ᠡᠪᠦᠯ ᠤᠨ ᠳᠣᠲᠣᠷᠠ ᠬᠠᠪᠤᠷ ( ᠮᠥᠴᠡᠯᠭᠡ ᠰᠢᠯᠦᠭ ) – ᠪ᠂ ᠪᠦᠷᠢᠨᠪᠡᠬᠢ Өвлийн дотор хавар ( Мөчлөг шүлэг ) – Б ᠂ Бүрэнбэх
396 ᠴᠠᠰᠤᠨ ᠤ᠋ ᠳᠣᠲᠣᠷᠠ ᠴᠡᠴᠡᠭ
ᠤᠮᠠᠷᠠᠲᠤ ᠳᠠᠯᠠᠨ ᠬᠠᠷᠠ ᠠᠭᠤᠯᠠᠨ ᠤ᠋ ᠱᠣᠪᠬᠣ ᠣᠷᠭᠢᠯ ᠨᠢᠭᠡᠨᠲᠡ ᠴᠠᠭᠠᠨ ᠮᠥᠩᠭᠥᠨ ᠲᠤᠭᠤᠯᠭᠠ ᠡᠮᠦᠰᠴᠦ ᠂ ᠡᠮᠦᠨᠡᠲᠦ ᠲᠦᠮᠡᠳ ᠦ᠋ᠨ ᠲᠠᠯᠠ ᠶ᠋ᠢᠨ ᠣᠢ ᠰᠢᠭᠤᠢ ᠭᠦᠨ ᠰᠢᠷᠠ ᠨᠥᠮᠥᠷᠭᠡ ᠡᠭᠡᠯᠳᠦᠷᠭᠡᠯᠡᠨ ᠂ ᠬᠥᠬᠡᠬᠣᠲᠠ ᠶ᠋ᠢᠨ ᠡᠮᠦᠨᠡᠭᠦᠷ ᠮᠤᠷᠤᠢᠨ ᠤᠷᠤᠰᠴᠤ ᠪᠦᠬᠦᠢ ᠳᠠᠬᠤ ᠶ᠋ᠢᠨ ᠭᠣᠣᠯ ᠪᠠᠰᠠ ᠨᠢᠮᠭᠡᠨ ᠬᠠᠰ ᠤ᠋ᠨ ᠪᠦᠰᠡ ᠶ᠋ᠢ ᠪᠦᠰᠡᠯᠡᠵᠡᠢ ᠃ ᠡᠨᠡ ᠦᠶᠡ ᠬᠥᠬᠡᠬᠣᠲᠠ ᠶ᠋ᠢᠨ ᠬᠢᠨ ᠬᠢᠷᠠᠭᠤ ᠰᠢᠭᠦᠳᠡᠷᠢ ᠲᠡᠢ ᠤᠷᠤᠯᠳᠤᠭᠠᠨ ᠬᠢᠵᠦ ᠂ ᠰᠠᠯᠬᠢ ᠰᠢᠭᠤᠷᠭᠠᠨ ᠲᠠᠢ ᠤᠷᠤᠯᠳᠤᠭᠠᠨ ᠬᠢᠵᠦ ᠴᠠᠰᠤ ᠮᠥᠰᠥ ᠲᠡᠢ ᠤᠷᠤᠯᠳᠤᠭᠠᠨ ᠬᠢᠵᠦ ᠂ ᠴᠡᠭᠡᠯᠬᠡᠨ ᠬᠠᠪᠤᠷ ᠢ᠋ ᠤᠷᠢᠨ ᠂ ᠴᠡᠴᠡᠭ ᠬᠤᠸᠠᠷ ᠢ᠋ ᠲᠠᠷᠢᠨᠠ ᠃
ᠴᠡᠴᠡᠭ ᠂ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠢᠷᠭᠤᠢ ᠴᠡᠴᠡᠭ ᠪᠢᠰᠢ ᠃ ᠢᠷᠭᠤᠢ ᠴᠡᠴᠡᠭ ᠦ᠋ᠨ ᠳᠡᠯᠭᠡᠷᠡᠬᠦ ᠨᠢ ᠡᠷᠲᠡ ᠪᠣᠯᠪᠠᠴᠤ ᠵᠤᠯᠭᠠᠷᠠᠬᠤ ᠨᠢ ᠮᠥᠨ ᠬᠤᠷᠳᠤᠨ ᠃ ᠴᠡᠴᠡᠭ ᠂ ᠰᠠᠷᠠᠯᠠᠩ ᠴᠡᠴᠡᠭ ᠪᠢᠰᠢ ᠂ ᠰᠠᠷᠠᠯᠠᠩ ᠴᠡᠴᠡᠭ ᠵᠤᠨ ᠯᠠ ᠤᠷᠭᠤᠬᠤ ᠡᠴᠡ ᠪᠢᠰᠢ ᠡᠪᠦᠯ ᠮᠦᠰᠢᠶᠡᠵᠦ ᠯᠡ ᠴᠢᠳᠠᠬᠤ ᠦᠭᠡᠢ ᠃ ᠴᠡᠴᠡᠭ ᠂ ᠪᠡᠷᠢ ᠴᠡᠴᠡᠭ ᠪᠢᠰᠢ ᠃ ᠪᠡᠷᠢ ᠴᠡᠴᠡᠭ ᠦᠵᠡᠬᠦ ᠳ᠋ᠦ᠍ ᠰᠠᠢᠬᠠᠨ ᠪᠣᠯᠪᠠᠴᠤ ᠥᠭᠲᠡᠭᠡᠨ ᠠᠪᠤᠪᠠᠯ ᠠᠰᠢᠭ ᠬᠡᠷᠡᠭᠰᠡᠯ ᠢ᠋ᠶ᠋ᠡᠷ ᠬᠣᠮᠰᠠ ᠃ ᠡᠨᠡ ᠴᠡᠴᠡᠭ ᠢ᠋ ᠪᠢᠳᠡ ᠮᠠᠤ ᠽᠧ ᠳ᠋ᠦᠩ ᠦ᠋ᠨ ᠦᠶᠡ ᠶ᠋ᠢᠨ ᠮᠣᠩᠭᠣᠯᠴᠤᠳ ᠤ᠋ᠨ ᠦᠷᠡᠯᠡᠨ ᠲᠠᠷᠢᠵᠤ ᠪᠠᠢᠭᠠ ᠦᠶᠡ ᠶ᠋ᠢᠨ ᠦᠶᠡ ᠶ᠋ᠢᠨ ᠮᠥᠩᠬᠡ ᠴᠡᠴᠡᠭ ᠭᠡᠵᠦ ᠨᠡᠷᠡᠯᠡᠵᠡᠭᠡᠳᠡᠭ ᠶᠦ᠍ᠮ᠃ ᠴᠡᠴᠡᠭ ᠂ ᠰᠢᠵᠢᠷ ᠠᠯᠲᠠᠨ ᠪᠣᠯᠣᠳ ᠴᠡᠴᠡᠭ ᠠ᠋ !
ᠪᠣᠯᠣᠳ ᠴᠡᠴᠡᠭ ᠢ᠋ ᠮᠦᠰᠢᠶᠡᠯᠭᠡᠨ ᠳᠡᠯᠭᠡᠷᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠬᠣᠲᠠ ᠶ᠋ᠢᠨ ᠬᠠᠭᠤᠴᠢᠨ ᠬᠡᠷᠡᠮ ᠦ᠋ᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠲᠤᠭ ᠳᠠᠯᠪᠠᠭᠠ ᠮᠢᠷᠠᠯᠵᠠᠨ ᠬᠡᠢᠰᠴᠦ ᠬᠡᠷᠡᠮ ᠦ᠋ᠨ ᠤᠭ ᠲᠤ᠌ ᠲᠡᠷᠭᠡ ᠤᠨᠤᠭᠠ ᠴᠤᠪᠤᠷᠠᠨ ᠦᠷᠭᠦᠯᠵᠢᠯᠡᠵᠦ᠂ ᠤᠷᠭᠠ ᠪᠠᠷᠢᠭᠰᠠᠨ ᠭᠠᠷ ᠴᠤ᠌ ᠨᠢᠭᠡ ᠣᠪᠣᠭᠠ ᠬᠦᠳᠡᠷ᠂ ᠪᠢᠷ ᠴᠢᠮᠬᠢᠭᠰᠡᠨ ᠭᠠᠷ ᠴᠤ᠌ ᠨᠢᠭᠡ ᠳᠠᠮᠨᠠᠭᠤᠷ ᠨᠡᠭᠦᠷᠡᠰᠦ ᠁ ᠬᠥᠮᠦᠰ ᠪᠦᠬᠦ ᠬᠦᠴᠦᠨ ᠴᠢᠳᠠᠯ᠂ ᠢᠯᠴᠢ ᠬᠠᠯᠭᠤᠨ ᠢ᠋ᠶ᠋ᠠᠨ ᠪᠡᠶᠡᠰᠦᠨ ᠭᠠᠷᠭᠠᠬᠤ ᠳ᠋ᠤ᠌᠄
ᠡᠪᠦᠯ ᠦ᠋ᠨ ᠳᠣᠲᠣᠷᠠ ᠬᠠᠪᠤᠷ ᠡᠰᠡᠨᠢᠵᠦ
ᠴᠠᠰᠤᠨ ᠤ᠋ ᠳᠣᠲᠣᠷᠠ ᠴᠡᠴᠡᠭ ᠰᠠᠭᠤᠨᠠ ᠃
ᠠᠪᠤᠷᠭᠤ ᠬᠥᠭᠵᠢᠮ
ᠮᠣᠲ᠋ᠣᠷ ᠤ᠋ᠨ ᠳᠠᠭᠤᠨ ᠂ ᠲᠡᠷᠭᠡᠨ ᠦ᠌ ᠴᠢᠮᠡᠭᠡᠨ ᠂ ᠠᠯᠤᠬᠠ ᠶ᠋ᠢᠨ ᠳᠣᠷᠭᠢᠶᠠᠨ ᠂ ᠬᠥᠳᠡᠯᠮᠦᠷᠢ ᠶ᠋ᠢᠨ ᠴᠤᠤᠷᠢᠶᠠᠨ ᠂ ᠴᠣᠬᠢᠯᠭᠠ ᠲᠠᠭᠠᠷᠠᠯᠳᠤᠵᠤ ᠠᠢᠵᠠᠮ ᠴᠣᠬᠢᠴᠠᠨ ᠠᠪᠤᠷᠭᠤ ᠬᠥᠭᠵᠢᠮ ᠪᠣᠯᠵᠤ ᠂ ᠪᠣᠯᠣᠳ ᠰᠢᠷᠡᠮᠦ ᠬᠠᠢᠯᠤᠭᠤᠯᠬᠤ ᠲᠠᠯᠠᠪᠠᠢ ᠳᠡᠭᠡᠷᠡ ᠡᠴᠡ ᠳᠥᠷᠪᠡᠨ ᠵᠦᠭ ᠲᠦ᠍ ᠨᠢᠰᠦᠨ ᠰᠠᠳᠠᠷᠠᠨᠠ ᠃ ᠮᠠᠨ ᠤ᠋ ᠪᠠᠭᠠᠲᠤᠷᠯᠢᠭ ᠦᠢᠯᠡ ᠬᠡᠷᠡᠭ ᠦ᠋ᠨ ᠬᠥᠭᠵᠢᠮ ᠂ ᠴᠠᠭ ᠦᠶᠡ ᠶ᠋ᠢᠨ ᠬᠥᠭᠵᠢᠮ ᠂ ᠪᠣᠯᠣᠳ ᠲᠡᠮᠦᠷ ᠦ᠋ᠨ ᠬᠥᠭᠵᠢᠮ ᠠ᠋ ! ᠨᠣᠮᠢᠨ ᠳᠠᠯᠠᠢ ᠶ᠋ᠢᠨ ᠳᠠᠪᠠᠯᠭᠠᠨ ᠤᠤ ? ᠨᠣᠭᠣᠭᠠᠨ ᠬᠠᠳᠠᠨ ᠤ᠋ ᠢᠰᠬᠡᠷᠦᠭᠡᠨ ᠦᠦ? ᠮᠥᠰᠥᠨ ᠠᠭᠤᠯᠠᠨ ᠤ᠋ ᠳᠡᠯᠪᠡᠷᠡᠭᠡᠨ ᠦᠦ? ᠮᠥᠩᠭᠥᠨ ᠴᠠᠰᠤᠨ ᠤ᠋ ᠬᠦᠷᠬᠢᠷᠡ ᠦᠦ?
ᠨᠡᠩ ᠬᠦᠴᠦᠲᠡᠢ ᠪᠡᠷ ᠬᠦᠩᠭᠢᠨᠡᠲᠦᠭᠡᠢ !
ᠬᠠᠩᠭᠠᠢ ᠲᠡᠷᠭᠡᠨ ᠦ᠌ ᠳᠣᠩᠰᠣᠯᠭᠠ ᠂ ᠬᠠᠱᠠᠩ ᠦᠬᠡᠷ ᠦ᠋ᠨ ᠠᠯᠬᠤᠭᠠ ᠂ ᠬᠥᠳᠡᠭᠡ ᠴᠤᠪᠤᠭᠰᠠᠨ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠥᠨᠥᠴᠢᠨ ᠬᠣᠩᠬᠣᠨ ᠤ᠋ ᠭᠢᠩᠰᠢᠭᠡ ᠂ ᠬᠥᠯᠳᠡᠭᠦᠦ ᠳ᠋ᠦ᠍ ᠳᠠᠪᠬᠢᠭᠰᠠᠨ ᠭᠠᠭᠴᠠ ᠮᠣᠷᠢᠨ ᠤ᠋ ᠬᠥᠩᠭᠡᠨ ᠲᠤᠭᠤᠷᠠᠢ ᠶ᠋ᠢᠨ ᠴᠢᠮᠡᠭᠡ ᠶ᠋ᠢ ᠪᠣᠳᠣᠪᠠᠯ ᠡᠨᠡ ᠨᠢ ᠶᠠᠭᠠᠬᠢᠭᠰᠠᠨ ᠠᠭᠤᠤ ᠶᠡᠬᠡ ᠬᠥᠭᠵᠢᠯᠲᠡ ᠪᠣᠢ!
ᠨᠡᠩ ᠬᠦᠴᠦᠲᠡᠢ ᠪᠡᠷ ᠬᠦᠩᠭᠢᠨᠡᠲᠦᠭᠡᠢ !
ᠲᠦᠮᠡᠨ ᠠᠭᠲᠠᠨ ᠤ᠋ ᠲᠦᠪᠦᠷᠭᠡᠨ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠰᠣᠨᠣᠰᠳᠠᠵᠤ᠂ ᠲᠡᠦᠬᠡ ᠶ᠋ᠢᠨ ᠬᠦᠷᠳᠦᠨ ᠦ᠌ ᠲᠦᠷᠴᠢᠭᠢᠨᠡᠭᠡᠨ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠳᠤᠭᠤᠯᠳᠠᠨᠠ᠃ ᠪᠤᠷᠭᠠᠰᠤᠨ ᠤᠷᠭᠠ ᠬᠥᠰᠢᠭᠰᠡᠨ ᠪᠠᠭᠤᠷᠠᠢ ᠦᠨᠳᠦᠰᠦᠲᠡᠨ ᠂ ᠪᠣᠯᠣᠳ ᠪᠦᠷᠢᠶᠡ ᠡᠷᠭᠢᠭᠦᠯᠦᠭᠰᠡᠨ ᠴᠢᠭᠢᠷᠠᠭ ᠦᠨᠳᠦᠰᠦᠲᠡᠨ ᠪᠣᠯᠵᠤ ᠪᠠᠢᠬᠤ ᠶᠡᠬᠡ ᠠᠯᠬᠤᠯᠲᠠ ᠶ᠋ᠢᠨ ᠬᠥᠯ ᠦ᠋ᠨ ᠴᠢᠮᠡᠭᠡ ᠮᠥᠨ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠲᠣᠪ ᠲᠣᠳᠣᠬᠠᠨ ᠃
ᠡᠨᠡᠬᠦ ᠬᠥᠭᠵᠢᠮ ᠦ᠋ᠨ ᠳᠠᠭᠤᠨ ᠳ᠋ᠤ᠌ ᠂ ᠮᠠᠨ ᠤ᠋ ᠦᠨᠳᠦᠰᠦᠲᠡᠨ ᠮᠠᠨᠳᠤᠬᠤ ᠨᠠᠷᠠᠨ ᠤ᠋ ᠵᠦᠭ ᠲᠦᠷᠭᠡᠯᠡᠨ ᠳᠠᠪᠬᠢᠨᠠ᠃
ᠣᠳᠣ ᠬᠢᠭᠡᠳ ᠳ᠋ᠧᠩ
ᠪᠣᠯᠣᠳ ᠰᠢᠷᠠᠮᠤ ᠬᠠᠢᠯᠠᠭᠤᠯᠵᠤ ᠳᠠᠢᠴᠢᠨ ᠹᠷᠣᠨᠲ ᠳᠡᠭᠡᠷᠡ ᠤᠲᠤᠭᠠ ᠂ ᠲᠣᠭᠣᠰᠣ ᠂ ᠠᠭᠤᠷ ᠡᠪᠬᠡᠷᠡᠯᠳᠦᠨ ᠡᠭᠡᠳᠡᠷᠡᠵᠦ ᠬᠥᠷᠥᠰᠥᠲᠦ ᠠᠯᠲᠠᠨ ᠳᠡᠯᠡᠬᠡᠢ ᠡᠴᠡ ᠬᠥᠬᠡ ᠮᠥᠩᠭᠥᠨ ᠣᠭᠲᠠᠷᠭᠤᠢ ᠥᠭᠡᠳᠡ ᠮᠠᠴᠤᠯᠬᠢᠯᠠᠨᠠ᠃ ᠬᠥᠬᠡ ᠮᠥᠩᠭᠥᠨ ᠣᠭᠲᠠᠷᠭᠤᠢ ᠳ᠋ᠠᠬᠢ ᠬᠥᠪᠰᠡᠭᠡᠷ ᠴᠠᠭᠠᠨ ᠡᠭᠦᠯᠡ ᠬᠦᠵᠦᠭᠦᠦ ᠪᠡᠨ ᠰᠤᠩᠭᠠᠨ ᠳᠠᠯᠠᠪᠴᠢ ᠪᠠᠨ ᠳᠡᠯᠭᠡᠵᠦ ᠬᠥᠷᠥᠰᠥᠲᠦ ᠠᠯᠲᠠᠨ ᠳᠡᠯᠡᠬᠡᠢ ᠤᠷᠤᠭᠤ ᠰᠢᠭᠦᠷᠦᠯᠬᠢᠯᠡᠨᠠ ᠃
ᠡᠭᠦᠯᠡ ᠴᠦ᠍ ᠤᠲᠤᠭᠠ ᠰᠢᠭ᠋᠂
ᠤᠲᠤᠭᠠ ᠴᠤ᠌ ᠡᠭᠦᠯᠡ ᠮᠡᠲᠦ᠃
ᠤᠲᠤᠭᠠᠨ ᠤ᠋ ᠴᠠᠭᠠᠨᠠ ᠂ ᠲᠣᠭᠣᠰᠣᠨ ᠤ᠋ ᠳᠤᠮᠳᠠ ᠂ ᠡᠭᠦᠯᠡᠨ ᠦ᠌ ᠳᠣᠣᠷᠠ ᠂ ᠲᠡᠮᠦᠷ ᠪᠣᠯᠪᠠᠰᠤᠷᠠᠭᠤᠯᠬᠤ ᠭᠠᠯ ᠤ᠋ᠨ ᠳᠥᠯᠥ ᠡᠨᠳᠡ ᠲᠡᠨᠳᠡ ᠳᠦᠷᠡᠯᠵᠡᠨ ᠥᠷᠪᠥᠯᠵᠡᠵᠦ ᠣᠭᠲᠠᠷᠭᠤᠢ ᠶ᠋ᠢᠨ ᠪᠠᠷᠠᠭᠤᠨ ᠬᠠᠶᠠᠭᠠᠨᠠ ᠲᠤᠰᠤᠭᠰᠠᠨ ᠰᠢᠩᠭᠢᠬᠦ ᠨᠠᠷᠠᠨ ᠤ᠋ ᠤᠯᠠᠪᠢᠷ ᠲᠤᠶᠠᠭᠠ ᠲᠠᠢ ᠥᠩᠭᠡ ᠮᠥᠷᠥᠢᠴᠡᠨᠡ ᠃ ᠰᠢᠩᠭᠡᠭᠰᠡᠨ ᠨᠠᠷᠠᠨ ᠤ᠋ ᠤᠯᠠᠪᠢᠷ ᠲᠤᠶᠠᠭᠠ ᠥᠷᠥᠨᠡ ᠠᠯᠤᠰ ᠠ᠋ᠴᠠ ᠨᠢᠭᠤᠷ ᠢ᠋ᠶ᠋ᠠᠨ ᠤᠯᠠᠪᠠᠯᠵᠠᠭᠤᠯᠵᠤ ᠲᠡᠮᠦᠷ ᠪᠣᠯᠪᠠᠰᠤᠷᠠᠭᠤᠯᠬᠤ ᠭᠠᠯ ᠤ᠋ᠨ ᠳᠥᠯᠥ ᠲᠡᠢ ᠵᠢᠰᠦ ᠪᠡᠨ ᠲᠠᠭᠠᠷᠠᠭᠤᠯᠤᠨᠠ ᠃
ᠲᠤᠶᠠᠭᠠ ᠴᠤ᠌ ᠭᠠᠯ ᠰᠢᠭ᠋᠂
ᠭᠠᠯ ᠴᠤ᠌ ᠲᠤᠶᠠᠭᠠ ᠮᠡᠲᠦ᠃
ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠤᠭ ᠠ᠋ᠴᠠ ᠣᠷᠣᠢ ᠬᠦᠷᠲᠡᠯᠡ ᠂ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠣᠷᠣᠢ ᠠᠴᠠ ᠣᠭᠲᠠᠷᠭᠤᠢ ᠲᠤᠯᠲᠠᠯᠠ ᠴᠠᠬᠢᠯᠭᠠᠨ ᠳ᠋ᠧᠩ ᠵᠢᠭᠳᠡᠷᠡᠨ ᠪᠥᠭᠡᠮᠨᠡᠷᠡᠵᠦ ᠂ ᠵᠤᠵᠠᠭᠠᠷᠠᠨ ᠪᠥᠭᠡᠮᠨᠡᠷᠡᠵᠦ ᠂ ᠵᠤᠵᠠᠭᠠᠷᠠᠨ ᠰᠢᠩᠭᠡᠷᠡᠭᠰᠡᠭᠡᠷ ᠲᠦᠮᠡᠨ ᠪᠣᠳᠠᠰ ᠤ᠋ᠨ ᠪᠠᠷᠠ ᠰᠡᠭᠦᠳᠡᠷ ᠦ᠋ᠨ ᠡᠨᠳᠡᠭᠡ ᠲᠡᠷᠲᠡᠭᠡ ᠂ ᠳᠡᠭᠡᠷᠡ ᠳᠣᠣᠷᠠ ᠳᠤᠯᠠᠯᠵᠠᠨ ᠭᠢᠯᠪᠠᠯᠵᠠᠨᠠ ᠃ ᠡᠩ ᠳᠡᠯᠡᠬᠡᠢ ᠡᠴᠡ ᠭᠡᠷᠡᠯᠲᠦ ᠰᠤᠪᠤᠳ ᠢ᠋ ᠲᠡᠭᠡᠭᠡᠰᠢ ᠪᠡᠨ ᠰᠠᠴᠤᠵᠤ ᠪᠠᠢᠭᠠ ᠶᠤᠮ ᠤᠤ ?᠂ ᠡᠰᠡᠷᠸᠠ ᠲᠩᠷᠢ ᠶ᠋ᠢᠨ ᠪᠣᠯᠣᠷ ᠡᠷᠢᠬᠡᠨ ᠦ᠌ ᠬᠡᠯᠬᠢᠶᠡ ᠲᠠᠰᠤᠷᠠᠴᠢᠬᠠᠭᠠᠳ ᠣᠳᠣᠨ ᠰᠣᠯᠢᠷ ᠳᠣᠭᠣᠭᠰᠢ ᠪᠠᠨ ᠰᠤᠪᠤᠷᠠᠯᠳᠤᠨ ᠪᠠᠭᠤᠵᠤ ᠪᠠᠢᠭᠠ ᠶᠤᠮ ᠤᠤ ?
ᠣᠳᠣ ᠴᠤ᠌ ᠳ᠋ᠧᠩ ᠰᠢᠭ ᠂
ᠳ᠋ᠧᠩ ᠴᠦ᠍ ᠣᠳᠣ ᠮᠡᠲᠦ ᠃
ᠡᠳᠡᠭᠡᠷ ᠪᠠᠢᠭᠠᠯᠢ ᠶ᠋ᠢᠨ ᠦᠵᠡᠭᠳᠡᠯ ᠦ᠋ᠨ ᠳᠤᠮᠳᠠ ᠂ ᠮᠠᠨ ᠤ᠋ ᠦᠶᠡ ᠶ᠋ᠢᠨ ᠪᠠᠭᠠᠲᠤᠷ ᠂ ᠰᠠᠯᠬᠢᠨ ᠢ᠋ ᠤᠷᠢᠨ ᠡᠭᠦᠯᠡ ᠶ᠋ᠢ ᠨᠡᠭᠦᠯᠭᠡᠵᠦ ᠂ ᠣᠳᠣᠨ ᠢ᠋ ᠵᠢᠭᠡᠯᠡᠨ ᠬᠠᠷᠠᠩᠭᠤᠢ ᠶ᠋ᠢ ᠦᠯᠳᠡᠵᠦ ᠂ ᠦᠷᠡ ᠶ᠋ᠢᠨ ᠦᠷᠡ ᠳ᠋ᠦ᠍ ᠵᠤᠯᠭᠠᠷᠠᠰᠢ ᠦᠭᠡᠢ ᠮᠥᠩᠬᠡ ᠂ ᠡᠪᠦᠯ ᠦ᠋ᠨ ᠡᠪᠦᠯ ᠳ᠋ᠦ᠍ ᠬᠤᠪᠠᠬᠠᠢᠷᠠᠰᠢ ᠦᠭᠡᠢ ᠪᠥᠬᠡ ᠰᠢᠵᠢᠷ ᠠᠯᠲᠠᠨ ᠴᠡᠴᠡᠭ ᠢ᠋ ᠲᠠᠷᠢᠨᠠ ᠃
ᠬᠥᠮᠦᠨ ᠴᠦ᠍ ᠰᠠᠬᠢᠭᠤᠯᠰᠤᠨ ᠰᠢᠭ᠋ ᠂
ᠰᠠᠬᠢᠭᠤᠯᠰᠤᠨ ᠴᠤ᠌ ᠬᠥᠮᠦᠨ ᠮᠡᠲᠦ ᠃
ᠴᠡᠴᠡᠭ ᠳᠡᠯᠭᠡᠷᠡᠬᠦ ᠦᠶᠡᠰ
ᠠᠯᠲᠠᠨ ᠴᠡᠴᠡᠭ ᠳᠡᠯᠭᠡᠷᠡᠯᠡ᠄
ᠬᠠᠶᠠᠯᠠᠭᠰᠠᠨ ᠪᠤᠲᠠᠷᠭᠠᠨᠠ ᠂ ᠪᠣᠯᠣᠳ ᠤ᠋ᠨ ᠣᠴᠢᠨ ᠳ᠋ᠤ᠌ ᠬᠡᠰᠦᠨ ᠥᠭᠴᠦ ᠰᠢᠭᠦᠳᠡᠷᠢ ᠶ᠋ᠢᠨ ᠲᠣᠰᠣ ᠳᠡᠯᠡᠬᠡᠢ ᠳ᠋ᠦ᠍ ᠰᠦᠷᠴᠢᠭᠳᠡᠨᠡ ᠃ ᠪᠠᠭᠤᠭᠰᠠᠨ ᠴᠠᠰᠤ ᠂ ᠪᠣᠯᠣᠳ ᠤ᠋ᠨ ᠣᠴᠢᠨ ᠳ᠋ᠤ᠌ ᠬᠠᠢᠯᠤᠨ ᠥᠭᠴᠦ ᠬᠤᠷᠠ ᠶ᠋ᠢᠨ ᠤᠰᠤ ᠡᠭᠦᠯᠡᠨ ᠳ᠋ᠦ᠍ ᠬᠣᠮᠠᠭᠯᠠᠭᠲᠠᠨᠡ ᠃ ᠬᠥᠯᠳᠡᠭᠰᠡᠨ ᠭᠠᠵᠠᠷ ᠤᠶᠠᠷᠠᠨ ᠵᠥᠭᠡᠯᠡᠷᠡᠵᠦ ᠨᠣᠢᠲᠠᠨ ᠦᠷᠡᠰ ᠢ᠋ ᠰᠢᠷᠣᠢ ᠳ᠋ᠤ᠌ ᠲᠥᠯᠵᠢᠭᠦᠯᠦᠨᠡ ᠃ ᠪᠠᠷᠢᠯᠳᠤᠭᠰᠠᠨ ᠮᠥᠰᠥ ᠬᠠᠭᠠᠷᠠᠨ ᠳᠡᠯᠪᠡᠷᠡᠵᠦ ᠤᠷᠤᠰᠬᠠᠯ ᠢ᠋ ᠮᠢᠷᠠᠯᠵᠢᠭᠣᠯᠣᠨ ᠭᠠᠯᠠᠭᠤ ᠶ᠋ᠢ ᠳᠠᠭᠤᠳᠠᠨᠠ᠃
ᠠᠯᠲᠠᠨ ᠴᠡᠴᠡᠭ ᠳᠡᠯᠭᠡᠷᠡᠯᠡ ᠄
ᠪᠣᠯᠣᠳ ᠤ᠋ᠨ ᠣᠴᠢ ᠳᠠᠬᠤ ᠶ᠋ᠢᠨ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠳ᠋ᠤ᠌ ᠦᠰᠦᠷᠦᠨ ᠲᠤᠰᠤᠭᠰᠠᠨ ᠳ᠋ᠤ᠌ ᠠᠯᠲᠠᠨ ᠵᠢᠭᠠᠰᠤ ᠲᠡᠨᠳᠡ ᠢᠷᠭᠠᠯᠠᠨᠠ ᠃ ᠪᠣᠯᠣᠳ ᠤ᠋ᠨ ᠣᠴᠢ ᠳᠠᠯᠠᠨ ᠬᠠᠷᠠ ᠠᠭᠤᠯᠠ ᠶ᠋ᠢᠨ ᠣᠷᠭᠢᠯ ᠳ᠋ᠤ᠌ ᠬᠠᠷᠪᠤᠨ ᠬᠦᠷᠦᠭᠰᠡᠨ ᠳ᠋ᠦ᠍ ᠠᠯᠲᠠᠨ ᠪᠤᠭᠤ ᠲᠡᠨᠳᠡ ᠲᠣᠭᠯᠠᠨᠠ ᠃ ᠪᠣᠯᠣᠳ ᠤ᠋ᠨ ᠣᠴᠢ ᠤᠰᠤᠲᠤ ᠶ᠋ᠢᠨ ᠬᠠᠷᠠᠭᠠᠨᠠ ᠶ᠋ᠢᠨ ᠰᠠᠯᠠᠭᠠᠨ ᠳᠡᠭᠡᠷᠡ ᠰᠠᠳᠠᠷᠠᠨ ᠤᠨᠠᠭᠰᠠᠨ ᠳ᠋ᠤ᠌ ᠠᠯᠲᠠᠨ ᠭᠤᠷᠭᠤᠤᠯᠳᠠᠢ ᠲᠡᠨᠳᠡ ᠳᠣᠩᠭᠣᠳᠤᠨᠠ ᠃
ᠠᠯᠲᠠᠨ ᠴᠡᠴᠡᠭ ᠳᠡᠯᠭᠡᠷᠡᠯᠡ ᠄
ᠡᠭᠦᠨ ᠡᠴᠡ ᠬᠣᠢᠰᠢ ᠠᠯᠲᠠᠨ ᠲᠡᠮᠡᠭᠡ ᠵᠣᠭᠳᠣᠷ ᠢ᠋ᠶ᠋ᠠᠨ ᠬᠡᠢᠰᠬᠡᠨ ᠂ ᠮᠥᠩᠭᠥᠨ ᠠᠵᠢᠷᠭᠠ ᠳᠡᠯ ᠢ᠋ᠶ᠋ᠡᠨ ᠪᠣᠰᠬᠠᠵᠤ ᠂ ᠲᠡᠮᠦᠷ ᠪᠤᠬᠠ ᠡᠪᠡᠷ ᠢ᠋ᠶ᠋ᠡᠨ ᠰᠡᠷᠡᠢᠯᠭᠡᠨ ᠂ ᠨᠣᠮᠢᠨ ᠲᠠᠯᠠ ᠭᠡᠷᠡᠯ ᠰᠠᠴᠤᠷᠠᠭᠤᠯᠤᠨᠠ ᠃
ᠬᠥᠬᠡ ᠣᠭᠲᠠᠷᠭᠤᠢ ᠳ᠋ᠤ᠌ ᠮᠥᠩᠭᠥᠨ ᠭᠣᠣᠯ ᠪᠠᠢᠨᠠ ᠭᠡᠬᠦᠯᠡᠷ ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠰᠠ ᠠᠯᠲᠠᠨ ᠮᠥᠷᠡᠨ ᠤᠷᠤᠰᠤᠨᠠ ᠃
1958 —1960