ᠮᠣᠩᠭᠣᠯ ᠪᠢᠴᠢᠭ - ᠵ · ᠮᠥᠩᠬᠡᠡᠷᠲᠡᠨᠢ Монгол бичиг - З · Мөнхэрдэнэ
357ᠮᠣᠩᠭᠣᠯ ᠪᠢᠴᠢᠭ
ᠵ · ᠮᠥᠩᠬᠡᠡᠷᠲᠡᠨᠢ
ᠳᠠᠪᠬᠢᠵᠤ ᠪᠠᠶ᠋ᠢᠬ᠋ᠠ ᠠᠲᠤᠭᠤᠨ ᠪ ᠳᠡᠯ ᠰᠡᠭᠦᠯ ᠰᠢᠭ᠌ ᠲᠠᠲᠠᠯᠠᠵᠤ ᠪᠢᠴᠢᠭᠰᠡᠨ
ᠳᠡᠯᠭᠡᠷᠡᠵᠦ ᠪᠠᠶ᠋ᠢᠬ᠋ᠠ ᠴᠡᠴᠡᠭ ᠦ᠋ᠨ ᠳᠤᠰᠤᠯ ᠰᠢᠭᠦᠲᠡᠷᠢ ᠰᠢᠭ᠌ ᠲᠤᠩᠭᠠᠯᠠᠭ ᠪᠢᠴᠢᠭᠰᠡᠨ
ᠳᠡᠭᠦᠯᠢᠵᠦ ᠪᠠᠶ᠋ᠢᠬ᠋ᠠ ᠪᠦᠷᠭᠦᠳ ᠦ᠋ᠨ ᠬᠣᠣᠰ ᠵᠢᠭᠦᠷ ᠰᠢᠭ᠌ ᠬᠦᠴᠦᠲᠡᠢ ᠪᠢᠴᠢᠭᠰᠡᠨ
ᠳᠠᠭᠤᠯᠠᠵᠤ ᠪᠠᠶ᠋ᠢᠬ᠋ᠠ ᡀᠵᠠᠪ ᠦ᠋ᠨ ᠳᠡᠪᠡᠯ ᠪᠦᠰᠡ ᠰᠢᠭ᠌ ᠲᠦᠪ ᠪᠢᠴᠢᠭᠰᠡᠨ
ᠠᠯᠲᠠᠨ ᠬᠡᠷᠡᠭᠡ ᠴᠢᠯᠠᠭᠤᠨ ᠬᠥᠰᠢᠶᠡ ᠵᠢᠷᠦᠬᠡ ᠰᠡᠤᠠᠬᠢᠯ
ᠠᠯᠢ ᠠᠯᠢᠨ ᠳ᠋ᠤ᠌ ᠨᠢ ᠰᠢᠩᠭᠡᠵᠦ ᠦᠯᠡᠳᠡᠭᠰᠡᠨ ᠬᠠᠭᠠᠨ ᠪᠢᠴᠢᠭ
ᠠᠷᠤ ᠥᠪᠥᠷ ᠪᠤᠷᠢᠶᠠᠳ ᠲᠤᠸᠠ ᠣᠶ᠋ᠢᠷᠠᠳ ᠬᠥᠬᠡᠨᠠᠭᠤᠷ
ᠠᠮᠢ ᠠᠮᠢᠨ ᠳ᠋ᠤ᠌ ᠨᠢ ᠠᠭᠤᠰᠴᠤ ᠣᠷᠣᠭᠰᠠᠨ ᠤᠲᠤᠮ ᠪᠢᠴᠢᠭ
ᠣᠲᠣ ᠴᠢᠯᠠᠭᠤ ᠶ᠋ᠢ ᠠᠭᠤᠯᠵᠠᠭᠤᠯᠲᠠᠭ ᠴᠣᠷ ᠦ᠋ᠨ ᠭᠠᠭᠴᠠ ᠬᠣᠯᠪᠣᠬ᠋ᠠ
ᠣᠷᠴᠢᠯᠠᠩ ᠳ᠋ᠤ᠌ ᠪᠢᠲᠡᠨ ᠊ᠢ ᠨᠢᠭᠡᠳᠬᠡᠳᠡᠭ ᠦᠷᠡ ᠶ᠋ᠢᠨ ᠭᠠᠭᠴᠠ ᠳᠠᠯᠪᠠᠬ᠋ᠠ
ᠠᠮᠢᠲᠤ ᠳ᠋ᠠᠭᠠᠨ ᠨᠥᠮᠥᠷᠴᠦ ᠶᠠᠪᠤᠬᠤ ᠲᠩᠷᠢ ᠮᠢᠨᠢ
ᠦᠬᠦᠬᠦ ᠳ᠋ᠡᠭᠡᠨ ᠨᠠᠯᠠᠵᠤ ᠬᠡᠪᠲᠡᠬᠦ ᠭᠠᠵᠠᠷ ᠮᠢᠨᠢ ᠃
ᠢᠯᠠᠭᠤᠭᠰᠠᠨ ᠲᠡᠭᠦᠯᠲᠡᠷ ᠳᠣᠯᠣᠭᠠᠨ ᠡᠷᠲᠡᠨᠢ ᠶ᠋ᠢᠨ ᠡᠭᠡᠰᠢᠭ ᠲᠡᠢ
ᠢᠷᠠᠭᠤ ᠠᠶᠠᠯᠭᠤᠲᠤ ᠬᠣᠷᠢᠨ ᠳᠥᠷᠪᠡᠨ ᠭᠡᠢᠭᠦᠯᠦᠭᠴᠢ ᠲᠡᠢ
ᠡᠷᠡ ᠡᠮᠡ ᠰᠠᠭᠠᠷᠮᠠᠭ ᠠᠷᠬ᠋ᠠ ᠪᠢᠯᠢᠭ ᠦ᠋ᠨ ᠪᠦᠲᠦᠭᠡᠯ ᠲᠡᠢ
ᠡᠬᠢᠨ ᠳᠤᠮᠳᠠ ᠠᠲᠠᠭ ᠳᠦᠷᠰᠦ ᠪᠠᠶᠠᠨ ᠬᠡᠯᠪᠡᠷᠢ ᠲᠡᠢ
ᠲᠢᠲᠢᠮ ᠨᠢᠷᠤᠭᠤ ᠰᠢᠯᠪᠢ ᠬᠥᠮᠦᠨ ᠪ ᠪᠡᠶᠡ ᠶ᠋ᠢᠨ ᠪᠦᠲᠦᠴᠡ ᠲᠡᠢ
ᠳᠡᠪᠢᠰᠭᠡᠷ ᠳᠠᠭᠠᠪᠤᠷᠢ ᠬᠡᠮᠡᠬᠦ ᠨᠠᠷᠢᠨ ᠲᠤᠩᠭᠠᠯᠠᠭ ᠤᠬᠠᠭᠠᠨ ᠲᠠᠢ
ᠶᠢᠰᠦᠨ ᠡᠷᠲᠡᠨᠢ ᠡᠴᠡ ᠦᠨᠡᠲᠡᠢ ᠴᠠᠭᠯᠠᠰᠢ ᠦᠭᠡᠢ ᠳᠡᠭᠡᠳᠦ ᠪᠢᠴᠢᠭ
ᠶᠢᠰᠦᠨ ᠰᠢᠲᠢ ᠪᠡᠷ ᠥᠭᠡᠷᠡᠴᠢᠯᠡᠭᠰᠡᠨ ᠴᠦ᠍ ᠭᠤᠶ᠋ᠢᠪᠢᠰᠢ ᠦᠭᠡᠢ ᠪᠠᠲᠤ ᠪᠢᠴᠢᠭ
ᠡᠭᠡᠯ ᠲᠦᠮᠡᠨ ᠨᠢ ᠦᠶᠡ ᠶ᠋ᠢᠨ ᠦᠶᠡ ᠳ᠋ᠡᠭᠡᠨ ᠬᠠᠶ᠋ᠢᠷᠠᠯᠠᠵᠤ ᠰᠢᠲᠦᠭᠰᠡᠨ
ᠡᠬᠡ ᠶ᠋ᠢᠨ ᠰᠦ᠋ ᠲᠡᠢ ᠰᠢᠮᠡᠵᠦ ᠥᠰᠦᠭᠰᠡᠨ ᠠᠷᠢᠭᠤᠨ ᠪᠢᠴᠢᠭ
ᠡᠷᠲᠡᠮᠲᠦ ᠬᠥᠪᠡᠭᠦᠳ ᠨᠢ ᠦᠷᠡ ᠶ᠋ᠢᠨ ᠦᠷᠡ ᠳ᠋ᠡᠭᠡᠨ ᠬᠠᠮᠠᠭᠠᠯᠠᠵᠤ ᠢᠷᠡᠭᠰᠡᠨ
ᠡᠴᠢᠭᠡ ᠶ᠋ᠢᠨ ᠴᠢᠰᠤ ᠲᠠᠢ ᠠᠰᠬᠠᠷᠠᠵᠤ ᠶᠠᠪᠤᠭᠰᠠᠨ ᠵᠣᠷᠢᠬᠲᠤ ᠪᠢᠴᠢᠭ
ᠲᠣᠲᠣ ᠸᠠᠬᠢᠨᠲᠠᠷᠠ ᠮᠠᠨᠵᠤ ᠣᠯᠠᠨ ᠪᠢᠴᠢᠭ ᠦ᠋ᠨ ᠡᠪᠦᠭᠡ
ᠲᠠᠯᠠ ᠬᠠᠩᠭᠠᠢ ᠭᠣᠪᠢ ᠪᠤᠮᠠᠨ ᠠᠷᠠᠳ ᠦ᠋ᠨ ᠵᠢᠷᠦᠬᠡ
ᠪᠦᠲᠦᠨ ᠪᠠᠶᠠᠨ ᠠ᠋ᠴᠠ ᠠᠰᠬᠠᠷᠠᠬᠤ ᠬᠠᠶ᠋ᠢᠷᠠ ᠮᠢᠨᠢ
