ᠴᠠᠰᠤᠨ ᠡᠴᠡ ᠰᠢᠯᠦᠭ - ᠮ ᠂ ᠠᠰᠠᠷ Цаснаас шүлэг - М ᠂ Асар
270ᠴᠠᠰᠤᠨ ᠡᠴᠡ ᠰᠢᠯᠦᠭ
ᠶᠡᠬᠡ ᠴᠠᠰᠤ
ᠡᠨᠡ ᠡᠪᠦᠯ ᠦᠨ ᠴᠠᠰᠤ ᠂ ᠡᠷᠲᠡ ᠮᠥᠷᠳᠡᠯᠡ ᠪᠡᠨ ᠶᠡᠬᠡ ᠴᠦ᠍ ᠣᠷᠣᠯᠠ᠃
ᠴᠣᠬᠣᠮ ᠂ ᠰᠢᠭᠤᠷᠭᠠ ᠲᠠᠯᠪᠢᠭᠰᠠᠨ ᠪᠣᠯ ᠪᠤᠷᠠᠮᠠᠷ ᠪᠠᠢᠭᠰᠠᠨ ᠶᠤᠮ ᠂ ᠲᠤᠯᠢᠶᠠ ᠭᠠᠷᠤᠭᠰᠠᠨ ᠪᠣᠯ ᠤᠶᠠᠷᠠᠮᠠᠷ ᠪᠠᠢᠭᠰᠠᠨ ᠶᠤᠮ᠃
ᠭᠡᠲᠡᠯᠡ ᠂ ᠠᠭᠤᠷ ᠠᠮᠢᠰᠬᠤᠯ ᠬᠦᠢᠲᠡᠷᠡᠭᠡᠳ ᠯᠡ ᠂ ᠬᠦᠢᠲᠡᠷᠡᠭᠡᠳ ᠯᠡ ᠂ ᠲᠠᠩᠳᠠ ᠲᠢᠭ᠋ ᠠ᠋ᠴᠠ ᠳᠣᠷᠣᠭᠰᠢ ᠁
ᠬᠥᠬᠡᠬᠣᠲᠠ ᠳ᠋ᠤ᠌ ᠪᠠᠢᠲᠠᠯᠠ ᠡᠢᠮᠦ ᠬᠦᠢᠲᠡᠨ ᠶᠦ᠍ᠮ ᠴᠢᠨᠢ ᠬᠥᠳᠡᠭᠡ ᠨᠤᠲᠤᠭ ᠲᠤ᠌ ᠴᠣᠬᠣᠮ ᠶᠠᠭᠠᠬᠢᠵᠤ ᠪᠠᠢᠭᠠ ᠪᠣᠯ?
ᠬᠥᠷ ᠴᠠᠰᠤ ᠡᠪᠦᠯᠵᠢᠬᠦ ᠯᠡ ᠲᠥᠯᠥᠪᠲᠡᠢ ᠂ ᠬᠥᠮᠦᠨ ᠮᠠᠯ ᠤ᠋ᠨ ᠵᠤᠳ ᠰᠢᠦ ᠳᠡ ᠃
ᠪᠠᠢᠭᠠᠯᠢ ᠶ᠋ᠢᠨ ᠳᠠᠪᠲᠠᠯᠲᠠ ᠬᠠᠢᠷᠠ ᠨᠠᠢᠷ ᠦᠭᠡᠢ ᠭᠡᠳᠡᠭ ᠪᠢᠯᠢᠤ?
ᠲᠡᠷᠡ ᠵᠢᠯ ᠦᠨ ᠶᠡᠬᠡ ᠴᠠᠰᠤ – ᠲᠡᠦᠬᠡᠨ ᠳ᠋ᠦ᠍ ᠦᠭᠡᠢ ᠲᠡᠮᠦᠷ ᠵᠤᠳ ᠢ᠋ ᠠᠷᠠᠢ ᠬᠥᠮᠦᠰ ᠮᠠᠷᠲᠠᠬᠤ ᠪᠣᠯᠤᠭᠠ ᠦᠭᠡᠢ ᠪᠢᠵᠡ?
ᠤᠰᠤ ᠮᠥᠰᠥᠨ ᠦ᠌ ᠵᠠᠭᠠᠭ
– ᠠᠪᠤᠭᠠᠢ ᠲᠠ ᠴᠠᠰᠤ ᠶ᠋ᠢ ᠶᠠᠮᠠᠷ ᠭᠡᠵᠦ ᠦᠵᠡᠨᠡ?
– ᠶᠠᠭᠤ ? ᠴᠠᠰᠤ ᠴᠢᠨᠢ ᠴᠠᠭᠠᠨ ᠯᠠ ᠪᠠᠢᠳᠠᠭ ᠪᠢᠵᠡ ᠳᠡ᠃
– ᠥᠩᠭᠡ ᠨᠢ ᠴᠠᠭᠠᠨ ᠢ᠋ ᠬᠡᠨ ᠴᠦ᠍ ᠮᠡᠳᠡᠨᠡ ᠰᠢᠦ ᠳᠡ᠃ ᠦᠨᠡᠨ ᠳ᠋ᠡᠭᠡᠨ ᠶᠠᠮᠠᠷ ᠢ᠋ ᠨᠢ ᠲᠠᠨ ᠠ᠋ᠴᠠ ᠪᠢ ᠠᠰᠠᠭᠤᠵᠤ ᠪᠠᠢᠨᠠ?
– ᠦᠨᠡᠨ ᠳ᠋ᠡᠭᠡᠨ ᠠ᠋?
– ᠤᠰᠤ ᠤᠤ ? ᠮᠥᠰᠥ ᠦᠦ?
– ᠤ᠌ᠤ – ᠤᠰᠤ ᠰᠢᠳᠡ᠃
– ᠭᠡᠬᠦ ᠳ᠋ᠦ᠍ ᠂ ᠬᠦᠢᠲᠡ ᠣᠷᠣᠪᠠᠯ ᠬᠥᠯᠳᠡᠴᠢᠭᠡᠳ ᠮᠥᠰᠥ ᠪᠣᠯᠳᠠᠭ ᠰᠢᠦ ᠃
– ᠠ – ᠲᠡᠢᠮᠦ ᠂ ᠮᠥᠰᠥ ᠃
– ᠤᠷᠢ ᠣᠷᠣᠪᠠᠯ ᠤᠶᠠᠷᠠᠴᠢᠬᠠᠭᠠᠳ ᠪᠠᠰᠠ ᠤᠰᠤ ᠪᠣᠯᠳᠠᠭ ᠰᠢᠦ
– ᠵᠠ – ᠲᠡᠭᠡᠪᠡᠯ ᠤᠰᠤ ᠠ᠋?
– ᠴᠣᠬᠣᠮ ᠤᠰᠤ ᠨᠢ ᠶᠦ᠍ᠮ ᠦᠦ ? ᠮᠥᠰᠥ ᠨᠢ ᠶᠤᠮ ᠦᠦ?
– ᠴᠣᠬᠣᠮ ᠤᠤ? ᠤᠰᠤ ᠴᠤ᠌ ᠲᠡᠷᠡ ᠂ ᠮᠥᠰᠥ ᠴᠦ᠍ ᠲᠡᠷᠡ ᠪᠠᠢᠯᠭᠦᠢ ᠃
– ᠦᠭᠡᠢ ᠂ ᠲᠠ ᠴᠢᠨᠢ ᠰᠠᠶᠢ ᠤᠰᠤ ᠴᠤ᠌ ᠪᠢᠰᠢ ᠂ ᠮᠥᠰᠥ ᠴᠦ᠍ ᠪᠢᠰᠢ ᠭᠡᠰᠡᠨ ᠪᠢᠰᠢ ᠪᠢᠯᠢᠤ?
– ᠲᠡᠢᠮᠦ ᠠ᠋?
– ᠲᠡᠭᠡᠭᠡᠳ ᠴᠠᠰᠤ ᠶ᠋ᠢ ᠴᠣᠬᠣᠮ ᠶᠠᠮᠠᠷ ᠭᠡᠪᠡᠯ ᠵᠣᠬᠢᠨᠠ ᠪᠣᠢ?
– ᠲᠡᠭᠡᠭᠡᠳ ᠦᠦ ? ᠴᠠᠰᠤ ᠶ᠋ᠢ ᠬᠠᠰᠢ ᠯᠠ ᠴᠠᠰᠤ ᠭᠡᠬᠦ ᠶᠤᠮ ᠪᠢᠵᠡ ᠃
– ᠠᠪᠤᠭᠠᠢ ᠲᠠ ᠮᠥᠨ ᠴᠤ᠌ ᠴᠠᠰᠤ ᠮᠥᠰᠥ ᠰᠢᠭ ᠤᠯᠠᠷᠢᠵᠤ ᠴᠢᠳᠠᠳᠠᠭ ᠬᠥᠮᠦᠨ ᠶᠤᠮ ᠪᠠᠢᠨᠠ ᠰᠢᠦ ᠃
– ᠠ? ᠴᠢ ᠁
– ᠵᠠ ! ᠪᠢ ᠮᠡᠳᠡᠴᠢᠭᠰᠡᠨ?
ᠵᠠᠷᠢᠮ ᠳ᠋ᠤᠨᠢ ᠵᠠᠪᠰᠢᠶᠠᠨ
– ᠡᠨᠡ ᠴᠠᠰᠤ ᠭᠡᠵᠢ ᠠ᠋ ! ᠡᠪᠦᠭᠡᠨ ᠠᠬᠠ ᠮᠢᠨᠢ ᠃
– ᠠ᠋ ᠳᠧ ᠂ ᠠᠮᠠᠷ ᠦᠬᠡᠷ ᠯᠡ ᠪᠠᠢᠬᠤ ᠰᠢᠦ ᠳᠡ ᠂ ᠠᠪᠤᠭᠠᠢ ᠮᠢᠨᠢ ᠃
– ᠶᠠᠭᠤ ᠭᠡᠵᠦ ᠳᠡ᠂ ᠮᠥᠷ ᠮᠥᠰᠬᠢᠵᠦ ᠠᠩ ᠬᠢᠬᠦ ᠳ᠋ᠦ᠍ ᠮᠥᠨ ᠴᠦ᠍ ᠨᠢᠭᠡ ᠣᠯᠳᠠᠰᠢ ᠦᠭᠡᠢ ᠰᠠᠢᠬᠠᠨ ᠵᠠᠪᠰᠢᠶᠠᠨ ᠪᠢᠰᠢᠦ ᠃
– ᠠᠪᠤᠭᠠᠢ ᠮᠢᠨᠢ ᠂ ᠴᠢ ᠳᠡ ᠂ ᠴᠠᠰᠤ ᠭᠡᠳᠡᠭ ᠴᠢᠨᠢ ᠵᠤᠳ ᠰᠢᠦ ᠳᠡ ᠃
– ᠢᠱᠢ ᠳ᠋ᠠ᠂ ᠡᠪᠦᠭᠡᠨ ᠠᠬᠠ ᠮᠢᠨᠢ ! ᠡᠨᠡ ᠰᠠᠢᠨ ᠵᠠᠪᠰᠢᠶᠠᠨ ᠢ᠋ ᠠᠯᠳᠠᠪᠠᠯ ᠮᠢᠬᠠ ᠴᠦ᠍ ᠦᠭᠡᠢ? ᠪᠠᠬᠠ ᠴᠦ᠍ ᠦᠭᠡᠢ ᠪᠣᠯᠤᠨᠠ ᠰᠢᠦ ᠃
– ᠠᠶ – ᠳ᠋ᠠ ᠂ ᠠᠪᠤᠭᠠᠢ ᠮᠢᠨᠢ ! ᠮᠠᠯ ᠢ᠋ᠶ᠋ᠠᠨ ᠬᠠᠶᠠᠭᠠᠳ ᠲᠠᠯᠠ ᠪᠠᠷ ᠬᠡᠰᠦᠬᠦ ᠭᠡᠭᠴᠢ ᠳᠡᠮᠡᠢ ᠯᠡ ᠳᠡᠮᠡᠢ
᠃
– ᠬᠠᠢ – ᠡᠪᠦᠭᠡᠨ ᠠᠬᠠ ᠮᠢᠨᠢ ! ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠨᠵᠤᠭᠠ ᠳᠦᠭᠦᠷᠡᠩ ᠤᠯᠠᠢᠲᠠᠢ ᠢᠷᠡᠬᠦ ᠶ᠋ᠢ ᠬᠠᠷᠠᠵᠤ ᠪᠠᠢ ᠃
– ᠠᠮᠠᠨ ᠳ᠋ᠤ᠌ ᠴᠢᠨᠢ ᠣᠷᠣᠲᠠᠯᠠ ᠪᠠᠰᠠ ᠠᠷᠪᠢᠨ ᠳᠠᠪᠠᠭᠠ ᠪᠣᠢ ᠰᠢᠦ ᠃
– ᠲᠡᠭᠡᠶᠡ ᠯᠡ ᠂ ᠡᠨᠡ ᠰᠠᠢᠬᠠᠨ ᠵᠠᠪᠰᠢᠶᠠᠨ ᠢ᠋ ᠁
– ᠵᠠ᠂ ᠵᠠ ! ᠴᠢ ᠥᠪᠡᠰᠦᠪᠡᠨ ᠮᠡᠳᠡ ᠳ᠋ᠠ
– ᠁