ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ - ᠲ ᠂ ᠭᠣᠮᠪᠣᠵᠠᠪ Ирэх зууны хонхон дуун - Т ᠂ Гомбожав
241ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ
ᠲ ᠂ ᠭᠣᠮᠪᠣᠵᠠᠪ
ᠮᠠᠷᠭᠠᠰᠢ
ᠴᠢᠮᠠ ᠳ᠋ᠤ᠌ ᠪᠢ ᠲᠣᠩ ᠣᠯᠠᠨ ᠵᠠᠬᠢᠳᠠᠯ ᠪᠢᠴᠢᠯᠡ ᠂ ᠭᠡᠪᠡᠴᠦ
ᠬᠠᠶᠢᠭ ᠢ ᠴᠢᠨᠢ ᠮᠡᠳᠡᠬᠦ ᠥᠬᠡᠢ ᠤᠴᠢᠷ
ᠬᠠᠲᠠᠪᠴᠢᠨ ᠠ᠋ᠴᠠ ᠪᠠᠨ ᠴᠠᠰᠢ ᠨᠢᠭᠡ ᠶ᠋ᠢ ᠴᠦ᠍ ᠭᠤᠪᠢᠭᠤᠯᠵᠤ ᠴᠢᠳᠠᠭᠠ ᠥᠬᠡᠢ
ᠴᠢᠮᠠ ᠳ᠋ᠤ᠌ ᠪᠢ ᠤᠯᠠᠨ ᠤᠳᠠᠭᠠ ᠳ᠋ᠢᠶᠠᠩᠬᠤᠸᠠ ᠠᠪᠤᠯᠠ ᠂ ᠭᠡᠪᠡᠴᠦ
ᠨᠣᠮᠧᠷ ᠲᠣᠭᠠ ᠶ᠋ᠢ ᠴᠢᠨᠢ ᠮᠡᠳᠡᠬᠦ ᠥᠬᠡᠢ ᠤᠴᠢᠷ
ᠨᠢᠭᠡᠬᠡᠨ ᠤᠳᠠᠭᠠ ᠴᠤ᠌ ᠨᠡᠭᠡᠭᠡᠯᠲᠡᠲᠡᠢ ᠰᠣᠨᠣᠷ ᠲᠣᠭᠰᠢᠵᠤ ᠴᠢᠳᠠᠭᠠ ᠥᠬᠡᠢ
ᠪᠢ
ᠬᠤᠶᠠᠷ ᠭᠠᠷ ᠢᠶ᠋ᠠᠨ ᠴᠢᠮᠠ ᠵᠦᠭ
ᠬᠣᠯᠠ ᠶ᠋ᠢᠨ ᠬᠣᠯᠠ ᠠ᠋ᠴᠠ ᠰᠤᠩᠭᠠᠯᠠ
ᠵᠢᠰᠦ ᠶ᠋ᠢ ᠴᠢᠨᠢ ᠦᠵᠡᠭᠡ ᠥᠬᠡᠢ ᠂ ᠭᠡᠪᠡᠴᠦ
ᠴᠢᠮᠠ ᠪᠠᠨ ᠪᠢ ᠲᠠᠨᠢᠨᠠ ᠡ !
ᠥᠷᠲᠡᠭᠡ
ᠡᠨᠡ ᠤᠷᠤ ᠥᠷᠲᠡᠭᠡ ᠪᠢᠰᠢ ᠪᠢᠯᠡ
ᠬᠣᠶᠠᠷ ᠦᠵᠦᠭᠦᠷ ᠨᠢ ᠬᠠᠷᠠᠭᠳᠠᠬᠤ ᠥᠬᠡᠢ
ᠬᠤᠤᠰ ᠴᠠᠭᠠᠨ ᠱᠤᠭᠤᠮ ᠵᠤᠷᠠᠶ᠋ᠢᠵᠤ
ᠬᠣᠯᠪᠣᠯᠴᠠᠭᠰᠠᠨ ᠨᠤᠭᠤᠭᠠᠨ ᠬᠠᠶ᠋ᠢᠷᠴᠠᠭ
ᠬᠣᠯᠠ ᠠ᠋ᠴᠠ ᠢᠷᠡᠵᠦ ᠬᠣᠯᠠ ᠲᠡᠰᠢ ᠣᠳᠤᠨᠠ
ᠪᠢ
ᠲᠡᠷᠭᠡ ᠡᠰᠡ ᠵᠣᠭᠰᠣᠬᠤ ᠡᠨᠡ ᠴᠡᠭ ᠳᠡᠭᠡᠷᠡ
ᠲᠡᠷᠭᠡ ᠲᠣᠰᠴᠤ
ᠲᠡᠷᠡ ᠭᠡᠵᠦ ᠲᠠᠨᠢᠵᠤ ᠴᠢᠳᠠᠮᠠ ᠦᠭᠡᠢ
ᠲᠣᠩ ᠣᠯᠠᠨ ᠵᠣᠴᠢᠳ ᠤᠨ ᠢᠶ᠋ᠠᠨ ᠠᠶ᠋ᠢᠰᠤᠢ ᠴᠢᠮᠡᠭᠡ ᠶ᠋ᠢ ᠴᠢᠩᠨᠠᠨᠠ
ᠡᠨᠡ ᠤᠷᠤ
ᠡᠩᠬᠡ ᠶ᠋ᠢᠨ ᠲᠣᠮᠣ ᠥᠷᠲᠡᠭᠡ ᠶᠤᠮ ᠪᠢᠯᠡ
ᠥᠨᠥᠴᠢᠷᠡᠯ
ᠬᠠᠪᠢ ᠶ᠋ᠢᠨ ᠠᠯᠢᠪᠠ ᠬᠣᠯᠠᠳᠴᠤ
ᠬᠢᠵᠠᠭᠠᠷ ᠦᠭᠡᠢ ᠰᠠᠶ᠋ᠢᠬᠠᠨ ᠴᠠᠭᠠᠨ ᠡᠯᠡᠰᠦᠨ ᠳᠡᠭᠡᠷᠡ
ᠬᠠᠶ᠋ᠢᠷᠠ ᠪᠣᠳᠣᠯ ᠮᠢᠨᠢ ᠡᠯᠢᠭᠡᠳᠡᠨᠡ
ᠡᠥᠴᠥᠭᠡᠳᠦᠷ ᠦᠨ ᠢᠷᠠᠭᠤᠬᠠᠨ ᠵᠡᠭᠦᠳᠦ ᠦᠳᠡᠭᠡᠷᠢ ᠠᠪᠴᠠᠢ
ᠥᠷᠥᠭᠡᠯ ᠤᠷᠤᠭᠤ ᠨᠢᠭᠡᠬᠡᠨ ᠰᠤᠮᠤ ᠂ ᠪᠢ ᠬᠠᠷᠪᠤᠭᠠ ᠦᠭᠡᠢ
ᠦᠷᠭᠦᠭᠰᠡᠨ ᠡᠨᠳᠡᠭᠦᠷᠡᠯ ᠦᠨ ᠲᠦᠮᠡᠨ ᠵᠠᠪᠠ
ᠨᠠᠮᠠᠶ᠋ᠢ ᠬᠦᠨᠳᠦ ᠰᠢᠷᠬᠠᠲᠤᠭᠤᠯᠤᠯᠠ ᠁
ᠮᠡᠳᠡᠬᠦ ᠥᠬᠡᠢ ᠶᠠᠭᠤᠮᠠ ᠲᠣᠩ ᠣᠯᠠᠨ
ᠮᠡᠳᠡᠬᠦ ᠠ᠋ᠴᠠ ᠭᠠᠭᠴᠠ
ᠮᠥᠩᠭᠥᠨ ᠴᠠᠭᠠᠨ ᠡᠯᠡᠰᠦᠨ ᠳᠡᠭᠡᠷᠡ
ᠮᠥᠷ ᠮᠢᠨᠢ ᠢᠨᠢᠶᠡᠵᠦ ᠪᠠᠶ᠋ᠢᠨᠠ
ᠬᠣᠯᠠ ᠳᠡᠭᠡᠭᠦᠷ