ᠪᠦᠬᠦᠨ ᠶ᠋ᠢᠡᠨ ᠳᠤᠷᠠᠲᠠᠢ ᠵᠣᠷᠢᠭᠤᠯᠬᠤ ᠦᠷᠡ ᠮᠢᠨᠢ ᠃
ᠴᠢᠬᠢᠨ ᠪ ᠭᠦᠨ ᠡᠴᠡ ᠵᠢᠮᠢᠰ ᠬᠠᠩᠬᠤᠯᠤᠮᠠᠷ ᠢᠷᠠᠭᠤ ᠰᠣᠨᠣᠰᠬᠤᠯᠠᠩ
ᠴᠡᠭᠡᠵᠢᠨ ᠳᠣᠲᠣᠷᠠ ᠠ᠋ᠴᠠ ᠰᠢᠪᠠᠭᠤ ᠨᠢᠰᠦᠮᠡᠷ ᠤᠷᠠᠨ ᠡᠭᠡᠰᠢᠭᠯᠢᠭ
ᠬᠤᠨᠲᠠᠨ ᠴᠠᠭᠠᠰᠤᠨ ᠠ᠋ᠴᠠ ᠳᠠᠭᠢᠨᠢᠰ ᠠᠮᠢᠯᠠᠮᠠᠷ ᠭᠣᠣᠠ ᠦᠵᠡᠰᠬᠦᠯᠡᠩ
ᠬᠤᠯᠤᠰᠤᠨ ᠦᠵᠦᠭ ᠠ᠋ᠴᠠ ᠰᠣᠯᠣᠩᠬ᠋ᠠ ᠲᠠᠲᠠᠮᠠᠷ ᠦᠨᠡᠨ ᠪᠠᠶᠠᠰᠬᠤᠯᠠᠩ
ᠠᠭᠤᠯᠠ ᠤᠰᠤ ᠡᠪᠡᠰᠦ ᠴᠡᠴᠡᠭ ᠦ᠋ᠨ ᠠᠮᠢᠰᠬᠤᠯ ᠨᠡᠪᠴᠢᠭᠰᠡᠨ
ᠠᠭᠤᠲᠠᠮ ᠳᠡᠯᠡᠬᠡᠢ ᠲᠡᠷᠡ ᠴᠢᠭ᠌ ᠶ᠋ᠢᠡᠷ ᠶ᠋ᠢᠡᠨ ᠦᠨᠦᠷᠲᠦᠬᠦ ᠠᠮᠢᠲᠤ ᠪᠢᠴᠢᠭ
ᠡᠷᠬᠡᠰ ᠭᠠᠷᠠᠭ ᠨᠠᠷᠠᠨ ᠰᠠᠷᠠᠨ ᠪ ᠴᠢᠮᠡᠭᠡ ᠰᠢᠨᠭᠭᠡᠭᠰᠡᠨ
ᠡᠰᠡᠷᠸ᠋ᠠ ᠲᠩᠷᠢ ᠪᠦᠬᠦᠯᠢ ᠪᠡᠷ ᠶ᠋ᠢᠡᠨ ᠰᠣᠨᠣᠰᠤᠭᠲᠠᠬᠤ ᠠᠨᠢᠷᠲᠤ ᠪᠢᠴᠢᠭ
ᠴᠢᠩᠭᠢᠰ ᠭᠥᠶᠥᠭ ᠬᠤᠪᠢᠯᠠᠢ ᠶᠡᠬᠡ ᠬᠠᠭᠠᠳ ᠦ᠋ᠨ ᠵᠠᠷᠯᠢᠬ
ᠴᠢ ᠪᠢᠲᠡ ᠮᠠᠷᠲᠠᠪᠠᠰᠤ ᠴᠢᠮᠡᠭᠡ ᠦᠭᠡᠢ ᠢᠷᠡᠬᠦ ᠡᠷᠯᠢᠭ
ᠣᠷᠣᠢ ᠶ᠋ᠢᠨ ᠳᠡᠭᠡᠳᠦ ᠠᠪᠤ ᠮᠢᠨᠢ ᠪᠢᠯᠡ ᠣᠷᠴᠢᠯᠠᠩ ᠳ᠋ᠤ᠌ ᠭᠠᠭᠴᠠᠬᠠᠨ ᠡᠵᠢ ᠮᠢᠨᠢ ᠪᠢᠯᠡ ᠃
2023.05.05
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠱᠠᠭᠰᠠᠯ
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣᠠ᠋