ᠶᠡᠬᠡ ᠵᠠᠩᠵᠤᠨ ᠪ ᠬᠥᠰᠢᠶᠡ - ᠪ · ᠣᠰᠤᠷ ᠲᠡᠮᠲᠡᠭᠯᠡᠪᠡ Их жанжны хөшөө - Б · Осор тэмдэглэв
212ᠶᠡᠬᠡ ᠵᠠᠩᠵᠤᠨ ᠪ ᠬᠥᠰᠢᠶᠡ
— ᠮᠣᠩᠭᠣᠯ ᠶ᠋ᠢᠠᠷ ᠠᠶᠠᠯᠠᠭᠰᠠᠨ ᠲᠡᠮᠲᠡᠭᠯᠡᠯ
ᠠᠭᠤᠷ ᠦ᠋ᠨ ᠲᠡᠷᠬᠡᠨ ᠳ᠋ᠦ᠍ ᠰᠠᠭᠤᠭᠰᠠᠭᠠᠷ
ᠤᠷᠲᠤ ᠵᠠᠮ ᠊ᠢ ᠬᠥᠬᠡᠭᠡᠯᠡ ᠳ᠋ᠠ ᠂
ᠠᠭᠤᠯᠠ ᠤᠰᠤ ᠶ᠋ᠢ ᠭᠡᠲᠦᠯᠦᠭᠰᠡᠭᠡᠷ
ᠤᠯᠠᠭᠠᠨᠪᠠᠭᠠᠲᠤᠷ ᠲᠤ ᠬᠦᠷᠦᠯᠡ ᠃
ᠤᠰᠤ ᠨᠠᠷᠠ ᠨᠢ ᠲᠡᠩᠴᠡᠪᠡᠯ
ᠤᠷᠭᠤᠮᠠᠯ ᠰᠠᠶ᠋ᠢᠨ ᠳᠡᠯᠭᠡᠷᠡᠳᠡᠭ
ᠤᠯᠠᠭᠠᠨᠪᠠᠭᠠᠲᠤᠷ ᠊ᠢ ᠦᠵᠡᠬᠡᠳ ᠂
ᠤᠶᠠᠬᠠᠨ ᠰᠡᠤᠠᠬᠢᠯ ᠬᠥᠲᠡᠯᠦᠯᠡ ᠃
ᠪᠣᠷᠣᠭᠠᠨ ᠨᠠᠷᠠ ᠨᠢ ᠲᠡᠩᠴᠡᠪᠡᠯ
ᠪᠣᠲᠠᠰ ᠪᠦᠬᠦᠨ ᠳᠡᠯᠭᠡᠷᠡᠳᠡᠭ
ᠠᠪᠤᠷᠭᠤ ᠶᠡᠬᠡ ᠬᠥᠭᠵᠢᠯ ᠳ᠋ᠤᠨᠢ
ᠠᠶᠤᠤᠯᠢᠬᠠᠢ ᠲᠦᠬᠦᠷᠡᠩ ᠪᠠᠶᠠᠷᠯᠠᠯᠠ ᠃
ᠪᠤᠮᠠᠨ ᠵᠠᠩ ᠦ᠋ᠨ ᠥᠨᠲᠥᠷ
ᠪᠣᠭᠲᠠ ᠠᠭᠤᠯᠠ ᠨᠢ ᠰᠦᠮᠪᠦᠷᠯᠡᠵᠡᠢ ᠃
ᠪᠣᠰᠤᠬ᠋ᠠ ᠪᠡᠶᠡ ᠨᠢ ᠰᠡᠬᠦᠶ᠋ᠢᠭᠡᠳ
ᠪᠤᠭᠤᠷᠤᠯ ᠳᠦᠷᠢ ᠪᠡᠨ ᠭᠠᠶ᠋ᠢᠬᠠᠭᠤᠯᠵᠠᠢ ᠃
ᠪᠤᠲᠠᠯᠠᠵᠤ ᠤᠷᠭᠤᠭᠰᠠᠨ ᠵᠦᠢᠯ ᠦ᠋ᠨ ᠮᠣᠲᠣ
ᠦᠵᠦᠭᠦᠷ ᠨᠢ ᠲᠣᠣᠷᠯᠠᠭᠠᠳ ᠰᠠᠭᠰᠠᠶ᠋ᠢᠵᠠᠢ ᠃
ᠪᠤᠯᠠᠭ ᠱᠠᠩᠲᠠ ᠭᠣᠣᠯ ᠭᠣᠷᠣᠬᠠ
ᠪᠤᠷᠵᠠᠩ ᠦᠭᠡᠢ ᠲᠤᠨᠤᠷᠠᠵᠠᠢ ᠃
ᠪᠤᠵᠠᠭᠠᠢ ᠥᠨᠲᠥᠷ ᠨᠠᠷᠠᠰᠤᠨ ᠮᠣᠲᠣ
ᠥᠩᠭᠡ ᠨᠢ ᠨᠣᠭᠣᠭᠠᠨ ᠶ᠋ᠢᠠᠷ ᠪᠠᠭᠯᠠᠷᠠᠵᠠᠢ ᠃
ᠪᠤᠮᠪᠠᠭᠠᠷ ᠴᠠᠭᠠᠨ ᠬᠡᠷ ᠦ᠋ᠳ
ᠬᠣᠲᠠᠯᠠᠵᠤ ᠪᠠᠭᠤᠭᠠᠳ ᠡᠩᠨᠡᠷᠡᠵᠡᠢ ᠃
ᠤᠲᠤᠭᠠᠨ ᠰᠤᠭᠤᠨᠠᠭ ᠲᠠᠲᠠᠭᠤᠯᠲᠠᠭ
