳᠡᠭᠡᠷᠡ ᠭᠡᠵᠦ ᠰᠠᠮᠵᠠ ᠥᠪᠡᠷ ᠢ᠋ᠶ᠋ᠡᠨ ᠰᠣᠩᠭᠣᠪᠠ ᠭᠡᠵᠢ ᠦᠦ ?
3
ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤᠨᠢ ᠡᠪᠬᠡᠷᠡᠵᠦ ᠵᠣᠭᠰᠣᠭᠰᠠᠨ ᠣᠯᠠᠨ ᠤ᠋ ᠳᠣᠲᠣᠷᠠ ᠡᠨᠡ ᠲᠡᠷᠡ ᠶᠠᠷᠢᠶᠠ ᠡᠭᠦᠰᠪᠡ
– ᠡᠨᠡ ᠰᠠᠮᠵᠠ ᠠ᠋ ! ᠦᠢᠯᠡ ᠲᠡᠢ ᠲᠥᠷᠥᠵᠡᠢ
– ᠡᠨᠡ ᠲᠡᠨᠡᠭ ᠠ᠋ ! ᠬᠥᠭᠡᠷᠦᠬᠦᠢ ᠴᠦ᠍ ᠠᠮᠢᠲᠠᠨ ᠦᠭᠡᠯᠡᠵᠦ ᠶᠠᠷᠢᠬᠤ ᠶ᠋ᠢ ᠨᠢ ᠰᠣᠨᠣᠰᠪᠠᠯ ᠂ ᠥᠷᠢ ᠡᠪᠡᠳᠴᠦ ᠪᠠᠢᠬᠤ ᠰᠢᠭ᠋ ᠂ ᠦᠵᠡᠬᠦ ᠨᠢᠳᠦᠨ ᠬᠠᠷᠠᠴᠠ ᠶ᠋ᠢ ᠨᠢ ᠠᠵᠢᠪᠠᠯ ᠂ ᠬᠣᠯᠠ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠬᠦᠢᠲᠡ ᠣᠷᠬᠢᠭᠰᠠᠭᠠᠷ ᠡᠨᠡ ᠨᠢ ᠴᠦ᠍
ᠬᠣᠬᠢ ᠨᠢ ᠲᠡᠷᠡ !ᠲᠡᠷᠡ ᠭᠡᠬᠦ ᠰᠢᠭ ᠰᠠᠮᠵᠠ ᠤᠷᠤᠭᠤ ᠭᠢᠯᠠᠯᠵᠠᠨᠠ᠃ ᠲᠡᠷᠡ ᠨᠢ ᠴᠦ᠍
ᠵᠠᠶᠠᠭᠠ ᠨᠢ ᠲᠡᠨᠳᠡ! ᠭᠡᠬᠦ ᠮᠡᠲᠦ ᠰᠠᠮᠵᠠ ᠤᠷᠤᠭᠤ ᠰᠢᠯᠪᠢᠯᠵᠢᠨᠡ᠃
ᠳᠡᠯᠢᠭᠦᠨ ᠴᠢᠷᠠᠢ ᠂ ᠳᠡᠭᠡᠷᠡᠩᠭᠦᠢ ᠬᠠᠷᠠᠴᠠ ᠪᠦᠬᠦᠨ ᠪᠦᠷ ᠯᠡ ᠰᠠᠮᠵᠠ ᠤᠷᠤᠭᠤ ᠃
ᠬᠦᠵᠦᠭᠦᠦ ᠪᠡᠨ ᠣᠭᠣᠰᠣᠷᠯᠠᠭᠤᠯᠤᠭᠰᠠᠨ ᠰᠠᠮᠵᠠᠨ ᠤ᠋ ᠵᠣᠪᠠᠯᠠᠩ ᠬᠥᠮᠦᠰ ᠶᠡᠷᠦ ᠨᠢ ᠮᠡᠳᠡᠳᠡᠭ ᠦᠭᠡᠢ ᠴᠦ᠍ ᠪᠣᠯᠪᠠᠤ ?
4
ᠬᠠᠷᠠᠩᠭᠠ ᠶ᠋ᠢᠨ ᠳᠠᠭᠤᠨ ᠳ᠋ᠤ᠌ ᠳᠦᠢᠷᠡᠨ ᠵᠠᠪᠳᠤᠭᠰᠠᠨ ᠴᠢᠬᠢ ᠨᠢ ᠮᠥᠳᠳᠥ ᠨᠠᠮ ᠪᠣᠯᠵᠤ ᠂ ᠲᠠᠰᠢᠭᠤᠷ ᠤ᠋ᠨ ᠬᠤᠢᠪᠢᠨ ᠳ᠋ᠤ᠌ ᠢᠵᠠᠷᠠᠨ ᠰᠢᠬᠠᠭᠰᠠᠨ ᠮᠠᠬᠠᠪᠣᠳ ᠨᠢ ᠭᠡᠯ ᠠᠶᠠᠳᠴᠤ ᠢᠷᠡᠲᠡᠯᠡ ᠂ ᠬᠥᠨᠳᠡᠯᠡᠨ ᠡᠴᠡ ᠨᠢ ᠴᠣᠷᠭᠢᠵᠤ ᠂ ᠬᠦᠢᠲᠡᠨ ᠢ᠋ᠶ᠋ᠡᠷ ᠲᠤᠰᠬᠤ ᠬᠥᠮᠦᠰ ᠤᠨ ᠬᠠᠷᠠᠴᠠ ᠳ᠋ᠤ᠌ ᠵᠢᠷᠦᠬᠡ ᠨᠢ ᠵᠢᠬᠢᠭᠦᠰᠴᠦ ᠪᠣᠯᠤᠯᠲᠠᠢ ᠰᠠᠢᠬᠢ ᠰᠠᠮᠵᠠ ᠭᠡᠨᠡᠳᠲᠡ ᠪᠠᠢᠭᠰᠠᠭᠠᠷ ᠬᠠᠯᠢᠷ ᠠᠮᠠ ᠨᠢ ᠲᠠᠲᠠᠭᠠᠨᠠᠨ ᠂ ᠬᠠ ᠭᠤᠶᠠ ᠨᠢ ᠠᠲᠠᠪᠠᠯᠵᠠᠭᠰᠠᠨ ᠢᠶᠠᠨ ᠦᠰᠦ ᠨᠢ ᠥᠷᠥᠪᠢᠰᠬᠢᠨ ᠪᠣᠰᠤᠭᠠᠳ ᠂ ᠨᠢᠳᠦ ᠨᠢ ᠴᠢᠬᠢᠰᠭᠡᠨ ᠭᠡᠷᠡᠯᠲᠦᠪᠡ ᠃
