ᠮᠥᠬᠥᠭᠰᠡᠨ ᠳᠠᠯᠠᠢ ᠶ᠋ᠢᠨ ᠣᠷᠣᠮ ᠳᠡᠭᠡᠷᠡ - ᠲ ᠂ ᠭᠣᠮᠪᠣᠵᠠᠪ Мөхсөн далайн ором дээр - Т ᠂ Гомбожав
263ᠮᠥᠬᠥᠭᠰᠡᠨ ᠳᠠᠯᠠᠢ ᠶ᠋ᠢᠨ ᠣᠷᠣᠮ ᠳᠡᠭᠡᠷᠡ
ᠳᠠᠯᠠᠢ ᠶ᠋ᠢᠨ ᠨᠢᠯᠪᠤᠰᠤ
ᠤᠮᠪᠠᠬᠤ ᠭᠡᠵᠦ
ᠳᠠᠯᠠᠢ ᠪᠠᠨ ᠡᠷᠢᠨ ᠣᠴᠢᠬᠤ ᠳ᠋ᠤ᠌
ᠰᠢᠷᠬᠢᠴᠢᠭᠰᠡᠨ ᠪᠠᠶ᠋ᠢᠯᠠ
ᠭᠠᠩᠳᠠᠬᠤ ᠳ᠋ᠠᠭᠠᠨ ᠪᠢ
ᠨᠢᠯᠪᠤᠰᠤ ᠶ᠋ᠢ ᠨᠢ ᠲᠡᠭᠦᠵᠦ ᠰᠠᠭᠤᠯᠠ
ᠳᠤᠰᠤᠯ ᠪᠦᠷᠢ ᠨᠢ
ᠲᠤᠨᠲᠠᠷᠠᠬᠤ ᠳᠤᠷᠠ ᠦᠭᠡᠢ
ᠳᠠᠯᠠᠢ ᠶ᠋ᠢᠨ ᠮᠢᠨᠢ ᠰᠡᠳᠬᠢᠯ ᠬᠥᠪ ᠬᠦᠨᠳᠦ ᠡ !
ᠳᠠᠪᠠᠯᠭᠠᠨ
ᠲᠣᠩ ᠬᠦᠴᠦᠲᠡᠢ ᠰᠣᠨᠣᠰᠳᠠᠵᠤ
ᠲᠣᠩ ᠬᠣᠯᠠ ᠰᠣᠨᠣᠰᠳᠠᠵᠤ
ᠨᠠᠮᠠᠢ᠍ᠢ ᠂ ᠤᠯᠠᠮ ᠬᠠᠭᠰᠠᠭᠠᠨᠠ
ᠲᠡᠳᠡᠭᠡᠷ
ᠨᠠᠳᠠ ᠤᠷᠤᠭᠤ ᠪᠦᠯᠲᠡᠭᠡᠨᠡᠬᠦ
ᠬᠣᠨᠢᠨ ᠪᠣᠷᠣ ᠨᠢᠳᠦ ᠶ᠋ᠢ ᠪᠢ
ᠤᠩᠰᠢᠵᠤ ᠴᠢᠳᠠᠭᠰᠠᠨ ᠥᠬᠡᠢ ᠡ
ᠮᠢᠨᠤ ᠵᠢᠷᠦᠬᠡ
ᠲᠠᠭᠤ ᠦᠭᠡᠢ ᠴᠢᠯᠠᠭᠤᠵᠢᠵᠤ ᠪᠠᠶ᠋ᠢᠯᠠ !
ᠰᠣᠭᠲᠣᠭᠤ ᠡᠪᠡᠰᠦ
ᠢᠨᠢᠶᠡᠳᠦ ᠠᠯᠳᠠᠭᠰᠠᠨ ᠡᠨᠡ ᠤᠬᠠᠭᠠᠨ ᠤ
ᠰᠡᠭᠦᠳᠡᠷ ᠨᠢ ᠪᠡᠬᠡᠨ ᠬᠠᠷᠠ ᠨᠠᠲᠤᠯᠵᠠᠨᠠ
ᠢᠷ ᠰᠢᠭ
ᠨᠠᠷᠢᠬᠠᠨ ᠤᠷᠤᠰᠬᠠᠯ ᠢᠳᠡᠭ ᠢᠳᠡᠭ ᠢᠶ᠋ᠡᠷ ᠥᠷᠭᠡᠰᠴᠦ
ᠢᠷᠮᠡᠭ ᠳᠠᠭᠠᠭᠰᠠᠨ ᠡᠬᠡ ᠭᠠᠵᠠᠷ ᠢ ᠂ ᠲᠠᠩᠳᠠ
ᠢᠷᠡᠭᠡᠳᠦᠢ ᠦᠭᠡᠢ ᠶᠡᠭᠦᠷᠡᠭᠦᠯᠦᠨᠡ
ᠡᠨᠡ ᠠᠶᠤᠯ ᠤᠨ ᠬᠢᠵᠠᠭᠠᠷ ᠦᠭᠡᠢ ᠪᠣᠭᠣᠮᠢ
ᠡᠷᠲᠡ ᠣᠷᠣᠢ ᠦᠭᠡᠢ
ᠡᠷᠦᠬᠡᠨ ᠲᠣᠯᠣᠭᠠᠢ ᠣᠷᠢᠶᠠᠨᠠ ᠭᠡᠬᠦ ᠡᠴᠡ
ᠳᠡᠯᠡᠬᠡᠢ ᠂ ᠬᠠᠷᠠᠭᠠᠨ ᠠ᠋ᠴᠠ ᠪᠠᠯᠠᠷᠠᠨᠠ ᠪᠢᠯᠡ
ᠭᠢᠰᠬᠢᠭᠰᠡᠭᠡᠷ ᠨᠢᠴᠠ ᠣᠴᠢᠬᠤ ᠡᠨᠡ ᠡᠪᠡᠰᠦ ᠶ᠋ᠢ
ᠭᠢᠰᠬᠢᠵᠦ ᠴᠢᠳᠠᠬᠤ ᠬᠥᠯ ᠡᠷᠢᠨ ᠂ ᠪᠢ
ᠥᠪᠥᠷ ᠳᠥᠴᠢ ᠶᠢᠰᠦᠨ ᠬᠤᠰᠢᠭᠤ ᠶ᠋ᠢ
ᠡᠭᠦᠳᠡ ᠳᠠᠷᠠᠭᠠᠯᠠᠨ ᠲᠣᠭᠣᠷᠢᠯᠠ ᠡ !
ᠪᠦᠷᠢᠶᠡ ᠮᠠᠩᠬᠠ
ᠳᠤᠮᠤᠭ ᠢ ᠴᠢᠨᠢ ᠬᠤᠳᠠᠯᠳᠤᠵᠤ
ᠪᠠᠶᠠᠵᠢᠬᠤ ᠂ ᠪᠢ ᠳᠤᠷᠠ ᠦᠭᠡᠢ
ᠲᠠᠭᠤᠨ ᠤ ᠴᠢᠨᠢ ᠤᠴᠢᠷ ᠢ ᠣᠯᠬᠤ ᠭᠡᠵᠦ
ᠵᠣᠪᠠᠬᠤ ᠡᠭᠦᠷᠭᠡ ᠲᠡᠢ ᠡ
ᠡᠯᠡᠰᠦᠨ ᠨᠤᠲᠤᠭ ᠤᠨ ᠮᠢᠨᠢ ᠬᠣᠩᠬᠣᠨ ᠤ ᠬᠤᠷᠴᠠ ᠬᠡᠯᠡ
ᠡᠵᠡᠭᠦᠢ ᠶ᠋ᠢᠨ ᠮᠢᠨᠢ
ᠨᠢᠭᠡ ᠪᠣᠳᠣᠭᠰᠠᠨ ᠮᠦᠭᠡᠷᠡᠯ
ᠠᠪᠢᠶᠠ ᠶ᠋ᠢ ᠴᠢᠨᠢ ᠶᠠᠭᠠᠬᠢᠵᠤ ᠲᠡᠮᠳᠡᠭᠯᠡᠪᠡᠯ ᠵᠣᠬᠢᠬᠤ ᠪᠢᠯᠡ ?
ᠳᠦᠩᠭᠢᠨᠡᠨ ᠰᠣᠨᠣᠰᠳᠠᠬᠤ ᠨᠡᠷᠡ ᠪᠡᠷ ᠴᠢᠨᠢ
ᠳᠥᠷᠪᠡᠨ ᠵᠦᠭ ᠴᠢᠮᠠ ᠤᠷᠤᠭᠤ ᠴᠢᠬᠢ ᠲᠠᠯᠪᠢᠨᠠ
ᠴᠢᠨᠤ ᠳᠠᠭᠤ ᠂ ᠨᠠᠢᠮᠠᠨ ᠵᠣᠪᠬᠢᠰ ᠤᠷᠤᠭᠤ
ᠲᠦᠮᠡᠨ ᠠᠰᠠᠭᠤᠯᠲᠠ ᠳᠡᠯᠭᠡᠨᠡ ᠡ
ᠭᠠᠩ ᠤᠨ ᠨᠠᠷᠠ ᠲᠡᠰᠪᠦᠷᠢᠲᠡᠢ ᠲᠣᠭᠲᠠᠵᠤ
ᠭᠠᠵᠠᠷ ᠤᠨ ᠤᠯᠠᠮ ᠤᠯᠠᠮ ᠬᠠᠰᠠᠬᠤ ᠲᠠᠭᠤᠨ
ᠨᠠᠮᠠᠢ᠍ᠢ ᠲᠠᠷᠴᠢᠯᠭᠠᠨᠠ
ᠪᠢ
ᠲᠣᠯᠣᠭᠠᠢ ᠪᠠᠨ ᠲᠡᠪᠡᠷᠢᠨ ᠭᠦᠶᠦᠬᠦ ᠳ᠋ᠦ᠍
ᠪᠤᠳᠤᠯ ᠠ᠋ᠴᠠ ᠮᠢᠨᠢ ᠬᠣᠯᠠ ᠡᠪᠦᠭᠡᠵᠢᠶᠡᠷ ᠨᠢᠭᠡ ᠬᠥᠮᠦᠨ ᠦ
《 ᠪᠣᠷᠣᠭᠠᠨ ! ᠪᠣᠷᠣᠭᠠᠨ ! ᠁》 ᠭᠡᠬᠦ ᠲᠠᠭᠤᠨ
ᠪᠥᠬᠥ ᠣᠷᠣᠨ ᠵᠠᠢ ᠳᠦᠭᠦᠷᠴᠦ ᠪᠠᠶ᠋ᠢᠯᠠ !
1988.5
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠠᠮᠢᠯᠠᠭᠤᠯᠤᠨ ᠬᠠᠭᠤᠯᠤᠭᠰᠠᠨ ᠨᠢ ᠄ ᠴᠤᠯᠮᠤᠨᠲᠤᠶᠠᠭᠠ
2023 . 05. 12