ᠡᠬᠡ ᠣᠷᠣᠨ - ᠲ ᠂ ᠭᠣᠮᠪᠣᠵᠠᠪ Эх орон - Т ᠂ Гомбожав
356ᠡᠬᠡ ᠣᠷᠣᠨ
ᠲ ᠂ ᠭᠣᠮᠪᠣᠵᠠᠪ
1
ᠰᠠᠬᠠᠯ ᠨᠢ ᠪᠤᠭᠤᠷᠤᠯᠰᠢᠬᠰᠠᠨ ᠠᠪᠤᠷᠭᠤ ᠮᠤᠲᠤ ᠂ ᠨᠠᠮᠠᠶ᠋ᠢ
ᠰᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠨᠠᠪᠴᠢᠯᠠᠯᠠ
ᠣᠨ ᠲᠣᠭᠠᠯᠠᠯ ᠦ᠋ᠨ ᠲᠣᠷᠲᠣᠮ ᠰᠢᠨᠡ ᠵᠠᠭᠤᠨ ᠶ᠋ᠢᠠᠷ
ᠣᠷᠴᠢᠯᠠᠩ ᠦ᠋ᠨ ᠬᠠᠷᠠᠬ᠋ᠠ ᠮᠢᠯᠢᠶᠠᠵᠤ
ᠣᠷᠣᠨ ᠴᠠᠭ ᠦ᠋ᠨ ᠭᠣᠶ᠋ᠢᠲᠠᠬᠠᠨ ᠲᠥᠪᠰᠢᠨ ᠳᠡᠭᠡᠷᠡ
ᠪᠢ ᠳᠤᠪ ᠳᠤᠭᠤᠶ᠋ᠢᠬᠠᠨ ᠤᠷᠭᠤᠯᠠ
2
ᠠᠲᠤᠷᠢᠶᠠ ᠳᠦᠭᠦᠷᠡᠩ ᠡᠪᠦᠭᠡᠨ ᠴᠢᠷᠠᠢ
ᠢᠮᠠᠭᠲᠠ ᠮᠢᠨᠦ ᠪᠣᠲᠣᠯ ᠊ᠢ
ᠢᠨᠢᠶᠡᠵᠦ ᠣᠬᠢᠯᠠᠵᠤ ᠴᠢᠲᠠᠲᠠᠭ ᠦᠭᠡᠢ
ᠬᠠᠲᠤᠨ ᠭᠣᠣᠯ ᠦ᠋ᠨ
ᠬᠠᠮᠤᠬ ᠨᠠᠷᠢᠬᠠᠨ ᠤᠨᠲᠤᠷᠤᠯ ᠵᠦᠭ ᠲᠣᠮᠢᠯᠠᠨᠠ
ᠲᠡᠨᠲᠡᠬᠢ
ᠦᠬᠡᠷ ᠦ᠋ᠨ ᠱᠠᠬ᠋ᠠ ᠴᠢᠨᠡᠭᠡᠨ
ᠥᠨᠲᠡᠭᠡᠨ ᠴᠢᠯᠠᠭᠤ ᠨᠢᠭᠡᠪᠦᠷᠢ ᠨᠢ
ᠦᠭᠡ ᠶᠠᠷᠢᠵᠤ
ᠥᠰᠥᠭᠡᠢ ᠵᠠᠯᠭᠠᠨ ᠱᠣᠭᠰᠢᠵᠤ ᠢᠷᠡᠭᠰᠡᠨ
ᠡᠲᠦᠷ ᠬᠣᠨᠣᠭ ᠦ᠋ᠳ ᠦ᠋ᠨ ᠰᠥ᠋ ᠪᠡᠷ
ᠪᠢᠯᠢᠭ ᠊ᠢ ᠮᠢᠨᠢ ᠤᠭᠵᠢᠨᠠ
ᠲᠡᠭᠡᠬᠦ ᠪᠡᠷ ᠨᠢ ᠂ ᠨᠠᠲᠠᠲᠤ
ᠲᠤᠩ ᠬᠠᠭᠤᠴᠢᠨ ᠥᠩᠭᠡ ᠪᠣᠲᠣᠭ ᠰᠢᠩᠭᠡᠯᠡ
3
ᠳᠡᠯ ᠶ᠋ᠢᠡᠨ ᠵᠠᠭᠤᠯᠴᠠᠭᠰᠠᠨ ᠲᠦᠮᠡᠨ ᠠᠲᠤᠭᠤᠳ
ᠳᠠᠪᠬᠢᠯᠳᠤᠵᠤ ᠥᠩᠭᠡᠷᠡᠯᠡ
ᠳᠡᠷᠭᠡᠳᠡ ᠨᠢ ᠪᠢ
ᠶᠠᠭᠤ ᠴᠦ᠍ ᠣᠯᠵᠤ ᠬᠠᠷᠠᠬ᠋ᠠ ᠦᠭᠡᠢ ᠲᠣᠷᠮᠣᠯᠵᠠᠵᠤ ᠪᠠᠶ᠋ᠢᠪᠠ
ᠳᠡᠨᠵᠢ ᠮᠢᠨᠢ ᠬᠣᠪᠠᠬᠠᠶ᠋ᠢᠷᠠᠬ᠋ᠠ ᠦᠭᠡᠢ
ᠳᠡᠭᠡᠳᠦ ᠡᠴᠡ ᠬᠣᠴᠣᠷᠠᠭᠠᠭᠰᠠᠨ ᠵᠠᠶᠠᠭᠠᠨ ᠪ ᠮᠢᠨᠢ ᠬᠥᠬᠥ
ᠳᠠᠩᠳᠠ ᠢᠪᠢᠯᠦᠩᠬᠡᠨ ᠪᠠᠶ᠋ᠢᠨᠠ ᠡ
ᠣᠯᠠᠨ ᠮᠢᠩᠭᠠᠨ ᠬᠤᠷᠠᠬ᠋ᠠ ᠲᠤᠭᠤᠯ
ᠣᠩᠭᠣᠨ ᠪᠣᠰᠤᠬ᠋ᠠ ᠠᠭᠤᠯᠠᠰ ᠦ᠋ᠨ ᠬᠠᠮᠲᠤ
ᠡᠮᠦᠨᠡ ᠴᠢᠨᠢ ᠪᠢ ᠰᠢᠲᠤᠷᠭᠤᠬᠠᠨ ᠰᠥᠭᠥᠲᠦᠭᠡᠳ ᠬᠥᠬᠥᠬᠦ ᠳ᠋ᠦ᠍
ᠡᠬᠡ ᠭᠠᠵᠠᠷ ᠵᠥᠪ ᠵᠥᠭᠡᠯᠡᠬᠡᠨ ᠣᠪᠣᠯᠵᠠᠨᠠ
ᠴᠢᠨᠦᠬᠢ ᠭᠡᠳᠡᠭ ᠶ᠋ᠢᠡᠨ ᠪᠢ ᠢᠩᠬᠢᠵᠦ
ᠴᠢᠰᠤᠨ ᠪ ᠥᠩᠭᠡ ᠪᠡᠷ ᠲᠠᠨᠢᠬᠰᠠᠨ ᠶᠤᠮ ᠡ
4
ᠲᠠᠯᠠ ᠶ᠋ᠢᠨ ᠮᠢᠩᠭᠠᠨ ᠴᠣᠪᠣᠬ᠋ᠠ ᠪᠠᠷ
ᠲᠠᠨ ᠪ ᠮᠢᠨᠢ
ᠪᠠᠶᠠᠷ ᠭᠣᠨᠢᠬ ᠦ᠋ᠨ ᠨᠢᠯᠪᠤᠰᠤ ᠴᠥᠷᠬᠦᠯᠡᠯᠲᠦᠨ ᠤᠤᠠᠬᠤ ᠶ᠋ᠢ ᠬᠠᠷᠠᠵᠤ
ᠤᠷᠤᠭᠤᠯ ᠶ᠋ᠢᠠᠨ ᠰᠢᠩᠬᠤᠲᠠᠭᠰᠠᠨ ᠲᠡᠲᠡᠭᠡᠷ ᠡᠲᠦᠷ ᠦ᠋ᠳ ᠊ᠢ ᠥᠷᠥ ᠡᠪᠡᠲᠦᠯᠡ
ᠵᠢᠭᠦᠷ ᠭᠡᠵᠦ ᠪᠣᠯᠴᠢᠩ ᠳᠡᠭᠡᠷᠡ ᠴᠢᠨᠢ ᠬᠠᠨᠲᠠᠭᠰᠠᠨ
ᠵᠡᠭᠦᠦ ᠶ᠋ᠢᠨ ᠣᠯᠠᠨ ᠰᠢᠷᠬᠠᠨ ᠠ᠋ᠴᠠ
ᠡᠭᠡᠲᠡᠩ ᠴᠠᠭᠠᠨ ᠭᠠᠰᠢᠭᠤᠲᠠᠯ ᠳᠤᠰᠤᠯᠠᠬᠤ ᠶ᠋ᠢ ᠴᠢᠩᠨᠠᠵᠤ
ᠶᠠᠰᠤ ᠨᠢ ᠬᠠᠷᠠᠯᠠᠭᠰᠠᠨ ᠲᠡᠲᠡᠭᠡᠷ ᠭᠠᠷ ᠦ᠋ᠳ ᠊ᠢ
ᠴᠠᠪᠴᠢᠵᠤ ᠰᠠᠭᠤᠯᠠ
ᠲᠡᠷᠡ ᠡᠲᠦᠷ ᠡᠴᠡ ᠡᠬᠢᠯᠡᠵᠦ ᠂ ᠪᠢ
ᠠᠨᠠᠭᠠᠬᠤ ᠤᠬᠠᠭᠠᠨ ᠪ ᠳᠦᠷᠪᠡᠨ ᠦᠨᠲᠦᠰᠦ ᠶ᠋ᠢ
ᠠᠪᠤ ᠶ᠋ᠢᠨ ᠶ᠋ᠢᠡᠨ ᠭᠠᠷ ᠠ᠋ᠴᠠ ᠳᠤᠰᠤᠭᠰᠠᠨ ᠪᠢᠯᠡ
5
ᠭᠡᠷᠡᠯ ᠰᠡᠭᠦᠲᠡᠷ ᠬᠠᠷᠰᠢᠨ ᠡᠷᠭᠢᠬᠦ ᠬᠣᠷᠸ᠋ᠠ ᠳ᠋ᠦ᠍
ᠭᠡᠷ ᠮᠢᠨᠢ ᠬᠠᠷᠠᠩᠭᠤᠢ ᠪᠣᠯᠬᠤ ᠠ᠋ᠴᠠ ᠠᠶᠤᠬᠤ ᠳ᠋ᠠᠭᠠᠨ
ᠴᠢᠨᠦᠬᠢ ᠪᠡᠨ ᠳᠡᠭᠡᠷᠡ
ᠲᠤᠩ ᠣᠯᠠᠨ ᠴᠤᠩᠬᠤ ᠵᠢᠷᠤᠯᠠ
ᠰᠤᠲᠠᠰᠤᠨ ᠳ᠋ᠦ᠍ ᠴᠢᠨᠢ ᠴᠢᠰᠤ ᠵᠠᠩᠭᠢᠰᠴᠢᠬᠠᠬᠤ ᠠ᠋ᠴᠠ ᠬᠢᠴᠢᠶᠡᠬᠦ ᠳ᠋ᠡᠭᠡᠨ
ᠰᠤᠯᠠ ᠵᠤᠭᠠᠴᠠᠨ ᠠᠯᠬᠤᠯᠠᠬᠤ ᠳ᠋ᠠᠭᠠᠨ ᠴᠦ᠍
ᠵᠠᠮ ᠦ᠋ᠨ ᠵᠢᠵᠢᠭ ᠴᠢᠯᠠᠭᠤᠨ ᠊ᠢ ᠵᠠᠶ᠋ᠢᠰᠬᠠᠨ ᠢᠰᠭᠦᠯᠵᠦ ᠶᠠᠪᠤᠯᠠ ᠂ ᠂ ᠂ ᠂
ᠴᠢᠨᠦᠬᠢ ᠪᠡᠨ ᠬᠣᠯᠠ ᠨᠢᠰᠬᠦ ᠭᠦᠰᠡᠯ ᠶ᠋ᠢᠡᠷ
ᠴᠠᠭ ᠳᠦᠭᠦᠷᠡᠩ ᠠᠮᠢᠰᠬᠤᠯᠯᠠᠨ
ᠴᠣᠶ᠋ᠢᠯᠣᠨ ᠪᠣᠰᠬᠤ ᠪᠦᠷᠭᠦᠳ ᠊ᠢ ᠰᠦᠷᠦᠭ ᠰᠦᠷᠦᠭ ᠶ᠋ᠢᠡᠷ ᠳᠠᠭᠤᠳᠠᠵᠤ
᠂ ᠂ ᠂ ᠂ ᠂ ᠂ ᠂ ᠂
ᠤᠨᠲᠠᠷᠠᠲᠠᠭ ᠦᠭᠡᠢ ᠭᠠᠭᠴᠠᠬᠠᠨ ᠵᠤᠯᠠ ᠶ᠋ᠢ
ᠳᠤᠨᠳᠠᠷᠠᠳᠠᠭ ᠦᠭᠡᠢ ᠪᠠᠶᠠᠨ ᠳᠤᠰᠤ ᠪᠠᠷ ᠶ᠋ᠢᠠᠨ ᠮᠥᠩᠬᠡ ᠠᠰᠠᠭᠠᠵᠤ ᠬᠠᠩᠭᠢᠨᠠᠯᠠ!
6
ᠨᠡᠷᠡ ᠪᠡᠷ ᠴᠢᠨᠢ ᠤᠶᠠᠩᠭᠠᠷᠠᠬᠤ ᠪᠣᠲᠣᠯ ᠳ᠋ᠦ᠍
ᠨᠢᠭᠡ ᠰᠢᠷᠬᠡᠭ ᠡᠪᠡᠰᠦ ᠬᠢᠭᠡᠳ
ᠠᠷᠪᠠᠨ ᠲᠦᠮᠡᠨ ᠠᠭᠤᠯᠠ ᠬᠣᠶᠠᠷ
ᠠᠲᠠᠯᠢᠬᠠᠨ ᠬᠦᠨᠲᠦ ᠰᠠᠨᠠᠭᠲᠠᠨᠠ
ᠵᠠᠶᠠᠬ᠋ᠠ ᠪᠠᠷ ᠴᠢᠨᠢ ᠭᠡᠯᠬᠢᠶᠡᠷᠡᠬᠦ
ᠵᠡᠭᠦᠲᠦᠨ ᠳ᠋ᠦ᠍
ᠴᠥᠯ ᠦ᠋ᠨ ᠪᠠᠯᠠᠷ ᠪᠠᠶ᠋ᠢᠰᠢᠩ ᠬᠢᠭᠡᠳ
ᠬᠣᠲᠠ ᠶ᠋ᠢᠨ ᠠᠪᠤᠷᠭᠤ ᠠᠰᠠᠷ ᠬᠣᠶᠠᠷ
ᠢᠵᠢᠯᠢᠬᠡᠨ ᠲᠣᠲᠣᠨᠤ ᠬᠠᠷᠠᠭᠲᠠᠨᠠ
ᠴᠢᠩᠬᠢᠬᠦ ᠳ᠋ᠡᠭᠡᠨ ᠂ ᠮᠢᠨᠦ ᠬᠥᠯ
ᠴᠢᠨᠦᠬᠢ ᠪᠡᠨ ᠲᠤᠮᠤ ᠠᠯᠠᠭᠠᠨ ᠳᠡᠭᠡᠷᠡ
ᠬᠦᠨᠲᠦ ᠮᠥᠷᠲᠡᠭᠡᠨ ᠬᠥᠩᠭᠡᠬᠡᠨ
ᠠᠮᠢᠰᠬᠤᠬ᠋ᠠ ᠲᠡᠮᠲᠡᠭᠯᠡᠨ ᠠᠶᠠᠯᠠᠬᠤ ᠪᠣᠯᠤᠨᠠ ᠡ!
7
ᠠᠯᠤᠰ ᠵᠠᠭᠤᠨ ᠪ ᠲᠡᠭᠷᠢ ᠶ᠋ᠢᠨ
ᠠᠮᠠᠷᠠᠭ ᠬᠣᠶᠠᠷ ᠨᠢᠲᠦ
ᠴᠢᠮᠠ ᠳᠡᠭᠡᠷᠡ ᠠᠯᠲᠠᠨ ᠰᠢᠷᠭᠠᠯ ᠭᠡᠷᠡᠯᠲᠦᠨᠡ
ᠲᠡᠷᠡ ᠬᠣᠯᠠ ᠶ᠋ᠢᠨ ᠵᠠᠢ ᠤᠷᠤᠭᠤ
ᠲᠡᠭᠷᠢᠯᠢᠭ ᠰᠠᠶ᠋ᠢᠬᠠᠨ ᠬᠡᠶ᠋ᠢᠷᠬᠡᠵᠦ
ᠴᠢ ᠮᠢᠨᠢ
ᠠᠷᠪᠠᠨ ᠳᠠᠪᠬᠤᠷ ᠬᠤᠪᠴᠠᠰᠤ ᠪᠠᠨ
ᠨᠢᠭᠡᠯᠡ ᠬᠠᠪᠤᠷ ᠶ᠋ᠢᠠᠷ ᠲᠠᠶ᠋ᠢᠯᠵᠤ ᠣᠷᠬᠢᠭᠠᠳ ᠪᠣᠰᠤᠯᠠ ᠪᠢᠯᠡ
ᠪᠢ
ᠠᠮᠢ ᠨᠠᠰᠤᠨ ᠪ ᠪᠠᠨ ᠬᠡᠪᠡᠷᠡᠭᠬᠡᠨ ᠨᠤᠮᠤ ᠶ᠋ᠢ
ᠠᠯᠢᠪᠠ ᠪᠦᠬᠦᠨ ᠪ ᠴᠢᠨᠢ ᠲᠥᠯᠥᠭᠡ
ᠬᠢᠵᠠᠭᠠᠷ ᠦᠭᠡᠢ ᠲᠡᠯᠡᠵᠦ ᠵᠣᠭᠰᠣᠯᠠ ᠡ!
8
ᠡᠬᠡ ᠣᠷᠣᠨ ᠮᠢᠨᠢ ᠠ᠋
1988 ᠂ 9
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠲᠤᠭᠴᠢ ᠰᠠᠷᠠᠨᠠ
ᠬᠢᠨᠠᠭᠴᠢ ᠄ ᠭᠠᠸᠠ
2023 ᠂ 5 ᠂ 13 ᠪ ᠡᠲᠦᠷ