ᠬᠥᠮᠦᠨ ᠦ᠌ ᠬᠣᠩᠰᠢᠶᠠᠷ ᠬᠢᠲᠤᠭᠠ ᠰᠢᠪᠦᠭᠡ ᠂ ᠬᠦᠢᠲᠡᠨ ᠬᠠᠷᠠᠴᠠ ᠨᠢ ᠬᠤᠷᠴᠠ ᠮᠡᠰᠡ ᠭᠡᠰᠡᠨ ᠢ᠋ ᠲᠡᠷᠡ ᠪᠠᠰᠠ ᠤᠬᠠᠵᠤ ᠮᠡᠳᠡᠭᠡ ᠶᠦ᠍ᠮ ᠪᠢᠵᠡ ? ᠵᠠᠢᠯᠠᠭᠤᠯ
5
ᠦᠢᠯᠡ ᠲᠡᠢ ᠰᠠᠮᠵᠠ ᠬᠥᠭᠡᠷᠦᠬᠦᠢ ᠴᠦ᠍ ᠠᠮᠢᠲᠠᠨ ᠃
ᠬᠦᠵᠦᠭᠦᠨ ᠦ᠌ ᠪᠡᠨ ᠭᠢᠨᠵᠢ ᠶ᠋ᠢ ᠬᠤᠷᠤᠭᠤ ᠬᠢᠮᠤᠰᠤ ᠪᠠᠷ ᠢ᠋ᠶ᠋ᠠᠨ ᠤᠭᠵᠢᠬᠤ ᠂ ᠤᠷᠤᠭᠤᠯ ᠰᠢᠲᠦ ᠪᠡᠷ ᠢ᠋ᠶ᠋ᠡᠨ ᠬᠡᠮᠡᠯᠢᠬᠦ ᠨᠢ
《 ᠳᠡᠭᠡᠳᠦ ᠶ᠋ᠢᠨ ᠦᠶᠡ ᠳ᠋ᠡᠭᠡᠨ ᠪᠢᠳᠡ ᠴᠢᠨᠢ ᠬᠤᠷᠮᠤᠰᠲᠠ ᠲᠡᠭᠷᠢ ᠶ᠋ᠢ ᠲᠦᠢᠳᠴᠢᠳᠡᠭ ᠴᠢᠳᠠᠯ ᠲᠠᠢ ᠪᠠᠢᠭᠰᠠᠨ ᠳ᠋ᠠᠭ ᠡᠨᠡ ᠯᠡ ᠪᠠᠢᠭᠰᠠᠨ ᠦᠭᠡᠢ ᠪᠣᠯ ! 》 ᠭᠡᠬᠦ ᠰᠢᠭ ᠶᠦ᠍ᠮ ᠃
ᠬᠥᠮᠦᠰ ᠤᠨ ᠵᠦᠭ ᠬᠦᠵᠦᠭᠦᠦ ᠪᠡᠨ ᠭᠢᠯᠵᠢᠢᠯᠭᠡᠨ ᠤᠩᠬᠤᠭᠠᠷ ᠬᠣᠶᠠᠷ ᠨᠢᠳᠦ ᠪᠡᠨ ᠤᠷᠪᠠᠩ ᠤᠷᠪᠠᠩ ᠬᠢᠬᠦ ᠨᠢ ᠄ 《ᠲᠠᠨᠠᠷ ᠲᠠᠩᠳᠠ ᠨᠠᠮᠠᠶᠢ ᠲᠡᠭᠡᠵᠦ ᠵᠢᠬᠡᠭᠦᠨ ᠭᠢᠯᠤᠢᠬᠤ ᠴᠤ᠌ ᠶᠠᠭᠠᠮᠠᠢ ᠳ᠋ᠠ᠂ ᠲᠠᠰᠢᠭᠤᠷ ᠳᠠᠯᠠᠢᠭᠰᠠᠨ ᠲᠡᠭᠦᠨ ᠢ᠋ ᠲᠠᠯᠠ ᠳ᠋ᠤᠨᠢ ᠬᠠᠶᠠᠴᠢᠳᠠᠭ ᠴᠢᠨᠢ ᠶᠠᠭᠠᠬᠢᠪᠠ ?》 ᠭᠡᠬᠦ ᠴᠦ᠍ ᠶᠤᠮᠰᠢᠭ᠃
ᠬᠥᠭᠡᠷᠦᠬᠦᠢ – ᠲᠡᠷᠡ ᠰᠠᠮᠵᠠ ᠂ ᠬᠡᠷᠪᠡ ᠬᠡᠯᠡ ᠮᠡᠳᠡᠳᠡᠭ ᠪᠠᠢᠭᠠᠳ ᠭᠢᠨᠵᠢ ᠦᠭᠡᠢ ᠪᠣᠯᠤᠭᠰᠠᠨ ᠴᠤ᠌ ᠪᠣᠯ ᠁
ᠪᠠᠭᠠᠯ
– ᠪᠠᠭᠠᠯ ᠭᠡᠵᠦ ᠪᠠᠵᠠᠭᠠᠬᠤ ᠦᠭᠡᠢ ᠠᠮᠢᠲᠠᠨ ᠂
ᠪᠢ ᠪᠠᠰᠠ ᠲᠤᠢᠯ ᠢ᠋ᠶ᠋ᠠᠷ ᠵᠢᠭᠰᠢᠳᠡᠭ ᠃
ᠪᠠᠭᠠᠯ ᠭᠡᠳᠡᠭ ᠨᠣᠬᠠᠢ ᠶ᠋ᠢᠨ ᠲᠥᠷᠥᠯ ᠴᠦ᠍ ᠂ ᠬᠣᠲᠠ ᠱᠠᠭᠢᠭᠤᠯᠤᠭᠠᠳ ᠬᠤᠯᠠᠭᠠᠢᠴᠢ ᠲᠡᠭᠦᠨ ᠢ᠋ ᠣᠢᠰᠢᠶᠠᠬᠤ ᠦᠭᠡᠢ ᠂ ᠬᠣᠨᠢᠨ ᠳ᠋ᠤ᠌ ᠳᠠᠭᠠᠭᠤᠯᠤᠭᠠᠳ ᠴᠢᠨᠣᠠ ᠲᠡᠭᠦᠨ ᠡᠴᠡ ᠠᠶᠤᠬᠤ ᠦᠭᠡᠢ ᠃
