ᠵᠠᠯᠠᠭᠤᠰ ᠳᠡᠭᠦᠦᠨᠠᠷ ᠲᠠᠭᠠᠨ ᠬᠦᠷᠭᠡᠬᠦ ᠰᠢᠯᠦᠭ- ᠣ ·ᠳᠠᠰᠢᠪᠠᠯᠪᠠᠷЗалуус түнөөрдаа хүргэх шүлэг-о ·дашбалбар
371ᠵᠠᠯᠠᠭᠤᠰ ᠳᠡᠭᠦᠦᠨᠠᠷ ᠲᠠᠭᠠᠨ ᠬᠦᠷᠭᠡᠬᠦ ᠰᠢᠯᠦᠭ
ᠣ · ᠳᠠᠰᠢᠪᠠᠯᠪᠠᠷ
ᠦᠵᠡᠭᠡᠳ ᠥᠩᠭᠡᠷᠡᠬᠦ ᠠᠮᠢᠳᠤᠷᠠᠯ ᠊ᠢ ᠮᠥᠩᠬᠡ ᠶ᠋ᠢᠨ ᠶᠤᠮᠰᠢᠬ ᠪᠣᠳᠣᠵᠤ
ᠦᠳᠡᠯᠡᠭᠡᠳ ᠪᠤᠴᠠᠬᠤ ᠬᠣᠷᠸ᠋ᠠ ᠶ᠋ᠢ ᠡᠭᠦᠷᠢᠳᠡ ᠶ᠋ᠢᠨ ᠶᠤᠮᠰᠢᠬ ᠰᠡᠳᠬᠢᠵᠦ
ᠵᠠᠯᠠᠭᠤ ᠢᠳᠡᠷ ᠨᠠᠰᠤ ᠪᠠᠨ ᠬᠥᠭᠰᠢᠷᠡᠬᠦ ᠦᠭᠡᠢ ᠶᠤᠮᠰᠢᠬ ᠰᠠᠨᠠᠵᠤ
ᠽᠠᠮᠪᠤᠲᠢᠪ ᠤ᠋ᠨ ᠡᠯᠢᠭᠡᠨ ᠳᠡᠭᠡᠷᠡ ᠲᠣᠶ᠋ᠢᠯᠠᠵᠤ ᠶᠠᠪᠤᠭᠠ ᠳᠡᠭᠦᠦ ᠮᠢᠨᠢ
ᠥᠩᠭᠡ ᠠᠯᠠᠭ ᠡᠨᠡ ᠬᠣᠷᠸᠠ ᠳᠡᠭᠡᠷᠡ
ᠥᠪᠡᠷ ᠦ᠋ᠨ ᠰᠠᠢᠨ ᠳ᠋ᠤ᠌ ᠪᠠᠨ ᠴᠢ ᠳᠥᠷᠥᠭᠡ ᠦᠭᠡᠢ
ᠡᠳᠦᠷ ᠡᠳᠦᠷ ᠦ᠋ᠨ ᠨᠠᠷᠠ ᠶ᠋ᠢ ᠦᠵᠡᠵᠦ ᠲᠩᠷᠢ ᠶ᠋ᠢ ᠬᠠᠷᠠᠬᠤ
ᠥᠨᠳᠥᠷ ᠶᠡᠬᠡ ᠲᠠᠪᠢᠯᠠᠩ ᠊ᠢ ᠬᠠᠶ᠋ᠢᠷᠠᠯᠠᠭᠰᠠᠨ ᠠᠪᠤ ᠡᠵᠢ ᠳ᠋ᠦ᠍ ᠪᠡᠨ ᠪᠠᠶᠠᠷᠯᠠᠯᠠ
ᠦᠳᠡᠰᠢ ᠶ᠋ᠢᠨ ᠴᠡᠩᠭᠡᠭᠡᠨ ᠦ᠌ ᠭᠠᠵᠠᠷ ᠰᠣᠭᠲᠣᠭᠤ ᠶᠤᠮᠰᠢᠬ ᠳᠠᠷᠪᠢᠵᠤ
ᠦᠶᠡ ᠶ᠋ᠢᠨ ᠬᠣᠩᠭᠣᠷ ᠪᠦᠰᠡᠭᠦᠢ ᠲᠡᠢ ᠪᠡᠨ
ᠮᠠᠨᠰᠢᠭᠣᠷᠠᠨ ᠴᠡᠩᠭᠡᠵᠦ ᠶᠠᠪᠤᠬᠤ ᠳ᠋ᠤ᠌
ᠦᠰᠦᠨ ᠪᠤᠭᠤᠷᠤᠯ ᠡᠵᠢ ᠴᠢᠨᠢ ᠦᠨᠢᠶᠡᠨ ᠦ᠌ ᠳᠠᠯᠠᠩ ᠰᠢᠪᠲᠤᠷᠠᠴᠤ
ᠨᠠᠮᠤᠷ ᠤ᠋ᠨ ᠬᠦᠢᠲᠡᠨ ᠰᠥᠨᠢ ᠵᠠᠯᠠᠨ ᠳᠡᠭᠡᠷᠡ ᠵᠢᠬᠡᠭᠦᠴᠡᠨ ᠰᠠᠭᠤᠭᠠ
ᠠᠮᠲᠠᠲᠤ ᠪᠢᠰᠢᠯᠠᠭ ᠬᠤᠷᠤᠭᠤ ᠵᠤᠵᠠᠭᠠᠨ ᠥᠷᠥᠮᠡ ᠶ᠋ᠢ ᠨᠢ
ᠠᠮᠢᠬᠠᠨ ᠳ᠋ᠠᠭᠠᠨ ᠴᠢᠮᠠᠲᠤ ᠯᠠ ᠭᠡᠵᠦ ᠬᠠᠳᠠᠭᠠᠯᠠᠵᠤ
ᠵᠠᠮ ᠤ᠋ᠨ ᠤᠨᠤᠭᠠ ᠬᠦᠯᠢᠶᠡᠨᠡ
ᠥᠷᠢ ᠠᠪᠤᠯᠭᠠ ᠨᠡᠬᠡᠬᠦ ᠦᠭᠡᠢ ᠡᠬᠡ ᠶ᠋ᠢᠨ ᠰᠡᠳᠬᠢᠯ ᠊ᠢ
ᠬᠡᠦᠬᠡᠨ ᠨᠤᠭᠦᠳ ᠣᠷᠣᠯᠠᠬᠤ ᠦᠭᠡᠢ
ᠡᠪᠦᠯ ᠪᠣᠯᠬᠤ ᠠ᠋ᠴᠠ ᠤᠷᠢᠲᠠᠵᠤ ᠡᠵᠢ ᠳ᠋ᠦ᠍ ᠪᠡᠨ ᠨᠢᠭᠡ ᠣᠴᠢᠭᠠᠷᠠᠢ
ᠡᠭᠡᠮ ᠦ᠋ᠨ ᠴᠢᠨᠢ ᠶᠠᠰᠤ ᠬᠤᠭᠤᠷᠠᠬᠤ ᠳ᠋ᠤ᠌ ᠠᠪᠤ ᠶ᠋ᠢᠨ ᠴᠢᠨᠢ ᠴᠡᠭᠡᠵᠢ ᠡᠪᠡᠳᠴᠦ
ᠡᠳᠡᠭᠡᠷᠡᠲᠡᠯᠡ ᠨᠢ ᠠᠳᠠᠯᠢᠬᠠᠨ ᠰᠢᠷᠬᠠ ᠲᠠᠢ ᠶᠠᠪᠤᠳᠠᠭ ᠶᠤᠮ ᠰᠢᠦ
ᠰᠢᠷᠬᠡᠭ ᠰᠢᠷᠬᠡᠭ ᠢ᠋ᠶ᠋ᠡᠷ ᠴᠠᠶ᠋ᠢᠬᠰᠠᠨ ᠦᠰᠦ ᠨᠢ
ᠴᠢᠮᠠᠶ᠋ᠢ ᠬᠦᠯᠢᠶᠡᠭᠰᠡᠨ ᠬᠣᠨᠣᠭ ᠦ᠋ᠳ ᠦ᠋ᠨ ᠲᠣᠭᠠ
ᠰᠢᠨᠡᠬᠡᠨ ᠴᠠᠰᠤᠨ ᠠ᠋ᠴᠠ ᠤᠷᠢᠲᠠᠵᠤ ᠠᠪᠤ ᠳ᠋ᠤ᠌ ᠪᠠᠨ ᠨᠢᠭᠡ ᠣᠴᠢᠭᠠᠷᠠᠢ
ᠡᠪᠦᠯ ᠦ᠋ᠨ ᠰᠥᠨᠢ ᠲᠠᠯᠠ ᠳ᠋ᠤ᠌ ᠶᠠᠪᠤᠭᠠ ᠠᠪᠤ ᠶ᠋ᠢ ᠪᠡᠨ
ᠦᠶᠡ ᠦᠶᠡᠬᠡᠨ ᠰᠠᠨᠠᠭᠠᠷᠠᠢ
ᠥᠪᠡᠷ ᠢ᠋ᠶ᠋ᠡᠨ ᠴᠢ
ᠳᠤᠯᠠᠭᠠᠨ ᠬᠥᠨᠵᠢᠯᠡ ᠳ᠋ᠦ᠍ ᠪᠡᠨ ᠬᠡᠪᠲᠡᠵᠦ ᠪᠠᠶ᠋ᠢᠭᠠ ᠳ᠋ᠤ᠌ ᠪᠠᠨ ᠭᠡᠮᠰᠢᠭᠡᠷᠡᠢ
ᠵᠠᠭᠤᠨ ᠣᠯᠠᠨ ᠬᠣᠨᠣᠭ ᠬᠥᠳᠡᠯᠵᠦ
ᠣᠯᠵᠤ ᠬᠤᠷᠢᠶᠠᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠵᠠᠷᠤᠵᠤ ᠦᠷᠡᠵᠦ
ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠨᠢ ᠴᠢᠮᠠᠲᠤ ᠯᠠ ᠬᠠᠷᠠᠮ ᠦᠭᠡᠢ ᠢᠯᠡᠭᠡᠬᠦ ᠶᠦ᠍ᠮ
ᠵᠣᠭᠣᠭ ᠤ᠋ᠨ ᠭᠠᠵᠠᠷ ᠴᠢ ᠲᠡᠭᠦᠨ ᠊ᠢ ᠨᠢ ᠰᠢᠷᠠ ᠠᠶ᠋ᠢᠷᠠᠭ ᠪᠣᠯᠭᠠᠵᠤ
ᠵᠣᠪᠠᠵᠤ ᠠᠮᠢᠳᠤᠷᠠᠭᠰᠠᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ
ᠬᠥᠯᠥᠰᠥ ᠶ᠋ᠢ ᠤᠤᠭᠤᠬᠤ ᠬᠡᠷᠡᠭ ᠦᠭᠡᠢ
ᠡᠨᠳᠡ ᠴᠢ ᠪᠤᠷᠤᠭᠤᠳᠠᠵᠤ ᠶᠠᠪᠤᠬᠤ ᠳ᠋ᠤ᠌
ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠨᠡᠷᠡ ᠳᠣᠷᠭᠢᠨᠠ
ᠡᠷᠳᠡᠨᠢᠲᠦ ᠪᠤᠭᠤᠷᠤᠯ ᠢ᠋ᠶ᠋ᠠᠨ ᠬᠠᠶ᠋ᠢᠷᠠᠯᠠᠭᠠ ᠦᠭᠡᠢ ᠪᠣᠯ
ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠬᠠᠶ᠋ᠢᠷᠠᠯᠠᠬᠤ ᠶᠠᠭᠤ ᠯᠠ ᠪᠣᠯ
ᠠᠮᠢᠳᠤᠷᠠᠯ ᠲᠤᠷᠰᠢᠳᠠ ᠪᠠᠨ ᠬᠠᠶ᠋ᠢᠷᠠᠯᠠᠵᠤ ᠶᠠᠪᠤᠬᠤ ᠠᠪᠤ ᠭᠡᠳᠡᠭ ᠬᠥᠮᠦᠨ
ᠠᠯᠲᠠᠨ ᠨᠠᠷᠠ ᠰᠢᠭ᠋ ᠭᠠᠭᠴᠠᠬᠠᠨ ᠶᠤᠮ ᠰᠢᠦ
ᠦᠷᠡ ᠬᠡᠦᠬᠡᠳ ᠲᠥᠷᠥᠯᠡ ᠭᠡᠵᠦ ᠪᠠᠶᠠᠷᠯᠠᠵᠤ ᠶᠠᠪᠤᠬᠤ ᠶ᠋ᠢᠨ ᠴᠠᠭ ᠲᠤ᠌
ᠦᠰᠦᠨ ᠪᠤᠭᠤᠷᠤᠯ ᠥᠲᠡᠭᠦᠰ ᠊ᠢ ᠬᠠᠮᠢᠭᠠ ᠨᠢᠭᠡ ᠳ᠋ᠦ᠍ ᠪᠡᠨ
ᠨᠤᠲᠤᠭᠯᠠᠭᠤᠯᠵᠤ ᠪᠠᠶ᠋ᠢᠭᠠ ᠶ᠋ᠢ ᠰᠠᠨᠠᠭᠠᠷᠠᠢ
ᠬᠣᠨᠣᠭ ᠡᠳᠦᠷ ᠦ᠋ᠳ ᠊ᠢ ᠵᠢᠷᠭᠠᠯ ᠲᠠᠢ ᠥᠲᠡᠯᠡ ᠴᠦ᠍ ᠳᠡᠭᠦᠦ ᠮᠢᠨᠢ
ᠬᠣᠷᠸᠠ ᠶ᠋ᠢᠨ ᠶᠠᠭᠤᠮᠠ ᠪᠣᠯᠭᠠᠨ ᠳ᠋ᠤ᠌ ᠡᠴᠦᠰ ᠪᠠᠶ᠋ᠢᠲᠠᠭ ᠊ᠢ ᠰᠠᠨᠠᠭᠠᠷᠠᠢ
ᠣᠷᠴᠢᠯᠠᠩ ᠤ᠋ᠨ ᠱᠤᠤᠭᠢᠶᠠᠨ ᠠᠮᠢᠲᠠᠨ ᠬᠥᠮᠦᠨ ᠦ᠌ ᠬᠡᠯᠡ ᠠᠮᠠ
ᠣᠷᠣᠨ ᠬᠣᠲᠠ ᠶ᠋ᠢᠨ ᠤᠲᠤᠭᠠ ᠤᠨᠢᠶᠠᠷ ᠠ᠋ᠴᠠ ᠬᠣᠯᠠᠳᠠᠵᠤ
ᠠᠶᠠᠨ ᠵᠠᠮ ᠤ᠋ᠨ ᠲᠣᠭᠣᠰᠣ ᠭᠦᠪᠢᠭᠡᠳ
ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠷ ᠦ᠋ᠨ ᠪᠣᠱᠣᠭᠠ ᠶ᠋ᠢ ᠠᠯᠬᠤᠵᠤ ᠦᠵᠡᠭᠡᠷᠡᠢ
ᠡᠷᠭᠢᠨᠡᠭ ᠦ᠋ᠨ ᠲᠡᠨᠳᠡ ᠡᠴᠡ ᠬᠤᠪᠢᠩ ᠰᠠᠪᠠ ᠬᠠᠩᠭᠢᠨᠠᠭᠤᠯᠵᠤ
ᠡᠵᠢ ᠴᠢᠨᠢ 《 ᠬᠦᠦ ᠮᠢᠨᠢ 》 ᠭᠡᠭᠰᠡᠭᠡᠷ ᠪᠣᠰᠴᠤ ᠢᠷᠡᠨᠡ
ᠠᠮᠠᠰᠠᠷ ᠳᠦᠭᠦᠷᠡᠩ ᠴᠠᠢ ᠲᠠᠢ ᠭᠠᠩᠭᠠᠷ ᠱᠠᠭᠠᠵᠠᠩ ᠢ᠋ᠶ᠋ᠠᠨ ᠠᠯᠳᠠᠵᠤ
ᠠᠵᠠᠢ ᠪᠤᠭᠤᠷᠤᠯ ᠬᠥᠭᠰᠢᠨ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠰᠠᠨᠳᠤᠴᠢᠨᠠ
ᠠᠪᠤ ᠴᠢᠨᠢ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠣᠶ᠋ᠢᠮᠣᠷ ᠲᠤ᠌
ᠠᠯᠲᠠᠢ ᠶ᠋ᠢᠨ ᠠᠭᠤᠯᠠᠰ ᠰᠢᠭ᠋ ᠬᠠᠩᠬᠠᠶ᠋ᠢᠵᠤ
ᠠᠯᠢᠪ ᠨᠢᠭᠡᠨ ᠳ᠋ᠦ᠍ ᠪᠠᠷᠢᠴᠠ ᠠᠯᠳᠠᠬᠤ ᠦᠭᠡᠢ
ᠠᠭᠤᠵᠢᠭᠤ ᠲᠠᠶ᠋ᠢᠪᠤᠩ ᠰᠠᠭᠤᠨᠠ
ᠮᠠᠨᠠᠨ ᠨᠡᠪᠲᠡᠯᠬᠦ ᠣᠳᠣ ᠰᠢᠭ᠋ ᠨᠢᠳᠦ ᠨᠢ ᠭᠢᠯᠠᠯᠵᠠᠵᠤ
ᠮᠠᠯᠠᠭᠠᠢ ᠪᠠᠨ ᠡᠮᠦᠰᠦᠨ ᠨᠢᠳᠤᠷᠭᠠ ᠪᠠᠨ ᠵᠠᠰᠠᠵᠤ
ᠢᠷᠡᠵᠦ ᠦᠨᠦᠰᠦᠭᠦᠯᠬᠦ ᠶ᠋ᠢ ᠴᠢᠨᠢ ᠬᠦᠯᠢᠶᠡᠨᠡ
ᠲᠥᠷᠥᠭᠰᠡᠨ ᠭᠡᠷ ᠴᠢᠨᠢ ᠳᠤᠯᠠᠭᠠᠬᠠᠨ
ᠭᠠᠯ ᠤ᠋ᠨ ᠢᠯᠴᠢᠨ ᠳ᠋ᠦ᠍ ᠴᠢ ᠨᠣᠵᠣᠭᠠᠷᠠᠵᠤ
ᠲᠡᠭᠦᠯᠳᠡᠷ ᠣᠷᠴᠢᠯᠠᠩ ᠤ᠋ᠨ ᠳ᠋ᠧᠪᠠᠵᠠᠨ
ᠡᠴᠢᠭᠡ ᠶ᠋ᠢᠨ ᠭᠡᠷ ᠪᠣᠯᠬᠤ ᠶ᠋ᠢ ᠮᠡᠳᠡᠷᠡᠨᠡ
ᠮᠣᠷᠢᠳ ᠦᠦᠷᠰᠡᠬᠦ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠪᠠᠨ
ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠦᠨᠦᠷᠯᠡᠵᠦ
ᠮᠣᠳᠣᠨ ᠳᠠᠭᠱ᠌ᠢ ᠲᠠᠢ ᠥᠷᠥᠮᠡ ᠢᠳᠡᠵᠦ
ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠷ ᠠ᠋ᠴᠠ ᠴᠠᠢ ᠤᠤᠭᠤᠨᠠ
ᠲᠠᠩᠰᠤᠭ ᠰᠠᠢᠬᠠᠨ ᠊ᠢ ᠨᠢ ᠪᠢᠰᠢᠷᠡᠨ
ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠪᠡᠷ ᠬᠡᠷᠡᠨ ᠶᠠᠪᠤᠯᠠ ᠴᠤ᠌
ᠲᠠᠯᠠ ᠨᠤᠲᠤᠭ ᠲᠤ᠌ ᠨᠠᠷᠠᠨ ᠮᠠᠨᠳᠤᠵᠤ
ᠭᠡᠷ ᠦ᠋ᠨ ᠴᠡᠩᠬᠡᠷ ᠤᠲᠤᠭᠠ ᠰᠤᠭᠤᠨᠠᠭᠯᠠᠨ
ᠬᠤᠶ᠋ᠢᠯᠠᠷᠠᠨ ᠳᠠᠪᠬᠢᠬᠤ ᠵᠡᠭᠡᠷᠡ ᠶ᠋ᠢᠨ ᠰᠦᠷᠦᠭ
ᠲᠤᠯᠤᠭᠠᠳ ᠳᠠᠮᠵᠢᠬᠤ ᠠ᠋ᠴᠠ ᠢᠯᠡᠭᠦᠦ ᠰᠠᠢᠬᠠᠨ ᠊ᠢ
ᠬᠤᠷᠮᠤᠰᠲᠠ ᠶ᠋ᠢᠨ ᠳᠣᠣᠷᠠ ᠦᠵᠡᠭᠡ ᠦᠭᠡᠢ ᠪᠡᠨ ᠴᠢ ᠮᠡᠳᠡᠷᠡᠨᠡ
ᠮᠣᠣᠳ᠋ ᠬᠥᠭᠡᠭᠡᠭᠰᠡᠨ ᠬᠣᠲᠠ ᠶ᠋ᠢᠨ ᠭᠠᠩᠭᠠᠩ ᠬᠡᠦᠬᠡᠨ ᠡᠴᠡ ᠢᠯᠡᠭᠦᠦ ᠪᠡᠷ ᠴᠢ
ᠮᠣᠩᠭᠣᠯ ᠳᠡᠪᠡᠯ ᠲᠡᠢ ᠬᠥᠳᠡᠭᠡ ᠶ᠋ᠢᠨ ᠪᠣᠷᠣ ᠪᠦᠰᠡᠭᠦᠢ ᠶ᠋ᠢ ᠬᠠᠶ᠋ᠢᠷᠠᠯᠠᠨᠠ
ᠥᠷᠭᠡᠨ ᠬᠣᠷᠸᠠ ᠳ᠋ᠤ᠌ ᠵᠠᠭᠤᠨ ᠵᠢᠯ ᠠᠮᠢᠳᠤᠷᠠᠬᠤ ᠦᠭᠡᠢ ᠴᠦ᠍
ᠬᠣᠭᠰᠢᠯ ᠬᠤᠷᠢᠶᠠᠭᠴᠢ ᠠ᠋ᠴᠠ ᠡᠪᠦᠯ ᠦ᠋ᠨ ᠰᠥᠨᠢ ᠮᠣᠳᠣᠳ ᠊ᠢ ᠥᠷᠥᠪᠳᠦᠳᠡᠭ
ᠠᠪᠤ ᠶ᠋ᠢ ᠪᠡᠨ ᠢᠯᠡᠭᠦᠦ ᠣᠶ᠋ᠢᠯᠠᠭᠠᠨᠠ ᠴᠢ
ᠬᠠᠷᠢ ᠬᠣᠯᠠ ᠶ᠋ᠢᠨ ᠱᠤᠤᠭᠢᠶᠠᠨᠲᠤ ᠬᠣᠲᠠ
ᠨᠢᠶᠣᠨ ᠤ᠋ ᠭᠡᠷᠡᠯ ᠮᠠᠰᠢᠨ ᠤ᠋ ᠴᠢᠮᠡᠭᠡᠨ ᠡᠴᠡ
ᠬᠠᠷᠭᠤᠢ ᠵᠠᠮ ᠪᠤᠯᠠᠭ ᠱᠠᠩᠳᠠ
ᠬᠣᠲᠠ ᠲᠠᠢ ᠬᠣᠨᠢ ᠪᠠᠨ ᠢᠯᠡᠭᠦᠦ ᠣᠶ᠋ᠢᠯᠠᠭᠠᠨᠠ
ᠤᠬᠠᠭᠠᠨ ᠪᠠᠯᠠᠷᠠᠲᠠᠯᠠ ᠲᠠᠴᠢᠭᠢᠨᠠᠭᠰᠠᠨ
ᠡᠰᠲ᠋ᠷᠡᠳ᠋ ᠬᠥᠭᠵᠢᠮ ᠦ᠋ᠨ ᠴᠢᠮᠡᠭᠡᠨ ᠡᠴᠡ ᠢᠯᠡᠭᠦᠦ
ᠤᠴᠢᠷᠯᠠᠵᠤ ᠠᠷᠭᠠᠳᠠᠭᠰᠠᠨ ᠠᠷᠠᠳ ᠤ᠋ᠨ ᠳᠠᠭᠤᠨ ᠳ᠋ᠤ᠌ ᠪᠠᠨ ᠲᠡᠰᠦᠨᠡ ᠴᠢ
ᠳᠡᠭᠡᠳᠦ ᠶ᠋ᠢᠨ ᠨᠣᠮ ᠲᠠᠢ ᠮᠡᠷᠭᠡᠳ ᠊ᠢ ᠡᠷᠢᠵᠦ
ᠳᠡᠯᠡᠬᠡᠢ ᠪᠡᠷ ᠨᠢᠭᠡ ᠲᠡᠨᠦᠬᠦ ᠶ᠋ᠢᠨ ᠬᠡᠷᠡᠭ ᠦᠭᠡᠢ
ᠳᠡᠷᠭᠡᠳᠡ ᠪᠡᠨ ᠪᠠᠶ᠋ᠢᠭᠠ ᠰᠤᠤᠲᠤ ᠤᠬᠠᠭᠠᠲᠠᠨ ᠊ᠢ
ᠳᠡᠩᠳᠡᠭᠦᠦ ᠣᠶ᠋ᠢᠰᠢᠶᠠᠯ ᠦᠭᠡᠢ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣ
ᠠᠷᠢᠭᠤᠨ ᠦᠨᠡᠨ ᠵᠣᠪᠠᠯᠠᠩ ᠪᠡᠷᠬᠡ ᠬᠠᠶ᠋ᠢᠷᠠ ᠤᠬᠠᠭᠠᠨ ᠤ᠋
ᠠᠮᠢᠨ ᠭᠣᠣᠯ ᠳ᠋ᠤ᠌ ᠨᠠᠪᠲᠠᠷᠠᠭᠰᠠᠨ ᠮᠡᠷᠭᠡᠳ
ᠠᠪᠤ ᠡᠵᠢ ᠬᠣᠶᠠᠷ ᠴᠢᠨᠢ ᠶᠦ᠍ᠮ ᠰᠢᠦ
ᠠᠮᠢᠳᠤᠷᠠᠯ ᠲᠡᠳᠡᠨ ᠊ᠢ ᠭᠦᠨ ᠤᠬᠠᠭᠠᠨ ᠳ᠋ᠤ᠌ ᠰᠤᠷᠭᠠᠵᠤ
ᠠᠳᠠᠭ ᠤ᠋ᠨ ᠮᠠᠭᠤ ᠠᠮᠢᠲᠠᠨ ᠊ᠢ ᠴᠦ᠍ ᠥᠷᠥᠰᠢᠶᠡᠬᠦ
ᠠᠭᠤᠤ ᠶᠡᠬᠡ ᠰᠡᠳᠬᠢᠯ ᠲᠡᠢ ᠪᠣᠯᠭᠠᠭᠰᠠᠨ ᠶᠤᠮ
ᠠᠴᠢᠲᠤ ᠡᠵᠢ ᠳ᠋ᠦ᠍ ᠪᠡᠨ ᠠᠯᠴᠢᠭᠤᠷ ᠠᠪᠠᠴᠢᠬᠤ ᠶ᠋ᠢᠨ ᠬᠡᠷᠡᠭ ᠦᠭᠡᠢ
ᠠᠪᠤ ᠳ᠋ᠤ᠌ ᠪᠠᠨ ᠰᠢᠯ ᠶᠠᠭᠤᠮᠠ ᠥᠭᠬᠦ ᠶ᠋ᠢᠨ ᠴᠦ᠍ ᠬᠡᠷᠡᠭ ᠦᠭᠡᠢ
ᠠᠶ᠋ᠢᠯ ᠤ᠋ᠨ ᠬᠡᠦᠬᠡᠳ ᠬᠠᠭᠤᠷᠬᠤ ᠬᠡᠳᠦᠨ ᠰᠢᠬᠢᠷ ᠴᠦ᠍ ᠬᠡᠷᠡᠭ ᠦᠭᠡᠢ
ᠠᠯᠢ ᠠᠯᠢᠨ ᠢ᠋ᠶ᠋ᠠᠷ ᠨᠢ ᠲᠡᠳᠡ ᠳᠤᠲᠠᠭᠠ ᠦᠭᠡᠢ
ᠡᠷᠲᠡ ᠴᠠᠭ ᠲᠤ᠌ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠰᠠᠨ ᠥᠪᠡᠷ ᠊ᠢ ᠪᠠᠨ ᠯᠠ
ᠡᠵᠢ ᠠᠪᠤ ᠬᠣᠶᠠᠷ ᠲᠤ᠌ ᠪᠠᠨ ᠬᠦᠷᠭᠡᠵᠦ ᠥᠭ
ᠡᠷᠡ ᠶ᠋ᠢᠨ ᠴᠡᠭᠡᠯ ᠳ᠋ᠦ᠍ ᠬᠦᠷᠦᠭᠰᠡᠨ ᠴᠦ᠍ ᠴᠢᠮᠠ ᠶ᠋ᠢ ᠬᠠᠷᠠᠬᠤ ᠠ᠋ᠴᠠ ᠢᠯᠡᠭᠦᠦ
ᠡᠷᠬᠢᠮ ᠪᠡᠯᠡᠭ ᠬᠥᠭᠰᠢᠴᠦᠦᠯ ᠳ᠋ᠦ᠍ ᠦᠭᠡᠢ
ᠤᠴᠢᠷ ᠮᠡᠳᠡᠬᠦ ᠦᠭᠡᠢ ᠨᠢᠯᠬᠠ ᠪᠠᠭᠠ ᠳ᠋ᠤ᠌ ᠪᠠᠨ ᠴᠤ᠌
ᠤᠬᠠᠭᠠᠨ ᠰᠠᠭᠤᠭᠰᠠᠨ ᠢᠳᠡᠷ ᠨᠠᠰᠤᠨ ᠳ᠋ᠤ᠌ ᠪᠠᠨ ᠴᠤ᠌
ᠠᠭᠤᠯᠠ ᠣᠪᠣᠭᠠ ᠰᠢᠭ᠋ ᠶᠠᠭᠤᠮᠠ ᠶ᠋ᠢ ᠠᠬᠠ ᠨᠢ
ᠤᠯᠤᠰ ᠠᠮᠢᠲᠠᠨ ᠳ᠋ᠤ᠌ ᠠᠮᠠᠯᠠᠵᠤ ᠶᠠᠪᠤᠯᠠ
ᠠᠰᠠᠷᠠᠵᠤ ᠲᠡᠤᠠᠬᠦᠭᠰᠡᠨ ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ
ᠠᠴᠢ ᠶ᠋ᠢ ᠪᠦᠷᠢᠮᠦᠰᠦᠨ ᠬᠠᠷᠢᠭᠤᠯᠵᠤ
ᠠᠮᠲᠠᠲᠠᠨ ᠊ᠢ ᠢᠳᠡᠭᠦᠯᠵᠦ ᠥᠩᠭᠡᠲᠡᠨ ᠊ᠢ ᠡᠮᠦᠰᠬᠡᠵᠦ
ᠠᠯᠲᠠᠨ ᠠᠶᠠᠭᠠᠨ ᠠ᠋ᠴᠠ ᠤᠤᠭᠤᠯᠭᠠᠬᠤ ᠶ᠋ᠢᠨ ᠲᠠᠶ᠋ᠢᠲᠠᠢ
ᠠᠨᠳᠠᠭᠤᠷᠠᠵᠤ ᠡᠨᠳᠡᠭᠦᠷᠡᠵᠦ ᠶᠠᠪᠤᠯᠠ
ᠣᠳᠣ ᠯᠠ ᠡᠵᠢ ᠠᠪᠤ ᠶ᠋ᠢ ᠪᠡᠨ ᠵᠢᠷᠭᠠᠭᠠᠶᠠ ᠭᠡᠲᠡᠯᠡ
ᠣᠷᠴᠢᠯᠠᠩ ᠤ᠋ᠨ ᠲᠣᠭᠯᠠᠭᠠᠮ ᠳᠠᠩᠴᠤ ᠬᠠᠲᠠᠭᠤ
ᠠᠯᠪᠠ ᠠᠵᠢᠯ ᠤ᠋ᠨ ᠡᠷᠬᠡ ᠪᠡᠷ ᠠᠯᠤᠰ ᠭᠠᠵᠠᠷ ᠣᠲᠣᠭᠠᠳ
ᠠᠶᠠᠨ ᠵᠠᠮ ᠊ᠢ ᠬᠣᠷᠣᠭᠠᠭᠰᠠᠭᠠᠷ ᠶᠠᠭᠠᠷᠠᠨ ᠶᠠᠭᠠᠷᠠᠨ ᠢᠷᠡᠬᠦ ᠳ᠋ᠦ᠍
ᠠᠪᠤ ᠮᠢᠨᠢ ᠡᠨᠡ ᠬᠣᠷᠸᠠ ᠠ᠋ᠴᠠ ᠶᠠᠪᠤᠴᠢᠬᠠᠭᠰᠠᠨ ᠪᠠᠶ᠋ᠢᠯᠠ
《 ᠬᠦᠦ ᠲᠡᠢ ᠪᠠᠨ ᠯᠠ ᠨᠢᠭᠡ ᠠᠭᠤᠯᠵᠠᠮᠠᠷ ᠪᠠᠶ᠋ᠢᠨᠠ ᠳᠠ 》 ᠭᠡᠵᠦ
ᠡᠵᠢ ᠳ᠋ᠦ᠍ ᠮᠢᠨᠢ ᠬᠡᠯᠡᠭᠰᠡᠨ ᠭᠡᠳᠡᠭ ᠶᠦ᠍ᠮ
ᠬᠦᠰᠡᠯ ᠦ᠋ᠨ ᠰᠡᠭᠦᠯᠴᠢ ᠨᠢ ᠭᠠᠭᠴᠠᠬᠠᠨ ᠡᠨᠡ ᠯᠡ ᠪᠠᠶ᠋ᠢᠬᠰᠠᠨ ᠶᠤᠮ
ᠴᠢ ᠵᠢᠮᠡᠯᠡᠯ ᠬᠦᠯᠢᠶᠡᠵᠦ ᠴᠡᠷᠢᠭ ᠦ᠋ᠨ ᠨᠥᠬᠥᠳ ᠲᠦ᠍ ᠪᠡᠨ
ᠣᠷᠬᠢᠭᠳᠠᠵᠤ ᠪᠣᠯᠤᠨᠠ
ᠴᠢ ᠵᠡᠭᠡᠷᠡ ᠶ᠋ᠢᠨ ᠢᠨᠵᠠᠭᠠ ᠰᠢᠭ᠋ ᠬᠥᠭᠡᠷᠦᠬᠦᠨ ᠪᠦᠰᠡᠭᠦᠢ ᠳ᠋ᠦ᠍ ᠪᠡᠨ
ᠬᠠᠶᠠᠭᠳᠠᠵᠤ ᠪᠣᠯᠤᠨᠠ
ᠬᠠᠷᠢᠨ ᠠᠪᠤ ᠡᠵᠢ ᠴᠢᠨᠢ ᠰᠡᠷᠢᠭᠦᠨ ᠲᠤᠩᠭᠠᠯᠠᠭ ᠪᠠᠶ᠋ᠢᠵᠤ
ᠬᠠᠷᠢᠵᠤ ᠢᠷᠡᠬᠦ ᠶ᠋ᠢ ᠴᠢᠨᠢ ᠬᠦᠯᠢᠶᠡᠬᠦ ᠡᠴᠡ ᠢᠯᠡᠭᠦᠦ ᠵᠢᠷᠭᠠᠯ ᠊ᠢ
ᠬᠠᠮᠤᠭ ᠣᠷᠴᠢᠯᠠᠩ ᠢ᠋ᠶ᠋ᠠᠷ ᠬᠠᠶ᠋ᠢᠵᠤ ᠡᠷᠢᠪᠡᠴᠦ ᠣᠯᠬᠤ ᠦᠭᠡᠢ
ᠠᠯᠳᠠᠭᠠ ᠶ᠋ᠢ ᠮᠢᠨᠢ ᠲᠠᠨᠠᠷ ᠪᠤᠤ ᠳᠠᠪᠲᠠᠵᠠᠭᠠ
ᠠᠪᠤ ᠡᠵᠢ ᠶ᠋ᠢ ᠪᠡᠨ ᠠᠮᠢᠳᠤ ᠳ᠋ᠤᠨᠢ ᠠᠮᠵᠢᠵᠤ ᠪᠠᠶᠠᠷᠯᠠᠭᠤᠯᠵᠠᠭᠠ
ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍ ᠡᠭᠦᠨ ᠡᠴᠡ ᠢᠯᠡᠭᠦᠦ ᠭᠠᠪᠢᠶᠠ ᠶ᠋ᠢ
ᠠᠬᠠ ᠨᠢ ᠮᠡᠳᠡᠬᠦ ᠦᠭᠡᠢ
ᠦᠵᠡᠭᠡᠳ ᠥᠩᠭᠡᠷᠡᠬᠦ ᠠᠮᠢᠳᠤᠷᠠᠯ ᠊ᠢ ᠮᠥᠩᠬᠡ ᠶ᠋ᠢᠨ ᠶᠤᠮᠰᠢᠬ ᠪᠣᠳᠣᠵᠤ
ᠥᠲᠡᠯᠦᠭᠡᠳ ᠪᠤᠴᠠᠬᠤ ᠬᠣᠷᠸᠠ ᠶ᠋ᠢ ᠡᠭᠦᠷᠢᠳᠡ ᠶ᠋ᠢᠨ ᠶᠤᠮᠰᠢᠬ ᠰᠡᠳᠬᠢᠵᠦ
ᠵᠠᠯᠠᠭᠤ ᠢᠳᠡᠷ ᠨᠠᠰᠤ ᠪᠠᠨ ᠬᠥᠭᠰᠢᠷᠡᠬᠦ ᠦᠭᠡᠢ ᠶᠤᠮᠰᠢᠬ ᠰᠠᠨᠠᠵᠤ
ᠽᠠᠮᠪᠤᠲᠢᠪ ᠤ᠋ᠨ ᠡᠯᠢᠭᠡᠨ ᠳᠡᠭᠡᠷᠡ ᠲᠣᠶ᠋ᠢᠯᠠᠵᠤ ᠶᠠᠪᠤᠭᠠ ᠳᠡᠭᠦᠦ ᠮᠢᠨᠢ
ᠥᠩᠭᠡ ᠠᠯᠠᠭ ᠡᠨᠡ ᠬᠣᠷᠸᠠ ᠳᠡᠭᠡᠷᠡ
ᠥᠪᠡᠷ ᠦ᠋ᠨ ᠰᠠᠢᠨ ᠳ᠋ᠤ᠌ ᠪᠠᠨ ᠴᠢ ᠳᠥᠷᠥᠭᠡ ᠦᠭᠡᠢ
ᠡᠳᠦᠷ ᠡᠳᠦᠷ ᠦ᠋ᠨ ᠨᠠᠷᠠ ᠶ᠋ᠢ ᠦᠵᠡᠵᠦ ᠲᠩᠷᠢ ᠶ᠋ᠢ ᠬᠠᠷᠠᠬᠤ
ᠥᠨᠳᠥᠷ ᠶᠡᠬᠡ ᠲᠠᠪᠢᠯᠠᠩ ᠊ᠢ ᠬᠠᠶ᠋ᠢᠷᠠᠯᠠᠭᠰᠠᠨ ᠠᠪᠤ ᠡᠵᠢ ᠳ᠋ᠦ᠍ ᠪᠡᠨ ᠪᠠᠶᠠᠷᠯᠠᠯᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠱᠠᠭᠰᠠᠯ
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣ ᠠ᠋