ᠬᠠᠪᠤᠷ ᠬᠡᠦᠬᠡᠨ- ᠣ · ᠰᠡᠴᠡᠨᠳᠦХавар хүүхэн-О· Цэцэнт
436ᠬᠠᠪᠤᠷ ᠬᠡᠦᠬᠡᠨ
ᠣ · ᠰᠡᠴᠡᠨᠳᠦ
ᠡᠷᠲᠡᠨ ᠡᠳᠦᠭᠡ ᠶ᠋ᠢ ᠵᠢᠷᠠᠨ ᠢ᠋ᠶ᠋ᠠᠷ ᠳᠤᠭᠤᠯᠤᠯᠠ ᠴᠤ᠌
ᠥᠷᠲᠡᠭᠡ ᠤᠯᠠᠭᠠ ᠶ᠋ᠢ ᠵᠠᠭᠤᠨ ᠢ᠋ᠶ᠋ᠠᠷ ᠡᠪᠬᠡᠯᠡ ᠴᠦ᠍
ᠡᠷᠭᠢᠯᠳᠦᠬᠦ ᠬᠠᠰ ᠤ᠋ᠨ ᠡᠷᠴᠢᠮ ᠢ᠋ᠶ᠋ᠡᠷ
ᠡᠬᠡ ᠳᠡᠯᠡᠬᠡᠢ ᠶ᠋ᠢᠨ ᠡᠯᠢᠭᠡᠨ ᠳ᠋ᠦ᠍ ᠥᠨᠥᠳᠥᠷ
ᠶᠣᠣᠯᠠᠭᠰᠠᠨ ᠪᠥᠮᠪᠥᠷᠴᠡᠭ ᠦ᠋ᠨ ᠰᠤᠨᠢᠶᠠᠭᠰᠠᠨ ᠮᠥᠴᠡ
ᠶᠣᠷᠳᠣ ᠶ᠋ᠢᠨ ᠭᠠᠯᠪᠠ ᠶ᠋ᠢᠨ ᠶᠠᠭ ᠡᠨᠡ ᠬᠣᠷᠣᠮ ᠳ᠋ᠤ᠌
ᠶᠠᠭᠠᠨ ᠳᠤᠷᠳᠤᠩ ᠠᠯᠴᠢᠭᠤᠷ ᠨᠠᠮᠢᠷᠠᠭᠤᠯᠤᠨ
ᠶᠠᠯᠢᠩ ᠮᠥᠩᠭᠥᠨ ᠲᠤᠶᠠᠭᠠ ᠰᠠᠴᠤᠷᠠᠭᠤᠯᠤᠨ
ᠲᠥᠷᠬᠥᠮ ᠦ᠋ᠨ ᠰᠠᠢᠬᠠᠨ ᠨᠤᠲᠤᠭ ᠢ᠋ᠶ᠋ᠠᠨ
ᠳᠤᠷᠠᠰᠤᠨ ᠳᠤᠷᠠᠰᠤᠨ ᠤᠶᠠᠷᠠᠨ ᠳᠠᠭᠤᠯᠠᠨ ᠰᠠᠨᠠᠵᠤ
ᠲᠡᠪᠴᠢᠶᠡᠷᠢ ᠠᠯᠲᠠᠨ ᠭᠡᠮᠦᠷ ᠵᠢᠮᠦᠷ ᠰᠠᠭᠤᠵᠤ
ᠲᠣᠭᠠᠯᠠᠯ ᠤ᠋ᠨ ᠵᠢᠮᠡ ᠶ᠋ᠢ ᠲᠡᠰᠴᠦ ᠶᠠᠳᠠᠨ ᠬᠦᠯᠢᠶᠡᠵᠦ
ᠡᠪᠦᠯ ᠡᠪᠦᠭᠡᠨ ᠦ᠌ ᠮᠥᠩᠭᠥᠨ ᠣᠷᠳᠣᠨ ᠳ᠋ᠤ᠌
ᠠᠯᠲᠠ ᠴᠠᠭᠠᠨ ᠬᠠᠳᠠᠭ ᠢ᠋ᠶ᠋ᠠᠨ ᠳᠡᠯᠭᠡᠨ ᠵᠣᠯᠭᠠᠵᠤ
ᠵᠢᠰᠢᠶᠠᠨ ᠤ᠋ ᠠᠯᠲᠠᠨ ᠲᠠᠮᠠᠭᠠ ᠪᠠᠨ ᠡᠪᠦᠷᠲᠦᠯᠡᠵᠦ
ᠵᠤᠭᠠ ᠨᠠᠢᠷ ᠤ᠋ᠨ ᠳᠡᠪᠵᠢᠶᠡᠨ ᠡᠴᠡ ᠠᠶᠠᠷᠯᠠᠵᠤ
ᠬᠠᠮᠤᠭ ᠡᠷᠳᠡᠨᠢ ᠪᠡᠷ ᠴᠣᠭᠴᠠᠯᠠᠭᠰᠠᠨ
ᠬᠠᠰ ᠤ᠋ᠨ ᠣᠷᠳᠣᠨ ᠳ᠋ᠠᠭᠠᠨ ᠡᠭᠡᠵᠦ
ᠡᠯᠭᠦᠭᠦᠷ ᠮᠥᠩᠭᠥᠨ ᠲᠣᠪᠴᠢ ᠪᠠᠨ ᠲᠣᠪᠴᠢᠯᠠᠵᠤ
ᠡᠪᠯᠢᠭ ᠨᠣᠭᠣᠭᠠᠨ ᠪᠦᠰᠡ ᠪᠡᠨ ᠴᠢᠩᠭᠠᠯᠠᠵᠤ
ᠡᠷᠳᠡᠨᠢ ᠶ᠋ᠢᠨ ᠣᠯᠠᠨ ᠵᠢᠮᠰᠡᠭᠯᠡᠯ ᠢ᠋ᠶ᠋ᠡᠷ ᠭᠣᠶᠣᠯᠠᠵᠤ
ᠡᠭᠦᠳᠡᠨ ᠦ᠌ ᠰᠤᠪᠤᠳ ᠤ᠋ᠨ ᠤᠨᠵᠢᠯᠭᠠ ᠶ᠋ᠢ ᠰᠡᠬᠦᠵᠦ
ᠤᠶᠠᠭᠠᠨ ᠵᠠᠯᠠᠨ ᠥᠭᠡᠳᠡ ᠪᠡᠨ ᠳᠡᠪᠳᠡᠷᠢᠨ ᠬᠦᠷᠴᠦ
ᠠᠵᠢᠨᠠᠢ ᠬᠦᠯᠦᠭ ᠲᠡᠭᠡᠨ ᠠᠯᠠᠪᠬᠢᠨ ᠮᠣᠷᠳᠠᠵᠤ
ᠤᠰᠤ ᠨᠤᠲᠤᠭ ᠭᠠᠯ ᠭᠣᠯᠣᠮᠲᠠ ᠪᠣᠷᠣ ᠭᠡᠷ
ᠡᠬᠡ ᠬᠡᠯᠡ ᠪᠣᠰᠤᠭᠠ ᠦᠰᠦᠭ ᠤᠤᠭᠠᠯ ᠰᠣᠶᠣᠯ
ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠬᠥᠮᠡᠢ ᠬᠤᠭᠤᠷ ᠴᠣᠭᠣᠷ
ᠤᠯᠠᠭᠠᠨ ᠭᠠᠯᠠᠭᠤ ᠬᠤᠨ ᠰᠢᠪᠠᠭᠤ ᠪᠣᠯᠵᠣᠮᠣᠷ
ᠡᠪᠴᠢᠭᠦᠦ ᠳᠦᠭᠦᠷᠡᠩ ᠮᠥᠷᠥᠭᠡᠳᠦᠯ ᠬᠠᠯᠭᠢᠯᠠᠭᠤᠯᠤᠨ
ᠡᠩᠭᠡᠷ ᠳᠡᠪᠲᠦᠲᠡᠯᠡ ᠮᠥᠩᠭᠥᠨ ᠰᠤᠪᠤᠳ ᠬᠡᠯᠬᠢᠨ
ᠡᠳᠦᠭᠡᠨ ᠲᠡᠭᠷᠢ ᠳ᠋ᠡᠭᠡᠨ ᠳᠠᠭᠠᠳᠬᠠᠨ ᠵᠠᠯᠪᠠᠷᠢᠨ
ᠦᠷ ᠦ᠋ᠨ ᠴᠣᠯᠮᠣᠨ ᠢ᠋ ᠭᠢᠯᠠᠯᠵᠠᠭᠤᠯᠤᠨ ᠳᠠᠪᠬᠢᠭᠤᠯᠤᠨ
ᠳᠦᠩᠭᠦᠷ ᠳᠦᠩᠭᠦᠷ ᠠᠭᠤᠯᠠᠰ ᠤ᠋ᠨ ᠣᠷᠣᠢ ᠪᠠᠷ
ᠲᠣᠷᠭᠠᠨ ᠲᠣᠷᠭᠠᠨ ᠡᠭᠦᠯᠡᠰ ᠦ᠋ᠨ ᠰᠡᠵᠢᠭᠦᠷ ᠢ᠋ᠶ᠋ᠡᠷ
ᠲᠤᠨᠤᠮᠠᠯ ᠰᠠᠷᠠᠨ ᠤ᠋ ᠵᠢᠮᠡᠢ᠋ᠭ᠌ᠰᠡᠨ ᠭᠠᠩᠭᠠᠷᠠᠯ ᠢ᠋ᠶ᠋ᠠᠷ
ᠲᠤᠯᠠᠯᠵᠠᠮᠠᠯ ᠨᠠᠷᠠᠨ ᠤ᠋ ᠲᠠᠩᠬᠢ ᠰᠠᠴᠤᠷᠠᠭ ᠢ᠋ᠶ᠋ᠠᠷ
ᠡᠭᠦᠯᠡᠨ ᠮᠠᠨᠳᠠᠯ ᠳ᠋ᠤ᠌ ᠣᠭᠰᠢᠵᠤ
ᠡᠷᠳᠡᠨᠢ ᠶ᠋ᠢᠨ ᠬᠤᠷᠠ ᠪᠠᠷ ᠷᠠᠰᠢᠶᠠᠯᠠᠵᠤ
ᠠᠭᠠᠭ ᠲᠠᠢ ᠴᠠᠢᠨ ᠳ᠋ᠤ᠌ ᠬᠦᠪᠦᠷᠡᠵᠦ
ᠠᠷᠤ ᠶ᠋ᠢᠨ ᠰᠢᠯᠢ ᠳ᠋ᠦ᠍ ᠨᠣᠭᠣᠭᠠ ᠵᠤᠭᠤᠷᠠᠭᠤᠯᠵᠤ
ᠬᠥᠨᠳᠡᠢᠯᠡᠭᠰᠡᠨ ᠠᠭᠤᠯᠠᠰ ᠢ᠋ᠶ᠋ᠠᠨ ᠰᠢᠷᠲᠡᠵᠦ
ᠬᠠᠲᠠᠭᠰᠠᠨ ᠨᠠᠭᠤᠷ ᠢ᠋ᠶ᠋ᠠᠨ ᠬᠠᠷᠠᠵᠤ
ᠬᠠᠭᠤᠷᠠᠢ ᠭᠣᠣᠯ ᠤ᠋ᠨ ᠰᠠᠢᠷᠠᠮ ᠊ᠢ ᠬᠠᠢᠵᠤ
ᠬᠣᠲᠠ ᠶ᠋ᠢᠨ ᠪᠤᠬᠢᠨᠢᠳᠤᠭᠤ ᠠᠭᠠᠷ ᠢ᠋ ᠵᠢᠭᠰᠢᠵᠦ
ᠬᠠᠷᠠᠭᠠ ᠨᠢ ᠪᠦᠷᠦᠯᠵᠡᠵᠦ ᠨᠢᠯᠪᠤᠰᠤ ᠳᠤᠰᠤᠯᠠᠬᠤ ᠳ᠋ᠤ᠌
ᠬᠠᠷᠠᠰᠠᠭᠤᠯ ᠤ᠋ᠨ ᠬᠤᠢ ᠰᠠᠯᠬᠢ ᠳᠡᠭᠳᠡᠵᠦ
ᠬᠠᠭᠠᠨ ᠪᠠᠢᠭᠠᠯᠢ ᠶ᠋ᠢᠨ ᠵᠢᠭᠰᠠᠭᠠᠯ ᠢ᠋ ᠰᠢᠳᠢᠴᠢᠯᠡᠵᠦ
ᠬᠠᠷᠠ ᠲᠦᠷᠦᠭᠦᠳᠡᠨ ᠳ᠋ᠦ᠍ ᠨᠢᠭᠡ ᠶ᠋ᠢ ᠥᠭᠦᠯᠡᠨᠡᠮ
ᠤᠷᠲᠤ ᠪᠠᠷ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠴᠤ᠌
ᠠᠮᠢ ᠪᠦᠬᠦᠨ ᠢ᠋ ᠡᠩᠬᠦᠢ᠍ᠷᠡᠯᠡᠵᠦ
ᠢᠴᠡᠭᠡᠯᠡᠭᠰᠡᠳ ᠢ᠋ᠶ᠋ᠡᠨ ᠰᠡᠷᠢᠭᠡᠵᠦ
ᠤᠷᠭᠤᠳᠠᠭ ᠪᠦᠬᠦᠨ ᠢ᠋ ᠢᠯᠪᠢᠵᠦ
ᠳᠡᠪᠡᠯ ᠢ᠋ᠶ᠋ᠡᠨ ᠰᠣᠯᠢᠬᠤ ᠳᠡᠯᠡᠬᠡᠢ ᠳ᠋ᠦ᠍
ᠵᠤᠪᠴᠠᠭᠠ ᠲᠡᠷᠯᠢᠭ ᠢ᠋ ᠨᠢ ᠡᠮᠦᠰᠬᠡᠵᠦ
ᠳᠡᠯᠪᠢ ᠪᠡᠨ ᠵᠠᠳᠠᠯᠬᠤ ᠴᠡᠴᠡᠭᠡᠰ ᠲᠦ᠍
ᠵᠥᠭᠡᠢ ᠡᠷᠪᠡᠬᠡᠢ ᠶ᠋ᠢ ᠨᠢ ᠪᠥᠵᠢᠭᠦᠯᠵᠦ
ᠬᠠᠢᠷᠠ ᠶ᠋ᠢᠨ ᠴᠡᠩᠬᠡᠷ ᠬᠠᠳᠠᠭ ᠨᠢ
ᠬᠠᠨ ᠲᠡᠭᠷᠢ ᠳ᠋ᠡᠭᠡᠨ ᠳᠤᠯᠠᠯᠵᠠᠵᠤ
ᠬᠣᠰᠢᠭᠤᠷᠠᠨ ᠨᠢᠰᠬᠦ ᠭᠠᠯᠠᠭᠤᠳ ᠨᠢ
ᠬᠤᠰᠤᠳᠠᠢ ᠨᠠᠭᠤᠷ ᠲᠠᠭᠠᠨ ᠲᠤᠬᠠᠯᠠᠵᠤ
ᠬᠥᠪᠰᠥᠭᠦᠷ ᠵᠥᠭᠡᠯᠡᠨ ᠬᠥᠷᠥᠰᠥ ᠨᠠᠯᠠᠢᠵᠤ
ᠬᠥᠭᠡᠷᠦᠬᠦᠨ ᠶᠠᠭᠠᠨ ᠰᠣᠶᠣᠭᠠ ᠴᠢᠬᠢᠯᠡᠵᠦ
ᠬᠠᠰᠢᠶᠠᠨ ᠤ᠋ ᠬᠣᠨᠢ ᠮᠠᠯ ᠮᠠᠢᠯᠠᠵᠤ ᠮᠦᠭᠡᠷᠦᠯᠳᠦᠨ
ᠬᠣᠯᠠ ᠶ᠋ᠢᠨ ᠲᠡᠷᠭᠡᠯ ᠬᠥᠳᠡᠭᠡ ᠵᠡᠷᠭᠡᠯᠭᠡᠨᠳᠡᠨᠡ
2023 ᠂ 4 ᠂ 2
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ᠣ · ᠰᠡᠴᠡᠨᠲᠦ
ᠬᠢᠨᠠᠭᠴᠢ ᠄ ᠤᠳᠬᠠᠨᠰᠤᠠ