ᠰᠤᠷ ᠰᠠᠢᠲᠤ ᠦᠰᠦ ᠪᠡᠷ ᠪᠡᠶᠡ ᠪᠡᠨ ᠴᠢᠮᠡᠵᠦ ᠲᠥᠷᠥᠭᠡᠳ ᠂ ᠰᠣᠷᠮᠤᠤᠰᠤ ᠤᠷᠲᠤ ᠨᠢᠳᠦ ᠪᠡᠷ ᠡᠵᠡᠨ ᠢ᠋ᠶ᠋ᠡᠨ ᠠᠵᠢᠬᠤ ᠶ᠋ᠢ ᠪᠠᠭᠠᠯ ᠭᠡᠳᠡᠭ ᠠᠮᠢᠲᠠᠨ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠳᠤᠷᠠᠯᠠᠵᠤ ᠂ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠴᠢᠳᠠᠳᠠᠭ ᠯᠠ ᠭᠡᠨᠡ ᠃
ᠡᠵᠡᠨ ᠨᠢ ᠡᠷᠬᠡᠯᠡᠭᠦᠯᠬᠦ ᠳ᠋ᠦ᠍ ᠪᠠᠭᠠᠯ ᠨᠢ ᠪᠢᠯᠳᠠᠤᠴᠢᠯᠠᠨᠠ ᠂ ᠡᠵᠡᠨ ᠦ᠌ ᠬᠢᠨᠢ ᠪᠠᠢᠳᠠᠯ ᠢ᠋ ᠮᠡᠳᠡᠶᠡ ᠭᠡᠪᠡᠯ ᠪᠠᠭᠠᠯ ᠤ᠋ᠨ ᠬᠢᠨᠢ ᠰᠡᠭᠦᠯ ᠢ᠋ ᠯᠠᠪᠯᠠᠵᠤ ᠪᠠᠢ
ᠪᠠᠭᠠᠯ ᠤ᠋ᠨ ᠰᠡᠭᠦᠯ ᠬᠠᠪᠴᠢᠵᠤ ᠯᠠ ᠪᠠᠢᠪᠠᠯ ᠂ ᠡᠵᠡᠨ ᠦ᠌ ᠬᠢᠨᠢ ᠴᠢᠷᠠᠢ ᠠᠭᠤᠷ ᠲᠠᠢ ᠭᠡᠵᠦ ᠮᠡᠳᠡ ᠃ ᠪᠠᠭᠠᠯ ᠤ᠋ᠨ ᠰᠡᠭᠦᠯ ᠡᠷᠲᠦᠢᠵᠦ ᠯᠡ ᠪᠠᠢᠪᠠᠯ ᠂ ᠡᠵᠡᠨ ᠦ᠌ ᠬᠢᠨᠢ ᠴᠢᠷᠠᠢ ᠥᠭᠡᠳᠡ ᠲᠡᠢ ᠭᠡᠴᠦ ᠪᠣᠳᠣ ᠃
ᠠᠰᠠᠭᠤᠯᠭᠠᠨ ᠦᠭᠡᠢ ! ᠪᠢᠰᠢ ᠭᠡᠪᠡᠴᠦ ᠮᠥᠨ ! ᠲᠡᠢᠮᠦ ᠯᠠ ᠪᠠᠢᠬᠤ ᠠᠯᠪᠠᠲᠠᠢ ᠶᠤᠮ ᠃
ᠪᠤᠴᠠᠭᠠᠭᠠᠳ ᠬᠡᠯᠡᠭᠰᠡᠨ ᠴᠦ᠍ ᠲᠡᠷᠡ ᠃ ᠡᠵᠡᠨ ᠦ᠌ ᠬᠢᠨᠢ ᠴᠢᠷᠠᠢ ᠪᠠᠷᠤᠢᠵᠤ ᠯᠠ ᠪᠠᠢᠪᠠᠯ ᠂ ᠪᠠᠭᠠᠯ ᠤ᠋ᠨ ᠰᠡᠭᠦᠯ ᠬᠠᠪᠴᠢᠵᠤ ᠪᠠᠢᠳᠠᠭ ᠃ ᠡᠵᠡᠨ ᠦ᠌ ᠬᠢᠨᠢ ᠴᠢᠷᠠᠢ ᠮᠦᠰᠢᠶᠡᠵᠦ ᠯᠡ ᠪᠠᠢᠪᠠᠯ ᠪᠠᠭᠠᠯ ᠤ᠋ᠨ ᠰᠡᠭᠦᠯ ᠡᠷᠳᠦᠢᠵᠦ ᠪᠠᠢᠳᠠᠭ ᠃
ᠶᠠᠷᠢᠶᠠᠨ ᠦᠭᠡᠢ ! ᠬᠤᠳᠠᠯ ᠭᠡᠪᠡᠴᠦ ᠦᠨᠡᠨ ! ᠡᠢᠮᠦ ᠯᠡ ᠪᠠᠢᠬᠤ ᠶᠣᠰᠣᠲᠠᠢ ᠶᠤᠮ ᠃
ᠪᠠᠭᠠᠯ ᠤ᠋ᠨ ᠴᠢᠳᠠᠳᠠᠭ ᠮᠡᠳᠡᠳᠡᠭ ᠨᠢ ᠡᠨᠡᠭᠦᠬᠡᠨ ᠢ᠋ᠶ᠋ᠡᠷ ᠪᠠᠰᠠ ᠵᠣᠭᠰᠣᠬᠤ ᠪᠢᠰᠢ ᠃
