ᠥᠨᠳᠥᠷᠯᠢᠭ ᠦᠨ ᠥᠩᠭᠡᠲᠦ ᠵᠡᠭᠦᠳᠦ 〈 ᠮᠥᠴᠡᠯᠬᠡ ᠨᠢᠭᠡ 〉- ᠲ ᠂ ᠭᠣᠮᠪᠣᠵᠠᠪ Өндөрлөгийн өнгөт зүүд 〈 Мөчлөг нэг 〉 - Т ᠂ Гомбожав
221ᠥᠨᠳᠥᠷᠯᠢᠭ ᠦᠨ ᠥᠩᠭᠡᠲᠦ ᠵᠡᠭᠦᠳᠦ 〈 ᠮᠥᠴᠡᠯᠬᠡ ᠨᠢᠭᠡ 〉
ᠭᠠᠩᠭᠠᠩ ᠤᠯᠠᠭᠠᠨ ᠲᠡᠮᠡᠭᠡ
— ᠪᠠᠷᠺᠥ᠋ᠯ ᠶ᠋ᠢᠡᠷ ᠠᠶᠠᠯᠠᠭᠰᠠᠨ ᠲᠥᠷᠥᠭᠳᠡᠯ
ᠭᠠᠵᠠᠲᠠᠭ ᠦᠭᠡᠢ ᠬᠣᠣᠰ ᠪᠦᠬᠦ ᠪᠡᠨ ᠰᠡᠷᠡᠢᠯᠭᠡᠭᠰᠡᠨ
ᠭᠠᠩᠭᠠᠩ ᠤᠯᠠᠭᠠᠨ ᠲᠡᠮᠡᠭᠡ
ᠭᠠᠵᠠᠷ ᠦ᠋ᠨ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠳᠡᠭᠡᠷᠡ ᠲᠡᠭᠷᠢ ᠬᠠᠨᠲᠠᠷᠴᠤ ᠵᠣᠭᠰᠣᠨᠠ
ᠬᠠᠪ ᠬᠠᠲᠠᠭᠤ
ᠬᠠᠷᠭᠠᠢ ᠰᠢᠭ᠋ ᠵᠣᠭᠲᠣᠷ ᠨᠢ ᠲᠡᠭᠷᠢ ᠶ᠋ᠢᠨ ᠰᠠᠮ ᠪᠢᠯᠡ
ᠪᠦᠲᠦᠭᠦᠨ ᠲᠤᠮᠤ
ᠪᠦᠬᠦᠯᠢ ᠬᠠᠲᠠ ᠰᠢᠭ᠋ ᠲᠠᠪᠠᠬ ᠨᠢ ᠪᠥᠮᠪᠥᠷᠴᠡᠭ ᠦ᠋ᠨ ᠲᠣᠪᠴᠢ ᠪᠢᠯᠡ
ᠣᠩᠭᠣᠴᠠ ᠰᠢᠭ᠋
ᠣᠩᠬᠣᠯᠢᠲᠠᠭ ᠦᠭᠡᠢ ᠡᠨᠡ ᠲᠡᠮᠡᠭᠡᠨ ᠪ ᠨᠢᠷᠤᠭᠤᠨ ᠳᠡᠭᠡᠷᠡ
ᠣᠨ ᠵᠢᠯ ᠰᠠᠵᠢᠯᠠᠵᠤ
ᠣᠲᠣ ᠰᠠᠷᠠ ᠰᠠᠵᠢᠯᠠᠵᠤ
ᠣᠷᠴᠢᠯᠠᠩ ᠦ᠋ᠨ ᠬᠠᠷᠠ ᠴᠠᠭᠠᠨ ᠵᠡᠭᠦᠲᠦ
