ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠ - 10 Эрдэнэ тунамал нэрт судар оршив - 10
272ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠ - 10
ᠲᠡᠨᠳᠡᠴᠡ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠯᠠᠮᠠ ᠮᠥᠩᠬᠡ ᠭᠠᠵᠠᠷᠠ ᠬᠦᠷᠴᠦ ᠪᠦᠷᠦᠨ ᠂
ᠳᠡᠭᠡᠳᠦ ᠵᠣᠣ ᠰᠢᠭᠡᠮᠦᠨᠢ ᠶ᠋ᠢᠨ ᠡᠮᠦᠨᠡ ᠮᠥᠷᠭᠥᠵᠦ ᠰᠢᠷᠡᠭᠡᠨ ᠦ᠌ ᠴᠣᠷᠵᠢ ᠠ᠋ᠴᠠ ᠤᠰᠤᠨ ᠲᠠᠤᠯᠠᠢ ᠵᠢᠯᠡ① ᠂
ᠲᠡᠨᠳᠡ ᠠᠷᠪᠠᠨ ᠰᠠᠷᠠ ᠶ᠋ᠢᠨ ᠰᠢᠨᠠ ᠶ᠋ᠢᠨ ᠰᠠᠢᠨ ᠡᠳᠦᠷ ᠥᠰᠦᠪᠡᠨ ᠳᠤᠢᠯᠵᠤ ᠲᠣᠢᠨ ᠪᠤᠯᠬᠤᠢ ᠴᠠᠭ ᠲᠤᠷ ᠂
ᠲᠡᠭᠦᠨ ᠥᠩᠭᠡ ᠰᠣᠯᠣᠩᠭᠠ ᠲᠠᠲᠠᠬᠤᠨ ᠯᠤᠤ ᠳᠣᠩᠭᠣᠳᠴᠤ ᠭᠠᠵᠠᠷ ᠳᠡᠯᠡᠬᠡᠢ ᠬᠥᠳᠡᠯᠦᠭᠰᠡᠨ ᠳ᠋ᠦ᠍ᠷ ᠂
ᠭᠠᠢᠬᠠᠮᠰᠢᠭ᠋ ᠲᠤ᠌ ᠪᠡᠯᠬᠡᠰ ᠬᠣᠲᠠᠯᠠ ᠪᠦᠭᠦᠳᠡ ᠳ᠋ᠦ᠍ᠷ ᠦᠵᠡᠭᠳᠡᠭᠰᠡᠨ ᠴᠠᠭ ᠲᠤᠷ ᠂
ᠬᠠᠮᠲᠤ ᠪᠠᠷ ᠬᠦᠷᠭᠡᠵᠦ ᠣᠳᠤᠭᠰᠠᠨ ᠥᠭᠡᠳᠡᠢ ᠪᠠᠭᠠᠲᠤᠷ ᠲᠠᠪᠠᠨᠤᠩ ᠡᠬᠢᠯᠡᠨ ᠡᠯᠴᠢᠰ ᠪᠦᠭᠦᠳᠡᠭᠡᠷ ᠂
ᠬᠠᠮᠤᠭ ᠲᠥᠪᠡᠳ ᠤᠯᠤᠰ ᠦᠯᠡᠮᠵᠢ ᠮᠠᠰᠢ ᠰᠦᠰᠦᠭ ᠪᠢᠰᠢᠷᠡᠯ ᠲᠥᠷᠥᠭᠦᠯᠵᠦ ᠲᠠᠬᠢᠪᠠᠢ ᠂
ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠯᠠᠮᠠ ᠬᠠᠷᠢᠨ ᠪᠠᠰᠠ ᠨᠢᠭᠦᠯᠡᠰᠴᠦ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠲᠤᠷ ᠂
ᠤᠪᠠᠸᠠᠨ ᠳᠠᠷᠬᠠᠨ② ᠂ ᠴᠥᠭᠡᠬᠦᠷ ᠲᠠᠢᠵᠢ ᠂ ᠥᠭᠡᠳᠡᠢ ᠂ ᠲᠣᠮᠢ ᠰᠠᠮᠪᠤᠷᠠ ᠳᠠᠪᠠᠨᠤᠩ ᠲᠡᠷᠢᠭᠦᠲᠡᠨ ᠢ᠋ᠶ᠋ᠡᠷ ᠂
— — — —
① ᠲᠥᠪᠡᠳ ᠦ᠋ᠨ ᠣᠨ ᠲᠣᠭᠠᠯᠠᠯ ᠂ ᠮᠣᠩᠭᠣᠯ ᠤ᠋ᠨ ᠬᠠᠷᠠ ᠡᠮᠡ ᠲᠠᠤᠯᠠᠢ ᠵᠢᠯ ᠲᠡᠢ ᠠᠳᠠᠯᠢ ᠃ ᠸᠠᠨ ᠯᠢ ᠶ᠋ᠢᠨ ᠭᠤᠴᠢᠨ ᠨᠢᠭᠡᠳᠦᠭᠡᠷ ᠣᠨ ( 1603 ) ᠪᠣᠯᠤᠨᠠ ᠃
② ᠨᠠᠮᠤᠳᠠᠢ ᠰᠡᠴᠡᠨ ᠬᠠᠭᠠᠨ ᠤ᠋ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠃ ᠬᠢᠲᠠᠳ ᠪᠢᠴᠢᠭ ᠲᠦ᠍ 五十万打力台吉 ᠭᠡᠨᠡ ᠃ ᠡᠨᠡᠬᠦ 五十万打力 ᠭᠡᠳᠡᠭ ᠨᠢ 五卜万打儿汗 ᠭᠡᠰᠡᠨ ᠦ᠌ ᠡᠨᠳᠡᠭᠦᠦ ᠪᠢᠴᠢᠯᠭᠡ ᠪᠣᠯᠤᠨᠠ ᠃
ᠥᠪᠡᠷ ᠦ᠋ᠨ ᠪᠡᠶᠡ ᠮᠡᠲᠦ ᠠᠰᠠᠷᠠᠬᠤᠢ ᠮᠠᠢᠳᠠᠷᠢ① ᠶ᠋ᠢ ᠱᠠᠰᠢᠨ ᠳ᠋ᠤᠷ ᠲᠤᠰᠠᠯᠠᠨ ᠢᠯᠡᠭᠡᠵᠦ ᠂
ᠦᠰᠦᠨ ᠢ᠋ᠶ᠋ᠡᠨ ᠥᠭᠴᠦ ᠲᠡᠳᠡᠨ ᠢ᠋ ᠵᠠᠬᠢᠷᠴᠤ᠂ ᠶᠠᠪᠤᠭᠤᠯᠤᠭᠰᠠᠨ ᠤᠴᠢᠷ ᠲᠤᠷ ᠂
