ᠠᠯᠢᠮᠠ - ᠪ᠂ ᠪᠦᠷᠢᠨᠪᠡᠬᠢ Алим - Б ᠂ Бүрэнбэх
315ᠠᠯᠢᠮᠠ
ᠪ᠂ ᠪᠦᠷᠢᠨᠪᠡᠬᠢ
ᠬᠣᠩᠭᠣᠷ ᠬᠠᠯᠢᠭᠤᠨ ᠭᠠᠯᠠᠭᠤ ᠨᠢ
ᠬᠣᠢᠲᠤ ᠨᠠᠭᠤᠷ ᠲᠠᠭᠠᠨ ᠵᠤᠰᠠᠭᠠᠯᠲᠠᠢ ᠃
ᠬᠤᠨᠠᠨ ᠭᠠᠵᠠᠷ ᠤ᠋ᠨ ᠡᠮᠴᠢ ᠮᠢᠨᠢ
ᠮᠠᠯᠵᠢᠬᠤ ᠣᠷᠣᠨ ᠳ᠋ᠠᠭᠠᠨ ᠰᠠᠭᠤᠭᠠᠯᠢᠲᠠᠢ ᠃
ᠠᠯᠲᠠᠨ ᠴᠣᠮᠣᠷᠯᠢᠭᠲᠤ ᠯᠢᠩᠬᠤᠠ ᠨᠢ
ᠠᠷᠤ ᠶ᠋ᠢᠨ ᠨᠠᠭᠤᠷ ᠲᠠᠭᠠᠨ ᠳᠡᠯᠭᠡᠭᠡᠰᠦᠲᠡᠢ ᠃
ᠠᠷᠠᠳ ᠤ᠋ᠨ ᠰᠠᠢᠨ ᠡᠮᠴᠢ ᠮᠢᠨᠢ
ᠠᠶᠠᠯᠭᠤ ᠰᠢᠯᠦᠭ ᠲᠡᠭᠡᠨ ᠮᠠᠭᠲᠠᠭᠠᠯᠲᠠᠢ ᠃
ᠪᠢ ᠡᠨᠡ ᠠᠷᠠᠳ ᠤ᠋ᠨ ᠳᠠᠭᠤᠤ ᠶ᠋ᠢ ᠳ᠋ᠡᠭᠡᠨ ᠨᠡᠬᠡᠭᠰᠡᠭᠡᠷ ᠠᠶᠠᠯᠠᠭᠤᠯᠤᠨ ᠰᠢᠯᠦᠭᠯᠡᠭᠳᠡᠭᠰᠡᠨ ᠲᠡᠷᠡ ᠡᠮᠴᠢ ᠶ᠋ᠢ ᠰᠤᠷᠠᠭᠯᠠᠨ ᠡᠷᠢᠭᠰᠡᠭᠡᠷ ᠭᠦᠨᠡ ᠴᠡᠩᠬᠡᠷ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡ ᠪᠡᠷ ᠴᠦ᠍ ᠶᠠᠪᠤᠯᠠ ᠂ ᠭᠦᠶᠦᠬᠡᠨ ᠨᠣᠭᠣᠭᠠᠨ ᠬᠠᠪᠤᠷᠵᠢᠶᠠ ᠳᠡᠭᠡᠷᠡ ᠴᠦ᠍ ᠬᠦᠷᠦᠯᠡ ᠂ ᠡᠮᠴᠢ ᠶ᠋ᠢᠨ ᠶᠠᠪᠤᠬᠤ ᠨᠢ ᠳᠠᠭᠤᠤ ᠶ᠋ᠢᠨ ᠬᠦᠪᠦᠬᠦ ᠡᠴᠡ ᠬᠤᠷᠳᠤᠨ ᠲᠤᠯᠠ ᠶᠡᠷᠦᠨᠢ ᠨᠢᠭᠤᠷ ᠵᠣᠯᠭᠠᠵᠤ ᠂ ᠭᠠᠷ ᠪᠠᠷᠢᠯᠴᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠃ ᠬᠥᠮᠦᠰ ᠡᠴᠡ ᠰᠣᠨᠣᠰᠬᠤ ᠳ᠋ᠤ᠌ ᠯᠢ ( ᠮᠣᠩᠭᠣᠯ ᠳ᠋ᠤ᠌ ᠠᠯᠢᠮᠠ ᠭᠡᠰᠡᠨ ᠤᠳᠬᠠ ᠲᠠᠢ ) ᠡᠮᠴᠢ ᠬᠥᠬᠡᠬᠣᠲᠠ ᠶ᠋ᠢᠨ ᠡᠮᠨᠡᠯᠭᠡ ᠶ᠋ᠢᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠮᠣᠩᠭᠣᠯ ᠡᠮᠨᠡᠯᠭᠡ ᠶ᠋ᠢ ᠰᠤᠷᠤᠯᠴᠠᠨ ᠲᠡᠭᠦᠰᠬᠡᠵᠦ ᠦᠵᠦᠮᠦᠴᠢᠨ ᠳ᠋ᠦ᠍ ᠢᠷᠡᠭᠡᠳ ᠨᠢᠭᠡᠨᠲᠡ ᠲᠠᠪᠤᠨ ᠵᠢᠯ ᠰᠢᠬᠠᠭᠤ ᠠᠵᠢᠯᠯᠠᠵᠠᠢ ᠭᠡᠨᠡ ᠃ ᠮᠠᠯᠴᠢᠳ ᠲᠡᠭᠦᠨ ᠢ᠋ ᠨᠢᠭᠡ ᠳ᠋ᠦ᠍ ᠲᠡᠷᠢᠭᠦᠯᠡᠭᠴᠢ ᠶ᠋ᠢᠨ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠦ᠌ ᠬᠥᠮᠦᠨ ᠶᠤᠮ ᠭᠡᠳ ᠂ ᠬᠣᠶᠠᠷ ᠲᠤ᠌ ᠲᠡᠷᠢᠭᠦᠯᠡᠭᠴᠢ ᠶ᠋ᠢᠨ ᠶᠠᠪᠤᠭᠤᠯᠤᠭᠰᠠᠨ ᠡᠮᠴᠢ ᠶᠤᠮ ᠭᠡᠳ ᠭᠤᠷᠪᠠ ᠳ᠋ᠤ᠌ ᠲᠡᠷᠢᠭᠦᠯᠡᠭᠴᠢ ᠶ᠋ᠢᠨ ᠵᠢᠭᠠᠪᠤᠷᠢ ᠳᠠᠭᠠᠭᠠᠯᠭᠠᠪᠤᠷᠢ ᠶ᠋ᠢ ᠰᠠᠢᠲᠤᠷ ᠪᠡᠶᠡᠯᠡᠭᠦᠯᠦᠭᠰᠡᠨ ᠬᠤᠪᠢᠰᠬᠠᠯᠴᠢ ᠵᠠᠯᠠᠭᠤ ᠶᠤᠮ ᠭᠡᠳ ᠰᠡᠳᠬᠢᠯ ᠵᠢᠷᠦᠬᠡᠨ ᠠᠴᠠ ᠢ᠋ᠶ᠋ᠡᠨ ᠳᠣᠲᠣᠨᠣᠴᠢᠯᠠᠨ ᠬᠠᠢᠷᠠᠯᠠᠨᠠ ᠃
ᠦᠵᠦᠮᠦᠴᠢᠨ ᠨᠤᠲᠤᠭ ᠢ᠋ᠶ᠋ᠠᠷ ᠢᠷᠡᠵᠦ ᠪᠠᠢᠭᠠᠳ ᠡᠢᠮᠦ ᠨᠥᠬᠥᠷ ᠲᠡᠢ ᠤᠴᠠᠷᠠᠬᠤ ᠦᠭᠡᠢ ᠪᠡᠷ ᠪᠤᠴᠠᠵᠤ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ ᠃ ᠯᠢ ᠡᠮᠴᠢ ᠨᠢᠭᠡᠳᠦᠯ ᠳᠡᠭᠡᠷᠡ ᠪᠡᠨ ᠬᠡᠵᠢᠶᠡᠳᠡ ᠰᠠᠭᠤᠳᠠᠭ ᠦᠭᠡᠢ ᠲᠤᠯᠠ ᠲᠡᠭᠦᠨ ᠢ᠋ ᠰᠤᠷᠪᠤᠯᠵᠢᠯᠠᠶᠠ ᠭᠡᠪᠡᠯ ᠮᠠᠯᠴᠢᠳ ᠤ᠋ᠨ ᠭᠡᠷ ᠢ᠋ᠶ᠋ᠡᠷ ᠡᠷᠢᠬᠦ ᠬᠡᠷᠡᠭᠲᠡᠢ ᠃ ᠨᠢᠭᠡᠳᠦᠯ ᠳᠡᠭᠡᠷᠡ ᠢᠷᠡᠭᠰᠡᠨ ᠪᠠᠷᠢᠭᠠᠳᠠ ᠶ᠋ᠢᠨ ᠭᠠᠨᠪᠦ᠋ ᠪᠠ ᠮᠠᠯᠴᠢᠳ ᠠᠴᠠ ᠲᠡᠭᠦᠨ ᠦ᠌ ᠰᠤᠷᠠᠭ ᠢ᠋ ᠰᠠᠢᠬᠠᠨ ᠯᠠᠪᠯᠠᠭᠠᠳ ᠴᠢᠯᠠᠭᠤᠲᠤ ᠪᠠᠷᠢᠭᠠᠳᠠ ᠶ᠋ᠢᠨ ᠬᠣᠶᠠᠳᠤᠭᠠᠷ ᠬᠣᠲᠠ ᠳ᠋ᠤ᠌ ᠬᠦᠷᠦᠯᠡ ᠃ ᠡᠨᠡ ᠬᠣᠲᠠᠨ ᠳ᠋ᠤ᠌ ᠰᠠᠭᠤᠳᠠᠭ ᠨᠢᠷᠤᠭᠤ ᠬᠥᠯ ᠬᠠᠭᠤᠴᠢᠨ ᠲᠠᠢ ᠪᠡᠯᠪᠡᠰᠦᠨ ᠡᠵᠢ ᠲᠦᠭᠢᠮᠡ ᠲᠡᠢ ᠪᠢ ᠡᠮᠦᠨᠡ ᠬᠡᠳᠦᠨ ᠵᠢᠯ ᠲᠠᠨᠢᠯᠴᠠᠭᠰᠠᠨ ᠪᠢᠯᠡ ᠃ ᠲᠠᠨᠢᠯ ᠳᠡᠭᠡᠷᠡ ᠪᠡᠨ ᠡᠪᠡᠳᠴᠢᠨ ᠬᠠᠭᠤᠴᠢᠨ ᠲᠠᠢ ᠤᠴᠢᠷ ᠲᠡᠭᠦᠨ ᠦ᠌ ᠳ᠋ᠦ᠍ ᠪᠠᠭᠤᠪᠠᠯ ᠡᠮᠴᠢ ᠶ᠋ᠢ ᠰᠤᠷᠠᠭᠯᠠᠬᠤ ᠳ᠋ᠤ᠌ ᠳᠥᠭᠥᠮ ᠭᠡᠵᠦ ᠪᠣᠳᠣᠭᠠᠳ ᠲᠦᠭᠢᠮᠡ ᠡᠵᠢ ᠶ᠋ᠢᠨ ᠳ᠋ᠦ᠍ ᠪᠠᠭᠤᠯᠠ ᠃ ᠡᠵᠢ ᠶ᠋ᠢᠨ ᠬᠥᠳᠡᠯᠵᠦ ᠪᠠᠷᠢᠬᠤ ᠠᠴᠠ ᠦᠵᠡᠪᠡᠯ ᠬᠠᠷᠢᠨ ᠡᠪᠡᠳᠴᠢᠨ ᠬᠠᠭᠤᠴᠢᠨ ᠲᠠᠢ ᠬᠥᠮᠦᠨ ᠦ᠌ ᠰᠢᠨᠵᠢ ᠦᠭᠡᠢ ᠂ ᠠᠭᠳᠤᠭᠠᠷ ᠨᠢᠷᠤᠭᠤ ᠨᠢ ᠳᠡᠨᠢᠭᠡᠳ ᠠᠯᠬᠤᠵᠤ ᠭᠢᠰᠬᠢᠬᠦ ᠨᠢ ᠬᠦᠩᠭᠡᠷᠡᠴᠢᠵᠢ ᠃ ᠶᠠᠷᠢᠯᠴᠠᠭᠠᠨ ᠤ᠋ ᠳᠤᠮᠳᠠ ᠡᠵᠢ᠄
