ᠥᠨᠳᠥᠷᠯᠢᠭ ᠦᠨ ᠥᠩᠭᠡᠲᠦ ᠵᠡᠭᠦᠳᠦ 〈 ᠮᠥᠴᠡᠯᠬᠡ ᠬᠣᠶᠠᠷ 〉- ᠲ ᠂ ᠭᠣᠮᠪᠣᠵᠠᠪ Өндөрлөгийн өнгөт зүүд 〈 Мөчлөг хоёр 〉 - Т ᠂ Гомбожав
212ᠥᠨᠳᠥᠷᠯᠢᠭ ᠦᠨ ᠥᠩᠭᠡᠲᠦ ᠵᠡᠭᠦᠳᠦ 〈 ᠮᠥᠴᠡᠯᠬᠡ ᠬᠣᠶᠠᠷ 〉
ᠬᠠᠮᠢᠯ ᠤᠨ ᠳᠤᠷᠠᠳᠬᠠᠯ
ᠭᠠᠨᠳᠢᠭ ᠴᠢᠯᠠᠭᠤ ᠬᠢᠰᠬᠢᠵᠤ
ᠭᠤᠸᠠ ᠲᠡᠪᠡᠷᠢᠭᠰᠡᠨ ᠤᠶ᠋ᠢᠭᠤᠷ ᠭᠡᠤᠭᠡᠨ᠂ ᠴᠠᠭ ᠳᠦᠭᠦᠷᠡᠩ ᠢᠨᠢᠶᠡᠮᠰᠦᠭᠯᠡᠨᠡ
ᠭᠡᠴᠢᠨᠡᠨ ᠠᠯᠬᠤᠭᠰᠠᠨ ᠴᠦ᠍ ᠪᠠᠭᠤᠵᠤ ᠴᠢᠳᠠᠬᠤ ᠥᠬᠡᠢ
ᠭᠡᠰᠡᠭᠬᠡᠨ ᠴᠢᠯᠠᠭᠤᠨ ᠠᠴᠠ ᠪᠠᠨ
ᠬᠡᠵᠢᠶᠡ ᠴᠦ᠍ ᠭᠡᠰᠡᠨ ᠵᠤᠭᠰᠤᠯ ᠦᠭᠡᠢ
ᠨᠠᠳᠠ ᠤᠷᠤᠭᠤ ᠠᠯᠬᠤᠯᠠᠨᠠ ᠪᠢᠯᠡ
ᠡᠮᠦᠨᠡ ᠪᠠᠨ ᠲᠡᠪᠡᠷᠢᠭᠰᠡᠨ ᠭᠤᠸᠠ ᠶᠢᠨ ᠬᠢᠨᠢ ᠦᠨᠦᠷ ᠨᠢ
ᠦᠳᠡᠰᠢ ᠪᠤᠯᠭᠠᠨ ᠮᠢᠨᠤ ᠳᠡᠷᠭᠡᠲᠡ ᠬᠠᠩᠬᠤᠯᠤᠨᠠ ᠠ᠋ ᠁
ᠬᠠᠮᠢᠭᠤᠸᠠ
ᠵᠡᠭᠦᠳᠦᠨ ᠳᠦ ᠮᠢᠨᠢ ᠴᠢ ᠳᠤᠩ ᠠᠮᠲᠠᠲᠠᠢ ᠪᠠᠶ᠋ᠢᠯᠠ
ᠵᠡᠭᠦᠳᠦ ᠮᠢᠨᠢ ᠰᠡᠷᠢᠴᠢᠬᠡᠯᠡ
ᠪᠢ ᠲᠠᠷᠭᠤᠨ ᠬᠤᠨᠢᠳ ᠰᠢᠭ᠋ ᠪᠡᠯᠴᠢᠬᠦ
ᠲᠠᠷᠢᠶᠠᠨ ᠳᠤᠮᠳᠠ ᠴᠢᠨᠢ ᠵᠤᠭᠰᠤᠨᠠ
ᠭᠡᠲᠡᠯᠡ
ᠬᠤᠪᠳᠤᠭᠰᠠᠨ ᠰᠡᠳᠬᠢᠯ ᠬᠤᠷᠤᠮᠬᠠᠨ ᠠᠭᠰᠢᠵᠤ
ᠬᠤᠶᠠᠷ ᠭᠠᠷ ᠮᠢᠨᠢ᠂ ᠴᠢᠮᠡ ᠤᠷᠤᠭᠤ
ᠰᠠᠷᠪᠠᠶ᠋ᠢᠭᠰᠠᠨ ᠬᠡᠪ ᠢᠶ᠋ᠠᠷ ᠢᠶ᠋ᠠᠨ ᠴᠡᠴᠡᠷᠡᠴᠢᠯᠡ
