ᠪᠡᠴᠢᠨ ᠪᠠᠭᠰᠢ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢ ᠭᠤᠷᠪᠠᠨᠲᠠ ᠳᠠᠷᠤᠭᠰᠠᠨ ᠨᠢ（ ᠬᠡᠯᠡ ᠪᠢᠴᠢᠭ – ᠶᠢᠰᠦᠳᠦᠭᠡᠷ ᠳᠡᠪᠲᠡᠷ） Бичин багш хохимойн шуламыг гурвантаа дарсан нь（ Хэл бичиг – Есдүгээр дэвтэр）
300ᠪᠡᠴᠢᠨ ᠪᠠᠭᠰᠢ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢ ᠭᠤᠷᠪᠠᠨᠲᠠ ᠳᠠᠷᠤᠭᠰᠠᠨ ᠨᠢ
ᠨᠢᠭᠡᠨ ᠡᠳᠦᠷ ᠲᠠᠩᠰᠤᠭ ᠯᠠᠮᠠ ᠪᠡᠴᠢᠨ᠂ ᠭᠠᠬᠠᠢ ᠪᠣᠯᠤᠨ ᠰᠢᠷᠣᠢ ᠶ᠋ᠢ ᠳᠠᠭᠠᠭᠤᠯᠤᠨ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠥᠨᠳᠥᠷ ᠠᠭᠤᠯᠠᠨ ᠤ᠋ ᠡᠮᠦᠨᠡ ᠬᠦᠷᠴᠦ ᠢᠷᠡᠪᠡ᠃ ᠦᠵᠡᠪᠡᠰᠦ ᠡᠨᠡ ᠠᠭᠤᠯᠠ ᠲᠩᠷᠢ ᠲᠤᠯᠤᠮᠠ ᠰᠡᠬᠦᠶ᠋ᠢᠨ ᠰᠦᠨᠳᠡᠷᠯᠡᠵᠦ᠂ ᠪᠡᠷᠬᠡ ᠪᠠᠷᠲᠠᠭᠠ ᠲᠦᠮᠡᠨ ᠳᠠᠪᠬᠤᠷ᠃ ᠡᠨᠡ ᠠᠭᠤᠯᠠᠨ ᠳ᠋ᠤᠷ ᠤᠯᠠᠷᠢᠵᠤ ᠬᠤᠪᠢᠷᠠᠬᠤ ᠳ᠋ᠠᠭᠠᠨ ᠴᠢᠳᠠᠮᠠᠭᠠᠢ᠂ ᠠᠷᠭᠠ ᠮᠡᠬᠡ ᠣᠯᠠᠨ᠂ ᠠᠮᠢᠲᠠᠨ ᠣᠯᠠᠨ ᠊ᠢ ᠬᠣᠣᠷᠯᠠᠳᠠᠭ ᠨᠢᠭᠡᠨ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠪᠣᠢ ᠠᠵᠤᠭᠤ᠃
ᠲᠠᠩᠰᠤᠭ ᠯᠠᠮᠠ ᠶ᠋ᠢ ᠢᠳᠡᠰᠦᠭᠡᠢ ᠭᠡᠮᠡᠨ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠨᠢᠭᠡᠨ ᠵᠠᠯᠠᠭᠤ ᠥᠬᠢᠨ ᠬᠤᠪᠢᠯᠵᠤ᠂ ᠠᠭᠤᠯᠠᠨ ᠠ᠋ᠴᠠ ᠪᠠᠭᠤᠵᠤ ᠲᠠᠩᠰᠤᠭ ᠯᠠᠮᠠ ᠶ᠋ᠢ ᠥᠳᠥᠭᠡᠪᠡ᠃ ᠲᠡᠷᠡ ᠬᠤᠸᠠᠷ ᠲᠠᠢ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠬᠠᠯᠠᠭᠤᠨ ᠠᠭᠤᠷ ᠪᠠᠭᠠᠭᠢᠭᠰᠠᠨ ᠨᠢᠭᠡ ᠰᠠᠭᠰᠤ ᠮᠠᠨᠲᠠᠤ ᠲᠣᠬᠣᠶ᠋ᠢᠯᠠᠵᠤ᠂ ᠲᠠᠩᠰᠤᠭ ᠯᠠᠮᠠ ᠶ᠋ᠢᠨ ᠵᠦᠭ ᠢᠨᠢᠶᠡᠭᠰᠡᠭᠡᠷ ᠢᠷᠡᠪᠡ᠃ ᠪᠡᠴᠢᠨ ᠪᠠᠭᠰᠢ ᠰᠢᠮᠨᠤ ᠶ᠋ᠢᠨ ᠦᠨᠦᠷ ᠊ᠢ ᠦᠨᠦᠷᠲᠡᠨ ᠮᠡᠳᠡᠵᠦ᠂ ᠲᠡᠭᠦᠨ ᠦ᠌ ᠡᠷᠳᠡᠨᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ᠷ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢᠨ ᠤᠭ ᠳᠦᠷᠰᠦ ᠲᠠᠨᠢᠭᠳᠠᠪᠠ᠃《 ᠶᠠᠮᠪᠠᠷ ᠪᠦᠳᠦᠭᠦᠨ ᠵᠢᠷᠦᠬᠡ ᠲᠡᠢ ᠰᠢᠮᠨᠤ ᠠᠵᠤᠭᠤ ! 