ᠥᠷᠯᠥᠭᠡ ᠶ᠋ᠢᠨ ᠢᠨᠢᠶᠡᠮᠰᠦᠭᠯᠡᠯ - ᠪ᠂ ᠪᠦᠷᠢᠨᠪᠡᠬᠢ Өглөөний инээмсэглэл - Б ᠂ Бүрэнбэх
240ᠥᠷᠯᠥᠭᠡ ᠶ᠋ᠢᠨ ᠢᠨᠢᠶᠡᠮᠰᠦᠭᠯᠡᠯ
ᠪᠢᠲᠡᠭᠦᠦ ᠨᠠᠷᠠᠨ ᠤ᠋ ᠬᠠᠯᠠᠭᠤᠨ ᠢᠯᠴᠢᠨ ᠳ᠋ᠦ᠍ ᠥᠷᠯᠥᠭᠡ ᠶ᠋ᠢᠨ ᠲᠩᠷᠢ ᠶ᠋ᠢᠨ ᠵᠡᠭᠦᠨ ᠬᠠᠴᠠᠷ ᠤᠯᠠᠢᠵᠤ ᠰᠢᠩᠭᠡᠨ ᠤᠯᠠᠭᠠᠨ ᠭᠡᠷᠡᠯ ᠰᠠᠴᠤᠷᠠᠭᠤᠯᠤᠨᠠ ᠃ ᠨᠣᠢᠷ ᠠ᠋ᠴᠠ ᠰᠠᠶᠢᠬᠠᠨ ᠰᠡᠷᠢᠭᠰᠡᠨ ᠲᠠᠯᠠ ᠥᠷᠯᠥᠭᠡ ᠶ᠋ᠢᠨ ᠲᠤᠶᠠᠭᠠ ᠶ᠋ᠢ ᠣᠯᠵᠤ ᠦᠵᠡᠮᠡᠭᠴᠡ ᠭᠦᠨ ᠭᠦᠨ ᠠᠮᠢᠰᠬᠤᠬᠤ ᠳ᠋ᠤ᠌ ᠠᠮᠠᠨ ᠤ᠋ ᠬᠢᠨ ᠠᠭᠤᠷ ᠨᠢ ᠨᠣᠮᠢᠨ ᠨᠣᠭᠣᠭᠠᠨ ᠤᠨᠢᠶᠠᠷ ᠪᠣᠯᠤᠨ ᠬᠤᠪᠢᠷᠠᠭᠠᠳ ᠣᠢ ᠰᠢᠭᠤᠢ ᠤᠷᠤᠭᠤ ᠠᠶᠠᠷ ᠬᠥᠪᠦᠨᠡ ᠃ ᠰᠢᠩᠭᠡᠨ ᠤᠯᠠᠭᠠᠨ ᠭᠡᠷᠡᠯ ᠪᠠ ᠨᠣᠮᠢᠨ ᠨᠣᠭᠣᠭᠠᠨ ᠤᠨᠢᠶᠠᠷ ᠤ᠋ᠨ ᠲᠡᠨᠳᠡ ᠡᠴᠡ ᠨᠢᠭᠡᠨ ᠰᠢᠪᠠᠭᠤ ᠬᠥᠭᠵᠢᠯᠲᠡᠢ ᠪᠡᠷ ᠨᠢᠰᠦᠨ ᠠᠢᠰᠤᠢ ᠃
ᠰᠢᠪᠠᠭᠤ ᠂ ᠰᠦᠨ ᠴᠠᠭᠠᠨ ᠰᠢᠪᠠᠭᠤ !
ᠲᠣᠮᠣ ᠨᠠᠷᠠᠨ ᠲᠡᠭᠰᠢ ᠲᠠᠯᠠ ᠶ᠋ᠢᠨ ᠵᠠᠬᠠ ᠠ᠋ᠴᠠ ᠲᠣᠯᠣᠭᠠᠢ ᠪᠠᠨ ᠪᠤᠯᠲᠠᠢᠯᠭᠠᠵᠤ ᠲᠣᠷᠭᠠᠨ ᠰᠢᠷᠠ ᠭᠡᠵᠢᠭᠡ ᠪᠡᠨ ᠰᠠᠮᠨᠠᠬᠤ ᠳ᠋ᠤ᠌ ᠠᠯᠲᠠᠨ ᠦᠰᠦᠨ ᠦ᠌ ᠬᠢᠨᠢ ᠤᠷᠲᠤ ᠰᠢᠷᠬᠡᠭ ᠲᠠᠯᠠ ᠤᠷᠤᠭᠤ ᠰᠠᠳᠠᠷᠠᠨ ᠨᠠᠮᠢᠷᠠᠨᠠ ᠃ ᠥᠴᠥᠭᠡᠳᠦᠷ ᠰᠥᠨᠢ ᠰᠠᠷᠠᠨ ᠳᠠᠭᠢᠨᠢ ᠲᠠᠯᠠ ᠳᠡᠭᠡᠭᠦᠷ ᠥᠩᠭᠡᠷᠡᠬᠦ ᠳ᠋ᠡᠭᠡᠨ ᠬᠦᠵᠦᠭᠦᠨ ᠳ᠋ᠡᠬᠢ ᠰᠤᠪᠤᠳ ᠡᠷᠢᠬᠡᠨ ᠦ᠌ ᠬᠡᠯᠬᠢᠶᠡ ᠪᠡᠨ ᠲᠠᠰᠤᠯᠴᠢᠪᠠᠤ ? ᠬᠡᠭᠡᠷᠡ ᠶ᠋ᠢᠨ ᠨᠣᠭᠣᠭᠠᠨ ᠳᠡᠭᠡᠷᠡ ᠵᠢᠵᠢᠭ ᠵᠢᠵᠢᠭ ᠪᠣᠯᠣᠷ ᠪᠥᠮᠪᠥᠭᠡ ᠪᠥᠮᠪᠥᠭᠡᠨᠡᠵᠦ ᠂ ᠳᠤᠰᠤᠯ ᠳᠤᠰᠤᠯ ᠴᠠᠭᠠᠨ ᠭᠢᠯᠪᠠᠭᠠ ᠭᠢᠯᠠᠯᠵᠠᠨᠠ ᠃ ᠰᠢᠵᠢᠷ ᠠᠯᠲᠠᠨ ᠭᠡᠷᠡᠯ ᠦ᠋ᠨ ᠰᠢᠷᠬᠡᠭ ᠪᠠ ᠮᠥᠩᠭᠥᠨ ᠴᠠᠭᠠᠨ ᠭᠢᠯᠪᠠᠭᠠᠨ ᠤ᠋ ᠳᠤᠮᠳᠠᠭᠤᠷ ᠪᠥᠭᠡᠮ ᠴᠠᠭᠠᠨ ᠡᠭᠦᠯᠡ ᠪᠠᠶᠠᠰᠤᠯᠲᠠᠢ ᠪᠠᠷ ᠬᠥᠪᠦᠨ ᠠᠢᠰᠤᠢ ᠃
ᠡᠭᠦᠯᠡ ᠂ ᠮᠢᠨᠳᠠᠰᠤᠨ ᠴᠠᠭᠠᠨ ᠡᠭᠦᠯᠡ ᠃
ᠨᠢᠭᠡᠳᠦᠯ ᠦ᠋ᠨ ᠵᠤᠰᠠᠯᠠᠩ ᠳᠡᠭᠡᠷᠡ ᠡᠷᠲᠡᠯᠡᠨ ᠪᠣᠰᠤᠭᠰᠠᠨ ᠰᠠᠭᠠᠯᠢᠴᠢᠳ ᠦᠨᠢᠶᠡ ᠪᠡᠨ ᠰᠠᠭᠠᠵᠤ ᠪᠠᠷᠠᠭᠠᠳ ᠰᠦ᠍ ᠪᠡᠨ ᠨᠠᠰᠢ ᠴᠠᠰᠢ ᠵᠥᠭᠡᠭᠡᠬᠦ ᠳ᠋ᠦ᠍ ᠦᠰᠦ ᠪᠡᠨ ᠪᠣᠭᠣᠭᠰᠠᠨ ᠤᠯᠠᠭᠠᠨ ᠂ ᠨᠣᠭᠣᠭᠠᠨ ᠂ ᠰᠢᠷᠠ ᠂ ᠶᠠᠭᠠᠨ ᠂ ᠬᠣᠨᠳᠣᠨ ᠠᠯᠴᠢᠭᠤᠷ ᠨᠢ ᠥᠷᠯᠥᠭᠡ ᠶ᠋ᠢ ᠤᠭᠲᠤᠨ ᠳᠡᠯᠭᠡᠷᠡᠭᠰᠡᠨ ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠮᠡᠲᠦ ᠦᠵᠡᠰᠬᠦᠯᠡᠩ ᠰᠠᠢᠬᠠᠨ ᠮᠢᠷᠠᠯᠵᠠᠨ ᠬᠠᠷᠠᠭᠳᠠᠨᠠ ᠃ ᠬᠡᠨ ᠨᠢ ᠶᠠᠮᠠᠷ ᠨᠢᠭᠡᠨ ᠱᠣᠭ ᠭᠠᠷᠭᠠᠭᠰᠠᠨ ᠪᠤᠶᠤ ᠢᠨᠢᠶᠡᠳᠦᠮᠲᠡᠢ ᠦᠭᠡ ᠬᠡᠯᠡᠭᠰᠡᠨ ᠢ᠋ ᠪᠤᠤ ᠮᠡᠳᠡ ᠂ ᠰᠠᠭᠠᠯᠢᠴᠢᠳ ᠤ᠋ᠨ ᠵᠢᠷᠦᠬᠡᠨ ᠦ᠌ ᠤᠭ ᠠ᠋ᠴᠠ ᠣᠷᠭᠢᠯᠤᠭᠰᠠᠨ ᠢᠨᠢᠶᠡᠳᠦ ᠶ᠋ᠢᠨ ᠳᠠᠭᠤ ᠨᠢ ᠲᠣᠭᠣᠨᠣ ᠶ᠋ᠢᠨ ᠳᠡᠭᠡᠪᠦᠷ ᠣᠴᠢᠵᠤ ᠡᠷᠭᠢᠯᠳᠦᠨᠡ ᠃ ᠡᠨᠡᠬᠦ ᠴᠡᠴᠡᠭ ᠦ᠋ᠨ ᠤᠷᠤᠰᠬᠠᠯ ᠪᠠ ᠢᠨᠢᠶᠡᠳᠦᠨ ᠦ᠌ ᠳᠠᠪᠠᠯᠭᠠᠨ ᠳᠤᠮᠳᠠ ᠲᠣᠭᠲᠠᠵᠤ ᠶᠠᠳᠠᠨ ᠳᠡᠭᠦᠯᠢᠨ ᠳᠡᠪᠬᠡᠷᠴᠦ ᠪᠠᠢᠭᠠ ᠠᠯᠢᠶᠠ ᠰᠠᠷᠠᠯ ᠤ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠡᠴᠡ ᠨᠢᠭᠡᠨ ᠬᠣᠷᠮᠣᠢ ᠰᠢᠭᠤᠭᠰᠠᠨ ᠵᠠᠯᠠᠭᠤ ᠡᠷᠡ ᠦᠰᠦᠷᠦᠨ ᠪᠠᠭᠤᠨᠠ ᠃
ᠠᠳᠤᠭᠤᠴᠢᠨ ᠂ ᠪᠦᠷᠭᠦᠳ ᠰᠢᠭ ᠡᠷᠡᠯᠬᠡᠭ ᠠᠳᠤᠭᠤᠴᠢᠨ ! 1961.12