ᠨᠠᠳᠠᠳᠤ
ᠭᠠᠩ ᠬᠠᠭᠤᠷᠠᠢ ᠡᠳᠦᠷ ᠬᠤᠨᠤᠭ ᠤᠳ
ᠭᠠᠯ ᠨᠤᠴᠤᠵᠤ ᠬᠠᠷᠠᠭᠳᠠᠨᠠ
ᠭᠠᠵᠠᠷ ᠳᠦᠭᠦᠷᠡᠩ
ᠪᠤᠷᠤᠭᠠᠨ ᠳᠤ ᠮᠠᠷᠲᠠᠭᠳᠠᠭᠰᠠᠨ ᠰᠡᠳᠬᠢᠯ ᠦᠳ ᠬᠠᠭᠰᠠᠵᠤ
ᠭᠠᠭᠴᠠᠬᠠᠨ ᠳᠤᠰᠤᠯ ᠦᠷᠦᠪᠳᠦᠯ ᠦᠭᠡᠢ ᠡᠭᠦᠯᠡᠰ ᠰᠢᠷᠲᠡᠨ
ᠡᠬᠡ ᠭᠠᠵᠠᠷ ᠤᠨ ᠦᠨᠦᠴᠢᠨ ᠡᠯᠢᠭᠡ
ᠡᠨᠡ ᠭᠡᠰᠡᠭ
ᠡᠩᠬᠦᠷᠡᠶ᠋ᠢᠯᠡᠯ ᠳᠦ ᠮᠠᠷᠲᠠᠭᠳᠠᠭᠰᠠᠨ ᠰᠢᠷᠦᠢ ᠶᠢᠨ
ᠡᠪᠬᠡᠷᠡᠭᠦᠨ ᠡᠪᠬᠡᠷᠡᠭᠥᠨ ᠭᠤᠨᠢᠭ᠂ ᠴᠢ ᠬᠠᠷᠠᠭᠳᠠᠯᠠ ᠠ᠋
ᠴᠢᠮᠠ ᠳᠡᠭᠡᠷᠡ
ᠪᠢ ᠬᠡᠷᠬᠢᠨ ᠠᠮᠠ ᠬᠦᠷᠴᠦ ᠴᠢᠳᠠᠬᠤ ᠪᠢᠯᠡ ?!
ᠵᠡᠷᠭᠡᠯᠭᠡᠨ
ᠰᠠᠶ᠋ᠢᠬᠠᠨ ᠬᠠᠮᠢᠯ ᠤᠨ ᠠᠷᠤ ᠭᠤᠪᠢ ᠪᠠᠷ
ᠰᠠᠨᠠᠭᠠ ᠮᠢᠨᠢ᠂ ᠤᠮᠳᠠᠭᠠᠰᠴᠤ ᠶᠠᠪᠤᠯᠠ
ᠨᠠᠷᠠ
ᠭᠠᠯ ᠤᠯᠠᠶ᠋ᠢᠰᠤᠭᠰᠠᠨ ᠲᠦᠮᠡᠨ ᠵᠡᠭᠦᠦ ᠪᠡᠷ ᠭᠠᠵᠠᠷ ᠢ ᠲᠦᠭᠡᠨᠡᠵᠤ
ᠭᠠᠭᠴᠠᠬᠠᠨ ᠨᠠᠪᠴᠢ ᠲᠡᠢ ᠡᠪᠡᠰᠦᠨ ᠤᠷᠤᠢ ᠠᠴᠠ
ᠭᠠᠰᠢᠭᠤᠨ ᠤᠲᠤᠭᠠ ᠰᠤᠭᠤᠨᠠᠭᠯᠠᠨᠠ
ᠳᠠᠭᠤ ᠬᠠᠭᠰᠠᠮᠠᠷ ᠡᠨᠡ ᠭᠠᠵᠠᠷ ᠤᠨ
ᠳᠤᠭᠤᠯᠠᠩ ᠵᠠᠶᠠᠭᠠᠨ ᠳᠤ ᠭᠤᠨᠢᠭᠯᠠᠵᠤ
ᠳᠤᠭᠤᠶ᠋ᠢᠬᠠᠨ ᠪᠤᠳᠤᠯ
ᠳᠤᠪᠤ ᠬᠦᠳᠦᠯ ᠦᠨ ᠡᠩᠭᠡᠷ ᠰᠤᠭᠤ ᠪᠠᠷ ᠭᠦᠰᠡᠯ ᠨᠡᠩᠵᠢᠨ ᠶᠠᠪᠤᠬᠤ ᠳᠤ
ᠤᠰᠤ ᠦᠵᠡᠭᠲᠡᠯᠡ
ᠤᠰᠤ ᠯᠡ ᠦᠵᠡᠭᠲᠡᠯᠡ ᠡ !