ᠦᠯᠡᠮᠵᠢ ᠪᠣᠭᠳᠠ ᠠᠰᠠᠷᠠᠬᠤᠢ ᠮᠠᠢᠳᠠᠷᠢ ᠶ᠋ᠢ ᠵᠠᠯᠠᠵᠤ ᠥᠭᠡᠳᠡ ᠪᠣᠯᠭᠠᠭᠠᠳ ᠢᠷᠡᠵᠦ ᠂
ᠬᠦᠷᠴᠦ ᠢᠷᠡᠭᠰᠡᠨ ᠰᠢᠯᠲᠠᠭᠠᠨ ᠢ᠋ᠶ᠋ᠠᠨ ᠤᠬᠠᠭᠤᠯ ᠤ᠋ᠨ ᠤᠷᠢᠳ ᠡᠯᠴᠢ ᠢᠯᠡᠭᠡᠭᠰᠡᠨ ᠴᠠᠭ ᠲᠤᠷ ᠂
ᠬᠦᠨᠳᠦᠯᠡᠵᠦ ᠰᠣᠨᠣᠰᠤᠭᠠᠳ ᠰᠡᠴᠡ ᠠᠰᠠᠷᠠᠬᠤᠢ ᠮᠠᠢᠳᠠᠷᠢ ᠶ᠋ᠢ ᠤᠭᠲᠤᠭᠤᠯᠵᠤ ᠢᠯᠡᠭᠡᠭᠡᠳ ᠵᠠᠯᠠᠵᠤ ᠪᠦᠷ ᠦ᠋ᠨ ᠃
ᠬᠥᠬᠡ ᠬᠣᠲᠠ ᠳ᠋ᠤᠷ ᠵᠣᠣ ᠰᠢᠭᠡᠮᠦᠨᠢ ᠶ᠋ᠢᠨ ᠡᠮᠦᠨᠡ ᠬᠠᠭᠠᠨ ᠬᠠᠲᠤᠨ ᠂ ᠤᠨᠪᠤ ᠬᠣᠩ ᠲᠠᠢᠵᠢ② ᠲᠡᠷᠢᠭᠦᠲᠡᠨ ᠂
ᠬᠦᠰᠡᠬᠦᠢ ᠰᠡᠳᠬᠢᠯ ᠦ᠋ᠨ ᠡᠭᠦᠳᠡᠴᠡ ᠪᠢᠰᠢᠷᠡᠵᠦ ᠬᠦᠨᠳᠦᠯᠡᠭᠡᠳ ᠲᠠᠬᠢᠯ ᠤ᠋ᠨ ᠣᠷᠣᠨ ᠪᠣᠯᠭᠣᠵᠤᠬᠤᠢ ᠃
ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠠᠯᠲᠠᠨ ᠲᠠᠪᠡᠴᠠᠩ ᠲᠡᠬᠡᠷᠡ ᠰᠠᠭᠤᠯᠭᠠᠵᠤ
ᠬᠠᠭᠠᠨ ᠬᠠᠲᠤᠨ ᠡᠬᠢᠯᠡᠨ ᠬᠠᠮᠤᠭ ᠪᠦᠭᠦᠳᠡ ᠳᠥᠴᠢᠨ ᠲᠦᠮᠡᠨ ᠮᠣᠩᠭᠣᠯ ᠦᠯᠡᠮᠵᠢ ᠮᠠᠰᠢ ᠬᠦᠨᠳᠦᠯᠡᠵᠦ ᠂
— — — —
① ᠪᠠᠳᠮᠠ ᠰᠠᠮᠪᠠᠪᠠ ᠪᠠᠭᠰᠢ ᠶ᠋ᠢᠨ ᠮᠡᠷᠭᠡᠨ ᠱᠠᠪᠢ ᠪᠠᠰᠠᠮᠪᠠ ᠷᠬᠢᠠᠮᠰᠤ ᠶ᠋ᠢᠨ ᠬᠤᠪᠢᠯᠭᠠᠨ ᠂ ᠨᠡᠷᠡ ᠢᠨᠤ ᠭᠡᠨᠳᠦᠨ ᠭᠡᠪᠡᠯᠪᠠᠽᠠᠩ ᠷᠭᠢᠨᠮᠰᠤ ᠰᠢᠷᠢᠪᠡᠳᠡ ᠭᠡᠳᠡᠭ ᠃ ᠳᠥᠲᠥᠭᠡᠷ ᠳᠠᠯᠠᠢ ᠯᠠᠮᠠ ᠶᠤᠨᠳᠣᠨᠵᠠᠮᠰᠤ ᠲᠥᠪᠡᠳ ᠲᠦ᠍ ᠥᠭᠡᠳᠡ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷᠠ ᠱᠠᠰᠢᠨ ᠢ᠋ ᠪᠠᠷᠢᠬᠤ ᠯᠠᠮᠠ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠂ ᠳᠠᠷᠤᠢ ᠸᠠᠨ ᠯᠢ ᠶ᠋ᠢᠨ ᠭᠤᠴᠢᠨ ᠨᠢᠭᠡᠳᠦᠭᠡᠷ ᠣᠨ (1603 ) ᠳ᠋ᠤ᠌ ᠭᠡᠨᠳᠦᠨ ᠭᠡᠪᠡᠯᠪᠡᠽᠠᠩ ᠷᠭᠢᠨᠮᠰᠤ ᠰᠢᠷᠢᠪᠡᠳᠡ ᠶ᠋ᠢ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷᠠ ᠢᠯᠡᠭᠡᠵᠡᠢ ᠃ᠲᠡᠷᠡ ᠮᠥᠨ ᠳᠠᠷᠠᠭᠠ ᠵᠢᠯ ᠨᠢ ᠲᠦᠮᠡᠳ ᠲᠦ᠍ ᠵᠠᠯᠠᠷᠠᠨ ᠢᠷᠡᠵᠦ ᠳᠠᠯᠠᠢ ᠯᠠᠮᠠ ᠶᠤᠨᠳᠣᠨᠵᠠᠮᠰᠤ ᠶ᠋ᠢᠨ ᠰᠠᠭᠠᠳᠠᠨ ᠰᠠᠭᠤᠭᠰᠠᠨ ᠰᠢᠷᠡᠬᠡᠨᠡ ᠰᠠᠭᠤᠬᠤ ᠳ᠋ᠤ᠌ ᠶᠡᠬᠡᠳᠡ ᠠᠰᠠᠷᠠᠭᠴᠢ ᠮᠠᠢᠳᠠᠷᠢ ᠬᠤᠲᠤᠭᠲᠤ ᠭᠡᠵᠦ ᠡᠷᠭᠦᠮᠵᠢᠯᠡᠭᠳᠡᠵᠡᠢ ᠃
②ᠨᠠᠮᠤᠲᠠᠢ ᠰᠡᠴᠡᠨ ᠬᠠᠭᠠᠨ ᠤ᠋ ᠠᠴᠢ ᠪᠣᠱᠣᠭ ᠲᠤ᠌ ᠬᠣᠩ ᠲᠠᠢᠵᠢ ᠶ᠋ᠢᠨ ᠬᠥᠪᠡᠭᠦᠨ ᠃
ᠬᠠᠮᠤᠭ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠ ᠠᠬᠤᠢ ᠶᠡᠬᠡ ᠪᠤᠶᠠᠨ ᠪᠠᠷᠠᠮᠢᠳ ᠢ᠋ ᠡᠷᠭᠦᠵᠦ ᠪᠦᠷ ᠦ᠋ᠨ ᠂