ᠵᠤᠯᠠᠢ ᠶ᠋ᠢ ᠨᠢ ᠢᠯᠢᠪᠡᠯ ᠬᠦᠵᠦᠭᠦᠦ ᠪᠡᠨ ᠭᠤᠳᠤᠢᠵᠤ ᠂ ᠨᠢᠳᠦ ᠪᠡᠨ ᠠᠨᠢᠵᠤ ᠥᠭᠬᠦ ᠶ᠋ᠢ ᠪᠡᠷᠬᠡ ᠮᠡᠳᠡᠨᠡ᠃
ᠵᠣ ᠶ᠋ᠢ ᠨᠢ ᠳᠠᠷᠤᠪᠠᠯ ᠬᠡᠪᠲᠡᠴᠢᠭᠡᠳ ᠬᠥᠷᠪᠡᠵᠦ ᠤᠷᠪᠠᠨ ᠪᠠᠭᠠᠰᠢ ᠭᠠᠷᠭᠠᠬᠤ ᠶ᠋ᠢ ᠤᠴᠢᠷ ᠦᠭᠡᠢ ᠴᠢᠳᠠᠨᠠ ᠃
ᠪᠠᠰᠠ ᠲᠡᠭᠡᠭᠡᠳ ᠂ ᠡᠵᠡᠨ ᠦ᠌ ᠪᠡᠨ ᠡᠮᠦᠨᠡ ᠬᠣᠢᠨᠠ ᠠ᠋ᠴᠠ ᠱᠣᠭᠰᠢᠭᠠᠳ ᠳᠠᠭᠠᠬᠤ ᠭᠡᠭᠴᠢ ᠂ ᠥᠯᠮᠡᠢ ᠪᠣᠷᠪᠢ ᠶ᠋ᠢ ᠨᠢ ᠳᠣᠯᠢᠶᠠᠭᠠᠳ ᠰᠢᠷᠪᠠᠯᠵᠠᠬᠤ ᠭᠡᠭᠴᠢ ᠂ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠢᠷᠮᠠᠢᠵᠤ ᠂ ᠬᠢᠷᠢ ᠪᠡᠷ ᠢᠶᠠᠨ ᠬᠢᠳᠡᠭ ᠠᠮᠢᠲᠠᠨ ᠳ᠋ᠠ᠃
ᠪᠠᠭᠠᠯ ᠢ᠋ ᠪᠠᠰᠠ ᠪᠠᠰᠤᠵᠤ ᠪᠣᠯᠬᠤ ᠭᠠᠢᠬᠠᠯ ᠪᠢᠰᠢ ᠃ ᠡᠵᠡᠨ ᠦ᠌ ᠪᠡᠨ ᠬᠣᠷᠮᠣᠢ ᠳᠣᠣᠷᠠ ᠬᠡᠯᠡ ᠪᠡᠨ ᠭᠠᠷᠭᠠᠵᠤ ᠵᠣᠭᠰᠣᠭᠠᠳ ᠂ ᠭᠡᠨᠡᠳᠲᠡ ᠭᠡᠨᠡᠳᠲᠡ ᠭᠡᠮ ᠦᠭᠡᠢ ᠬᠥᠮᠦᠨ ᠦ᠌ ᠥᠭᠡᠳᠡ ᠡᠴᠡ ᠳᠠᠪ ᠳᠠᠪ ᠬᠢᠵᠦ ᠂ ᠰᠢᠲᠦ ᠦᠵᠡᠭᠦᠯᠦᠨ ᠠᠷᠬᠢᠷᠠᠬᠤ ᠨᠢ ᠬᠠᠷᠢᠨ ᠴᠤ᠌ ᠶᠠᠭ ᠨᠣᠬᠠᠢ ᠶᠤᠮ ᠠ᠋ !
ᠢᠯᠠᠩᠭᠤᠶᠠ ᠡᠨᠡ ᠦᠶᠡ ᠳ᠋ᠦ᠍ᠨᠢ ᠪᠣᠯ ᠪᠢ ᠬᠠᠷᠢᠨ ᠶᠠᠰᠤᠨ ᠠ᠋ᠴᠠ ᠪᠠᠨ ᠳᠤᠷᠠ ᠭᠤᠲᠤᠨ ᠂ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠵᠢᠭᠰᠢᠳᠡᠭ ᠪᠢᠯᠡ ᠃
ᠡᠨᠡ ᠪᠦᠬᠦ ᠮᠡᠳᠡᠳᠡᠭ ᠴᠢᠳᠠᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠵᠡᠨ ᠦ᠌ ᠪᠡᠨ ᠬᠡᠰᠢᠭ ᠲᠦ᠍ ᠬᠦᠷᠲᠡᠵᠦ ᠂ ᠱᠥᠯᠥ ᠲᠣᠰᠣᠨ ᠳ᠋ᠤ᠌ ᠴᠠᠳᠴᠢᠬᠠᠪᠠᠯ᠂ ᠰᠢᠷᠡᠭᠡᠨ ᠳᠣᠣᠷᠠ ᠰᠢᠷᠭᠤᠵᠤ ᠣᠷᠣᠭᠠᠳ ᠮᠠᠩᠰᠢᠭᠤᠷᠠᠵᠤ ᠣᠷᠬᠢᠳᠠᠭ ᠵᠣᠯᠢᠭ ᠰᠢᠦ ᠃
ᠭᠡᠪᠡᠴᠦ ᠂ ᠪᠠᠭᠠᠯ ᠭᠡᠵᠦ ᠪᠠᠰᠠ ᠨᠢᠭᠡ ᠰᠣᠨᠢᠬᠠᠨ ᠰᠢᠭ᠋ ᠪᠤᠶᠠᠨ ᠲᠠᠢ ᠠᠮᠢᠲᠠᠨ ᠴᠤ᠌ ᠪᠣᠯᠪᠠᠤ?