》ᠭᠡᠮᠡᠨ ᠪᠡᠴᠢᠨ ᠪᠠᠭᠰᠢ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠵᠠᠩᠳᠤᠷᠴᠤ᠂ ᠪᠣᠯᠣᠳ ᠪᠠᠷᠢᠶᠠ ᠳᠠᠯᠠᠶ᠋ᠢᠵᠤ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢᠨ ᠲᠡᠷᠢᠭᠦᠨ ᠊ᠢ ᠪᠠᠷᠢᠨ ᠵᠠᠨᠴᠢᠪᠠ᠃ ᠫᠠᠰ ᠬᠢᠬᠦ ᠳᠠᠭᠤᠨ ᠭᠠᠷᠴᠤ ᠥᠨᠥᠬᠢ ᠥᠬᠢᠨ ᠢᠨᠤ ᠭᠠᠵᠠᠷ ᠲᠤᠷ ᠰᠠᠪᠠᠨ ᠤᠨᠠᠵᠤ ᠦᠬᠦᠪᠡᠢ᠃ ᠭᠡᠲᠡᠯᠡ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠦᠬᠦᠭᠰᠡᠨ ᠦᠭᠡᠢ᠂ ᠲᠡᠭᠦᠨ ᠦ᠌ ᠪᠤᠲᠠ ᠪᠡᠶᠡ ᠨᠢ ᠨᠢᠭᠡ ᠵᠤᠷᠪᠤᠰ ᠤᠲᠤᠭᠠ ᠪᠣᠯᠤᠨ ᠬᠤᠪᠢᠷᠠᠵᠤ ᠳᠤᠲᠠᠭᠠᠪᠠ᠃ ᠪᠡᠴᠢᠨ ᠪᠠᠭᠰᠢ ᠲᠡᠭᠦᠨ ᠦ᠌ ᠮᠡᠬᠡᠲᠦ ᠠᠷᠭᠠ ᠶ᠋ᠢ ᠮᠡᠳᠡᠭᠡᠳ ᠬᠣᠶ᠋ᠢᠨᠠ ᠠ᠋ᠴᠠ ᠨᠡᠬᠡᠰᠦᠭᠡᠢ ᠭᠡᠲᠡᠯᠡ ᠲᠠᠩᠰᠤᠭ ᠯᠠᠮᠠ ᠭᠠᠷ ᠠ᠋ᠴᠠ ᠲᠡᠳᠡᠨ ᠬᠣᠷᠢᠭᠯᠠᠵᠤ᠂ ᠰᠠᠢᠨ ᠬᠥᠮᠦᠨ ᠊ᠢ ᠠᠯᠠᠪᠠ ᠭᠡᠮᠡᠨ ᠵᠢᠮᠡᠯᠡᠪᠡ᠃
ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ᠂ ᠠᠭᠤᠯᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠨᠢᠭᠡᠨ ᠡᠮᠡᠭᠡᠨ ᠲᠠᠶᠠᠭ ᠲᠤᠯᠵᠤ᠂ ᠥᠬᠢᠨ ᠮᠢᠨᠢ ᠠ᠋ ! ᠭᠡᠵᠦ ᠭᠠᠰᠠᠯᠤᠭᠰᠠᠭᠠᠷ ᠭᠠᠷᠴᠤ ᠢᠷᠡᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠪᠡᠴᠢᠨ ᠪᠠᠭᠰᠢ ᠡᠮᠦᠨᠡᠰᠢ ᠠᠯᠬᠤᠵᠤ᠄ 《 ᠰᠢᠮᠨᠤ ᠴᠢ ᠪᠠᠰᠠ ᠬᠦᠷᠦᠭᠡᠳ ᠢᠷᠡᠪᠡ ᠦᠦ᠂ ᠰᠢᠳᠡᠮ ᠦᠵᠡ! 》 ᠭᠡᠮᠡᠨ ᠪᠣᠯᠣᠳ ᠪᠠᠷᠢᠶᠠ ᠪᠠᠷ ᠵᠠᠨᠴᠢᠬᠤᠢ ᠳ᠋ᠤᠷ ᠲᠡᠷᠡ ᠡᠮᠡᠭᠡᠨ ᠭᠠᠵᠠᠷ ᠲᠤ᠌ ᠰᠠᠪᠠᠨ ᠤᠨᠠᠪᠠ᠃ ᠡᠨᠡ ᠪᠣᠯ ᠪᠠᠰᠠ ᠴᠤ᠌ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢᠨ ᠪᠡᠶᠡ ᠮᠤᠯᠲᠤᠷᠠᠬᠤ ᠠᠷᠭᠠ ᠮᠥᠨ᠂ ᠪᠤᠲᠠ ᠪᠡᠶᠡ ᠨᠢ ᠬᠡᠵᠢᠶᠡᠨᠡᠢ ᠨᠢᠭᠡᠨ ᠵᠤᠷᠪᠤᠰ ᠴᠠᠭᠠᠨ ᠤᠲᠤᠭᠠ ᠪᠣᠯᠤᠨ ᠳᠤᠲᠠᠭᠠᠵᠤᠬᠤᠢ᠃ ᠪᠡᠴᠢᠨ ᠪᠠᠭᠰᠢ ᠨᠡᠬᠡᠰᠦᠭᠡᠢ ᠭᠡᠲᠡᠯᠡ ᠲᠠᠩᠰᠤᠭ ᠯᠠᠮᠠ ᠪᠠᠰᠠ ᠬᠣᠷᠢᠭᠯᠠᠪᠠ᠃ ᠲᠠᠩᠰᠤᠭ ᠯᠠᠮᠠ᠄《 ᠴᠢ ᠡᠬᠡ ᠥᠬᠢᠨ ᠬᠣᠶᠠᠭᠤᠯᠠ ᠶ᠋ᠢ ᠪᠦᠷ ᠠᠯᠠᠴᠢᠬᠠᠪᠠ᠂ ᠶᠣᠰᠣᠨ ᠳ᠋ᠤᠷ ᠨᠡᠶ᠋ᠢᠴᠡᠨᠡ ᠤᠤ? 