ᠬᠠᠢᠷᠠᠯᠠᠨ ᠨᠢᠭᠦᠯᠡᠰᠬᠦᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠮᠠᠢᠳᠠᠷᠢ ᠬᠤᠲᠤᠭ ᠲᠤ᠌ ᠡᠰᠷᠤᠠ ᠶ᠋ᠢᠨ ᠡᠭᠡᠰᠢᠭ ᠦ᠋ᠨ ᠨᠣᠮ ᠤ᠋ᠨ ᠳᠠᠭᠤᠨ ᠢ᠋ ᠳᠠᠭᠤᠷᠢᠰᠬᠠᠪᠠᠢ ᠃
ᠳᠡᠭᠦᠨᠦ ᠬᠤᠢᠨᠠ ᠨᠠᠮᠤᠲᠠᠢ ᠰᠡᠴᠡᠨ ᠬᠠᠭᠠᠨ ᠂ ᠵᠥᠩᠭᠡᠨ ᠬᠠᠲᠤᠨ ᠂ ᠬᠣᠩ ᠲᠠᠢᠵᠢ ᠭᠤᠷᠪᠠᠭᠤᠯᠠ ᠂
ᠳᠡᠭᠡᠳᠦ ᠪᠣᠭᠳᠠ ᠬᠠᠭᠠᠨ ᠤ᠋ ᠲᠥᠷᠥ ᠶ᠋ᠢ ᠨᠣᠮ ᠤ᠋ᠨ ᠶᠣᠰᠣᠭᠠᠷ ᠶᠠᠪᠤᠭᠤᠯᠤᠭᠠᠳ ᠂
ᠲᠡᠭᠰᠢ ᠪᠤᠷᠬᠠᠨ ᠪᠠᠭᠰᠢ ᠶ᠋ᠢᠨ ᠨᠣᠮᠯᠠᠭᠰᠠᠨ ᠵᠠᠭᠤᠨ ᠨᠠᠢ᠍ᠮᠠᠨ ᠭᠡᠨᠵᠤᠷ ᠨᠣᠮ① ᠢ᠋ ᠮᠣᠩᠭᠣᠯ ᠤ᠋ᠨ ᠬᠡᠯᠡᠪᠡᠷ ᠂
ᠲᠡᠷᠡ ᠴᠠᠭ ᠲᠤ᠌ ᠰᠢᠷᠡᠭᠡ ᠳ᠋ᠦ᠍ ᠬᠥᠰᠢ ᠴᠣᠷᠵᠢ ᠂ ᠠᠶᠤᠰᠢ ᠠᠨᠠᠨᠲᠠ ᠮᠠᠨᠵᠤᠰᠢᠷᠢ ᠬᠥᠰᠢ ᠲᠡᠷᠢᠭᠦᠲᠡᠨ ᠪᠠ ᠂
ᠭᠠᠢᠬᠠᠮᠰᠢᠭ᠋ ᠭᠤᠷᠪᠠᠨ ᠲᠦᠮᠡᠨ ᠦ᠌ ᠬᠡᠯᠡᠮᠦᠷᠴᠢ ᠮᠡᠷᠭᠡᠳ ᠢ᠋ᠶ᠋ᠠᠷ ᠂
ᠬᠠᠷᠠ ᠪᠠᠷᠰ ᠵᠢᠯ ᠡᠴᠡ ᠤᠯᠠᠭᠠᠨ ᠬᠣᠨᠢᠨ ᠵᠢᠯ ② ᠬᠦᠷᠳᠡᠯᠡ ᠪᠡᠷ ᠂
ᠬᠠᠮᠤᠭ ᠨᠣᠮ ᠤ᠋ᠳ ᠢ᠋ ᠪᠦᠷᠢᠨ ᠲᠡᠭᠦᠰ ᠣᠷᠴᠢᠭᠤᠯᠵᠤ ᠪᠦᠷ ᠦ᠋ᠨ ᠂
ᠭᠠᠢᠬᠠᠮᠰᠢᠭ ᠵᠣᠬᠢᠰᠲᠠᠶᠠ ᠳᠡᠪᠲᠡᠷ ᠲᠣᠷ ᠣᠨᠣᠰᠢᠭᠤᠯᠵᠤ ᠲᠠᠯᠪᠢᠪᠠᠢ ᠃
ᠴᠡᠭᠷᠡᠸᠠᠷᠳᠢ ᠠᠯᠲᠠᠨ ᠬᠠᠭᠠᠨ ᠤ᠋ ᠠᠴᠢ ᠬᠥᠪᠡᠭᠦᠨ ᠢᠨᠦ ᠂
— — — —
① ᠭᠡᠨᠵᠦᠷ ᠨᠣᠮ ᠢ᠋ ᠨᠢᠭᠡ ᠵᠠᠭᠤᠨ ᠨᠠᠢ᠍ᠮᠠᠨ ᠪᠣᠳᠢ ᠬᠤᠪᠢᠶᠠᠬᠤ ᠲᠤᠯᠠ ᠢᠩᠭᠢᠵᠦ ᠨᠡᠷᠡᠢᠳᠦᠭᠰᠡᠨ ᠪᠢᠯᠡ ᠃
②ᠳᠠᠷᠤᠢ ᠬᠠᠷᠠ ᠡᠷᠡ ᠪᠠᠷᠰ ᠵᠢᠯ ( ᠸᠠᠨ ᠯᠢ ᠶ᠋ᠢᠨ ᠭᠤᠴᠢᠳᠤᠭᠠᠷ ᠣᠨ ᠂1602 ᠣᠨ )ᠠᠴᠠ ᠤᠯᠠᠭᠠᠨ ᠡᠮᠡ ᠬᠣᠨᠢᠨ ᠵᠢᠯ ( ᠸᠠᠨ ᠯᠢ ᠶ᠋ᠢᠨ ᠭᠤᠴᠢᠨ ᠲᠠᠪᠤᠳᠤᠭᠠᠷ ᠣᠨ ᠂ 1607 ᠣᠨ ) ᠬᠦᠷᠲᠡᠯᠡᠬᠢ ᠬᠤᠭᠤᠴᠠᠭᠠ᠃
ᠴᠠᠭ ᠦᠭᠡᠢ ᠰᠦᠰᠦᠭ ᠪᠢᠰᠢᠷᠡᠯ ᠶᠡᠬᠡ ᠳ᠋ᠦ᠍ ᠣᠨᠪᠤ ᠬᠣᠩ ᠲᠠᠢᠵᠢ ᠂
ᠴᠠᠭᠠᠨ ᠳ᠋ᠠᠷᠠ ᠪᠣᠳᠢᠰᠤᠩ ᠤ᠋ᠨ ᠵᠠᠯᠠᠵᠤ ᠢᠷᠡᠭᠰᠡᠨ ᠵᠣᠣ ᠠᠩᠭᠣᠪᠢ ᠯᠤᠭᠠ ᠠᠳᠠᠯᠢᠳᠬᠠᠵᠤ ᠂
ᠴᠠᠭᠯᠠᠰᠢ ᠦᠭᠡᠢ ᠡᠯᠳᠡᠪ ᠵᠦᠢᠯ ᠳ᠋ᠦ᠍ ᠡᠷᠳᠡᠨᠢᠰ ᠢ᠋ᠶ᠋ᠡᠷ ᠡᠭᠦᠳᠬᠡᠭᠦᠯᠵᠦ ᠪᠦᠷ ᠦ᠋ᠨ ᠃
ᠡᠷᠳᠡᠨᠢ ᠵᠣᠣ ᠰᠢᠭᠡᠮᠦᠨᠢ ᠵᠡᠭᠦᠨ ᠡᠲᠡᠭᠡᠳ ᠳᠠᠬᠢ ᠂
ᠡᠰᠷᠦᠨ ᠴᠡᠭᠷᠡᠸᠡᠷᠳᠢ ᠠᠯᠲᠠᠨ ᠬᠠᠭᠠᠨ ᠤ᠋ ᠬᠥᠪᠡᠭᠦᠳ ᠪᠤᠳᠠᠰᠢᠷᠢ ᠬᠣᠩ ᠲᠠᠢᠵᠢ ᠡᠴᠢᠭᠡ ᠶᠦ᠍ᠭᠡᠨ ᠂
ᠡᠷᠭᠢᠨ ᠭᠤᠷᠪᠠᠨ ᠴᠠᠭ ᠤ᠋ᠨ ᠰᠡᠢᠪᠠᠷ ᠤᠲᠤᠭᠰᠠᠳ ᠤ᠋ᠨ ᠪᠡᠶᠡ ᠪᠠᠢᠭᠤᠯᠤᠭᠰᠠᠨ ᠰᠦᠮᠡ ᠳ᠋ᠦ᠍ᠷ᠂