ᠤᠰᠤ ᠦᠨᠡᠬᠡᠷ ᠦᠵᠡᠭᠳᠡᠯᠡ ᠭᠡᠪᠡᠴᠤ ᠪᠢ
ᠤᠷᠤᠭᠰᠢ ᠤᠴᠢᠬᠤ ᠠᠴᠠ ᠪᠠᠨ ᠳᠠᠲᠠᠭᠠᠯᠵᠠᠨᠠ
ᠤᠴᠢᠷ ᠨᠢ
ᠤᠯᠠᠭᠠᠨ ᠬᠠᠯᠴᠠᠭᠠᠢ ᠡᠨᠡ ᠭᠠᠵᠠᠷ ᠲᠠᠬᠢ
ᠤᠷᠠᠨ ᠡᠨᠳᠡᠭᠦᠷᠡᠯ ᠮᠢᠨᠢ ᠦᠨᠡᠲᠡᠢ ᠪᠢᠯᠡ ᠠ᠋
ᠡᠷᠲᠡᠨ ᠦ ᠪᠤᠯᠠᠰᠢᠨ ᠰᠦᠷᠦᠭ ᠢ ᠲᠤᠭᠤᠷᠢᠨ ᠦᠵᠡᠭᠰᠡᠨ ᠲᠦᠷᠦᠭᠳᠡᠯ
ᠡᠷᠡ ᠪᠤᠷᠤ ᠬᠠᠷᠴᠠᠭᠠᠢ ᠶᠢᠨ ᠰᠦᠷᠦᠭ
ᠡᠨᠳᠡ ᠤᠨᠲᠠᠪᠠ
ᠬᠡᠯᠡᠬᠦ ᠭᠡᠳ
ᠬᠡᠯᠡᠵᠤ ᠵᠠᠪᠳᠤᠭᠠ ᠦᠭᠡᠢ ᠦᠭᠡᠰ ᠨᠢ
ᠭᠡᠪᠲᠡᠭᠡᠳ ᠪᠤᠰᠴᠤ ᠴᠢᠳᠠᠭᠠ ᠦᠭᠡᠢ
ᠬᠡᠭᠦᠷ ᠲᠠᠢ ᠪᠠᠨ ᠬᠠᠮᠲᠤ
ᠬᠡᠳᠦᠨ ᠮᠢᠩᠭᠠᠨ ᠵᠢᠯ ᠠᠮᠤᠰᠬᠢᠯᠠ
ᠦᠨᠦᠳᠦᠷ᠂ ᠲᠡᠷᠡ
ᠥᠷᠭᠡᠯᠡᠭᠰᠡᠨ ᠨᠣᠶ᠋ᠢᠷ ᠠᠴᠠ ᠪᠠᠨ ᠭᠡᠨᠡᠳᠲᠡ ᠰᠡᠷᠢᠪᠡ
ᠦᠭᠡᠰ ᠨᠢ᠂ ᠦᠷᠭᠦᠭᠰᠡᠨ ᠤᠯᠠᠨ ᠰᠢᠪᠠᠭᠤᠳ
ᠠᠭᠠᠷ ᠳᠦᠭᠦᠷᠡᠩ ᠪᠤᠲᠠᠷᠠᠨᠠ ᠁
ᠬᠡᠨ ᠴᠦ᠍ ᠣᠶ᠋ᠢᠯᠠᠭᠠᠬᠤ ᠦᠭᠡᠢ ᠠ᠋ !
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠴᠤᠯᠮᠤᠨᠲᠤᠶᠠᠭᠠ