《 ᠨᠢᠭᠡᠳᠦᠯ ᠡᠴᠡ ᠢᠷᠡᠪᠡᠦ ᠬᠡᠦᠬᠡ 》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠂
《 ᠨᠢᠭᠡᠳᠦᠯ ᠡᠴᠡ ᠢᠷᠡᠵᠡᠢ 》 ᠭᠡᠪᠡ ᠃
《 ᠠᠯᠢᠮᠠ ᠬᠦᠦ ᠮᠢᠨᠢ ᠨᠢᠭᠡᠳᠦᠯ ᠳ᠋ᠡᠭᠡᠨ ᠪᠤᠴᠠᠪᠠᠤ 》 ᠠᠯᠢᠮᠠ ᠬᠦᠦ ᠭᠡᠨᠡ ᠲᠦᠭᠢᠮᠡ ᠡᠵᠢ ᠦᠷᠡ ᠬᠡᠦᠬᠡᠳ ᠦᠭᠡᠢ ᠪᠥᠭᠡᠳ ᠤᠷᠤᠭ ᠰᠠᠳᠤᠨ ᠴᠦ᠍ ᠡᠨᠡ ᠭᠠᠵᠠᠷ ᠪᠠᠢᠬᠤ ᠦᠭᠡᠢ ᠶᠢ ᠪᠢ ᠮᠡᠳᠡᠬᠦ ᠲᠤᠯᠠ ᠡᠭᠦᠨ ᠢ᠋ ᠲᠦᠳᠡᠭᠡᠯᠵᠡᠨ ᠪᠠᠢᠲᠠᠯᠠ ᠂ ᠡᠵᠢ ᠬᠡᠳᠦᠢᠨ ᠤᠴᠢᠷ ᠢ᠋ ᠮᠡᠳᠡᠭᠰᠡᠨ ᠶᠤᠮ ᠰᠢᠭ ᠶᠡᠬᠡ ᠯᠡ ᠶᠤᠭᠲᠠᠷᠠᠬᠣᠨ ᠢ᠋ᠶ᠋ᠠᠷ ᠄
《 ᠠᠯᠢᠮᠠ ᠬᠦᠦ ᠪᠢᠳᠡ ᠬᠣᠶᠠᠷ ᠪᠣᠯ ᠤᠷᠤᠭ ᠰᠠᠳᠤᠨ ᠤ᠋ ᠬᠣᠯᠪᠣᠭᠠᠲᠠᠨ ᠪᠢᠰᠢ ᠂ ᠣᠶᠤᠨ ᠵᠢᠷᠦᠬᠡᠨ ᠦ᠌ ᠪᠠᠷᠢᠯᠳᠣᠯᠭᠠᠲᠠᠨ ᠶᠤᠮ ᠰᠢᠦ 》 ᠭᠡᠳ ᠄
《ᠬᠠᠪᠤᠷ ᠴᠠᠭ ᠬᠠᠷᠠᠰᠤ ᠪᠣᠷᠤᠰᠤ ᠂ ᠪᠢ ᠡᠪᠦᠯ ᠦ᠋ᠨ ᠢᠳᠡᠰᠢᠨ ᠦ᠌ ᠪᠡᠨ ᠢᠷᠣᠭᠠᠷ ᠰᠢᠪᠬᠠᠷᠤᠤ ᠶ᠋ᠢ ᠬᠤᠷᠢᠶᠠᠬᠤ ᠳ᠋ᠠᠭᠠᠨ ᠭᠠᠭᠴᠠᠬᠠᠨ ᠬᠣᠨᠢᠨ ᠡᠪᠴᠢᠭᠦᠦ ᠪᠠᠢᠭᠰᠠᠨ ᠢ᠋ ᠪᠣᠯᠭᠠᠴᠢᠬᠠᠭᠠᠳ ᠬᠦᠦ ᠪᠡᠨ ᠪᠠᠷᠠ ᠬᠠᠷᠠᠵᠤ ᠰᠠᠭᠤᠨᠠ ᠃ ᠬᠦᠦ ᠮᠢᠨᠢ ᠣᠢᠷᠠ ᠳ᠋ᠤ᠌ ᠶᠡᠷᠦᠨᠢ ᠢᠷᠡᠭᠰᠡᠨ ᠦᠭᠡᠢ ᠂ ᠡᠷᠲᠡᠯᠡᠵᠦ ᠣᠷᠣᠢᠯᠠᠵᠤ ᠶᠠᠪᠤᠭᠰᠠᠭᠠᠷ ᠮᠠᠷᠢᠶᠠ ᠮᠢᠬᠠ ᠪᠠᠨ ᠰᠢᠭᠣᠷᠠᠭᠣᠯᠴᠢᠯᠡ ᠭᠡᠰᠡᠨ ᠴᠢᠮᠡᠭᠡ ᠲᠡᠢ ᠃ ᠬᠢᠲᠤᠭᠠ ᠬᠡᠳᠦᠢ ᠬᠤᠷᠴᠠ ᠪᠣᠯᠪᠠᠴᠤ ᠡᠰᠢᠨ ᠢ᠋ᠶ᠋ᠡᠨ ᠲᠤᠰᠠ ᠦᠭᠡᠢ ᠭᠡᠵᠡᠢ ᠂ ᠡᠮᠴᠢ ᠬᠥᠮᠦᠨ ᠦ᠌ ᠡᠮ ᠨᠢ ᠪᠡᠶᠡ ᠳ᠋ᠤᠨᠢ ᠭᠦᠶᠦᠬᠦ ᠦᠭᠡᠢ ᠶᠤᠮ ᠰᠢᠦ ᠁ 》 ᠭᠡᠵᠦ ᠡᠵᠢ ᠶ᠋ᠢ ᠦᠷᠭᠦᠯᠵᠢᠯᠡᠨ ᠶᠠᠷᠢᠵᠤ ᠪᠠᠢᠲᠠᠯᠠ ᠵᠡᠷᠭᠡᠯᠡᠳᠡᠭᠡ ᠭᠡᠷ ᠤᠨ ᠨᠢᠭᠡ ᠡᠪᠦᠭᠡᠵᠢᠶᠡᠷ ᠬᠥᠮᠦᠨ ᠣᠷᠣᠵᠤ ᠢᠷᠡᠭᠡᠳ ᠄