ᠬᠣᠶᠠᠷ ᠬᠡᠰᠡᠭ ᠴᠠᠭᠠᠨ ᠡᠭᠦᠯᠡ ᠭᠠᠩᠭᠠᠨᠠᠭᠰᠠᠭᠠᠷ ᠥᠩᠭᠡᠷᠡᠨᠡ
ᠰᠡᠭᠦᠳᠡᠷ ᠨᠢ ᠮᠢᠨᠤ ᠳᠡᠭᠡᠷᠡ ᠲᠤᠰᠬᠤ ᠦᠭᠡᠢ ᠡ
ᠬᠠᠯᠠᠭᠤᠴᠠᠯ ᠂ ᠵᠢᠬᠡᠭᠦᠴᠡᠯ ᠁
ᠬᠠᠭᠰᠠᠷᠠᠯ ᠂ ᠭᠠᠩᠰᠠᠷᠠᠯ ᠁
ᠬᠠᠪᠢ ᠳ᠋ᠤ᠌ ᠮᠢᠨᠢ ᠤᠷᠭᠤᠳᠠᠭ ᠦᠭᠡᠢ ᠂ ᠬᠠᠷᠢᠨ
ᠬᠢᠵᠠᠭᠠᠷ ᠦᠭᠡᠢ ᠬᠣᠯᠠ ᠶ᠋ᠢᠨ ᠮᠥᠷᠲᠡᠭᠡᠨ
ᠬᠢᠵᠠᠭᠠᠷ ᠦᠭᠡᠢ ᠣᠶ᠋ᠢᠷᠠ ᠶ᠋ᠢᠨ
ᠬᠠᠪᠢᠷᠭᠠᠯᠠᠬᠤ ᠰᠠᠷᠠ ᠪᠠ ᠲᠡᠷᠭᠡᠯᠯᠡᠬᠦ ᠰᠠᠷᠠ ᠯᠠ
ᠬᠠᠨᠴᠤᠢ ᠳ᠋ᠤ᠌ ᠮᠢᠨᠢ ᠡᠭᠦᠷᠯᠡᠨᠡ ᠪᠢᠯᠡ
ᠴᠠᠭᠠᠪᠤᠷᠯᠠᠯ
ᠪᠢ ᠥᠷᠯᠥᠭᠡ ᠪᠣᠯᠭᠠᠨ ᠥᠯᠥᠰᠬᠦᠯᠡᠩ ᠰᠡᠷᠢᠳᠡᠭ ᠪᠢᠯᠡ
ᠨᠠᠳᠠᠳᠤ ᠂ ᠨᠠᠷᠠ ᠪᠠ ᠬᠣᠭᠣᠯᠠᠨ ᠭᠡᠷ ᠠᠳᠠᠯᠢᠬᠠᠨ ᠬᠣᠯᠠ ᠰᠠᠨᠠᠭᠳᠠᠨᠠ
ᠬᠣᠯᠠ ᠠᠶᠠᠯᠠᠶᠠ ᠭᠡᠵᠦ ᠬᠠᠴᠢᠨ ᠶᠡᠬᠡ ᠬᠦᠰᠡᠨᠡ᠂ ᠭᠡᠪᠡᠴᠦ
ᠬᠣᠯᠠ ᠤᠳᠬᠤ ᠵᠠᠮ
ᠬᠠᠮᠢᠭᠠ ᠪᠠᠶ᠋ᠢᠬᠤ ᠶ᠋ᠢ ᠮᠡᠳᠡᠬᠦ ᠥᠬᠡᠢ ᠡ
ᠬᠠᠮᠢᠭᠠ ᠭᠠᠵᠠᠷ ᠠ᠋ᠴᠠ ᠵᠠᠬᠢᠳᠠᠯ ᠨᠢᠭᠡ ᠢᠷᠡᠬᠦ ᠶᠤᠮ ᠰᠢᠭ
ᠬᠠᠯᠠᠭᠤᠬᠠᠨ ᠪᠣᠳᠣᠭᠳᠠᠵᠤ
ᠬᠠᠭᠠᠯᠭᠠ ᠨᠢ ᠤᠨᠢᠰᠤ ᠲᠠᠢ ᠳᠠᠮᠵᠢᠭᠤᠯᠬᠤ ᠭᠡᠷ ᠲᠦ᠍ ᠰᠠᠨᠠᠨ ᠰᠠᠨᠠᠨ ᠣᠴᠢᠨᠠ
ᠬᠠᠶᠠ ᠬᠠᠶᠠ
ᠬᠠᠳᠠᠨ ᠤ ᠴᠢᠯᠠᠭᠤ ᠪᠤᠶᠤ ᠬᠠᠩᠭᠠᠢ ᠶ᠋ᠢᠨ ᠡᠪᠡᠰᠦ ᠲᠠᠢ
ᠬᠠᠮᠤᠭ ᠠ᠋ᠴᠠ ᠢᠯᠡᠭᠦᠦ ᠶᠠᠷᠢᠶᠠ ᠨᠡᠶ᠋ᠢᠯᠡᠬᠦ ᠰᠢᠭ᠌ ᠪᠣᠳᠣᠯ ᠤᠶᠠᠩᠭᠠᠷᠠᠨᠠ
ᠦᠷᠭᠦᠯᠵᠢ
ᠥᠪᠡᠷ ᠢᠶ᠋ᠡᠨ ᠴᠦ᠍ ᠦᠯᠦ ᠮᠡᠳᠡᠬᠦ ᠰᠢᠯᠲᠠᠭᠠᠨ ᠢᠶ᠋ᠠᠷ
ᠬᠡᠶ᠋ᠢᠷᠬᠡᠬᠦ ᠪᠤᠶᠤ ᠭᠤᠨᠢᠭᠯᠠᠵᠤ ᠂ ᠪᠢ
ᠦᠳᠡᠰᠢ ᠪᠣᠯᠭᠠᠨ ᠥᠯᠥᠰᠬᠦᠯᠡᠩ ᠬᠡᠪᠲᠡᠳᠡᠭ ᠪᠢᠯᠡ
ᠨᠠᠳᠠ ᠳ᠋ᠤ᠌
ᠨᠠᠷᠠ ᠪᠠ ᠬᠣᠭᠣᠯᠠᠨ ᠭᠡᠷ ᠂ ᠬᠠᠮᠤᠭ ᠢᠯᠡᠭᠦᠦ ᠵᠡᠭᠥᠳᠥᠯᠡᠭᠳᠡᠨᠡ
ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ ( ᠨᠢᠭᠡ )
ᠳᠣᠮᠣᠭ ᠳᠤᠷᠠᠳᠬᠠᠯ ᠪᠠᠯᠠᠯᠵᠤ
ᠳᠠᠭᠤ ᠦᠭᠡᠢ ᠨᠠᠷᠢᠨ ᠡᠪᠡᠰᠦ ᠳᠠᠭᠤᠯᠠᠩᠬᠠᠨ ᠤᠷᠭᠤᠨᠠ
ᠬᠡᠭᠡᠷᠡ ᠶ᠋ᠢᠨ ᠴᠡᠴᠡᠭ
ᠬᠡᠬᠥᠷ ᠴᠢᠯᠠᠭᠤᠵᠢᠭᠰᠠᠨ ᠬᠠᠭᠤᠴᠢᠨ ᠳᠠᠶ᠋ᠢᠨ ᠤ ᠲᠠᠯᠠᠪᠤᠷ ᠲᠤ᠌ ᠤᠶᠠᠩᠭᠠᠲᠠᠶ᠋ᠢᠬᠠᠨ ᠠᠯᠬᠠᠷᠠᠵᠠᠢ
ᠠᠶ᠋ᠢᠯ ᠠ᠋ᠴᠠ ᠬᠣᠯᠠ ᠪᠣᠳᠣᠯ ᠠ᠋ᠴᠠ ᠣᠶ᠋ᠢᠷᠠ ᠡᠨᠡ ᠭᠠᠵᠠᠷ ᠤᠨ
ᠤᠬᠠᠭᠠ ᠨᠤᠷᠠᠭᠠᠬᠤ ᠰᠢᠬᠥᠳᠡᠷᠢ
ᠤᠨᠠᠬᠤ ᠶ᠋ᠢᠨ ᠨᠠᠭᠠᠭᠤᠷ ᠪᠦᠮᠪᠦᠭᠡᠨᠡᠭᠦᠯᠬᠥ
ᠠᠮᠠᠷᠠᠭ ᠴᠠᠭᠠᠨ ᠮᠠᠨᠠᠨ ᠰᠡᠬᠦᠵᠦ
ᠰᠠᠶ᠋ᠢᠬᠠᠨ ᠬᠣᠶᠠᠷ ᠵᠠᠯᠠᠭᠤ ᠬᠥᠮᠦᠨ ᠦ
ᠰᠠᠨᠠᠬᠤ ᠶ᠋ᠢᠨ ᠭᠠᠭᠴᠠ ᠶᠠᠷᠢᠶᠠ ᠳᠥᠰᠢᠭᠰᠡᠨ ᠪᠠᠷᠠ
ᠪᠥᠮᠪᠥᠷᠴᠡᠭ ᠪᠦᠪᠡᠶ᠋ᠢᠯᠡᠩᠬᠡᠨ ᠲᠤᠶᠠᠭᠠᠷᠠᠵᠤ ᠪᠠᠶ᠋ᠢᠨᠠ ᠡ ᠁
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ : ᠴᠣᠯᠮᠣᠨᠲᠦᠶᠠᠭᠠ
2023᠂ 5᠂ 4