ᠵᠥᠭᠡᠬᠡᠪᠦᠷᠢ ᠶ᠋ᠢᠨ ᠮᠠᠰᠢᠨ ᠵᠥᠷᠢᠯᠲᠦᠵᠡᠢ ᠃
ᠠᠭᠤᠲᠠᠮ ᠵᠠᠮ ᠶ᠋ᠢᠠᠷ ᠵᠢᠷᠡᠯᠵᠡᠳᠡᠭ
ᠰᠠᠭᠤᠲᠠᠯ ᠦ᠋ᠨ ᠮᠠᠰᠢᠨ ᠬᠡᠯᠬᠢᠯᠲᠦᠵᠡᠢ ᠃
ᠤᠭᠤᠬᠢᠯᠠᠵᠤ ᠲᠦᠷᠭᠡᠨ ᠶᠠᠪᠤᠲᠠᠭ ᠠ᠋ᠴᠠ
ᠭᠠᠯᠲᠤ ᠳᠤᠭᠤᠢ ᠨᠢ ᠫᠠᠷᠴᠢᠬᠢᠨᠡᠵᠡᠢ ᠃
ᠤᠶᠠᠨ ᠵᠥᠬᠡᠯᠡᠨ ᠪᠥᠮᠪᠥᠯᠵᠡᠬᠦ ᠡᠴᠡ
ᠵᠣᠴᠢᠳ ᠦ᠋ᠨ ᠲᠡᠷᠭᠡ ᠰᠦᠯᠵᠢᠯᠲᠦᠵᠡᠢ ᠃
ᠤᠷᠲᠤ ᠵᠢᠯᠠᠬ᠋ᠠ ᠶ᠋ᠢᠨ ᠲᠠᠷᠢᠶᠠᠨ ᠳ᠋ᠦ᠍
ᠺᠣᠮᠪᠠᠶ᠋ᠢᠨ ᠮᠠᠰᠢᠨ ᠬᠦᠩᠭᠢᠨᠡᠵᠡᠢ ᠃
ᠠᠭᠤᠯᠠ ᠲᠡᠬᠡᠭᠦᠷ ᠡᠷᠬᠢᠯᠲᠦᠬᠦ ᠡᠴᠡ
ᠨᠢᠰᠳᠡᠭ ᠮᠠᠰᠢᠨ ᠳᠥᠩᠬᠢᠨᠡᠵᠡᠢ ᠃
ᠡᠷᠲᠡᠨᠢ ᠰᠤᠪᠤᠳ ᠦ᠋ᠨ ᠴᠠᠬᠢᠯᠭᠠᠨ ᠳ᠋ᠸᠩ
ᠠᠲᠠᠬᠡ ᠲᠠᠷᠲᠠᠭᠡ ᠳᠤᠯᠠᠯᠵᠠᠵᠤ ᠪᠠᠶ᠋ᠢᠨᠠ ᠃
ᠡᠷᠬᠢᠮ ᠴᠠᠭ ᠦ᠋ᠨ ᠪᠠᠶᠠᠷᠲᠤ ᠳᠠᠭᠤᠨ
ᠡᠭᠡᠰᠢᠭ ᠲᠣᠲᠣᠬᠠᠨ ᠬᠠᠩᠭᠢᠨᠠᠵᠤ ᠪᠠᠶ᠋ᠢᠨᠠ ᠃
ᠴᠠᠷᠲᠠᠵᠤ ᠬᠢᠭᠰᠡᠨ ᠵᠠᠰᠠᠮᠠᠯ ᠵᠠᠮ
ᠴᠠᠰᠢ ᠪᠠᠨ ᠠᠯᠤᠰ ᠲᠤ ᠵᠤᠷᠠᠶ᠋ᠢᠵᠤ ᠪᠠᠶ᠋ᠢᠨᠠ ᠃
ᠬᠠᠰ ᠴᠠᠭᠠᠨ ᠠᠰᠠᠷ ᠦ᠋ᠳ ᠨᠢ
ᠬᠠᠷᠠᠬᠤ ᠨᠢᠲᠦ ᠶ᠋ᠢ ᠭᠢᠯᠪᠠᠭᠤᠯᠵᠤ ᠪᠠᠶ᠋ᠢᠨᠠ ᠃
ᠠᠷᠢᠭᠤᠨ ᠲᠤᠤᠯᠠ ᠶ᠋ᠢᠨ ᠬᠥᠪᠡᠭᠡᠨ ᠳ᠋ᠦ᠍
ᠤᠯᠠᠭᠠᠨᠪᠠᠭᠠᠲᠤᠷ ᠰᠦᠨᠲᠡᠷᠯᠡᠵᠡᠢ ᠃
ᠠᠷᠠᠳ ᠦ᠋ᠨ ᠵᠢᠷᠭᠠᠯ ᠴᠠᠯᠭᠢᠯᠠᠭᠠᠳ
ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍ ᠳᠠᠭᠤᠷᠢᠰᠴᠠᠢ ᠃
ᠨᠠᠶ᠋ᠢᠵᠠ ᠮᠣᠩᠭᠣᠯ ᠤᠯᠤᠰ ᠦ᠋ᠨ
ᠨᠠᠷᠠᠨ ᠰᠠᠴᠤᠷᠠᠯᠲᠤ ᠨᠡᠶ᠋ᠢᠰᠯᠡᠯ ᠬᠣᠲᠠ ᠂
ᠡᠯᠢᠭᠡᠨ ᠬᠠᠶ᠋ᠢᠷᠠ ᠶ᠋ᠢ ᠲᠠᠲᠠᠭᠠᠳ
