ᠥᠨᠳᠥᠷᠯᠢᠭ ᠦᠨ ᠥᠩᠭᠡᠲᠦ ᠵᠡᠭᠦᠳᠦ 〈 ᠮᠥᠴᠡᠯᠬᠡ ᠭᠤᠷᠪᠠ 〉- ᠲ ᠂ ᠭᠣᠮᠪᠣᠵᠠᠪ Өндөрлөгийн өнгөт зүүд 〈 Мөчлөг гурав 〉 - Т ᠂ Гомбожав
223ᠥᠨᠳᠥᠷᠯᠢᠭ ᠦᠨ ᠥᠩᠭᠡᠲᠦ ᠵᠡᠭᠦᠳᠦ 〈 ᠮᠥᠴᠡᠯᠬᠡ ᠭᠤᠷᠪᠠ 〉
ᠲᠡᠭᠷᠢ ᠠᠭᠤᠯᠠ ᠶᠢᠨ ᠠᠶᠠᠯᠠᠯ
1
ᠨᠡᠷᠡ ᠶᠢᠨ ᠭᠢᠨᠢ ᠥᠨᠳᠥᠷ ᠢ ᠮᠠᠴᠤᠵᠤ ᠤᠳᠠᠯᠠ
ᠨᠢᠳᠤ ᠮᠢᠨᠢ
ᠨᠢᠭᠡᠨ ᠪᠥᠭᠡᠮ ᠬᠠᠯᠠᠭᠤᠨ ᠭᠦᠰᠡᠯ ᠢ ᠠᠭᠤᠯᠭᠠ ᠬᠦᠨᠳᠦᠬᠡᠨ ᠬᠠᠷᠪᠤᠵᠤ ᠪᠢᠯᠡ
ᠡᠷᠡᠮᠡᠯᠵᠡᠯ᠂ ᠡᠨᠡ ᠭᠡᠰᠡᠭ
ᠡᠪᠦᠷᠳᠦᠯᠡᠵᠤ ᠤᠳᠠᠭᠰᠠᠨ ᠬᠠᠯᠠᠭᠤᠨ ᠴᠢᠠᠯᠭᠤ
ᠡᠴᠦᠰ ᠲᠡᠬᠡᠨ ᠨᠡᠪᠴᠢᠯᠡ
ᠪᠢᠯᠢᠭ ᠦᠨ ᠴᠤᠭᠯᠠᠭᠠᠨ ᠤ ᠠᠯᠲᠠᠨ ᠪᠢᠯᠸᠲ
ᠪᠡᠶᠡᠰ ᠢ ᠮᠢᠨᠢ ᠤᠶ᠋ᠢᠷᠠᠰᠤᠭᠤᠯᠵᠤ
ᠪᠢ ᠡᠳᠦᠭᠡ᠂ ᠥᠨᠳᠥᠷᠯᠢᠭ ᠦᠨ ᠪᠣᠰᠣᠭᠠ ᠨᠢᠷᠤᠭᠤᠨ ᠳᠡᠭᠡᠷᠡ
ᠦᠳᠡ ᠨᠠᠷᠠ ᠲᠠᠢ ᠢᠷᠡᠯᠡ ᠰᠢᠤ
2
ᠡᠮᠦᠨᠡ ᠮᠢᠨᠢ
ᠦᠯᠢᠭᠡᠷ ᠦᠳ ᠦᠨ ᠥᠯ ᠪᠤᠭᠤᠷᠤᠯ ᠴᠤᠭᠯᠠᠭᠠᠨ
ᠡᠭᠦᠯᠡᠨ ᠳᠦ ᠰᠢᠷᠭᠤᠵᠤ ᠬᠠᠷᠠᠭᠳᠠᠨᠠ
ᠦᠩᠭᠡᠷᠡᠵᠤ ᠬᠣᠯᠠᠳᠠᠭᠰᠠᠨ ᠲᠡᠤᠬᠡ ᠶᠢᠨ
ᠥᠭᠦᠯᠡᠪᠦᠷᠢ ᠨᠣᠶ᠋ᠢᠲᠠᠨ ᠳᠤᠷᠠᠳᠬᠠᠯ
ᠥᠭᠡᠳᠡ ᠡᠴᠡ ᠮᠢᠨᠢ ᠠᠰᠬᠠᠷᠠᠵᠤ
ᠨᠠᠮᠠᠢ᠍ᠢ