《 ᠲᠦᠭᠢᠮᠡ ᠭᠤᠸᠠᠢ ᠂ ᠮᠠᠨ ᠤ᠋ ᠯᠢ ᠡᠭᠦᠨ ᠢ᠋ᠶ᠋ᠡᠷ ᠢᠷᠡᠬᠦ ᠭᠡᠨᠡ ᠦᠦ ?》 ᠭᠡᠵᠦ ᠬᠡᠳᠦᠢᠪᠡᠷ ᠡᠮᠡᠭᠡᠨ ᠡᠴᠡ ᠠᠰᠠᠭᠤᠭᠰᠠᠨ ᠪᠣᠯᠪᠠᠴᠤ ᠨᠢᠳᠦ ᠨᠢ ᠮᠢᠨᠦ ᠳᠡᠭᠡᠷᠡ ᠲᠤᠰᠤᠨᠠ ᠃ ᠨᠠᠮᠠᠶ᠋ᠢ ᠯᠠᠪ ᠣᠯᠠᠨ ᠢ᠋ ᠲᠣᠭᠣᠷᠢᠭᠰᠠᠨ ᠬᠥᠮᠦᠨ ᠲᠤᠯᠠ ᠯᠢ ᠡᠮᠴᠢ ᠶ᠋ᠢᠨ ᠲᠤᠬᠠᠢᠳᠢ ᠴᠢᠮᠡᠭᠡ ᠮᠡᠳᠡᠬᠦ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠤᠯᠲᠠᠢ᠃
《 ᠡᠷᠡᠭᠦᠯ ᠬᠥᠮᠦᠨ ᠡᠮᠴᠢ ᠡᠷᠢᠳᠡᠭ ᠦᠭᠡᠢ ᠂ ᠡᠮᠨᠢᠭ ᠮᠣᠷᠢ ᠵᠠᠮ ᠡᠷᠢᠳᠡᠭ ᠦᠭᠡᠢ ᠭᠡᠵᠢ ᠂ ᠴᠢ ᠴᠢᠨᠢ ᠡᠷᠡᠭᠦᠯ ᠮᠡᠨᠳᠦ ᠪᠠᠢᠭᠠ ᠪᠢᠰᠢ ᠶᠤᠮ ᠦᠦ ? 》 ᠭᠡᠵᠦ ᠡᠮᠡᠭᠡᠨ ᠡᠵᠢ ᠡᠴᠡ ᠨᠠᠭᠠᠳᠤᠮ ᠪᠣᠯᠭᠠᠨ ᠬᠡᠯᠡᠬᠦ ᠳ᠋ᠦ᠍᠂
《 ᠪᠣᠯᠵᠣᠮᠣᠷ ᠰᠢᠪᠠᠭᠤ ᠪᠤᠷᠭᠠᠰᠤ ᠪᠠᠨ ᠮᠠᠷᠲᠠᠳᠠᠭ ᠦᠭᠡᠢ ᠂ ᠪᠤᠭᠤ ᠭᠥᠷᠥᠭᠡᠰᠦ ᠪᠤᠯᠠᠭ ᠢ᠋ᠶ᠋ᠠᠨ ᠮᠠᠷᠲᠠᠳᠠᠭ ᠦᠭᠡᠢ ᠭᠡᠵᠢ ᠂ ᠡᠮᠵᠡᠭᠲᠡᠢ ᠪᠡᠶᠡ ᠴᠢᠨᠢ ᠡᠷᠡᠭᠦᠯᠵᠢᠭᠰᠡᠨ ᠡᠴᠡ ᠬᠣᠢᠰᠢ ᠡᠮᠴᠢ ᠪᠡᠨ ᠲᠠᠭ ᠮᠠᠷᠲᠠᠴᠢᠪᠡᠦ ᠴᠢ 》 ᠭᠡᠰᠡᠨ ᠡᠪᠦᠭᠡᠨ ᠦ᠌ ᠬᠦᠴᠦᠲᠦ ᠬᠠᠷᠢᠭᠤᠯᠲᠠ ᠨᠢ ᠡᠵᠢ ᠳ᠋ᠦ᠍ ᠶᠡᠬᠡᠯᠡ ᠲᠠᠭᠠᠯᠠᠮᠵᠢᠲᠠᠢ ᠪᠣᠳᠣᠭᠳᠠᠭᠰᠠᠨ ᠶᠤᠮ ᠰᠢᠭ᠋ ᠲᠡᠰᠬᠡᠯ ᠦᠭᠡᠢ ᠢᠨᠢᠶᠡᠪᠡ᠃
《 ᠵᠠᠶᠠᠭᠠ ᠦᠭᠡᠢ ᠬᠥᠮᠦᠨ ᠵᠠᠮ ᠳᠡᠭᠡᠷᠡ ᠠᠭᠤᠯᠵᠠᠬᠤ ᠦᠭᠡᠢ ᠃ ᠵᠢᠭᠠᠷ ᠦᠭᠡᠢ ᠪᠡᠬᠡ ᠴᠠᠭᠠᠰᠤᠨ ᠳᠡᠭᠡᠷᠡ ᠰᠠᠭᠤᠬᠤ ᠦᠭᠡᠢ ᠭᠡᠵᠢ ᠂ ᠴᠢᠩᠭᠢᠪᠡᠯ ᠪᠢᠳᠡ ᠭᠤᠷᠪᠠᠭᠤᠯᠠ ᠪᠠᠨ ᠴᠥᠮ ᠯᠢ ᠡᠮᠴᠢ ᠶ᠋ᠢᠨ ᠡᠷᠢᠯᠴᠢᠨ ᠪᠠᠢᠭᠠ ᠶᠤᠮ ᠪᠠᠢᠨᠠ ᠰᠢᠦ 》 ᠭᠡᠵᠦ ᠪᠢ ᠬᠡᠯᠡᠭᠡᠳ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠢᠨᠢᠶᠡᠯᠴᠡᠵᠡᠭᠡᠪᠡ