ᠡᠩ ᠦᠭᠡᠢ ᠪᠠᠶᠠᠷ ᠲᠦᠷᠦᠭᠦᠯᠵᠡᠢ ᠃
ᠠᠪᠤ ᠪᠠᠨ ᠪᠠᠶ᠋ᠢᠬᠤ ᠳ᠋ᠦ᠍ ᠪᠠᠵᠠᠭᠠᠭᠰᠠᠨ
ᠠᠷᠠᠯᠲᠤ ᠪᠠᠨ ᠶᠠᠭᠤᠨ ᠳ᠋ᠦ᠍ ᠭᠦᠭᠯᠨᠯᠡ ᠳ᠋ᠠ ᠂
ᠠᠬᠠ ᠳᠡᠭᠦᠦ ᠮᠣᠩᠭᠣᠯ ᠦ᠋ᠨ ᠲᠤᠬᠠᠢ ᠲᠠᠢ
ᠠᠶᠠᠯᠭᠤ ᠪᠠᠬᠠᠨ ᠡᠷᠭᠦᠶᠡ ᠳ᠋ᠠ ᠃
ᠡᠵᠢ ᠪᠡᠨ ᠪᠠᠶ᠋ᠢᠬᠤ ᠳ᠋ᠦ᠍ ᠪᠡᠯᠡᠳᠬᠡᠭᠰᠡᠨ
ᠡᠲᠡᠭᠡᠷ ᠶ᠋ᠢᠡᠨ ᠶᠠᠭᠤᠨ ᠳ᠋ᠦ᠍ ᠳᠠᠷᠤᠯᠠ ᠳ᠋ᠠ ᠂
ᠡᠷᠡᠯᠬᠡᠭ ᠮᠣᠩᠭᠣᠯ ᠦ᠋ᠨ ᠬᠥᠭᠵᠢᠯ ᠊ᠢ
ᠡᠪᠯᠨᠭᠦᠯᠵᠤ ᠵᠢᠭᠠᠬᠠᠨ ᠬᠣᠯᠪᠣᠶᠠ ᠳ᠋ᠠ ᠃
ᠳ᠋ᠠ ᠬᠦᠷᠢᠶᠡ ᠬᠡᠳ ᠶᠠᠷᠢᠪᠠᠯ
ᠨᠠᠰᠤᠲᠠᠳ ᠠᠨᠲᠠᠬᠤ ᠦᠭᠡᠢ ᠮᠡᠲᠡᠨᠡ ᠪᠠᠶ᠋ᠢᠬᠠ
ᠳᠠᠪᠠᠭᠤ ᠰᠠᠶ᠋ᠢᠬᠠᠨ ᠬᠥᠭᠵᠢᠯ ᠊ᠢ ᠨᠢ
ᠡᠯᠭᠦᠵᠦ ᠠᠪᠤᠭᠠᠳ ᠬᠡᠯᠡᠶᠡ ᠃
ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠬᠡᠪᠡᠯ
ᠤᠯᠤᠰ ᠦ᠋ᠳ ᠨᠠᠷᠢᠨ ᠮᠡᠲᠡᠨᠡ ᠪᠠᠶ᠋ᠢᠬᠠ
ᠤᠷᠠᠨ ᠬᠣᠭᠣᠷ ᠦ᠋ᠨ ᠠᠶᠠᠯᠭᠤ ᠪᠡᠷ
ᠤᠶᠠᠩᠭᠠᠯᠠᠵᠤ ᠵᠢᠭᠠᠬᠠᠨ ᠲᠠᠭᠤᠯᠠᠶᠡ ᠃
ᠬᠠᠷᠠᠭᠰᠠᠨ ᠦᠵᠡᠭᠰᠡᠨ ᠪᠦᠬᠦᠨ ᠊ᠢ ᠪᠡᠨ
ᠬᠠᠮᠤᠵᠤ ᠰᠢᠮᠡᠵᠦ ᠬᠡᠯᠡᠵᠦ ᠦᠭᠡᠢ ᠂
ᠬᠠᠲᠠᠨ ᠪᠠᠭᠠᠲᠤᠷ ᠦ᠋ᠨ ᠬᠥᠰᠢᠶᠡ ᠶ᠋ᠢ ᠨᠢ
ᠬᠠᠮᠤᠭ ᠦ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠮᠠᠭᠲᠠᠶᠡ ᠃
ᠰᠦᠷᠯᠢᠭ ᠬᠦᠴᠦᠲᠦ ᠤᠯᠤᠰ ᠦ᠋ᠨ ᠬᠢᠨᠢ
ᠪᠠᠲᠠᠷᠠᠯ ᠪᠦᠬᠦᠨ ᠊ᠢ ᠳᠤᠷᠠᠳᠬᠤ ᠦᠭᠡᠢ ᠂
ᠰᠦᠬᠡᠪᠠᠭᠠᠲᠤᠷ ᠦ᠋ᠨ ᠬᠥᠰᠢᠶᠡ ᠶ᠋ᠢ ᠨᠢ
ᠪᠠᠲᠠᠭᠲᠤ ᠰᠢᠯᠦᠭ ᠶ᠋ᠢᠡᠷ ᠮᠠᠭᠲᠠᠶᠡ ᠃
ᠰᠢᠪᠠᠭᠤᠨ ᠬᠣᠩᠰᠢᠶᠠᠷᠲᠤ ᠡᠭᠡᠲᠡᠨ ᠭᠣᠲᠣᠯ ᠊ᠢ
ᠲᠥᠷᠥᠭᠡ ᠳᠠᠭᠠᠭᠠᠳ ᠢᠰᠭᠦᠯᠦᠭᠰᠡᠨ
ᠴᠣᠭᠲᠤ ᠮᠣᠩᠭᠣᠯ ᠦ᠋ᠨ ᠲᠣᠷᠭᠠᠨ ᠲᠡᠷᠯᠢᠭ ᠊ᠢ
ᠬᠦᠲᠡᠷ ᠪᠡᠶᠡ ᠳ᠋ᠦ᠍ ᠡᠮᠦᠰᠴᠢᠭᠡᠭᠰᠡᠨ
ᠰᠢᠯᠲᠡᠲᠦ ᠲᠣᠷᠬ᠋ᠠ ᠳᠤᠷᠳᠤᠩ ᠪᠥᠰ ᠊ᠢ
ᠲᠤᠮᠲᠠ ᠪᠡᠶᠡ ᠳ᠋ᠦ᠍ ᠣᠷᠢᠶᠠᠴᠢᠬᠠᠭᠰᠠᠨ
ᠱ᠌ᠢᠷᠦ ᠶ᠋ᠢᠨ ᠣᠷᠣᠶ᠋ᠢᠲᠤ ᠭᠠᠩ ᠦ᠋ᠨ ᠮᠠᠯᠠᠭᠠᠢ ᠶ᠋ᠢ
ᠲᠡᠷᠢᠭᠦᠨ ᠳ᠋ᠦ᠍ ᠲᠠᠯᠪᠢᠭᠠᠳ ᠡᠮᠦᠰᠴᠢᠭᠡᠭᠰᠡᠨ
ᠰᠠᠮᠠᠭᠤᠨ ᠪ ᠳᠠᠷᠤᠯᠬ᠋ᠠ ᠬᠣᠷᠲᠤᠨ ᠫᠤᠤ
ᠰᠤᠭᠤᠨ ᠳᠣᠭᠤᠤᠷ ᠤᠨᠵᠢᠢᠬᠰᠠᠨ
ᠰᠠᠷᠠᠨ ᠭᠡᠷᠡᠯᠲᠦ ᠤᠷᠲᠤ ᠢᠯᠲᠦ
ᠲᠠᠰᠢᠶᠠ ᠳᠠᠭᠠᠭᠠᠳ ᠭᠢᠯᠠᠯᠵᠠᠭᠰᠠᠨ
ᠰᠤᠮᠤᠨ ᠲᠠᠶ᠋ᠢᠰᠠ ᠰᠤᠷ ᠦ᠋ᠨ ᠪᠥᠰᠨ
ᠲᠤᠮᠲᠠ ᠪᠡᠶᠡ ᠪᠡᠷ ᠣᠷᠢᠶᠠᠭᠰᠠᠨ
ᠰᠤᠨᠤᠮᠠ ᠵᠠᠯᠠᠭᠤ ᠪᠠᠭᠠᠲᠤᠷ ᠡᠷᠡ
ᠨᠢᠲᠦᠨ ᠳ᠋ᠦ᠍ ᠣᠨᠴᠠᠭᠠᠢ ᠬᠠᠷᠠᠭᠲᠠᠯᠠ ᠃
ᠰᠢᠷᠭᠠᠯ ᠵᠡᠭᠡᠷᠲᠡ ᠮᠣᠷᠢ
ᠰᠠᠯᠬᠢ ᠲᠠᠲᠠᠭᠠᠳ ᠳᠠᠪᠬᠢᠵᠤ ᠪᠠᠶ᠋ᠢᠬᠤ ᠰᠢᠭ᠋
ᠰᠢᠷᠠᠮᠤᠨ ᠠᠮᠠᠭᠠᠢ ᠴᠠᠭᠠᠨ ᠵᠤᠤᠵᠠᠢ
ᠰᠢᠲᠦᠨ ᠳ᠋ᠦ᠍ ᠬᠠᠷᠭᠤᠭᠠᠳ ᠲᠠᠴᠢᠭᠢᠨᠠᠵᠤ ᠪᠠᠶ᠋ᠢᠬᠤ ᠰᠢᠭ᠋
ᠴᠢᠲᠠᠯ ᠬᠦᠴᠦ ᠲᠡᠢ ᠰᠦᠬᠡᠪᠠᠭᠠᠲᠤᠷ
ᠴᠢᠩᠭᠠᠭᠠᠵᠤ ᠲᠠᠲᠠᠭᠠᠳ ᠲᠣᠭᠲᠣᠷᠴᠤ ᠪᠠᠶ᠋ᠢᠬᠤ ᠰᠢᠭ᠋
ᠴᠠᠪᠴᠢᠮᠠ ᠥᠨᠲᠥᠷ ᠠᠭᠤᠯᠠ ᠥᠭᠡᠲᠡ
ᠰᠤᠨᠲᠠᠯᠡ ᠳᠠᠪᠬᠢᠭᠠᠳ ᠭᠠᠷᠴᠤ ᠪᠠᠶ᠋ᠢᠬᠤ ᠰᠢᠭ᠋
ᠰᠤᠷ ᠦ᠋ᠨ ᠰᠠᠶ᠋ᠢᠬᠠᠨ ᠨᠣᠭᠲᠣ
ᠴᠢᠬᠢᠨ ᠪ ᠠᠷᠤ ᠪᠠᠷ ᠭᠣᠭᠴᠣᠭᠠᠷᠠᠵᠡᠢ ᠂
ᠰᠢᠬᠠᠮᠠᠯ ᠪᠦᠯᠡᠵᠡᠭ ᠰᠢᠷᠢᠮᠡᠯ ᠬᠠᠵᠠᠭᠠᠷ
ᠲᠡᠭᠦᠨ ᠪ ᠲᠡᠬᠡᠭᠦᠷ ᠭᠢᠯᠠᠯᠵᠠᠵᠠᠢ ᠃
ᠰᠢᠩᠬᠤᠨ ᠤᠯᠠᠭᠠᠨ ᠰᠠᠭᠠᠯᠲᠠ ᠶ᠋ᠢ
ᠰᠠᠭᠠᠯᠲᠤᠷᠬ᠋ᠠ ᠠ᠋ᠴᠠ ᠨᠢ ᠡᠯᠭᠦᠵᠡᠢ ᠂
ᠰᠢᠷᠠ ᠠᠯᠲᠠᠨ ᠥᠩᠭᠡᠲᠡᠢ ᠲᠣᠯᠢ
ᠲᠡᠭᠦᠨ ᠪ ᠳᠡᠭᠡᠷᠡ ᠨᠢ ᠬᠡᠷᠡᠯᠲᠦᠵᠡᠢ ᠃
ᠬᠥᠭᠡ ᠥᠩᠭᠡ ᠶ᠋ᠢᠨ ᠬᠥᠮᠥᠯᠲᠦᠷᠬᠡ
ᠬᠦᠵᠦᠭᠦᠦ ᠤᠷᠤᠭᠤ ᠨᠢ ᠬᠦᠷᠪᠡᠶ᠋ᠢᠵᠡᠢ ᠂
ᠬᠦᠷᠡᠩ ᠤᠯᠠᠭᠠᠨ ᠵᠠᠯᠠᠬ᠋ᠠ
ᠣᠮᠣᠷᠤ ᠲᠦᠭᠦᠷᠡᠩ ᠪᠤᠲᠠᠷᠠᠵᠡᠢ ᠃
ᠨᠠᠪᠴᠢᠨ ᠬᠤᠸᠠᠷ ᠲᠠᠢ ᠠᠯᠲᠠᠨ ᠬᠦᠯᠢᠮ
ᠵᠢᠭᠦᠷ ᠪᠣᠯᠤᠨ ᠲᠠᠩᠲᠠᠵᠤ ᠪᠠᠶ᠋ᠢᠨᠠ ᠂
ᠨᠠᠷᠠᠨ ᠰᠠᠷᠠᠨ ᠬᠣᠶᠠᠷ ᠲᠥᠷᠥᠭᠡ
ᠰᠠ ᠨᠢ ᠬᠠᠷᠭᠤᠭᠠᠳ ᠬᠠᠷᠴᠢᠭᠢᠨᠠᠵᠤ ᠪᠠᠶ᠋ᠢᠨᠠ ᠃
ᠨᠠᠢ᠍ᠮᠠᠨ ᠰᠠᠶ᠋ᠢᠬᠠᠨ ᠭᠠᠨᠵᠤᠬ᠋ᠠ ᠨᠢ
ᠯᠠᠪᠢᠷ ᠪᠣᠯᠤᠨ ᠬᠡᠶ᠋ᠢᠰᠴᠦ ᠪᠠᠶ᠋ᠢᠨᠠ ᠂
ᠨᠠᠭᠠᠨᠠ ᠴᠠᠭᠠᠨᠠ ᠠ᠋ᠴᠠ ᠨᠢ ᠬᠠᠷᠠᠬᠤᠯᠠᠷ
ᠨᠠᠷᠠᠨ ᠰᠠᠷᠠᠨ ᠬᠡᠷᠡᠯᠲᠦᠵᠦ ᠪᠠᠶ᠋ᠢᠬᠤ ᠰᠢᠭ᠋ ᠃
ᠦᠰᠦᠷᠦᠭᠡᠳ ᠭᠦᠶᠦᠬᠦ ᠵᠡᠭᠡᠷᠲᠡ ᠮᠣᠷᠢ
ᠡᠭᠦᠯᠡ ᠲᠠᠲᠠᠭᠠᠳ ᠨᠢᠰᠴᠦ ᠪᠠᠶ᠋ᠢᠨᠠ ᠂
ᠥᠨᠲᠥᠷ ᠵᠢᠯᠣᠭᠣ ᠶ᠋ᠢ ᠰᠤᠩᠭᠠᠭᠠᠳ
ᠠᠭᠤᠯᠠᠨ ᠲᠡᠬᠡᠭᠦᠷ ᠬᠠᠷᠠᠶ᠋ᠢᠵᠤ ᠪᠠᠶ᠋ᠢᠨᠠ ᠃
ᠭᠠᠩ ᠳᠦᠷᠪᠡᠨ ᠲᠤᠭᠤᠷᠠᠢ
ᠭᠠᠵᠠᠷ ᠴᠠᠪᠴᠢᠭᠠᠳ ᠨᠢᠵᠢᠭᠢᠨᠡᠵᠦ ᠪᠠᠶ᠋ᠢᠨᠠ ᠂
ᠭᠠᠷ ᠲᠤ ᠪᠠᠷᠢᠬᠰᠠᠨ ᠤᠷᠲᠤ ᠵᠢᠯᠣᠭᠣ
ᠭᠠᠷᠤᠲᠢ ᠶ᠋ᠢᠨ ᠳᠡᠯᠡᠪᠴᠢ ᠬᠥᠮᠥᠶ᠋ᠢᠵᠦ ᠪᠠᠶ᠋ᠢᠨᠠ ᠃
ᠭᠠᠶ᠋ᠢᠬᠠᠮᠰᠢᠬ ᠵᠠᠩᠵᠤᠨ ᠰᠦᠬᠡᠪᠠᠭᠠᠲᠤᠷ
ᠭᠠᠷ ᠡᠷᠭᠦᠭᠡᠳ ᠤᠷᠠᠶ᠋ᠢᠯᠠᠵᠤ ᠪᠠᠶ᠋ᠢᠨᠠ ᠂
ᠭᠠᠮᠰᠢᠬ ᠲᠠᠲᠠᠲᠠᠭ ᠭᠠᠶ᠋ᠢᠬᠠᠯ ᠦ᠋ᠳ ᠊ᠢ
ᠭᠠᠪᠠᠯᠠ ᠶ᠋ᠢ ᠨᠢ ᠴᠥᠮᠥᠯᠡᠭᠰᠡᠨ ᠨᠢ ᠢᠯᠡᠷᠬᠡᠢ ᠪᠠᠶ᠋ᠢᠨᠠ ᠃
ᠬᠥᠯᠥᠭᠯᠡᠵᠦ ᠤᠨᠤᠭᠰᠠᠨ ᠵᠡᠭᠡᠷᠲᠡ ᠮᠣᠷᠢ
ᠬᠦᠨᠲᠦᠷᠴᠤ ᠠᠪᠤᠭᠠᠳ ᠴᠠᠮᠨᠠᠵᠤ ᠪᠠᠶ᠋ᠢᠨᠠ ᠂
ᠬᠦᠴᠦᠲᠦ ᠵᠠᠩᠵᠤᠨ ᠰᠦᠬᠡᠪᠠᠭᠠᠲᠤᠷ
ᠬᠥᠨᠲᠡᠯᠡᠨ ᠰᠠᠭᠤᠭᠠᠳ ᠤᠷᠤᠭᠰᠢᠯᠠᠵᠤ ᠪᠠᠶ᠋ᠢᠨᠠ ᠃
ᠬᠥᠨᠥᠭᠡᠯ ᠶᠡᠬᠡᠲᠦ ᠬᠠᠷᠭᠢᠰ ᠲᠡᠶ᠋ᠢᠰᠦᠨ ᠊ᠢ
ᠬᠥᠷᠪᠡᠲᠡᠯᠡ ᠳᠠᠷᠤᠭᠰᠠᠨ ᠨᠢ ᠢᠯᠡᠷᠬᠡᠢ ᠪᠠᠶ᠋ᠢᠨᠠ ᠂
ᠬᠥᠪᠴᠢ ᠠᠭᠤᠲᠠᠮ ᠮᠣᠩᠭᠣᠯ ᠣᠷᠣᠨ ᠶ᠋ᠢᠠᠨ
ᠬᠥᠭᠵᠢᠯ ᠳ᠋ᠦ᠍ ᠳᠠᠯᠠᠯᠤᠭᠠᠳ ᠲᠠᠪᠰᠢᠵᠤ ᠪᠠᠶ᠋ᠢᠨᠠ ᠃
ᠤᠯᠠᠭᠠᠨᠪᠠᠭᠠᠲᠤᠷ ᠬᠤᠲᠠ ᠶ᠋ᠢᠨ
ᠠᠭᠤᠲᠠᠮ ᠶᠡᠬᠡ ᠲᠠᠯᠠᠪᠠᠢ ᠳ᠋ᠦ᠍
ᠤᠯᠤᠰ ᠦ᠋ᠨ ᠵᠠᠰᠠᠭ ᠦ᠋ᠨ ᠭᠠᠵᠠᠷ ᠦ᠋ᠨ
ᠤᠷᠲᠤ ᠰᠠᠶ᠋ᠢᠬᠠᠨ ᠪᠡᠶᠡ ᠳ᠋ᠦ᠍
ᠵᠤᠭᠠᠴᠠᠬᠤ ᠣᠯᠠᠨ ᠬᠥᠮᠦᠰ ᠦ᠋ᠨ
ᠲᠤᠩᠭᠠᠯᠠᠭ ᠨᠢᠲᠦᠨ ᠪ ᠬᠠᠷᠠᠭᠠᠨ ᠳ᠋ᠦ᠍
ᠵᠤᠯᠭᠠᠷᠠᠰᠢ ᠦᠭᠡᠢ ᠴᠡᠴᠡᠭ ᠦ᠋ᠳ ᠦ᠋ᠨ
ᠤᠷᠠᠨ ᠨᠠᠪᠴᠢᠯᠠᠬ᠋ᠠ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍
ᠤᠭᠠᠯᠵᠠ ᠳᠠᠭᠠᠯᠵᠨ ᠪᠡᠷ ᠴᠢᠮᠡᠭᠳᠡᠭᠰᠡᠨ
ᠤᠷᠠᠴᠤᠳ ᠲᠠᠷᠠᠭᠴᠤᠤᠨ ᠪᠦᠲᠦᠭᠡᠭᠰᠡᠨ
ᠤᠴᠢᠷ ᠶᠡᠬᠡᠲᠡᠢ ᠡᠨᠡ ᠬᠥᠰᠢᠶᠡ ᠶ᠋ᠢ
ᠤᠯᠤᠰ ᠲᠦᠮᠡᠨ ᠪᠢᠰᠢᠷᠡᠨᠡ ᠃
ᠰᠠᠷᠠ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠬᠠᠷᠠᠪᠠᠴᠤ
ᠰᠠᠴᠤᠷᠠᠵᠤ ᠪᠠᠶ᠋ᠢᠬᠤ ᠪᠠᠷ ᠪᠣᠰᠬᠠᠵᠠᠢ ᠂
ᠰᠠᠲᠤᠨ ᠲᠥᠷᠥᠯ ᠨᠢ ᠪᠠᠬᠠᠷᠬᠤ ᠪᠠᠷ