ᠤᠬᠤᠨᠠ
– ᠠᠳᠠ ᠲᠡᠨᠳᠡ ᠦᠵᠡᠭᠳᠡᠵᠦ ᠪᠠᠢᠳᠠᠭ ᠂
ᠡᠢᠮᠦ ᠨᠢᠭᠡ ᠪᠠᠪᠠᠨᠠᠭᠤᠷ ᠤᠬᠤᠨᠠ
ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠡᠢᠮᠦ ᠨᠢᠭᠡ ᠶᠠᠯᠳᠠᠭᠠᠷ ᠡᠪᠡᠷᠲᠦ ᠪᠡᠷ ᠤᠬᠤᠨᠠ ᠲᠠᠯᠪᠢᠴᠢᠬᠰᠠᠨ ᠶᠤᠮ ? ᠶᠠᠯᠳᠠᠭᠠᠷ ᠡᠰᠡᠬᠦ ᠨᠢ ᠴᠦ᠍ ᠶᠠᠭᠠᠬᠢᠬᠤᠪ ᠳ᠋ᠠ᠂ ᠶᠠᠩᠰᠢᠶᠠ ᠭᠡᠳᠡᠭ ᠨᠢ ᠶᠠᠭ ᠠᠷᠭᠠ ᠦᠭᠡᠢ ᠃
ᠲᠣᠭᠲᠠᠭᠰᠠᠨ ᠰᠦᠷᠦᠭ ᠢ᠋ ᠳᠤᠮᠳᠠᠭᠤᠷ ᠨᠢ ᠰᠦᠯᠵᠢᠵᠦ ᠂ ᠠᠮᠤᠷ ᠢᠳᠡᠭᠦᠯᠬᠦ ᠦᠭᠡᠢ ᠤᠬᠤᠨᠠᠳᠠᠭᠠᠳ ᠭᠦᠶᠦᠨᠡ ᠃
ᠬᠣᠲᠠᠯᠠᠭᠰᠠᠨ ᠬᠣᠨᠢ ᠶ᠋ᠢ ᠳᠣᠲᠣᠭᠤᠷ ᠨᠢ ᠬᠤᠳᠬᠤᠵᠤ ᠂ ᠲᠠᠢᠪᠤᠭᠤ ᠬᠡᠪᠲᠡᠭᠦᠯᠬᠦ ᠦᠭᠡᠢ ᠪᠠᠪᠠᠨᠠᠳᠠᠭᠠᠳ ᠲᠠᠭᠤᠨᠠ ᠃
ᠬᠥᠭ ᠴᠠᠭ ᠦᠭᠡᠢ ᠬᠥᠭᠡᠭᠡᠴᠡᠯᠳᠦᠵᠦ ᠂ ᠬᠤᠷᠠᠭᠠ ᠢᠰᠢᠭᠡ ᠶ᠋ᠢ ᠴᠢ ᠲᠠᠭᠠᠷᠢᠭᠤᠯᠤᠭᠠᠳ ᠂ ᠲᠠᠩᠳᠠ ᠤᠬᠤᠨᠠᠳᠠᠵᠤ ᠂ ᠲᠠᠩᠳᠠ ᠪᠠᠪᠠᠨᠠᠳᠠᠭᠠᠳ ᠯᠠ ᠶᠠᠷᠰᠢᠭ ᠪᠠᠢᠨᠠ ᠳ᠋ᠠ᠃
ᠤᠬᠤᠨᠠ ᠶᠤᠮ ᠴᠢᠨᠢ ᠳ᠋ᠠ᠂ ᠢᠮᠠᠭᠠ ᠪᠠᠨ ᠲᠠᠭᠤᠬᠤ ᠴᠤ᠌ ᠶᠠᠭᠠᠮᠠᠢ ᠃ ᠤᠴᠢᠷ ᠦᠭᠡᠢ ᠶᠠᠭᠤ ᠭᠡᠵᠦ ᠪᠠᠰᠠ ᠬᠣᠨᠢ ᠶ᠋ᠢ ᠣᠴᠢᠭᠠᠳ ᠳᠣᠷᠭᠢᠵᠤ ᠲᠤᠷᠪᠢᠵᠤ ᠦᠵᠡᠨᠡ ᠪᠣᠢ ? ᠳᠠᠵᠢᠨ ᠪᠢᠰᠢᠦ ᠃
ᠵᠢᠷᠭᠤᠭᠠᠨ ᠢᠮᠠᠭᠠᠨ ᠳ᠋ᠦ᠍ ᠵᠢᠷᠠᠨ ᠤᠬᠤᠨᠠ ᠵᠤᠳ ᠭᠡᠬᠦ ᠳ᠋ᠦ᠍ ᠂ ᠡᠢᠮᠦ ᠪᠠᠪᠠᠨᠠᠭᠤᠷ ᠤᠬᠤᠨᠠ ᠵᠢᠷᠠᠨ ᠢᠮᠠᠭᠠᠨ ᠳ᠋ᠤ᠌ ᠨᠢᠭᠡ ᠯᠡ ᠪᠠᠢᠶᠠ ᠴᠤ᠌ ᠠᠮᠠᠷ ᠦᠭᠡᠢ ᠶᠠ ᠃
ᠲᠣᠳᠢ
– ᠲᠡᠢᠮᠦ ᠨᠢᠭᠡ ᠲᠠᠯᠠ ᠲᠠᠢ ᠭᠡᠬᠦ ᠳ᠋ᠦ᠍
ᠡᠢᠮᠦ ᠪᠠᠰᠠ ᠨᠢᠭᠡ ᠲᠠᠯᠠ ᠪᠣᠢ ᠃
1
ᠲᠣᠳᠢ ᠭᠡᠳᠡᠭ ᠰᠢᠪᠠᠭᠤ ᠴᠣᠬᠣᠮ ᠶᠠᠮᠠᠷᠬᠠᠨ ᠠᠮᠢᠲᠠᠨ ᠪᠣᠢ ?