》ᠭᠡᠮᠡᠨ ᠵᠠᠩᠳᠤᠷᠤᠭᠰᠠᠨ ᠳ᠋ᠤᠷ᠂ ᠪᠡᠴᠢᠨ ᠪᠠᠭᠰᠢ᠄《 ᠪᠠᠭᠰᠢ ᠲᠠ ᠮᠡᠬᠡᠯᠡᠭᠳᠡᠪᠡ᠂ ᠲᠡᠳᠡ ᠡᠬᠡ ᠥᠬᠢᠨ ᠪᠢᠰᠢ᠂ ᠪᠦᠷ ᠨᠢᠭᠡ ᠯᠡ ᠰᠢᠮᠨᠤ ᠮᠥᠨ ! 》ᠭᠡᠵᠦ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠳ᠋ᠦ᠍ ᠲᠠᠩᠰᠤᠭ ᠯᠠᠮᠠ ᠦᠯᠦ ᠢᠲᠡᠭᠡᠨᠡ᠃
ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠬᠣᠶᠠᠷ ᠤᠳᠠᠭᠠ ᠪᠦᠷ ᠤᠭ ᠳᠦᠷᠰᠦ ᠪᠡᠨ ᠲᠠᠨᠢᠭᠳᠠᠵᠤ᠂ ᠠᠮᠢ ᠪᠠᠨ ᠴᠤ᠌ ᠡᠰᠡ ᠯᠡ ᠠᠯᠳᠠᠬᠤ ᠰᠢᠬᠠᠭᠰᠠᠨ ᠲᠤᠯᠠ ᠪᠡᠴᠢᠨ ᠪᠠᠭᠰᠢ ᠪᠠᠶ᠋ᠢᠬᠰᠠᠨ ᠴᠠᠭ ᠲᠤ᠌ ᠲᠠᠩᠰᠤᠭ ᠯᠠᠮᠠ ᠶ᠋ᠢ ᠢᠳᠡᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠮᠡᠳᠡᠪᠡ᠃ ᠢᠩᠭᠢᠭᠡᠳ ᠲᠡᠷᠡ ᠳᠠᠬᠢᠨ ᠠᠷᠭᠠ ᠬᠡᠷᠡᠭᠯᠡᠵᠦ᠂ ᠲᠠᠩᠰᠤᠭ ᠯᠠᠮᠠ ᠶ᠋ᠢ ᠥᠳᠥᠭᠡᠵᠦ᠂ ᠪᠡᠴᠢᠨ ᠊ᠢ ᠬᠥᠭᠡᠭᠡᠨ ᠶᠠᠪᠤᠭᠤᠯᠰᠤᠭᠠᠢ ᠭᠡᠵᠦ ᠪᠣᠳᠣᠪᠠ᠃
ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠨᠢᠭᠡᠨ ᠡᠪᠦᠭᠡᠨ ᠪᠣᠯᠤᠨ ᠬᠤᠪᠢᠯᠵᠤ ᠲᠠᠶᠠᠭ ᠲᠤᠯᠤᠭᠰᠠᠭᠠᠷ ᠲᠠᠩᠰᠤᠭ ᠯᠠᠮᠠ ᠶ᠋ᠢ ᠡᠷᠢᠷᠡ ᠢᠷᠡᠪᠡ᠃ ᠪᠡᠴᠢᠨ ᠪᠠᠭᠰᠢ ᠪᠠᠰᠠ ᠲᠡᠭᠦᠨ ᠦ᠌ ᠤᠭ ᠳᠦᠷᠰᠦ ᠶ᠋ᠢ ᠲᠠᠨᠢᠵᠤ ᠄《 ᠠᠶᠤᠮᠰᠢᠭ ᠦᠭᠡᠢ ᠰᠢᠮᠨᠤ ᠴᠢ ᠬᠡᠳᠦᠢ ᠠᠷᠪᠢᠨ ᠠᠷᠭᠠ ᠬᠡᠷᠡᠭᠯᠡᠵᠦ᠂ ᠶᠠᠭᠠᠬᠢᠵᠤ ᠬᠤᠪᠢᠯᠤᠭᠰᠠᠨ ᠴᠤ᠌ ᠡᠴᠢᠭᠡ ᠪᠡᠨ ᠬᠠᠭᠤᠷᠴᠤ ᠦᠯᠦ ᠴᠢᠳᠠᠮᠤᠢ ! 》 ᠭᠡᠮᠡᠨ ᠵᠠᠩᠳᠤᠷᠴᠤ᠂ ᠪᠣᠯᠣᠳ ᠪᠠᠷᠢᠶᠠ ᠪᠠᠨ ᠳᠠᠯᠠᠶ᠋ᠢᠨ ᠣᠷᠣᠪᠠ᠃ ᠲᠡᠷᠡ ᠡᠪᠦᠭᠡᠨ᠄《 ᠠᠮᠢ ᠠᠪᠤᠷᠠ ! ᠠᠮᠢ ᠠᠪᠤᠷᠠ ! 》 ᠭᠡᠮᠡᠨ ᠣᠷᠢᠯᠠᠭᠰᠠᠨ ᠳ᠋ᠤᠷ ᠲᠠᠩᠰᠤᠭ ᠯᠠᠮᠠ ᠶᠠᠭᠠᠷᠠᠨ ᠪᠡᠴᠢᠨ ᠊ᠢ ᠬᠣᠷᠢᠭᠯᠠᠪᠠ᠃ ᠲᠡᠷᠡ ᠡᠪᠦᠭᠡᠨ ᠪᠡᠴᠢᠨ ᠦ᠌ ᠡᠮᠦᠨᠡ ᠢᠷᠡᠵᠦ᠄《 ᠴᠢ ᠮᠢᠨᠦ ᠬᠥᠭᠰᠢᠨ ᠪᠣᠯᠤᠨ ᠥᠬᠢᠨ ᠊ᠢ ᠴᠥᠮ ᠠᠯᠠᠴᠢᠬᠠᠭᠰᠠᠨ ᠪᠣᠯᠬᠣᠷ ᠪᠢ ᠪᠠᠰᠠ ᠬᠥᠭᠰᠢᠨ ᠠᠮᠢ ᠪᠠᠨ ᠴᠦᠯᠡᠵᠦ᠂ ᠴᠢᠮᠠ ᠲᠠᠢ ᠳᠡᠭᠡᠷᠡ ᠳᠣᠣᠷᠠ ᠪᠠᠨ ᠦᠵᠡᠯᠴᠡᠶᠡ ! 》ᠭᠡᠵᠦ ᠪᠡᠴᠢᠨ ᠪᠠᠭᠰᠢ ᠶ᠋ᠢ ᠥᠳᠥᠭᠡᠪᠡ᠃ ᠡᠭᠦᠨ ᠳ᠋ᠦ᠍ ᠪᠡᠴᠢᠨ ᠪᠠᠭᠰᠢ ᠴᠡᠭᠡᠵᠢ ᠪᠡᠨ ᠳᠡᠯᠪᠡᠷᠡᠲᠡᠯᠡ ᠠᠭᠤᠷᠯᠠᠵᠤ᠄《 ᠴᠢ ᠶᠠᠭᠠᠬᠢᠵᠤ ᠬᠤᠪᠢᠯᠤᠭᠰᠠᠨ ᠴᠤ᠌ ᠤᠭ ᠳᠦᠷᠰᠦ ᠴᠢᠨᠢ ᠲᠠᠨᠢᠭᠳᠠᠬᠤ ᠶᠤᠮ ! 》 ᠭᠡᠵᠦ ᠵᠠᠩᠳᠤᠷᠤᠨ ᠬᠡᠯᠡᠭᠡᠳ ᠪᠣᠯᠣᠳ ᠪᠠᠷᠢᠶᠠ ᠳᠠᠯᠠᠶ᠋ᠢᠨ ᠵᠠᠨᠴᠢᠰᠤᠭᠠᠢ ᠭᠡᠪᠡ᠃ ᠲᠠᠩᠰᠤᠭ ᠯᠠᠮᠠ ᠲᠡᠷᠡ ᠡᠪᠦᠭᠡᠨ ᠊ᠢ ᠬᠠᠮᠠᠭᠠᠯᠠᠵᠤ᠄《 ᠬᠥᠮᠦᠨ ᠬᠡᠮᠡᠭᠴᠢ ᠨᠢᠭᠦᠯᠡᠰᠬᠦᠢ ᠰᠡᠳᠬᠢᠯ ᠊ᠢ ᠰᠢᠲᠦᠮᠦᠢ᠂ ᠰᠢᠮᠨᠤ ᠶ᠋ᠢ ᠪᠣᠯᠪᠠᠴᠤ ᠲᠡᠭᠦᠨ ᠊ᠢ ᠢᠳᠬᠠᠨ ᠰᠠᠢᠨ ᠵᠦᠭ ᠲᠦ᠍ᠷ ᠣᠷᠣᠭᠤᠯᠪᠠᠰᠤ ᠵᠣᠬᠢᠨᠠ᠂ ᠬᠡᠷᠬᠢᠨ ᠠᠯᠠᠵᠤ ᠪᠣᠯᠬᠤ ᠪᠣᠢ? 》 ᠭᠡᠵᠦ ᠴᠢᠷᠠᠢ ᠲᠠᠯᠪᠢᠨ ᠬᠡᠯᠡᠨᠡ᠃ ᠪᠡᠴᠢᠨ ᠪᠠᠭᠰᠢ᠄ 《 ᠰᠢᠮᠨᠤ ᠬᠥᠮᠦᠨ ᠢᠳᠡᠬᠦ ᠵᠠᠩ ᠢ᠋ᠶ᠋ᠠᠨ ᠭᠡᠭᠡᠬᠦ ᠦᠭᠡᠢ ᠶᠦ᠍ᠮ᠂ ᠠᠪᠤᠷᠠᠯᠠ ᠭᠡᠳ ᠴᠢᠮᠠ ᠶ᠋ᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠦᠷᠦ ᠡᠪᠡᠳᠬᠦ ᠦᠭᠡᠢ ᠶᠦ᠍ᠮ᠂ ᠴᠢᠳᠬᠥᠷ ᠰᠢᠮᠨᠤ ᠶ᠋ᠢ ᠡᠨᠡᠷᠢᠵᠦ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ ! 》 ᠭᠡᠵᠦ ᠬᠡᠯᠡᠪᠡ᠃ ᠲᠡᠷᠡ ᠰᠢᠮᠨᠤ ᠪᠠᠰᠠ ᠴᠠᠯᠴᠢᠰᠤᠭᠠᠢ ᠭᠡᠲᠡᠯᠡ ᠪᠡᠴᠢᠨ ᠪᠠᠭᠰᠢ ᠬᠡᠵᠢᠶᠡᠨᠡᠢ ᠠᠭᠤᠷ ᠢ᠋ᠶ᠋ᠠᠨ ᠳᠠᠷᠤᠨ ᠶᠠᠳᠠᠵᠤ᠂ ᠲᠠᠩᠰᠤᠭ ᠠ᠋ᠴᠠ ᠪᠡᠶᠡ ᠮᠤᠯᠲᠤᠷᠠᠨ᠂ ᠲᠡᠷᠡ ᠡᠪᠦᠭᠡᠨ ᠊ᠢ ᠠᠭᠤᠯᠠ ᠶ᠋ᠢᠨ ᠵᠡᠪᠡ ᠤᠷᠤᠭᠤ ᠵᠠᠨᠴᠢᠨ ᠤᠨᠠᠭᠠᠪᠠ᠃ ᠪᠡᠴᠢᠨ ᠪᠠᠭᠰᠢ ᠨᠡᠬᠡᠰᠦᠭᠡᠢ ᠭᠡᠲᠡᠯᠡ ᠲᠠᠩᠰᠤᠭ ᠯᠠᠮᠠ ᠪᠠᠰᠠ ᠬᠣᠷᠢᠭᠯᠠᠭᠰᠠᠨ ᠪᠣᠯᠬᠣᠷ ᠲᠡᠷᠡ ᠰᠢᠮᠨᠤ ᠳᠤᠲᠠᠭᠠᠨ ᠵᠠᠪᠳᠤᠪᠠ᠃
ᠲᠠᠩᠰᠤᠭ ᠯᠠᠮᠠ ᠰᠢᠮᠨᠤ ᠶ᠋ᠢ ᠲᠠᠨᠢᠬᠤ ᠦᠭᠡᠢ ᠮᠥᠷᠲᠡᠭᠡᠨ ᠰᠢᠮᠨᠤ ᠶ᠋ᠢ ᠠᠯᠠᠬᠤ ᠶ᠋ᠢ ᠴᠦ᠍ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ᠂ ᠡᠴᠦᠰ ᠲᠡᠭᠡᠨ ᠰᠢᠮᠨᠤ ᠲᠠᠢ ᠡᠷᠡᠯᠬᠡᠭ ᠲᠡᠮᠡᠴᠡᠳᠡᠭ ᠪᠡᠴᠢᠨ ᠪᠠᠭᠰᠢ ᠶ᠋ᠢ ᠴᠡᠴᠡᠭ ᠵᠢᠮᠢᠰ ᠦ᠋ᠨ ᠠᠭᠤᠯᠠᠨ ᠳ᠋ᠤᠨᠢ ᠬᠥᠭᠡᠭᠡᠨ ᠶᠠᠪᠤᠭᠤᠯᠪᠠ᠃
ᠪᠡᠴᠢᠨ ᠪᠠᠭᠰᠢ ᠶᠠᠪᠤᠭᠰᠠᠨ ᠤ᠋ ᠬᠣᠶ᠋ᠢᠨᠠ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠠᠪ ᠠᠮᠠᠷᠬᠠᠨ ᠢ᠋ᠶ᠋ᠠᠷ ᠲᠠᠩᠰᠤᠭ ᠪᠠᠭᠰᠢ ᠱᠠᠪᠢ ᠨᠠᠷ ᠊ᠢ ᠠᠭᠤᠢ ᠳ᠋ᠠᠭᠠᠨ ᠪᠠᠷᠢᠨ ᠠᠪᠴᠢᠷᠠᠵᠤ᠂ ᠪᠢᠴᠢᠬᠠᠨ ᠰᠢᠮᠨᠤ ᠪᠠᠨ ᠵᠠᠷᠤᠵᠤ᠂ ᠡᠬᠡ ᠪᠡᠨ ᠵᠠᠯᠠᠭᠤᠯᠵᠤ᠂ ᠲᠠᠩᠰᠤᠭ ᠤ᠋ᠨ ᠮᠢᠬᠠ ᠶ᠋ᠢ ᠬᠠᠮᠲᠤ ᠢᠳᠡᠰᠦᠭᠡᠢ ᠭᠡᠪᠡ᠃
ᠭᠠᠬᠠᠢ ᠪᠠᠭᠰᠢ ᠴᠢᠳᠠᠯ ᠮᠡᠬᠦᠰᠳᠡᠵᠦ ᠠᠭᠤᠢ ᠠ᠋ᠴᠠ ᠳᠤᠲᠠᠭᠠᠨ ᠭᠠᠷᠴᠤ᠂ ᠨᠣᠮ ᠤ᠋ᠨ ᠠᠬᠠ ᠪᠡᠴᠢᠨ ᠊ᠢ ᠵᠠᠯᠠᠨ ᠠᠪᠴᠢᠷᠠᠵᠤ᠂ ᠪᠠᠭᠰᠢ ᠪᠠᠨ ᠠᠪᠤᠷᠠᠨ ᠭᠠᠷᠭᠠᠰᠤᠭᠠᠢ ᠭᠡᠮᠡᠨ ᠴᠡᠴᠡᠭ ᠵᠢᠮᠢᠰ ᠦ᠋ᠨ ᠠᠭᠤᠯᠠ ᠶ᠋ᠢ ᠰᠢᠭᠤᠳ ᠴᠢᠭᠯᠡᠨ ᠶᠠᠪᠤᠪᠠ᠃
ᠪᠡᠴᠢᠨ ᠪᠠᠭᠰᠢ ᠴᠡᠴᠡᠭ ᠵᠢᠮᠢᠰ ᠦ᠋ᠨ ᠠᠭᠤᠯᠠᠨ ᠳ᠋ᠠᠭᠠᠨ ᠢᠷᠡᠭᠰᠡᠨ ᠤ᠋ ᠳᠠᠷᠠᠭᠠ ᠰᠢᠮᠨᠤ ᠶ᠋ᠢ ᠠᠯᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠳ᠋ᠡᠭᠡᠨ ᠳᠣᠲᠣᠷᠠ ᠨᠢ ᠶᠡᠷᠦ ᠠᠮᠤᠷ ᠦᠭᠡᠢ ᠪᠠᠶ᠋ᠢᠪᠠ᠃ ᠡᠳᠦᠭᠡ ᠮᠠᠭᠤ ᠰᠢᠮᠨᠤ ᠪᠠᠰᠠ ᠲᠦᠢᠳᠴᠦ ᠪᠠᠶ᠋ᠢᠬᠤ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠰᠢᠮᠨᠤ ᠶ᠋ᠢᠨ ᠠᠭᠤᠢ ᠶ᠋ᠢ ᠴᠢᠭᠯᠡᠨ ᠣᠳᠪᠠ᠃ ᠰᠢᠮᠨᠤ ᠶ᠋ᠢᠨ ᠠᠭᠤᠢ ᠳ᠋ᠤ᠌ ᠣᠶ᠋ᠢᠷᠠᠲᠤᠭᠠᠳ ᠥᠨᠥᠬᠢ ᠬᠥᠭᠰᠢᠨ ᠰᠢᠮᠨᠤ — ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢᠨ ᠡᠬᠡ ᠲᠡᠢ ᠤᠴᠠᠷᠠᠪᠠ᠃ ᠪᠡᠴᠢᠨ ᠪᠠᠭᠰᠢ ᠲᠡᠷᠡ ᠳᠣᠣᠷᠠ ᠨᠢ ᠬᠥᠭᠰᠢᠨ ᠰᠢᠮᠨᠤ ᠶ᠋ᠢ ᠵᠠᠨᠴᠢᠨ ᠠᠯᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠦ᠌ ᠳᠦᠷᠢ ᠪᠡᠷ ᠬᠤᠪᠢᠯᠵᠤ᠂ ᠠᠷᠭᠠ ᠬᠡᠷᠡᠭᠯᠡᠨ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢᠨ ᠠᠷᠭᠠ ᠮᠡᠬᠡ ᠶ᠋ᠢ ᠢᠯᠡᠴᠢᠯᠡᠵᠦ᠂ ᠲᠠᠩᠰᠤᠭ ᠯᠠᠮᠠ ᠶ᠋ᠢ ᠰᠡᠩᠬᠡᠷᠡᠭᠦᠯᠰᠦᠭᠡᠢ ᠭᠡᠮᠡᠨ ᠪᠣᠳᠣᠪᠠ᠃
《 ᠬᠥᠭᠰᠢᠨ ᠰᠢᠮᠨᠤ 》ᠠᠭᠤᠢ ᠶ᠋ᠢᠨ ᠡᠭᠦᠳᠡ ᠶ᠋ᠢ ᠠᠯᠬᠤᠨ ᠣᠷᠣᠬᠤ ᠳ᠋ᠤ᠌ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠣᠯᠠᠨ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠤᠭᠲᠤᠨ ᠠᠪᠤᠪᠠ᠃《 ᠬᠥᠭᠰᠢᠨ ᠰᠢᠮᠨᠤ 》 ᠲᠠᠩᠰᠤᠭ ᠯᠠᠮᠠ ᠶ᠋ᠢᠨ ᠡᠮᠦᠨᠡ ᠬᠦᠷᠴᠦ ᠨᠢᠳᠦ ᠪᠡᠨ ᠰᠡᠶ᠋ᠢᠮᠡᠶ᠋ᠢᠯᠭᠡᠨ᠄《 ᠴᠢ ᠴᠢᠨᠢ ᠲᠠᠩᠰᠤᠭ ᠯᠠᠮᠠ ᠮᠥᠨ ᠦᠦ? ᠱᠠᠪᠢ ᠪᠡᠴᠢᠨ ᠴᠢᠨᠢ ᠶᠠᠭᠠᠬᠢᠪᠠ ? 》 ᠭᠡᠵᠦ ᠠᠰᠠᠭᠤᠪᠠ᠃ ᠲᠠᠩᠰᠤᠭ ᠯᠠᠮᠠ᠄《 ᠲᠡᠷᠡ ᠨᠢᠭᠡ ᠯᠡ ᠡᠳᠦᠷ ᠦ᠋ᠨ ᠳᠣᠲᠣᠷᠠ ᠭᠤᠷᠪᠠᠨ ᠰᠠᠢᠨ ᠬᠥᠮᠦᠨ ᠊ᠢ ᠵᠠᠨᠴᠢᠨ ᠠᠯᠠᠭᠰᠠᠨ ᠪᠣᠯᠬᠣᠷ ᠪᠢ ᠬᠥᠭᠡᠭᠡᠨ ᠶᠠᠪᠤᠭᠤᠯᠪᠠ 》ᠭᠡᠵᠦ ᠰᠡᠭᠦᠷᠡᠰᠦ ᠠᠯᠲᠠᠨ ᠬᠡᠯᠡᠨᠡ᠃ ᠡᠭᠦᠨ ᠳ᠋ᠦ᠍ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠵᠦ᠄《 ᠡᠬᠡ ᠠ᠋ ! ᠬᠡᠦᠬᠡᠨ ᠴᠢᠨᠢ ᠪᠢ ᠭᠤᠷᠪᠠ ᠤᠳᠠᠭᠠ ᠠᠷᠭᠠ ᠬᠡᠷᠡᠭᠯᠡᠵᠦ ᠪᠠᠶ᠋ᠢᠭᠠᠳ ᠪᠡᠴᠢᠨ ᠊ᠢ ᠬᠥᠭᠡᠭᠡᠨ ᠶᠠᠪᠤᠭᠤᠯᠪᠠ 》ᠭᠡᠵᠦ ᠬᠡᠯᠡᠨᠡ᠃《 ᠬᠥᠭᠰᠢᠨ ᠰᠢᠮᠨᠤ 》᠄《 ᠥᠬᠢᠨ ᠴᠢ ᠶᠠᠮᠠᠷ ᠠᠷᠭᠠ ᠬᠡᠷᠡᠭᠯᠡᠭᠰᠡᠨ ᠪᠣᠢ? ᠡᠲᠡᠨᠦᠰᠡ ᠮᠡᠳᠡᠭᠰᠡᠨ ᠦᠦ ᠦᠭᠡᠢ ᠦᠦ? 》ᠭᠡᠵᠦ ᠰᠣᠴᠢᠭᠰᠠᠨ ᠮᠠᠶᠢᠬ ᠲᠠᠢ ᠠᠰᠠᠭᠤᠪᠠ᠃ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶᠡᠬᠡ ᠯᠡ ᠣᠮᠣᠷᠬᠠᠭᠯᠠᠨ ᠠᠭᠠᠰᠢᠯᠠᠵᠤ《 ᠴᠢ ᠢᠲᠡᠭᠡᠬᠦ ᠦᠭᠡᠢ ᠪᠣᠯ ᠪᠢ ᠴᠢᠮᠠ ᠳ᠋ᠤ᠌ ᠦᠵᠡᠭᠦᠯᠦᠶᠡ 》ᠭᠡᠵᠦ ᠬᠡᠯᠡᠬᠦ ᠲᠡᠢ ᠵᠡᠷᠭᠡ ᠪᠡᠶᠡ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠪᠠ᠃ ᠲᠡᠷᠡ ᠳᠠᠷᠠᠭᠠᠪᠡᠷ ᠵᠠᠯᠠᠭᠤ ᠥᠬᠢᠨ᠂ ᠬᠥᠭᠰᠢᠨ ᠡᠮᠡᠭᠡᠨ᠂ ᠡᠪᠦᠭᠡᠨ ᠪᠣᠯᠤᠨ ᠬᠤᠪᠢᠯᠤᠨ ᠦᠵᠡᠭᠦᠯᠪᠡ᠃
ᠲᠠᠩᠰᠤᠭ ᠡᠭᠦᠨ ᠊ᠢ ᠦᠵᠡᠭᠡᠳ ᠰᠢᠮᠨᠤ ᠶ᠋ᠢᠨ ᠮᠡᠬᠡ ᠳ᠋ᠦ᠍ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠵᠦ᠄《 ᠰᠢᠮᠨᠤ ᠴᠢ ᠭᠤᠷᠪᠠᠨ ᠤᠳᠠᠭᠠ ᠨᠠᠮᠠᠶ᠋ᠢ ᠮᠡᠬᠡᠯᠡᠬᠦ ᠢᠨᠤ ᠶᠠᠮᠠᠷ ᠶᠣᠰᠣᠨ ? 》ᠭᠡᠮᠡᠨ ᠠᠭᠤᠷᠯᠠᠨ ᠠᠰᠠᠭᠤᠪᠠ᠃ ᠡᠭᠦᠨ ᠳ᠋ᠦ᠍ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠵᠦ᠄《 ᠨᠢᠭᠡ ᠯᠡ ᠦᠭᠡ᠂ ᠮᠢᠬᠠ ᠶ᠋ᠢ ᠴᠢᠨᠢ ᠢᠳᠡᠨᠡ ! 》ᠭᠡᠪᠡ᠃ ᠲᠠᠩᠰᠤᠭ ᠯᠠᠮᠠ ᠪᠠᠬᠠᠨ ᠮᠡᠯᠡᠷᠡᠭᠡᠳ᠄《 ᠪᠢ ᠴᠢᠮᠠᠶ᠋ᠢ ᠭᠤᠷᠪᠠ ᠤᠳᠠᠭᠠ ᠠᠪᠤᠷᠠᠪᠠ᠃ ᠴᠢ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠭᠡᠳ ᠲᠠᠯᠪᠢᠴᠢᠬᠠ 》ᠭᠡᠵᠦ ᠠᠷᠭᠠ ᠶᠠᠳᠠᠨ ᠭᠤᠶᠤᠭᠰᠠᠨ ᠳ᠋ᠤ᠌ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ᠄ 《 ᠡᠷᠭᠢᠭᠦᠦ ᠬᠤᠤᠱᠠᠩ ᠴᠢ᠂ ᠪᠢ ᠶᠠᠭᠤᠨ ᠳ᠋ᠤ᠌ ᠴᠢᠮᠠᠶ᠋ᠢ ᠲᠠᠯᠪᠢᠬᠤ ᠠᠵᠢ ! ᠭᠣᠷᠢ ᠪᠠᠨ ᠲᠡᠳᠡ ! 》ᠭᠡᠪᠡ ᠃ ᠲᠠᠩᠰᠤᠭ ᠯᠠᠮᠠ ᠨᠠᠰᠤᠨ ᠤ᠋ ᠠᠶᠤᠯ ᠳ᠋ᠤ᠌ ᠲᠤᠯᠭᠠᠷᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠡᠳ ᠪᠡᠴᠢᠨ ᠦ᠌ ᠦᠭᠡ ᠶ᠋ᠢ ᠠᠪᠤᠭᠰᠠᠨ ᠦᠭᠡᠢ ᠳ᠋ᠡᠭᠡᠨ ᠲᠤᠶ᠋ᠢᠯ ᠢ᠋ᠶ᠋ᠠᠷ ᠭᠡᠮᠰᠢᠵᠡᠢ᠃ ᠲᠡᠷᠡ᠂ ᠪᠡᠴᠢᠨ ᠊ᠢ ᠪᠣᠳᠣᠬᠤ ᠲᠠᠢ ᠵᠡᠷᠭᠡ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ᠄《 ᠪᠡᠴᠢᠨ ᠮᠢᠨᠢ ᠠ᠋ ! ᠪᠢ ᠦᠨᠡᠨ ᠬᠤᠳᠠᠯ ᠊ᠢ ᠢᠯᠭᠠᠬᠤ ᠦᠭᠡᠢ᠂ ᠬᠥᠮᠦᠨ ᠰᠢᠮᠨᠤ ᠶ᠋ᠢ ᠲᠣᠩᠭᠣᠷᠠᠭᠤᠯᠵᠤ᠂ ᠴᠢᠮᠠ ᠪᠠᠨ ᠬᠥᠭᠡᠭᠡᠭᠡᠳ ᠶᠠᠪᠤᠭᠤᠯᠴᠢᠬᠠᠯᠠ ᠰᠢᠦ ! ᠴᠢ ᠬᠠᠮᠢᠭᠠ ᠪᠠᠶ᠋ᠢᠨᠠ ᠪᠣᠢ? 》 ᠭᠡᠵᠦ ᠪᠠᠷᠬᠢᠷᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ 《 ᠬᠥᠭᠰᠢᠨ ᠰᠢᠮᠨᠤ 》᠄《 ᠪᠠᠭᠰᠢ ᠠ᠋ ! ᠪᠢ ᠡᠨᠳᠡ ᠪᠣᠢ ! 》ᠭᠡᠮᠡᠨ ᠬᠠᠰᠬᠢᠷᠪᠠ᠃
ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠣᠴᠢᠰᠬᠢᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠥᠨᠥᠬᠢ 《 ᠬᠥᠭᠰᠢᠨ ᠰᠢᠮᠨᠤ 》ᠪᠡᠶᠡ ᠤᠷᠪᠠᠮᠠᠭᠴᠠ ᠰᠦᠷ ᠵᠢᠪᠬᠤᠭᠠ ᠲᠠᠢ ᠪᠡᠴᠢᠨ ᠪᠣᠯᠤᠨ ᠬᠤᠪᠢᠷᠠᠵᠤ᠂ ᠭᠠᠷ ᠲᠠᠭᠠᠨ ᠪᠣᠯᠣᠳ ᠪᠠᠷᠢᠶᠠ ᠡᠷᠭᠢᠭᠦᠯᠦᠨ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢᠨ ᠲᠣᠯᠣᠭᠠᠢ ᠤᠷᠤᠭᠤ ᠵᠠᠨᠴᠢᠪᠠ᠃ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠠᠶᠤᠬᠤ ᠶ᠋ᠢᠨ ᠶᠡᠬᠡᠪᠡᠷ ᠠᠶᠤᠵᠤ᠂ ᠶᠠᠭᠠᠷᠠᠨ ᠬᠠᠷᠢᠭᠤᠴᠠᠨ ᠲᠤᠰᠪᠠ᠃ ᠭᠠᠬᠠᠢ᠂ ᠰᠢᠷᠣᠢ ᠨᠠᠷ ᠪᠡᠴᠢᠨ ᠊ᠢ ᠬᠠᠪᠰᠤᠷᠤᠨ ᠲᠤᠯᠤᠯᠳᠤᠵᠤ᠂ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢᠨ ᠭᠠᠷ ᠳᠣᠣᠷᠠᠬᠢ ᠶᠡᠬᠡ ᠪᠠᠭᠠ ᠰᠢᠮᠨᠤᠰ ᠊ᠢ ᠪᠦᠷ ᠠᠯᠠᠵᠤ ᠳᠠᠭᠤᠰᠬᠠᠪᠠ᠃ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠳᠤᠲᠠᠭᠠᠰᠤᠭᠠᠢ ᠭᠡᠲᠡᠯᠡ ᠪᠡᠴᠢᠨ ᠪᠠᠭᠰᠢ ᠪᠡᠶᠡ ᠪᠡᠨ ᠬᠡᠳᠦ ᠰᠠᠵᠢᠯᠠᠮᠠᠭᠴᠠ ᠠᠷᠪᠠᠨ ᠬᠡᠳᠦᠨ ᠪᠡᠴᠢᠨ ᠪᠣᠯᠤᠨ ᠬᠤᠪᠢᠷᠠᠵᠤ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢ ᠪᠦᠰᠡᠯᠡᠨ ᠠᠪᠤᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠳᠤᠲᠠᠭᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠪᠡᠴᠢᠨ ᠪᠠᠭᠰᠢ ᠠᠮᠠᠨ ᠠ᠋ᠴᠠ ᠪᠠᠨ ᠡᠷᠳᠡᠨᠢ ᠶ᠋ᠢᠨ ᠭᠠᠯ ᠦᠯᠢᠶᠡᠨ ᠭᠠᠷᠭᠠᠵᠤ᠂ ᠬᠣᠬᠢᠮᠠᠢ ᠶ᠋ᠢᠨ ᠰᠢᠮᠨᠤ ᠶ᠋ᠢ ᠰᠢᠲᠠᠭᠠᠨ ᠠᠯᠠᠵᠠᠢ᠃
ᠢᠷᠡᠯᠲᠡ ᠄
ᠲᠠᠪᠤᠨ ᠵᠢᠯ ᠦᠨ ᠲᠦᠷᠢᠮᠳᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳᠤ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠶᠢᠰᠦᠳᠦᠭᠡᠷ ᠲᠡᠪᠳᠡᠷ ※
ᠦᠪᠦᠷ ᠮᠤᠩᠭᠤᠯ ᠤᠨ ᠰᠤᠷᠭᠠᠨ ᠬᠦᠮᠦᠵᠢᠯ ᠦᠨ ᠬᠡᠪᠯᠡᠯ ᠦᠨ ᠬᠤᠷᠢᠶᠠ ᠨᠠᠢᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠦᠪᠦᠷ ᠮᠤᠩᠭᠤᠯ ᠤᠨ ᠰᠢᠨᠬᠤᠸᠠ ᠨᠤᠮ ᠤᠨ ᠲᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠦᠪᠦᠷ ᠮᠤᠩᠭᠤᠯ ᠤᠨ ᠮᠤᠩᠭᠤᠯ ᠪᠢᠴᠢᠭ ᠬᠡᠪᠯᠠᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1981 ᠤᠨ ᠤ 5 ᠰᠠᠷᠠ ᠳᠤ ᠬᠤᠶᠠᠳᠤᠭᠠᠷ ᠬᠡᠪ ᠢ ᠬᠢᠪᠡ
1984 ᠤᠨ ᠤ 4 ᠰᠠᠷᠠ ᠳᠤ ᠲᠦᠷᠪᠡᠳᠦᠭᠡᠷ ᠤᠳᠠᠭᠠ ᠶ᠋ᠢᠨ ᠬᠡᠪᠯᠡᠯ ᠡᠴᠡ ᠰᠣᠩᠭᠣᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠣᠶᠤᠨᠴᠡᠴᠡᠭ
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣᠠ ᠂ ᠲᠣ᠋ · ᠨᠠᠨᠳᠢᠨ
2023.3.17