ᠡᠯᠳᠡᠪ ᠵᠦᠢᠯ ᠡᠷᠳᠡᠮ ᠳ᠋ᠦ᠍ ᠤᠷᠠᠳ ᠢ᠋ᠶ᠋ᠠᠷ ᠵᠣᠣ ᠠᠩᠭᠤᠪᠢ ᠶ᠋ᠢᠨ ᠪᠡᠶᠡ ᠶ᠋ᠢ ᠪᠤᠰᠬᠠᠵᠤ᠃
ᠬᠣᠶᠠᠳᠤᠭᠠᠷ ᠢᠯᠭᠠᠯ ᠦᠭᠡᠢ ᠵᠣᠣ ᠰᠦᠮᠡ ᠶ᠋ᠢᠨ ᠡᠮᠦᠨᠡ ᠬᠡᠢᠳ ᠪᠠᠢᠭᠤᠯᠵᠤ ᠂
ᠬᠣᠲᠠᠯᠠ ᠲᠡᠭᠦᠰᠦᠭᠰᠡᠨ ᠡᠯᠳᠡᠪ ᠵᠦᠢᠯ ᠳ᠋ᠦ᠍ ᠲᠠᠬᠢᠯ ᠨᠤᠭᠤᠳ ᠢ᠋ᠶ᠋ᠠᠷ ᠳᠠᠬᠢᠵᠤ ᠂
ᠬᠤᠪᠢᠯᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠠ ᠶ᠋ᠢᠨ ᠨᠠᠢ᠍ᠮᠠᠨ ᠠ᠋ᠴᠠ ᠬᠣᠷᠢᠨ ᠬᠦᠷᠳᠡᠯᠡ ᠢᠷᠦᠭᠡᠷ ᠪᠠᠷᠠᠮᠢᠳ ᠢ᠋ ᠂
ᠬᠤᠲᠤᠭ ᠲᠠᠨ ᠬᠤᠸᠠᠷᠠᠭ ᠤ᠋ᠳ ᠤ᠋ᠨ ᠴᠢᠭᠤᠯᠭᠠᠨ ᠢ᠋ᠶ᠋ᠠᠷ ᠢᠷᠦᠭᠡᠯᠭᠡᠮᠦᠢ ᠳᠠᠭᠤᠷᠢᠰᠬᠠᠵᠤ ᠃
ᠭᠡᠭᠡᠨ ᠬᠠᠭᠠᠨ ᠬᠡᠳᠦᠢ ᠲᠣᠭᠠᠲᠠᠨ ᠬᠠᠲᠤᠳ ᠠᠪᠤᠭᠰᠠᠨ ᠂
ᠬᠡᠳᠦᠢ ᠲᠣᠭᠠᠲᠠᠨ ᠬᠥᠪᠡᠭᠦᠳ ᠥᠬᠢᠳ ᠢ᠋ ᠲᠥᠷᠥᠭᠦᠯᠦᠭᠰᠡᠨ ᠂
ᠬᠢᠵᠢᠶᠡ ᠳᠡ ᠠᠰᠤᠷᠤ ᠳᠤᠷᠠᠬᠠᠷᠤ ᠵᠠᠰᠠᠭ ᠴᠠᠭᠠᠵᠢ ᠪᠠᠢᠭᠤᠯᠤᠭᠰᠠᠨ ᠂
ᠭᠡᠯᠭᠦ ᠶᠡᠬᠡ ᠤᠯᠤᠰ ᠤ᠋ᠨ ᠬᠠᠭᠠᠴᠠᠭᠰᠠᠨ ᠲᠥᠷᠥ ᠶ᠋ᠢ ᠬᠠᠮᠲᠤᠳᠬᠠᠭᠰᠠᠨ ᠂
ᠲᠡᠳᠡᠭᠡᠷ ᠣᠯᠠᠨ ᠲᠣᠭᠠᠲᠠᠨ ᠶᠠᠪᠤᠳᠠᠯ ᠠ᠋ᠴᠠ ᠢᠨᠤ ᠡᠳᠦᠢ ᠲᠡᠳᠦᠢ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠷ ᠬᠣᠷᠢᠶᠠᠨ ᠪᠢᠴᠢᠭᠰᠡᠨ ᠪᠤᠶᠤ ᠃
ᠴᠡᠭᠷᠡᠸᠡᠷᠳᠢ ᠠᠯᠲᠠᠨ ᠬᠠᠭᠠᠨ ᠤ᠋ ᠲᠥᠷᠥᠯ ᠢ᠋ ᠤᠬᠠᠭᠤᠯᠬᠤᠢ ᠡᠷᠳᠡᠨᠢ ᠲᠣᠯᠢ ᠨᠡᠷᠡᠲᠦ ᠬᠤᠷᠢᠶᠠᠩᠭᠤᠢ ᠴᠡᠳᠢᠭ ᠲᠡᠭᠦᠰᠪᠡ ᠃
ᠢᠮᠠᠭᠲᠠ ᠪᠣᠳᠢ ᠶᠠᠪᠤᠳᠠᠯ ᠤ᠋ᠨ ᠮᠠᠲᠠᠯ ᠢ᠋ ᠣᠭᠣᠭᠠᠲᠠ ᠳᠤᠭᠤᠯᠤᠭᠠᠳ
ᠢᠯᠠᠩᠭᠤᠶᠠ ᠮᠡᠳᠡᠨ ᠡᠨᠡᠷᠢᠬᠦ ᠶ᠋ᠢᠨ ᠮᠢᠩᠭᠠᠨ ᠨᠠᠷᠠᠨ ᠢ᠋ᠶ᠋ᠠᠷ ᠭᠡᠢᠭᠦᠯᠵᠦ ᠂
ᠢᠯᠠᠭᠤᠭᠰᠠᠨ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠢ᠋ ᠠᠷᠪᠠᠨ ᠵᠦᠭ ᠲᠦ᠍ᠷ ᠳᠡᠯᠭᠡᠷᠡᠭᠦᠯᠦᠭᠴᠢ ᠂
ᠢᠲᠡᠭᠡᠯ ᠦ᠋ᠨ ᠣᠷᠣᠨ ᠪᠣᠭᠳᠠ ᠨᠠᠷᠠᠨ ᠮᠡᠲᠦ ᠯᠠᠮᠠ ᠨᠠᠷ ᠲᠤᠷ ᠵᠠᠯᠪᠠᠷᠢᠮᠤᠢ!
ᠠᠷᠢᠭᠤᠨ ᠬᠣᠶᠠᠷ ᠴᠢᠭᠤᠯᠭᠠᠨ ᠤ᠋ ᠳᠡᠯᠡᠬᠡᠢ ᠳ᠋ᠦ᠍ᠷ ᠳᠡᠭᠡᠳᠦ ᠬᠥᠯᠭᠡᠨ ᠦ᠌ ᠦᠷᠡᠰ ᠢ᠋ ᠂
ᠠᠷᠢᠯᠤᠭᠰᠠᠨ ᠬᠣᠭᠣᠰᠣᠨ ᠨᠢᠭᠦᠯᠡᠰᠬᠦ ᠶ᠋ᠢᠨ ᠤᠰᠤᠨ ᠢ᠋ᠶ᠋ᠠᠷ ᠴᠢᠭᠢᠳᠬᠡᠵᠦ ᠪᠦᠷ ᠦ᠋ᠨ ᠂
ᠠᠮᠤᠭᠤᠯᠠᠩ ᠭᠤᠷᠪᠠᠨ ᠭᠦᠯᠭᠡᠨ ᠦ᠌ ᠴᠠᠭᠠᠨ ᠯᠢᠩᠬᠤᠠ ᠰᠡᠴᠡᠭ ᠢ᠋ ᠳᠡᠯᠭᠡᠷᠡᠭᠦᠯᠦᠭᠴᠢ ᠂
ᠠᠳᠠᠯᠢᠳᠬᠠᠰᠢ ᠦᠭᠡᠢ ᠲᠤᠰᠠ ᠶ᠋ᠢ ᠪᠦᠲᠦᠭᠡᠭᠴᠢ ᠭᠡᠯᠪᠡᠷᠡᠸᠡᠷᠡᠰ ①ᠰᠢᠭᠡᠮᠦᠨᠢ ᠳ᠋ᠦ᠍ᠷ ᠮᠥᠷᠭᠥᠮᠦ !
— — — —
① ᠪᠠᠰᠠ ᠭᠠᠯᠪᠠᠷᠸᠠᠰᠤᠨ ᠪᠤᠶᠤ ᠭᠠᠯᠪᠠᠷᠸᠠᠷᠠᠰ ᠭᠡᠵᠦ ᠪᠢᠴᠢᠨᠡ ᠃ ᠡᠷᠲᠡᠨ ᠦ᠌ ᠡᠨᠡᠳᠬᠡᠭ ᠦ᠋ᠨ ᠦᠯᠢᠭᠡᠷ ᠳᠣᠮᠣᠭ ᠲᠤ᠌ ᠭᠠᠷᠳᠠᠭ ᠮᠣᠳᠣᠨ ᠤ᠋ ᠨᠡᠷᠡ ᠂ ᠡᠭᠦᠨ ᠢ᠋ ᠲᠥᠪᠡᠳ ᠢ᠋ᠶ᠋ᠡᠷ ᠪᠠᠭᠰᠠᠮ ᠵᠣᠩᠰᠢᠨ ᠭᠡᠵᠦ ᠂ ᠮᠣᠩᠭᠣᠯ ᠪᠢᠴᠢᠭ ᠲᠦ᠍ ᠣᠷᠴᠢᠭᠤᠯᠤᠨ ᠬᠦᠰᠡᠯ ᠢ᠋ ᠬᠠᠩᠭᠠᠭᠴᠢ ᠮᠣᠳᠣᠨ ᠭᠡᠵᠡᠢ ᠃
ᠥᠭᠦᠯᠡᠬᠦᠢ ᠠᠳᠠᠯᠢᠳᠬᠠᠬᠤᠢ ᠥᠭᠡᠬᠦ ᠪᠢᠯᠢᠭ ᠦ᠋ᠨ ᠮᠥᠨ ᠴᠢᠨᠠᠷ ᠲᠤ᠌ ᠂
ᠦᠷᠭᠦᠯᠵᠢ ᠲᠥᠷᠥᠬᠦ ᠲᠦᠷᠢᠳᠬᠡᠯ ᠦᠭᠡᠢ ᠣᠭᠲᠠᠷᠭᠤᠢ ᠮᠡᠲᠦ ᠂
ᠥᠪᠡᠷᠡ ᠥᠪᠡᠷᠡ ᠤᠬᠠᠭᠴᠢ ᠪᠡᠯᠭᠡ ᠪᠢᠯᠢᠭ ᠦ᠋ᠨ ᠶᠠᠪᠤᠳᠠᠯ ᠳ᠋ᠤ᠌ ᠂
ᠦᠨᠡᠬᠡᠷ ᠭᠤᠷᠪᠠᠨ ᠴᠠᠭ ᠤ᠋ᠨ ᠢᠯᠠᠭᠤᠭᠰᠠᠨ ᠪᠢᠯᠢᠭ ᠪᠠᠷᠠᠮᠢᠳ ᠲᠤᠷ ᠮᠥᠷᠭᠥᠮᠦ ᠴᠢᠮᠠᠲᠤ !
ᠳᠡᠭᠡᠳᠦ ᠪᠣᠭᠳᠠ ᠢᠯᠠᠭᠤᠭᠰᠠᠳ ᠤ᠋ᠨ ᠡᠴᠢᠭᠡ ᠮᠠᠸᠠᠵᠤᠰᠢᠷᠢ᠂
ᠲᠡᠭᠰᠢ ᠨᠢᠭᠦᠯᠡᠰᠬᠦᠢ ᠶ᠋ᠢᠨ ᠡᠵᠡᠨ ᠢᠨᠤ ᠪᠣᠯᠤᠭᠰᠠᠨ ᠯᠤᠸᠠᠬᠢ ᠱᠣᠸᠠᠷᠢ ᠂
ᠲᠡᠷᠰᠯᠡᠭᠴᠢ ᠨᠢᠰᠸᠠᠨᠢᠰ ᠤ᠋ᠨ ᠳᠠᠢᠰᠤᠨ ᠢ᠋ ᠳᠠᠷᠤᠭᠴᠢ ᠸᠴᠢᠷᠠ ᠪᠡᠸᠢ ᠂
ᠲᠡᠳᠡᠭᠡᠷ ᠭᠤᠷᠪᠠᠨ ᠢᠲᠡᠭᠡᠯ ᠳ᠋ᠦ᠍ ᠪᠣᠳᠢᠰᠤᠩ ᠳ᠋ᠤᠷ ᠮᠠᠭᠲᠠᠨ ᠮᠥᠷᠭᠥᠮᠦ !
ᠤᠷᠢᠳᠤ ᠬᠠᠮᠤᠭ ᠲᠥᠷᠥᠯ ᠲᠤᠲᠤᠮ ᠳ᠋ᠤᠷ ᠢ᠋ᠶ᠋ᠠᠨ ᠂
ᠦᠯᠡᠮᠵᠢ ᠪᠤᠶᠠᠨ ᠪᠢᠯᠢᠭ ᠦ᠋ᠨ ᠴᠢᠭᠤᠯᠭᠠᠨ ᠢ᠋ ᠬᠤᠷᠢᠶᠠᠭᠰᠠᠨ ᠤ᠋ ᠬᠦᠴᠦ ᠪᠡᠷ ᠂
ᠤᠬᠠᠭᠠᠨ ᠪᠢᠯᠢᠭ ᠬᠦᠴᠦᠨ ᠠᠤᠬᠠ ᠶ᠋ᠢ ᠲᠡᠭᠦᠰ ᠲᠤᠭᠤᠯᠵᠤ ᠂
ᠤᠯᠤᠰ ᠮᠣᠩᠭᠣᠯ ᠤ᠋ᠨ ᠡᠵᠡᠨ ᠢᠨᠤ ᠪᠣᠯᠤᠨ ᠲᠥᠷᠥᠭᠰᠡᠨ ᠂
ᠠᠷᠪᠠᠨ ᠵᠦᠭ ᠦ᠋ᠨ ᠳᠠᠢᠰᠤᠳ ᠢ᠋ ᠡᠷᠬᠡ ᠳ᠋ᠦ᠍ᠷ ᠢ᠋ᠶ᠋ᠠᠨ ᠣᠷᠣᠭᠤᠯᠵᠤ ᠂
ᠠᠯᠳᠠᠷᠰᠢᠭᠰᠠᠨ ᠪᠣᠭᠳᠠ ᠰᠡᠴᠡᠨ ᠬᠠᠭᠠᠨ ᠤ᠋ ᠪᠠᠢᠭᠤᠯᠤᠭᠰᠠᠨ ᠤ᠋ ᠶᠣᠰᠣᠭᠠᠷ ᠂
ᠠᠳᠠᠯᠢᠳᠬᠠᠰᠢ ᠦᠭᠡᠢ ᠲᠥᠷᠥ ᠱᠠᠰᠢᠨ ᠢ᠋ ᠲᠤᠯᠭᠤᠷᠠ ᠠ᠋ᠴᠠ ᠪᠠᠢᠭᠤᠯᠤᠭᠰᠠᠨ ᠂
ᠠᠷᠢᠭᠤᠨ ᠣᠷᠣᠨ ᠳ᠋ᠠᠬᠢ ᠲᠩᠷᠢ ᠶ᠋ᠢᠨ ᠬᠥᠪᠡᠭᠦᠨ ᠠᠯᠲᠠᠨ ᠬᠠᠭᠠᠨ ᠤ᠋ ᠠᠯᠳᠠᠷ ᠤ᠋ᠨ ᠳᠣᠮᠣᠭ ᠢ᠋ ᠂
ᠦᠨᠳᠦᠰᠦᠨ ᠳᠡᠭᠡᠳᠦ ᠯᠠᠮᠠ ᠨᠠᠷ ᠲᠤᠷ ᠢ᠋ᠶ᠋ᠠᠨ ᠵᠠᠯᠪᠠᠷᠢᠮᠤᠢ ᠂
ᠦᠯᠡᠮᠵᠢ ᠪᠣᠭᠳᠠ ᠠᠯᠲᠠᠨ ᠬᠠᠭᠠᠨ ᠤ᠋ ᠨᠡᠷᠡ ᠠᠯᠳᠠᠷᠢ ᠥᠴᠦᠬᠡᠨ ᠰᠣᠨᠣᠰᠴᠤ
ᠤᠷᠠᠨ ᠲᠠᠩᠭᠠᠷᠢᠭ᠋ ᠳᠠᠶᠤᠨ ᠬᠢᠶᠡ ᠶ᠋ᠢᠨ ᠵᠣᠬᠢᠶᠠᠭᠰᠠᠨ ᠠ᠋ᠴᠠ ᠲᠤᠭᠤᠷᠪᠢᠵᠤ ᠂
ᠤᠯᠠᠮ ᠪᠠᠰᠠ ᠬᠣᠲᠠᠯᠠ ᠳᠠ ᠠᠯᠳᠠᠷᠰᠢᠲᠤᠭᠠᠢ ᠭᠡᠮᠡᠨ ᠪᠢᠴᠢᠪᠡ ᠪᠢ ᠰᠡᠳᠬᠢᠵᠦ ᠃
ᠲᠡᠭᠷᠢᠯᠢᠭ ᠪᠣᠭᠳᠠ ᠠᠯᠲᠠᠨ ᠬᠠᠭᠠᠨ ᠤ᠋ ᠰᠠᠢᠨ ᠶᠠᠪᠤᠳᠠᠯ ᠤ᠋ᠨ ᠴᠡᠳᠢᠭ ᠢ᠋
ᠲᠡᠭᠦᠰ ᠪᠦᠷᠢᠨ ᠪᠢᠴᠢᠬᠦᠶᠡ ᠪᠡᠷᠬᠡ ᠳ᠋ᠡᠬᠢ ᠪᠥᠭᠡᠰᠦ ᠪᠡᠷ ᠂
ᠲᠡᠭᠦᠨᠡᠷ ᠬᠥᠪᠡᠭᠦᠳ ᠠᠯᠲᠠᠨ ᠤᠷᠤᠭᠤᠳ ᠢᠨᠤ ᠦᠵᠡᠵᠦ ᠬᠢᠴᠢᠶᠡᠲᠦᠭᠡᠢ ᠭᠡᠮᠡᠨ ᠂
ᠲᠡᠭᠦᠰᠬᠡᠵᠦ ᠡᠳᠦᠢ ᠲᠡᠳᠦᠢ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠷ ᠳᠡᠪᠲᠡᠷ ᠲᠣᠷ ᠣᠷᠣᠰᠢᠭᠤᠯᠪᠠᠢ ᠪᠢ ᠃
