ᠠᠳᠤᠭᠤᠴᠢᠨ ᠪᠦᠷᠭᠦᠳ - ᠮ ᠂ ᠠᠰᠠᠷ Адуучин бүргэд - М ᠂ Асар
281ᠠᠳᠤᠭᠤᠴᠢᠨ ᠪᠦᠷᠭᠦᠳ
ᠮ ᠂ ᠠᠰᠠᠷ
ᠵᠡᠷᠭᠡᠴᠡᠨ ᠪᠠᠭᠤᠭᠰᠠᠨ ᠠᠢᠯ ᠤ᠋ᠳ ᠤ᠋ᠨ ᠪᠠᠷᠠᠭᠤᠨ ᠵᠠᠬᠠ ᠶ᠋ᠢᠨ ᠭᠡᠷ ᠡᠴᠡ ᠬᠠᠨᠴᠤᠢ ᠪᠠᠨ ᠲᠣᠬᠣᠢ ᠳ᠋ᠠᠭᠠᠨ ᠬᠦᠷᠲᠡᠯᠡ ᠰᠢᠮᠠᠯᠠᠭᠰᠠᠨ ᠬᠥᠷᠥᠰᠥᠯᠢᠭ ᠬᠠᠷᠠ ᠬᠦᠦ ᠭᠠᠷᠴᠤ ᠢᠷᠡᠭᠡᠳ ᠂ ᠬᠠᠲᠠᠪᠴᠢᠨ ᠤ᠋ ᠪᠠᠷᠠᠭᠤᠨᠲᠠᠢ ᠠ᠋ᠴᠠ ᠭᠣᠵᠣᠭᠣᠷ ᠪᠦᠭᠦᠷᠭᠡ ᠲᠡᠢ ᠤᠵᠢᠷᠭᠠᠨ ᠡᠮᠡᠭᠡᠯ ᠊ᠢ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠠᠪᠴᠤ ᠂ ᠬᠠᠨᠠ ᠲᠦᠰᠢᠭᠦᠯᠦᠭᠰᠡᠨ ᠭᠤᠢᠪᠡᠷ ᠪᠡᠬᠢ ᠲᠠᠲᠠᠭᠠᠷᠢ ᠲᠠᠢ ᠂ ᠭᠤᠰᠢᠯᠵᠢᠮᠠ ᠰᠢᠯᠤᠭᠤᠨ ᠴᠡᠭᠡᠵᠢ ᠲᠡᠢ ᠬᠤᠯᠤᠰᠤᠨ ᠤᠷᠭᠠ ᠶ᠋ᠢ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠰᠢᠭᠦᠷᠡᠨ ᠂ ᠤᠶᠠᠭᠠ ᠲᠣᠭᠣᠷᠢᠨ ᠰᠣᠷᠲᠣᠯᠵᠠᠭᠰᠠᠨ ᠰᠤᠭᠤ ᠰᠠᠢᠬᠠᠨ ᠬᠤᠯᠤᠰᠤᠨ ᠰᠢᠷᠭᠠ ᠶ᠋ᠢ ᠴᠢᠭᠯᠡᠵᠦ ᠂ ᠥᠷᠭᠡᠨ ᠲᠡᠭᠰᠢ ᠮᠥᠷᠥ ᠪᠡᠨ ᠬᠡᠯᠪᠡᠯᠵᠡᠭᠦᠯᠦᠨ ᠂ ᠠᠯᠲᠠ ᠳᠡᠯᠢᠮ ᠢ᠋ᠶ᠋ᠡᠷ ᠠᠯᠬᠤᠯᠠᠨᠠ ᠃
ᠨᠣᠭᠣᠭᠠᠨ ᠳᠤᠷᠳᠤᠩ ᠪᠦᠰᠡ ᠪᠡᠷ ᠬᠣᠷᠮᠣᠢ ᠶ᠋ᠢ ᠨᠢ ᠡᠪᠦᠳᠦᠭ ᠲᠤᠯᠲᠠᠯᠠ ᠠᠭᠰᠠᠨ ᠬᠥᠭᠡᠷᠦᠭᠦᠯᠦᠭᠰᠡᠨ ᠴᠡᠩᠬᠡᠷ ᠴᠢᠰᠴᠦ ᠲᠡᠷᠯᠢᠭ ᠦ᠋ᠨ ᠭᠡᠭᠡᠪᠲᠦᠷ ᠥᠩᠭᠡ ᠨᠢ ᠴᠢᠮᠡᠳ ᠦ᠋ᠨ ᠬᠦᠳᠡᠷ ᠪᠢᠷᠠᠯᠢᠭ ᠪᠡᠶᠡ ᠭᠠᠳᠠᠷ ᠲᠠᠢ ᠠᠷᠠᠢ ᠲᠡᠩᠴᠡᠮᠡ ᠦᠭᠡᠢ ᠰᠠᠨᠠᠭᠳᠠᠪᠠᠴᠤ ᠂ ᠨᠣᠭᠣᠭᠠᠨ ᠭᠦᠮ ᠢ᠋ᠶ᠋ᠡᠷ ᠴᠢᠮᠬᠢᠨ ᠬᠠᠪᠴᠢᠶᠠᠷᠢᠯᠠᠭᠰᠠᠨ ᠰᠡᠪᠬᠢᠨ ᠭᠤᠲᠤᠯ ᠤ᠋ᠨ ᠢ᠋ᠶ᠋ᠠᠨ ᠲᠦᠷᠡᠢ ᠡᠴᠡ ᠮᠠᠨᠤᠬᠤ ᠶ᠋ᠢᠨ ᠰᠣᠷᠣᠭᠤᠯ ᠴᠤᠬᠤᠢᠯᠭᠠᠨ ᠂ ᠨᠠᠢ᠍ᠮᠠᠨ ᠥᠨᠴᠥᠭᠲᠡᠢ ᠬᠦᠷᠡᠩ ᠮᠠᠯᠠᠭᠠᠢ ᠶ᠋ᠢ ᠪᠠᠷᠠᠭᠤᠨ ᠬᠥᠮᠥᠰᠬᠡ ᠤᠷᠤᠭᠤ ᠪᠠᠨ ᠢᠪ ᠪᠠᠭᠤᠲᠠᠯᠠ ᠬᠠᠵᠠᠭᠠᠢ ᠳᠠᠷᠤᠵᠤ ᠂ ᠲᠡᠭᠦᠨ ᠦ᠌ ᠳᠣᠭᠤᠤᠷ ᠬᠠᠷᠠ ᠴᠠᠭᠠᠨ ᠨᠢ ᠬᠣᠣᠰᠯᠠᠭᠰᠠᠨ ᠳᠤᠷᠠᠨ ᠬᠣᠶᠠᠷ ᠨᠢᠳᠦ ᠶ᠋ᠢ ᠡᠷᠪᠡᠭᠡᠨᠡᠭᠦᠯᠦᠨ ᠬᠠᠷᠠᠬᠤ ᠨᠢ ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠳᠡᠭᠵᠢᠨ ᠪᠠᠢᠳᠠᠯ ᠢ᠋ ᠬᠠᠷᠠᠭᠤᠯᠵᠠᠢ᠃
ᠬᠤᠰᠤᠨ ᠤᠷᠭᠠ ᠪᠠᠨ ᠲᠤᠯᠵᠤ ᠂ ᠬᠤᠯᠤᠰᠤᠨ ᠰᠢᠷᠭᠠ ᠳ᠋ᠠᠭᠠᠨ ᠮᠣᠷᠳᠠᠨ ᠂ ᠲᠠᠰᠢᠶᠠᠯᠳᠤᠵᠤ ᠰᠠᠭᠤᠭᠠᠳ ᠪᠠᠢᠨ ᠪᠠᠢᠨ ᠢᠰᠬᠡᠷᠴᠦ ᠂ ᠬᠠᠶᠠ ᠬᠠᠶᠠ ᠳᠠᠭᠤᠯᠠᠨ ᠂ ᠠᠭᠲᠠ ᠮᠣᠷᠢᠨ ᠤ᠋ ᠰᠠᠨᠠᠭᠠᠨ ᠲᠠᠪᠠ ᠪᠠᠷ ᠠᠯᠬᠤᠭᠤᠯᠤᠭᠰᠠᠭᠠᠷ ᠡᠮᠦᠨᠡ ᠵᠦᠭ ᠲᠦ᠍ ᠣᠳᠤᠨᠠ᠃
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠨᠢ ᠴᠢᠬᠢ ᠰᠣᠯᠪᠢᠨ ᠰᠡᠩᠬᠡᠯᠵᠡᠵᠦ ᠂ ᠬᠤᠰᠤᠨ ᠤᠷᠭᠠ ᠶ᠋ᠢᠨ ᠬᠢᠨᠢ ᠦᠵᠦᠭᠦᠷ ᠰᠠᠵᠢᠯᠠᠭᠠ ᠲᠠᠭᠠᠷᠠᠨ ᠨᠠᠬᠢᠯᠵᠠᠨᠠ ᠃
ᠴᠢᠮᠡᠳ ᠂ ᠴᠡᠴᠡᠭᠲᠦ ᠲᠠᠯᠠ ᠶ᠋ᠢᠨ ᠳᠤᠮᠳᠠᠭᠤᠷ ᠴᠢᠩᠭᠢᠨᠠᠨ ᠵᠢᠩᠭᠢᠨᠡᠲᠡᠯᠡ ᠢᠰᠬᠡᠷᠦᠭᠰᠡᠭᠡᠷ ᠠᠳᠤᠭᠤᠨ ᠤ᠋ ᠪᠠᠨ ᠳᠡᠷᠭᠡᠳᠡ ᠬᠦᠷᠴᠦ ᠂ ᠨᠠᠭᠠᠭᠤᠷ ᠴᠠᠭᠠᠭᠤᠷ ᠨᠢ ᠬᠡᠳᠦ ᠡᠷᠭᠢᠨ ᠂ ᠨᠠᠮ ᠥᠨᠳᠥᠷ ᠬᠡᠳᠦᠨᠲᠡ ᠬᠠᠰᠬᠢᠷᠴᠤ ᠂ ᠠᠳᠤᠭᠤ ᠪᠠᠨ ᠰᠢᠬᠠᠵᠤ ᠲᠠᠯᠠ ᠶᠢᠨ ᠬᠣᠲᠣᠭᠣᠷ ᠲᠤ᠌ ᠣᠷᠣᠭᠤᠯᠤᠨᠠ ᠃ ᠠᠭᠰᠤᠮ ᠰᠢᠷᠭᠠ ᠮᠣᠷᠢ ᠪᠠᠨ ᠲᠡᠭᠦᠨ ᠦ᠌ ᠨᠠᠭᠠᠨᠠ ᠴᠢᠳᠥᠷᠯᠡᠵᠦ ᠂ ᠠᠳᠤᠭᠤᠨ ᠤ᠋ ᠵᠣᠭᠰᠣᠭᠠᠯ ᠤ᠋ᠨ ᠬᠣᠢᠨᠠᠬᠠᠨ ᠵᠦᠯᠭᠡᠨ ᠳ᠋ᠦ᠍ ᠬᠣᠷᠮᠣᠢ ᠪᠠᠨ ᠳᠡᠪᠢᠰᠴᠦ ᠵᠠᠪᠢᠯᠠᠨ ᠰᠠᠭᠤᠭᠠᠳ ᠂ ᠤᠷᠭᠠ ᠪᠠᠨ ᠲᠠᠲᠠᠵᠤ ᠂ ᠬᠤᠢᠪᠢ ᠪᠠᠨ ᠡᠷᠴᠢᠮᠯᠡᠬᠦ ᠶ᠋ᠢᠨ ᠵᠠᠭᠤᠷᠠ ᠠᠳᠤᠭᠤᠨ ᠵᠦᠭ ᠢ᠋ᠶ᠋ᠡᠨ ᠪᠠᠢᠨ ᠳᠠᠬᠢᠨ ᠨᠢᠳᠦ ᠬᠠᠶᠠᠨᠠ ᠃
ᠦᠳᠡᠰᠢ ᠶ᠋ᠢᠨ ᠰᠡᠷᠢᠭᠦᠨ ᠦ᠌ ᠠᠳᠤᠭᠤ ᠂ ᠵᠠᠷᠢᠮ ᠨᠢ ᠬᠠᠷᠢᠯᠴᠠᠨ ᠴᠢᠮᠬᠢᠯᠡᠵᠦ ᠵᠠᠷᠢᠮ ᠨᠢ ᠵᠥᠭᠡᠯᠡᠨ ᠭᠠᠵᠠᠷ ᠢ᠋ ᠡᠷᠢᠵᠦ ᠬᠡᠳᠦ ᠳᠠᠪᠠᠲᠠᠯᠠ ᠬᠥᠷᠪᠡᠨ ᠂ ᠴᠢᠯᠡᠭᠡ ᠪᠡᠨ ᠭᠠᠷᠭᠠᠨ ᠲᠠᠭᠠᠯᠠᠮᠵᠢᠲᠠᠢᠬᠠᠨ ᠰᠤᠨᠢᠶᠠᠭᠠᠳ ᠂ ᠰᠣᠷᠭᠣᠭ ᠨᠣᠭᠣᠭᠠᠨ ᠤ᠋ ᠰᠤᠷ ᠢ᠋ ᠰᠢᠮᠡᠲᠡᠢᠬᠡᠨ ᠬᠠᠵᠠᠯᠠᠨᠠ ᠃ ᠭᠠᠭᠴᠠᠬᠦ ᠤᠨᠠᠭᠠ ᠰᠠᠷᠪᠠᠭᠠ ᠨᠤᠭᠤᠳ ᠨᠣᠴᠣᠯᠳᠤᠨ ᠨᠤᠤᠯᠤᠯᠳᠤᠨ ᠴᠣᠪᠬᠣᠴᠢᠨ ᠪᠣᠰᠴᠤ ᠂ ᠨᠡᠰᠢ ᠴᠠᠰᠢ ᠳᠠᠪᠬᠢᠯᠳᠤᠨ ᠲᠣᠭᠯᠠᠭᠠᠳ ᠠᠮᠤᠷ ᠪᠠᠢᠬᠤ ᠦᠭᠡᠢ ᠃ ᠴᠢᠮᠡᠳ ᠤᠨ ᠪᠣᠢ ᠳ᠋ᠤ᠌ ᠠᠳᠤᠭᠤ ᠨᠢ ᠲᠦᠰᠢᠭ ᠲᠡᠢ ᠪᠣᠯᠤᠨ ᠨᠠᠮ ᠵᠢᠮ ᠬᠥᠯᠯᠡᠨ ᠲᠣᠭᠲᠠᠵᠤ ᠂ ᠴᠢᠮᠡᠳ ᠴᠦ᠍ ᠬᠤᠯᠤᠰᠤᠨ ᠰᠢᠷᠭᠠ ᠳ᠋ᠠᠭᠠᠨ ᠪᠠᠷᠳᠠᠮ ᠢᠲᠡᠭᠡᠵᠦ ᠂ ᠠᠳᠤᠭᠤ ᠪᠠᠨ ᠰᠡᠳᠬᠢᠯ ᠲᠠᠯᠪᠢᠭᠤᠨ ᠮᠠᠨᠠᠵᠤ ᠰᠠᠭᠤᠨᠠ ᠃
ᠬᠣᠲᠣᠭᠣᠷ ᠳᠦᠭᠦᠷᠡᠩ ᠠᠳᠤᠭᠤ ᠨᠢ ᠢᠨᠴᠠᠭᠯᠠᠨ ᠲᠤᠷᠭᠢᠯᠠᠨ ᠢᠳᠡᠰᠢᠯᠡᠬᠦ ᠳ᠋ᠦ᠍ ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠨᠢ ᠬᠡᠳᠦ ᠴᠢᠮᠬᠢᠯᠡᠭᠡᠳ ᠠᠳᠤᠭᠤᠨ ᠲᠡᠰᠢ ᠲᠡᠭᠡᠨᠡ ᠃
ᠰᠡᠪᠢᠯᠵᠡᠭᠰᠡᠨ ᠰᠠᠯᠬᠢ ᠰᠢᠷᠦᠭᠦᠰᠴᠦ ᠂ ᠰᠥᠨᠢ ᠶ᠋ᠢᠨ ᠠᠮᠢᠰᠬᠤᠯ ᠵᠢᠭᠢᠭᠦᠰᠦᠨᠡ ᠃ ᠡᠭᠦᠯᠡᠨ ᠲᠣᠯᠣᠭᠠᠢ ᠥᠭᠰᠥᠵᠦ ᠂ ᠥᠪᠴᠢ ᠡᠩᠨᠡᠷᠡᠨ ᠨᠡᠲᠦᠢᠭᠡᠳ ᠂ ᠬᠣᠵᠢᠳ ᠤ᠋ᠨ ᠰᠠᠷᠠᠨ ᠣᠳᠣᠨ ᠲᠡᠳᠦᠢ ᠪᠦᠳᠡᠭᠢᠷᠡᠵᠦ ᠂ ᠬᠣᠯᠠᠬᠢ ᠮᠡᠴᠢᠳ ᠣᠷᠣ ᠴᠤ᠌ ᠦᠭᠡᠢ ᠪᠦᠷᠬᠦᠢᠯᠡ ᠃
ᠠᠳᠤᠭᠤᠨ ᠰᠦᠷᠦᠭ ᠳᠡᠮᠡᠢ ᠯᠡ ᠲᠡᠨᠳᠡ ᠪᠠᠭᠯᠠᠷᠠᠨ ᠢᠳᠡᠰᠢᠯᠡᠵᠦ ᠂ ᠠᠳᠤᠭᠤᠴᠢᠨ ᠡᠷᠡ ᠲᠩᠷᠢ ᠶ᠋ᠢᠨ ᠪᠠᠢᠳᠠᠯ ᠢ᠋ ᠰᠢᠨᠵᠢᠨᠡ ᠃
ᠠᠶᠤᠩᠭᠠ ᠶ᠋ᠢᠨ ᠳᠠᠭᠤᠨ ᠠᠯᠤᠰ ᠲᠡᠷᠲᠡᠭᠡᠡᠴᠡ ᠦᠯᠦ ᠮᠡᠳᠡᠭᠳᠡᠮᠡ ᠳᠤᠭᠤᠯᠳᠠᠵᠤ ᠂ ᠴᠠᠬᠢᠰ ᠬᠢᠬᠦ ᠴᠠᠭᠠᠨ ᠭᠡᠷᠡᠯ ᠪᠠᠢᠨ ᠪᠠᠢᠰᠬᠢᠭᠠᠳ ᠵᠤᠷᠪᠤᠰᠯᠠᠨᠠ ᠃ ᠤᠰᠤᠨ ᠬᠠᠷᠠ ᠡᠭᠦᠯᠡ ᠤᠯᠠᠮ ᠠᠴᠠ ᠡᠭᠡᠳᠡᠷᠡᠨ ᠳᠠᠪᠬᠤᠴᠠᠵᠤ ᠂ ᠠᠶᠤᠩᠭᠠ ᠶ᠋ᠢᠨ ᠳᠠᠭᠤᠨ ᠨᠡᠩ ᠨᠠᠭᠠᠰᠢᠯᠠᠨ ᠣᠢᠷᠠᠲᠤᠭᠰᠠᠭᠠᠷ ᠠᠪᠠᠷ ᠳᠡᠪᠡᠷ ᠬᠤᠷᠠ ᠶ᠋ᠢᠨ ᠳᠤᠰᠤᠯ ᠪᠠᠭᠤᠨᠠ ᠃ ᠴᠢᠮᠡᠳ ᠬᠡᠳᠦᠢᠨ ᠪᠣᠰᠴᠤ ᠴᠢᠳᠥᠷᠯᠡᠭᠰᠡᠨ ᠮᠣᠷᠢ ᠪᠠᠨ ᠪᠠᠷᠢᠲᠠᠯᠠ ᠂ ᠴᠠᠬᠢᠯᠭᠠᠨ ᠬᠡᠳᠦ ᠭᠢᠯᠪᠠᠵᠤ ᠠᠶᠤᠩᠭᠠ ᠶ᠋ᠢᠨ ᠳᠠᠭᠤᠨ ᠦᠷᠭᠦᠯᠵᠢᠯᠡᠯᠡ ᠃
ᠳᠤᠭᠤᠢᠯᠠᠨ ᠳᠡᠪᠬᠡᠴᠡᠬᠦ ᠬᠤᠯᠤᠰᠤᠨ ᠰᠢᠷᠭᠠ ᠪᠡᠶᠡ ᠶ᠋ᠢ ᠨᠢ ᠨᠠᠭᠠᠯᠳᠤᠨ ᠡᠷᠭᠢᠯᠳᠦᠭᠡᠳ ᠂ ᠲᠤᠷᠪᠢ ᠲᠠᠢ ᠡᠷᠡ ᠴᠢᠮᠡᠳ ᠣᠯᠣᠩ ᠢ᠋ ᠨᠢ ᠳᠠᠩᠭᠢᠨᠠᠲᠠᠯᠠ ᠲᠠᠲᠠᠨᠠ ᠃ ᠲᠣᠭᠰᠢᠨ ᠠᠶᠤᠩᠭᠠ ᠨᠢᠵᠢᠭᠢᠨᠡᠵᠦ ᠂ ᠳᠠᠭᠤᠲᠤ ᠮᠥᠨᠳᠥᠷ ᠴᠢᠳᠬᠤᠯᠠᠬᠤ ᠳ᠋ᠤ᠌ ᠂ ᠲᠣᠭᠲᠠᠭᠰᠠᠨ ᠠᠳᠤᠭᠤ ᠬᠥᠯ ᠠᠯᠳᠠᠵᠤ ᠂ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠬᠢᠯᠡᠨ ᠬᠣᠱᠤᠤᠷᠠᠪᠠ ᠃ ᠴᠢᠮᠡᠳ ᠂ ᠬᠤᠯᠤᠰᠤᠨ ᠰᠢᠷᠭᠠ ᠶ᠋ᠢ ᠬᠠᠷᠠᠢᠯᠭᠠᠵᠤ ᠂ ᠨᠢᠳᠦ ᠴᠢᠴᠢᠮᠡ ᠬᠠᠷᠠᠩᠭᠤᠢ ᠶ᠋ᠢ ᠨᠠᠰᠢ ᠴᠠᠰᠢ ᠵᠦᠰᠦᠨ ᠂ ᠵᠡᠭᠦᠨ ᠢ᠋ ᠬᠤᠮᠢᠵᠤ ᠪᠠᠷᠠᠭᠤᠨ ᠢ᠋ ᠬᠠᠰᠢᠪᠠᠴᠤ ᠤᠨᠠᠭᠠ ᠳᠠᠭᠠ ᠦᠦᠷᠰᠡᠵᠦ ᠤᠷᠤᠭᠰᠢ ᠬᠣᠢᠰᠢ ᠳᠠᠪᠬᠢᠯᠳᠤᠭᠠᠳ ᠠᠳᠤᠭᠤ ᠶᠡᠷᠦ ᠨᠢ ᠲᠣᠭᠲᠠᠭᠤᠷᠢ ᠦᠭᠡᠢ ᠃
ᠠᠭᠠᠷ ᠤ᠋ᠨ ᠴᠡᠭᠡᠯ ᠳ᠋ᠦ᠍ ᠠᠶᠤᠩᠭᠠ ᠶ᠋ᠢᠨ ᠳᠠᠭᠤᠨ ᠲᠦᠷᠵᠢᠭᠢᠨᠡᠵᠦ ᠂ ᠠᠲᠠᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠠᠳᠤᠭᠤᠨ ᠳᠥᠪᠥᠷᠭᠡ ᠫᠡᠷᠴᠢᠭᠢᠨᠡᠨᠡ ᠃
ᠬᠦᠢᠲᠡᠨ ᠪᠣᠷᠣᠭᠠᠨ ᠬᠦᠢ ᠬᠦᠢ ᠴᠢᠩᠭᠠᠷᠠᠵᠤ ᠂ ᠭᠡᠷᠡᠯ ᠭᠢᠯᠪᠠᠭᠠ ᠭᠡᠨᠡᠳᠲᠡ ᠭᠡᠨᠡᠳᠲᠡ ᠴᠠᠬᠢᠯᠬᠤ ᠳ᠋ᠤ᠌ ᠴᠢᠮᠡᠳ ᠤᠨ ᠪᠡᠶᠡ ᠵᠢᠷᠢᠰ ᠵᠢᠷᠢᠰ ᠳᠠᠭᠵᠢᠵᠤ ᠬᠤᠢᠬᠠ ᠶ᠋ᠢᠨ ᠦᠰᠦ ᠨᠢ ᠠᠷᠵᠢᠰ ᠠᠷᠵᠢᠰ ᠪᠣᠰᠤᠨᠠ ᠃ ᠲᠡᠭᠡᠪᠡᠴᠦ ᠴᠢᠮᠡᠳ ᠂ ᠠᠶᠤᠩᠭᠠ ᠠᠴᠠ ᠰᠢᠷᠭᠢᠬᠦ ᠨᠢ ᠳᠤᠲᠠᠭᠤ ᠂ ᠠᠳᠤᠭᠤ ᠪᠠᠨ ᠪᠣᠳᠣᠬᠤ ᠨᠢ ᠢᠯᠡᠭᠦᠦ ᠂ ᠪᠦᠯᠦᠭ ᠪᠦᠯᠦᠭ ᠪᠥᠭᠡᠮᠨᠡᠷᠡᠵᠦ ᠂ ᠬᠡᠰᠡᠭ ᠬᠡᠰᠡᠭ ᠤᠷᠤᠭᠤᠳᠠᠬᠤ ᠠᠳᠤᠭᠤ ᠪᠠᠨ ᠪᠤᠲᠠᠷᠠᠭᠠᠬᠤ ᠦᠭᠡᠢ ᠶ᠋ᠢ ᠤᠷᠤᠯᠳᠤᠵᠤ ᠂ 《 ᠪᠢ ᠪᠠᠢᠪᠠᠯ ᠠᠳᠤᠭᠤ ᠮᠡᠨᠳᠦ 》 ᠭᠡᠵᠦ ᠲᠠᠰᠤ ᠪᠣᠳᠣᠨ ᠬᠥᠮᠥᠭᠡᠢ ᠪᠡᠨ ᠵᠠᠭᠤᠭᠠᠳ ᠴᠢᠳᠠᠯ ᠮᠡᠳᠡᠨ ᠬᠤᠯᠤᠰᠤᠨ ᠰᠢᠷᠭᠠ ᠶᠢ ᠨᠢᠰᠬᠡᠨᠡ ᠃ ᠠᠶᠤᠩᠭᠠ ᠨᠢᠵᠢᠭᠢᠨᠡᠬᠦ ᠪᠦᠷᠢ ᠠᠳᠤᠭᠤ ᠪᠤᠲᠠᠷᠠᠨ ᠲᠠᠵᠢᠭᠢᠨᠠᠵᠤ ᠂ ᠠᠳᠤᠭᠤᠴᠢᠨ ᠤ᠋ ᠬᠠᠰᠬᠢᠷᠬᠤ ᠶ᠋ᠢᠨ ᠲᠡᠳᠦᠢ ᠳᠠᠬᠢᠭᠠᠳ ᠵᠢᠭᠠᠬᠠᠨ ᠲᠣᠭᠲᠠᠨᠠ ᠃
ᠪᠠᠷᠠᠭᠠᠨ ᠡᠭᠦᠯᠡᠰ ᠤᠨ ᠴᠠᠭᠠᠨᠠ ᠠᠴᠠ ᠡᠷᠴᠢᠲᠦ ᠭᠢᠯᠪᠡᠭᠡᠨ ᠳᠤᠯᠠᠰ ᠳᠤᠯᠠᠰ ᠴᠠᠬᠢᠯᠵᠤ ᠂ ᠪᠤᠵᠢᠭᠢᠨᠠᠨ ᠨᠠᠳᠬᠤᠬᠤ ᠠᠳᠤᠭᠤᠨ ᠤ᠋ ᠲᠤᠭᠤᠷᠠᠢ ᠡᠴᠡ ᠴᠠᠬᠢᠭᠤᠷ ᠤ᠋ᠨ ᠣᠴᠢ ᠭᠢᠯᠠᠰ ᠭᠢᠯᠠᠰ ᠪᠠᠳᠠᠷᠠᠨᠠ᠃ ᠴᠠᠬᠢᠯᠭᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠬᠠᠪᠢ ᠣᠢᠷᠠ ᠶ᠋ᠢᠨ ᠦᠵᠡᠭᠳᠡᠯ ᠤᠨ ᠨᠢᠭᠡ ᠦᠶᠡ ᠭᠡᠷᠡᠯᠲᠦᠨ ᠰᠦᠮᠡᠯᠵᠡᠵᠦ ᠂ ᠨᠢᠭᠡ ᠦᠶᠡ ᠬᠠᠷᠠᠩᠭᠤᠢᠯᠠᠨ ᠥᠩᠭᠡᠷᠡᠬᠦ ᠳ᠋ᠦ᠍ ᠦᠷᠭᠦᠭᠰᠡᠨ ᠠᠳᠤᠭᠤᠨ ᠤ᠋ ᠰᠣᠴᠢᠭᠰᠠᠨ ᠨᠢᠲᠦᠨᠡᠴᠡ ᠨᠣᠭᠣᠭᠠᠨ ᠂ ᠤᠯᠠᠭᠠᠨ ᠂ ᠬᠥᠬᠡ ᠂ ᠰᠢᠷᠠ ᠁ ᠡᠯᠳᠡᠪ ᠥᠩᠭᠡ ᠡᠷᠢᠶᠡᠨ ᠮᠡᠷᠢᠶᠡᠨ ᠢ᠋ᠶ᠋ᠡᠷ ᠰᠣᠯᠣᠩᠭᠠᠷᠠᠬᠤ ᠨᠢ ᠫᠠᠳ ᠬᠠᠷᠠ ᠰᠥᠨᠢ ᠶ᠋ᠢᠨ ᠰᠣᠬᠣᠷ ᠲᠤ᠌ ᠰᠣᠨᠢᠨ ᠵᠢᠭ᠍ᠲᠡᠢ ᠬᠠᠷᠠᠭᠳᠠᠬᠤ ᠠᠵᠢ ᠃
ᠴᠢᠮᠡᠳ ᠨᠡᠪᠲᠡᠷᠡᠲᠡᠯᠡ ᠨᠣᠷᠤᠭᠳᠠᠭᠰᠠᠨ ᠢ᠋ᠶ᠋ᠠᠨ ᠬᠠᠢᠬᠤᠷᠤᠯ ᠦᠭᠡᠢ ᠨᠢᠭᠡ ᠯᠡ ᠠᠮᠢ ᠪᠠᠷ ᠨᠡᠢᠲᠠ ᠶᠢᠨ ᠢ᠋ᠶ᠋ᠠᠨ ᠬᠥᠷᠥᠩᠭᠡ ᠶ᠋ᠢ ᠬᠠᠮᠠᠭᠠᠯᠠᠨᠠ ᠃
ᠠᠶᠤᠩᠭᠠ ᠶ᠋ᠢᠨ ᠳᠠᠭᠤᠨ ᠲᠠᠰᠤᠷᠠᠭᠠ ᠦᠭᠡᠢ ᠦᠷᠭᠦᠯᠵᠢᠯᠡᠵᠦ ᠂ ᠠᠭᠠᠭ ᠲᠠᠢ ᠪᠣᠷᠣᠭᠠ ᠵᠣᠭᠰᠣᠭᠠ ᠦᠭᠡᠢ ᠴᠢᠳᠬᠤᠨ ᠂ ᠠᠳᠤᠭᠤᠨ ᠰᠦᠷᠦᠭ ᠲᠣᠷᠣᠭᠠ ᠤᠷᠤᠭᠤᠳᠠᠭᠰᠠᠭᠠᠷ ᠁
ᠠᠷᠤ ᠳ᠋ᠤ᠌ ᠬᠠᠶᠠᠭᠳᠠᠭᠰᠠᠨ ᠤᠨᠠᠭᠠ ᠲᠠᠢ ᠭᠡᠭᠦᠳ ᠢ᠋ ᠠᠷᠠᠢ ᠴᠠᠷᠠᠢ ᠶᠡᠬᠡ ᠰᠦᠷᠦᠭ ᠲᠦ᠍ ᠨᠡᠢᠯᠡᠭᠦᠯᠲᠡᠯᠡ ᠂ ᠠᠯᠤᠰ ᠠᠴᠠ ᠠᠳᠤᠭᠤᠨ ᠤ᠋ ᠦᠦᠷᠰᠡᠬᠦ ᠴᠢᠮᠡᠭᠡ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠴᠢᠮᠡᠳ ᠤᠨ ᠵᠢᠷᠦᠬᠡ ᠶ᠋ᠢ ᠳᠣᠭᠳᠣᠯᠵᠠᠲᠠᠯᠠ ᠬᠠᠩᠭᠢᠨᠠᠨᠠ ᠃ ᠪᠣᠷᠣᠭᠠᠨ ᠤ᠋ ᠴᠢᠪᠬᠠᠳᠠᠯ ᠳ᠋ᠤ᠌ ᠴᠢᠮᠡᠳ ᠦ᠋ᠨ ᠴᠢᠷᠠᠢ ᠨᠢ ᠵᠢᠮᠵᠢᠭᠢᠨᠡᠵᠦ ᠂ ᠴᠢᠬᠢ ᠨᠢ ᠮᠢᠨᠴᠦᠭᠦᠷᠡᠭᠡᠳ ᠪᠦᠬᠦ ᠪᠡᠶᠡ ᠨᠢ ᠭᠣᠣᠯ ᠳ᠋ᠠᠭᠠᠨ ᠣᠷᠣᠲᠠᠯᠠ ᠵᠢᠬᠡᠭᠦᠰᠦᠨᠡ᠃ ᠭᠡᠪᠡᠴᠦ ᠲᠡᠷᠡ ᠂ ᠠᠳᠤᠭᠤᠨ ᠤ᠋ ᠪᠠᠨ ᠦᠦᠷᠰᠡᠬᠦ ᠳᠠᠭᠤᠨ ᠢ᠋ ᠰᠣᠨᠣᠰᠬᠤ ᠪᠦᠷᠢ ᠠᠶᠤᠩᠭᠠ ᠪᠣᠷᠣᠭᠠᠨ ᠢ᠋ ᠠᠯᠢ ᠬᠡᠳᠦᠢᠨ ᠮᠠᠷᠲᠠᠵᠤ ᠂ ᠳᠠᠷᠤᠵᠤ ᠪᠦᠳᠦᠷᠢᠵᠦ ᠣᠢᠴᠢᠬᠤ ᠶ᠋ᠢ ᠪᠣᠳᠣᠯ ᠦᠭᠡᠢ ᠵᠢᠯᠣᠭᠣ ᠰᠤᠩᠭᠠᠨ ᠥᠨᠳᠡᠢᠨᠡ ᠃ ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠨᠢ ᠴᠦ᠍ ᠳᠠᠮ ᠲᠣᠮ ᠭᠢᠰᠬᠢᠬᠦ ᠶ᠋ᠢ ᠮᠠᠲᠠᠯ ᠦᠭᠡᠢ ᠵᠢᠯᠣᠭᠣ ᠳ᠋ᠠᠭᠠᠨ ᠳᠠᠪᠬᠢᠨᠠ ᠃ ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢᠨ ᠳᠤᠮᠳᠠᠭᠤᠷ ᠂ ᠬᠡᠰᠡᠭ ᠲᠡᠭᠡᠨ ᠭᠠᠭᠴᠠ ᠬᠠᠷᠠ ᠰᠡᠭᠦᠳᠡᠷ ᠪᠦᠷᠭᠦᠳ ᠰᠢᠭ ᠪᠠᠷᠠ ᠰᠤᠷᠠᠭ ᠦᠭᠡᠢ ᠬᠠᠯᠢᠨ ᠣᠳᠴᠤ ᠂ ᠤᠳᠠᠵᠤ ᠲᠦᠳᠡᠯ ᠦᠭᠡᠢ ᠠᠯᠢ ᠵᠦᠭ ᠡᠴᠡ ᠴᠦ᠍ ᠮᠠᠭᠠᠳ ᠮᠥᠨ ᠪᠦᠷᠭᠦᠳ ᠰᠢᠭ ᠱᠤᠤᠭᠢᠨ ᠢᠷᠡᠬᠦ ᠪᠥᠭᠡᠳ ᠬᠡᠰᠡᠭ ᠲᠡᠭᠡᠨ ᠣᠯᠠᠭᠤᠯᠠ ᠪᠣᠯᠤᠭᠠᠳ ᠪᠦᠷᠦᠭ ᠪᠠᠷᠤᠭ ᠰᠡᠭᠦᠳᠡᠭᠡᠨᠡᠨ ᠢᠷᠡᠨᠡ ᠃
ᠴᠢᠮᠡᠳ ᠂ ᠬᠡᠰᠡᠭ ᠠᠳᠤᠭᠤ ᠪᠠᠨ ᠳᠥᠩᠭᠡᠵᠢ ᠨᠡᠬᠡᠨ ᠭᠦᠢᠴᠡᠵᠦ ᠂ ᠡᠮᠦᠨᠡᠭᠦᠷ ᠨᠢ ᠬᠡᠷᠦᠵᠦ ᠠᠮᠠᠳᠠᠨ ᠡᠷᠭᠢᠭᠦᠯᠦᠭᠡᠳ ᠠᠳᠤᠭᠤ ᠤᠷᠤᠭᠤ ᠲᠠᠭᠤᠲᠠᠯᠠ ᠂ ᠠᠶᠤᠩᠭᠠᠲᠤ ᠪᠣᠷᠣᠭᠠᠨ ᠲᠦᠵᠢᠭᠢᠨᠡᠨ ᠨᠦᠵᠢᠭᠢᠨᠡᠭᠰᠡᠭᠡᠷ ᠠᠯᠤᠰ ᠲᠡᠷᠲᠡᠭᠡ ᠳ᠋ᠦ᠍ ᠰᠢᠯᠵᠢᠵᠦ ᠂ ᠡᠷᠪᠡᠭᠡᠷ ᠰᠡᠷᠪᠡᠭᠡᠷ ᠡᠭᠦᠯᠡᠰ ᠡᠪᠬᠡᠷᠦᠨ ᠱᠤᠩᠭᠤᠷᠠᠭᠰᠠᠭᠠᠷ ᠡᠮᠦᠨᠡᠲᠦ ᠳᠠᠯᠠᠢ ᠳ᠋ᠤ᠌ ᠵᠢᠪᠪᠦᠪᠡ ᠃
ᠳᠥᠩᠭᠡᠨ ᠳᠠᠩᠭᠠᠨ ᠲᠣᠭᠲᠠᠵᠤ ᠪᠠᠢᠭᠰᠠᠨ ᠬᠣᠵᠢᠳ ᠤ᠋ᠨ ᠰᠠᠷᠠᠨ ᠴᠦ᠍ ᠳᠠᠯᠳᠠ ᠣᠷᠣᠵᠤ ᠦᠷ ᠮᠠᠩᠬᠠᠢᠲᠠᠯᠠ ᠴᠠᠢᠪᠠ ᠁
ᠬᠤᠷᠠ ᠶ᠋ᠢᠨ ᠳᠠᠷᠠᠭᠠᠬᠢ ᠭᠠᠯ ᠬᠦᠷᠳᠦᠨ ᠨᠠᠷᠠᠨ ᠬᠤᠷᠴᠠ ᠲᠤᠶᠠᠭᠠ ᠪᠠᠨ ᠰᠠᠴᠤᠷᠠᠭᠤᠯᠤᠨ ᠮᠠᠨᠳᠤᠬᠤ ᠳ᠋ᠤ᠌ ᠴᠡᠯᠭᠡᠷ ᠲᠠᠯᠠ ᠶ᠋ᠢᠨ ᠡᠪᠡᠰᠦᠨ ᠦ᠌ ᠦᠵᠦᠭᠦᠷ ᠲᠦ᠍ ᠰᠢᠭᠦᠳᠡᠷᠢ ᠶ᠋ᠢᠨ ᠪᠥᠮᠪᠥᠯᠢᠭ ᠪᠣᠯᠣᠷ ᠰᠢᠯ ᠮᠡᠲᠦ ᠮᠡᠯᠲᠡᠭᠡᠨᠡᠵᠦ ᠂ ᠴᠡᠴᠡᠷᠡᠨ ᠵᠣᠭᠰᠣᠬᠤ ᠠᠳᠤᠭᠤᠨ ᠤ᠋ ᠦᠰᠦ ᠪᠤᠯᠠᠭᠠ ᠶ᠋ᠢᠨ ᠰᠤᠷ ᠰᠢᠭ᠋ ᠭᠢᠯᠲᠠᠭᠠᠨᠠᠨᠠ ᠃
ᠴᠢᠮᠡᠳ ᠤᠨ ᠨᠢᠭᠤᠷ ᠴᠢᠷᠠᠢ ᠨᠢ ᠰᠢᠷᠦᠭᠦᠨ ᠮᠥᠨᠳᠥᠷ ᠲᠦ᠍ ᠴᠣᠬᠢᠭᠳᠠᠭᠠᠳ ᠬᠥᠬᠡᠷᠡᠨ ᠪᠣᠷᠣᠯᠠᠵᠤ ᠂ ᠪᠦᠬᠦ ᠪᠡᠶᠡ ᠨᠢ ᠲᠣᠭᠲᠠᠨ ᠶᠠᠳᠠᠵᠤ ᠂ ᠣᠪᠣᠯᠵᠠᠪᠠᠴᠤ ᠂ ᠠᠳᠤᠭᠤ ᠪᠠᠨ ᠠᠯᠳᠠᠯ ᠦᠭᠡᠢ ᠮᠡᠨᠳᠦ ᠮᠠᠨᠠᠭᠰᠠᠨ ᠳ᠋ᠠᠭᠠᠨ ᠬᠣᠩᠬᠣᠢᠨ ᠰᠠᠭᠤᠭᠰᠠᠨ ᠬᠣᠶᠠᠷ ᠨᠢᠳᠦᠨ ᠡᠴᠡ ᠨᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠣᠮᠣᠭᠲᠤ ᠭᠡᠷᠡᠯ ᠭᠢᠯᠠᠯᠵᠠᠵᠤ ᠂ ᠬᠥᠬᠡᠷᠡᠨ ᠬᠠᠪᠤᠩᠲᠠᠭᠰᠠᠨ ᠵᠤᠵᠠᠭᠠᠨ ᠤᠷᠤᠭᠤᠯ ᠤᠨ ᠢ᠋ᠶ᠋ᠠᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠯᠠᠪᠠᠢ ᠴᠠᠭᠠᠨ ᠰᠢᠳᠦ ᠪᠡᠨ ᠢᠷᠡᠰᠬᠢᠯᠭᠡᠨ ᠂ ᠮᠠᠨᠳᠤᠬᠤ ᠨᠠᠷᠠᠨ ᠢ᠋ ᠤᠭᠲᠤᠵᠤ ᠮᠠᠩᠨᠠᠢ ᠲᠡᠨᠢᠭᠡᠷ ᠢᠨᠢᠶᠡᠮᠰᠦᠭᠯᠡᠨᠡ ᠃
ᠴᠢᠮᠡᠳ ᠤᠨᠤᠭᠰᠠᠨ ᠮᠣᠷᠢᠨ ᠤ᠋ ᠪᠠᠨ ᠣᠯᠣᠩ ᠢ᠋ ᠴᠢᠩᠭᠠᠯᠠᠵᠤ ᠂ ᠤᠷᠭᠠᠨ ᠬᠤᠢᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠤᠰᠤ ᠶ᠋ᠢ ᠰᠢᠪᠲᠤᠷᠠᠭᠠᠳ ᠠᠳᠤᠭᠤᠨ ᠤ᠋ ᠳᠤᠮᠳᠠᠭᠤᠷ ᠴᠣᠭᠣᠯᠤᠨ ᠣᠷᠣᠵᠤ ᠂ ᠰᠤᠮᠤᠨ ᠵᠡᠷᠭᠡᠳᠡ ᠶ᠋ᠢ ᠪᠠᠷᠢᠵᠤ ᠬᠤᠯᠤᠰᠤᠨ ᠰᠢᠷᠭᠠ ᠪᠠᠨ ᠶᠡᠭᠦᠯᠡᠨᠡ ᠃
1962 . 7 ᠰᠠᠷᠠ