ᠦᠵᠡᠮᠵᠢᠲᠡᠢ ᠰᠠᠶ᠋ᠢᠬᠠᠨ ᠪᠣᠰᠬᠠᠵᠠᠢ ᠃
ᠠᠭᠤᠯᠠᠨ ᠲᠠᠯᠲᠠ ᠠ᠋ᠴᠠ ᠬᠠᠷᠠᠪᠠᠴᠤ
ᠰᠦᠨᠲᠡᠷᠯᠡᠵᠦ ᠪᠠᠶ᠋ᠢᠬᠤ ᠪᠠᠷ ᠪᠣᠰᠬᠠᠵᠠᠢ ᠂
ᠤᠰᠤᠨ ᠪ ᠠᠯᠤᠰ ᠠ᠋ᠴᠠ ᠬᠠᠷᠠᠪᠠᠴᠤ
ᠲᠤᠶᠠᠭᠠᠷᠠᠵᠤ ᠪᠠᠶ᠋ᠢᠬᠤ ᠪᠠᠷ ᠪᠣᠰᠬᠠᠵᠠᠢ ᠃
ᠪᠣᠭᠣᠯ ᠦ᠋ᠨ ᠬᠢᠨᠵᠢ ᠶ᠋ᠢ ᠲᠠᠰᠤᠯᠬᠤ ᠪᠠᠷ
ᠪᠣᠰᠴᠤ ᠵᠣᠭᠰᠣᠭᠰᠠᠨ ᠪᠠᠭᠠᠲᠤᠷ ᠭᠡᠨᠡ ᠂
ᠪᠣᠯᠲᠠᠭ ᠦᠭᠡᠢ ᠬᠠᠷᠭᠢᠰ ᠲᠡᠶ᠋ᠢᠰᠦᠨ ᠊ᠢ
ᠪᠣᠲᠠ ᠴᠣᠬᠢᠬᠰᠠᠨ ᠵᠠᠩᠵᠤᠨ ᠭᠡᠨᠡ ᠃
ᠠᠷᠢᠭᠤᠨ ᠰᠡᠤᠠᠬᠢᠯᠲᠦ ᠠᠷᠠᠳ ᠲᠠᠭᠠᠨ
ᠵᠢᠷᠦᠬᠡ ᠨᠢ ᠪᠣᠯᠤᠭᠰᠠᠨ ᠪᠠᠭᠠᠲᠤᠷ ᠭᠡᠨᠡ ᠂
ᠠᠯᠲᠠᠷᠲᠤ ᠮᠠᠷᠭᠡᠨ ᠯᠸᠨᠢᠨ ᠪ
ᠱᠠᠪᠢ ᠨᠢ ᠪᠣᠯᠤᠭᠰᠠᠨ ᠵᠠᠩᠵᠤᠨ ᠭᠡᠨᠡ ᠃
ᠬᠥᠭᠵᠢᠯ ᠵᠢᠷᠭᠠᠯ ᠦ᠋ᠨ ᠣᠷᠲᠣᠨ ᠶ᠋ᠢᠠᠨ
ᠮᠠᠨᠲᠤᠭᠤᠯᠵᠤ ᠪᠣᠰᠬᠠᠭᠰᠠᠨ ᠪᠠᠭᠠᠲᠤᠷ ᠭᠡᠨᠡ ᠂
ᠬᠥᠨᠥᠭᠡᠯ ᠵᠠᠨᠤᠯᠲᠤ ᠲᠡᠶ᠋ᠢᠰᠦᠨ ᠲᠡᠢ
ᠮᠠᠩᠯᠠᠢᠯᠠᠵᠤ ᠲᠡᠮᠡᠴᠡᠭᠰᠡᠨ ᠵᠠᠩᠵᠤᠨ ᠭᠡᠨᠡ ᠃
ᠡᠷᠬᠡ ᠴᠢᠯᠥᠭᠡᠨ ᠪ ᠲᠥᠯᠥᠭᠡ
ᠲᠠᠪᠬᠡᠷᠦᠨ ᠪᠣᠰᠤᠭᠰᠠᠨ ᠪᠠᠭᠠᠲᠤᠷ ᠭᠡᠨᠡ ᠂
ᠡᠷᠡᠯᠬᠡᠭ ᠵᠣᠷᠢᠬᠲᠤ ᠣᠯᠠᠨ ᠊ᠢ ᠪᠡᠨ
ᠲᠠᠶ᠋ᠢᠴᠢᠯᠠᠵᠤ ᠪᠣᠰᠬᠠᠭᠰᠠᠨ ᠵᠠᠩᠵᠤᠨ ᠭᠡᠨᠡ ᠃
ᠬᠣᠪᠢᠰᠬᠠᠯᠲᠤ ᠨᠠᠮ ᠦ᠋ᠨ ᠶ᠋ᠢᠠᠨ ᠲᠤᠭ ᠊ᠢ
ᠮᠠᠨᠲᠤᠭᠤᠯᠵᠤ ᠭᠠᠷᠤᠭᠰᠠᠨ ᠪᠠᠭᠠᠲᠤᠷ
ᠬᠣᠪᠢ ᠵᠠᠶᠠᠬ᠋ᠠ ᠪᠡᠨ ᠰᠢᠢᠳᠪᠦᠷᠢᠯᠡᠬᠦ ᠪᠡᠷ
ᠡᠷᠡᠯᠬᠡᠭ ᠲᠡᠮᠡᠴᠡᠭᠰᠡᠨ ᠵᠠᠩᠵᠤᠨ ᠭᠡᠨᠡ ᠃
ᠭᠠᠪᠢᠶᠠ ᠨᠡᠷᠡ ᠶᠢ ᠨᠢ ᠬᠡᠯᠡᠪᠡᠯ
ᠭᠠᠯᠠᠪ ᠳᠡᠯᠡᠬᠡᠢ ᠳ᠋ᠦ᠍ ᠠᠯᠳᠠᠷᠰᠢᠵᠠᠢ ᠂
ᠭᠠᠩ ᠵᠣᠷᠢᠭᠳᠤ ᠵᠠᠩᠵᠤᠨ ᠭᠡᠵᠦ
ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠳ᠋ᠦ᠍ ᠮᠠᠭᠲᠠᠭᠠᠯ ᠲᠡᠢ ᠃
ᠪᠣᠭᠳᠠ ᠠᠭᠤᠯᠠ ᠶᠢᠨ ᠨᠠᠷᠠᠰᠤ ᠰᠢᠭ᠋
ᠠᠯᠳᠠᠷ ᠨᠡᠷᠡ ᠨᠢ ᠮᠥᠩᠬᠡᠷᠡᠵᠡᠢ ᠂
ᠪᠤᠶ᠋ᠢᠷ ᠦ᠋ᠨ ᠲᠤᠩᠭᠠᠯᠠᠭ ᠤᠰᠤ ᠰᠢᠭ᠋
ᠠᠭᠤᠤ ᠵᠣᠷᠢᠯᠲᠠ ᠨᠢ ᠡᠩᠭᠢᠵᠢᠵᠡᠢ ᠃
ᠡᠷᠡᠯᠬᠡᠭ ᠪᠠᠭᠠᠲᠤᠷ ᠠᠷᠠᠳ ᠦ᠋ᠨ ᠶ᠋ᠢᠠᠨ
ᠵᠢᠷᠦᠬᠡᠨ ᠲᠣᠲᠣᠷᠡ ᠠᠮᠢᠯᠠᠵᠠᠢ ᠂
ᠣᠨ ᠵᠢᠯ ᠦ᠋ᠨ ᠤᠲᠠᠭᠠᠨ ᠳ᠋ᠦ᠍ ᠴᠦ᠍
ᠪᠠᠯᠠᠷᠠᠰᠢ ᠦᠭᠡᠢ ᠪᠡᠷ ᠮᠥᠩᠬᠡᠷᠡᠵᠡᠢ ᠃
ᠵᠠᠩᠵᠤᠨ ᠰᠦᠬᠡᠪᠠᠭᠠᠲᠤᠷ ᠦ᠋ᠨ ᠱᠠᠪᠢ ᠨᠠᠷ ᠮᠢᠨᠢ
ᠵᠢᠷᠭᠠᠯ ᠦ᠋ᠨ ᠣᠷᠲᠣᠨ ᠊ᠢ ᠪᠣᠰᠬᠠᠵᠠᠢ ᠂
ᠵᠠᠶᠠᠭᠠᠭᠰᠠᠨ ᠮᠣᠩᠭᠣᠯ ᠤᠯᠤᠰ ᠦ᠋ᠨ ᠶ᠋ᠢᠠᠨ
ᠵᠢᠪᠬᠤᠯᠠᠩ ᠰᠦᠷ ᠊ᠢ ᠪᠠᠲᠠᠷᠠᠭᠤᠯᠵᠠᠢ ᠃
ᠤᠤᠭᠤᠭᠰᠠᠨ ᠤᠰᠤ ᠮᠢᠨᠢ ᠣᠨᠲᠣᠣ ᠴᠦ᠍
ᠠᠷᠢᠭᠤᠨ ᠰᠠᠨᠠᠬ᠋ᠠ ᠨᠢᠭᠡᠲᠡᠢ ᠪᠢᠲᠡ ᠂
ᠤᠯᠤᠰ ᠮᠢᠨᠢ ᠲᠤᠰ ᠲᠠᠭᠠᠨ ᠴᠦ᠍
ᠠᠯᠤᠰ ᠦ᠋ᠨ ᠵᠣᠷᠢᠯᠲᠠ ᠨᠢᠭᠡᠲᠡᠢ ᠪᠢᠲᠡ ᠃
ᠡᠩᠬᠡ ᠰᠠᠶ᠋ᠢᠬᠠᠨ ᠣᠷᠣᠨ ᠪ ᠴᠢᠨᠢ
ᠬᠥᠭᠵᠢᠯ ᠊ᠢ ᠬᠠᠷᠠᠭᠠᠳ ᠪᠠᠶᠠᠷᠯᠠᠯᠠ ᠂
ᠡᠪ ᠬᠠᠮᠲᠤ ᠶ᠋ᠢᠨ ᠨᠡᠶ᠋ᠢᠭᠡᠮ ᠳ᠋ᠦ᠍
ᠲᠦᠷᠭᠡᠨ ᠣᠷᠣᠬᠤ ᠶ᠋ᠢ ᠴᠢᠨᠢ ᠢᠷᠦᠭᠡᠶᠡ !
( ᠪ · ᠣᠰᠤᠷ ᠲᠡᠮᠲᠡᠭᠯᠡᠪᠡ )
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠣᠶᠤᠨᠴᠢᠮᠡᠭ
ᠬᠢᠨᠠᠭᠴᠢ ᠪᠠᠭᠰᠢ ᠄ ᠣᠣᠬᠠᠭᠰᠣᠡ