ᠬᠠᠯᠠᠭᠤᠨ ᠬᠦᠢᠲᠡᠨ ᠰᠠᠯᠬᠢ ᠰᠠᠵᠢᠯᠠᠵᠤ ᠢᠷᠡᠵᠡᠢ ᠡ
ᠣᠬᠢᠯᠠᠯ ᠢᠨᠢᠶᠡᠯ ᠬᠣᠶᠠᠷ
ᠤᠨᠠᠬᠤ ᠨᠠᠷᠠ ᠂ ᠪᠣᠰᠬᠤ ᠨᠠᠷᠠ ᠰᠢᠭ᠋ ᠡᠭᠡᠯᠵᠢᠯᠡᠵᠦ
ᠤᠯᠠᠭᠠᠨ ᠴᠢᠰᠤ ᠂ ᠶᠠᠭᠠᠨ ᠴᠡᠴᠡᠭ
ᠤᠰᠤ ᠲᠡᠭᠡᠭᠡᠭᠰᠡᠨ ᠦᠬᠡᠷ ᠬᠠᠰᠠᠭ ᠦ᠋ᠨ ᠮᠢᠨᠢ ᠬᠦᠷᠲᠦ ᠰᠢᠭ᠌
ᠬᠠᠶᠠ ᠳᠡᠭᠡᠷᠡ
ᠬᠠᠶᠠ ᠲᠣᠣᠷᠠ ᠪᠥᠮᠪᠥᠷᠢᠵᠦ ᠢᠷᠡᠭᠰᠡᠨ ᠪᠢᠯᠡ
ᠬᠥᠮᠦᠰ
ᠬᠥᠭᠡᠷᠦᠬᠦᠢ ᠡᠨᠡ ᠂ ᠤᠬᠠᠭᠠᠨ ᠳᠡᠯᠡᠬᠡᠢ ᠶ᠋ᠢᠨ ᠨᠢᠯᠬᠠᠰ
ᠥᠷᠯᠦᠭᠡ ᠡᠴᠡ ᠥᠲᠡᠰᠢ ᠪᠣᠯᠲᠠᠯᠠ
ᠡᠪᠦᠯ ᠡᠴᠡ ᠵᠤᠨ ᠪᠣᠯᠲᠠᠯᠠ
ᠦᠷᠡ ᠰᠠᠭᠤᠬᠤ ᠦᠭᠡᠢ ᠨᠢᠭᠡ ᠪᠣᠲᠣᠯ ᠦ᠋ᠨ ᠲᠥᠯᠥᠭᠡ
ᠤᠨᠠᠵᠤ ᠯᠠ ᠪᠠᠶ᠋ᠢᠯᠠ ᠪᠣᠰᠴᠤ ᠯᠠ ᠪᠠᠶ᠋ᠢᠯᠠ
ᠲᠡᠭᠡᠭᠡᠳ ᠯᠡ
ᠣᠯᠠᠨ ᠬᠥᠮᠦᠨ ᠦᠬᠦᠵᠦ ᠬᠣᠯᠠᠲᠠᠯᠠ
ᠣᠨ ᠵᠢᠯ ᠦᠷᠭᠦᠵᠦ ᠬᠣᠯᠠᠲᠠᠯᠠ
ᠭᠠᠭᠴᠠᠬᠦ
ᠲᠥᠭᠡᠷᠢᠯ ᠳ᠋ᠦ᠍ ᠤᠨᠠᠭᠰᠠᠨ ᠬᠦᠭᠡᠷᠦᠬᠦᠢ ᠲᠡᠮᠡᠭᠡ
ᠲᠥᠮᠡᠨ ᠬᠠᠪᠤᠷ ᠊ᠢ ᠪᠤᠯᠠᠰᠢᠯᠠᠵᠤ ᠨᠡᠯᠦᠢᠭᠰᠡᠨ
ᠲᠦᠨᠡᠷ ᠴᠠᠭᠠᠨ ᠡᠯᠡᠰᠦᠨ ᠳᠠᠯᠠᠢ ᠳ᠋ᠦ᠍
ᠲᠥᠭᠡ ᠬᠢᠷᠢᠲᠡᠶ᠋ᠢᠬᠡᠨ ᠶᠠᠪᠤᠵᠤ ᠴᠢᠲᠠᠬ᠋ᠠ ᠦᠭᠡᠢ ᠵᠣᠭᠰᠣᠵᠤ ᠯᠠ ᠪᠠᠶ᠋ᠢᠵᠢ ᠡ ᠂ ᠂ ᠂ ᠂
ᠣᠲᠣ
ᠲᠡᠮᠡᠭᠡ ᠶᠠᠪᠤᠵᠤ ᠡᠬᠢᠯᠡᠯᠡ
ᠣᠩᠭᠣᠨ ᠲᠡᠭᠷᠢ ᠶ᠋ᠢ ᠵᠣᠭᠲᠣᠷ ᠶ᠋ᠢᠠᠷ ᠶ᠋ᠢᠠᠨ ᠰᠠᠮᠨᠠᠵᠤ
ᠣᠩᠭᠣᠴᠠ ᠰᠢᠭ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠡᠨ ᠴᠠᠭ ᠦᠶᠡ ᠶ᠋ᠢ ᠠᠴᠢᠭᠠᠳ
ᠲᠡᠮᠡᠭᠡ ᠮᠢᠨᠢ ᠶᠠᠪᠤᠵᠤ ᠡᠬᠢᠯᠡᠯᠡ!
ᠥᠴᠦᠭᠡᠲᠦᠷ ᠦ᠋ᠨ ᠠᠯᠢᠪᠠ
ᠥᠨᠢᠲᠡ ᠨᠡᠪᠴᠢᠳᠡᠭ ᠦᠭᠡᠢ ᠥᠨᠲᠡᠭᠡ ᠪᠣᠯᠵᠤ ᠬᠣᠴᠣᠷᠣᠯᠠ
ᠥᠨᠥᠲᠦᠷ
ᠨᠠᠷᠠ ᠪᠠ ᠴᠡᠴᠡᠭ ᠂ ᠨᠠᠶ᠋ᠢᠵᠢ ᠶᠤᠰᠤᠨ ᠪ ᠨᠥᠬᠦᠷᠯᠡᠯ ᠵᠠᠶᠠᠬ᠋ᠠ
ᠬᠣᠯᠠ ᠶᠠᠪᠤᠬᠤ ᠶ᠋ᠢᠨ ᠬᠦᠰᠡᠯ ᠂ ᠬᠤᠪᠢᠷᠠᠵᠤ ᠰᠢᠨᠡᠤᠠᠬᠦ ᠶ᠋ᠢᠨ ᠮᠥᠷᠦᠭᠡᠲᠦᠯ ᠂ ᠂ ᠂ ᠂
ᠥᠨᠳᠥᠷᠯᠢᠭ ᠦ᠋ᠨ ᠲᠡᠮᠡᠭᠡᠨ ᠪ ᠮᠢᠨᠢ
ᠡᠭᠦᠯᠡ ᠱᠦᠷᠭᠦᠭᠡᠮᠡ ᠠᠴᠢᠶᠠ ᠪᠣᠯᠤᠯᠠ
ᠡᠮᠦᠨᠡᠰᠢᠯᠡᠬᠦ ᠠᠶᠠᠨ ᠪ ᠬᠢᠨᠢ
ᠥᠩᠭᠡ ᠵᠢᠪᠬᠤᠭᠠᠲᠤ ᠪᠢᠯᠸᠲ᠋ ᠪᠣᠯᠤᠯᠠ ᠂ ᠂ ᠂ ᠂
ᠲᠡᠮᠡᠭᠡ ᠶᠠᠪᠤᠵᠤ ᠡᠬᠢᠯᠡᠯᠡ
ᠲᠡᠦᠬᠡ ᠶ᠋ᠢᠨ ᠠᠪᠤᠷᠭᠤ ᠨᠡᠭᠦᠲᠡᠯ
ᠲᠡᠮᠡᠭᠡ ᠮᠢᠨᠢ ᠶᠠᠪᠤᠵᠤ ᠡᠬᠢᠯᠡᠯᠡ ᠡ!
ᠡᠷᠡᠴᠤᠤᠯ ᠤᠨ ᠨᠠᠭᠠᠳᠤᠮ
ᠬᠡᠳᠡᠷ ᠬᠠᠲᠠᠭᠤ ᠬᠠᠰᠠᠭ ᠡᠷᠡ ᠶ᠋ᠢᠨ ᠂ ᠬᠦᠴᠦ ᠨᠢ
ᠬᠦᠢᠲᠡᠨ ᠪᠤᠯᠠᠭ ᠦᠨ ᠤᠰᠤ ᠰᠢᠭ᠋ ᠣᠨᠳᠣᠷᠣᠳᠠᠭ ᠪᠢᠯᠡ
ᠤᠨᠳᠤᠷᠤᠯᠲᠤ ᠤᠰᠤ
ᠤᠳᠠᠬᠤ ᠦᠭᠡᠢ ᠤᠳᠠᠬᠤ ᠦᠭᠡᠢ ᠬᠠᠰᠢᠯᠭᠠ ᠪᠠᠨ ᠳᠠᠪᠠᠨᠠ
ᠠᠭᠤᠳᠠᠮ ᠲᠠᠯᠠ ᠳ᠋ᠦ᠍ ᠂ ᠲᠡᠭᠡᠭᠡᠳ
ᠤᠳᠤᠮᠰᠢᠯᠲᠤ ᠰᠠᠶ᠋ᠢᠬᠠᠨ ᠨᠠᠭᠠᠳᠤᠮ ᠪᠣᠯᠤᠨᠠ ᠡ
ᠬᠥᠮᠦᠰ
ᠬᠥᠩᠭᠡᠷᠡᠳᠡᠯᠡ ᠰᠣᠶ᠋ᠢᠭᠰᠠᠨ ᠮᠣᠷᠢᠳ ᠳᠠᠭᠠᠨ ᠮᠣᠷᠳᠠᠨᠠ
ᠬᠥᠰᠢᠯᠳᠦᠵᠦ ᠵᠠᠩᠭᠢᠷᠠᠭᠰᠠᠨ ᠬᠦᠴᠦ ᠲᠤᠷᠪᠢ
ᠬᠥᠳᠡᠭᠡ ᠶ᠋ᠢᠨ ᠠᠭᠤᠳᠠᠮ ᠳ᠋ᠤ᠌ ᠭᠠᠷᠴᠤ
ᠬᠣᠨᠢ ᠲᠠᠲᠠᠯᠳᠤᠵᠤ ᠨᠠᠭᠠᠳᠤᠨᠠ
ᠬᠥᠯᠥᠰᠥ ᠵᠤᠩᠭᠠᠭ ᠂ ᠬᠥᠬᠡ ᠡᠪᠡᠰᠦᠨ ᠦ ᠦᠨᠦᠷ ᠲᠠᠢ
ᠰᠠᠯᠬᠢ ᠬᠤᠶ᠋ᠢᠯᠠᠷᠠᠵᠤ
ᠬᠥᠭᠰᠢᠳ ᠦᠨ ᠴᠢᠷᠠᠢ ᠠ᠋ᠴᠠ ᠤᠨ ᠵᠢᠯ ᠦᠨ ᠣᠷᠣᠮ ᠪᠠᠯᠠᠷᠠᠨᠠ
ᠬᠡᠦᠬᠡᠳ ᠤᠨ ᠨᠢᠳᠦᠨ ᠳ᠋ᠦ᠍ ᠥᠷᠨᠢᠭᠦᠨ ᠭᠤᠤᠠ ᠵᠡᠭᠦᠳᠦ ᠳᠡᠯᠭᠡᠭᠳᠡᠨᠡ
ᠬᠥᠳᠡᠭᠡ ᠶ᠋ᠢᠨ ᠭᠦᠨ ᠳ᠋ᠦ᠍
ᠬᠥᠬᠡ ᠴᠢᠯᠠᠭᠤ ᠭᠡᠳᠡᠭᠡᠨ ᠳ᠋ᠡᠭᠡᠨ ᠴᠡᠴᠡᠭᠯᠡᠨᠡ ᠡ
ᠮᠡᠬᠡ ᠪᠡᠷ ᠨᠠᠭᠠᠳᠳᠠᠭ ᠦᠭᠡᠢ
ᠬᠦᠴᠦ ᠪᠡᠷ ᠢᠶ᠋ᠠᠨ ᠨᠠᠭᠠᠳᠤᠨᠠ
ᠡᠷᠡ ᠶ᠋ᠢᠨ ᠶᠣᠰᠣᠭᠠᠷ ᠢᠯᠠᠵᠤ ᠪᠠᠶᠠᠷᠯᠠᠵᠤ
ᠡᠷᠡ ᠶ᠋ᠢᠨ ᠶᠣᠰᠣᠭᠠᠷ ᠢᠯᠠᠭᠳᠠᠵᠤ ᠪᠠᠶᠠᠷᠯᠠᠨᠠ
ᠡᠨᠡ ᠪᠣᠯ ᠡᠷᠡ ᠬᠥᠮᠥᠨ ᠦ ᠨᠠᠭᠠᠳᠤᠮ
ᠡᠬᠡ ᠬᠣᠷᠸᠠ ᠶᠢᠨ ᠴᠢᠭᠢᠷᠠᠭ ᠴᠠᠭᠠᠨ ᠢᠨᠢᠶᠡᠳᠦ ᠪᠢᠯᠡ
ᠰᠠᠮ ᠪᠣᠲᠣᠯ
ᠪᠠᠭᠴᠠ ᠪᠠᠭᠴᠠ ᠴᠡᠴᠡᠭ ᠶ᠋ᠢᠡᠷ ᠢᠨᠢᠶᠡᠮᠰᠦᠭᠯᠡᠭᠰᠡᠨ
ᠪᠠᠷᠺᠦᠢ᠍ᠯ ᠤᠨ ᠲᠠᠯᠠ ᠳ᠋ᠦ᠍ ᠂ ᠪᠢ
ᠬᠡᠦᠬᠡᠨ ᠶ᠋ᠢᠡᠷ ᠲᠠᠭᠤᠯᠭᠠᠬᠤ ᠨᠠᠭᠠᠲᠤᠮ ᠦᠵᠡᠯᠡ
ᠡᠭᠦᠯᠡ ᠶᠠᠪ ᠶᠠᠭᠠᠨ
ᠡᠪᠡᠰᠦ ᠨᠣᠪ ᠨᠣᠭᠣᠭᠠᠨ
ᠦᠵᠡᠭᠳᠡᠵᠦ ᠶᠠᠲᠠᠮᠠ ᠲᠡᠷᠲᠡᠭᠡ ᠵᠠᠬᠠ ᠡᠴᠡ
ᠥᠩᠭᠡᠲᠦ ᠰᠣᠯᠣᠩᠬ᠋ᠠ ᠲᠠᠰᠤᠷᠠᠵᠤ
ᠥᠷᠭᠡᠨ ᠲᠠᠯᠠ ᠳ᠋ᠦ᠍
ᠭᠣᠪᠢ ᠶ᠋ᠢᠨ ᠴᠢᠭᠢᠷᠠᠭ ᠬᠠᠷᠠ ᠵᠠᠯᠠᠭᠤ ᠶ᠋ᠢ
ᠭᠤᠸ᠋ᠠ ᠰᠠᠶ᠋ᠢᠬᠠᠨ ᠲᠠᠭᠤᠵᠤ ᠶᠠᠪᠤᠨᠠ
ᠲᠣᠷᠮᠣᠰ ᠭᠡᠬᠦ ᠨᠢᠲᠦᠨ ᠡᠴᠡ ᠨᠢ
ᠳᠣᠲᠣᠨᠣᠬᠠᠨ ᠠᠯᠢᠶᠠᠯᠠᠯ ᠭᠢᠯᠠᠰᠴᠤ
ᠲᠤᠶᠠᠬ᠋ᠠ ᠲᠠᠲᠠᠭᠰᠠᠨ ᠴᠢᠷᠠᠢ ᠡᠴᠡ ᠨᠢ
ᠲᠤᠩᠭᠠᠯᠠᠭᠬᠠᠨ ᠮᠦᠰᠢᠶᠡᠯ ᠮᠢᠷᠠᠯᠵᠠᠵᠤ
ᠳᠤᠷᠠᠯᠠᠯᠲᠤ ᠨᠠᠰᠤᠨ ᠪ ᠴᠣᠪᠣᠭᠣᠬᠠᠨ ᠠᠶᠠᠰ ᠶ᠋ᠢᠠᠷ
ᠳᠣᠭᠤᠶ᠋ᠢᠬᠠᠨ ᠰᠡᠤᠠᠬᠢᠯ ᠊ᠢ ᠬᠥᠭᠵᠢᠮᠳᠡᠵᠦ ᠶᠠᠪᠤᠬᠤ
ᠭᠠᠩᠭᠠᠩ ᠭᠤᠸ᠋ᠠ ᠣᠶ᠋ᠢᠭᠤᠷ ᠬᠡᠦᠬᠡᠨ
ᠭᠠᠵᠠᠷ ᠳᠡᠭᠡᠷᠡᠬᠢ ᠰᠠᠷᠠ ᠪᠢᠯᠡ
ᠪᠠᠭᠯᠠᠬ᠋ᠠ ᠪᠠᠭᠯᠠᠬ᠋ᠠ ᠴᠡᠴᠡᠭ ᠶ᠋ᠢᠡᠷ ᠢᠨᠢᠶᠡᠮᠰᠦᠭᠯᠡᠭᠰᠡᠨ
ᠪᠠᠷᠺᠦᠢ᠍ᠯ ᠦ᠋ᠨ ᠲᠠᠯᠠ ᠳ᠋ᠦ᠍᠂ ᠪᠢ
ᠬᠠᠮᠤᠭ ᠦ᠋ᠨ ᠭᠤᠸ᠋ᠠ ᠬᠡᠦᠬᠡᠨ ᠪ ᠡᠮᠦᠨᠡ
ᠬᠠᠮᠤᠭ ᠤᠨ ᠬᠠᠱᠠᠩ ᠮᠣᠷᠢ ᠤᠨᠤᠨ
ᠬᠠᠩᠭᠠᠢ ᠶ᠋ᠢᠨ ᠨᠤᠭᠤᠭᠠᠨ ᠵᠦᠯᠭᠡᠨ ᠳᠡᠭᠡᠭᠦᠷ
ᠬᠠᠨᠲᠠᠯᠠ ᠦᠶᠡᠷᠬᠡᠬᠦ ᠶ᠋ᠢ ᠰᠠᠨᠠᠵᠤ ᠰᠠᠭᠤᠯᠠ ᠡ !
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠩᠷᠢ ᠡᠵᠢ ᠂ ᠴᠤᠯᠮᠤᠨᠲᠤᠶᠠᠭᠠ ᠂ ᠰᠠᠷᠠᠨᠠ
ᠬᠢᠨᠠᠭᠴᠢ ᠄ ᠴᠤᠯᠮᠤᠨᠲᠤᠶᠠᠭᠠ