ᠮᠥᠩᠭᠥᠨ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠳ ( ᠮᠥᠴᠡᠯᠭᠡ ᠰᠢᠯᠦᠭ ) – ᠪ᠂ ᠪᠦᠷᠢᠨᠪᠡᠬᠢ Мөнгөн дэлхийн эзэд ( Мөчлөг шүлэг ) – Б ᠂ Бүрэнбэх
444ᠮᠥᠩᠭᠥᠨ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠳ ( ᠮᠥᠴᠡᠯᠭᠡ ᠰᠢᠯᠦᠭ )
ᠴᠠᠰᠤ ᠂ ᠮᠥᠷ ᠂ ᠴᠠᠰᠤ
ᠡᠪᠦᠯ ᠦ᠋ᠨ ᠴᠠᠰᠤ ᠬᠥᠳᠡᠭᠡ ᠨᠤᠲᠤᠭ ᠢ᠋ ᠴᠤᠯᠤ ᠮᠥᠩᠭᠥ ᠪᠡᠷ ᠭᠠᠳᠠᠷᠯᠠᠭᠰᠠᠨ ᠰᠢᠭ᠋ ᠡᠭᠡᠷᠡᠮᠡ ᠰᠠᠷᠠᠭᠤᠯ ᠲᠠᠯᠠ ᠴᠠᠭᠠᠨ ᠂ ᠪᠠᠷᠤᠭ ᠪᠦᠷᠦᠭ ᠰᠢᠭᠤᠢ ᠴᠠᠭᠠᠨ ᠂ ᠪᠦᠳᠡᠭᠢ ᠰᠦᠳᠡᠬᠢ ᠠᠭᠤᠯᠠ ᠴᠠᠭᠠᠨ ᠃ ᠰᠠᠯᠬᠢ ᠦᠭᠡᠢ ᠂ ᠴᠢᠮᠡᠭᠡ ᠦᠭᠡᠢ ᠵᠢᠭᠲᠡᠢ ᠨᠠᠮ ᠵᠢᠮ ᠃ ᠭᠬᠢᠷ ᠦᠭᠡᠢ ᠂ ᠲᠣᠭᠣᠰᠣ ᠦᠭᠡᠢ ᠭᠠᠢᠬᠠᠯᠲᠠᠢ ᠠᠷᠢᠭᠤᠨ ᠴᠠᠭᠠᠨ ᠃
ᠴᠠᠰᠤ ᠵᠣᠭᠰᠣᠪᠠᠤ ? ᠭᠡᠵᠦ ᠲᠩᠷᠢ ᠶ᠋ᠢ ᠬᠠᠷᠠᠪᠠᠯ ᠄
ᠡᠭᠦᠯᠡ ᠂ ᠰᠠᠷᠠᠨ ᠂ ᠡᠭᠦᠯᠡ ᠃
ᠭᠡᠷ ᠦ᠋ᠨ ᠲᠣᠭᠣᠨᠣ ᠪᠠᠷ ᠦᠰᠦᠷᠦᠭᠰᠡᠨ ᠭᠠᠯ ᠤ᠋ᠨ ᠣᠴᠢ ᠶᠠᠮᠠᠷ ᠨᠢᠭᠡᠨ ᠴᠡᠴᠡᠭᠲᠦ ᠫᠤᠤᠵᠢᠩ ᠰᠢᠭ᠋ ᠵᠠᠳᠠᠷᠠᠨ ᠰᠠᠷᠨᠢᠨᠠ ᠃ ᠬᠤᠷᠳᠤᠨ ᠬᠦᠯᠦᠭ ᠤᠶᠠᠭᠠᠨ ᠳᠡᠭᠡᠷᠡ ᠪᠡᠨ ᠲᠣᠭᠲᠠᠵᠤ ᠶᠠᠳᠠᠨ ᠂ ᠳᠡᠪᠬᠡᠷᠦᠨ ᠦᠦᠷᠰᠡᠨᠡ ᠃ ᠠᠪᠠ ᠶ᠋ᠢᠨ ᠨᠣᠬᠠᠢ ᠬᠠᠰᠢᠶᠠᠨ ᠡᠩᠭᠡᠷ ᠢ᠋ᠶ᠋ᠡᠨ ᠬᠡᠪᠲᠡᠵᠦ ᠶᠠᠳᠠᠨ ᠂ ᠬᠥᠭᠵᠢᠯᠳᠦᠨ ᠭᠦᠶᠦᠯᠳᠦᠨᠡ ᠃ ᠬᠠᠰᠢᠷ ᠠᠩᠴᠢᠨ ᠪᠦᠰᠡ ᠲᠠᠢᠯᠤᠯ ᠦᠭᠡᠢ ᠰᠠᠷᠬᠤᠳ ᠪᠠᠯᠭᠤᠵᠤ ᠦᠷ ᠦ᠋ᠨ ᠴᠣᠯᠮᠣᠨ ᠢ᠋ ᠬᠦᠯᠢᠶᠡᠨᠡ ᠃ ᠨᠡᠭᠦᠳᠡᠯ ᠦ᠋ᠨ ᠠᠩᠴᠢᠳ ᠪᠠᠢᠨ ᠪᠠᠢᠨ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠶ᠋ᠢ ᠬᠠᠩᠭᠢᠨᠠᠭᠤᠯᠬᠤ ᠳ᠋ᠤ᠌ ᠮᠣᠳᠣᠨ ᠰᠠᠯᠠᠭᠠᠨ ᠳᠡᠭᠡᠷᠡᠬᠢ ᠴᠠᠰᠤᠨ ᠴᠡᠴᠡᠭ ᠦ᠋ᠨ ᠬᠡᠯᠲᠡᠰ ᠠᠶᠠᠷ ᠠᠶᠠᠷ ᠳᠣᠷᠣᠭᠰᠢ ᠤᠨᠠᠨᠠ ᠃
ᠭᠡᠭᠡ ᠣᠷᠣᠪᠠᠤ? ᠭᠡᠵᠦ ᠠᠯᠤᠰ ᠢ᠋ ᠪᠠᠷᠠᠯᠠᠪᠠᠯ ᠄
ᠲᠠᠯᠠ ᠂ ᠠᠭᠤᠯᠠ ᠂ ᠲᠠᠯᠠ ᠃
ᠥᠷᠯᠥᠭᠡ ᠪᠣᠯᠬᠤ ᠳ᠋ᠤ᠌ ᠮᠣᠷᠢᠨ ᠬᠠᠵᠠᠭᠠᠷ ᠤ᠋ᠨ ᠴᠢᠮᠡᠭᠡ ᠂ ᠨᠣᠬᠠᠢ ᠶ᠋ᠢᠨ ᠭᠢᠨᠵᠢᠨ ᠦ᠌ ᠳᠠᠭᠤᠨ ᠨᠢᠭᠡᠨᠲᠡ ᠵᠠᠮᠬᠠᠷᠠᠭᠠᠳ ᠭᠠᠭᠴᠠᠬᠦ ᠠᠢᠯ ᠤ᠋ᠨ ᠭᠡᠷ ᠦ᠋ᠨ ᠲᠣᠭᠣᠨᠣ ᠪᠠᠷ ᠰᠤᠭᠤᠨᠠᠭᠯᠠᠭᠰᠠᠨ ᠰᠢᠩᠭᠡᠨ ᠴᠡᠩᠬᠡᠷ ᠤᠲᠤᠭᠠ ᠥᠯᠵᠡᠢ ᠵᠠᠩᠭᠢᠶᠠ ᠵᠠᠩᠭᠢᠳᠴᠤ ᠠᠩᠴᠢᠳ ᠤ᠋ᠨ ᠢ᠋ᠶ᠋ᠠᠨ ᠭᠠᠨᠵᠤᠭᠠ ᠰᠠᠢᠲᠠᠢ ᠢᠷᠡᠬᠦ ᠶ᠋ᠢ ᠵᠥᠩᠨᠡᠨ ᠪᠡᠯᠡᠭᠯᠡᠨᠡ ᠃
ᠠᠩᠴᠢᠳ ᠬᠠᠮᠢᠭᠠᠰᠢ ᠭᠠᠷᠤᠭᠰᠠᠨ ᠶᠤᠮ ᠪᠣᠯ ? ᠭᠡᠵᠦ ᠲᠠᠯᠠ ᠶ᠋ᠢ ᠠᠵᠢᠪᠠᠯ ᠄
ᠴᠠᠰᠤ ᠂ ᠮᠥᠷ ᠂ ᠴᠠᠰᠤ ᠃
ᠮᠥᠩᠭᠥᠨ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠳ
ᠭᠠᠯ ᠤᠯᠠᠭᠠᠨ ᠨᠠᠷᠠᠨ᠂ ᠴᠤᠯᠤ ᠴᠠᠭᠠᠨ ᠳᠡᠯᠡᠬᠡᠢ ᠃
ᠴᠢᠳᠬᠤᠭᠰᠠᠨ ᠮᠥᠩᠭᠥᠨ ᠰᠤᠪᠤᠷᠭᠠ ᠰᠢᠭ᠋ ᠱᠣᠪᠬᠣ ᠣᠷᠭᠢᠯ ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠳ᠋ᠤ᠌ ᠬᠤᠷᠴᠠ ᠭᠡᠷᠡᠯ ᠰᠠᠴᠤᠷᠠᠭᠤᠯᠤᠨᠠ ᠃
ᠵᠣᠷᠢᠭᠲᠤ ᠪᠦᠷᠭᠦᠳ ᠱᠣᠪᠬᠣ ᠣᠷᠭᠢᠯ ᠳᠡᠭᠡᠭᠦᠷ ᠬᠠᠯᠢᠨ ᠳᠡᠭᠦᠯᠢᠨᠡ ᠃ ᠵᠣᠷᠢᠭᠲᠤ ᠪᠦᠷᠭᠦᠳ ᠠ᠋ ! ᠮᠥᠩᠭᠥᠨ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠨ ᠨᠢ ᠴᠢ ᠶᠦ᠍ᠮ ᠦᠦ ? ᠭᠠᠯ ᠤᠯᠠᠭᠠᠨ ᠨᠠᠷᠠ ᠂ ᠴᠤᠯᠤ ᠴᠠᠭᠠᠨ ᠳᠡᠯᠡᠬᠡᠢ ᠃ ᠠᠷᠴᠢᠭᠰᠠᠨ ᠬᠠᠰ ᠲᠣᠯᠢ ᠰᠢᠭ᠋ ᠲᠥᠭᠥᠷᠢᠭ ᠨᠠᠭᠤᠷ ᠨᠠᠷᠠᠨ ᠤ᠋ ᠢᠯᠴᠢᠨ ᠳ᠋ᠦ᠍ ᠥᠳᠬᠡᠨ ᠴᠠᠩ ᠪᠠᠭᠠᠭᠢᠭᠤᠯᠤᠨᠠ ᠃ ᠬᠤᠷᠳᠤᠨ ᠵᠡᠭᠡᠷᠡ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡ ᠪᠡᠷ ᠨᠠᠳᠬᠤᠨ ᠭᠦᠶᠦᠯᠳᠦᠨᠡ ᠃ ᠬᠤᠷᠳᠤᠨ ᠵᠡᠭᠡᠷᠡ ᠠ᠋ !ᠮᠥᠩᠭᠥᠨ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠨ ᠨᠢ ᠴᠢ ᠶᠦ᠍ᠮ ᠦᠦ ? ᠭᠠᠯ ᠤᠯᠠᠭᠠᠨ ᠨᠠᠷᠠ ᠂ ᠴᠤᠯᠤ ᠴᠠᠭᠠᠨ ᠳᠡᠯᠡᠬᠡᠢ ᠃ ᠰᠤᠪᠤᠭᠤᠯᠤᠭᠰᠠᠨ ᠰᠢᠯ ᠦ᠋ᠨ ᠤᠲᠠᠰᠤ ᠰᠢᠭ᠋ ᠴᠤᠪᠤᠭᠠ ᠵᠠᠮ ᠪᠡᠯᠴᠢᠭᠡᠷ ᠦ᠋ᠨ ᠳᠤᠮᠳᠠ ᠲᠣᠣᠷᠯᠠᠨ ᠰᠦᠯᠵᠢᠨᠡ ᠃ᠠᠯᠢᠶᠠ ᠲᠠᠤᠯᠠᠢ ᠵᠠᠮ ᠳᠡᠭᠡᠭᠦᠷ ᠪᠦᠭᠭᠦᠨ ᠨᠠᠭᠠᠳᠤᠨᠠ ᠃
ᠠᠯᠢᠶᠠ ᠲᠠᠤᠯᠠᠢ ᠠ᠋ !ᠮᠥᠩᠭᠥᠨ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠨ ᠨᠢ ᠴᠢ ᠶᠦ᠍ᠮ ᠦᠦ ?
ᠭᠠᠯ ᠤᠯᠠᠭᠠᠨ ᠴᠢᠷᠠᠢ ᠂ ᠴᠤᠯᠤ ᠴᠠᠭᠠᠨ ᠰᠠᠬᠠᠯ ᠃
ᠡᠪᠦᠭᠡᠨ ᠠᠩᠴᠢᠨ ᠵᠠᠯᠠᠭᠤᠴᠤᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠵᠤ ᠭᠠᠨᠵᠤᠭᠠ ᠰᠠᠢᠲᠠᠢ ᠪᠠᠷ ᠳᠤᠭᠤᠢᠯᠠᠩ ᠵᠦᠭ ᠢ᠋ᠶ᠋ᠡᠨ ᠪᠤᠴᠠᠨᠠ ᠃ᠬᠦᠯᠦᠭ ᠦ᠋ᠨ ᠲᠤᠭᠤᠷᠠᠢ ᠨᠢ ᠮᠥᠩᠭᠥᠨ ᠳᠠᠪᠠᠯᠭᠠᠨ ᠢ᠋ ᠪᠣᠰᠬᠠᠬᠤ ᠳ᠋ᠤ᠌ ᠭᠠᠵᠠᠷ ᠳᠡᠯᠡᠬᠡᠢ ᠳᠠᠢᠪᠠᠯᠵᠠᠨ ᠬᠥᠳᠡᠯᠦᠨᠡ ᠃ ᠡᠨᠡ ᠦᠶᠡ ᠳ᠋ᠦ᠍ ᠵᠣᠷᠢᠭᠲᠤ ᠪᠦᠷᠭᠦᠳ ᠬᠠᠳᠠᠨᠠ ᠨᠢᠭᠤᠪᠠ ᠃ ᠬᠤᠷᠳᠤᠨ ᠵᠡᠭᠡᠷᠡ ᠪᠤᠲᠠᠨᠠ ᠳᠠᠯᠳᠠᠯᠠᠪᠠ ᠃ ᠠᠯᠢᠶᠠ ᠲᠠᠤᠯᠠᠢ ᠡᠪᠡᠰᠦᠨᠡ ᠰᠢᠷᠭᠤᠪᠠ ᠃
ᠠ ! ᠮᠥᠩᠭᠥᠨ ᠳᠡᠯᠡᠬᠡᠢ ᠶ᠋ᠢᠨ ᠵᠢᠩᠬᠢᠨᠢ ᠡᠵᠡᠳ ᠠᠢᠰᠤᠢ ᠃
ᠨᠠᠷᠠᠰᠤ ᠴᠡᠴᠡᠭ ᠬᠣᠶᠠᠷ
ᠤᠯᠠᠭᠠᠨ ᠲᠤᠶᠠᠭᠠᠨ ᠤ᠋ ᠳᠣᠭᠤᠤᠷ ᠬᠣᠣᠰ ᠰᠢᠪᠠᠭᠤ ᠵᠡᠷᠭᠡᠴᠡᠨ ᠨᠢᠰᠦᠨᠡ ᠃
ᠪᠣᠷᠣ ᠬᠠᠳᠠᠨ ᠳᠡᠭᠡᠭᠦᠷ ᠤᠭᠠᠯᠵᠠ ᠠᠷᠭᠠᠯᠢ ᠴᠤᠪᠤᠷᠠᠨ ᠭᠦᠶᠦᠯᠳᠦᠨᠡ ᠃
ᠮᠥᠩᠭᠥᠨ ᠲᠠᠯᠠ ᠶ᠋ᠢᠨ ᠳᠤᠮᠳᠠᠭᠤᠷ ᠵᠦᠢᠷᠡᠢ ᠵᠠᠯᠠᠭᠤ ᠬᠠᠮᠲᠤ ᠶᠠᠪᠤᠨᠠ ᠃ ᠡᠮᠡᠭᠲᠡᠢ ᠨᠢ ᠰᠠᠭᠤᠯᠠᠭᠠᠲᠠᠢ ᠤᠰᠤ ᠳᠡᠭᠦᠵᠢᠯᠡᠵᠦ ᠡᠷᠡᠭᠲᠡᠢ ᠨᠢ ᠠᠪᠠ ᠶ᠋ᠢᠨ ᠮᠣᠷᠢ ᠬᠥᠲᠥᠯᠵᠡᠢ ᠃
ᠰᠠᠭᠤᠯᠭᠠᠨ ᠳᠣᠲᠣᠷᠠ ᠠᠴᠠ ᠪᠣᠯᠣᠷ ᠪᠥᠮᠪᠥᠭᠡ ᠴᠠᠯᠭᠢᠯᠠᠨ ᠦᠰᠦᠷᠦᠨᠡ ᠃ ᠭᠡᠲᠡᠯᠡ ᠬᠡᠦᠬᠡᠨ ᠦ᠌ ᠴᠡᠭᠡᠵᠢᠨ ᠡᠴᠡ ᠬᠠᠢᠷᠠ ᠶ᠋ᠢᠨ ᠣᠴᠢ ᠬᠡᠴᠢᠨᠡᠨ ᠦᠰᠦᠷᠴᠦ ᠪᠠᠢᠬᠤ ᠶ᠋ᠢ ᠬᠡᠷᠬᠢᠨ ᠮᠡᠳᠡᠨᠡ ᠃
ᠴᠠᠰᠤᠨ ᠤ᠋ ᠳᠣᠲᠣᠷᠠ ᠬᠥᠯ ᠦ᠋ᠨ ᠮᠥᠷ ᠬᠠᠷᠠᠯᠠᠨ ᠦᠯᠡᠳᠡᠨᠡ ᠃ ᠭᠡᠲᠡᠯᠡ ᠵᠠᠯᠠᠭᠤ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠢᠨᠠᠭ ᠤ᠋ᠨ ᠵᠢᠷᠤᠭ ᠬᠡᠪᠯᠡᠭᠳᠡᠵᠦ ᠪᠠᠢᠬᠤ ᠶ᠋ᠢ ᠶᠠᠭᠠᠬᠢᠨ ᠣᠢᠯᠠᠭᠠᠨᠠ ᠃
ᠴᠠᠭᠠᠨ ᠳᠡᠯᠡᠬᠡᠢ ᠂ ᠤᠯᠠᠭᠠᠨ ᠠᠯᠴᠢᠭᠤᠷ — ᠴᠠᠰᠤᠨ ᠳ᠋ᠤ᠌ ᠳᠡᠯᠭᠡᠷᠡᠭᠰᠡᠨ ᠴᠡᠴᠡᠭ ᠮᠡᠲᠦ!
ᠴᠠᠭᠠᠨ ᠳᠡᠯᠡᠬᠡᠢ ᠂ ᠬᠥᠬᠡ ᠳᠡᠪᠡᠯ ᠴᠠᠰᠤᠨ ᠳ᠋ᠤ᠌ ᠤᠷᠭᠤᠭᠰᠠᠨ ᠨᠠᠷᠠᠰᠤ ᠠᠳᠠᠯᠢ!
ᠲᠢᠶᠠᠨ ᠠᠨ ᠮᠧᠨ ᠦ᠌ ᠤᠯᠠᠭᠠᠨ ᠭᠡᠷᠡᠯ ᠬᠡᠯᠲᠡᠰ ᠳᠡᠭᠡᠷᠡ ᠨᠢ ᠲᠣᠰᠴᠤ ᠪᠠᠢᠬᠤ ᠪᠣᠯᠬᠣᠷ ᠮᠠᠨ ᠤ᠋ ᠴᠡᠴᠡᠭ ᠡᠪᠦᠯ ᠪᠣᠯᠤᠭᠰᠠᠨ ᠴᠤ᠌ ᠤᠪ ᠤᠯᠠᠭᠠᠨ ᠃
ᠵᠦᠩ ᠨᠠᠨ ᠬᠠᠢ ᠶ᠋ᠢᠨ ᠨᠣᠮᠢᠨ ᠤᠷᠤᠰᠬᠠᠯ ᠦᠨᠳᠦᠰᠦ ᠤᠷᠤᠭᠤ ᠨᠢ ᠰᠢᠮᠡᠳᠴᠦ ᠪᠠᠢᠬᠤ ᠪᠣᠯᠬᠣᠷ ᠮᠠᠨ ᠤ᠋ ᠨᠠᠷᠠᠰᠤ ᠬᠦᠢᠲᠡᠨ ᠪᠣᠯᠤᠭᠰᠠᠨ ᠴᠤ᠌ ᠬᠥᠪ ᠬᠥᠬᠡ ᠃
ᠬᠣᠶᠠᠷ ᠰᠢᠪᠠᠭᠤ ᠬᠠᠮᠢᠭᠠᠰᠢ ᠪᠠᠨ ᠨᠢᠰᠴᠡᠪᠡ?
ᠵᠦᠢᠷᠡᠢ ᠭᠥᠷᠥᠭᠡᠰᠦ ᠶᠠᠭᠤᠨ ᠳ᠋ᠠᠭᠠᠨ ᠨᠢᠭᠤᠴᠢᠪᠠ?
ᠮᠠᠨ ᠤ᠋ ᠨᠠᠷᠠᠰᠤ ᠴᠡᠴᠡᠭ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠡᠪᠦᠯᠵᠢᠨ ᠵᠤᠨᠵᠢᠨ ᠦᠰᠦᠨ ᠪᠣᠢᠵᠢᠵᠤ ᠂ ᠦᠷᠡᠯᠡᠨ ᠳᠡᠯᠭᠡᠷᠡᠨᠡ ᠃
1962 . 1
ᠵᠢᠷᠦᠬᠡᠨ ᠦ᠌ ᠰᠤᠳᠠᠰᠤ
ᠬᠤᠷᠠᠭᠰᠠᠨ ᠴᠠᠰᠤᠨ ᠤ᠋ ᠵᠠᠷᠢᠮ ᠨᠢ ᠳᠡᠭᠡᠭᠰᠢ ᠳᠡᠭᠳᠡᠵᠦ ᠂ ᠨᠡᠭᠦᠳᠡᠯ ᠴᠠᠭᠠᠨ ᠡᠭᠦᠯᠡᠨ ᠳ᠋ᠦ᠍ ᠰᠢᠷᠭᠤᠪᠠ ᠃ ᠵᠠᠷᠢᠮ ᠨᠢ ᠳᠣᠷᠣᠭᠰᠢ ᠰᠢᠩᠭᠡᠵᠦ ᠂ ᠢᠨᠢᠶᠡᠯᠳᠦ ᠬᠠᠷᠠ ᠰᠢᠷᠣᠢ ᠳ᠋ᠤ᠌ ᠰᠢᠷᠭᠢᠪᠡ ᠃ ᠵᠠᠷᠢᠮ ᠨᠢ ᠭᠣᠣᠯ ᠭᠣᠷᠣᠬᠠᠨ ᠳ᠋ᠤ᠌ ᠠᠢᠯᠴᠢᠯᠠᠨ ᠣᠴᠢᠪᠠ ᠃ ᠵᠠᠷᠢᠮ ᠨᠢ ᠰᠠᠯᠠᠭᠠ ᠮᠥᠴᠢᠷ ᠲᠦ᠍ ᠰᠢᠮᠡᠳᠦᠨ ᠭᠦᠶᠦᠪᠡ ᠃ ᠢᠩᠭᠢᠭᠰᠡᠨ ᠡᠴᠡ ᠡᠭᠦᠯᠡᠨ ᠦ᠌ ᠳᠣᠲᠣᠷᠠ ᠯᠤᠤ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠵᠤ᠂ ᠬᠥᠷᠥᠰᠥᠨ ᠦ᠌ ᠳᠣᠲᠣᠷᠠ ᠦᠨᠳᠦᠰᠦ ᠰᠠᠬᠠᠯ ᠢ᠋ᠶ᠋ᠠᠨ ᠬᠥᠳᠡᠯᠭᠡᠨ ᠂ ᠭᠣᠣᠯ ᠭᠣᠷᠣᠬᠠ ᠳᠠᠭᠤ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠵᠤ ᠂ ᠰᠠᠯᠠᠭᠠ ᠮᠥᠴᠢᠷ ᠦᠶᠡ ᠭᠡᠰᠢᠭᠦᠦ ᠪᠡᠨ ᠳᠡᠨᠡᠢᠯᠭᠡᠨᠡ ᠃
ᠡᠨᠡ ᠬᠠᠪᠤᠷ ᠮᠠᠨ ᠤ᠋ ᠨᠤᠲᠤᠭ ᠠ᠋ᠴᠠ ᠪᠡᠭᠡᠵᠢᠩ ᠳ᠋ᠦ᠍ ᠲᠡᠮᠦᠷ ᠵᠠᠮ ᠨᠠᠪᠲᠠᠷᠠᠯᠠ ᠃
ᠪᠢᠳᠡ ᠡᠨᠡ ᠲᠡᠮᠦᠷ ᠵᠠᠮ ᠢ᠋ ᠪᠣᠯᠣᠳ ᠭᠠᠷ ᠭᠡᠵᠦ ᠪᠣᠯᠬᠤ ᠦᠭᠡᠢ ᠦᠦ ?ᠠᠷᠤ ᠭᠠᠵᠠᠷ ᠤ᠋ᠨ ᠮᠠᠯᠴᠢᠳ ᠡᠨᠡ ᠲᠣᠮᠣ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠢᠶᠠᠨ ᠠᠨ ᠮᠧᠨ ᠦ᠌ ᠡᠮᠦᠨᠡ ᠰᠦ᠍ ᠶ᠋ᠢᠨ ᠳᠡᠭᠡᠵᠢ ᠪᠡᠨ ᠡᠷᠭᠦᠨᠡ ᠃
ᠪᠢᠳᠡ ᠡᠭᠦᠨ ᠢ᠋ ᠵᠢᠷᠦᠬᠡᠨ ᠦ᠌ ᠰᠤᠳᠠᠰᠤ ᠭᠡᠵᠦ ᠪᠣᠯᠬᠤ ᠦᠭᠡᠢ ᠦᠦ? ᠡᠨᠡ ᠰᠤᠳᠠᠰᠤ ᠮᠣᠩᠭᠣᠯᠴᠤᠳ ᠤ᠋ᠨ ᠵᠢᠷᠦᠬᠡᠨ ᠦ᠌ ᠯᠤᠭᠰᠢᠯᠲᠠ ᠶ᠋ᠢ ᠬᠤᠸᠠᠢ ᠿᠧᠨ ᠳᠠᠩ ᠤ᠋ᠨ ᠵᠦᠩ ᠦ᠋ᠨ ᠴᠣᠬᠢᠯᠭᠠ ᠲᠠᠢ ᠬᠣᠯᠪᠣᠨᠠ ᠃ 18 —20 ᠪᠢᠳᠡ ᠡᠭᠦᠨ ᠢ᠋ ᠴᠣᠭᠣᠷ ᠤ᠋ᠨ ᠤᠲᠠᠰᠤ ᠭᠡᠵᠦ ᠪᠣᠯᠬᠤ ᠦᠭᠡᠢ ᠦᠦ ? ᠡᠨᠡ ᠤᠲᠠᠰᠤ ᠲᠠᠯᠠ ᠶ᠋ᠢᠨ ᠢᠷᠠᠭᠤ ᠡᠬᠡᠰᠢᠭ ᠢ᠋ ᠲᠠᠰᠤᠷᠠᠯ ᠦᠭᠡᠢ ᠪᠡᠷ ᠪᠧᠢ ᠬᠠᠢ ᠴᠡᠴᠡᠷᠯᠢᠭ ᠲᠦ᠍ ᠬᠦᠷᠭᠡᠨ ᠬᠠᠩᠭᠢᠨᠠᠭᠤᠯᠤᠨᠠ ᠃
ᠪᠢᠳᠡ ᠡᠭᠦᠨ ᠢ᠋ ᠮᠥᠷᠥᠭᠡᠳᠦᠯ ᠦ᠋ᠨ ᠰᠣᠯᠣᠩᠭᠠ ᠭᠡᠵᠦ ᠪᠣᠯᠬᠤ ᠦᠭᠡᠢ ᠦᠦ ? ᠡᠨᠡ ᠰᠣᠯᠣᠩᠭᠠ ᠪᠡᠭᠡᠵᠢᠩ ᠳ᠋ᠦ᠍ ᠳᠡᠯᠭᠡᠷᠡᠭᠰᠡᠨ ᠪᠡᠯᠭᠡᠲᠦ ᠴᠡᠴᠡᠭ ᠦ᠋ᠨ ᠡᠷᠬᠡᠰ ᠢ᠋ ᠬᠥᠳᠡᠭᠡ ᠲᠠᠯᠠ ᠳ᠋ᠤ᠌ ᠠᠪᠴᠢᠷᠠᠵᠤ ᠰᠠᠴᠤᠨᠠ ᠃ 1962.1
ᠲᠣᠯᠢ
ᠤᠰᠤᠨ ᠴᠥᠭᠥᠷᠥᠮ ᠂ ᠬᠥᠳᠡᠯᠮᠦᠷᠢ ᠶ᠋ᠢᠨ ᠬᠥᠯᠥᠰᠥᠨ ᠳᠤᠰᠤᠯ ᠢ᠋ᠶ᠋ᠠᠷ ᠷᠠᠰᠢᠶᠠᠨ ᠤ᠋ ᠠᠯᠲᠠᠨ ᠬᠣᠮᠠᠬᠠ ᠃ ᠥᠷᠯᠥᠭᠡ᠂ ᠵᠥᠭᠡᠯᠡᠨ ᠰᠠᠯᠬᠢᠨ ᠢᠯᠪᠢᠬᠦ ᠳ᠋ᠦ᠍ ᠴᠥᠬᠥᠷᠡᠮ ᠦ᠋ᠨ ᠤᠰᠤ ᠬᠤᠨᠢᠶᠠᠰᠤᠷᠠᠨ ᠢᠷᠠᠭᠤ ᠰᠠᠢᠬᠠᠨ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠶ᠋ᠢᠨ ᠠᠶᠠᠯᠭᠤ ᠴᠤᠤᠷᠢᠶᠠᠳᠠᠨᠠ ᠃ ᠳᠠᠭᠤᠤ ᠶ᠋ᠢᠨ ᠨᠢᠭᠡᠨ ᠳᠣᠯᠭᠢᠶᠠᠨ ᠢ᠋ᠶ᠋ᠠᠷ ᠤᠰᠤᠨ ᠤ᠋ ᠨᠢᠭᠡᠨ ᠬᠤᠨᠢᠶᠠᠰᠤ ᠃ ᠤᠰᠤᠨ ᠤ᠋ ᠨᠢᠭᠡᠨ ᠬᠤᠨᠢᠶᠠᠰᠤ ᠪᠠᠷ ᠳᠠᠭᠤᠤ ᠶ᠋ᠢᠨ ᠨᠢᠭᠡᠨ ᠳᠣᠯᠭᠢᠶᠠᠨ ᠃ ᠦᠳᠡ ᠳ᠋ᠦ᠍ ᠂ ᠠᠯᠲᠠᠨ ᠨᠠᠷᠠᠨ ᠳᠡᠭᠡᠷᠡ ᠮᠠᠨᠳᠤᠵᠤ ᠭᠦᠨ ᠴᠡᠯᠮᠡᠭ ᠣᠭᠲᠠᠷᠭᠤᠢ ᠳ᠋ᠤ᠌ ᠴᠠᠭᠠᠨ ᠡᠭᠦᠯᠡ ᠠᠶᠠᠷ ᠨᠢᠰᠦᠨ ᠂ ᠲᠥᠭᠥᠷᠢᠭ ᠨᠣᠮᠣᠬᠠᠨ ᠴᠥᠬᠥᠷᠡᠮ ᠳ᠋ᠦ᠍ ᠳᠠᠷᠪᠠᠭᠤᠯᠲᠤ ᠣᠩᠭᠣᠴᠠ ᠨᠣᠵᠣᠭᠠᠨ ᠨᠡᠭᠦᠨᠡ ᠃ ᠨᠢᠭᠡᠨ ᠪᠥᠭᠡᠮ ᠡᠭᠦᠯᠡᠨ ᠦ᠌ ᠳᠣᠣᠷᠠ ᠨᠢᠭᠡᠨ ᠳᠠᠷᠪᠠᠭᠤᠯᠲᠤ ᠣᠩᠭᠣᠴᠠ ᠃ ᠨᠢᠭᠡᠨ ᠳᠠᠷᠪᠠᠭᠤᠯᠲᠤ ᠣᠩᠭᠣᠴᠠᠨ ᠤ᠋ ᠳᠣᠣᠷᠠ ᠨᠢᠭᠡᠨ ᠪᠥᠭᠡᠮ ᠡᠭᠦᠯᠡ ᠃ ᠦᠳᠡᠰᠢ ᠨᠠᠮ ᠵᠢᠮ ᠣᠭᠲᠠᠷᠭᠤᠢ ᠶ᠋ᠢᠨ ᠲᠦᠮᠡᠨ ᠣᠳᠣᠨ ᠣᠰᠤᠨᠠ ᠱᠠᠭᠠᠢᠵᠤ ᠰᠡᠯᠢᠭᠦᠨ ᠵᠡᠯᠢᠭᠦᠨ ᠴᠥᠬᠥᠷᠡᠮ ᠦ᠋ᠨ ᠮᠢᠩᠭᠠᠨ ᠵᠢᠭᠠᠰᠤ ᠲᠣᠯᠣᠭᠠᠢ ᠪᠠᠨ ᠪᠤᠯᠲᠠᠢᠯᠭᠠᠨ ᠣᠭᠲᠠᠷᠭᠤᠢ ᠶ᠋ᠢ ᠪᠠᠢᠨ ᠪᠠᠢᠨ ᠪᠠᠷᠠᠯᠠᠨᠠ ᠃ ᠨᠢᠭᠡᠨ ᠣᠳᠣᠨ ᠤ᠋ ᠳᠣᠣᠷᠠ ᠨᠢᠭᠡᠨ ᠵᠢᠭᠠᠰᠤ ᠢᠷᠠᠭᠠᠯᠠᠵᠤ ᠨᠢᠭᠡᠨ ᠵᠢᠭᠠᠰᠤᠨ ᠤ᠋ ᠳᠣᠣᠷᠠ ᠨᠢᠭᠡᠨ ᠣᠳᠣᠨ ᠭᠢᠯᠠᠯᠵᠠᠨᠠ ᠃ ᠬᠠᠪᠤᠷ ᠂ ᠴᠥᠬᠥᠷᠡᠮ ᠦ᠋ᠨ ᠡᠷᠭᠢᠨ ᠲᠣᠭᠣᠷᠢᠨ ᠤ᠋ ᠠᠭᠤᠯᠠ ᠲᠠᠯᠠ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠪᠢᠯᠬᠠᠵᠤ ᠤᠨᠢᠶᠠᠷᠲᠤᠨ ᠤᠷᠢᠬᠠᠨ ᠨᠣᠭᠣᠭᠠᠨ ᠰᠠᠯᠬᠢ ᠰᠠᠯᠬᠢᠯᠠᠬᠤᠶᠠ ᠂ ᠴᠥᠬᠥᠷᠡᠮ ᠦ᠋ᠨ ᠤᠰᠤᠨ ᠤ᠋ ᠥᠩᠭᠡ ᠴᠦ᠍ ᠨᠣᠮᠢᠨ ᠨᠣᠭᠣᠭᠠᠨ ᠪᠣᠯᠤᠨ ᠬᠤᠪᠢᠷᠠᠭᠠᠳ ᠮᠠᠯᠴᠢᠳ ᠤ᠋ᠨ ᠰᠢᠨᠡ ᠠᠮᠢᠳᠤᠷᠠᠯ ᠤ᠋ᠨ ᠮᠥᠩᠬᠡ ᠶ᠋ᠢᠨ ᠬᠠᠪᠤᠷ ᠢ᠋ ᠰᠡᠳᠬᠢᠭᠳᠡᠭᠦᠯᠦᠨᠡ ᠃ ᠵᠤᠨ ᠂ ᠴᠥᠬᠥᠷᠡᠮ ᠦ᠋ᠨ ᠡᠷᠭᠢ ᠢᠷᠮᠡᠭ ᠢ᠋ᠶ᠋ᠡᠷ ᠬᠡᠭᠡᠷᠡ ᠶ᠋ᠢᠨ ᠤᠯᠠᠭᠠᠨ ᠴᠡᠴᠡᠭ ᠳᠡᠯᠭᠡᠷᠡᠵᠦ ᠤᠯᠠᠭᠠᠨ ᠢ᠋ᠶ᠋ᠠᠷ ᠤᠨᠢᠶᠠᠷᠲᠤᠨ ᠤᠯᠠᠭᠠᠨ ᠢ᠋ᠶ᠋ᠠᠷ ᠰᠣᠯᠣᠩᠭᠠᠷᠠᠬᠤᠶᠠ ᠴᠥᠬᠥᠷᠡᠮ ᠦ᠋ᠨ ᠤᠰᠤᠨ ᠤ᠋ ᠥᠩᠭᠡ ᠴᠦ᠍ ᠮᠠᠨᠤᠬᠤ ᠶ᠋ᠢᠨ ᠤᠯᠠᠭᠠᠨ ᠪᠣᠯᠤᠨ ᠬᠤᠪᠢᠷᠠᠭᠠᠳ ᠭᠠᠩ ᠭᠠᠴᠢᠭ ᠢ᠋ ᠢᠯᠠᠭᠴᠢ ᠠᠬᠢᠯᠲᠠ ᠶ᠋ᠢᠨ ᠤᠯᠠᠭᠠᠨ ᠲᠤᠭ ᠢ᠋ ᠪᠣᠳᠣᠭᠳᠠᠭᠤᠯᠤᠨᠠ ᠃ ᠨᠠᠮᠤᠷ ᠂ ᠴᠥᠬᠥᠷᠡᠮ ᠢ᠋ ᠲᠣᠭᠣᠷᠢᠨ ᠤᠷᠭᠤᠭᠰᠠᠨ ᠤᠳᠠ ᠤᠯᠢᠶᠠᠰᠤ ᠪᠣᠯᠪᠠᠰᠤᠷᠠᠨ ᠰᠢᠷᠠᠯᠠᠵᠤ ᠠᠯᠲᠠᠨ ᠨᠠᠪᠴᠢ ᠬᠤᠢᠯᠠᠷᠠᠨ ᠡᠷᠭᠢᠯᠳᠦᠬᠦᠶᠡ ᠴᠥᠬᠥᠷᠡᠮ ᠦ᠋ᠨ ᠤᠰᠤᠨ ᠤ᠋ ᠥᠩᠭᠡ ᠴᠦ᠍ ᠠᠯᠲᠠᠨ ᠰᠢᠷᠭᠠᠯ ᠪᠣᠯᠤᠨ ᠬᠤᠪᠢᠷᠠᠭᠠᠳ ᠡᠩᠬᠦᠷᠡᠢ ᠬᠠᠢᠷᠠᠲᠤ ᠡᠬᠡ ᠤᠯᠤᠰ ᠤ᠋ᠨ ᠮᠢᠨᠢ ᠰᠢᠵᠢᠷ ᠠᠯᠲᠠᠨ ᠴᠠᠭ ᠦᠶᠡ ᠶ᠋ᠢ ᠰᠠᠨᠠᠭᠳᠠᠭᠤᠯᠤᠨᠠ ᠃ ᠡᠪᠦᠯ ᠂ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠴᠠᠰᠤ ᠮᠥᠰᠥᠨ ᠳ᠋ᠦ᠍ ᠬᠤᠴᠢᠭᠳᠠᠵᠤ ᠮᠥᠩᠭᠥᠨ ᠴᠠᠭᠠᠨ ᠠᠭᠤᠷ ᠴᠠᠩ ᠪᠠᠭᠠᠭᠢᠬᠤᠶᠠ ᠴᠥᠬᠥᠷᠡᠮ ᠦ᠋ᠨ ᠤᠰᠤᠨ ᠤ᠋ ᠥᠩᠭᠡ ᠴᠦ᠍ ᠡᠬᠡ ᠶ᠋ᠢᠨ ᠴᠠᠭᠠᠨ ᠰᠦ᠍ ᠶ᠋ᠢ ᠬᠠᠰ ᠤ᠋ᠨ ᠠᠶᠠᠭᠠᠨ ᠳ᠋ᠤ᠌ ᠪᠢᠯᠬᠠᠭᠤᠯᠤᠭᠰᠠᠨ ᠶᠤᠮ ᠰᠢᠭ᠋ ᠠᠷᠢᠭᠤᠨ ᠴᠠᠭᠠᠨ ᠪᠣᠯᠤᠨ ᠬᠤᠪᠢᠷᠠᠭᠠᠳ ᠮᠠᠯᠴᠢᠳ ᠢ᠋ ᠰᠢᠨᠡ ᠠᠮᠵᠢᠯᠲᠠ ᠳ᠋ᠤ᠌ ᠵᠥᠩᠨᠡᠨ ᠪᠡᠯᠭᠡᠯᠡᠨᠡ ᠃ ᠤᠰᠤᠨ ᠴᠥᠬᠥᠷᠡᠮ ᠂ ᠰᠢᠨᠡ ᠠᠮᠢᠳᠤᠷᠠᠯ ᠢ᠋ ᠳᠤᠰᠬᠠᠭᠰᠠᠨ ᠰᠢᠯ ᠪᠣᠯᠣᠷ ᠤ᠋ᠨ ᠲᠣᠯᠢ ᠃ 1963.2