ᠴᠠᠭ ᠵᠠᠭᠤᠨ ᠤ ᠡᠮᠦᠨᠡ ᠡᠮᠦᠨᠡᠬᠢ
ᠴᠡᠷᠳᠡ ᠶᠢᠨ ᠭᠠᠯᠠᠪ ᠤᠷᠤᠭᠤ ᠳᠦᠯᠬᠢᠨᠡ ᠪᠢᠯᠡ
ᠡᠷᠡᠨ ᠠᠬᠤᠢ ᠶᠢᠨ ᠤᠷᠤᠰᠬᠠᠯ
ᠡᠷᠲᠡ ᠬᠠᠭᠤᠴᠢ ᠶᠢᠨ ᠳᠠᠯᠠᠢ ᠤᠷᠤᠭᠤ ᠪᠣᠳᠣᠯ ᠢ ᠮᠢᠨᠢ ᠠᠪᠠᠴᠢᠯᠠ
ᠪᠢ᠂ ᠪᠢᠯᠢᠭ ᠢ ᠮᠢᠨᠢ ᠬᠦᠩᠭᠡᠷᠡᠳᠡᠯᠡ ᠰᠣᠶ᠋ᠢᠭᠰᠠᠨ
ᠪᠡᠶᠡ ᠡᠴᠡ ᠪᠡᠨ ᠬᠠᠪᠢ ᠦᠭᠡᠢ ᠥᠨᠳᠥᠷ ᠨᠢᠭᠡᠨ ᠨᠡᠷᠡ ᠶᠢ
ᠬᠦᠷᠪᠡᠰᠦᠭᠰᠡᠨ ᠬᠠᠷᠠ ᠤᠰᠤᠨ ᠰᠠᠩ ᠤᠨ
ᠬᠥᠯ ᠦᠭᠡᠢ ᠭᠦᠨ ᠢᠷᠤᠭᠠᠷ ᠠᠴᠠ ᠱᠦᠭᠦᠵᠤ ᠠᠪᠤᠯᠠ ᠠ᠋
3
ᠡᠭᠦᠯᠡ ᠶᠢ
ᠥᠯᠮᠡᠢ ᠳᠣᠣᠷᠠ ᠪᠠᠨ ᠤᠰᠤ ᠴᠢᠬᠠᠷᠲᠠᠯᠠ ᠭᠢᠰᠬᠢᠵᠤ
ᠥᠨᠳᠥᠷᠯᠢᠭ ᠦᠨ ᠦᠰᠴᠤ ᠭᠦᠢᠴᠡᠭᠡ ᠦᠭᠡᠢ
ᠣᠷᠭᠢᠯ ᠤᠳ ᠤᠨ ᠳᠡᠭᠡᠭᠦᠷ
ᠪᠢ ᠰᠡᠳᠬᠢᠯ ᠢᠶ᠋ᠠᠷ ᠢᠶ᠋ᠠᠨ ᠠᠯᠬᠤᠯᠠᠨᠠ
ᠬᠠᠭᠤᠴᠢ ᠬᠤᠯᠠ ᠶᠢᠨ ᠳᠤᠷᠠᠳᠬᠠᠯ
ᠬᠤᠷᠤᠠ ᠴᠢᠩᠨᠠᠨ ᠴᠢᠯᠠᠭᠤᠵᠢᠯᠠ
ᠬᠣᠴᠣᠷᠤᠭᠰᠠᠨ ᠠᠶᠠᠰ ᠨᠢ
ᠬᠠᠶᠠ ᠲᠣᠳᠣᠷᠬᠠᠢ
ᠬᠠᠶᠠ ᠪᠠᠯᠠᠷᠬᠠᠢ ᠬᠠᠷᠠᠭᠳᠠᠨᠠ ᠪᠢᠯᠡ
ᠡᠨᠳᠡ
ᠳᠠᠯᠠᠢ ᠶᠢᠨ ᠤᠰᠤ ᠨᠢᠭᠡᠨᠲᠡ ᠰᠢᠷᠭᠢᠵᠡᠢ
ᠳᠠᠬᠢᠭᠠᠳ ᠯᠠ ᠢᠷᠤᠭᠠᠷᠳᠠᠬᠤ ᠦᠭᠡᠢ ᠭᠡᠰᠡᠨ
ᠳᠠᠷᠤᠵᠤ ᠪᠣᠯᠣᠮᠠ ᠦᠭᠡᠢ ᠰᠠᠨᠠᠭᠠ ᠳᠠᠪᠠᠯᠭᠠᠯᠠᠵᠤ ᠵᠣᠭᠰᠣᠨᠠ ᠠ᠋
ᠪᠦᠷᠭᠦᠳ
ᠪᠥᠮᠪᠥᠷᠴᠡᠭ ᠦᠨ ᠡᠨᠡᠬᠦ ᠭᠠᠯ ᠮᠠᠩᠨᠠᠢ ᠶᠢᠨ ᠣᠷᠭᠢᠵᠤ ᠪᠣᠰᠬᠤ ᠭᠦᠰᠡᠯ
ᠪᠦᠳᠦᠭᠦᠨ ᠬᠦᠷᠡᠩ ᠬᠣᠣᠰ ᠳᠠᠯᠠᠪᠴᠢ ᠪᠠᠨ ᠳᠡᠪᠢᠭᠰᠡᠭᠡᠷ ᠠᠭᠠᠷ ᠰᠤᠮᠤᠳᠠᠨᠠ
ᠡᠨᠡ ᠪᠥᠬᠥᠨ ᠦ ᠳᠡᠭᠡᠭᠦᠷ
ᠤᠷᠲᠤ ᠨᠠᠰᠤᠯᠠᠭᠰᠠᠨ ᠲᠡᠤᠬᠡ ᠶᠢᠨ
ᠤᠬᠠᠭᠠᠨ ᠤ ᠥᠨᠳᠥᠷ ᠳᠦᠪᠰᠢᠨ
ᠤᠶᠠᠩᠭᠠᠨ ᠲᠡᠭᠷᠢ ᠨᠢᠮᠬᠡᠬᠡᠨ ᠬᠠᠷᠠᠭᠳᠠᠨᠠ ᠠ᠋
4
ᠣᠷᠭᠢᠯ ᠳᠠᠮᠵᠢᠨ ᠵᠣᠭᠰᠣᠴᠠ ᠮᠢᠨᠢ ᠦᠨᠳᠦᠷᠯᠡᠵᠤ
ᠣᠭᠲᠠᠷᠭᠤᠢ ᠤᠯᠠᠮ ᠤᠯᠠᠮ ᠴᠡᠩᠬᠡᠷᠯᠡᠯᠡ !
ᠮᠢᠨᠤ
ᠡᠷᠡᠨ ᠠᠬᠤᠢ ᠶᠢᠨ ᠦᠩᠭᠡᠲᠦ ᠱᠤᠭᠤᠮ ᠢᠶ᠋ᠠᠷ ᠰᠦᠯᠵᠢᠭᠰᠡᠨ
ᠡᠷᠡᠭᠦᠯ ᠤᠬᠠᠭᠠᠨ ᠤ ᠮᠢᠨᠢ ᠪᠠᠶᠠᠨ ᠬᠦᠰᠦᠨᠦᠭᠲᠦ
ᠡᠨᠳᠡ᠂ ᠡᠪᠬᠡᠭᠡᠰᠤ ᠪᠠᠨ ᠳᠡᠯᠭᠡᠨᠡ ᠁
ᠪᠣᠳᠣᠯ ᠮᠢᠨᠢ ᠮᠠᠴᠤᠵᠤ ᠬᠦᠷᠦᠮᠡ ᠦᠭᠡᠢ
ᠪᠣᠰᠣᠭᠠ ᠪᠣᠰᠣᠭᠠ ᠣᠷᠭᠢᠯ ᠤᠳ ᠵᠢᠵᠢᠭᠷᠡᠨ ᠪᠦᠳᠡᠭᠢᠷᠡᠵᠤ
ᠪᠤᠤᠷᠠ ᠶᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠢᠰᠬᠢᠷᠴᠤ ᠶᠠᠪᠤᠬᠤ
ᠪᠣᠷᠣ ᠬᠦᠷᠡᠩ ᠵᠠᠯᠠᠭᠤ ᠡᠷᠡ ᠶᠢᠨ ᠪᠠᠷᠠ ᠶᠡᠬᠡᠰᠦᠨ ᠲᠣᠳᠣᠷᠠᠨᠠ
ᠠᠮᠢᠳᠤᠷᠠᠯ ᠤᠨ ᠲᠦᠭᠦᠵᠤ ᠬᠥᠷᠥᠭᠡ ᠦᠭᠡᠢ ᠪᠡᠶ᠋ᠢᠷᠢ ᠥᠭᠡᠳᠡ
ᠠᠮᠢ ᠨᠠᠰᠤᠨ ᠤ ᠪᠠᠶᠠᠨ ᠪᠣᠳᠣᠭ
ᠠᠮᠠᠷᠠᠭ ᠳᠤᠷᠠᠯᠠᠯ ᠤᠨ ᠦᠩᠭᠡᠲᠦ ᠴᠡᠴᠡᠭᠡᠰ ᠢ ᠭᠦᠳᠦᠯᠵᠤ ᠶᠠᠪᠤᠭᠠ
ᠤᠶ᠋ᠢᠭᠤᠷ ᠭᠡᠤᠭᠡᠨ ᠤ ᠢᠨᠢᠶᠡᠮᠰᠦᠭ ᠴᠢᠷᠠᠢ
ᠣᠷᠣᠨ ᠵᠠᠢ ᠶᠢᠨ ᠶᠠᠭᠠᠨ ᠲᠤᠶᠠᠭᠠ ᠲᠡᠯᠡᠷᠡᠨᠡ ᠪᠢᠯᠡ
ᠡᠴᠦᠰ ᠲᠡᠬᠡᠨ
ᠣᠭᠲᠠᠷᠭᠤᠢ ᠪᠠᠭᠠᠨᠠᠲᠠᠭᠰᠠᠨ
ᠠᠭᠤᠯᠠᠰ ᠤᠨ ᠪᠠᠷᠠ ᠵᠠᠮᠬᠠᠷᠠᠨ ᠠᠷᠢᠯᠵᠤ
ᠡᠭᠡᠷᠡᠮᠡ ᠬᠠᠭᠤᠷᠠᠢ ᠴᠥᠯ ᠦᠨ ᠲᠡᠭᠷᠢ ᠥᠭᠡᠳᠡ
ᠡᠨᠡ ᠳᠦᠪᠰᠢᠨ ᠢ ᠡᠷᠭᠦᠵᠤ ᠶᠠᠪᠤᠭᠠ
ᠡᠷᠡ ᠪᠠᠭᠠᠲᠤᠷ ᠨᠢᠭᠡ ᠦᠨᠳᠦᠰᠦᠲᠡᠨ ᠦ
ᠡᠭᠴᠡ ᠪᠣᠰᠣᠭᠠ ᠳᠦᠷᠢ᠂ ᠠᠯᠢᠪᠠ ᠶᠢ ᠡᠵᠡᠯᠡᠵᠤ ᠰᠦᠨᠳᠡᠷᠯᠡᠨᠡ ᠡ ᠁
5
ᠥᠨᠳᠥᠷᠯᠢᠭ ᠦᠨ ᠠᠶᠠᠯᠠᠯ ᠮᠢᠨᠢ ᠦᠳᠳᠡᠷᠬᠡᠨ ᠲᠡᠭᠦᠰᠦᠨᠡ
ᠦᠯᠡᠳᠡᠭᠰᠡᠨ ᠮᠥᠷ ᠮᠢᠨᠢ ᠴᠤ᠌
ᠥᠴᠥᠭᠡᠳᠦᠷ ᠢᠶ᠋ᠠᠨ ᠪᠦᠬᠡᠴᠡᠶ᠋ᠢᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠠᠷᠢᠯᠤᠨᠠ ᠪᠢᠯᠡ
ᠭᠠᠭᠴᠠᠬᠦ
ᠡᠳᠦᠷ ᠰᠥᠨᠢ ᠦᠭᠡᠢ ᠳᠤᠷᠠᠰᠴᠤ ᠶᠠᠪᠤᠬᠤ ᠶᠢᠨ ᠦᠩᠭᠡᠲᠦ ᠵᠣᠭᠣᠭ ᠪᠣᠯᠵᠤ
ᠡᠭᠦᠯᠡᠰ ᠴᠣᠭᠣᠴᠢᠨ ᠵᠣᠭᠰᠣᠬᠤ ᠥᠨᠳᠥᠷᠬᠡᠨ ᠨᠢᠭᠡ ᠨᠡᠷᠡ
ᠰᠡᠳᠬᠢᠯ ᠳᠦ ᠮᠢᠨᠢ ᠭᠡᠷᠡᠯᠲᠦᠵᠤ ᠮᠦᠩᠬᠡᠷᠡᠨᠡ ᠡ
ᠲᠡᠭᠷᠢ ᠠᠭᠤᠯᠠ ᠠ᠋ ! ᠁
ᠲᠩᠷᠢ ᠠᠭᠤᠯᠠ ᠶ᠋ᠢᠨ ᠰᠠᠷᠠ
ᠲᠩᠷᠢ ᠠᠭᠤᠯᠠ ᠶ᠋ᠢᠨ ᠰᠠᠷᠠ
ᠲᠡᠪ ᠲᠡᠷᠭᠡᠯᠬᠡᠨ ᠬᠤᠪᠢ ᠤᠴᠠᠷᠠᠯ ᠳᠠᠯᠠᠯᠤᠭᠰᠠᠭᠠᠷ
ᠲᠩᠷᠢ ᠳ᠋ᠡᠭᠡᠨ ᠮᠠᠨᠲᠤᠯᠠ
ᠲᠦᠮᠡᠨ ᠦᠷᠡ ᠪᠡᠨ ᠨᠣᠶ᠋ᠢᠷ ᠶ᠋ᠢᠠᠷ ᠠᠷᠭᠠᠳᠠᠬᠤ ᠡᠵᠢ ᠶ᠋ᠢᠨ ᠪᠥᠪᠠᠢ ᠰᠢᠭ᠌
ᠲᠡᠭᠦᠨ ᠪ ᠭᠡᠷᠡᠯ ᠳᠦ
ᠡᠲᠦᠷᠵᠢᠨ ᠳᠠᠭᠤᠯᠠᠭᠰᠠᠨ ᠣᠢ ᠶ᠋ᠢᠨ ᠡᠭᠡᠰᠢᠭ ᠡᠭᠦᠷ ᠲᠡᠭᠡᠨ ᠡᠭᠡᠵᠦ
ᠡᠭᠦᠯᠡ ᠳᠠᠭᠠᠵᠤ ᠠᠯᠢᠶᠠᠯᠠᠭᠰᠠᠨ
ᠠᠭᠤᠯᠠᠨ ᠪ ᠰᠠᠯᠬᠢ
ᠡᠪᠡᠰᠦᠨ ᠳ᠋ᠡᠭᠡᠨ ᠰᠢᠷᠭᠤᠯᠠ
ᠦᠨᠳᠦᠷᠯᠢᠭ ᠦ᠋ᠨ ᠠᠯᠢᠪᠠ ᠨᠢᠭᠡᠯᠡ ᠥᠩᠭᠡ ᠪᠠᠷ ᠲᠤᠨᠤᠷᠠᠵᠤ
ᠥᠯᠥᠰᠴᠦ ᠶᠠᠪᠤᠭᠰᠠᠨ ᠰᠡᠳᠬᠢᠯ ᠤᠳ
ᠥᠴᠥᠭᠡᠳᠦᠷ ᠦᠨ ᠪᠣᠯᠵᠣᠭᠠᠨ ᠳ᠋ᠠᠭᠠᠨ ᠦᠨᠦᠰᠦᠯᠴᠡᠵᠦ ᠲᠡᠷᠭᠡᠯᠯᠡᠨᠡ
ᠡᠪᠦᠭᠡᠳ ᠦ᠋ᠨ ᠦᠭᠡ ᠳᠠᠭᠤ ᠴᠥᠭᠡᠷᠡᠵᠦ
ᠥᠨᠭᠭᠡᠷᠡᠭᠰᠡᠨ ᠳᠤᠷᠠᠳᠬᠠᠯ ᠰᠠᠨᠠᠨ ᠪᠣᠲᠣᠯ ᠲᠡᠷᠭᠡᠯᠯᠡᠨᠡ
ᠠᠭᠤᠯᠵᠠᠬᠤ ᠶ᠋ᠢᠨ ᠪᠠᠶᠠᠷ ᠲᠤ
ᠠᠭᠤᠯᠠᠨ ᠴᠢᠯᠠᠭᠤ ᠰᠢᠯᠦᠭ ᠰᠠᠨᠠᠮᠠᠷ
ᠤᠶᠠᠰᠬᠤ ᠶ᠋ᠢᠨ ᠵᠠᠶᠠᠭᠠᠨ ᠳᠦ
ᠥᠨᠥᠴᠢᠨ ᠭᠠᠯᠠᠭᠤ ᠬᠠᠨᠢ ᠳᠤᠷᠠᠰᠤᠮᠠᠷ
ᠲᠡᠪ ᠲᠡᠷᠭᠡᠯᠬᠡᠨ
ᠲᠩᠷᠢ ᠠᠭᠤᠯᠠ ᠶ᠋ᠢᠨ ᠰᠠᠷᠠᠨ ᠪ ᠭᠡᠷᠡᠯ ᠳᠦ ᠂ ᠪᠢ
ᠠᠯᠤᠰ ᠬᠣᠯᠠ ᠶ᠋ᠢᠨ ᠨᠤᠲᠤᠭ
ᠠᠲᠠᠷ ᠦ᠋ᠨ ᠪᠤᠭᠤᠷᠤᠯ ᠤᠭᠰᠠᠭᠠ
ᠠᠯᠢᠶᠠ ᠬᠣᠩᠭᠣᠷᠬᠠᠨ ᠦᠷᠡ ᠪᠡᠨ ᠰᠡᠤᠠᠬᠢᠯ ᠳᠤᠭᠤᠶ᠋ᠢᠬᠠᠨ
ᠳᠤᠷᠠᠰᠴᠤ ᠁
ᠰᠠᠭᠤᠯᠠ ᠡ
ᠲᠡᠭᠷᠢ ᠠᠭᠤᠯᠠ ᠶ᠋ᠢᠨ ᠵᠠᠮ
ᠲᠡᠭᠷᠢ ᠠᠭᠤᠯᠠ ᠶ᠋ᠢᠨ ᠵᠠᠮ
ᠮᠤᠷᠤᠢ ᠰᠠᠷᠤᠢ ᠮᠤᠷᠤᠢ ᠰᠠᠷᠤᠢ ᠡ! ᠁
ᠲᠡᠦᠬᠡ ᠡᠨᠡᠭᠦᠷ ᠶᠠᠪᠤᠵᠤ ᠤᠲᠤᠯᠠ
ᠮᠥᠷ ᠨᠢ
ᠮᠤᠷᠤᠢ ᠰᠠᠷᠤᠢ ᠂ ᠮᠤᠷᠤᠢ ᠰᠠᠷᠤᠢ!
ᠠᠮᠢᠲᠤᠷᠠᠯ ᠡᠨᠡᠭᠦᠷ ᠠᠯᠬᠤᠯᠠᠵᠤ ᠢᠷᠡᠯᠡ
ᠠᠮᠢ ᠨᠠᠰᠤ
ᠮᠤᠷᠤᠢ ᠰᠠᠷᠤᠢ ᠂ ᠮᠤᠷᠤᠢ ᠰᠠᠷᠤᠢ!
ᠠᠲᠤᠭᠤᠴᠢᠨ ᠮᠠᠯᠴᠢᠨ
ᠠᠷᠤ ᠬᠢᠵᠠᠭᠠᠷ ᠦ᠋ᠨ ᠦᠨᠲᠦᠰᠦᠲᠡᠨ ᠡᠨᠡ ᠵᠠᠮ ᠶ᠋ᠢᠠᠷ ᠴᠣᠪᠣᠵᠤ ᠢᠷᠡᠯᠡ
ᠦᠯᠢᠭᠡᠷ ᠨᠢ
ᠮᠤᠷᠤᠢ ᠰᠠᠷᠤᠢ ᠂ ᠮᠤᠷᠤᠢ ᠰᠠᠷᠤᠢ!
ᠪᠠᠯᠠᠷ ᠬᠠᠷᠭᠠᠢ ᠶ᠋ᠢᠨ ᠴᠤᠤᠷᠢᠶᠠ ᠴᠢᠩᠨᠠᠭᠰᠠᠭᠠᠷ
ᠪᠢ ᠡᠨᠡᠭᠦᠷ ᠠᠶᠠᠯᠠᠵᠤ ᠶᠠᠪᠤᠯᠠ
ᠰᠡᠤᠠᠬᠢᠯᠭᠡ ᠮᠢᠨᠢ
ᠮᠤᠷᠤᠢ ᠰᠠᠷᠤᠢ ᠂ ᠮᠤᠷᠤᠢ ᠰᠠᠷᠤᠢ! ᠁
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠲᠩᠷᠢ ᠡᠵᠢ ᠂ ᠴᠣᠯᠮᠣᠨᠲᠤᠶᠠᠭᠠ᠂ ᠲᠤᠭᠴᠢ ᠰᠠᠷᠠᠨᠠ
ᠬᠢᠨᠠᠭᠴᠢ ᠄ ᠴᠣᠯᠮᠣᠨᠲᠤᠶᠠᠭᠠ
2023 ᠂ 5 ᠂ 19 ᠪ ᠡᠲᠦᠷ