ᠴᠡᠭᠷᠠᠸᠠᠷᠳᠢ ᠠᠯᠲᠠᠨ ᠬᠠᠭᠠᠨ ᠤ᠋ ᠲᠣᠭᠣᠵᠢ 《 ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠ 》 ᠭᠡᠬᠦ ᠡᠨᠡ ᠨᠣᠮ ᠢ᠋ ᠰᠢᠯᠢ ᠶ᠋ᠢᠨ ᠭᠣᠣᠯ ᠠᠢᠮᠠᠭ ᠤ᠋ᠨ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ᠋ ᠸᠠᠩ ᠤ᠋ᠨ ᠣᠷᠳᠣᠨ ᠠ᠋ᠴᠠ ᠣᠯᠵᠠᠢ ᠃ ᠬᠣᠢᠨᠠ ᠪᠠᠢᠭᠠ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ᠋ ᠸᠠᠩ ᠬᠦᠩ ᠦ᠋ᠨ ᠭᠡᠷ ᠦ᠋ᠨ ᠦᠶᠡ ᠶ᠋ᠢᠨ ᠵᠠᠯᠭᠠᠮᠵᠢᠯᠠᠯ ᠢ᠋ ᠪᠣᠯ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ ᠡᠨᠡ ᠨᠣᠮ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠳᠠᠭᠠᠯᠳᠤᠭᠤᠯᠤᠭᠰᠠᠨ ᠨᠢ ᠮᠠᠭᠠᠳ ᠪᠢᠯᠡ ᠃ ᠡᠨᠡ ᠨᠢ ᠬᠡᠳᠦᠢᠪᠡᠷ ᠲᠤᠰ ᠨᠣᠮ ᠯᠤᠭᠠ ᠬᠣᠯᠪᠣᠭᠠ ᠦᠭᠡᠢ ᠵᠦᠢᠯ ᠪᠣᠯᠪᠠᠴᠤ ᠨᠢᠭᠡᠨ ᠬᠠᠭᠤᠳᠠᠰᠤ ᠶ᠋ᠢᠨ ᠲᠡᠳᠦᠢ ᠯᠡ ᠲᠤᠯᠠ ᠮᠥᠨ ᠬᠣᠢᠨᠠ ᠨᠢ ᠳᠠᠭᠠᠯᠳᠤᠭᠤᠯᠪᠠ ᠃
ᠰᠣᠳᠣ ᠴᠢᠩᠭᠢᠰ ᠬᠠᠭᠠᠨ ᠂
ᠡᠭᠦᠨ ᠦ᠌ ᠳᠥᠷᠪᠡᠳᠦᠭᠡᠷ ᠬᠥᠪᠡᠭᠦᠨ ᠲᠤᠯᠤᠢ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠬᠤᠪᠢᠯᠠᠢ ᠬᠠᠭᠠᠨ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠴᠢᠩᠭᠢᠮ ᠲᠠᠢᠵᠢ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠳ᠋ᠠᠷᠮᠠᠪᠠᠯᠠ ᠲᠠᠢᠵᠢ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠪᠤᠶᠠᠨᠲᠤ ᠬᠠᠭᠠᠨ ①᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠵᠠᠶᠠᠭᠠ ᠲᠤ ᠬᠠᠭᠠᠨ ②᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠳᠤᠬᠤᠨ ᠲᠡᠮᠦᠷ ᠬᠠᠭᠠᠨ ③᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠤᠰᠬᠠᠯ ᠬᠠᠭᠠᠨ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠬᠠᠷᠭᠤᠴᠠᠭ ᠳᠦᠭᠦᠷᠡᠩ ᠬᠤᠸᠩ ᠲᠠᠢᠵᠢ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠠᠵᠠᠢ ᠲᠠᠢᠵᠢ ᠃
— — — —
① ᠶᠤᠸᠠᠨ ᠤᠯᠤᠰ ᠤ᠋ᠨ ᠳᠥᠲᠥᠭᠡᠷ ᠬᠠᠭᠠᠨ ᠃ ᠨᠡᠷᠡ ᠠᠶᠤᠷᠪᠠᠯᠪᠠᠳ ᠭᠡᠳᠡᠭ ᠃
② ᠶᠤᠸᠠᠨ ᠤᠯᠤᠰ ᠤ᠋ᠨ ᠶᠢᠰᠦᠳᠦᠭᠡᠷ ᠬᠠᠭᠠᠨ ᠂ ᠨᠡᠷᠡ ᠲᠤᠭ ᠲᠡᠮᠦᠷ ᠭᠡᠳᠡᠭ ᠃ᠶᠤᠸᠠᠨ ᠤᠯᠤᠰ ᠤ᠋ᠨ ᠭᠤᠲᠠᠭᠠᠷ ᠬᠠᠭᠠᠨ ᠬᠠᠢᠰᠠᠨ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠃ ᠡᠨᠳᠡ ᠪᠤᠶᠠᠨᠲᠤ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠭᠡᠳᠡᠭ ᠨᠢ ᠪᠤᠷᠤᠭᠤ ᠪᠣᠯᠵᠠᠢ ᠃
③ᠳᠤᠬᠤᠨ ᠲᠡᠮᠦᠷ ᠪᠣᠯ ᠶᠤᠸᠠᠨ ᠤᠯᠤᠰ ᠤ᠋ᠨ ᠨᠠᠢ᠍ᠮᠠᠳᠤᠭᠠᠷ ᠬᠠᠭᠠᠨ ᠬᠥᠰᠡᠯᠡ (ᠵᠠᠶᠠᠭᠠᠲᠤ ᠬᠠᠭᠠᠨ ᠤ᠋ ᠠᠬᠠ ) ᠶ᠋ᠢᠨ ᠬᠥᠪᠡᠭᠦᠨ ᠃ ᠡᠨᠳᠡ ᠵᠠᠶᠠᠭᠠ ᠲᠤ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠭᠡᠳᠡᠭ ᠨᠢ ᠪᠤᠷᠤᠭᠤ ᠪᠣᠯᠪᠠ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠬᠠᠷᠭᠤᠴᠠᠭ ᠲᠠᠢᠵᠢ ①᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠪᠣᠯᠬᠤ ᠵᠢᠨᠦᠩ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠲᠠᠶᠠᠨ ᠬᠠᠭᠠᠨ ᠂
