ᠪᠡᠯᠭᠡᠲᠦ ᠴᠠᠰᠤ - ᠮ ᠂ ᠠᠰᠠᠷ Бэлгэт цас - М ᠂ Асар
278ᠪᠡᠯᠭᠡᠲᠦ ᠴᠠᠰᠤ
ᠡᠨᠡ ᠡᠳᠦᠷ ᠨᠢᠮᠠ ᠭᠠᠷᠠᠭ
ᠬᠤᠷᠴᠠ ᠤᠯᠠᠭᠠᠨ ᠥᠩᠭᠡ ᠪᠡᠷ ᠬᠤᠸᠠᠩᠯᠢ ᠳᠡᠭᠡᠷᠡ ᠳᠤᠷᠠᠢᠲᠠᠯᠠ ᠲᠡᠮᠳᠡᠭᠯᠡᠵᠦ ᠪᠣᠢ ᠃
ᠦᠳᠡ ᠡᠴᠡ ᠬᠣᠢᠰᠢ ᠴᠠᠰᠤ ᠣᠷᠣᠭᠠᠳ ᠵᠣᠭᠰᠣᠪᠠ ᠃
ᠣᠷᠣᠬᠤ ᠳ᠋ᠠᠭᠠᠨ᠂ ᠡᠷᠲᠡ ᠦᠭᠡᠢ ᠣᠷᠣᠢ ᠦᠭᠡᠢ ᠂ ᠶᠠᠭ ᠯᠠ ᠰᠠᠷᠠᠨ ᠳᠠᠭᠢᠨᠢ ᠮᠡᠳᠡᠵᠦ ᠪᠠᠢᠭᠠᠳ ᠬᠠᠰ ᠤᠨ ᠬᠡᠯᠲᠡᠰ ᠢᠶᠠᠨ ᠰᠠᠴᠤᠴᠢᠯᠠ ᠭᠡᠮᠡᠷ ᠴᠠᠭ ᠳᠡᠭᠡᠷᠡ ᠪᠡᠨ ᠣᠷᠣᠵᠠᠢ
ᠵᠣᠭᠰᠣᠬᠤ ᠳ᠋ᠠᠭᠠᠨ ᠂ ᠶᠡᠬᠡ ᠦᠭᠡᠢ ᠪᠠᠭᠠ ᠦᠭᠡᠢ ᠂ ᠡᠭᠡᠭᠡ ᠯᠡ ᠰᠠᠨᠰᠠᠷ ᠲᠡᠭᠷᠢ ᠬᠦᠯᠢᠶᠡᠵᠦ ᠪᠠᠢᠭᠠᠳ ᠬᠠᠢᠷᠠ ᠶ᠋ᠢᠨ ᠬᠠᠳᠠᠭ ᠢ᠋ᠶ᠋ᠠᠨ ᠳᠡᠯᠭᠡᠴᠢᠬᠡᠯᠡ ᠭᠡᠮᠡᠷ ᠬᠡᠮᠵᠢᠶᠡᠨ ᠳ᠋ᠡᠭᠡᠨ ᠵᠣᠭᠰᠣᠵᠠᠢ ᠃
ᠬᠠᠰ ᠬᠡᠯᠲᠡᠰ ᠂ ᠬᠠᠢᠷᠠ ᠶ᠋ᠢᠨ ᠬᠠᠳᠠᠭ ᠪᠤᠲᠠᠷᠠᠬᠤ ᠴᠠᠰᠤ ᠶ᠋ᠢ ᠤᠭᠲᠤᠭᠠᠳ᠂ ᠪᠠᠳᠠᠷᠠᠨ ᠳᠡᠯᠭᠡᠷᠡᠬᠦ ᠲᠡᠷᠢᠭᠦᠯᠡᠭᠴᠢ ᠴᠡᠴᠡᠭ ᠭᠣᠢᠳᠠ ᠰᠠᠢᠬᠠᠨ ᠮᠦᠰᠢᠶᠡᠪᠡ ᠃
ᠴᠠᠰᠤ ᠴᠡᠴᠡᠭ ᠬᠣᠶᠠᠷ ᠤ᠋ᠨ ᠬᠤᠷᠴᠠ ᠲᠣᠳᠣ ᠥᠩᠭᠡ ᠪᠣᠳᠣᠭ ᠬᠣᠣᠰᠯᠠᠨ ᠳᠤᠸᠠᠯᠠᠭᠠᠳ ᠂ ᠭᠤᠸᠠ ᠰᠠᠢᠬᠠᠨ ᠤ᠋ ᠬᠦᠷᠲᠡᠭᠡᠯ ᠪᠣᠯᠵᠤ ᠭᠢᠯᠠᠪᠠᠨᠠ᠃
ᠬᠠᠳᠠᠭ ᠲᠤ᠌ ᠬᠠᠳᠬᠤᠭᠰᠠᠨ ᠬᠤᠸᠠᠷ ᠯᠠ ᠪᠠᠢᠭᠠᠰᠠᠢ ᠂ ᠬᠠᠷᠢᠨ ᠪᠢᠲᠡᠭᠡᠢ ᠰᠦᠨ ᠳ᠋ᠦ᠍ ᠲᠤᠰᠤᠭᠰᠠᠨ ᠴᠠᠰᠤ ᠪᠣᠯᠤᠭᠠᠰᠠᠢ
ᠴᠠᠭᠠᠨ ᠨᠢ ᠬᠠᠳᠠᠭ ᠂ ᠤᠯᠠᠭᠠᠨ ᠨᠢ ᠬᠤᠸᠠᠷ ᠰᠢᠦ ᠳ᠋ᠠ᠃
ᠪᠣᠷᠣᠭᠠᠨ ᠪᠠ ᠴᠠᠰᠤ
1
ᠨᠠᠮᠤᠷ ᠡᠪᠦᠯ ᠦᠨ ᠵᠠᠪᠰᠠᠷ ᠂ ᠪᠣᠷᠣᠭᠠᠨ ᠲᠠᠢ ᠴᠠᠰᠤ ᠲᠠᠢ ᠃
ᠪᠣᠷᠣᠭᠠᠨ ᠨᠢ ᠣᠳᠬᠤ ᠴᠠᠭ ᠤ᠋ᠨ ᠤᠯᠠ ᠶ᠋ᠢ ᠳᠠᠷᠤᠵᠤ ᠂ ᠴᠠᠰᠤ ᠨᠢ ᠢᠷᠡᠬᠦ ᠡᠷᠡᠨ ᠦ᠌ ᠵᠠᠮ ᠢ᠋ ᠳᠡᠪᠢᠰᠦᠨᠡ ᠃
ᠪᠣᠷᠣᠭᠠᠨ ᠴᠠᠰᠤ ᠬᠣᠶᠠᠷ ᠪᠣᠯᠳᠠᠭ ᠰᠠᠨ ᠪᠣᠯ ᠲᠣᠭᠣᠰᠣ ᠶᠢᠷᠲᠢᠨᠴᠦ ᠳ᠋ᠦ᠍ ᠲᠤᠰᠠ ᠬᠢᠬᠦ ᠶ᠋ᠢ ᠵᠣᠷᠢᠪᠠ ᠃
2
ᠬᠥᠮᠦᠨ ᠦ᠌ ᠮᠥᠷ ᠶᠠᠭᠠᠬᠢᠭᠠᠳ ᠴᠢᠰᠤ ᠲᠠᠢ ᠨᠢᠯᠪᠤᠰᠤ ᠲᠠᠢ ᠪᠣᠢ ?
《 ᠨᠢᠭᠦᠯ ᠬᠢᠯᠢᠨᠴᠡ ᠠᠷᠢᠯᠵᠤ ᠂ ᠨᠢᠩᠵᠢᠨ ᠰᠡᠳᠬᠢᠯ ᠲᠦᠭᠡᠭ 》 ᠭᠡᠵᠦ ᠠᠰᠬᠠᠷᠠᠬᠤ ᠪᠣᠷᠣᠭᠠᠨ ᠦᠳᠡᠰᠢ ᠪᠡᠷ ᠣᠷᠣᠵᠤ ᠂ ᠬᠥᠮᠦᠨ ᠪᠠ ᠣᠷᠴᠢᠯᠠᠩ ᠢ᠋ ᠤᠬᠢᠶᠠᠨ ᠱᠠᠭᠢᠪᠠ ᠃
3
ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ ᠶᠠᠭᠠᠬᠢᠭᠠᠳ ᠠᠰᠬᠠᠨ ᠲᠠᠢ ᠮᠤᠰᠢᠭᠠᠢ ᠲᠠᠢ ᠪᠣᠢ ?
《ᠰᠢᠨᠡ ᠮᠥᠷ ᠨᠢ ᠳᠤᠷᠠᠢᠵᠤ ᠂ ᠰᠢᠯᠤᠭᠤᠨ ᠵᠠᠮ ᠨᠢ ᠵᠤᠷᠠᠢᠭ 》 ᠭᠡᠵᠦ ᠪᠤᠲᠠᠷᠠᠬᠤ ᠴᠠᠰᠤ ᠦᠷ ᠢ᠋ᠶ᠋ᠡᠷ ᠪᠠᠭᠤᠵᠤ ᠂ ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠶ᠋ᠢ ᠲᠡᠭᠰᠢᠯᠡᠨ ᠬᠤᠴᠠᠪᠠ ᠃
ᠴᠠᠰᠤᠨ ᠤ᠋ ᠴᠠᠢᠯᠭᠠᠨ ᠰᠠᠨᠠᠭᠠᠨ ᠳ᠋ᠤ᠌ ᠭᠬᠢᠷ ᠭᠡᠵᠦ ᠦᠭᠡᠢ ᠪᠢᠵᠡ ᠃
4
ᠬᠥᠯ ᠦ᠋ᠨ ᠤᠯᠠ ᠭᠡᠵᠦ ᠬᠠᠷᠢᠨ ᠲᠡᠭᠰᠢ ᠲᠡᠢ ᠬᠠᠵᠠᠭᠠᠢ ᠲᠠᠢ ᠠᠵᠢ ᠃
ᠥᠷᠯᠥᠭᠡ ᠡᠷᠲᠡ ᠪᠣᠯᠬᠤ ᠳ᠋ᠤ᠌ ᠠᠢᠯ ᠠᠢᠯ ᠠ᠋ᠴᠠ ᠭᠠᠳᠠᠭᠰᠢ ᠪᠠᠨ ᠠᠯᠬᠤᠭᠰᠠᠨ ᠮᠥᠷ ᠭᠠᠷᠪᠠ ᠃
ᠠᠰᠬᠠᠨ ᠨᠢ ᠠᠰᠬᠠᠨ ᠂ ᠮᠤᠰᠢᠭᠠᠢ ᠨᠢ ᠪᠠᠰᠠ ᠯᠠ ᠮᠤᠰᠢᠭᠠᠢ ᠃
ᠪᠣᠷᠣᠭᠠᠨ ᠭᠠᠢᠬᠠᠰᠬᠢᠵᠦ ᠂ ᠴᠠᠰᠤ ᠬᠢᠷᠳᠡᠬᠢᠪᠡ᠃
5
ᠪᠣᠷᠣᠭᠠᠨ ᠨᠢ ᠣᠳᠴᠤ ᠂ ᠴᠠᠰᠤ ᠨᠢ ᠡᠪᠦᠯᠵᠢᠪᠡ ᠃
ᠴᠠᠰᠤᠨ ᠤ᠋ ᠳᠡᠭᠡᠭᠦᠷ ᠂ ᠡᠪᠦᠯ ᠲᠤᠵᠢ ᠠᠰᠬᠠᠨ ᠮᠥᠷ ᠮᠤᠰᠢᠭᠠᠢ ᠮᠥᠷ ᠶᠠᠭᠰᠢᠲᠠᠯᠠ ᠵᠥᠷᠢᠯᠳᠦᠵᠦ ᠂ ᠴᠢᠰᠤ ᠲᠠᠢ ᠮᠥᠷ ᠂ ᠨᠢᠯᠪᠤᠰᠤ ᠲᠠᠢ ᠮᠥᠷ ᠪᠠᠰᠠ ᠯᠠ ᠦᠵᠡᠭᠳᠡᠨᠡ ᠃
ᠪᠦᠯᠢᠶᠡᠨ ᠴᠢᠰᠤ ᠤᠤ ? ᠬᠠᠯᠠᠭᠤᠨ ᠨᠢᠯᠪᠤᠰᠤ ᠤᠤ ?
6
ᠪᠦᠯᠢᠶᠡᠨ ᠪᠣᠯ ᠪᠠᠭᠠᠲᠤᠷ ᠤ᠋ᠨ ᠴᠢᠰᠤ ᠂ ᠬᠠᠯᠠᠭᠤᠨ ᠪᠣᠯ ᠪᠠᠶᠠᠷ ᠤ᠋ᠨ ᠨᠢᠯᠪᠤᠰᠤ ᠃
ᠪᠦᠯᠢᠶᠡᠨ ᠴᠢᠰᠤᠨ ᠳ᠋ᠤ᠌ ᠪᠣᠳᠣᠭᠳᠠᠵᠤ ᠂ ᠬᠠᠯᠠᠭᠤᠨ ᠨᠢᠯᠪᠤᠰᠤᠨ ᠳ᠋ᠤ᠌ ᠤᠬᠢᠶᠠᠭᠳᠠᠭᠰᠠᠨ ᠠ᠋ᠴᠠ ᠲᠡᠦᠬᠡ ᠶ᠋ᠢᠨ ᠤᠯᠠ ᠮᠥᠷ ᠰᠠᠶᠢ ᠡᠭᠦᠷᠢᠳᠡ ᠪᠠᠯᠠᠷᠠᠰᠢ ᠦᠭᠡᠢ ᠂ ᠥᠨᠢᠳᠡ ᠰᠠᠴᠤᠷᠠᠩᠭᠤᠢ ᠪᠠᠢᠳᠠᠭ ᠪᠢᠰᠢᠦ ?
ᠲᠡᠢᠮᠦ ᠡᠴᠡ᠂ ᠴᠢᠰᠤ ᠪᠠᠨ ᠪᠣᠣ ᠬᠠᠢᠷᠠᠯᠠ ! ᠲᠡᠭᠡᠪᠡᠴᠦ ᠂ ᠨᠢᠯᠪᠤᠰᠤ ᠪᠠᠨ ᠪᠤᠤ ᠤᠷᠤᠰᠬᠠ !
1981 . . 1 .11.1 — 8 ᠬᠥᠬᠡᠬᠣᠲᠠ