ᡂᠢ ᠪᠢ ᠶᠢᠨ ᠪᠠᠢᠯᠳᠤᠭᠠᠨЦи бийн байлдаан
333ᡂᠢ ᠪᠢ ᠶᠢᠨ ᠪᠠᠢᠯᠳᠤᠭᠠᠨ
ᠵᠡᠭᠦᠨ ᠬᠠᠨ ᠤᠯᠤᠰ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠂ ᠼᠤᠤ ᠼᠤᠤ ᠬᠥᠬᠡ ᠮᠥᠷᠡᠨ ᠦ᠌ ᠡᠮᠦᠨᠡ ᠳ᠋ᠡᠬᠢ ᠵᠡᠭᠦᠨ ᠡᠤ ᠤᠯᠤᠰ ᠤ᠋ᠨ ᠭᠠᠵᠠᠷ ᠨᠤᠲᠤᠭ ᠊ᠢ ᠪᠤᠯᠢᠶᠠᠨ ᠡᠵᠡᠯᠡᠷᠡ ᠶᠡᠬᠡ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠡᠮᠦᠨᠡᠰᠢ ᠣᠷᠣᠪᠠ ᠃ ᠵᠡᠭᠦᠨ ᠡᠤ ᠤᠯᠤᠰ ᠤ᠋ᠨ ᠵᠧᠦ ᠢᠦᠢ ᠴᠡᠷᠢᠭ ᠵᠠᠩᠵᠤᠨ ᠲᠣᠮᠢᠯᠠᠵᠤ ᠂ ᡂᠢ ᠪᠢ ᠳ᠋ᠦ᠍ ᠪᠣᠭᠣᠳᠠᠯᠯᠠ ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ ᠲᠡᠢ ᠮᠥᠷᠡᠨ ᠠᠯᠤᠰᠯᠠᠨ ᠡᠰᠡᠷᠭᠦᠯᠡᠵᠦ ᠂ ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ ᠮᠥᠷᠡᠨ ᠦ᠌ ᠬᠣᠶ᠋ᠢᠲᠤ ᠡᠷᠭᠢ ᠳ᠋ᠦ᠍ ᠂ ᠵᠧᠦ ᠢᠦᠢ ᠶ᠋ᠢᠨ ᠴᠡᠷᠢᠭ ᠮᠥᠷᠡᠨ ᠦ᠌ ᠡᠮᠦᠨᠡᠲᠦ ᠡᠷᠭᠢ ᠳ᠋ᠦ᠍ ᠪᠠᠶ᠋ᠢᠪᠠ ᠃
ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ ᠴᠥᠮ ᠤᠮᠠᠷᠠᠲᠤ ᠭᠠᠵᠠᠷ ᠤ᠋ᠨ ᠬᠥᠮᠦᠰ ᠲᠤᠯᠠ ᠣᠩᠭᠣᠴᠠᠨ ᠳ᠋ᠤ᠌ ᠰᠠᠭᠤᠵᠤ ᠳᠠᠰᠢᠭᠠᠳᠤᠢ ᠠᠵᠠᠢ ᠃ ᠭᠡᠪᠡᠴᠦ ᠥᠷᠭᠡᠨ ᠮᠥᠷᠡᠨ ᠊ᠢ ᠭᠠᠲᠤᠯᠬᠤ ᠳ᠋ᠤ᠌ ᠡᠷᠬᠡᠪᠰᠢ ᠣᠩᠭᠣᠴᠠᠨ ᠳ᠋ᠤ᠌ ᠰᠠᠭᠤᠬᠤ ᠦᠭᠡᠢ ᠪᠣᠯᠬᠤ ᠦᠭᠡᠢ ᠃ ᠼᠤᠤ ᠼᠤᠤ ᠮᠠᠰᠢ ᠣᠯᠠᠨ ᠣᠩᠭᠣᠴᠠ ᠶ᠋ᠢ ᠲᠡᠮᠦᠷ ᠭᠢᠨᠵᠢ ᠪᠡᠷ ᠬᠣᠯᠪᠣᠭᠤᠯᠤᠭᠠᠳ ᠳᠡᠭᠡᠷᠡ ᠨᠢ ᠪᠠᠩᠰᠨ ᠳᠡᠪᠢᠰᠴᠦ ᠲᠠᠭᠰᠢ ᠭᠠᠵᠠᠷ ᠠᠳᠠᠯᠢ ᠪᠣᠯᠭᠠᠵᠠᠢ ᠃ ᠴᠡᠷᠢᠭ ᠦ᠋ᠳ ᠨᠢ ᠮᠥᠷᠡᠨ ᠳᠡᠭᠡᠷᠡ ᠪᠠᠶ᠋ᠢᠯᠲᠤᠵᠤ ᠰᠣᠷᠣᠮᠠᠭᠴᠠ ᠼᠤᠤ ᠼᠤᠤ ᠮᠥᠷᠡᠨ ᠊ᠢ ᠭᠠᠲᠤᠯᠤᠨ ᠳᠠᠭᠠᠷᠢᠬᠤ ᠪᠠᠷ ᠬᠦᠯᠢᠶᠡᠵᠦ ᠪᠠᠶ᠋ᠢᠪᠠ ᠃
ᠵᠧᠦ ᠢᠦᠢ ᠶ᠋ᠢᠨ ᠭᠠᠷ ᠳᠣᠣᠷᠠᠬᠢ ᠡᠪᠦᠭᠡᠨ ᠵᠠᠩᠵᠤᠨ ᠬᠤᠸᠠᠩ ᠭᠠᠢ ᠬᠡᠯᠡᠪᠡ ᠄ 《 ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ ᠨᠠᠶᠠᠨ ᠲᠦᠮᠡ ᠂ ᠪᠢᠳᠡᠨ ᠦ᠌ ᠴᠡᠷᠢᠭ ᠭᠤᠷᠪᠠᠬᠠᠨ ᠲᠦᠮᠡ ᠂ ᠬᠦᠴᠦᠨ ᠮᠠᠰᠢ ᠶᠡᠬᠡ ᠵᠥᠷᠢᠶᠡ ᠲᠡᠢ ᠃ ᠲᠡᠳᠡᠨ ᠲᠡᠢ ᠤᠳᠠᠭᠠᠨ ᠪᠠᠶ᠋ᠢᠯᠲᠤᠪᠠᠯ ᠪᠢᠳᠡᠨ ᠳ᠋ᠦ᠍ ᠠᠰᠢᠭ ᠦᠭᠡᠢ ᠃ ᠲᠡᠳᠡ ᠣᠩᠭᠣᠴᠠ ᠪᠠᠨ ᠲᠣᠯᠣᠭᠠᠢ ᠰᠡᠭᠦᠯ ᠊ᠢ ᠨᠢ ᠬᠣᠯᠪᠣᠵᠤ ᠴᠥᠮ ᠊ᠢ ᠦᠷᠭᠦᠯᠵᠢ ᠪᠣᠯᠭᠠᠭᠰᠠᠨ ᠲᠤᠯᠠ ᠭᠠᠭᠴᠠ ᠬᠦ ᠭᠠᠯ ᠢ᠋ᠶ᠋ᠠᠷ ᠳᠠᠭᠠᠷᠢᠬᠤ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠪᠡᠯ ᠲᠡᠳᠡ ᠳᠤᠲᠠᠭᠠᠪᠠᠴᠤ ᠳᠤᠲᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ 》 ᠭᠡᠪᠡ ᠃
ᠵᠧᠦ ᠢᠦᠢ ᠬᠡᠯᠡᠭᠰᠡᠨ ᠨᠢ ᠄ 《 ᠡᠨᠡ ᠠᠷᠭᠠ ᠮᠠᠰᠢ ᠰᠠᠢᠨ ᠂ ᠭᠡᠪᠡᠴᠦ ᠭᠠᠯ ᠢ᠋ᠶ᠋ᠠᠷ ᠶᠠᠭᠠᠬᠢᠨ ᠳᠠᠭᠠᠷᠢᠬᠤ ᠠᠷᠭᠠ ᠪᠠᠨ ᠰᠠᠶ᠋ᠢᠲᠤᠷ ᠪᠣᠳᠣᠬᠤ ᠬᠡᠷᠡᠭᠲᠡᠢ 》 ᠭᠡᠪᠡ ᠃ 《 ᠠᠷᠭᠠ ᠤᠬᠠᠭᠠᠨ ᠊ᠢ ᠨᠢᠭᠡᠨᠲᠡ ᠪᠣᠳᠣᠵᠤ ᠭᠠᠷᠭᠠᠪᠠ 》 ᠭᠡᠮᠡᠨ ᠬᠤᠸᠠᠩ ᠭᠠᠢ ᠪᠣᠳᠣᠭᠰᠠᠨ ᠠᠷᠭᠠ ᠪᠠᠨ ᠵᠧᠦ ᠢᠦᠢ ᠳ᠋ᠦ᠍ᠷ ᠬᠡᠯᠡᠪᠡᠰᠦ ᠵᠧᠦ ᠢᠦᠢ ᠰᠣᠨᠣᠰᠤᠭᠠᠳ ᠠᠯᠠᠰᠬᠢᠨ ᠪᠠᠶᠠᠷᠯᠠᠵᠤ ᠲᠡᠷᠡ ᠶᠣᠰᠣᠭᠠᠷ ᠬᠢᠲᠦᠭᠡᠢ ᠭᠡᠪᠡ ᠃
ᠬᠤᠸᠠᠩ ᠭᠠᠢ ᠂ ᠼᠤᠤ ᠼᠤᠤ ᠳ᠋ᠤ᠌ ᠵᠠᠬᠢᠳᠠᠯ ᠪᠢᠴᠢᠵᠦ ᠬᠥᠮᠦᠨ ᠲᠣᠮᠢᠯᠠᠨ ᠬᠦᠷᠭᠡᠭᠦᠯᠪᠡ ᠃ ᠵᠠᠬᠢᠳᠠᠯ ᠳ᠋ᠠᠭᠠᠨ ᠄ ᠡᠤ ᠤᠯᠤᠰ ᠤ᠋ᠨ ᠴᠡᠷᠢᠭ ᠴᠥᠭᠡᠨ ᠲᠤᠯᠠ ᠨᠠᠶᠠᠨ ᠲᠦᠮᠡᠨ ᠶᠡᠬᠡ ᠴᠡᠷᠢᠭ ᠊ᠢ ᠬᠡᠷᠬᠢᠪᠡᠴᠦ ᠬᠣᠷᠢᠭᠯᠠᠵᠤ ᠳᠡᠶ᠋ᠢᠯᠬᠦ ᠦᠭᠡᠢ ᠃ ᠵᠧᠦ ᠢᠦᠢ ᠬᠢᠷᠢ ᠪᠡᠨ ᠮᠡᠳᠡᠬᠦ ᠦᠭᠡᠢ ᠂ ᠥᠨᠳᠡᠭᠡ ᠪᠡᠷ ᠴᠢᠯᠠᠭᠤ ᠴᠣᠬᠢᠬᠤ ᠭᠡᠵᠦ ᠪᠠᠶ᠋ᠢᠬᠤ ᠲᠤᠯᠠ ᠳᠡᠶ᠋ᠢᠯᠦᠭᠳᠡᠨᠡ ᠭᠡᠳᠡᠭ ᠊ᠢ ᠬᠡᠨ ᠴᠦ᠍ ᠪᠦᠷ ᠮᠡᠳᠡᠵᠦ ᠪᠣᠢ ᠃ ᠮᠢᠨᠦ ᠪᠡᠶᠡ ᠵᠡᠭᠦᠨ ᠡᠤ ᠤᠯᠤᠰ ᠠ᠋ᠴᠠ ᠰᠠᠯᠵᠤ ᠮᠠᠰᠢ ᠣᠯᠠᠨ ᠴᠡᠷᠢᠭ ᠬᠢᠭᠡᠳ ᠬᠦᠨᠡᠰᠦ ᠪᠣᠷᠳᠣᠭᠠ ᠶ᠋ᠢ ᠠᠪᠴᠤ ᠲᠠᠨ ᠳ᠋ᠤ᠌ ᠳᠠᠭᠠᠬᠤ ᠪᠠᠷ ᠣᠴᠢᠨᠠ ᠭᠡᠵᠦ ᠪᠢᠴᠢᠵᠡᠢ ᠃
ᠬᠤᠸᠠᠩ ᠭᠠᠢ ᠶ᠋ᠢᠨ ᠵᠠᠬᠢᠳᠠᠯ ᠊ᠢ ᠦᠵᠡᠭᠡᠳ ᠼᠤᠤ ᠼᠤᠤ ᠶᠡᠬᠡᠳᠡ ᠪᠠᠶᠠᠷᠯᠠᠪᠠ ᠃
ᠨᠢᠭᠡᠨ ᠡᠳᠦᠷ ᠮᠥᠷᠡᠨ ᠳᠡᠭᠡᠷᠡ ᠵᠡᠭᠦᠨ ᠡᠮᠦᠨᠡ ᠶ᠋ᠢᠨ ᠰᠠᠯᠬᠢᠨ ᠰᠢᠷᠦᠭᠦᠰᠴᠦ ᠠᠭᠤᠯᠠ ᠮᠡᠲᠦ ᠳᠠᠪᠠᠯᠭᠠᠨ ᠪᠣᠰᠤᠨ ᠬᠣᠶ᠋ᠢᠲᠤ ᠡᠷᠭᠢ ᠤᠷᠤᠭᠤ ᠪᠠᠨ ᠴᠠᠯᠭᠢᠯᠠᠪᠠ ᠃ ᠼᠤᠤ ᠼᠤᠤ ᠰᠠᠯᠬᠢᠨ ᠊ᠢ ᠡᠰᠡᠷᠭᠦᠯᠡᠨ ᠪᠠᠷᠠᠯᠠᠨ ᠪᠠᠶ᠋ᠢᠲᠠᠯᠠ ᠭᠡᠨᠡᠳᠲᠡ ᠨᠢᠭᠡ ᠬᠤᠶᠠᠭ ᠬᠤᠷᠤᠭᠤ ᠪᠠᠷ ᠵᠢᠭᠠᠵᠤ ᠄ 《 ᠮᠥᠷᠡᠨ ᠦ᠌ ᠡᠮᠦᠨᠡ ᠵᠠᠬᠠ ᠠ᠋ᠴᠠ ᠨᠢᠭᠡᠨ ᠬᠡᠰᠡᠭ ᠳᠠᠷᠪᠠᠭᠤᠯ ᠰᠠᠯᠬᠢᠨ ᠳ᠋ᠤ᠌ ᠫᠦᠩᠭᠦᠶ᠋ᠢᠵᠦ ᠂ ᠨᠠᠰᠢᠯᠠᠬᠤ ᠨᠢ ᠪᠥᠷᠲᠥᠯᠵᠡᠨ ᠬᠠᠷᠠᠭᠳᠠᠵᠤ ᠪᠣᠢ 》 ᠬᠡᠮᠡᠪᠡ ᠃ ᠼᠤᠤ ᠼᠤᠤ ᠨᠠᠷᠢᠪᠴᠢᠯᠠᠨ ᠠᠵᠢᠭᠯᠠᠪᠠᠰᠤ ᠦᠨᠡᠬᠡᠷ ᠨᠢᠭᠡᠨ ᠠᠩᠭᠢ ᠣᠩᠭᠣᠴᠠ ᠬᠣᠶ᠋ᠢᠲᠤ ᠡᠷᠭᠢ ᠶ᠋ᠢ ᠴᠢᠭᠯᠡᠨ ᠢᠷᠡᠪᠡ ᠃ ᠲᠦᠳᠡᠯ ᠦᠭᠡᠢ ᠮᠥᠷᠡᠨ ᠦ᠌ ᠳᠤᠮᠳᠠ ᠬᠦᠷᠴᠦ ᠢᠷᠠᠭᠰᠠᠨ ᠳ᠋ᠤ᠌ ᠣᠩᠭᠣᠴᠠᠨ ᠤ᠋ ᠬᠣᠰᠢᠭᠤ ᠳ᠋ᠤ᠌ 《 ᠬᠤᠸᠠᠩ 》 ᠥᠰᠥᠭᠲᠦ ᠳᠠᠯᠪᠠᠭᠠ ᠡᠯᠭᠦᠵᠦ ᠪᠠᠶ᠋ᠢᠬᠤ ᠨᠢ ᠲᠣᠳᠣᠷᠬᠠᠢ ᠬᠠᠷᠠᠭᠳᠠᠪᠠ ᠃ ᠼᠤᠤ ᠼᠤᠤ ᠢᠨᠢᠶᠡᠵᠦ 《 ᠬᠤᠸᠠᠩ ᠭᠠᠢ ᠦᠭᠡ ᠪᠡᠨ ᠮᠠᠯᠵᠢᠭᠰᠠᠨ ᠦᠭᠡᠢ ᠂ ᠳᠠᠭᠠᠬᠤ ᠪᠠᠷ ᠢᠷᠡᠪᠡ 》 ᠭᠡᠪᠡ ᠃
ᠰᠠᠯᠬᠢ ᠤᠷᠤᠭᠤ ᠢᠷᠡᠵᠦ ᠪᠠᠶ᠋ᠢᠭᠠ ᠣᠩᠭᠣᠴᠠ ᠨᠤᠭᠤᠳ ᠦᠨᠡᠬᠡᠷ ᠬᠤᠸᠠᠩ ᠭᠠᠢ ᠶ᠋ᠢᠨ ᠣᠩᠭᠣᠴᠠ ᠮᠥᠨ ᠪᠠᠶ᠋ᠢᠪᠠ ᠃ ᠨᠡᠶ᠋ᠢᠲᠡ ᠬᠣᠷᠢᠨ ᠶᠡᠬᠡ ᠣᠩᠭᠣᠴᠠ ᠪᠣᠢ ᠃ ᠡᠳᠡᠭᠡᠷ ᠣᠩᠭᠣᠴᠠ ᠶ᠋ᠢ ᠴᠥᠮ ᠣᠷᠬᠢᠭᠤᠯ ᠢ᠋ᠶ᠋ᠠᠷ ᠪᠦᠲᠦᠭᠡᠵᠡᠢ ᠃ ᠳᠣᠲᠣᠷᠠ ᠨᠢ ᠰᠠᠭᠤᠭᠰᠠᠨ ᠴᠡᠷᠢᠭ ᠦᠭᠡᠢ ᠂ ᠬᠦᠨᠡᠰᠦ ᠪᠣᠷᠳᠣᠭᠠ ᠴᠤ᠌ ᠲᠡᠭᠡᠭᠡᠭᠰᠡᠨ ᠦᠭᠡᠢ ᠃ ᠬᠠᠷᠢᠨ ᠵᠡᠭᠡᠰᠦ ᠂ ᠬᠠᠭᠤᠷᠠᠢ ᠲᠦᠯᠡᠭᠡ ᠠᠴᠢᠵᠤ ᠳᠡᠭᠡᠷᠡ ᠡᠴᠡ ᠨᠢ ᠱᠡᠦ ᠂ ᠬᠦᠬᠦᠷ ᠠᠰᠬᠠᠭᠰᠠᠨ ᠠᠵᠠᠢ ᠃ ᠶᠡᠬᠡ ᠣᠩᠭᠣᠴᠠᠨ ᠤ᠋ ᠬᠣᠶ᠋ᠢᠨᠠ ᠠ᠋ᠴᠠ ᠪᠠᠰᠠ ᠬᠡᠳᠦᠨ ᠵᠠᠪᠢ ᠴᠦᠷᠬᠦᠯᠡᠭᠰᠡᠨ ᠪᠠᠶ᠋ᠢᠪᠠ ᠃
ᠬᠤᠸᠠᠩ ᠭᠠᠢ ᠶ᠋ᠢᠨ ᠣᠩᠭᠣᠴᠠ ᠳᠠᠷᠪᠠᠭᠤᠯ ᠢ᠋ᠶ᠋ᠠᠨ ᠭᠦᠢᠴᠡᠳ ᠳᠡᠯᠭᠡᠵᠦ ᠬᠠᠷᠪᠤᠭᠰᠠᠨ ᠰᠤᠮᠤ ᠮᠡᠲᠦ ᠬᠤᠷᠳᠤᠨ ᠣᠷᠣᠭᠰᠢ ᠳᠠᠪᠰᠢᠨᠠ ᠃ ᠵᠧᠦ ᠢᠦᠢ ᠴᠡᠷᠢᠭ ᠠᠪᠴᠤ ᠬᠣᠶ᠋ᠢᠨᠠ ᠠ᠋ᠴᠠ ᠨᠢ ᠳᠠᠭᠠᠵᠤ ᠪᠠᠶ᠋ᠢᠪᠠ ᠃ ᠲᠡᠷᠲᠡᠭᠡ ᠡᠷᠭᠢ ᠳ᠋ᠡᠬᠢ ᠼᠤᠤ ᠼᠤᠤ ᠵᠥᠪᠬᠡᠨ ᠬᠤᠸᠠᠩ ᠭᠠᠢ ᠶ᠋ᠢ ᠳᠠᠭᠠᠬᠤ ᠪᠠᠷ ᠢᠷᠡᠪᠡ ᠭᠡᠮᠡᠨ ᠪᠠᠶᠠᠷᠯᠠᠭᠰᠠᠨ ᠠ᠋ᠴᠠ ᠪᠢᠰᠢ ᠶᠠᠮᠠᠷ ᠴᠤ᠌ ᠪᠡᠯᠡᠳᠬᠡᠯ ᠦᠭᠡᠢ ᠪᠠᠶ᠋ᠢᠵᠠᠢ ᠃
ᠬᠤᠸᠠᠩ ᠭᠠᠢ ᠶ᠋ᠢᠨ ᠣᠩᠭᠣᠴᠠ ᠼᠤᠤ ᠼᠤᠤ ᠶ᠋ᠢᠨ ᠣᠩᠭᠣᠴᠠᠨ ᠳ᠋ᠤ᠌ ᠬᠣᠶᠠᠷ ᠭᠠᠵᠠᠷ ᠵᠠᠢ ᠲᠠᠢ ᠣᠶ᠋ᠢᠷᠠᠲᠤᠮᠠᠭᠴᠠ ᠪᠠᠨ ᠴᠡᠷᠢᠭ ᠲᠡᠭᠡᠨ ᠵᠠᠷᠯᠠᠨ ᠬᠣᠷᠢᠨ ᠣᠩᠭᠣᠴᠠ ᠵᠡᠭᠡᠰᠦ ᠪᠡᠨ ᠨᠢᠭᠡᠨ ᠵᠡᠷᠭᠡ ᠨᠣᠴᠣᠭᠠᠵᠤ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠵᠠᠪᠢ ᠳᠡᠭᠡᠷᠡ ᠪᠡᠨ ᠭᠠᠷᠴᠤ ᠴᠦᠷᠬᠦ ᠶ᠋ᠢ ᠲᠠᠶ᠋ᠢᠯᠪᠠ ᠃ ᠬᠣᠷᠢᠨ ᠣᠩᠭᠣᠴᠠ ᠭᠠᠯ ᠭᠱᠠᠨ ᠵᠠᠭᠤᠷᠠ ᠼᠤᠤ ᠼᠤᠤ ᠶ᠋ᠢᠨ ᠣᠩᠭᠣᠴᠠ ᠤᠷᠤᠭᠤ ᠳᠠᠭᠠᠷᠢᠨ ᠣᠷᠣᠪᠠ ᠃ ᠼᠤᠤ ᠼᠤᠤ ᠶ᠋ᠢᠨ ᠣᠩᠭᠣᠴᠠ ᠨᠢᠭᠡᠨ ᠳᠣᠣᠷᠠ ᠴᠥᠮ ᠭᠠᠯ ᠠᠪᠤᠯᠴᠠᠨ ᠰᠢᠲᠠᠪᠠ ᠃ ᠣᠩᠭᠣᠴᠠ ᠶ᠋ᠢ ᠪᠦᠷ ᠲᠡᠮᠦᠷ ᠭᠢᠨᠵᠢ ᠪᠡᠷ ᠬᠣᠯᠪᠣᠵᠤ ᠪᠠᠶ᠋ᠢᠬᠰᠠᠨ ᠲᠤᠯᠠ ᠰᠠᠯᠵᠤ ᠲᠠᠷᠬᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠠᠢ ᠃ ᠭᠠᠯ ᠪᠠᠰᠠ ᠡᠷᠭᠢ ᠳᠡᠭᠡᠷᠡ ᠦᠷᠪᠢᠰᠦᠨ ᠬᠦᠷᠴᠦ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠴᠦ᠍ ᠨᠣᠴᠣᠵᠤ ᠡᠬᠢᠯᠡᠪᠡ ᠃
ᠭᠠᠯ ᠤ᠋ᠨ ᠭᠡᠷᠡᠯ ᠭᠠᠵᠠᠷ ᠲᠩᠷᠢ ᠶ᠋ᠢ ᠭᠦᠨ ᠤᠯᠠᠭᠠᠨ ᠪᠣᠯᠭᠠᠵᠤ ᠭᠠᠰᠢᠭᠤᠨ ᠬᠠᠷᠠ ᠤᠲᠤᠭᠠ ᠮᠥᠷᠡᠨ ᠊ᠢ ᠪᠦᠷᠬᠦᠵᠦ ᠂ ᠤᠰᠤ ᠡᠷᠭᠢ ᠬᠣᠶᠠᠷ ᠨᠢ ᠢᠯᠭᠠᠷᠠᠨ ᠲᠠᠨᠢᠭᠳᠠᠬᠤ ᠦᠭᠡᠢ ᠪᠣᠯᠪᠠ ᠃ ᠤᠬᠢᠯᠠᠬᠤ ᠳᠠᠭᠤᠨ ᠴᠢᠷᠠᠯᠠᠬᠤ ᠳᠠᠭᠤᠨ ᠬᠤᠳᠬᠤᠯᠳᠤᠨ ᠦᠢᠮᠡᠵᠦ ᠂ ᠼᠤᠤ ᠼᠤᠤ ᠶ᠋ᠢᠨ ᠬᠤᠶᠠᠭ ᠠᠭᠲᠠ ᠬᠣᠶᠠᠷ ᠤ᠋ᠨ ᠰᠢᠳᠡᠵᠦ ᠦᠬᠦᠭᠰᠡᠨ ᠨᠢ ᠲᠣᠭᠠ ᠦᠭᠡᠢ ᠃
ᠼᠤᠤ ᠼᠤᠤ ᠵᠠᠪᠢ ᠳ᠋ᠤ᠌ ᠰᠠᠭᠤᠨ ᠡᠷᠭᠢ ᠳᠡᠭᠡᠷᠡ ᠳᠤᠲᠠᠭᠠᠨ ᠭᠠᠷᠪᠠ ᠃ ᠠᠷᠤ ᠠ᠋ᠴᠠ ᠨᠢ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤᠨ ᠭᠠᠵᠠᠷ ᠲᠩᠷᠢ ᠶ᠋ᠢ ᠳᠣᠩᠰᠣᠯᠭᠠᠨ ᠨᠢᠵᠢᠭᠢᠨᠡᠵᠦ ᠂ ᠵᠧᠦ ᠢᠦᠢ ᠶ᠋ᠢᠨ ᠴᠡᠷᠢᠭ ᠨᠡᠬᠡᠨ ᠢᠷᠡᠵᠡᠢ ᠃ ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ ᠂ ᠵᠧᠦ ᠢᠦᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠪᠠᠷᠠ ᠪᠠᠷ ᠰᠠᠷᠨᠢᠨ ᠪᠤᠲᠠᠷᠠᠵᠤ ᠬᠤᠶᠠᠭ ᠳᠤᠭᠤᠯᠠᠭᠠ ᠪᠠᠨ ᠭᠡᠭᠡᠨ ᠳᠤᠲᠠᠭᠠᠵᠤ ᠂ ᠡᠰᠡᠷᠭᠦᠴᠡᠨ ᠪᠠᠶ᠋ᠢᠯᠲᠤᠬᠤ ᠰᠡᠳᠬᠢᠯ ᠣᠭᠲᠣᠬᠠᠨ ᠴᠤ᠌ ᠦᠭᠡᠢ ᠃ ᠼᠤᠤ ᠼᠤᠤ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠬᠤᠸᠠ ᠿᠦᠩ ᠳ᠋ᠣᠣ ᠵᠦᠭ ᠪᠤᠷᠤᠭᠤᠯᠠᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠱᠠᠭᠰᠠᠯ
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣ ᠠ᠋
※ ᠢᠷᠡᠯᠲᠡ ᠄
ᠠᠯᠪᠠᠨ ᠵᠢᠷᠤᠮ ᠤ᠋ᠨ ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠳᠣᠯᠣᠳᠤᠭᠠᠷ ᠳᠡᠪᠲᠡᠷ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠶ᠋ᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ ᠃
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ ᠃
1991 ᠣᠨ ᠤ᠋3 ᠳ᠋ᠤᠭᠠᠷ ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠊ᠢ ᠬᠢᠪᠡ ᠃