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠲᠥᠷᠥ ᠪᠣᠯᠣᠳ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠪᠣᠳᠢ ᠠᠯᠠᠭ ᠬᠠᠭᠠᠨ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠣᠩᠭᠣᠨ ᠲᠤᠷᠠᠬᠠᠯ ᠨᠣᠶᠠᠨ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠳᠣᠷᠵᠢ ᠴᠡᠴᠡᠨ ᠵᠢᠨᠦᠩ ᠴᠢᠨ ᠸᠠᠩ ②᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠠᠴᠢᠲᠤ ᠡᠷᠳᠡᠨᠢ ᠬᠤᠸᠩ ᠲᠠᠢᠵᠢ ᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠰᠡᠴᠡᠨ ᠴᠢᠨ ᠸᠠᠩ ᠴᠠᠭᠠᠨ ᠪᠠᠪᠠᠢ ③᠃
ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠰᠡᠴᠡᠨ ᠴᠢᠨ ᠸᠠᠩ ᠰᠤᠳᠠᠨᠢ ᠃ ④
— — — —
① ᠬᠠᠷᠭᠤᠴᠠᠭ ᠲᠠᠢᠵᠢ ᠪᠣᠯ ᠠᠵᠠᠢ ᠲᠠᠢᠵᠢ ᠶ᠋ᠢᠨ ᠠᠴᠢ ᠂ ᠠᠭᠪᠠᠷᠵᠢᠨ ᠤ᠋ ᠬᠥᠪᠡᠭᠦᠨ ᠃ ᠡᠨᠳᠡ ᠠᠵᠠᠢ ᠲᠠᠢᠵᠢ ᠶ᠋ᠢᠨ ᠬᠥᠪᠡᠭᠦᠨ ᠭᠡᠰᠡᠨ ᠨᠢ ᠪᠤᠷᠤᠭᠤ ᠪᠣᠯᠪᠠ ᠃
② ᠡᠨᠡ ᠬᠥᠮᠦᠨ ᠪᠣᠯ ᠳᠡᠭᠡᠳᠦ ᠡᠷᠳᠡᠮᠲᠦ（德） ᠶ᠋ᠢᠨ ᠬᠣᠶᠠᠳᠤᠭᠠᠷ ᠣᠨ (1637 ) ᠳ᠋ᠤ᠌ ᠬᠠᠷᠢᠶᠠᠲᠤ ᠠᠢᠮᠠᠭ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠮᠠᠨᠵᠤ ᠳ᠋ᠤ᠌ ᠳᠠᠭᠠᠷᠠ ᠢᠷᠡᠪᠡ ᠃ ᠳᠡᠭᠡᠳᠦ ᠡᠷᠳᠡᠮᠲᠦ ᠶ᠋ᠢᠨ ᠵᠢᠷᠭᠤᠳᠤᠭᠠᠷ ᠣᠨ ᠳ᠋ᠤ᠌ ᠵᠠᠰᠠᠭ ᠬᠣᠱᠣᠢ ᠴᠢᠨ ᠸᠠᠩ ᠡᠷᠭᠦᠮᠵᠢᠯᠡᠭᠳᠡᠭᠡᠳ ᠦᠵᠦᠮᠦᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠬᠤᠰᠢᠭᠤᠨ ᠢ᠋ ᠵᠠᠬᠢᠷᠪᠠᠢ ᠃1646 ᠣᠨ ᠳ᠋ᠤ᠌ ᠨᠠᠰᠤ ᠪᠠᠷᠠᠪᠠ ᠃
③ᠡᠶᠡᠪᠡᠷ ᠵᠠᠰᠠᠭᠴᠢ （顺治） ᠶ᠋ᠢᠨ ᠭᠤᠲᠠᠭᠠᠷ ᠣᠨ (1647 ) ᠳ᠋ᠤ᠌ ᠵᠠᠰᠠᠭ ᠬᠣᠱᠣᠢ ᠴᠢᠨ ᠸᠠᠩ ᠵᠠᠯᠭᠠᠮᠵᠢᠯᠠᠵᠤ 1657 ᠣᠨ ᠳ᠋ᠤ᠌ ᠨᠠᠰᠤ ᠪᠠᠷᠠᠪᠠ ᠃
④ ᠡᠶᠡᠪᠡᠷ ᠵᠠᠰᠠᠭᠴᠢ ᠶ᠋ᠢᠨ ᠠᠷᠪᠠᠨ ᠲᠠᠪᠤᠳᠤᠭᠠᠷ ᠣᠨ (1658 ) ᠳ᠋ᠤ᠌ ᠵᠠᠰᠠᠭ ᠬᠣᠱᠣᠢ ᠴᠢᠨ ᠸᠠᠩ ᠵᠠᠯᠭᠠᠮᠵᠢᠯᠠᠵᠤ ᠡᠩᠬᠡ ᠠᠮᠤᠭᠤᠯᠠᠩ (康熙） ᠤ᠋ᠨ ᠬᠣᠷᠢ ᠶᠢᠰᠦᠳᠦᠭᠡᠷ ᠣᠨ ( 1690 ) ᠳ᠋ᠤ᠌ ᠨᠠᠰᠤ ᠪᠠᠷᠠᠪᠠ ᠃
ᠮᠠᠲ᠋ᠧᠷᠢᠶᠠᠯ ᠬᠠᠩᠭᠠᠭᠴᠢ ᠵᠢᠴᠢ ᠬᠠᠢᠭ
ᠬᠥᠬᠡ ᠮᠣᠩᠭᠣᠯ( ᠪᠠᠯᠵᠢ ) ᠄ ᠬᠣᠷᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠣᠰᠢᠭᠤ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠵᠢᠴᠢ ᠬᠠᠢᠭ
ᠠᠯᠲᠠᠨᠰᠦ᠋ᠬᠡ᠄ ᠬᠥᠯᠥᠨ ᠪᠣᠶ᠋ᠢᠷ ᠠᠶ᠋ᠢᠮᠠᠭ ᠤ᠋ᠨ ᠰᠢᠨᠡ ᠪᠠᠷᠭᠤ ᠵᠡᠭᠦᠨ ᠬᠤᠰᠢᠭᠤᠨ ᠤ᠋ ᠵᠢᠪᠬᠤᠯᠠᠩᠲᠤ ᠰᠤᠮᠤ ᠶ᠋ᠢᠨ ᠬᠣᠯᠪᠣᠭᠠᠲᠤ ᠭᠠᠴᠠᠭᠠᠨ ᠤ᠋ ᠮᠠᠯᠴᠢᠨ
ᠡᠷᠳᠡᠨᠢ ᠄ ᠰᠢᠨᠵᠢᠶᠠᠩ ᠤ᠋ᠨ ᠪᠣᠷᠣᠳᠠᠯᠠ ᠮᠣᠩᠭᠣᠯ ᠥᠪᠡᠷᠲᠡᠭᠡᠨ ᠵᠠᠰᠬᠠᠤ ᠵᠧᠦ ᠶ᠋ᠢᠨ ᠪᠣᠷᠣᠳᠠᠯᠠ ᠬᠣᠲᠠ ᠶ᠋ᠢᠨ ᠬᠥᠮᠦᠨ᠂ ᠤᠷᠳᠤᠪᠤᠯᠠᠭ ᠪᠠᠯᠭᠠᠰᠤ ᠶ᠋ᠢᠨ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠥᠷᠲᠡᠭᠡ ᠳ᠋ᠦ᠍ ᠠᠵᠢᠯᠯᠠᠵᠤ ᠪᠣᠢ᠃
ᠥᠷᠯᠥᠭ᠄ ᠤᠯᠠᠭᠠᠨᠬᠠᠳᠠ ᠬᠣᠲᠠ ᠶ᠋ᠢᠨ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠤ᠋ ᠪᠠᠶᠠᠨ᠋ᠠᠭᠤᠯᠠ ᠪᠠᠯᠭᠠᠰᠤ
ᠪᠤᠤ ᠿᠦᠩ ᠬᠤᠸᠠ ᠄ ᠲᠦᠩᠯᠢᠶᠣᠤ ᠬᠣᠲᠠ ᠶ᠋ᠢᠨ ᠬᠣᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠬᠣᠶ᠋ᠢᠲᠤ ᠬᠤᠰᠢᠭᠤᠨ ᠤ᠋ ᠨᠤᠭᠤᠰᠤᠲᠠᠢ ᠭᠣᠣᠯ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ
ᠪᠠᠶᠠᠨᠪᠤᠯᠠᠭ᠄ ᠵᠢᠷᠢᠮ ᠠᠶ᠋ᠢᠮᠠᠭ ᠤ᠋ᠨ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ᠋ ᠬᠣᠩᠬᠣᠷᠳᠠᠯᠠ ᠰᠤᠮᠤ ᠶ᠋ᠢᠨ ᠮᠠᠯᠴᠢᠨ
ᠬᠠᠨᠲᠠᠵᠠᠪ ᠄ ᠬᠥᠯᠥᠨ ᠪᠤᠶ᠋ᠢᠷ ᠠᠶ᠋ᠢᠮᠠᠬ ᠤ᠋ᠨ ᠡᠸᠡᠩᠬᠢ ᠬᠤᠰᠢᠭᠤᠨ ᠤ᠋ ᠰᠢᠨᠡᠬᠡᠨ ᠵᠡᠭᠦᠨ ᠰᠤᠮᠤᠨ ᠤ᠋ ᠮᠠᠯ ᠤ᠋ᠨ ᠡᠮᠴᠢ ᠶ᠋ᠢᠨ ᠮᠡᠷᠭᠡᠵᠢᠯ ᠲᠡᠢ᠂ ᠮᠠᠯ ᠤ᠋ᠨ ᠡᠮ ᠦ᠋ᠨ ᠳᠡᠯᠭᠡᠭᠦᠷ ᠡᠷᠬᠢᠯᠡᠵᠦ ᠪᠣᠢ᠃
ᠰᠠᠷᠠᠨᠠ ᠄ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠲᠦᠩᠯᠢᠶᠣᠤ ᠬᠣᠲᠠ ᠶ᠋ᠢᠨ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ᠋ ᠳᠠᠴᠢᠨᠲᠠᠯᠡ ᠪᠠᠯᠭᠠᠰᠤ ᠪᠠᠷ ᠨᠤᠲᠤᠭ ᠲᠠᠢ ᠂ ᠬᠤᠪᠢ ᠶ᠋ᠢᠨ ᠠᠵᠤ ᠠᠬᠤᠶ᠋ᠢᠯᠠᠯᠲᠠᠨ ᠃
ᠱᠠᠭᠰᠠᠯ᠄ ᠬᠥᠯᠥᠨ ᠪᠤᠶ᠋ᠢᠷ ᠠᠶ᠋ᠢᠮᠠᠭ ᠤ᠋ᠨ ᠰᠢᠨᠡ ᠪᠠᠷᠭᠤ ᠵᠡᠭᠦᠨ ᠬᠤᠰᠢᠭᠤᠨ ᠤ᠋ ᠵᠢᠪᠬᠤᠯᠠᠩᠲᠤ ᠰᠤᠮᠤ
ᠲ · ᠪᠠᠶᠠᠷ ( ᠮᠣᠩᠭᠣᠯ ᠨᠤᠲᠤᠭ )᠄ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ᠋ ᠳᠠᠴᠢᠨᠲᠠᠯᠠ ᠪᠠᠯᠭᠠᠰᠤᠨ ᠤ᠋ ᠵᠡᠭᠡᠰᠦᠲᠡᠢ ᠭᠠᠴᠠᠭᠠ ( ᠤᠤᠯ ᠤ᠋ᠨ ᠪᠠᠭᠠᠪᠡᠷᠬᠡ ᠰᠤᠮᠤ ᠶ᠋ᠢᠨ ᠱᠸᠵᠢᠨ ᠭᠠᠴᠠᠭᠠ )
ᠲᠠᠯᠠᠶ᠋ᠢᠪᠠᠶᠠᠷ ᠄ ᠬᠥᠯᠥᠨ ᠪᠤᠶ᠋ᠢᠷ ᠠᠶ᠋ᠢᠮᠠᠭ ᠤ᠋ᠨ ᠰᠢᠨᠡ ᠪᠠᠷᠭᠤ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ᠋ ᠬᠡᠷᠦᠯᠦᠨ ᠰᠤᠮᠤ ᠶ᠋ᠢᠨ ᠪᠠᠶᠠᠨᠬᠦ᠋ᠷᠢᠶᠡ ᠭᠠᠴᠠᠭᠠᠨ ᠤ᠋ ᠮᠠᠯᠴᠢᠨ
ᠴᠸᠨ ᠬᠤᠪᠢᠰᠬᠠᠯ ᠄ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ᠋ ᠪᠠᠶ᠋ᠢᠰᠢᠩᠲᠤ ᠪᠠᠯᠭᠠᠰᠤᠨ ᠤ᠋ ᠪᠠᠶ᠋ᠢᠰᠢᠩᠲᠤ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠢᠮᠢ ᠶ᠋ᠢᠨ ᠲᠠᠰᠤᠭ ᠤ᠋ᠨ ᠪᠠᠭᠰᠢ
ᠦᠰᠦᠭ ᠬᠢᠨᠠᠭᠴᠢ ᠵᠢᠴᠢ ᠬᠠᠢᠭ
ᠲᠤᠭᠴᠢ ᠰᠠᠷᠠᠨᠠ ᠄ ᠪᠡᠭᠡᠵᠢᠩ ᠬᠣᠲᠠ
ᠮᠥᠴᠢᠷ ᠄ ᠲᠦᠩᠯᠢᠶᠣᠤ ᠬᠣᠲᠠ ᠶ᠋ᠢᠨ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ᠋ ᠲᠦᠯᠡᠭᠡᠨᠲᠠᠯᠠ ᠪᠠᠭᠠ ᠰᠤᠷᠭᠠᠭᠤᠯᠢ
ᠪᠤᠤ ᠿᠦᠩ ᠬᠤᠸᠠ ᠄ ᠲᠦᠩᠯᠢᠶᠣᠤ ᠬᠣᠲᠠ ᠶ᠋ᠢᠨ ᠬᠣᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠬᠣᠶ᠋ᠢᠲᠤ ᠬᠤᠰᠢᠭᠤᠨ ᠤ᠋ ᠨᠤᠭᠤᠰᠤᠲᠠᠢ ᠭᠣᠣᠯ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ
ᠮᠡᠷᠭᠡᠵᠢᠯ ᠦ᠋ᠨ ᠠᠵᠢᠯ ᠊ᠢ ᠵᠢᠯᠣᠭᠣᠳᠤᠭᠴᠢ ᠵᠢᠴᠢ ᠬᠠᠢᠭ
ᠬᠥᠬᠡ ᠮᠣᠩᠭᠣᠯ ( ᠪᠠᠯᠵᠢ ) ᠄ ᠬᠣᠷᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠣᠰᠢᠭᠤ