ᠵᠠᠳᠠᠭᠠᠢ ᠰᠢᠯᠦᠭ ᠦᠨ ᠲᠡᠭᠦᠪᠦᠷᠢ - ᠣᠷᠣᠰᠢᠯ Задгай шүлгийн түүвэр - Оршил ᠰᠢᠯᠦᠭ ᠢᠷᠠᠭᠤ ᠨᠠᠢᠷᠠᠭ

                               ᠳᠠᠮᠤᠰᠦ᠋ᠷᠦᠩ 

          1       

       ᠲᠠ ᠪᠢᠳᠡᠨ ᠦ᠌ ᠡᠮᠦᠨ᠎ᠡ ᠳᠡᠯᠭᠡᠭᠳᠡᠵᠦ ᠪᠠᠢᠭ᠎ᠠ《 ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠲᠡᠭᠦᠪᠦᠷᠢ 》 ᠪᠣᠯ ᠤᠯᠤᠰ ᠪᠠᠢᠭᠤᠯᠤᠭᠳᠠᠭᠰᠠᠨ ᠠ᠋ᠴᠠ ᠨᠠᠰᠢ᠂ ᠦᠭᠡᠢ ᠂ ᠶᠡᠷᠦᠨᠢ ᠭᠠᠯᠪᠠ ᠳᠡᠯᠡᠬᠡᠢ ᠲᠣᠭᠲᠠᠭᠰᠠᠨ ᠠ᠋ᠴᠠ ᠨᠠᠰᠢ ᠥᠪᠥᠷ ᠮᠣᠩᠭᠣᠯ ᠳ᠋ᠤ᠌ ᠮᠣᠩᠭᠣᠯ ᠬᠡᠯᠡ ᠪᠡᠷ ᠪᠢᠴᠢᠭᠳᠡᠭᠰᠡᠨ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠠᠩᠬᠠᠳᠤᠭᠠᠷ ᠲᠡᠭᠦᠪᠦᠷᠢ ᠪᠣᠯᠬᠤ ᠨᠢ ᠮᠠᠳᠠᠭ ᠦᠭᠡᠢ ᠬᠡᠷᠡᠭ ᠃ ᠡᠨᠡ ᠨᠢ ᠮᠠᠨ ᠣᠷᠣᠨ ᠦ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠮᠠᠰᠢ ᠰᠢᠨ᠎ᠡ ᠰᠣᠷᠭᠣᠭ ᠂ ᠮᠠᠰᠢ ᠰᠢᠮᠡᠯᠢᠭ ᠠᠮᠲᠠᠷᠬᠠᠨ ᠂ ᠮᠠᠰᠢ ᠭᠣᠶᠣ ᠰᠠᠢᠬᠠᠨ ᠨᠢᠭᠡᠨ ᠪᠤᠲᠠ ᠥᠩᠭᠡᠲᠦ ᠴᠡᠴᠡᠭ ᠨᠡᠮᠡᠭᠳᠡᠭᠰᠡᠨ ᠢ᠋ ᠮᠡᠳᠡᠭᠡᠯᠡᠵᠦ ᠪᠠᠢᠨ᠎ᠠ ᠃  

      ᠲᠤᠰ ᠲᠡᠭᠦᠪᠦᠷᠢ ᠳ᠋ᠦ᠍ ᠬᠣᠷᠢᠨ ᠵᠣᠬᠢᠶᠠᠭᠴᠢ ᠶ᠋ᠢᠨ ᠵᠠᠭᠤ ᠲᠠᠪᠢ ᠭᠠᠷᠤᠢ ᠤᠷᠲᠤ ᠪᠣᠭᠣᠨᠢ ᠠᠳᠠᠯᠢ ᠦᠭᠡᠢ ᠂ ᠰᠡᠳᠦᠪ ᠮᠠᠲ᠋ᠧᠷᠢᠶᠠᠯ ᠣᠨᠳᠣᠣ ᠣᠨᠳᠣᠣ ᠂ ᠬᠡᠪ ᠨᠠᠮᠪᠠ ᠥᠭᠡᠷ᠎ᠡ ᠥᠭᠡᠷ᠎ᠡ ᠵᠠᠳᠠᠭᠠᠢ ᠰᠢᠯᠦᠭ ᠢ᠋ ᠲᠡᠭᠦᠪᠦᠷᠢᠯᠡᠪᠡ ᠂ ᠲᠤᠰ ᠲᠡᠭᠦᠪᠦᠷᠢ ᠶ᠋ᠢ ᠤᠩᠰᠢᠭᠠᠳ ᠨᠠᠳᠠ ᠭᠤᠷᠪᠠᠨ ᠰᠠᠭᠤᠭᠳᠠᠯ ᠨᠢᠭᠡ ᠵᠣᠷᠢᠭᠵᠢᠯ ᠣᠷᠣᠪᠠ ᠂ ᠭᠤᠷᠪᠠᠨ ᠰᠠᠭᠤᠭᠳᠠᠯ ᠭᠡᠪᠡᠯ ᠄ ᠰᠢᠨ᠎ᠡ ᠰᠣᠷᠭᠣᠭ ᠂ ᠥᠷᠭᠡᠨ ᠭᠦᠨᠵᠡᠭᠡᠢ ᠂ ᠭᠣᠶᠣ ᠰᠠᠢᠬᠠᠨ ᠰᠠᠨᠠᠭᠳᠠᠪᠠ ᠃ ᠨᠢᠭᠡ ᠵᠣᠷᠢᠭᠵᠢᠯ ᠭᠡᠪᠡᠯ ᠄ ᠮᠣᠩᠭᠣᠯ ᠵᠠᠳᠠᠭᠠᠢ ᠰᠢᠯᠦᠭ ᠲᠦ᠍ ᠰᠠᠷᠠᠭᠤᠯ ᠰᠠᠢᠬᠠᠨ ᠢᠷᠡᠭᠡᠳᠦᠢ ᠪᠠᠢᠨ᠎ᠠ ᠂ ᠮᠠᠰᠢ ᠶᠡᠬᠡ ᠡᠷᠡᠮᠡᠯᠵᠡᠯ ᠲᠡᠢ ᠪᠠᠢᠨ᠎ᠠ ᠭᠡᠳᠡᠭ ᠲᠦ᠍ ᠢᠲᠡᠭᠡᠯ ᠲᠡᠭᠦᠰ ᠪᠣᠯᠪᠠ ᠃ 

       ᠰᠢᠨ᠎ᠡ ᠰᠣᠷᠭᠣᠭ ᠭᠡᠵᠦ ᠬᠡᠯᠪᠡᠷᠢ  ᠲᠢᠭ ᠰᠢᠨ᠎ᠡ ᠰᠣᠷᠭᠣᠭ ᠂ ᠤᠳᠬ᠎ᠠ ᠠᠭᠤᠯᠭ᠎ᠠ ᠰᠢᠨ᠎ᠡ ᠰᠣᠷᠭᠣᠭ᠂ ᠦᠨᠦᠷ ᠠᠮᠲᠠ ᠰᠢᠨ᠎ᠡ ᠰᠣᠷᠭᠣᠭ ᠢ᠋ ᠵᠢᠭᠠᠵᠤ ᠪᠠᠢᠨ᠎ᠠ ᠃ 

      ᠥᠷᠭᠡᠨ ᠭᠦᠨᠵᠡᠭᠡᠢ ᠭᠡᠵᠦ ᠰᠡᠳᠦᠪ  ᠮᠠᠲ᠋ᠧᠷᠢᠶᠠᠯ ᠥᠷᠭᠡᠨ ᠳᠡᠯᠭᠡᠷ᠂ ᠲᠤᠰᠬᠠᠭᠰᠠᠨ ᠠᠮᠢᠳᠤᠷᠠᠯ ᠥᠷᠭᠡᠨ ᠭᠦᠨᠵᠡᠭᠡᠢ᠂ ᠵᠣᠬᠢᠶᠠᠭᠴᠢ ᠵᠢᠨ ᠡᠩᠨᠡᠭᠡ ᠬᠥᠮᠦᠨ ᠣᠯᠠᠨ᠂ ᠬᠡᠪ ᠨᠠᠮᠪᠠ ᠥᠷᠭᠡᠨ ᠳᠡᠯᠭᠡᠷ ᠵᠡᠷᠭᠡ ᠪᠣᠯᠤᠨ᠎ᠠ ᠃ 

      ᠭᠣᠶᠣ ᠰᠠᠢᠬᠠᠨ ᠭᠡᠵᠦ ᠤᠷᠠᠨ ᠰᠠᠨᠠᠭ᠎ᠠ ᠭᠣᠶᠣ ᠰᠠᠢᠬᠠᠨ᠂ ᠤᠶᠠᠩᠭ᠎ᠠ ᠰᠡᠳᠬᠢᠯᠭᠡ ᠭᠣᠶᠣ ᠰᠠᠢᠬᠠᠨ᠂ ᠳᠦᠷᠢ ᠳᠦᠷᠰᠦᠯᠡᠯ ᠭᠣᠶᠣ ᠰᠠᠢᠬᠠᠨ᠂ ᠰᠠᠨᠠᠭ᠎ᠠ ᠠᠬᠤᠢ ᠭᠣᠶᠣ ᠰᠠᠢᠬᠠᠨ᠂ ᠬᠡᠯᠡ ᠬᠡᠯᠡᠯᠭᠡ ᠭᠣᠶᠣ ᠰᠠᠢᠬᠠᠨ ᠵᠡᠷᠭᠡ ᠪᠣᠯᠤᠨ᠎ᠠ ᠃   

     ᠵᠣᠷᠢᠭᠵᠢᠭᠰᠠᠨ ᠵᠦᠢᠯ ᠭᠡᠪᠡᠯ ᠄ ᠲᠤᠰ  ᠲᠡᠭᠦᠪᠦᠷᠢ ᠪᠣᠯ ᠮᠣᠩᠭᠣᠯ ᠵᠠᠳᠠᠭᠠᠢ ᠰᠢᠯᠦᠭ ᠦᠨ  ᠤᠤᠭᠠᠨ ᠲᠡᠭᠦᠪᠦᠷᠢ ᠪᠣᠯᠤᠨ᠎ᠠ  ᠂ ᠭᠡᠪᠡᠴᠦ ᠲᠡᠭᠦᠨ ᠦ ᠡᠬᠢᠯᠡᠯᠲᠡ ᠶ᠋ᠢᠨ ᠴᠠᠭ ᠨᠢ ᠨᠡᠯᠢᠶᠡᠳ ᠥᠨᠳᠥᠷ ᠂ ᠴᠣᠭᠴᠠᠯᠠᠭᠰᠠᠨ ᠰᠠᠭᠤᠷᠢ ᠨᠢ ᠨᠡᠯᠢᠶᠡᠳ ᠪᠠᠲᠤ ᠂ ᠦᠨᠦᠷ ᠠᠮᠲᠠ ᠨᠢ ᠨᠡᠯᠢᠶᠡᠳ ᠬᠤᠷᠴᠠ ᠂ ᠵᠣᠬᠢᠶᠠᠭᠴᠢ ᠵᠢᠨ ᠡᠩᠨᠡᠭᠡ ᠨᠡᠯᠢᠶᠡᠳ ᠬᠦᠴᠦᠷᠬᠡᠭ ᠂ ᠤᠷᠠᠨ ᠪᠣᠯᠪᠠᠰᠤᠷᠠᠯ ᠨᠡᠯᠢᠶᠡᠳ ᠳᠠᠳᠮᠠᠭᠠᠢ ᠮᠥᠷᠲᠡᠭᠡᠨ ᠲᠤᠰ ᠬᠡᠯᠪᠡᠷᠢ ᠲᠢᠭ ᠪᠣᠯ ᠦᠭᠡᠰ ᠦᠨ ᠰᠠᠩ  ᠪᠠᠶᠠᠯᠢᠭ ᠂ ᠢᠯᠡᠳᠬᠡᠬᠦ ᠴᠢᠳᠠᠪᠤᠷᠢ  ᠴᠢᠩᠭ᠎ᠠ᠂ ᠠᠢᠵᠠᠮ ᠴᠣᠬᠢᠯᠭ᠎ᠠ ᠲᠣᠳᠣᠷᠬᠠᠢ ᠂ ᠤᠷᠠᠯᠢᠭ ᠰᠠᠢᠬᠠᠨ ᠂ ᠢᠷᠠᠭᠤ ᠬᠥᠭᠵᠢᠮᠯᠢᠭ ᠂ ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠶᠠᠭᠠᠬᠢᠬᠤ  ᠠᠷᠭ᠎ᠠ ᠦᠭᠡᠢ ᠠᠶᠠᠲᠠᠢ ᠵᠣᠬᠢᠴᠠᠬᠤ ᠶᠤᠮ ᠪᠠᠢᠨ᠎ᠠ ᠭᠡᠰᠡᠨ  ᠢ᠋ ᠦᠵᠡᠭᠦᠯᠪᠡ ᠃ ᠲᠡᠢᠮᠦ ᠳᠦ ᠂ ᠲᠤᠰ ᠲᠡᠭᠦᠪᠦᠷᠢ ᠬᠡᠳᠦᠢᠪᠡᠷ ᠠᠩᠬᠠᠨ ᠦ ᠵᠠᠳᠠᠭᠠᠢ ᠰᠢᠯᠦᠭ ᠤᠨ ᠲᠡᠭᠦᠪᠦᠷᠢ ᠪᠣᠯᠪᠠᠴᠤ ᠥᠩᠭᠡ ᠢᠯᠭᠠᠷᠠᠨ ᠳᠡᠯᠭᠡᠷᠡᠭᠰᠡᠨ ᠂ ᠦᠨᠦᠷ ᠬᠠᠩᠬᠤᠯᠤᠨ ᠪᠠᠳᠮᠠᠯᠠᠭᠰᠠᠨ ᠂ ᠨᠡᠩ ᠣᠯᠠᠨ ᠂ ᠨᠡᠩ ᠰᠠᠢᠬᠠᠨ ᠵᠠᠳᠠᠭᠠᠢ ᠰᠢᠯᠦᠭ ᠢ ᠥᠪᠥᠷ ᠮᠣᠩᠭᠣᠯ ᠦᠨ ᠲᠠᠯ᠎ᠠ ᠨᠤᠲᠤᠭ ᠲᠤ᠌ ᠥᠷᠭᠡᠨ ᠣᠯᠠᠨ  ᠲᠦᠮᠡᠨ ᠦ᠌ ᠴᠡᠭᠡᠵᠢᠨ  ᠳᠦ ᠠᠪᠴᠢᠷᠠᠵᠤ ᠥᠭᠬᠦ ᠪᠣᠯᠤᠨ᠎ᠠ ᠭᠡᠳᠡᠭ ᠲᠦ᠍ ᠪᠠᠲᠤ ᠢᠲᠡᠭᠡᠵᠦ ᠪᠠᠢᠨ᠎ᠠ ᠃  

       ᠮᠣᠩᠭᠣᠯ ᠵᠠᠳᠠᠭᠠᠢ ᠰᠢᠯᠦᠭ ᠤᠨ ᠠᠯᠤᠰ ᠢᠷᠡᠭᠡᠳᠦᠢ ᠪᠦᠷ ᠴᠦ᠍ ᠰᠠᠷᠠᠭᠤᠯᠬᠠᠨ ᠂ ᠪᠦᠷ ᠴᠦ᠍ ᠭᠣᠶᠣᠬᠠᠨ !

        2         

     ᠵᠠᠳᠠᠭᠠᠢ ᠰᠢᠯᠦᠭ ᠪᠣᠯ ᠰᠢᠯᠦᠭ ᠪᠠ ᠨᠠᠢᠷᠠᠭᠤᠯᠤᠯ ᠦᠨ ᠬᠣᠭᠣᠷᠣᠨᠳᠣᠬᠢ ᠰᠢᠨ᠎ᠡ ᠬᠡᠯᠪᠡᠷᠢ  ᠲᠢᠭ ᠪᠣᠯᠤᠨ᠎ᠠ ᠂ ᠮᠣᠩᠭᠣᠯ ᠬᠡᠯᠡᠨ ᠳᠡᠭᠡᠷ᠎ᠡ ᠪᠠᠢᠲᠤᠭᠠᠢ ᠂ ᠳᠡᠯᠡᠬᠡᠢ ᠵᠢᠨ ᠪᠤᠰᠤᠳ ᠪᠣᠯᠪᠠᠰᠤᠨ ᠤᠯᠤᠰ ᠦᠨᠳᠦᠰᠦᠲᠡᠨ ᠦ᠌ ᠤᠷᠠᠨ ᠵᠣᠬᠢᠶᠠᠯ ᠤᠨ ᠬᠦᠷᠢᠶᠡᠯᠡᠩ ᠳᠤ ᠠᠪᠴᠤ ᠬᠡᠯᠡᠪᠡᠯ ᠲᠡᠷᠡ ᠨᠢ ᠮᠥᠨᠴᠦ ᠨᠢᠯᠬ᠎ᠠ ᠨᠠᠬᠢᠶ᠎ᠠ ᠰᠢᠨ᠎ᠡ ᠰᠣᠶᠣᠭ᠎ᠠ ᠲᠡᠳᠦᠢ ᠪᠣᠯᠬᠤ ᠶᠤᠮ ᠃ ᠥᠪᠥᠷ ᠮᠣᠩᠭᠣᠯ ᠳ᠋ᠤ᠌ ᠮᠣᠩᠭᠣᠯ ᠬᠡᠯᠡᠨ ᠳᠡᠭᠡᠷ᠎ᠡ ᠵᠢᠩᠬᠢᠨᠢ ᠵᠠᠳᠠᠭᠠᠢ ᠰᠢᠯᠦᠭ ᠢᠯᠡᠷᠡᠭᠰᠡᠨ ᠨᠢ 1958  ᠣᠨ ᠳ᠋ᠤ᠌ ᠪ · ᠪᠦᠷᠢᠨᠪᠡᠬᠢ ᠨᠥᠬᠥᠷ ᠡᠴᠡ ᠯᠡ ᠡᠬᠢᠯᠡᠭᠰᠡᠨ ᠪᠢᠯᠡ ᠂ ᠲᠡᠭᠦᠨ ᠡᠴᠡ ᠨᠠᠰᠢ ᠪᠠᠰᠠ ᠬᠣᠷᠢ ᠭᠠᠷᠤᠢ ᠵᠢᠯ ᠪᠣᠯᠵᠤ ᠪᠠᠢᠨ᠎ᠠ ᠃ 《 ᠰᠣᠶᠣᠯ ᠤᠨ ᠶᠡᠬᠡ ᠬᠤᠪᠢᠰᠬᠠᠯ 》 ᠠᠴᠠ ᠡᠮᠦᠨ᠎ᠡ ᠮᠣᠩᠭᠣᠯ ᠬᠡᠯᠡ ᠳᠡᠭᠡᠷ᠎ᠡ ᠵᠠᠳᠠᠭᠠᠢ ᠰᠢᠯᠦᠭ ᠪᠢᠴᠢᠳᠡᠭ ᠨᠢ ᠮᠠᠰᠢ ᠴᠥᠭᠡᠨ ᠬᠡᠳᠦᠬᠡᠨ ᠬᠥᠮᠦᠨ ᠮᠥᠷᠲᠡᠭᠡᠨ ᠲᠣᠭᠠᠨ ᠦ ᠲᠠᠯ᠎ᠠ ᠪᠠᠷ ᠴᠦ᠍ ᠲᠤᠩ ᠴᠥᠭᠡᠨ ᠪᠠᠢᠭᠰᠠᠨ ᠪᠣᠯᠬᠣᠷ ᠡᠨᠡᠬᠦ ᠤᠷᠠᠯᠢᠭ ᠤᠨ ᠤᠷᠤᠰᠬᠠᠯ ᠨᠢ  ᠲᠤᠬᠠᠢ ᠶ᠋ᠢᠨ ᠦᠶ᠎ᠡ ᠳ᠋ᠡᠭᠡᠨ ᠭᠣᠷᠣᠬ᠎ᠠ ᠲᠡᠳᠦᠢ ᠯᠡ ᠪᠠᠢᠵᠤ ᠂  ᠨᠡᠩ ᠶᠡᠬᠡ ᠳᠣᠯᠭᠢᠶᠠᠨ ᠳᠠᠪᠠᠯᠭᠠᠨ ᠢ᠋ ᠪᠣᠰᠬᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ  ᠶᠦ᠍ᠮ ᠃ ᠭᠡᠪᠡᠴᠦ ᠂ ᠨᠢᠭᠡᠨ ᠳᠤᠰᠤᠯ ᠤᠰᠤᠨ ᠢᠶᠠᠷ ᠨᠠᠷᠠᠨ ᠦ ᠲᠤᠶᠠᠭ᠎ᠠ ᠶ᠋ᠢ ᠰᠢᠨᠵᠢᠵᠦ ᠮᠡᠳᠡᠬᠦ  ᠰᠢᠭ ᠬᠡᠳᠦᠢᠪᠡᠷ ᠲᠣᠭᠠᠲᠠᠢ ᠬᠡᠳᠦᠬᠡᠨ ᠵᠠᠳᠠᠭᠠᠢ ᠰᠢᠯᠦᠭ ᠪᠣᠯᠪᠠᠴᠤ ᠥᠪᠥᠷ ᠮᠣᠩᠭᠣᠯ ᠤᠨ ᠤᠷᠠᠨ ᠵᠣᠬᠢᠶᠠᠯ ᠤᠨ ᠴᠡᠴᠡᠷᠯᠢᠭ ᠲᠦ᠍ ᠰᠢᠨ᠎ᠡ ᠰᠣᠷᠭᠣᠭ ᠠᠭᠤᠷ ᠠᠮᠢᠰᠬᠤᠯ ᠢ᠋ ᠠᠪᠴᠢᠷᠠᠵᠤ ᠂ ᠰᠢᠨ᠎ᠡ ᠦᠨᠦᠷ ᠠᠮᠲᠠ ᠶ᠋ᠢ ᠨᠡᠮᠡᠷᠢᠯᠡᠭᠰᠡᠨ ᠪᠣᠯᠬᠣᠷ ᠲᠡᠷᠡ ᠳᠠᠷᠤᠢ ᠳ᠋ᠠᠭᠠᠨ ᠤᠩᠰᠢᠭᠴᠢᠳ ᠤ᠋ᠨ ᠠᠩᠬᠠᠷᠤᠯ ᠢ᠋ ᠲᠠᠲᠠᠵᠤ ᠪᠠᠢᠪᠠ ᠃ 《 ᠳᠥᠷᠪᠡᠨ ᠬᠥᠮᠦᠨ ᠦ᠌ ᠪᠦᠯᠦᠭ 》 ᠢ᠋ ᠪᠤᠲᠠ ᠨᠢᠷᠭᠡᠭᠰᠡᠨ ᠡᠴᠡ ᠨᠡᠰᠢ ᠂ ᠢᠯᠠᠩᠭᠤᠶ᠎ᠠ ᠣᠷᠴᠢᠮ ᠤᠨ ᠬᠡᠳᠦᠨ ᠵᠢᠯ ᠵᠠᠳᠠᠭᠠᠢ  ᠰᠢᠯᠦᠭ ᠦ᠋ᠨ ᠬᠠᠯᠠᠭᠤᠨ ᠤᠷᠤᠰᠬᠠᠯ ᠦᠶ᠎ᠡ ᠦᠶ᠎ᠡ ᠰᠡᠪᠡᠯᠵᠡᠵᠦ ᠂  ᠡᠨᠡ ᠲᠡᠷᠡ ᠠᠢᠮᠠᠭ ᠬᠣᠲᠠ  ᠳ᠋ᠤ᠌ ᠡᠢᠮᠦ ᠲᠡᠢᠮᠦ ᠰᠣᠨᠢᠨ ᠰᠡᠳᠬᠦᠯ ᠳᠡᠭᠡᠷ᠎ᠡ ᠵᠠᠳᠠᠭᠠᠢ ᠰᠢᠯᠦᠭ ᠤᠨ ᠴᠡᠴᠡᠭ ᠭᠠᠵᠠᠷ ᠰᠠᠢ ᠦᠭᠡᠢ ᠳᠡᠯᠭᠡᠷᠡᠬᠦ ᠪᠣᠯᠵᠤ ᠂ ᠰᠢᠨ᠎ᠡ ᠠᠮᠢᠯᠠᠯ ᠢᠶᠡᠨ ᠣᠯᠵᠤ ᠰᠣᠷᠭᠣᠭ ᠦᠨᠦᠷ ᠢᠶᠡᠨ ᠠᠩᠬᠢᠯᠤᠭᠤᠯᠵᠤ ᠪᠠᠢᠨ᠎ᠠ ᠃ ᠣᠳᠣ ᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠲᠠᠯ᠎ᠠ ᠨᠤᠲᠤᠭ ᠳᠡᠭᠡᠷ᠎ᠡ ᠡᠨᠡᠬᠦ ᠰᠣᠷᠭᠣᠭ ᠴᠡᠴᠡᠭ ᠨᠢ ᠨᠠᠷᠠᠨ ᠤ᠋ ᠭᠡᠷᠡᠯ ᠬᠤᠷ᠎ᠠ ᠶ᠋ᠢᠨ ᠰᠢᠮ᠎ᠡ  ᠪᠡᠷ ᠮᠠᠰᠢ ᠣᠯᠠᠨ ᠂ ᠮᠠᠰᠢ ᠢᠳᠡᠷᠡᠭᠦᠨ ᠂ ᠮᠠᠰᠢ ᠰᠠᠢᠬᠠᠨ ᠳᠡᠯᠭᠡᠷᠡᠵᠦ ᠪᠠᠢᠨ᠎ᠠ ᠂ ᠲᠡᠭᠦᠨ ᠦ᠌ ᠦᠷ᠎ᠡ ᠵᠢᠮᠢᠰ ᠨᠢ ᠳᠠᠷᠤᠢ ᠡᠦᠲᠦ ᠮᠠᠨ ᠤ᠋ ᠰᠣᠨᠢᠷᠬᠠᠨ ᠤᠩᠰᠢᠵᠤ ᠪᠠᠢᠭ᠎ᠠ 《 ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠲᠡᠭᠦᠪᠦᠷᠢ 》 ᠪᠣᠯᠤᠨ᠎ᠠ ᠃ ᠲᠡᠢᠮᠦ ᠡᠴᠡ ᠂ ᠡᠨᠡᠬᠦ ᠲᠡᠭᠦᠪᠦᠷᠢ ᠶ᠋ᠢᠨ ᠬᠠᠮᠤᠭ ᠲᠦᠷᠦᠭᠦᠨ ᠦ᠌ ᠣᠨᠴᠠᠯᠢᠭ ᠪᠣᠯ ᠬᠡᠯᠪᠡᠷᠢ ᠲᠢᠭ ᠦ᠋ᠨ ᠰᠢᠨ᠎ᠡ ᠰᠣᠷᠭᠣᠭ ᠲᠤ᠌ ᠣᠷᠣᠰᠢᠨ᠎ᠠ ᠃    

      ᠵᠠᠳᠠᠭᠠᠢ ᠰᠢᠯᠦᠭ ᠪᠣᠯ ᠰᠢᠯᠦᠭ  ᠪᠠ ᠨᠠᠢᠷᠠᠭᠤᠯᠤᠯ ᠤ᠋ᠨ ᠬᠣᠭᠣᠷᠣᠨᠳᠣᠬᠢ ᠰᠢᠨ᠎ᠡ ᠬᠡᠯᠪᠡᠷᠢ  ᠲᠢᠭ  ᠪᠣᠯᠬᠣᠷ ᠰᠢᠯᠦᠭ ᠪᠠ ᠨᠠᠢᠷᠠᠭᠤᠯᠤᠯ ᠤ᠋ᠨ ᠠᠯᠢ ᠠᠯᠢᠨ ᠤ᠋ ᠳᠠᠪᠠᠭᠤᠯᠢᠭ ᠲᠠᠯ᠎ᠠ ᠶ᠋ᠢ ᠠᠭᠤᠰᠤᠭᠤᠯᠤᠨ ᠰᠢᠩᠭᠡᠭᠡᠭᠰᠡᠨ ᠪᠠᠢᠬᠤ ᠶᠣᠰᠣᠲᠠᠢ ᠃ ᠵᠠᠳᠠᠭᠠᠢ ᠰᠢᠯᠦᠭ ᠨᠢ ᠰᠢᠯᠦᠭ ᠦ᠋ᠨ ᠦᠨᠦᠷ ᠠᠮᠲᠠ ᠲᠠᠢ ᠮᠥᠷᠲᠡᠭᠡᠨ ᠨᠠᠢᠷᠠᠭᠤᠯᠤᠯ ᠤ᠋ᠨ ᠥᠩᠭᠡ ᠭᠢᠯᠪᠠᠭ᠎ᠠ ᠲᠠᠢ ᠂ ᠭᠡᠲᠡᠯ᠎ᠡ ᠰᠢᠯᠦᠭ ᠲᠡᠢ ᠡᠭᠡᠭᠡ ᠠᠳᠠᠯᠢ  ᠪᠢᠰᠢ ᠮᠥᠷᠲᠡᠭᠡᠨ ᠨᠠᠢᠷᠠᠭᠤᠯᠤᠯ ᠲᠠᠢ  ᠴᠤ᠌ ᠶᠠᠭ ᠠᠳᠠᠯᠢ  ᠪᠢᠰᠢ ᠂ ᠲᠡᠷᠡ ᠪᠣᠯ ᠰᠢᠯᠦᠭ ᠲᠡᠢ  ᠣᠢᠷᠠᠯᠴᠠᠭ᠎ᠠ ᠂ ᠨᠠᠢᠷᠠᠭᠤᠯᠤᠯ ᠲᠠᠢ ᠲᠥᠰᠲᠡᠢ ᠂ ᠰᠢᠯᠦᠭ ᠡᠴᠡ ᠢᠯᠡᠭᠦᠦ ᠴᠢᠯᠥᠭᠡᠲᠡᠢ ᠂ ᠰᠢᠯᠦᠭ ᠡᠴᠡ ᠣᠯᠠᠨ ᠪᠣᠯᠤᠮᠵᠢ ᠲᠠᠢ ᠂ ᠨᠠᠢᠷᠠᠭᠤᠯᠤᠯ ᠠ᠋ᠴᠠ ᠴᠢᠩᠭ᠎ᠠ ᠳᠦᠷᠢᠮᠵᠢᠯ ᠲᠡᠢ ᠂ ᠨᠠᠢᠷᠠᠭᠤᠯᠤᠯ ᠠ᠋ᠴᠠ  ᠨᠠᠷᠢᠯᠢᠭ ᠪᠦᠲᠦᠴᠡ ᠲᠡᠢ ᠃ ᠲᠡᠷᠡ ᠪᠣᠯ ᠰᠢᠯᠦᠭ ᠪᠠ ᠨᠠᠢᠷᠠᠭᠤᠯᠤᠯ ᠲᠠᠢ ᠴᠢᠰᠤᠨ ᠪᠠᠷᠢᠯᠳᠤᠯᠭ᠎ᠠ ᠲᠠᠢ ᠲᠤᠯᠠ ᠰᠢᠯᠦᠭ ᠦ᠋ᠨ ᠴᠢᠰᠤ ᠲᠡᠭᠦᠨ ᠦ᠌ ᠰᠤᠳᠠᠰᠤᠨ ᠳ᠋ᠤ᠌ ᠯᠤᠭᠰᠢᠵᠤ ᠪᠠᠢᠨ᠎ᠠ ᠂ ᠨᠠᠢᠷᠠᠭᠤᠯᠤᠯ ᠤ᠋ᠨ ᠴᠣᠭᠴᠠ ᠲᠡᠭᠦᠨ ᠦ᠌ ᠮᠠᠬᠠᠪᠣᠳ ᠳᠡᠭᠡᠷ᠎ᠡ ᠡᠷᠴᠢᠯᠡᠵᠦ ᠪᠠᠢᠨ᠎ᠠ ᠃   

      ᠰᠢᠯᠦᠭ ᠪᠣᠯ ᠬᠤᠷᠴᠠ ᠠᠪᠰᠠᠷᠬᠠᠨ ᠂ ᠪᠢᠯᠬᠠᠮ᠎ᠠ ᠰᠡᠳᠬᠢᠯᠭᠡ ᠲᠡᠢ ᠂ ᠠᠢᠵᠠᠮ ᠴᠣᠬᠢᠯᠭ᠎ᠠ ᠲᠠᠢ ᠂ ᠮᠥᠷ ᠪᠠᠳᠠᠭ ᠲᠠᠢ ᠢᠷᠠᠭᠤ ᠰᠠᠢᠬᠠᠨ ᠤᠷᠠᠯᠢᠭ ᠤ᠋ᠨ ᠪᠦᠲᠦᠭᠡᠯ ᠪᠣᠯᠬᠤ ᠪᠥᠭᠡᠳ ᠤᠷᠠᠨ ᠭᠣᠢᠳᠠ ᠰᠠᠨᠠᠭ᠎ᠠ ᠠᠬᠤᠢ ᠂ ᠲᠤᠩᠭᠠᠨ ᠲᠠᠯᠠᠰᠵᠢᠭᠤᠯᠤᠭᠰᠠᠨ ᠬᠡᠯᠡ ᠬᠡᠯᠡᠯᠭᠡ ᠂ ᠠᠯᠤᠰ ᠭᠦᠨ ᠳᠠᠯᠳᠠ ᠠᠬᠤᠭᠤᠯᠤᠮᠵᠢ ᠂ ᠠᠮᠲᠠᠷᠬᠠᠨ ᠰᠣᠷᠭᠣᠭ ᠳᠦᠷᠢ ᠳᠦᠷᠰᠦᠯᠡᠯ ᠲᠡᠢ ᠪᠠᠢᠬᠤ ᠶ᠋ᠢ ᠱᠠᠭᠠᠷᠳᠠᠨ᠎ᠠ ᠃ ᠡᠨᠡ ᠪᠦᠬᠦᠨ ᠳᠠᠪᠠᠭᠤᠯᠢᠭ ᠲᠠᠯ᠎ᠠ ᠶ᠋ᠢ ᠵᠠᠳᠠᠭᠠᠢ ᠰᠢᠯᠦᠭ  ᠴᠦ᠍ ᠠᠳᠠᠯᠢ ᠶᠣᠰᠣᠭᠠᠷ ᠬᠠᠳᠠᠭᠠᠯᠠᠵᠤ ᠪᠠᠢᠨ᠎ᠠ ᠂ ᠡᠨᠡ ᠲᠠᠯ᠎ᠠ ᠪᠠᠷ ᠢ᠋ᠶ᠋ᠠᠨ ᠵᠠᠳᠠᠭᠠᠢ ᠰᠢᠯᠦᠭ  ᠨᠢ ᠰᠢᠯᠦᠭ ᠲᠡᠢ ᠣᠢᠷᠠᠯᠴᠠᠭ᠎ᠠ  ᠠᠵᠠᠢ ᠃ ᠭᠡᠪᠡᠴᠦ ᠲᠡᠷᠡ ᠪᠣᠯ ᠢᠷᠠᠭᠤ ᠨᠠᠢᠷᠠᠭ ᠤ᠋ᠨ ᠲᠡᠷᠡᠬᠦ ᠲᠣᠭᠲᠠᠮᠠᠯ ᠮᠥᠷ ᠪᠠᠳᠠᠭ ᠂ ᠬᠣᠯᠪᠣᠭ᠎ᠠ ᠭᠢᠰᠬᠢᠴᠡ ᠂ ᠠᠢᠵᠠᠮ ᠴᠣᠬᠢᠯᠭ᠎ᠠ ᠂ ᠬᠡᠯᠪᠡᠷᠢ  ᠮᠠᠶᠢᠭ ᠲᠤ᠌ ᠪᠠᠷᠢᠭᠳᠠᠬᠤ ᠦᠭᠡᠢ ᠤᠴᠢᠷ ᠰᠢᠯᠦᠭ ᠡᠴᠡ ᠨᠡᠩ ᠢᠯᠡᠭᠦᠦ ᠥᠷᠭᠡᠨ ᠪᠣᠯᠤᠮᠵᠢ ᠲᠠᠢ ᠪᠠᠷ ᠠᠮᠢᠳᠤᠷᠠᠯ ᠢ᠋ ᠲᠤᠰᠬᠠᠨ ᠂  ᠰᠡᠳᠬᠢᠯᠭᠡ ᠪᠡᠨ ᠤᠶᠠᠩᠭᠠᠯᠠᠵᠤ ᠂ ᠰᠠᠨᠠᠭ᠎ᠠ ᠪᠠᠨ ᠳᠡᠯᠭᠡᠵᠦ ᠪᠣᠯᠬᠤ ᠶᠤᠮ ᠃ ᠡᠨᠡ ᠲᠠᠯ᠎ᠠ ᠪᠠᠷ ᠲᠡᠷᠡ ᠬᠠᠷᠢᠨ ᠨᠠᠢᠷᠠᠭᠤᠯᠤᠯ ᠲᠠᠢ ᠲᠥᠰᠲᠡᠢ ᠪᠠᠢᠨ᠎ᠠ ᠂ ᠭᠡᠲᠡᠯ᠎ᠡ ᠨᠠᠢᠷᠠᠭᠤᠯᠤᠯ ᠢ᠋ ᠪᠣᠳᠣᠪᠠᠯ ᠨᠡᠩ ᠨᠠᠷᠢᠯᠢᠭ ᠂ ᠨᠡᠩ ᠠᠪᠰᠠᠷᠬᠠᠨ ᠂ ᠨᠡᠩ ᠤᠷᠠᠨ ᠪᠠᠢᠬᠤ ᠶᠣᠰᠣᠲᠠᠢ ᠃ ᠲᠡᠢᠮᠦ ᠡᠴᠡ ᠵᠠᠳᠠᠭᠠᠢ ᠰᠢᠯᠦᠭ ᠨᠢ ᠬᠡᠳᠦᠢᠪᠡᠷ ᠣᠬᠣᠷ ᠠᠪᠰᠠᠷᠬᠠᠨ ᠤᠷᠠᠯᠢᠭ ᠤ᠋ᠨ ᠡᠳ᠋ ᠪᠣᠯᠬᠤ ᠪᠣᠯᠪᠠᠴᠤ ᠲᠡᠷᠡ ᠪᠣᠯ ᠰᠢᠷᠡᠭᠡᠨ ᠳᠡᠭᠡᠷ᠎ᠡ ᠲᠠᠯᠪᠢᠳᠠᠭ ᠦᠵᠡᠰᠬᠦᠯᠡᠩ ᠦ᠋ᠨ  ᠭᠠᠵᠠᠷ ᠰᠣᠨᠢᠷᠬᠠᠭᠤᠯᠳᠠᠭ ᠂ ᠳᠡᠯᠭᠡᠭᠦᠷ ᠳᠡᠭᠡᠷ᠎ᠡ ᠭᠠᠢᠬᠠᠭᠤᠯᠳᠠᠭ ᠦᠵᠡᠭᠡᠳ ᠬᠠᠨᠤᠳᠠᠭ ᠦᠭᠡᠢ ᠂ ᠪᠠᠬᠠᠷᠤᠭᠠᠳ  ᠮᠣᠬᠣᠳᠠᠭ ᠦᠭᠡᠢ ᠨᠠᠷᠢᠨ  ᠬᠢᠴᠡᠲᠦ ᠭᠠᠷ ᠤᠷᠠᠯᠠᠯ ᠤ᠋ᠨ ᠡᠳ᠋ ᠲᠡᠢ ᠠᠳᠠᠯᠢᠬᠠᠨ ᠵᠠᠪᠠᠯ ᠨᠠᠷᠢᠨ ᠰᠡᠢᠯᠵᠦ ᠨᠢᠭᠲᠠ ᠤᠷᠠᠯᠠᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ ᠂ ᠲᠡᠷᠡ ᠨᠢ ᠵᠠᠷᠢᠮ ᠳ᠋ᠠᠭᠠᠨ ᠭᠠᠭᠴᠠ ᠥᠭᠦᠯᠡᠪᠦᠷᠢ ᠂ ᠵᠠᠷᠢᠮ ᠳ᠋ᠠᠭᠠᠨ ᠬᠡᠳᠦᠬᠡᠨ ᠪᠠᠳᠠᠭ ᠂ ᠬᠡᠲᠦᠷᠡᠬᠦ ᠳ᠋ᠡᠭᠡᠨ ᠮᠢᠩᠭ᠎ᠠ ᠬᠦᠷᠬᠦ ᠦᠭᠡᠢ ᠦᠰᠦᠭ ᠯᠡ ᠲᠡᠳᠦᠢ ᠃ ᠭᠡᠪᠡᠴᠦ ᠲᠡᠭᠦᠨ ᠳ᠋ᠦ᠍ ᠰᠤᠷᠤᠭᠠᠳ ᠪᠠᠷᠠᠬᠤ ᠦᠭᠡᠢ ᠰᠢᠮ᠎ᠡ ᠪᠠᠢᠨ᠎ᠠ ᠂ ᠰᠢᠷᠳᠡᠭᠡᠳ ᠪᠠᠷᠠᠬᠤ ᠦᠭᠡᠢ ᠦᠵᠡᠮᠵᠢ ᠪᠠᠢᠨ᠎ᠠ ᠂ ᠱᠠᠭᠰᠢᠭᠠᠳ ᠪᠠᠷᠠᠬᠤ ᠦᠭᠡᠢ ᠤᠷᠠᠯᠢᠭ ᠪᠠᠢᠨ᠎ᠠ ᠂ ᠰᠡᠩᠭᠢᠨᠡᠭᠡᠳ ᠪᠠᠷᠠᠬᠤ ᠦᠭᠡᠢ ᠦᠨᠦᠷ ᠪᠠᠢᠨ᠎ᠠ᠂ ᠤᠩᠰᠢᠭᠠᠳ ᠰᠠᠭᠤᠬᠤᠶ᠎ᠠ ᠠᠮᠠᠨ ᠳ᠋ᠤ᠌ ᠤᠷᠤᠰᠤᠮ᠎ᠠ ᠰᠡᠳᠬᠢᠭᠡᠳ ᠰᠠᠭᠤᠬᠤᠶ᠎ᠠ ᠴᠡᠭᠡᠵᠢᠨ ᠳ᠋ᠦ᠍ ᠬᠣᠨᠣᠭᠰᠢᠮ᠎ᠠ ᠪᠠᠢᠳᠠᠭ᠃ ᠵᠠᠳᠠᠭᠠᠢ ᠰᠢᠯᠦᠭ ᠪᠣᠯ ᠬᠥᠮᠦᠰ ᠲᠦ᠍ ᠭᠠᠷᠳᠠᠭᠤᠯᠵᠤ ᠪᠠᠢᠭ᠎ᠠ ᠬᠡᠰᠡᠭ ᠬᠡᠰᠡᠭ ᠰᠢᠬᠡᠷ ᠪᠣᠯᠤᠨ᠎ᠠ ᠂ ᠲᠡᠷᠡ ᠪᠣᠯ ᠲᠡᠢᠮᠦ ᠴᠦ᠍ ᠵᠢᠵᠢᠭᠬᠡᠨ ᠂ ᠲᠡᠢᠮᠦ ᠴᠦ᠍ ᠠᠮᠲᠠᠲᠠᠢ ᠂ ᠬᠡᠮᠡᠯᠢᠬᠦ ᠲᠤᠲᠤᠮ ᠰᠢᠯᠦᠰᠦ ᠶ᠋ᠢ ᠭᠣᠭᠣᠵᠢᠭᠤᠯᠵᠤ ᠂ ᠢᠳᠡᠬᠦ ᠲᠤᠲᠤᠮ ᠬᠣᠳᠣᠭᠣᠳᠣ ᠶ᠋ᠢ ᠪᠠᠶᠠᠰᠬᠠᠨ᠎ᠠ ᠃   

        3 

      ᠲᠤᠰ ᠲᠡᠭᠦᠪᠦᠷᠢ ᠳ᠋ᠦ᠍ ᠣᠷᠣᠭᠰᠠᠨ ᠵᠠᠳᠠᠭᠠᠢ ᠰᠢᠯᠦᠭ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠴᠥᠮ ᠠᠴᠢᠲᠤ ᠨᠠᠮ ᠂ ᠠᠭᠤᠤ ᠶᠡᠬᠡ ᠡᠬᠡ ᠤᠯᠤᠰ ᠂ ᠡᠬᠡ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠬᠥᠭᠵᠢᠯ ᠬᠤᠪᠢᠷᠠᠯ ᠂ ᠨᠡᠢᠭᠡᠮ ᠵᠢᠷᠤᠮᠲᠤ ᠳᠥᠷᠪᠡᠨ ᠣᠳᠣᠬᠢᠴᠢᠯᠠᠯᠲᠠ ᠶ᠋ᠢ ᠪᠡᠶᠡᠯᠡᠭᠦᠯᠬᠦᠢ ᠶ᠋ᠢᠨ ᠲᠥᠯᠥᠭᠡᠨ᠎ᠡ ᠣᠶᠤᠨ ᠲᠠᠷᠢᠬᠢ ᠪᠠᠨ ᠰᠢᠪᠬᠠᠵᠤ ᠂ ᠬᠦᠴᠦ ᠬᠥᠯᠥᠰᠥ ᠪᠡᠨ ᠤᠷᠤᠰᠬᠠᠵᠤ ᠪᠠᠢᠭ᠎ᠠ ᠡᠯ᠎ᠡ ᠹᠷᠣᠨᠲ ᠤ᠋ᠨ ᠪᠠᠭᠠᠲᠤᠷᠯᠢᠭ ᠠᠷᠠᠳ ᠲᠦᠮᠡᠨ ᠪᠠ ᠦᠨᠳᠦᠰᠦᠲᠡᠨ ᠨᠦ᠍ᠭᠦᠳ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠬᠡᠨ ᠨᠢ ᠬᠡᠨ ᠡᠴᠡ ᠪᠡᠨ ᠰᠠᠯᠵᠤ ᠴᠢᠳᠠᠳᠠᠭ ᠦᠭᠡᠢ ᠴᠢᠰᠤ ᠮᠢᠬᠠᠨ ᠤ᠋ ᠨᠢᠭᠲᠠ ᠪᠠᠷᠢᠯᠳᠤᠯᠭ᠎ᠠ ᠂ ᠴᠢᠩ ᠦᠨᠡᠨ ᠨᠥ᠋ᠬᠥᠷᠰᠡᠭ ᠪᠦᠯᠬᠦᠮᠳᠡᠯ ᠢ᠋ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠵᠦ ᠴᠢᠬᠢᠨ ᠳ᠋ᠦ᠍ ᠲᠤᠭᠤᠯᠳᠠᠲᠠᠯ᠎ᠠ ᠳᠦᠷᠰᠦᠯᠡᠨ ᠲᠤᠰᠬᠠᠵᠤ ᠂ ᠬᠡᠬᠦᠳᠡᠭ ᠳᠦᠭᠦᠷᠡᠩ ᠬᠠᠯᠠᠭᠤᠨ ᠰᠡᠳᠬᠢᠯᠭᠡ ᠪᠡᠷ ᠨᠤᠲᠠᠯᠠᠨ ᠦᠨᠡᠯᠡᠵᠦ ᠮᠠᠭᠲᠠᠨ ᠳᠠᠭᠤᠯᠠᠭᠰᠠᠨ ᠪᠠᠢᠨ᠎ᠠ ᠃ ᠠᠳᠠ ᠲᠤᠰᠬᠠᠭᠰᠠᠨ ᠠᠮᠢᠳᠤᠷᠠᠯ ᠤ᠋ᠨ ᠵᠢᠷᠤᠭ ᠠ᠋ᠴᠠ ᠨᠠᠮ ᠤ᠋ᠨ ᠤᠳᠤᠷᠢᠳᠤᠯᠭ᠎ᠠ ᠳᠣᠣᠷᠠᠬᠢ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠲᠠᠯ᠎ᠠ ᠨᠤᠲᠤᠭ ᠨᠢ ᠨᠡᠢᠭᠡᠮ ᠵᠢᠷᠤᠮ ᠤ᠋ᠨ ᠵᠠᠮ ᠢ᠋ᠶ᠋ᠠᠷ ᠦᠳᠲᠡᠷ ᠲᠦᠷᠭᠡᠨ ᠤᠷᠤᠭᠰᠢᠯᠠᠨ ᠥᠭᠡᠳᠡᠯᠡᠵᠦ ᠪᠠᠢᠭ᠎ᠠ ᠴᠠᠭ ᠡᠷᠡᠨ ᠦ᠌ ᠰᠦᠷ ᠵᠢᠪᠬᠤᠭ᠎ᠠ ᠂ ᠲᠡᠦᠬᠡᠨ ᠠᠬᠢᠴᠠ ᠶ᠋ᠢᠨ ᠠᠯᠬᠤᠭ᠎ᠠ ᠭᠢᠰᠬᠢᠴᠡ ᠶ᠋ᠢ ᠦᠵᠡᠵᠦ ᠭᠠᠷᠤᠨ᠎ᠠ ᠃ ᠡᠳᠡᠭᠡᠷ ᠲᠡᠦᠬᠡᠨ ᠤᠯᠠ ᠮᠥᠷ ᠢ᠋ ᠵᠣᠬᠢᠶᠠᠭᠴᠢᠳ ᠴᠥᠮ ᠪᠠᠬᠠᠷᠬᠠᠭᠰᠠᠨ ᠬᠠᠷᠠᠴᠠ  ᠪᠠᠷ᠂ ᠣᠮᠣᠭᠰᠢᠭᠰᠠᠨ ᠰᠡᠳᠬᠢᠯᠭᠡ ᠪᠡᠷ ᠲᠤᠰᠬᠠᠨ ᠬᠠᠷᠠᠭᠤᠯᠤᠭᠰᠠᠨ ᠠ᠋ᠴᠠ ᠦᠵᠡᠪᠡᠯ ᠵᠣᠬᠢᠶᠠᠭᠴᠢᠳ ᠤ᠋ᠨ ᠦᠵᠡᠯ ᠰᠡᠳᠬᠢᠯᠭᠡ ᠨᠢ ᠠᠷᠠᠳ ᠲᠦᠮᠡᠨ ᠦ᠌ ᠦᠵᠡᠯ ᠰᠡᠳᠬᠢᠯᠭᠡ ᠲᠡᠢ ᠠᠭᠤᠰᠴᠤ ᠂ ᠲᠡᠳᠡᠨ ᠦ᠌ ᠵᠢᠷᠦᠬᠡᠨ ᠦ᠌ ᠴᠣᠬᠢᠯᠭ᠎ᠠ ᠰᠤᠳᠠᠰᠤᠨ ᠤ᠋ ᠯᠤᠭᠰᠢᠯᠲᠠ ᠨᠢ ᠴᠠᠭ ᠦᠶ᠎ᠡ ᠶ᠋ᠢᠨ ᠠᠯᠬᠤᠴᠠ ᠠᠬᠢᠯᠲᠠ ᠲᠠᠢ ᠨᠡᠢᠴᠡᠵᠦ ᠪᠠᠢᠨ᠎ᠠ ᠭᠡᠰᠡᠨ ᠢ᠋ ᠬᠠᠷᠠᠭᠤᠯᠵᠤ ᠪᠠᠢᠨ᠎ᠠ ᠃ ᠵᠠᠷᠢᠮ ᠨᠢᠭᠡᠨ ᠬᠡᠮᠵᠢᠶᠡᠨ ᠡᠴᠡ ᠠᠪᠴᠤ ᠦᠵᠡᠪᠡᠯ ᠂ ᠡᠳᠡᠭᠡᠷ ᠵᠣᠬᠢᠶᠠᠯ ᠪᠣᠯ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠡᠪ ᠬᠠᠮᠲᠤ ᠨᠠᠮ ᠤ᠋ᠨ ᠤᠳᠤᠷᠢᠳᠤᠯᠭ᠎ᠠ ᠳᠣᠣᠷᠠᠬᠢ ᠠᠷᠤ ᠬᠢᠵᠠᠭᠠᠷ ᠣᠷᠣᠨ ᠤ᠋ ᠲᠡᠦᠬᠡᠨ ᠤᠷᠤᠭᠰᠢᠯᠠᠯᠲᠠ ᠶ᠋ᠢᠨ ᠣᠷᠣ ᠮᠥᠷ ᠢ᠋ ᠤᠷᠠᠯᠢᠭ ᠢ᠋ᠶ᠋ᠠᠷ ᠳᠤᠰᠬᠠᠨ ᠳᠦᠷᠰᠦᠯᠡᠵᠦ ᠂ ᠠᠷᠠᠳ ᠲᠦᠮᠡᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠳᠦᠷᠰᠦᠯᠢᠭ ᠵᠢᠷᠤᠭ ᠂ ᠴᠠᠭ ᠦᠶ᠎ᠡ ᠶ᠋ᠢᠨ ᠤᠷᠤᠭᠰᠢᠯᠠᠯᠲᠠ ᠶ᠋ᠢᠨ ᠬᠠᠩᠭᠢᠨᠠᠭᠤᠨ ᠴᠤᠤᠷᠢᠶ᠎ᠠ ᠪᠣᠯᠤᠨ᠎ᠠ ᠃  

       ᠲᠤᠰ ᠲᠡᠭᠦᠪᠦᠷᠢ ᠶ᠋ᠢᠨ ᠵᠣᠬᠢᠶᠠᠭᠴᠢᠳ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠴᠥᠮ ᠵᠠᠳᠠᠭᠠᠢ ᠰᠢᠯᠦᠭ ᠪᠢᠴᠢᠬᠦ ᠶ᠋ᠢᠨ ᠨᠢᠭᠤᠴᠠ ᠤᠪᠠᠳᠢᠰ ᠢ᠋ ᠳᠠᠳᠮᠠᠭᠠᠢ ᠡᠵᠡᠮᠰᠢᠵᠦ ᠂ ᠮᠣᠩᠭᠣᠯ ᠬᠡᠯᠡ ᠳᠡᠭᠡᠷ᠎ᠡ ᠵᠠᠳᠠᠭᠠᠢ ᠰᠢᠯᠦᠭ ᠪᠢᠴᠢᠬᠦ ᠲᠤᠬᠠᠢ ᠣᠯᠠᠨ ᠲᠠᠯ᠎ᠠ ᠪᠠᠷ ᠠᠮᠵᠢᠯᠲᠠ ᠲᠠᠢ ᠲᠤᠷᠰᠢᠯᠲᠠ ᠬᠢᠵᠦ ᠂ ᠮᠣᠩᠭᠣᠯ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠥᠨᠢᠷ ᠴᠡᠴᠡᠭ ᠢ᠋ ᠲᠠᠯ᠎ᠠ ᠳᠦᠭᠦᠷᠡᠩ ᠪᠠᠳᠠᠷᠠᠭᠤᠯᠤᠨ ᠳᠡᠯᠭᠡᠷᠡᠭᠦᠯᠵᠡᠢ ᠃ ᠡᠳᠡᠭᠡᠷ ᠵᠠᠳᠠᠭᠠᠢ ᠰᠢᠯᠦᠭ ᠠᠬᠤᠢ ᠠᠮᠢᠳᠤᠷᠠᠯ ᠢ᠋ ᠲᠤᠰᠬᠠᠭᠰᠠᠨ ᠨᠢ ᠠᠮᠢᠳᠤ ᠰᠡᠷᠭᠦᠯᠡᠩ ᠂ ᠪᠠᠢᠭᠠᠯᠢ ᠦᠵᠡᠮᠵᠢ ᠶ᠋ᠢ ᠳᠦᠷᠰᠦᠯᠡᠭᠰᠡᠨ ᠨᠢ ᠳᠡᠭᠵᠢᠨ ᠴᠣᠪᠣᠭᠣᠯᠢᠭ ᠂ ᠬᠠᠢᠷ᠎ᠠ ᠰᠡᠳᠬᠢᠯᠭᠡ ᠪᠡᠨ ᠤᠶᠠᠩᠭᠠᠯᠠᠭᠰᠠᠨ ᠨᠢ ᠪᠢᠯᠬᠠᠮ᠎ᠠ ᠴᠠᠯᠭᠢᠮ᠎ᠠ ᠂ ᠰᠠᠨᠠᠭ᠎ᠠ ᠠᠬᠤᠢ ᠶ᠋ᠢ ᠪᠦᠲᠦᠭᠡᠭᠰᠡᠨ ᠨᠢ ᠤᠷᠠᠨ ᠭᠣᠢᠳᠠ ᠂ ᠪᠦᠲᠦᠴᠡ ᠵᠣᠬᠢᠶᠠᠮᠵᠢ ᠨᠢ ᠵᠢᠭᠳᠡ ᠮᠥᠷᠲᠡᠭᠡᠨ ᠠᠪᠰᠠᠷᠬᠠᠨ ᠂ ᠬᠡᠯᠡ ᠬᠡᠯᠡᠯᠭᠡ ᠨᠢ ᠪᠠᠶᠠᠯᠢᠭ ᠮᠥᠷᠲᠡᠭᠡᠨ ᠢᠷᠠᠭᠤ ᠂ ᠳᠦᠷᠢ ᠳᠦᠷᠰᠦᠯᠡᠯ ᠨᠢ ᠠᠮᠢᠳᠤᠯᠢᠭ ᠮᠥᠷᠲᠡᠭᠡᠨ ᠰᠠᠢᠬᠠᠨ᠂ ᠥᠩᠭᠡ ᠪᠣᠳᠣᠭ ᠨᠢ ᠬᠤᠷᠴᠠ ᠮᠥᠷᠲᠡᠭᠡᠨ ᠭᠣᠶᠣ ᠂ ᠦᠨᠦᠷ ᠠᠮᠲᠠ ᠨᠢ ᠠᠩᠬᠢᠯᠤᠭᠤᠨ ᠮᠥᠷᠲᠡᠭᠡᠨ ᠰᠢᠮᠡᠲᠡᠢ ᠂ ᠬᠥᠭ ᠠᠶᠠᠰ ᠨᠢ ᠬᠠᠩᠭᠢᠨᠠᠭᠤᠨ ᠮᠥᠷᠲᠡᠭᠡᠨ ᠤᠶᠠᠩᠭᠠᠲᠠᠢ ᠂ ᠬᠡ ᠨᠠᠮᠪᠠ ᠨᠢ ᠪᠠᠶᠠᠯᠢᠭ ᠮᠥᠷᠲᠡᠭᠡᠨ ᠲᠠᠭᠠᠲᠠᠢ ᠡᠳᠡᠭᠡᠷ ᠵᠠᠳᠠᠭᠠᠢ ᠰᠢᠯᠦᠭ ᠢ᠋ ᠤᠩᠰᠢᠬᠤ ᠳ᠋ᠤ᠌ ᠵᠠᠷᠢᠮ ᠨᠢ ᠰᠢᠬᠢᠷ ᠬᠡᠮᠡᠯᠢᠭᠰᠡᠨ ᠰᠢᠭ ᠨᠢᠭᠡ ᠯᠡ ᠠᠮᠲᠠᠷᠬᠠᠨ ᠂ ᠵᠠᠷᠢᠮ ᠨᠢ ᠵᠢᠮᠢᠰ ᠵᠠᠭᠤᠭᠰᠠᠨ ᠰᠢᠭ᠋ ᠨᠢᠭᠡ ᠯᠡ ᠰᠡᠩᠭᠢᠨᠡᠭᠦᠨ ᠂  ᠵᠠᠷᠢᠮ ᠰᠠᠷᠬᠤᠳ ᠪᠠᠯᠭᠤᠭᠰᠠᠨ ᠰᠢᠭ᠋ ᠨᠢᠭᠡ ᠯᠡ ᠲᠠᠭᠠᠲᠠᠢ ᠂ ᠵᠠᠷᠢᠮ ᠨᠢ ᠮᠢᠬ᠎ᠠ ᠢᠳᠡᠭᠰᠡᠨ ᠰᠢᠭ ᠨᠢᠭᠡ ᠯᠡ ᠮᠠᠩᠰᠢᠭᠤᠨ ᠡᠳᠡᠭᠡᠷ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠬᠡᠪ ᠨᠠᠮᠪᠠ ᠣᠯᠠᠨ ᠶᠠᠩᠵᠤᠲᠠᠢ ᠂ ᠬᠡᠯᠪᠡᠷᠢ ᠳᠦᠷᠰᠦ ᠠᠷᠪᠢᠨ  ᠪᠠᠢᠳᠠᠯ ᠲᠠᠢ ᠂ ᠵᠠᠷᠢᠮ ᠨᠢ ᠥᠷᠨᠢᠭᠦᠨ ᠰᠦᠷᠯᠢᠭ ᠂ ᠵᠠᠷᠢᠮ ᠨᠢ ᠡᠶᠡᠪᠡᠷᠭᠦᠦ ᠵᠥᠭᠡᠯᠡᠨ ᠵᠠᠷᠢᠮ ᠨᠢ ᠠᠤᠭ᠎ᠠ ᠶᠡᠬᠡᠮᠰᠦᠭ ᠂ ᠵᠠᠷᠢᠮ ᠨᠢ ᠨᠠᠷᠢᠨ ᠴᠢᠩᠳᠠ ᠵᠠᠷᠢᠮ ᠨᠢ ᠠᠷᠤᠤᠬᠠᠨ ᠲᠤᠩᠭᠠᠯᠠᠭ ᠂ ᠵᠠᠷᠢᠮ ᠨᠢ ᠤᠷᠠᠨ ᠭᠣᠢᠳᠠ ᠵᠠᠷᠢᠮ ᠨᠢ ᠴᠣᠪᠣᠭᠣ ᠳᠡᠭᠵᠢᠨ ᠂ ᠵᠠᠷᠢᠮ ᠨᠢ ᠲᠥᠪᠯᠡᠭᠦᠨ ᠴᠢᠩᠭ᠎ᠠ ︔ᠵᠠᠷᠢᠮ ᠨᠢ ᠠᠯᠤᠰ ᠭᠦᠨ ᠂ ᠵᠠᠷᠢᠮ ᠨᠢ ᠣᠢᠷ᠎ᠠ ᠳᠣᠲᠣᠨᠣ ᠂ ᠲᠡᠭᠦᠨ ᠢ᠋ ᠤᠩᠰᠢᠨ ᠰᠠᠭᠤᠬᠤ ᠳ᠋ᠤ᠌  ᠴᠢᠮᠠᠭᠢ ᠡᠷᠬᠡ ᠦᠭᠡᠢ  ᠳᠠᠭᠤᠤ ᠶ᠋ᠢᠨ ᠶᠢᠷᠲᠢᠨᠴᠦ ᠬᠥᠭᠵᠢᠮ ᠵᠢᠨ ᠲᠢᠩᠬᠢᠮ ᠳ᠋ᠦ᠍ ᠤᠷᠢᠨ ᠣᠷᠣᠭᠤᠯᠵᠤ ᠂ ᠵᠢᠷᠤᠭ ᠤ᠋ᠨ ᠦᠵᠡᠰᠬᠦᠯᠡᠩ ᠤᠷᠠᠯᠢᠭ ᠤ᠋ᠨ ᠣᠷᠳᠣᠨ ᠳ᠋ᠤ᠌ ᠬᠥᠲᠥᠯᠦᠨ ᠳᠠᠭᠠᠭᠤᠯᠳᠠᠭ ᠃  

       ᠡᠳᠡᠭᠡᠷ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠣᠯᠠᠩᠬᠢ ᠨᠢ ᠦᠵᠡᠬᠦᠶ᠎ᠡ ᠥᠩᠭᠡ ᠲᠡᠢ ᠂ ᠨᠢᠰᠠᠯᠬᠤᠶ᠎ᠠ ᠳᠠᠭᠤᠨ ᠲᠠᠢ ᠂ ᠤᠩᠰᠢᠬᠤᠶ᠎ᠠ ᠠᠶᠠᠰ ᠲᠠᠢ ᠭᠢᠩᠰᠢᠬᠦᠶ᠎ᠡ ᠬᠥᠭ ᠲᠡᠢ ᠪᠣᠯᠵᠤ ᠴᠢᠳᠠᠭᠰᠠᠨ ᠪᠠᠢᠨ᠎ᠠ ᠃  ᠴᠠᠭ ᠦᠶ᠎ᠡ ᠶ᠋ᠢᠨ ᠰᠦᠷ ᠵᠢᠪᠬᠤᠭ᠎ᠠ ᠂ ᠠᠷᠤ ᠬᠢᠵᠠᠭᠠᠷ ᠤ᠋ᠨ ᠥᠩᠭᠡ ᠦᠵᠡᠮᠵᠢ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠣᠨᠴᠠᠯᠢᠭ ᠰᠢᠨᠵᠢ ᠂   ᠰᠦ ᠰᠠᠷᠬᠤᠳ ᠤ᠋ᠨ ᠦᠨᠦᠷ ᠠᠮᠲᠠ ᠡᠳᠡᠭᠡᠷ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠠᠭ ᠦᠶ᠎ᠡ ᠶ᠋ᠢᠨ ᠴᠤᠤᠷᠢᠶ᠎ᠠ ᠶ᠋ᠢ ᠬᠦᠩᠭᠢᠨᠡᠲᠡᠯ᠎ᠡ ᠲᠠᠲᠠᠵᠤ ᠂ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠣᠨᠴᠠᠯᠢᠭ ᠢ᠋ ᠳᠤᠷᠠᠢᠲᠠᠯ᠎ᠠ ᠵᠢᠷᠤᠭᠯᠠᠪᠠ ᠃ 

     ᠲᠤᠰ ᠲᠡᠭᠦᠪᠦᠷᠢ ᠳ᠋ᠦ᠍ ᠠᠷᠪᠠ ᠶᠢᠰᠦᠨ ᠵᠣᠬᠢᠶᠠᠭᠴᠢ ᠶ᠋ᠢᠨ ᠨᠠᠷᠢᠨ ᠤᠷᠠᠯᠠᠵᠤ ᠨᠢᠮᠪᠠᠢ ᠪᠦᠲᠦᠭᠡᠭᠰᠡᠨ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠳ ᠢ᠋ ᠬᠤᠷᠢᠶᠠᠮᠵᠢᠯᠠᠪᠠ᠃ ᠡᠨᠡᠬᠦ ᠵᠣᠬᠢᠶᠠᠭᠴᠢ ᠶ᠋ᠢᠨ ᠡᠩᠨᠡᠭᠡ ᠪᠣᠯ ᠬᠥᠮᠦᠨ ᠦ᠌ ᠲᠣᠭ᠎ᠠ ᠪᠠᠷ ᠣᠯᠠᠨ ᠂ ᠤᠷᠠᠨ ᠮᠡᠷᠭᠡᠰᠢᠯ ᠢ᠋ᠶ᠋ᠡᠷ ᠥᠨᠳᠥᠷ ᠂ ᠠᠮᠵᠢᠯᠲᠠ ᠪᠦᠲᠦᠮᠵᠢ ᠪᠡᠷ ᠶᠡᠬᠡ ᠠᠷᠭ᠎ᠠ ᠲᠤᠷᠰᠢᠯᠭ᠎ᠠ ᠪᠠᠷ ᠪᠠᠶᠠᠯᠢᠭ ᠂ ᠠᠬᠠᠮᠠᠳ ᠢᠳᠡᠷ ᠵᠠᠯᠠᠭᠤ ᠭᠤᠷᠪᠠᠨ ᠦᠶ᠎ᠡ ᠪᠡᠷ ᠪᠦᠷᠢᠯᠳᠦᠭᠰᠡᠨ ᠬᠦᠴᠦ ᠶᠡᠬᠡᠲᠡᠢ ᠂ ᠬᠦᠰᠡᠯ ᠶᠡᠬᠡᠲᠡᠢ ᠡᠩᠨᠡᠭᠡ ᠪᠣᠯᠤᠨ᠎ᠠ ᠃ ᠲᠡᠳᠡ ᠤᠷᠠᠨ  ᠰᠠᠨᠠᠭᠠᠨ ᠤ᠋ ᠳᠠᠯᠠᠪᠴᠢ ᠪᠠᠨ ᠰᠡᠵᠢᠯᠬᠢᠯᠡᠵᠦ ᠂ ᠬᠣᠯᠪᠣᠨ ᠪᠣᠳᠣᠬᠤ ᠰᠢᠵᠢᠮ ᠢ᠋ᠶ᠋ᠡᠨ ᠭᠣᠷᠤᠯᠵᠭᠤᠯᠵᠤ ᠂ ᠦᠭᠡᠰ ᠦ᠋ᠨ ᠰᠠᠩ ᠤ᠋ᠨ ᠬᠥᠮᠥᠷᠭᠡ ᠪᠡᠨ ᠠᠭᠤᠳᠠᠯᠠᠵᠤ ᠂ ᠤᠶᠠᠩᠭ᠎ᠠ ᠰᠡᠳᠬᠢᠯᠭᠡ ᠶ᠋ᠢᠨ ᠦᠶᠡᠷ ᠢ᠋ᠶ᠋ᠡᠨ ᠴᠠᠯᠭᠢᠭᠤᠯᠵᠤ ᠂ ᠠᠳᠠᠯᠢᠳᠬᠠᠯ ᠦᠯᠢᠳᠬᠡᠯ ᠠᠯᠢ ᠣᠯᠠᠨ ᠠᠷᠭ᠎ᠠ ᠠᠪᠴᠢᠯ ᠢ᠋ ᠬᠡᠷᠡᠭᠯᠡᠨ ᠂ ᠪᠡᠯᠭᠡᠳᠡᠯ ᠶᠡᠬᠡᠰᠬᠡᠯ ᠪᠦᠬᠦᠢ ᠠᠷᠪᠢᠨ ᠳᠠᠮ ᠰᠠᠮᠪᠠᠭ᠎ᠠ ᠶ᠋ᠢ ᠠᠰᠢᠭᠯᠠᠨ ᠪᠠᠢᠵᠤ᠂  ᠤᠩᠰᠢᠭᠴᠢᠳ ᠤ᠋ᠨ ᠡᠮᠦᠨ᠎ᠡ ᠤᠷᠭᠤᠮ᠎ᠠ ᠳᠦᠷᠢ ᠶ᠋ᠢ ᠪᠤᠰᠬᠠᠵᠤ ᠂ ᠰᠣᠨᠢᠷᠬᠠᠭᠴᠢᠳ ᠤ᠋ᠨ ᠰᠠᠨᠠᠭᠠᠨ ᠳ᠋ᠤ᠌  ᠰᠠᠢᠬᠠᠨ ᠵᠢᠷᠤᠭ ᠢ ᠡᠯᠭᠦᠪᠡ᠃ ᠡᠳᠡᠭᠡᠷ ᠵᠣᠬᠢᠶᠠᠯ ᠢ᠋ ᠰᠢᠮᠡᠭᠡᠳ ᠪᠠᠢᠪᠠᠯ ᠰᠢᠬᠢᠷ ᠵᠢᠮᠢᠰ ᠦ᠋ᠨ ᠠᠮᠲᠠ ᠭᠠᠷᠤᠨ᠎ᠠ᠃ ᠡᠨᠡ ᠡᠩᠨᠡᠭᠡᠨ ᠦ᠌ ᠣᠯᠠᠩᠬᠢ ᠨᠢ ᠰᠢᠯᠦᠭᠴᠢᠳ ᠶᠦ᠍ᠮ ᠂ ᠲᠡᠳᠡ ᠠᠮᠢᠳᠤᠷᠠᠯ ᠢ ᠰᠢᠨᠵᠢᠬᠦ ᠳ᠋ᠡᠭᠡᠨ ᠰᠢᠯᠦᠭᠴᠢᠨ ᠬᠥᠮᠦᠨ ᠦ᠌ ᠪᠢᠯᠢᠭᠲᠦ ᠨᠢᠳᠦ ᠪᠡᠷ ᠂ ᠲᠡᠳᠡ ᠳᠦᠷᠢ ᠳᠦᠷᠰᠦᠯᠡᠯ ᠢ᠋ ᠵᠢᠷᠤᠭᠯᠠᠬᠤ ᠳ᠋ᠠᠭᠠᠨ ᠵᠢᠷᠤᠭᠴᠢᠨ ᠬᠥᠮᠦᠨ ᠦ᠌ ᠤᠷᠠᠨ ᠠᠪᠢᠶᠠᠰ ᠢ᠋ᠶ᠋ᠠᠷ ᠂ ᠲᠡᠳᠡ ᠤᠶᠠᠩᠭ᠎ᠠ ᠰᠡᠳᠬᠢᠯᠭᠡ ᠪᠡᠨ ᠲᠠᠪᠠᠷᠠᠭᠤᠯᠬᠤ ᠳ᠋ᠠᠭᠠᠨ ᠲᠣᠭᠯᠠᠭᠴᠢ ᠬᠥᠮᠦᠨ ᠦ᠌ ᠪᠠᠶᠠᠯᠢᠭ ᠰᠠᠷᠠᠯ ᠢ᠋ᠶ᠋ᠠᠷ ᠂ ᠲᠡᠳᠡ ᠦᠭᠡ ᠬᠡᠯᠡᠯᠭᠡ ᠶ᠋ᠢ ᠬᠡᠷᠡᠭᠯᠡᠬᠦ ᠳ᠋ᠡᠭᠡᠨ ᠳᠠᠷᠬᠠᠳ ᠬᠥᠮᠦᠨ ᠦ᠌ ᠳᠠᠳᠮᠠᠭᠠᠢ ᠪᠣᠯᠪᠠᠰᠤᠷᠠᠯ ᠢ᠋ᠶ᠋ᠠᠷ ᠬᠡᠷᠡᠭᠯᠡᠵᠦ ᠴᠢᠳᠠᠬᠤ ᠪᠣᠯᠬᠣᠷ ᠡᠳᠡᠭᠡᠷ ᠵᠣᠬᠢᠶᠠᠯ ᠤ᠋ᠨ ᠣᠯᠠᠩᠬᠢ ᠨᠢ ᠬᠦᠨᠳᠦ ᠶ᠋ᠢᠨ ᠵᠢᠩ ᠲᠡᠢ ᠂ ᠬᠦᠩᠭᠢᠨᠡᠮ᠎ᠡ ᠠᠶᠠᠰ ᠲᠠᠢ ᠂ ᠬᠥᠮᠦᠵᠢᠯ ᠦ᠋ᠨ ᠠᠭᠤᠯᠭ᠎ᠠ ᠲᠠᠢ ᠂ ᠬᠦᠷᠲᠡᠮᠵᠢ ᠶ᠋ᠢᠨ ᠤᠷᠠᠯᠢᠭ ᠲᠠᠢ ᠵᠣᠬᠢᠶᠠᠯ ᠪᠣᠯᠵᠤ ᠴᠢᠳᠠᠭᠰᠠᠨ ᠶᠤᠮ ᠃ 

        4   

     ᠪᠢᠷ ᠦ᠋ᠨ ᠦᠵᠦᠭᠦᠷ ᠲᠦ᠋ᠨᠢ ᠰᠢᠳᠢ ᠣᠷᠣᠰᠢᠵᠤ ᠂ ᠪᠢᠯᠢᠭ ᠦ᠋ᠨ ᠣᠢ ᠳ᠋ᠤᠨᠢ ᠴᠡᠴᠡᠭ ᠳᠡᠯᠭᠡᠷᠡᠭᠰᠡᠨ ᠬᠥᠮᠦᠨ ᠬᠠᠰᠢ ᠯᠠ  ᠠᠰᠲᠠᠭᠠᠨ ᠂ ᠤᠩᠰᠢᠨ ᠤᠩᠰᠢᠨ ᠪᠠᠢᠵᠤ᠂ ᠠᠳᠠᠯᠢᠳᠬᠠᠨ ᠠᠳᠠᠯᠢᠳᠬᠠᠨ ᠦᠵᠡᠬᠦ ᠳ᠋ᠦ᠍ ᠬᠠᠰᠢ ᠯᠠ ᠠᠬᠠᠮᠠᠳ ᠰᠢᠯᠦᠭᠴᠢᠨ ᠦ᠌ ᠂  ᠪᠦᠷᠢᠨᠪᠡᠬᠢ ᠨᠥᠬᠥᠷ ᠦ᠋ᠨ ᠵᠠᠳᠠᠭᠠᠢ ᠰᠢᠯᠦᠭ ᠯᠡ ᠣᠨᠴᠠ ᠶ᠋ᠢᠨ ᠠᠮᠲᠠᠲᠠᠢ ᠂ ᠣᠨᠴᠠ ᠶ᠋ᠢᠨ ᠰᠢᠮᠡᠲᠡᠢ ᠰᠠᠨᠠᠭᠳᠠᠨ᠎ᠠ ᠃  ᠪ · ᠪᠦᠷᠢᠨᠪᠡᠬᠢ ᠨᠥᠬᠥᠷ ᠪᠣᠯ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠵᠠᠳᠠᠭᠠᠢ ᠰᠢᠯᠦᠭ ᠭᠡᠬᠦ ᠡᠨᠡᠬᠦ ᠰᠢᠨ᠎ᠡ ᠰᠣᠷᠭᠣᠭ ᠴᠡᠴᠡᠭ ᠢ᠋ ᠠᠩᠬᠠᠯᠠᠨ ᠲᠠᠷᠢᠭᠠᠳ ᠠᠮᠵᠢᠯᠲᠠ ᠭᠠᠷᠭᠠᠭᠰᠠᠨ ᠢ᠋ ᠪᠢᠳᠡ ᠪᠦᠷ ᠮᠡᠳᠡᠨ᠎ᠡ ᠂ ᠲᠡᠭᠦᠨ ᠦ᠌ ᠭᠠᠷᠭᠠᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠡᠦᠲᠦ ᠡᠳᠦᠢ ᠲᠡᠳᠦᠢ ᠬᠥᠮᠦᠰ ᠮᠥᠷᠳᠡᠨ ᠠᠯᠬᠤᠭᠰᠠᠭᠠᠷ ᠨᠢᠭᠡᠨᠲᠡ ᠥᠷᠭᠡᠨ ᠳᠠᠷᠳᠠᠩ ᠵᠠᠮ ᠵᠤᠷᠠᠢᠵᠤ᠂ ᠡᠷᠴᠢ ᠬᠦᠴᠦᠨ ᠲᠡᠢ ᠡᠩᠨᠡᠭᠡ ᠪᠦᠷᠢᠯᠳᠦᠵᠦ ᠂ ᠥᠷᠭᠡᠨ ᠳᠠᠯᠠᠢᠴᠠ ᠲᠠᠢ ᠤᠷᠤᠰᠬᠠᠯ ᠪᠣᠢ ᠪᠣᠯᠪᠠ  ᠃  ᠲᠡᠭᠦᠨ ᠦ᠌ ᠪᠢᠴᠢᠭᠰᠡᠨ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠲᠣᠭ᠎ᠠ ᠨᠢ ᠴᠥᠭᠡᠨ ᠪᠣᠯᠪᠠᠴᠤ ᠴᠢᠨᠠᠷ ᠨᠢ ᠥᠨᠳᠥᠷ ᠂ ᠵᠣᠬᠢᠶᠠᠯ ᠪᠦᠬᠦᠨ ᠡᠴᠡ ᠨᠢ ᠣᠢ ᠪᠢᠯᠢᠭ ᠦ᠋ᠨ ᠠᠪᠢᠶᠠᠰ ᠬᠡᠷᠡᠯᠳᠦᠵᠦ ᠂ ᠮᠥᠷ ᠪᠣᠯᠭᠠᠨ ᠠ᠋ᠴᠠ ᠨᠢ ᠣᠶᠤᠨ ᠤ᠋ ᠬᠥᠳᠡᠯᠮᠦᠷᠢ ᠶ᠋ᠢᠨ ᠣᠴᠢ ᠪᠠᠳᠠᠷᠠᠨ᠎ᠠ ᠃ ᠲᠡᠷᠡ ᠬᠡᠵᠢᠶᠡᠳᠡ ᠨᠡᠯᠦᠭᠡᠷ ᠳᠠᠯᠠᠢ ᠰᠢᠭ᠋ ᠠᠮᠢᠳᠤᠷᠠᠯ ᠳᠤᠮᠳᠠ ᠠ᠋ᠴᠠ ᠬᠠᠮᠤᠭ ᠰᠢᠨ᠎ᠡ ᠰᠣᠷᠭᠣᠭ ᠂  ᠰᠠᠢᠨ ᠰᠠᠢᠬᠠᠨ ᠂ ᠤᠳᠬ᠎ᠠ ᠴᠢᠨᠠᠷᠲᠠᠢ ᠂ ᠳᠡᠭᠵᠢᠨ ᠰᠡᠷᠭᠦᠯᠡᠩ ᠵᠦᠢᠯ ᠦ᠋ᠳ ᠢ᠋ ᠠᠵᠢᠭᠴᠢ ᠭᠢᠷᠬᠠᠢ ᠨᠢᠳᠦ ᠪᠡᠷ ᠰᠢᠨᠵᠢᠨ ᠢᠯᠡᠷᠡᠭᠦᠯᠵᠦ ᠂ ᠣᠢ ᠪᠢᠯᠢᠭᠲᠦ ᠴᠡᠭᠡᠵᠢᠨ ᠳ᠋ᠡᠭᠡᠨ ᠲᠤᠩᠭᠠᠨ ᠪᠣᠯᠪᠠᠰᠤᠷᠠᠭᠤᠯᠵᠤ ᠂ ᠰᠢᠳᠢ ᠣᠷᠣᠰᠢᠭᠰᠠᠨ ᠦᠵᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ  ᠬᠡᠯᠬᠢᠨ ᠬᠣᠯᠪᠣᠳᠠᠭ ᠪᠣᠯᠬᠣᠷ ᠪᠢᠴᠢᠭᠳᠡᠭᠰᠡᠨ ᠵᠠᠳᠠᠭᠠᠢ ᠰᠢᠯᠦᠭ ᠨᠢ ᠬᠡᠯᠬᠢᠶ᠎ᠡ ᠬᠡᠯᠬᠢᠶ᠎ᠡ ᠲᠠᠨ᠎ᠠ ᠰᠤᠪᠤᠳ ᠰᠢᠭ᠋ ᠶᠡᠷᠦ ᠪᠤᠰᠤ ᠶ᠋ᠢᠨ ᠭᠡᠷᠡᠯ ᠭᠠᠷᠤᠨ᠎ᠠ ᠃ ᠵᠣᠬᠢᠶᠠᠭᠴᠢ ᠶᠡᠷᠦ ᠡᠴᠡ ᠬᠥᠮᠦᠨ ᠪᠦᠬᠦᠨ ᠦᠵᠡᠳᠡᠭ ᠪᠣᠯᠪᠠᠴᠤ ᠢᠯᠡᠷᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠦᠵᠡᠭᠳᠡᠯ ᠢ᠋ ᠂ ᠬᠥᠮᠦᠨ ᠪᠦᠬᠦᠨ ᠪᠣᠳᠣᠳᠠᠭ ᠪᠣᠯᠪᠠᠴᠤ ᠠᠭᠤᠳᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ  ᠭᠤᠸ᠋᠎ᠠ  ᠰᠠᠢᠬᠠᠨ ᠢ᠋ ᠂ ᠬᠥᠮᠦᠨ ᠪᠦᠬᠦᠨ  ᠪᠠᠬᠠᠷᠳᠠᠭ ᠪᠣᠯᠪᠠᠴᠤ ᠳᠦᠷᠰᠦᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠰᠢᠯᠦᠭ  ᠳᠦᠷᠢ ᠶ᠋ᠢ ᠂ ᠬᠥᠮᠦᠨ ᠪᠦᠬᠦᠨ ᠣᠢᠯᠠᠭᠠᠳᠠᠭ ᠪᠣᠯᠪᠠᠴᠤ  ᠮᠠᠯᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠭᠦᠨ ᠰᠠᠨᠠᠭ᠎ᠠ ᠶ᠋ᠢ ᠴᠥᠮ  ᠰᠢᠯᠦᠭᠴᠢ  ᠶ᠋ᠢᠨ ᠬᠠᠷᠠᠴᠠ ᠪᠠᠷ ᠠᠵᠢᠭᠯᠠᠵᠤ ᠂ ᠰᠢᠯᠦᠭᠴᠢ ᠶ᠋ᠢᠨ ᠰᠡᠳᠬᠢᠯᠭᠡ ᠪᠡᠷ ᠲᠡᠭᠦᠯᠳᠡᠷᠵᠢᠭᠦᠯᠵᠦ ᠂ ᠰᠢᠯᠦᠭᠴᠢ ᠶ᠋ᠢᠨ ᠠᠪᠢᠶᠠᠰ ᠢ᠋ᠶ᠋ᠠᠷ ᠬᠡᠯᠬᠢᠨ ᠬᠣᠯᠪᠣᠬᠤ ᠳ᠋ᠤ᠌ ᠴᠢᠳᠠᠮᠠᠭᠠᠢ ᠪᠠᠢᠳᠠᠭ ᠃ 

      ᠪ · ᠪᠦᠷᠢᠨᠪᠡᠬᠢ ᠶ᠋ᠢᠨ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠰᠠᠨᠠᠭ᠎ᠠ ᠨᠢ ᠰᠢᠨ᠎ᠡ ᠂ ᠰᠣᠨᠢᠨ ᠂ ᠤᠷᠠᠨ  ᠪᠠᠢᠳᠠᠭ   ᠬᠡᠯᠡ ᠬᠡᠯᠡᠯᠭᠡ ᠨᠢ ᠢᠷᠠᠭᠤ ᠬᠥᠭᠵᠢᠮᠯᠢᠭ ᠂ ᠤᠷᠤᠰᠤᠮ᠎ᠠ ᠪᠠᠢᠳᠠᠭ᠃ ᠳᠦᠷᠢ ᠳᠦᠷᠰᠦᠯᠡᠯ ᠨᠢ ᠠᠮᠢᠳᠤ ᠂ ᠲᠣᠳᠣᠷᠠᠭᠤᠨ ᠂  ᠳᠤᠯᠠᠭᠠᠬᠠᠨ  ᠪᠠᠢᠳᠠᠭ᠃ ᠪᠦᠲᠦᠭᠡᠭᠰᠡᠨ ᠰᠠᠨᠠᠭ᠎ᠠ ᠠᠬᠤᠢ ᠨᠢ ᠢᠮᠠᠭᠲᠠ  ᠣᠢᠷ᠎ᠠ  ᠶ᠋ᠢ ᠦᠵᠡᠭᠦᠯᠦᠭᠡᠳ ᠬᠣᠯᠠ ᠶ᠋ᠢ ᠪᠣᠳᠣᠭᠤᠯᠳᠠᠭ ᠂ ᠡᠭᠦᠨ ᠢ᠋ ᠦᠵᠡᠭᠦᠯᠦᠭᠡᠳ ᠲᠡᠭᠦᠨ ᠊ᠢ ᠰᠡᠳᠬᠢᠭᠦᠯᠳᠡᠭ᠂ ᠬᠡᠯᠪᠡᠷᠢ ᠠᠪᠰᠠᠷᠬᠠᠨ ᠂ ᠪᠦᠲᠦᠴᠡ ᠨᠢᠭᠲᠠ ᠂ ᠵᠣᠬᠢᠶᠠᠮᠵᠢ ᠵᠢᠭᠳᠡ᠂ ᠥᠩᠭᠡ ᠥᠳᠬᠡᠨ ᠂ ᠦᠨᠦᠷ ᠬᠠᠩᠬᠤᠯᠤᠭᠤᠨ ᠰᠠᠨᠠᠭ᠎ᠠ ᠤᠷᠠᠨ ᠂ ᠰᠡᠳᠬᠢᠮᠵᠢ ᠤᠷᠠᠨ ᠂ ᠦᠵᠡᠮᠵᠢ ᠭᠣᠶᠣ ᠂ ᠦᠭᠡ ᠭᠣᠶᠣ ᠃ ᠪᠤᠴᠠᠯᠤᠮ᠎ᠠ ᠬᠠᠢᠷ᠎ᠠ ᠪᠢᠯᠬᠠᠮ᠎ᠠ ᠰᠡᠳᠬᠢᠯᠭᠡ ᠲᠡᠢ ᠂ ᠠᠢᠵᠠᠮ ᠴᠣᠬᠢᠯᠭ᠎ᠠ ᠵᠢᠭᠳᠡ ᠲᠡᠭᠰᠢ ᠂ ᠠᠶᠠᠰ ᠬᠥᠭ ᠥᠷᠨᠢᠭᠦᠨ ᠳᠡᠭᠵᠢᠨ ᠪᠠᠢᠳᠠᠭ᠃ ᠰᠢᠯᠦᠭᠴᠢᠨ ᠪᠣᠯ ᠶᠡᠷᠦ ᠡᠴᠡ ᠦᠵᠡᠯ ᠰᠠᠨᠠᠭᠠᠨ ᠤ᠋ ᠵᠥᠪ ᠡᠷᠬᠢᠮ ᠂ ᠬᠠᠢᠷ᠎ᠠ ᠰᠡᠳᠬᠢᠯᠭᠡ ᠶ᠋ᠢᠨ ᠡᠷᠡᠭᠦᠯ ᠪᠤᠴᠠᠯᠤᠮ᠎ᠠ ᠂ ᠥᠩᠭᠡ ᠪᠣᠳᠣᠭ ᠤ᠋ᠨ ᠥᠳᠬᠡᠨ ᠵᠤᠵᠠᠭᠠᠨ ᠂  ᠠᠢᠵᠠᠮ ᠴᠣᠬᠢᠯᠭ᠎ᠠ ᠶ᠋ᠢᠨ ᠢᠷᠠᠭᠤ ᠬᠥᠭᠵᠢᠮᠯᠢᠭ ᠂ ᠦᠭᠡ ᠬᠡᠯᠡᠯᠭᠡ ᠶ᠋ᠢᠨ ᠪᠠᠶᠠᠯᠢᠭ ᠤᠷᠠᠨ ᠂ ᠰᠠᠨᠠᠭ᠎ᠠ ᠠᠬᠤᠢ ᠶ᠋ᠢᠨ ᠠᠯᠤᠰ ᠭᠦᠨ ᠂ ᠳᠦᠷᠢ ᠳᠦᠷᠰᠦᠯᠡᠯ ᠦ᠋ᠨ ᠬᠠᠴᠢᠨ ᠭᠣᠢᠳᠠ ᠶ᠋ᠢ ᠬᠥᠭᠡᠭᠡᠴᠡᠯᠳᠦᠳᠡᠭ ᠃ ᠲᠡᠭᠦᠨ ᠦ᠌ ᠵᠠᠳᠠᠭᠠᠢ ᠰᠢᠯᠦᠭ ᠵᠠᠵᠢᠯᠬᠤ ᠶ᠋ᠢ ᠳᠠᠭᠠᠭᠠᠨ᠎ᠠ ᠂ ᠲᠡᠭᠦᠨ ᠦ᠌ ᠵᠠᠳᠠᠭᠠᠢ ᠰᠢᠯᠦᠭ ᠢ᠋ ᠬᠠᠭᠤᠳᠠᠰᠤ ᠳᠡᠯᠭᠡᠭᠡᠳ ᠤᠩᠰᠢᠪᠠᠯ ᠨᠢᠳᠦ ᠳᠦᠭᠦᠷᠡᠩ ᠳᠦᠷᠢ ᠳᠦᠷᠰᠦᠯᠡᠯ ᠂ ᠬᠠᠭᠤᠳᠠᠰᠤ ᠪᠠᠨ ᠳᠠᠷᠤᠭᠠᠳ ᠰᠡᠳᠬᠢᠪᠡᠯ ᠴᠡᠭᠡᠵᠢ ᠳᠦᠭᠦᠷᠡᠩ ᠬᠥᠷᠥᠭ ᠵᠢᠷᠤᠭ ᠃ ᠲᠡᠭᠦᠨ ᠦ᠌  ᠪᠢᠴᠢᠭᠰᠡᠨ ᠠᠩᠬᠠᠨ ᠤ᠋ ᠬᠡᠳᠦᠨ ᠵᠠᠳᠠᠭᠠᠢ ᠰᠢᠯᠦᠭ ᠪᠣᠯᠬᠤ 《 ᠡᠪᠦᠯ ᠦ᠋ᠨ ᠳᠣᠲᠣᠷ᠎ᠠ ᠬᠠᠪᠤᠷ 》 ᠭᠡᠰᠡᠨ ᠵᠣᠬᠢᠶᠠᠯ ᠪᠣᠯ ᠨᠢᠭᠡᠨ ᠴᠠᠭ ᠦᠶ᠎ᠡ ᠂ ᠨᠢᠭᠡᠨ ᠤᠯᠤᠰ ᠦᠨᠳᠦᠰᠦᠲᠡᠨ ᠦ᠌ ᠤᠷᠤᠭᠰᠢᠯᠠᠯᠲᠠ ᠲᠠᠪᠰᠢᠯᠲᠠ ᠶ᠋ᠢᠨ ᠤᠯᠠ ᠮᠥᠷ ᠢ᠋ ᠦᠨᠡᠨ ᠪᠣᠳᠠᠲᠠᠢ ᠪᠠᠷ ᠲᠡᠮᠳᠡᠭᠯᠡᠨ ᠲᠤᠰᠬᠠᠭᠰᠠᠨ  ᠪᠠᠢᠨ᠎ᠠ᠃《 ᠠᠯᠲᠠᠨ ᠰᠢᠷᠭᠠᠯ ᠡᠭᠦᠯᠡ 》 《 ᠥᠷᠯᠥᠭᠡ ᠶ᠋ᠢᠨ ᠢᠨᠢᠶᠡᠮᠰᠦᠭᠯᠡᠯ 》《 ᠯᠢᠩᠪᠦ ᠶ᠋ᠢᠨ ᠳᠠᠭᠤᠨ 》 ᠪᠣᠯ ᠲᠠᠯ᠎ᠠ ᠨᠤᠲᠤᠭ ᠤ᠋ᠨ ᠲᠠᠩᠰᠤᠭ ᠠᠮᠢᠳᠤᠷᠠᠯ ᠤ᠋ᠨ ᠲᠤᠬᠠᠢ ᠵᠢᠵᠢᠭ ᠦᠵᠡᠭᠳᠡᠯ ᠦ᠋ᠳ ᠪᠣᠯᠤᠨ᠎ᠠ ᠂ ᠡᠳᠡᠭᠡᠷ ᠵᠣᠬᠢᠶᠠᠯ ᠳ᠋ᠤ᠌ ᠲᠠᠯ᠎ᠠ ᠨᠤᠲᠤᠭ ᠤ᠋ᠨ ᠦᠨᠦᠷ ᠬᠠᠩᠬᠤᠯᠵᠤ ᠂ ᠲᠠᠷᠠᠭ ᠠᠢᠷᠠᠭ ᠤ᠋ᠨ ᠠᠮᠲᠠ ᠠᠮᠲᠠᠭᠳᠠᠨ᠎ᠠ ᠃  《ᠯᠢᠩᠪᠦ ᠶ᠋ᠢᠨ ᠳᠠᠭᠤᠨ 》 ᠪᠣᠯ ᠨᠠᠷᠢᠨ ᠪᠦᠲᠦᠴᠡ ᠨᠢᠮᠪᠠᠢ ᠬᠢᠴᠡᠲᠦ ᠤᠷᠠᠯᠢᠭ ᠤ᠋ᠨ ᠡᠳ᠋ ᠪᠣᠯᠤᠨ᠎ᠠ ᠂ ᠬᠡᠯᠪᠡᠷᠢ ᠮᠠᠶᠢᠬ ᠵᠢᠭᠳᠡ ᠲᠡᠭᠰᠢ ᠪᠠᠢᠵᠤ᠂ ᠡᠬᠢᠯᠡᠯᠲᠡ ᠲᠡᠭᠦᠰᠬᠡᠯ ᠢ᠋ ᠡᠪᠯᠢᠭ ᠬᠣᠯᠪᠣᠵᠤ ᠂ ᠤᠷᠠᠨ ᠰᠠᠨᠠᠭᠠᠨ ᠤ᠋ ᠳᠠᠯᠠᠪᠴᠢ ᠪᠠᠨ ᠬᠠᠯᠢᠨ ᠨᠢᠰᠬᠡᠵᠡᠢ ᠃  ᠪ · ᠪᠦᠷᠢᠨᠪᠡᠬᠢ ᠶ᠋ᠢᠨ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠳᠣᠲᠣᠷ᠎ᠠ ᠮᠢᠨᠦ ᠪᠠᠬᠠᠷᠳᠠᠭ ᠨᠢ ᠪᠣᠯ 《 ᠮᠥᠩᠭᠥᠨ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠳ 》 ᠪᠣᠯᠤᠨ᠎ᠠ ᠂ ᠡᠨᠡ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠠᠬᠤᠢ ᠠᠮᠢᠳᠤᠷᠠᠯ ᠤ᠋ᠨ ᠬᠡᠪ ᠵᠠᠩᠰᠢᠯ ᠤ᠋ᠨ ᠲᠤᠬᠠᠢ ᠰᠡᠷᠭᠦᠯᠡᠩ ᠳᠡᠭᠵᠢᠨ ᠵᠢᠷᠤᠭ ᠠᠵᠢ ᠂ ᠲᠤᠰ ᠵᠣᠬᠢᠶᠠᠯ ᠤ᠋ᠨ ᠳᠦᠷᠰᠦᠯᠡᠯ ᠵᠢᠷᠤᠭᠯᠠᠯ ᠤᠷᠠᠨ ᠭᠣᠶᠣ ᠂ ᠦᠵᠡᠮᠵᠢ ᠪᠠᠢᠳᠠᠯ ᠢᠷᠠᠭᠤ ᠰᠠᠢᠬᠠᠨ ᠂ ᠬᠡᠭᠡᠷ᠎ᠡ ᠲᠠᠯ᠎ᠠ ᠶ᠋ᠢᠨ ᠠᠭᠤᠷ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠪᠢᠯᠬᠠᠮ᠎ᠠ ᠂ ᠲᠠᠯ᠎ᠠ ᠨᠤᠲᠤᠭ ᠤ᠋ᠨ ᠠᠮᠤᠷ ᠲᠦᠪᠰᠢᠨ ᠠᠵᠤ ᠠᠮᠢᠳᠤᠷᠠᠯ ᠢ᠋ ᠲᠤᠰᠬᠠᠨ ᠂ ᠲᠠᠯ᠎ᠠ ᠶ᠋ᠢᠨ ᠠᠩᠴᠢᠳ ᠤ᠋ᠨ ᠠᠵᠢᠯᠴᠢ ᠬᠥᠳᠡᠯᠮᠦᠷᠢᠴᠢ ᠵᠠᠩ ᠴᠢᠨᠠᠷ ᠢ᠋ ᠲᠡᠮᠳᠡᠭᠯᠡᠵᠦ ᠂ ᠲᠠᠯ᠎ᠠ ᠶ᠋ᠢᠨ ᠠᠩᠴᠢᠳ ᠪᠣᠯ  ᠰᠠᠶᠢ ᠮᠥᠩᠭᠥᠨ ᠳᠡᠯᠡᠬᠡᠢ ᠶ᠋ᠢᠨ ᠵᠢᠩᠬᠢᠨᠢ ᠡᠵᠡᠨ ᠨᠢ ᠮᠥᠨ ᠭᠡᠰᠡᠨ ᠰᠠᠨᠠᠭ᠎ᠠ ᠶ᠋ᠢ ᠦᠵᠡᠭᠦᠯᠪᠡ ᠃ ᠡᠨᠡ ᠪᠣᠯ ᠂  ᠪ· ᠪᠦᠷᠢᠨᠪᠡᠬᠢ ᠨᠥᠬᠥᠷ ᠦ᠋ᠨ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠠᠮᠵᠢᠯᠲᠠ ᠶ᠋ᠢ ᠪᠦᠷᠢᠨ ᠳᠤᠰᠬᠠᠵᠤ ᠴᠢᠳᠠᠬᠤᠢᠴᠠ ᠵᠣᠬᠢᠶᠠᠯ ᠶᠤᠮ ᠂ ᠲᠤᠰ ᠵᠣᠬᠢᠶᠠᠯ ᠳᠡᠭᠡᠷ᠎ᠡ ᠵᠣᠬᠢᠶᠠᠭᠴᠢ ᠶ᠋ᠢᠨ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠂ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠪᠠ ᠮᠠᠴᠤᠵᠤ ᠬᠦᠷᠦᠭᠰᠡᠨ ᠤᠷᠠᠯᠢᠭ ᠤ᠋ᠨ ᠬᠡᠮᠵᠢᠶ᠎ᠡ ᠶ᠋ᠢ ᠲᠥᠪᠯᠡᠷᠡᠩᠭᠦᠢ ᠲᠤᠰᠬᠠᠵᠠᠢ ᠃ 《ᠵᠢᠷᠦᠬᠡᠨ ᠦ᠌ ᠰᠤᠳᠠᠰᠤ 》 ᠭᠡᠰᠡᠨ ᠵᠣᠬᠢᠶᠠᠯ ᠤ᠋ᠨ ᠬᠡᠯᠡᠯᠭᠡ ᠭᠣᠶᠣ ᠂ ᠠᠮᠢᠳᠤ ᠴᠣᠪᠣᠭᠣᠯᠢᠭ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠪᠢᠯᠬᠠᠮ᠎ᠠ ᠲᠤᠯᠠ ᠬᠥᠮᠦᠰ ᠲᠦ᠍ ᠪᠠᠶᠠᠷ ᠴᠡᠩᠭᠡᠯ ᠢ᠋ ᠠᠪᠴᠢᠷᠠᠵᠤ ᠥᠭᠭᠦᠨ᠎ᠡ ᠃ 《 ᠲᠣᠯᠢ  》ᠭᠡᠰᠡᠨ ᠵᠣᠬᠢᠶᠠᠯ ᠪᠣᠯ ᠴᠥᠭᠥᠷᠥᠮ  ᠦ᠋ᠨ ᠬᠠᠪᠤᠷ ᠵᠤᠨ ᠨᠠᠮᠤᠷ ᠡᠪᠦᠯ ᠦ᠋ᠨ ᠥᠷᠯᠥᠭᠡ ᠂ ᠦᠳᠡ ᠂ ᠦᠳᠡᠰᠢ ᠶ᠋ᠢᠨ ᠦᠵᠡᠮᠵᠢ ᠶ᠋ᠢ ᠣᠢ ᠲᠣᠢ ᠳ᠋ᠤᠨᠢ ᠣᠷᠣᠲᠠᠯ᠎ᠠ ᠵᠢᠷᠤᠭᠯᠠᠨ ᠦᠵᠡᠭᠦᠯᠵᠦ ᠂ ᠦᠵᠡᠮᠵᠢ ᠵᠢᠷᠤᠭ ᠤ᠋ᠨ ᠳᠣᠲᠣᠷ᠎ᠠ ᠦᠵᠡᠯ ᠰᠡᠳᠬᠢᠯᠭᠡ ᠪᠡᠨ ᠰᠢᠩᠭᠡᠭᠡᠭᠰᠡᠨ ᠪᠠᠢᠨ᠎ᠠ᠃ ᠬᠠᠷᠢᠨ 《 ᠠᠯᠢᠮ᠎ᠠ 》 ᠭᠡᠰᠡᠨ ᠵᠣᠬᠢᠶᠠᠯ ᠪᠣᠯ ᠂  ᠪ · ᠪᠦᠷᠢᠨᠪᠡᠬᠢ ᠶ᠋ᠢᠨ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠳᠣᠲᠣᠷ᠎ᠠ ᠪᠠᠬᠠᠨ ᠰᠤᠯᠠ ᠵᠣᠬᠢᠶᠠᠯ ᠪᠣᠯᠬᠤ ᠶᠤᠮ ᠂ ᠰᠤᠯᠠ ᠪᠣᠯᠤᠭᠰᠠᠨ ᠤ᠋ ᠰᠢᠯᠲᠠᠭᠠᠨ ᠨᠢ ᠥᠭᠦᠯᠡᠭᠰᠡᠨ ᠰᠢᠯᠦᠭ ᠦ᠋ᠨ ᠣᠨᠴᠠᠯᠢᠭ ᠨᠢ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠣᠨᠴᠠᠯᠢᠭ ᠠ᠋ᠴᠠ ᠬᠡᠲᠦᠷᠡᠭᠰᠡᠨ ᠳ᠋ᠦ᠍ ᠣᠷᠣᠰᠢᠨ᠎ᠠ ᠭᠡᠵᠦ ᠰᠠᠨᠠᠳᠠᠭ ᠃ ᠪ · ᠪᠦᠷᠢᠨᠪᠡᠬᠢ ᠨᠥᠬᠥᠷ ᠪᠣᠯ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠦᠷ᠎ᠡ ᠵᠢᠮᠢᠰ ᠢ᠋ ᠲᠠᠯ᠎ᠠ ᠨᠤᠲᠤᠭ ᠲᠤ᠌ ᠲᠠᠷᠢᠭᠰᠠᠨ ᠴᠡᠴᠡᠷᠯᠢᠭᠴᠢ ᠮᠥᠨ ᠂ ᠪᠠᠭᠰᠢ ᠮᠥᠨ᠂ ᠲᠡᠭᠦᠨ ᠦ᠌ ᠪᠢᠴᠢᠭᠰᠡᠨ ᠵᠠᠳᠠᠭᠠᠢ ᠰᠢᠯᠦᠭ ᠡᠦᠲᠦ ᠳ᠋ᠦ᠍ ᠲᠤᠯᠲᠠᠯ᠎ᠠ ᠬᠡᠪ ᠳᠠᠭᠤᠷᠢᠶᠠᠯ ᠪᠣᠯᠤᠭᠰᠠᠭᠠᠷ ᠪᠠᠢᠨ᠎ᠠ ᠃ ᠬᠠᠷᠠᠮᠰᠠᠯᠲᠠᠢ ᠨᠢ ᠶ᠋ᠢᠨ · ᠪᠦᠷᠢᠨᠪᠡᠬᠢ ᠨᠥᠬᠥᠷ ᠦ᠋ᠨ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠲᠣᠭ᠎ᠠ ᠨᠢ ᠳᠠᠩᠴᠤ ᠴᠥᠭᠡᠨ ᠤᠴᠢᠷ ᠠ᠋ᠴᠠ ᠠᠮᠲᠠᠯᠠᠭᠤᠯᠤᠭᠠᠳ ᠲᠠᠯᠪᠢᠭᠰᠠᠨ ᠪᠣᠯᠪᠠᠴᠤ ᠴᠠᠳᠬᠠᠭᠰᠠᠨ ᠦᠭᠡᠢ ᠪᠢᠯᠡ ᠃ 

     ᠰᠠᠢᠨᠴᠣᠭ᠎ᠡ᠎ ᠶᠢᠨ《 ᠵᠢᠷᠤᠭ》 ᠭᠡᠰᠡᠨ ᠵᠠᠳᠠᠭᠠᠢ ᠰᠢᠯᠦᠭ ᠲᠦ᠍ 《 ᠰᠤᠪᠤᠳ ᠴᠥ᠍ ᠶᠤᠮ ᠤᠤ ? ᠡᠦᠲᠦ  ᠴᠦ᠍ ᠶᠤᠮ ᠤᠤ? ᠬᠥᠪᠥᠩ ᠴᠦ᠍ ᠶᠤᠮ ᠦᠦ ? ᠡᠭᠦᠯᠡ ᠴᠥ᠍ ᠶᠤᠮ ᠤᠤ ? ᠭᠢᠯᠲᠠᠭᠠᠨᠠᠨ ᠬᠡᠷᠡᠯᠳᠦᠬᠦ ᠥᠩᠭᠡ ᠪᠡᠷ ᠨᠢ ᠰᠤᠪᠤᠳ ᠴᠥ᠍ ᠶᠤᠮ ᠤᠤ ᠭᠡᠮᠡᠷ ᠂ ᠭᠡᠲᠡᠯ᠎ᠡ ᠰᠤᠪᠤᠳ ᠵᠥᠪᠬᠡᠨ ᠠᠯᠠᠭᠠᠨ ᠳᠡᠭᠡᠷ᠎ᠡ ᠯᠡ ᠪᠥᠮᠪᠥᠷᠢᠬᠦ ᠡᠴᠡ ᠪᠢᠰᠢ ᠬᠡᠷᠬᠢᠨ ᠠᠲᠠᠷ ᠢ᠋ ᠪᠦᠷᠬᠦᠨ᠂ ᠲᠠᠯ᠎ᠠ ᠶ᠋ᠢ ᠳᠦᠭᠦᠷᠭᠡᠬᠦ ᠠᠵᠢ ᠃ ᠭᠢᠯᠠᠭᠠᠨᠠᠨ ᠠᠭᠰᠠᠢᠬᠤ ᠣᠯᠠᠨ ᠢ᠋ᠶ᠋ᠠᠷ ᠨᠢ ᠡᠦᠲᠦ ᠴᠢ ᠶᠤᠮ ᠦᠦ ᠭᠡᠮᠡᠷ ᠂ ᠭᠡᠲᠡᠯ᠎ᠡ ᠡᠦᠲᠦ ᠵᠥᠪᠬᠡᠨ ᠣᠷᠴᠢᠯᠠᠩ ᠤ᠋ᠨ ᠬᠥᠪ ᠲᠦ᠍ ᠠᠨᠢᠪᠴᠢᠨ ᠂ ᠣᠭᠲᠠᠷᠭᠤᠢ  ᠶ᠋ᠢᠨ ᠴᠡᠭᠡᠯ ᠳ᠋ᠦ᠍ ᠵᠢᠭᠳᠡᠷᠡᠬᠦ ᠠ᠋ᠴᠠ ᠪᠢᠰᠢ ᠬᠡᠷᠬᠢᠨ ᠰᠢᠯᠢ ᠳ᠋ᠦ᠍ ᠡᠭᠡᠨᠡᠭᠰᠢᠨ ᠭᠣᠪᠢ ᠳ᠋ᠤ᠌ ᠢᠳᠡᠭᠡᠰᠢᠬᠦ ᠠᠵᠢ ᠂ ᠭᠠᠵᠠᠷ ᠪᠢᠯᠬᠠᠨ ᠬᠥᠬᠡᠷᠡᠬᠦ ᠪᠡᠷ ᠨᠢ ᠬᠥᠪᠥᠩ ᠴᠤ ᠶᠤᠮ ᠦᠦ ᠭᠡᠮᠡᠷ᠂  ᠭᠡᠲᠡᠯ᠎ᠡ ᠬᠦᠪᠦᠭ ᠬᠡᠳᠦᠢᠪᠡᠷ ᠬᠥᠷᠥᠰᠥᠨ ᠳᠣᠣᠷ᠎ᠠ ᠠ᠋ᠴᠠ ᠬᠦᠪᠦᠷᠡᠨ ᠂ ᠰᠢᠷᠣᠢ ᠠ᠋ᠴᠠ ᠰᠣᠶᠣᠭᠠᠯᠠᠳᠠᠭ ᠴᠥ᠍ ᠤᠮᠠᠷᠠᠲᠤ ᠣᠷᠣᠨ ᠤ᠋ ᠨᠠᠮᠤᠷ ᠤ᠋ᠨ ᠬᠢᠷᠠᠭᠤ ᠂ ᠡᠪᠦᠯ  ᠦᠨ ᠰᠢᠭᠤᠷᠭ᠎ᠠ ᠶ᠋ᠢ ᠬᠡᠷᠬᠢᠨ ᠲᠤᠭᠤᠯᠬᠤ ᠠᠵᠢ ᠂ ᠭᠠᠯᠪᠠ ᠶ᠋ᠢ ᠬᠥᠰᠢᠭᠯᠡᠨ ᠴᠠᠢᠯᠵᠠᠬᠤ ᠪᠠᠷ ᠨᠢ ᠡᠭᠦᠯᠡ ᠴᠥ᠍ ᠶᠤᠮ ᠦᠦ ᠭᠡᠮᠡᠷ ᠂ ᠭᠡᠲᠡᠯ᠎ᠡ ᠡᠭᠦᠯᠡ ᠬᠡᠳᠦᠢᠪᠡᠷ ᠬᠠᠷᠠᠬᠤ ᠳ᠋ᠤ᠌ ᠨᠡᠯᠦᠭᠡᠷ ᠂ ᠦᠵᠡᠬᠦ ᠳ᠋ᠦ᠍ ᠳᠡᠯᠭᠡᠷ ᠴᠤ ᠲᠠᠩᠰᠤᠭ ᠵᠢᠷᠭᠠᠯ ᠤ᠋ᠨ ᠠᠮᠢᠯᠠᠯ᠎  ᠶ᠋ᠢᠨ ᠪᠡᠯᠭᠡ ᠂ ᠦᠷᠡᠵᠢᠯ  ᠤᠨ ᠣᠨᠳᠣᠷᠭ᠎ᠠ ᠬᠡᠷᠬᠢᠨ ᠪᠠᠢᠬᠤ  ᠠᠵᠠᠢ 》 ᠬᠡᠮᠡᠨ ᠬᠣᠨᠢᠨ ᠰᠦᠷᠦᠭ ᠢ᠋  ᠵᠢᠷᠤᠭᠯᠠᠨ ᠳᠦᠷᠰᠦᠯᠡᠭᠰᠡᠨ ᠪᠠᠢᠨ᠎ᠠ ᠃ ᠡᠭᠦᠨ ᠳ᠋ᠦ᠍ ᠡᠬᠢᠨ ᠦ᠌ ᠳᠥᠷᠪᠡᠨ ᠠᠰᠠᠭᠤᠯᠲᠠ 《  ᠰᠣᠪᠦᠳ ᠴᠦ᠍ ᠶᠤᠮ ᠤᠤ ? ᠡᠦᠲᠦ  ᠴᠦ᠍ ᠶᠤᠮ ᠦᠦ ? ᠬᠥᠪᠥᠩ  ᠶᠤᠮ ᠦᠦ ? ᠡᠭᠦᠯᠡ ᠴᠦ᠍ ᠶᠤᠮ ᠦᠦ ? 》 ᠭᠡᠵᠦ ᠡᠩ ᠵᠡᠷᠭᠡᠴᠡᠵᠦ ᠪᠠᠢᠬᠤ ᠪᠥᠭᠡᠳ《 ᠰᠤᠪᠤᠳ ᠂  ᠣᠳᠣ᠂ ᠬᠦᠪᠦᠩ ᠂ ᠡᠭᠦᠯᠡ》(ᠡᠨᠡ ᠪᠣᠯ ᠴᠥᠮ ᠬᠣᠨᠢ ᠲᠠᠢ ᠠᠳᠠᠯᠢ ᠴᠠᠭᠠᠨ ᠥᠩᠭᠡ ᠲᠡᠢ ) ᠳᠥᠷᠪᠡᠨ ᠨᠡᠷ᠎ᠡ ᠦᠭᠡ ᠶ᠋ᠢ ᠬᠣᠭᠣᠷᠣᠨᠳᠣ ᠨᠢ ᠵᠡᠷᠭᠡᠴᠡᠭᠦᠯᠪᠡ  ᠃ ᠳᠠᠷᠠᠭᠠᠯᠠᠭᠠᠳ ᠬᠦᠴᠦ ᠨᠡᠮᠡᠭᠳᠡᠭᠦᠯᠦᠭᠰᠡᠨ ᠰᠤᠯᠠ ᠦᠭᠡ ᠳᠥᠷᠪᠡᠨ 《 ᠴᠥ᠍  》᠂ ᠠᠰᠠᠭᠤᠯᠲᠠ ᠲᠠᠯᠪᠢᠭᠰᠠᠨ ᠰᠤᠯᠠ ᠦᠭᠡ ᠳᠥᠷᠪᠡᠨ 《 ᠶᠤᠮ ᠤᠤ ?》 ᠶᠢ ᠮᠥᠨ ᠠᠳᠠᠯᠢ ᠪᠦᠲᠦᠴᠡ ᠂ ᠠᠳᠠᠯᠢ  ᠴᠤᠬᠢᠯᠭ᠎ᠠ ᠪᠠᠷ ᠵᠡᠷᠭᠡᠴᠡᠭᠦᠯᠦᠭᠰᠡᠨ ᠪᠠᠢᠨ᠎ᠠ ᠃ ᠬᠡᠷᠪᠡ ᠳᠥᠷᠪᠡᠨ ᠤᠷᠠᠨ ᠠᠰᠠᠭᠤᠯᠲᠠ ᠲᠠᠯᠪᠢᠭᠰᠠᠨ ᠪᠢᠰᠢ ᠂ ᠭᠠᠭᠴᠠᠬᠠᠨ ᠠᠰᠠᠭᠤᠯᠲᠠ ᠲᠠᠯᠪᠢᠭᠰᠠᠨ ᠶᠤᠮ ᠪᠣᠯ ᠤᠩᠰᠢᠭᠴᠢᠳ ᠲᠡᠳᠦᠢ ᠶᠡᠬᠡ ᠰᠣᠨᠢᠷᠬᠠᠬᠤ ᠦᠭᠡᠢ  ᠴᠦ᠍ ᠮᠠᠭᠠᠳ ᠂ ᠳᠥᠷᠪᠡᠨ ᠤᠷᠠᠨ ᠠᠰᠠᠭᠤᠯᠲᠠ ᠶ᠋ᠢ ᠤᠭᠰᠠᠷᠠᠭᠤᠯᠤᠨ ᠲᠠᠯᠪᠢᠭᠰᠠᠨ ᠪᠣᠯᠬᠣᠷ ᠤᠩᠰᠢᠭᠴᠢᠳ ᠤ᠋ᠨ ᠤᠷᠮ᠎ᠠ ᠶ᠋ᠢ ᠠᠶᠠᠨᠳᠠᠭᠠᠨ ᠲᠠᠲᠠᠵᠠᠢ ᠃ ᠵᠠᠯᠭᠠᠭᠠᠳ ᠡᠨᠡᠬᠦ ᠳᠥᠷᠪᠡᠨ ᠤᠷᠠᠨ ᠠᠰᠠᠭᠤᠯᠲᠠ ᠪᠠᠨ ᠤᠯᠠᠮ ᠴᠢᠨᠠᠭᠰᠢᠳᠠ  ᠴᠢᠩᠭᠠᠷᠠᠭᠤᠯᠤᠨ ᠳᠤᠷᠠᠳᠪᠠ ᠄  《ᠭᠢᠯᠲᠠᠭᠠᠨᠠᠨ ᠬᠡᠷᠡᠯᠳᠦᠬᠦ ᠥᠩᠭᠡ ᠪᠡᠷ ᠨᠢ ᠰᠤᠪᠤᠳ  ᠴᠤ᠌ ᠶᠤᠮ ᠤᠤ ᠭᠡᠮᠡᠷ ᠂ ᠭᠢᠯᠠᠭᠠᠨᠠᠨ ᠠᠭᠰᠠᠢᠬᠤ ᠣᠯᠠᠨ ᠢ᠋ᠶ᠋ᠠᠷ ᠨᠢ ᠡᠦᠲᠦ  ᠴᠦ᠍ ᠶᠦ᠍ᠮ ᠦᠦ ᠭᠡᠮᠡᠷ ᠂ ᠭᠠᠵᠠᠷ ᠲᠤ᠌ ᠪᠢᠯᠬᠠᠨ ᠬᠥᠬᠡᠷᠡᠬᠦ ᠪᠡᠷ ᠨᠢ ᠬᠥᠪᠥᠩ   ᠴᠦ᠍ ᠶᠦ᠍ᠮ ᠦᠦ ᠭᠡᠮᠡᠷ ᠂ ᠭᠠᠯᠪᠠ ᠶ᠋ᠢ ᠬᠥᠰᠢᠭᠡᠯᠡᠨ ᠴᠠᠢᠯᠵᠠᠬᠤ ᠪᠠᠷ ᠨᠢ ᠡᠭᠦᠯᠡ ᠴᠦ᠍ ᠦᠦ ᠭᠡᠮᠡᠷ 》 ᠭᠡᠵᠦ ᠲᠦᠷᠦᠭᠦᠨ ᠦ᠌ ᠲᠠᠯᠪᠢᠭᠰᠠᠨ ᠳᠥᠷᠪᠡᠨ ᠠᠰᠠᠭᠤᠯᠲᠠ ᠶ᠋ᠢᠨ ᠢ᠋ᠶ᠋ᠡᠨ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ ᠨᠢ ᠶᠠᠷᠢᠵᠤ ᠂ ᠠᠰᠠᠭᠤᠯᠲᠠ ᠶ᠋ᠢᠨ ᠢ᠋ᠶ᠋ᠡᠨ ᠡᠷᠴᠢ ᠶ᠋ᠢ ᠵᠢᠭᠠᠬᠠᠨ ᠰᠤᠯᠠᠷᠠᠭᠤᠯᠤᠨ ᠠᠰᠠᠭᠤᠯᠲᠠ ᠪᠠᠨ ᠮᠠᠲᠣᠭ ᠪᠣᠯᠭᠠᠨ ᠳᠤᠷᠠᠳᠪᠠ ᠂ ᠡᠨᠡ ᠳᠥᠷᠪᠡᠨ ᠦᠭᠡ  ᠬᠡᠳᠦᠢᠪᠡᠷ ᠨᠢᠭᠡ ᠳᠣᠣᠷ᠎ᠠ ᠤᠭᠰᠠᠷᠠᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ ᠲᠡᠳᠡᠭᠡᠷ ᠦ᠋ᠨ ᠬᠣᠯᠪᠣᠭ᠎ᠠ ᠭᠢᠰᠬᠢᠴᠡ ᠂ ᠪᠦᠲᠦᠴᠡ ᠨᠠᠢᠷᠠᠭᠤᠯᠭ᠎ᠠ ᠡᠭᠡᠭᠡ ᠠᠳᠠᠯᠢ ᠪᠠᠢᠭ᠎ᠠ ᠶᠤᠮ ᠂ ᠡᠨᠡ ᠨᠢ ᠳᠡᠭᠡᠷᠡᠬᠢ ᠳᠥᠷᠪᠡᠨ ᠠᠰᠠᠭᠤᠯᠲᠠ ᠲᠠᠢ ᠪᠠᠨ ᠵᠠᠯᠭᠠᠵᠤ ᠪᠠᠢᠬᠤ ᠪᠥᠭᠡᠳ ᠳᠣᠣᠷᠠᠬᠢ ᠵᠦᠢᠯ ᠲᠡᠢ ᠪᠡᠨ  ᠴᠦ᠍ ᠬᠣᠯᠪᠣᠯᠳᠤᠵᠤ ᠪᠠᠢᠨ᠎ᠠ  ᠃ᠵᠣᠬᠢᠶᠠᠭᠴᠢ ᠦᠨᠡᠨᠳᠡᠭᠡᠨ ᠠᠰᠠᠭᠤᠯᠲᠠ ᠪᠠᠨ ᠰᠤᠯᠠᠳᠬᠠᠬᠤ ᠭᠡᠰᠡᠨ ᠪᠢᠰᠢ ᠂ ᠴᠢᠩᠭᠠᠳᠬᠠᠬᠤ ᠭᠡᠰᠡᠨ  ᠪᠠᠢᠨ᠎ᠠ ᠂ ᠤᠴᠢᠷ ᠨᠢ 《 ᠭᠡᠲᠡᠯ᠎ᠡ ᠰᠤᠪᠤᠳ ᠵᠥᠪᠬᠡᠨ  ᠁ ᠭᠡᠲᠡᠯ᠎ᠡ ᠡᠦᠲᠦ ᠵᠥᠪᠬᠡᠨ ᠁ ᠭᠡᠲᠡᠯ᠎ᠡ ᠬᠥᠪᠥᠩ ᠬᠡᠳᠦᠢᠪᠡᠷ  ᠁ ᠭᠡᠲᠡᠯ᠎ᠡ ᠡᠭᠦᠯᠡ ᠬᠡᠳᠦᠢᠪᠡᠷ ᠁》 ᠭᠡᠵᠦ  ᠰᠠᠶᠢ ᠶ᠋ᠢᠨ ᠰᠤᠯᠠᠷᠠᠭᠤᠯᠤᠭᠰᠠᠨ ᠠᠰᠠᠭᠤᠯᠲᠠ ᠪᠠᠨ 《 ᠭᠡᠲᠡᠯ᠎ᠡ  》ᠭᠡᠰᠡᠨ ᠦᠭᠡ ᠪᠡᠷ ᠨᠢᠭᠡ ᠯᠡ ᠤᠷᠪᠠᠭᠤᠯᠤᠭᠠᠳ ᠤᠯᠠᠮ ᠡᠷᠴᠢᠯᠡᠭᠦᠯᠦᠭᠰᠡᠨ ᠪᠢᠯᠡ ᠂ ᠲᠡᠷᠡ ᠨᠢ ᠬᠠᠷᠢᠨ ᠠᠰᠠᠭᠤᠯᠲᠠ ᠪᠠᠨ ᠨᠤᠲᠠᠯᠠᠬᠤ ᠭᠡᠰᠡᠨ ᠪᠢᠰᠢ ᠂ ᠦᠭᠡᠢᠰᠬᠡᠬᠦ ᠭᠡᠰᠡᠨ ᠪᠠᠢᠵᠠᠢ ᠂ ᠪᠦᠷ ᠡᠴᠦᠰ ᠲᠦ᠋ᠨᠢ ᠵᠠᠯᠭᠠᠪᠠᠷ ᠳᠥᠷᠪᠡᠨ  《ᠬᠡᠷᠬᠢᠨ ᠁ ᠠᠵᠢ ᠃ ᠬᠡᠷᠬᠢᠨ ᠁ ᠠᠵᠢ 》 ᠭᠡᠳᠡᠭ ᠢ᠋ᠶ᠋ᠡᠷ ᠠᠰᠠᠭᠤᠯᠲᠠ ᠪᠠᠨ ᠪᠦᠷᠢᠨ ᠦᠭᠡᠢᠰᠬᠡᠵᠡᠢ ᠃ ᠭᠡᠲᠡᠯ᠎ᠡ ᠪᠦᠷᠢᠨ ᠦᠭᠡᠢᠰᠬᠡᠭᠰᠡᠨ ᠶᠠᠪᠤᠳᠠᠯ ᠪᠣᠯ ᠨᠡᠩ ᠬᠦᠴᠦᠲᠡᠢ ᠪᠡᠷ ᠨᠤᠲᠠᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠠᠵᠢ ᠂ ᠲᠡᠭᠡᠭᠡᠳ ᠳᠠᠷᠠᠭᠠᠴᠢ ᠶ᠋ᠢᠨ ᠪᠠᠳᠠᠭ ᠲᠤ᠌ ᠄ 《 ᠯᠢᠩᠪᠦ ᠶ᠋ᠢᠨ ᠣᠷᠬᠢᠯᠭ᠎ᠠ ᠪᠠᠷ ᠴᠢᠨᠳᠠᠭᠠᠨ ᠬᠠᠯᠢᠶ᠎ᠠ ᠠᠶᠠᠷᠬᠠᠨ ᠨᠡᠭᠦᠵᠦ ᠂ ᠳᠠᠭᠤᠤ ᠶ᠋ᠢᠨ ᠬᠠᠩᠭᠢᠨᠠᠭ᠎ᠠ ᠪᠠᠷ ᠮᠢᠨᠳᠠᠰᠤᠨ ᠳᠣᠯᠭᠢᠶ᠎ᠠ ᠬᠥᠭᠡᠰᠦᠷᠡᠨ  ᠴᠠᠢᠯᠵᠠᠨ᠎ᠠ ᠁ 》 ᠭᠡᠵᠦ ᠠᠯᠢ ᠣᠯᠠᠨ ᠤᠷᠠᠨ ᠠᠰᠠᠭᠤᠯᠲᠠ ᠂ ᠠᠯᠢ ᠣᠯᠠᠨ ᠰᠤᠯᠠᠳᠬᠠᠭᠰᠠᠨ ᠠᠰᠠᠭᠤᠯᠲᠠ  ᠂ᠴᠢᠩᠭᠠᠳᠬᠠᠭᠰᠠᠨ ᠠᠰᠠᠭᠤᠯᠲᠠ ᠂ ᠠᠯᠢ ᠣᠯᠠᠨ ᠦᠭᠡᠢᠰᠬᠡᠯ ᠦ᠋ᠨ ᠢ᠋ᠶ᠋ᠡᠨ ᠬᠠᠷᠢᠭᠤ ᠳ᠋ᠤ᠌ ᠬᠥᠭᠡᠰᠦᠷᠡᠨ ᠴᠠᠢᠯᠵᠠᠨ ᠠᠢᠰᠤᠢ ᠨᠢ ᠰᠤᠪᠤᠳ  ᠴᠤ᠌ ᠪᠢᠰᠢ ᠂ ᠡᠦᠲᠦ ᠴᠦ᠍ ᠪᠢᠰᠢ ᠂ ᠬᠥᠪᠥᠩ ᠴᠦ᠍ ᠪᠢᠰᠢ ᠂ ᠡᠭᠦᠯᠡ  ᠴᠦ᠍ ᠪᠢᠰᠢ ᠂ ᠬᠠᠷᠢᠨ ᠬᠣᠨᠢᠨ ᠰᠦᠷᠦᠭ  ᠶᠦ᠍ᠮ ᠪᠠᠢᠨ᠎ᠠ ᠭᠡᠰᠡᠨ ᠢ᠋ᠶ᠋ᠡᠨ ᠲᠣᠳᠣᠷᠠᠭᠤᠯᠵᠠᠢ ᠃ ᠡᠨᠡ ᠮᠡᠲᠦ ᠂ ᠬᠣᠣᠰᠯᠠᠯ ᠂ ᠵᠡᠷᠭᠡᠴᠡᠭᠦᠯᠦᠯ ᠂ ᠤᠭᠰᠠᠷᠠᠭᠤᠯᠤᠯ ᠢ᠋ ᠬᠡᠷᠡᠭᠯᠡᠭᠰᠡᠨ ᠨᠢ ᠵᠣᠬᠢᠶᠠᠯ ᠤ᠋ᠨ ᠠᠭᠤᠷ  ᠠᠮᠢᠰᠬᠤᠯ ᠢ᠋ ᠥᠳᠬᠡᠷᠡᠭᠦᠯᠦᠨ ᠵᠤᠵᠠᠭᠠᠳᠬᠠᠬᠤ ᠳ᠋ᠤ᠌ ᠂ ᠵᠣᠬᠢᠶᠠᠯ ᠤ᠋ᠨ ᠤᠳᠬ᠎ᠠ ᠰᠠᠨᠠᠭ᠎ᠠ ᠶ᠋ᠢ ᠭᠦᠨᠵᠡᠭᠡᠢᠷᠡᠭᠦᠯᠦᠨ ᠳᠣᠪᠣᠢᠯᠭᠠᠬᠤ ᠳ᠋ᠤ᠌ ᠂ ᠵᠣᠬᠢᠶᠠᠯ  ᠤ᠋ᠨ ᠥᠩᠭᠡ ᠭᠢᠯᠪᠠᠭ᠎ᠠ ᠶ᠋ᠢ  ᠭᠢᠯᠠᠰᠠᠭᠤᠯᠤᠨ  ᠲᠤᠶᠠᠭᠠᠷᠠᠭᠤᠯᠬᠤ ᠳ᠋ᠤ᠌ ᠂ ᠵᠣᠬᠢᠶᠠᠯ ᠳ᠋ᠤ᠌ ᠬᠥᠭ ᠠᠶᠠᠰ ᠢ᠋ ᠬᠦᠴᠦᠵᠢᠭᠦᠯᠦᠨ ᠨᠡᠮᠡᠭᠳᠡᠭᠦᠯᠬᠦ ᠳ᠋ᠦ᠍ ᠴᠥᠮ ᠵᠦᠢᠷᠯᠡᠰᠢ ᠦᠭᠡᠢ ᠠᠴᠢ ᠦᠢᠯᠡᠳᠦᠯ ᠦᠵᠡᠭᠦᠯᠦᠭᠰᠡᠨ ᠪᠠᠢᠳᠠᠭ ᠃ ᠨᠢᠭᠡᠨ ᠬᠡᠰᠡᠭ ᠪᠠᠳᠠᠭ ᠲᠤ᠌ ᠠᠪᠴᠤ ᠬᠡᠯᠡᠪᠡᠯ ᠬᠣᠣᠰᠯᠠᠯ ᠂ ᠵᠡᠷᠭᠡᠴᠡᠭᠦᠯᠦᠯ ᠂  ᠤᠭᠰᠠᠷᠠᠭᠤᠯᠤᠯ ᠨᠢ ᠡᠢᠮᠦ ᠪᠠᠢᠳᠠᠭ ᠂ ᠬᠣᠯᠪᠣᠭ᠎ᠠ ᠬᠣᠣᠰ ᠥᠭᠦᠯᠡᠪᠦᠷᠢ ᠳ᠋ᠦ᠍ ᠠᠪᠴᠤ ᠬᠡᠯᠡᠬᠦ  ᠶᠦ᠍ᠮ ᠪᠣᠯ ᠨᠡᠩ ᠨᠡᠢᠳᠡᠮ ᠬᠠᠷᠠᠭᠳᠠᠨ᠎ᠠ  ᠃ 《 ᠣᠷᠣᠭ᠎ᠠ  ᠪᠤᠰᠬᠠᠭ᠎ᠠ ᠣᠨ ᠰᠠᠷ᠎ᠠ ᠂ ᠤᠷᠲᠤ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ ᠮᠡᠲᠦ ᠃ ᠤᠯᠠᠷᠢᠨ ᠨᠢᠰᠬᠦ ᠲᠡᠦᠬᠡ ᠶ᠋ᠢᠨ ᠬᠦᠷᠳᠦ ᠂ ᠥᠷᠭᠡᠨ ᠮᠥᠷᠡᠨ ᠦ᠌ ᠬᠦᠷᠬᠢᠷ᠎ᠡ ᠠᠳᠠᠯᠢ ᠃ 》 (  ᠪᠦᠬᠡᠲᠡᠮᠦᠷ᠄ 《 ᠨᠤᠲᠤᠭ ᠤ᠋ᠨ ᠬᠥᠷᠥᠰᠥ  》) 《 ᠰᠢᠷ᠎ᠠ ᠡᠯᠡᠰᠦ ᠰᠢᠷᠣᠢ ᠶ᠋ᠢᠨ ᠬᠠᠨᠵᠤ ᠨᠠᠳᠠ ᠶ᠋ᠢ ᠲᠤᠰᠴᠠᠢ ᠃ ᠴᠠᠭᠠᠨ ᠬᠤᠮᠠᠭ ᠴᠠᠷᠠᠰᠤᠨ ᠥᠯᠥᠭᠡᠢ ᠨᠠᠳᠠ ᠶ᠋ᠢ ᠲᠣᠷᠨᠢᠭᠤᠯᠵᠠᠢ ᠃ ᠪᠥᠭᠡᠯ ᠪᠥᠭᠡᠯ  —ᠭᠠᠵᠠᠷ ᠳᠡᠭᠡᠷ᠎ᠡ ᠪᠡᠨ ᠪᠢ  ᠭᠠᠨᠠᠢᠨ ᠵᠣᠭᠰᠣᠯ᠎ᠠ  ᠃ᠪᠥᠮᠪᠥᠷ ᠪᠥᠮᠪᠥᠷ  —ᠬᠥᠷᠥᠰᠥᠨ ᠳᠡᠭᠡᠷ᠎ᠡ ᠪᠡᠨ ᠪᠢ ᠬᠥᠯ ᠳ᠋ᠦ᠍ ᠣᠷᠣᠯ᠎ᠠ ᠃ ᠤᠨᠠᠭᠰᠠᠨ ᠰᠢᠷᠣᠢ ᠳ᠋ᠤ᠌ ᠮᠢᠨᠢ ᠬᠠᠢᠷ ᠲᠠᠢ ᠰᠠᠢᠷ ᠲᠠᠢ  ᠴᠤ᠌ ᠂ ᠤᠷᠭᠤᠭᠰᠠᠨ ᠵᠢᠷᠦᠬᠡᠨ ᠳ᠋ᠦ᠍ ᠮᠢᠨᠢ ᠬᠠᠢᠯ ᠲᠠᠢ  ᠤᠢᠯ ᠲᠠᠢ  ᠴᠤ᠌ ! ᠠ ᠂ ᠬᠠᠯᠠᠭᠠᠳ  ᠰᠢᠷᠣᠢ ! 》  ( ᠲ  .ᠪᠤᠶᠠᠨ ᠄ 《 ᠬᠠᠯᠠᠭᠤᠨ ᠰᠢᠷᠣᠢ  》 )  《 ᠬᠠᠨ᠎ᠠ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠮᠥᠯᠬᠥᠭᠰᠡᠨ ᠮᠥᠷ ᠢ᠋ ᠂ ᠬᠠᠲᠠᠪᠴᠢ ᠳᠠᠪᠠᠭᠠᠳ ᠭᠢᠰᠬᠢᠭᠰᠡᠨ ᠮᠥᠷ ᠢ᠋ ᠂ ᠬᠠᠨᠠᠭᠠᠷ ᠲᠠᠯ᠎ᠠ ᠪᠠᠷ ᠲᠣᠭᠯᠠᠭᠰᠠᠨ ᠮᠥᠷ ᠢ᠋ ᠂ ᠬᠠᠩᠭᠠᠯ ᠡᠮᠨᠢᠭ ᠴᠢᠬᠢᠳᠡᠭᠰᠡᠨ ᠮᠥᠷ ᠢ᠋ ᠬᠥᠷᠥᠰᠥᠨ ᠳ᠋ᠡᠭᠡᠨ ᠦᠯᠡᠳᠡᠭᠡᠭᠰᠡᠨ ᠨᠤᠲᠤᠭ ᠮᠢᠨᠢ ᠃ ᠪᠣᠷᠣ ᠮᠥᠷ ᠮᠢᠨᠢ  ᠲᠡᠨᠳᠡ ᠂ᠪᠣᠰᠤᠭ᠎ᠠ ᠪᠡᠶ᠎ᠡ ᠮᠢᠨᠢ ᠠᠳᠠ  ᠃ ᠪᠣᠷᠣ ᠮᠥᠷ ᠮᠢᠨᠦ ᠥᠮᠴᠢ ᠂ ᠪᠣᠰᠤᠭ᠎ᠠ ᠪᠡᠶ᠎ᠡ ᠴᠢᠨᠦ ᠥᠮᠴᠢ  ᠃》 (  ᠣ ᠪᠤᠶᠠᠨ᠋ᠥ᠌ᠯᠵᠡᠢ᠄  《 ᠡᠬᠡ ᠨᠤᠳᠤᠨ ᠤ᠋ ᠨᠠᠢᠷᠠᠯ  》 ) ᠡᠢᠮᠦᠷᠬᠦ  ᠵᠢᠱ᠌ᠢᠶ᠎ᠡ ᠲᠤᠰ ᠲᠡᠭᠦᠪᠦᠷᠢ ᠳ᠋ᠦ᠍ ᠤᠴᠢᠷ ᠦᠭᠡᠢ ᠣᠯᠠᠨ ᠪᠠᠢᠨ᠎ᠠ ᠂ ᠳᠡᠭᠡᠷᠡᠬᠢ ᠪᠣᠯ ᠲᠥᠯᠥᠭᠡᠯᠡᠭᠴᠢ ᠴᠢᠨᠠᠷᠲᠠᠢ  ᠵᠢᠱ᠌ᠢᠶ᠎ᠡ ᠪᠢᠰᠢ  ᠂ ᠵᠠᠬ᠎ᠠ ᠵᠣᠬ᠎ᠠ ᠠ᠋ᠴᠠ ᠨᠢ ᠭᠠᠷ ᠤ᠋ᠨ ᠠᠶ᠎ᠠ ᠪᠠᠷ ᠲᠠᠲᠠᠭᠰᠠᠨ  ᠵᠢᠱ᠌ᠢᠶ᠎ᠡ ᠲᠡᠳᠦᠢ  ᠶᠦ᠍ᠮ ᠃ ᠡᠭᠦᠨ ᠡᠴᠡ ᠪᠢᠳᠡ ᠂ ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠨ ᠬᠡᠯᠡ ᠬᠡᠯᠡᠯᠭᠡ ᠶ᠋ᠢ ᠰᠠᠢᠵᠢᠷᠠᠭᠤᠯᠬᠤ ᠳ᠋ᠤ᠌ ᠬᠣᠣᠰᠯᠠᠯ ᠂ ᠵᠡᠷᠭᠡᠴᠡᠭᠦᠯᠦᠯ ᠂ ᠤᠭᠰᠠᠷᠠᠭᠤᠯᠤᠯ ᠢ᠋ ᠂ ᠠᠳᠠᠯᠢᠳᠬᠠᠯ ᠂ ᠵᠦᠢᠷᠯᠡᠯ ᠂ ᠴᠢᠮᠡᠭᠯᠡᠯ ᠢ᠋ ᠣᠯᠠᠨᠲᠠ ᠬᠡᠷᠡᠭᠯᠡᠬᠦ ᠨᠢ ᠨᠢᠭᠡᠨ ᠵᠢᠮ᠎ᠡ ᠶᠣᠰᠣᠴᠢ ᠴᠢᠨᠠᠷᠲᠠᠢ ᠠᠷᠭ᠎ᠠ ᠪᠠᠷᠢᠯ ᠪᠣᠯᠤᠨ᠎ᠠ ᠭᠡᠰᠡᠨ ᠳ᠋ᠦᠩ ᠢ᠋ ᠭᠠᠷᠭᠠᠵᠤ ᠪᠣᠯᠬᠤ ᠶᠤᠮ ᠃