ᠡᠨᠡ ᠬᠣᠶᠠᠷ ᠡᠳᠦᠷ ᠯᠢ ᠡᠮᠴᠢ ᠭᠤᠷᠪᠠᠳᠤᠭᠠᠷ ᠬᠣᠲᠠ ᠪᠠᠷ ᠢᠷᠡᠬᠦ ᠴᠢᠮᠡᠭᠡ ᠲᠡᠢ ᠭᠡᠳᠡᠭ ᠢ᠋ ᠪᠢ ᠲᠡᠷᠡ ᠡᠪᠦᠭᠡᠨ ᠡᠴᠡ ᠯᠠᠪᠲᠠᠢ ᠰᠣᠨᠣᠰᠴᠠᠢ ᠃ ᠶᠠᠭᠤ ᠪᠣᠯᠤᠭᠰᠠᠨ ᠴᠤ᠌ ᠭᠤᠷᠪᠠᠳᠤᠭᠠᠷ ᠬᠣᠲᠠ ᠪᠠᠰᠠ ᠡᠨᠳᠡ ᠡᠴᠡ ᠣᠢᠷᠠᠬᠠᠨ ᠶᠦ᠍ᠮ ᠴᠢᠨᠢ ᠣᠴᠢᠵᠤ ᠦᠵᠡᠶᠡ ᠭᠡᠵᠦ ᠪᠣᠳᠣᠭᠠᠳ ᠴᠠᠢ ᠤᠤᠭᠤᠵᠤ ᠮᠣᠷᠢ ᠪᠠᠨ ᠠᠮᠠᠷᠠᠭᠠᠭᠠᠳ ᠳᠠᠬᠢᠨ ᠵᠠᠮ ᠬᠥᠭᠡᠭᠡᠯᠡ ᠃ ᠦᠵᠦᠮᠦᠴᠢᠨ ᠨᠤᠲᠤᠭ ᠤ᠋ᠨ ᠬᠠᠪᠤᠷ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠪᠣᠢ᠃ ᠠᠯᠤᠰ ᠬᠠᠢᠷᠬᠠᠨ ᠤ ᠣᠷᠭᠢᠯ ᠳᠡᠭᠡᠷᠡᠬᠢ ᠮᠥᠩᠭᠥᠨ ᠴᠠᠭᠠᠨ ᠴᠠᠰᠤ᠃ ᠠᠲᠠᠷ ᠲᠠᠯᠠ ᠶ᠋ᠢᠨ ᠪᠡᠯᠴᠢᠭᠡᠷ ᠳᠡᠭᠡᠭᠦᠷᠬᠢ ᠰᠢᠩᠭᠡᠨ ᠨᠣᠭᠣᠭᠠᠨ ᠤᠨᠢᠶᠠᠷ᠃ ᠴᠡᠩᠬᠡᠷ ᠨᠠᠭᠤᠷ ᠤ᠋ᠨ ᠲᠣᠭᠣᠷᠢᠨ ᠪᠡᠯᠴᠢᠭᠰᠡᠨ ᠬᠤᠷᠠᠭᠠ ᠢᠰᠢᠭᠡᠨ ᠦ᠌ ᠰᠦᠷᠦᠭ᠃ ᠴᠡᠭᠡᠨ ᠵᠠᠮ ᠢ᠋ᠶ᠋ᠠᠷ ᠨᠢᠰᠦᠨ ᠳᠠᠪᠬᠢᠭᠰᠠᠨ ᠮᠠᠰᠢᠨ ᠲᠡᠷᠭᠡᠨ ᠦ᠌ ᠴᠤᠪᠤᠭᠠ᠃ ᠡᠳᠡᠭᠡᠷ ᠰᠠᠢᠬᠠᠨ ᠦᠵᠡᠮᠵᠢ ᠪᠠᠢᠳᠠᠯ ᠳ᠋ᠦ᠍ ᠰᠡᠳᠬᠢᠯ ᠬᠣᠷᠭᠣᠳᠠᠭᠰᠠᠭᠠᠷ ᠮᠣᠷᠢ ᠪᠠᠨ ᠠᠭᠠᠵᠢᠭᠤ ᠠᠯᠬᠤᠭᠤᠯᠤᠨ ᠶᠠᠪᠤᠲᠠᠯᠠ ᠭᠡᠨᠡᠳᠲᠡ ᠲᠡᠮᠡᠭᠡ ᠪᠤᠢᠯᠠᠬᠤ ᠳᠠᠭᠤᠨ ᠰᠣᠨᠣᠰᠳᠠᠨᠠ᠃ ᠯᠠᠪᠯᠠᠨ ᠠᠵᠢᠭᠯᠠᠪᠠᠯ ᠂ ᠡᠮᠦᠨᠡ ᠬᠣᠲᠣᠭᠣᠷ ᠲᠤ᠌ ᠨᠢᠭᠡ ᠲᠡᠮᠡᠭᠡᠲᠡᠢ ᠬᠥᠮᠦᠨ ᠴᠠᠰᠢ ᠲᠡᠰᠢᠭᠦᠯᠦᠨᠡ ᠃ ᠬᠠᠨᠢ ᠲᠠᠢ ᠶᠠᠪᠤᠨᠠ ᠭᠡᠵᠦ ᠪᠣᠳᠣᠭᠠᠳ ᠮᠣᠷᠢ ᠪᠠᠨ ᠱᠣᠭᠰᠢᠭᠤᠯᠤᠨ ᠭᠦᠢᠴᠡᠵᠦ ᠬᠦᠷᠦᠭᠡᠳ ᠮᠡᠨᠳᠦ ᠰᠠᠢᠨ ᠢᠶᠠᠨ ᠠᠰᠠᠭᠤᠯᠴᠠᠪᠠ ᠃ ᠬᠠᠨᠢᠳᠠᠨ ᠢ᠋ᠶ᠋ᠠᠨ ᠯᠠᠪᠯᠠᠨ ᠦᠵᠡᠪᠡᠯ ᠨᠢᠭᠤᠷ ᠤ᠋ᠨ ᠬᠢᠨᠢ ᠮᠢᠬᠠᠨ ᠰᠢᠷᠭᠢᠭ ᠨᠠᠷᠢᠨ ᠪᠥᠭᠡᠳ ᠥᠩᠭᠡ ᠵᠢᠰᠦ ᠪᠡᠷ ᠭᠤᠸᠠᠯᠢᠭ ᠪᠣᠯᠪᠠᠴᠤ ᠨᠠᠷᠠ ᠬᠤᠷᠠ ᠰᠠᠯᠬᠢ ᠰᠢᠭᠤᠷᠭᠠ ᠳ᠋ᠤ᠌ ᠶᠠᠪᠤᠭᠰᠠᠭᠠᠷ ᠴᠢᠷᠠᠢ ᠨᠢ ᠨᠢᠭᠡᠨᠲᠡ ᠪᠣᠯᠪᠠᠰᠤᠷᠠᠭᠰᠠᠨ ᠬᠦᠷᠡᠯ ᠰᠢᠭ ᠪᠣᠷᠣ ᠬᠠᠷᠠ ᠪᠣᠯᠴᠢᠵᠠᠢ ᠃ ᠨᠠᠰᠤ ᠨᠢ ᠠᠭᠳᠠᠬᠤ ᠳ᠋ᠠᠭᠠᠨ ᠬᠣᠷᠢᠨ ᠳᠣᠯᠣᠭᠠ ᠨᠠᠢ᠍ᠮᠠ ᠶ᠋ᠢ ᠬᠡᠲᠦᠷᠡᠭᠡᠳᠦᠢ ᠃ ᠥᠩᠭᠡ ᠵᠢᠰᠦ ᠶ᠋ᠢ ᠨᠢ ᠦᠵᠡᠪᠡᠯ ᠲᠠᠷᠢᠶᠠᠯᠠᠬᠤ ᠣᠷᠣᠨ ᠤ᠋ ᠬᠥᠮᠦᠨ ᠰᠢᠭ ᠪᠣᠯᠪᠠᠴᠤ ᠦᠭᠡ ᠶᠠᠷᠢᠭᠠ ᠶ᠋ᠢ ᠨᠢ ᠰᠣᠨᠣᠰᠪᠠᠯ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠦ᠌ ᠮᠠᠶᠢᠭ ᠲᠠᠢ ᠃ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠡᠨ ᠢᠰᠡᠭᠡᠢ ᠤᠭᠤᠲᠠ ᠲᠠᠢ ᠬᠡᠳᠦᠨ ᠨᠣᠢᠲᠠᠨ ᠬᠤᠷᠠᠭᠠ ᠢᠰᠢᠭᠡ ᠡᠭᠦᠷᠴᠢᠵᠡᠢ ᠃ ᠬᠥᠭᠡᠷᠦᠬᠦᠢ ᠲᠡᠳᠡᠭᠡᠷ ᠬᠤᠷᠠᠭᠠ ᠢᠰᠢᠭᠡ ᠲᠡᠮᠡᠭᠡᠨ ᠦ᠌ ᠲᠠᠰᠢᠯᠲᠠ ᠲᠠᠢ ᠬᠠᠮᠰᠠᠷᠠᠭᠤᠯᠤᠨ ᠪᠠᠢᠨ ᠪᠠᠢᠨ ᠨᠢᠷᠠᠢ ᠳᠠᠭᠤᠨ ᠢ᠋ᠶ᠋ᠠᠷ ᠮᠠᠢᠯᠠᠯᠳᠤᠨᠠ ᠃ ᠬᠡᠭᠡᠷᠡ ᠰᠠᠶ᠋ᠢᠬᠠᠨ ᠲᠣᠰᠴᠤ ᠠᠪᠤᠭᠠᠳ ᠡᠬᠡ ᠳ᠋ᠦ᠍ᠨᠢ ᠬᠦᠬᠦᠯᠦᠭᠡᠳᠦᠢ ᠪᠣᠯᠤᠯᠲᠠᠢ ᠃ ᠲᠡᠨᠡᠢᠲᠡᠯᠡ ᠶᠠᠭᠤᠮᠠ ᠴᠢᠬᠢᠴᠢᠭᠰᠡᠨ ᠢᠯᠭᠢᠨ ᠠᠷᠠᠰᠤᠨ ᠴᠢᠨᠳᠠᠭᠠᠰᠤ ᠶ᠋ᠢ ᠲᠡᠮᠡᠭᠡᠨ ᠳᠡᠭᠡᠷᠡ ᠪᠡᠨ ᠠᠴᠢᠵᠠᠢ ᠃ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠶ᠋ᠢᠨ ᠠᠮᠠᠰᠠᠷ ᠢ᠋ᠶ᠋ᠠᠷ ᠡᠯᠳᠡᠪ ᠦ᠋ᠨ ᠰᠠᠢᠬᠠᠨ ᠵᠢᠷᠤᠭᠲᠤ ᠰᠡᠳᠬᠦᠯ ᠂ ᠮᠣᠩᠭᠣᠯ ᠰᠣᠨᠢᠨ ᠤ᠋ ᠥᠨᠴᠥᠭ ᠬᠥᠪᠡᠭᠡ ᠦᠵᠡᠭᠳᠡᠨᠡ ᠃ ᠬᠤᠷᠠᠭᠠ ᠡᠭᠦᠷᠴᠦ ᠪᠠᠢᠬᠤ ᠪᠠᠷ ᠨᠢ ᠦᠵᠡᠪᠡᠯ ᠬᠣᠨᠢᠴᠢᠨ ᠶᠤᠮ ᠰᠢᠭ᠋ ᠂ ᠬᠤᠳᠠᠢ ᠰᠣᠨᠢᠨ ᠰᠡᠳᠬᠦᠯ ᠢ᠋ᠶ᠋ᠡᠷ ᠨᠢ ᠳᠠᠭᠠᠪᠠᠯ ᠰᠢᠤᠳᠠᠨᠴᠢ ᠴᠤ᠌ ᠶᠤᠮ ᠰᠢᠭ᠋ ᠃ ᠶᠠᠭᠤ ᠪᠣᠯᠤᠭᠰᠠᠨ ᠴᠤ᠌ ᠮᠢᠨᠦ ᠣᠴᠢᠬᠤ ᠬᠣᠲᠠ ᠳ᠋ᠤ᠌ ᠲᠡᠷᠡ ᠪᠠᠰᠠ ᠣᠴᠢᠬᠤ ᠲᠤᠯᠠ ᠪᠢ ᠲᠡᠭᠦᠨ ᠢ᠋ ᠳᠠᠭᠠᠨ ᠶᠠᠪᠤᠯᠠ ᠃
《 ᠲᠠ ᠬᠣᠨᠢᠨ ᠳᠡᠭᠡᠷᠡ ᠡᠴᠡ ᠢᠷᠡᠪᠡᠦ 》
《 ᠦᠭᠡᠢ! ᠳᠠᠭᠠᠷᠢᠭᠠᠳ ᠢᠷᠡᠬᠦ ᠳ᠋ᠦ᠍ ᠬᠣᠨᠢᠴᠢᠨ ᠭᠤᠸᠠᠢ ᠮᠢᠨᠢ ᠬᠤᠷᠠᠭᠠ ᠲᠣᠰᠤᠭᠠᠳ ᠲᠡᠪᠡᠳᠡᠵᠦ ᠪᠠᠢᠬᠤ ᠲᠤᠯᠠ ᠨᠣᠢᠲᠠᠨ ᠬᠤᠷᠠᠭᠠ ᠶ᠋ᠢ ᠨᠢ ᠪᠢ ᠵᠠᠮ ᠳᠠᠭᠠᠤ ᠳ᠋ᠠᠭᠠᠨ ᠬᠣᠲᠠ ᠳᠡᠭᠡᠷᠡ ᠬᠦᠷᠭᠡᠵᠦ ᠥᠭᠬᠦᠶᠡ ᠭᠡᠰᠡᠨ ᠶᠦ᠍ᠮ ᠠ᠋ 》
《 ᠠ ᠂ ᠲᠠ ᠴᠢᠨᠢ ᠲᠡᠭᠡᠪᠡᠯ ᠰᠢᠤᠳᠠᠨᠴᠢ ᠤᠤ ? 》
《 ᠰᠠᠬᠢᠯᠲᠠᠢ ᠰᠢᠤᠳᠠᠨᠴᠢ ᠨᠢ ᠪᠢᠰᠢ ᠪᠣᠯᠪᠠᠴᠤ ᠰᠠᠢᠨ ᠳᠤᠷᠠ ᠶ᠋ᠢᠨ ᠰᠢᠤᠳᠠᠨᠴᠢ ᠨᠢ ᠶᠤᠮ ᠠ᠋ ᠃ 》
ᠡᠨᠡ ᠦᠶᠡ ᠳ᠋ᠦ᠍ ᠪᠢ ᠦᠭᠡᠨ ᠦ᠌ ᠡᠯᠭᠦᠮᠵᠢ ᠪᠡᠷ ᠯᠢ ᠡᠮᠴᠢ ᠶ᠋ᠢ ᠰᠤᠷᠠᠭᠯᠠᠬᠤ ᠭᠡᠲᠡᠯᠡ ᠨᠣᠬᠠᠢ ᠬᠤᠴᠠᠬᠤ ᠳᠠᠭᠤ ᠰᠣᠨᠣᠰᠳᠠᠵᠤ ᠮᠠᠩᠬᠠᠨ ᠤ᠋ ᠳᠠᠯᠳᠠ ᠪᠦᠬᠦᠢ ᠭᠤᠷᠪᠠᠳᠤᠭᠠᠷ ᠬᠣᠲᠠ ᠳ᠋ᠤ᠌ ᠬᠦᠷᠴᠦ ᠢᠷᠡᠯᠡ ᠃ ᠬᠡᠳᠦᠨ ᠠᠭᠰᠠᠭᠠᠷ ᠬᠠᠷᠠ ᠨᠣᠬᠠᠢ ᠭᠦᠶᠦᠯᠴᠡᠨ ᠢᠷᠡᠭᠡᠳ ᠮᠣᠷᠢ ᠶ᠋ᠢ ᠬᠣᠷᠭᠣᠭᠠᠬᠤ ᠭᠡᠲᠡᠯᠡ ᠲᠡᠮᠡᠭᠡᠲᠡᠢ ᠵᠠᠯᠠᠭᠤ ᠶ᠋ᠢ ᠵᠠᠩᠳᠤᠷᠤᠮᠠᠭᠴᠠ ᠡᠵᠡᠨ ᠳ᠋ᠡᠭᠡᠨ ᠡᠨᠳᠡᠭᠦᠷᠡᠨ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠰᠡᠨ ᠰᠢᠭ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠭᠰᠠᠭᠠᠷ ᠢᠮ ᠵᠢᠮ ᠦᠭᠡᠢ ᠠᠰ ᠠᠰ ᠲᠠᠭᠠᠨ ᠳᠤᠲᠠᠭᠠᠯᠠ ᠃ ᠨᠣᠬᠠᠢ ᠶ᠋ᠢᠨ ᠳᠠᠭᠤᠨ ᠢ᠋ᠶ᠋ᠠᠷ ᠭᠡᠷ ᠡᠴᠡᠭᠡᠨ ᠭᠦᠶᠦᠯᠴᠡᠨ ᠭᠠᠷᠴᠤ ᠢᠷᠡᠭᠰᠡᠨ ᠬᠣᠲᠠ ᠶ᠋ᠢᠨ ᠬᠡᠦᠬᠡᠳ ᠭᠡᠨᠡᠳᠲᠡ ᠪᠠᠶᠠᠷᠯᠠᠯᠳᠤᠨ ᠳᠠᠪᠬᠢᠯᠳᠤᠵᠤ ᠮᠥᠩᠭᠥᠨ ᠬᠤᠩᠬᠠ ᠰᠢᠭ᠋ ᠵᠢᠩᠭᠢᠨᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠄
ᠬᠣᠩᠭᠣᠷ ᠬᠠᠯᠢᠭᠤᠨ ᠭᠠᠯᠠᠭᠤ ᠨᠢ
ᠬᠣᠢᠲᠤ ᠨᠠᠭᠤᠷ ᠲᠠᠭᠠᠨ ᠵᠤᠰᠠᠭᠠᠯᠲᠠᠢ ᠃
ᠬᠤᠨᠠᠨ ᠭᠠᠵᠠᠷ ᠤ᠋ᠨ ᠡᠮᠴᠢ ᠮᠢᠨᠢ
ᠮᠠᠯᠵᠢᠬᠤ ᠣᠷᠣᠨ ᠳ᠋ᠠᠭᠠᠨ ᠰᠠᠭᠤᠭᠠᠯᠢᠲᠠᠢ ᠃
ᠠᠯᠲᠠᠨ ᠴᠣᠮᠣᠷᠯᠢᠭᠲᠤ ᠯᠢᠩᠬᠤᠠ ᠨᠢ
ᠠᠷᠤ ᠶ᠋ᠢᠨ ᠨᠠᠭᠤᠷ ᠲᠠᠭᠠᠨ ᠳᠡᠯᠭᠡᠭᠡᠰᠦᠲᠡᠢ ᠃
ᠠᠷᠠᠳ ᠤ᠋ᠨ ᠰᠠᠢᠨ ᠡᠮᠴᠢ ᠮᠢᠨᠢ
ᠠᠶᠠᠯᠠᠭᠤ ᠰᠢᠯᠦᠭ ᠲᠡᠭᠡᠨ ᠮᠠᠭᠲᠠᠭᠠᠯᠲᠠᠢ ᠭᠡᠵᠦ ᠳᠠᠭᠤᠯᠠᠯᠳᠤᠨᠠ ᠃
ᠡᠭᠦᠨ ᠢ᠋ ᠰᠣᠨᠣᠰᠤᠮᠠᠭᠴᠠ ᠬᠣᠭᠣᠯᠠ ᠬᠢᠵᠦ ᠪᠠᠢᠭᠰᠠᠨ ᠡᠵᠢ ᠰᠢᠨᠠᠭᠠ ᠪᠠᠨ ᠪᠠᠷᠢᠭᠰᠠᠭᠠᠷ ᠦᠢᠯᠡ ᠣᠶᠣᠵᠤ ᠪᠠᠢᠭᠰᠠᠨ ᠵᠠᠯᠠᠭᠤᠰ ᠵᠡᠭᠦᠦ ᠤᠲᠠᠰᠤ ᠪᠠᠨ ᠪᠠᠷᠢᠭᠰᠠᠭᠠᠷ ᠴᠥᠮ ᠡᠭᠦᠳᠡᠨ ᠳᠡᠭᠡᠷᠡ ᠪᠡᠨ ᠭᠠᠷᠴᠤ ᠢᠷᠡᠭᠡᠳ ᠵᠠᠯᠠᠭᠤ ᠶ᠋ᠢ ᠲᠤᠰᠤᠨᠠ ᠃ ᠪᠢ ᠮᠣᠷᠢ ᠪᠠᠨ ᠤᠶᠠᠭᠠᠨ ᠠᠴᠠ ᠤᠶᠠᠬᠤ ᠭᠡᠳ ᠲᠡᠮᠡᠭᠡᠲᠡᠢ ᠵᠠᠯᠠᠭᠤ ᠶ᠋ᠢᠨ ᠵᠢᠪᠠᠷ ᠤ᠋ᠨ ᠳᠣᠣᠷᠠ ᠲᠠᠯᠠ ᠳ᠋ᠤ᠌ ᠭᠠᠷᠬᠤ ᠳ᠋ᠤ᠌ ᠭᠡᠨᠡᠳᠲᠡ ᠮᠣᠩᠭᠣᠯ ᠡᠮ ᠤᠨ ᠵᠢᠭᠠᠷ ᠤ᠋ᠨ ᠦᠨᠦᠷ ᠦᠨᠦᠷᠲᠦᠯᠡ ᠃ ᠶᠠᠭᠤᠨ ᠤ᠋ ᠰᠢᠯᠲᠠᠭᠠᠨ ᠢ᠋ ᠪᠤᠤ ᠮᠡᠳᠡ ᠂ ᠡᠮ ᠤᠨ ᠦᠨᠦᠷ ᠲᠦ᠍ ᠣᠭᠲᠣ ᠳᠤᠷᠠ ᠦᠭᠡᠢ ᠨᠠᠳᠠ ᠳ᠋ᠤ᠌ ᠡᠨᠡ ᠡᠳᠦᠷ ᠤᠨ ᠦᠨᠦᠷ ᠣᠨᠴᠣᠭᠣᠢ ᠰᠠᠢᠬᠠᠨ ᠰᠠᠨᠠᠭᠳᠠᠨᠠ ᠄ ᠬᠠᠭᠳᠠ ᠶ᠋ᠢ ᠲᠦᠯᠬᠢᠭᠰᠡᠨ ᠨᠣᠭᠣᠭᠠᠨ ᠤ᠋ ᠦᠨᠦᠷ ᠴᠦ᠍ ᠶᠤᠮ ᠰᠢᠭ ᠂ ᠰᠢᠷᠣᠢ ᠶ᠋ᠢ ᠤᠨᠲᠠᠯᠠᠭᠰᠠᠨ ᠪᠣᠷᠣᠭᠠᠨ ᠤ᠋ ᠦᠨᠦᠷ ᠴᠦ᠍ ᠶᠤᠮ ᠰᠢᠭ ᠂ ᠲᠠᠯᠠ ᠶ᠋ᠢ ᠰᠡᠷᠭᠦᠭᠡᠭᠰᠡᠨ ᠬᠠᠪᠤᠷ ᠤ᠋ᠨ ᠦᠨᠦᠷ ᠴᠦ᠍ ᠶᠤᠮ ᠰᠢᠭ ᠃
ᠦᠭᠡᠢ ᠂ ᠡᠨᠡ ᠴᠢᠨᠢ ᠬᠠᠷᠢᠨ ᠮᠣᠩᠭᠣᠯ ᠨᠤᠲᠤᠭ ᠲᠤ᠌ ᠦᠨᠳᠦᠰᠦ ᠬᠠᠳᠬᠤᠨ ᠦᠷᠡᠯᠡᠨ ᠳᠡᠯᠭᠡᠷᠡᠭᠰᠡᠨ ᠶᠣᠰᠣᠲᠠᠢ ᠰᠠᠢᠬᠠᠨ ᠠᠯᠢᠮᠠ ᠶ᠋ᠢᠨ ᠦᠨᠦᠷ ᠪᠢᠰᠢ ᠶᠤᠮ ᠦᠦ
1964.9