ᠦᠰᠦ ᠨᠢ ᠭᠠᠳᠠᠨᠠ ᠪᠠᠨ ᠰᠢᠪᠠᠭᠤ ᠶ᠋ᠢ ᠂ ᠦᠭᠡ ᠮᠡᠳᠡᠬᠦ ᠦᠭᠡᠢ ᠠᠳᠤᠭᠤᠰᠤ ᠶ᠋ᠢ ᠬᠥᠮᠦᠰ ᠲᠠᠩᠳᠠ ᠪᠠᠨ ᠮᠠᠭᠤᠯᠠᠬᠤ ᠶᠤᠮ ᠂ ᠬᠥᠲᠥᠯᠪᠦᠷᠢ ᠳ᠋ᠦ᠍ ᠭᠠᠷᠭᠠᠭᠠᠳ ᠴᠤ᠌ ᠪᠤᠷᠤᠭᠤᠳᠬᠠᠬᠤ ᠶᠤᠮ ᠃
ᠬᠥᠭᠡᠷᠦᠬᠦᠢ – ᠠᠷᠠᠢ ᠯᠠ ᠨᠢᠭᠡ ᠪᠠᠭᠠ ᠬᠡᠲᠦᠷᠡᠭᠦᠯᠴᠢᠵᠦ ᠪᠠᠢᠭᠠ ᠨᠢ ᠪᠢᠰᠢ ᠪᠢᠵᠡ ?
2
ᠦᠭᠡᠢ ᠶᠡᠷᠦ ᠨᠢ ᠲᠡᠢᠮᠦ ᠪᠢᠰᠢ ᠭᠡᠵᠢ ᠦᠦ ?
ᠳᠠᠭᠤᠷᠢᠶᠠᠯᠭᠠᠬᠤ ᠨᠢ ᠴᠢᠨᠦ ᠵᠥᠪ ᠂ ᠳᠠᠭᠤᠷᠢᠶᠠᠭᠰᠠᠨ ᠨᠢ ᠲᠣᠳᠢ ᠶ᠋ᠢᠨ ᠪᠤᠷᠤᠭᠤ ᠂ ᠡᠨᠡ ᠴᠢᠨᠢ ᠬᠠᠷᠢᠨ ᠭᠣᠣᠯᠴᠢ ᠶᠤᠮ ᠭᠡᠵᠦ ᠦᠦ ? ᠵᠠ ?
ᠲᠡᠭᠡᠭᠡᠳ ᠂ ᠲᠣᠳᠢ ᠴᠣᠬᠣᠮ ᠦᠭᠡ ᠶ᠋ᠢ ᠴᠢᠨᠢ ᠦᠭᠡᠷᠡᠲᠡᠯᠡᠭᠦᠯᠵᠦ ᠂ ᠰᠠᠨᠠᠭᠠ ᠶ᠋ᠢ ᠴᠢᠨᠢ ᠰᠣᠯᠢᠪᠠᠤ? ᠵᠢᠱ᠌ᠢᠶᠡᠯᠡᠪᠡᠯ ᠄
ᠬᠠᠷᠠ ᠭᠡᠰᠡᠨ ᠢ᠋ ᠴᠢᠨᠢ ᠴᠠᠭᠠᠨ ᠭᠡᠪᠡᠦ ? ᠦᠭᠡᠢ ᠰᠢᠦ ᠳᠡ ᠃
ᠬᠠᠷᠢᠶᠠᠯ ᠢ᠋ ᠴᠢᠨᠢ ᠢᠷᠦᠭᠡᠯ ᠪᠣᠯᠭᠠᠪᠠᠤ ? ᠦᠭᠡᠢ ᠰᠢᠦ ᠳᠡ ᠃
ᠲᠡᠭᠡᠪᠡᠯ ᠪᠣᠯᠤᠯᠠ ᠯᠠ ᠰᠢᠳᠡ ᠂ ᠦᠭᠡ ᠮᠡᠳᠡᠬᠦ ᠦᠭᠡᠢ ᠠᠮᠢᠲᠠᠨ ᠥᠭᠡᠷᠡ ᠴᠣᠬᠣᠮ ᠶᠠᠭᠠᠬᠢᠳᠠᠭ ᠪᠢᠯᠡ ?
3
ᠲᠣᠳᠢ ᠶ᠋ᠢᠨ ᠲᠥᠷᠥᠯᠬᠢ ᠨᠢᠭᠡ ᠣᠨᠴᠠᠯᠢᠭ ᠨᠢ ᠬᠡᠯᠡ ᠤᠷᠠᠨ ᠲᠠᠢ ᠃
ᠲᠣᠳᠢ ᠶ᠋ᠢᠨ ᠰᠠᠢᠬᠠᠨ ᠨᠢᠭᠡ ᠵᠠᠩ ᠨᠢ ᠬᠥᠮᠦᠨ ᠢᠯᠭᠠᠳᠠᠭ ᠦᠭᠡᠢ ᠃
ᠲᠣᠳᠢ ᠶ᠋ᠢᠨ ᠰᠠᠢᠨᠲᠠᠢ ᠨᠢᠭᠡ ᠲᠠᠯᠠ ᠨᠢ ᠦᠭᠡ ᠭᠠᠵᠢᠭᠤᠳᠠᠭᠤᠯᠳᠠᠭ ᠦᠭᠡᠢ ᠃
ᠳᠠᠭᠤᠷᠢᠶᠠᠯᠭᠠᠬᠤ ᠠ᠋ᠴᠠ ᠴᠢ ᠬᠡᠷᠪᠡ ᠵᠢᠷᠦᠬᠡ ᠲᠠᠢ ᠯᠠ ᠶᠤᠮ ᠪᠣᠯ ᠂ ᠳᠠᠭᠤᠷᠢᠶᠠᠬᠤ ᠳ᠋ᠠᠭᠠᠨ ᠲᠣᠳᠢ ᠬᠠᠷᠢᠨ ᠵᠣᠷᠢᠭ ᠲᠠᠢ ᠯᠠ ᠰᠢᠪᠠᠭᠤ ᠃
ᠢᠲᠡᠭᠡᠬᠦ ᠦᠭᠡᠢ ᠪᠣᠯ ᠴᠢ ᠨᠢᠭᠡ ᠬᠠᠷᠢᠶᠠᠵᠤ ᠦᠵᠡ ᠂ ᠥᠭᠡᠳᠡ ᠡᠴᠡ ᠴᠢᠨᠢ ᠲᠡᠷᠡ ᠶᠠᠭᠠᠬᠢᠪᠠᠴᠤ ᠢᠷᠦᠭᠡᠬᠦ ᠪᠡᠷ ᠦᠭᠡᠢ ᠃
4
ᠲᠣᠳᠢ ᠭᠡᠵᠦ ᠦᠰᠦ ᠨᠢ ᠭᠠᠳᠠᠨᠠ ᠪᠠᠨ ᠰᠢᠪᠠᠭᠤ ᠂ ᠡᠢᠮᠦ ᠯᠡ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ
ᠲᠣᠳᠢ ᠶ᠋ᠢ ᠮᠠᠭᠤᠯᠠᠭᠠᠳ ᠪᠠᠢᠳᠠᠭ ᠨᠥᠬᠥᠳ ᠮᠢᠨᠢ ᠳᠤᠯᠢᠳᠠ ᠪᠣᠳᠣᠬᠤ ᠪᠣᠯᠪᠠᠤ ᠃
ᠲᠣᠭᠣᠰ
– ᠥᠩᠭᠡ ᠨᠢ ᠥᠩᠭᠡ ᠂
ᠵᠠᠩ ᠨᠢ ᠵᠠᠩ ᠃
1
ᠰᠠᠢᠬᠠᠨ ᠪᠣᠯᠭᠠᠨ ᠰᠠᠢᠨ ᠪᠢᠰᠢ ᠂ ᠡᠨᠡ ᠪᠣᠯ ᠥᠪ ᠦᠨᠡᠨ ᠃
ᠲᠣᠭᠣᠰ ᠢ᠋ᠶ᠋ᠠᠷ ᠠᠪᠴᠤ ᠬᠡᠯᠡᠶᠡ ᠂ ᠥᠩᠭᠡ ᠵᠠᠩ ᠬᠣᠶᠠᠷ ᠨᠢ ᠦᠰᠦᠳ ᠥᠭᠡᠷᠡ ᠃
ᠲᠠᠭᠠᠷᠠᠨᠠ ᠤᠤ ? ᠦᠭᠡᠢ ᠦᠦ ? ᠲᠠ ᠨᠢᠭᠡ ᠯᠠᠪᠯᠠᠵᠤ ᠦᠵᠡ ᠃
2
ᠲᠣᠭᠣᠰ ᠤ᠋ᠨ ᠰᠡᠭᠦᠯ ᠦᠵᠡᠬᠦ ᠶᠦ᠍ᠮ ᠭᠡᠳ ᠲᠣᠣᠷ ᠤ᠋ᠨ ᠭᠠᠳᠠᠭᠤᠷ ᠬᠥᠮᠦᠰ ᠰᠢᠪᠠᠯᠳᠤᠨᠠ ᠃
ᠲᠣᠭᠣᠰ ᠬᠠᠷᠢᠨ ᠠᠵᠢᠭ ᠴᠤ᠌ ᠦᠭᠡᠢ ᠂ ᠲᠣᠩᠭᠣᠰ ᠲᠣᠩᠭᠣᠰ ᠢᠳᠡᠰᠢ ᠡᠷᠢᠨᠡ ᠃
ᠡᠩ ᠦᠨ ᠳᠠᠪᠠᠯᠳᠠᠨ ᠣᠢᠰᠢᠶᠠᠬᠤ ᠴᠤ᠌ ᠦᠭᠡᠢ ᠂ ᠡᠪᠦᠭᠡᠳ ᠡᠮᠡᠭᠡᠳ ᠢ᠋ ᠦᠲᠡᠭᠡᠷᠬᠦ ᠴᠦ᠍ ᠦᠭᠡᠢ ᠃
3
ᠲᠡᠭᠡᠲᠡᠯᠡ ᠂ ᠡᠷᠢᠶᠡᠨ ᠪᠠᠩᠵᠢᠯ ᠂ ᠠᠯᠠᠭ ᠬᠦᠷᠮᠡ ᠲᠡᠢ ᠨᠢᠭᠡ ᠬᠡᠦᠬᠡᠨ ᠂ ᠣᠯᠠᠨ ᠤ᠋ ᠳᠣᠲᠣᠭᠤᠷ ᠣᠷᠣᠭᠠᠳ ᠢᠷᠡᠯᠡ ᠃
ᠲᠣᠭᠣᠰ ᠬᠡᠳᠦᠢᠨ ᠦᠵᠡᠵᠦ ᠵᠠᠪᠳᠤᠭᠠᠳ ᠂ ᠥᠳᠥ ᠰᠥᠳᠥ ᠪᠡᠨ ᠵᠠᠰᠠᠨ ᠦᠵᠡᠰᠬᠦᠯᠡᠩ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠬᠦᠷᠯᠡᠪᠡ ᠃
ᠲᠣᠯᠣᠭᠠᠢ ᠳᠡᠭᠡᠷᠡᠬᠢ ᠰᠡᠴᠢᠭ ᠨᠢ ᠴᠦ᠍ ᠲᠤᠩ ᠣᠮᠣᠭᠯᠠᠩ ᠰᠡᠷᠡᠯᠵᠢᠨᠡ ᠃
4
– ᠶᠠᠮᠠᠷ ᠰᠠᠢᠬᠠᠨ ᠶᠤᠮ !
– ᠶᠠᠭᠠᠬᠢᠭᠰᠠᠨ ᠭᠣᠶᠣ ᠪᠣᠢ !
– ᠁
ᠬᠦᠷᠢᠶᠡᠯᠡᠵᠦ ᠵᠣᠭᠰᠣᠭᠰᠠᠨ ᠬᠥᠮᠦᠰ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠱᠠᠭᠰᠢᠵᠤ ᠂ ᠠᠯᠠᠭᠠ ᠲᠠᠰᠢᠨ ᠬᠥᠭᠡᠷᠦᠯᠳᠦᠨᠡ ᠃
5
ᠶᠠᠮᠠᠷ ᠰᠠᠢᠬᠠᠨ ᠳ᠋ᠠᠭᠠᠨ ᠭᠡᠵᠢ ᠠᠲᠠᠭᠠ ᠨᠢ ᠬᠥᠳᠡᠯᠵᠦ ᠪᠠᠢᠬᠤ ᠳ᠋ᠤ᠌ ᠂
ᠦᠵᠡ ᠳ᠋ᠠ᠂ ᠲᠡᠷᠡ ! ᠥᠩᠭᠡᠲᠦ ᠰᠡᠭᠦᠯ ᠨᠢ ᠮᠢᠷᠠᠰᠬᠢᠬᠦ ᠶᠢᠨ ᠰᠠᠴᠠᠭᠤ ᠂ ᠦᠰᠦ ᠵᠢᠰᠦ ᠨᠢ ᠴᠦ᠍ ᠠᠷᠵᠢᠰᠭᠢᠭᠠᠳ ᠄
《ᠴᠢᠨᠦ ᠪᠠᠩᠵᠢᠯ ᠰᠠᠢᠬᠠᠨ ᠤᠤ ? ᠮᠢᠨᠦ ᠰᠡᠭᠦᠯ ᠭᠣᠶᠣ ᠤᠤ ? 》 ᠭᠡᠭᠰᠡᠭᠡᠷ ᠬᠣᠶᠠᠷ ᠨᠢᠳᠦ ᠨᠢ ᠡᠷᠢᠶᠡᠨ ᠪᠠᠩᠵᠢᠯ ᠤᠷᠤᠭᠤ ᠯᠠ ᠤᠴᠠᠷᠯᠠᠨᠠ ᠪᠢᠰᠢᠦ ᠃
6
ᠬᠦᠷᠢᠶᠡᠯᠡᠵᠦ ᠵᠣᠭᠰᠣᠭᠰᠠᠨ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠷ ᠬᠥᠷ ᠬᠡᠯᠴᠢᠵᠦ᠂ ᠡᠮᠦᠨᠡᠬᠢ ᠨᠢ ᠡᠷᠡᠬᠡᠢ ᠭᠠᠷᠭᠠᠨ ᠭᠠᠢᠬᠠᠯᠴᠠᠨᠠ ᠠᠷᠤ ᠳ᠋ᠠᠬᠢ ᠨᠢ ᠠᠮᠠ ᠪᠠᠨ ᠪᠠᠷᠢᠨ ᠲᠣᠪ ᠳᠤᠭᠤᠢ ᠯᠠ ᠪᠠᠢᠯᠴᠠᠨᠠ ᠃
ᠲᠣᠭᠣᠰ ᠲᠡᠭᠡᠬᠦ ᠳ᠋ᠦ᠍ ᠂ ᠪᠢ ᠳᠤᠬᠤᠨ ᠳᠡᠭᠡᠷᠡ ᠪᠡᠨ ᠨᠢᠳᠦ ᠦᠭᠡᠢ ᠭᠡᠰᠡᠨ ᠰᠢᠭ ᠰᠡᠭᠦᠯ ᠭᠡᠳᠡᠭ ᠢ᠋ ᠴᠢᠨᠢ ᠳᠡᠯᠭᠡᠭᠰᠡᠨ ᠳᠡᠭᠡᠷᠡ ᠪᠡᠨ ᠳᠡᠯᠭᠡᠭᠡᠳ ᠤᠯᠠᠮ ᠴᠤ᠌ ᠰᠡᠷᠭᠡᠢᠵᠦ ᠵᠣᠭᠰᠣᠨᠠ ᠃
ᠠᠢ ᠬᠥᠭᠡᠷᠦᠬᠦᠢ ! ᠴᠢᠮᠠ ᠠ᠋ᠴᠠ ᠥᠭᠡᠷᠡ ᠨᠢ ᠴᠦ᠍ ᠴᠢᠮᠠᠯᠠᠬᠠᠢ ᠳ᠋ᠠᠭᠠᠨ ᠨᠢᠳᠦ ᠲᠡᠢ ᠨᠢ ᠨᠢᠭᠡ ᠴᠤ᠌ ᠦᠭᠡᠢ ᠰᠢᠦ ᠃
1981.11.15 ᠬᠥᠬᠡᠬᠣᠲᠠ