ᠮᠥᠩᠬᠡᠷᠡᠬᠦ ᠳᠤᠷᠠᠳᠬᠠᠯ - ᠲ ᠂ ᠭᠣᠮᠪᠣᠵᠠᠪ Мөнхрөх дуртгал - Т ᠂ Гомбожав
229ᠮᠥᠩᠬᠡᠷᠡᠬᠦ ᠳᠤᠷᠠᠳᠬᠠᠯ
ᠲ ᠂ ᠭᠣᠮᠪᠣᠵᠠᠪ
ᠬᠥᠮᠦᠨ ᠮᠥᠩᠬᠡᠷᠡᠬᠦ ᠦᠭᠡᠢ
ᠬᠥᠮᠦᠨ ᠦ ᠲᠤᠬᠠᠢ ᠳᠤᠷᠠᠳᠬᠠᠯ ᠮᠥᠩᠬᠡᠷᠡᠨᠡ ᠭᠡᠳᠡᠭ ᠦᠨᠡᠨ ᠪᠠᠢᠵᠤ ᠰᠢᠦ᠂ ᠡᠪᠦᠭᠡ ᠮᠢᠨᠢ ᠡ
ᠲᠠ ᠮᠢᠨᠢ ᠬᠡᠳᠦᠢᠨ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠪᠢᠯᠡ
ᠲᠠᠨ ᠢ ᠦᠳᠡᠭᠰᠡᠨ ᠣᠨ ᠵᠢᠯ ᠴᠤ᠌
ᠳᠠᠰᠣᠷᠠᠨ ᠰᠣᠪᠣᠬᠣ᠌ ᠮᠠᠨᠢ ᠶ᠋ᠢᠨ ᠡᠷᠢᠬᠡ ᠰᠢᠭ᠌
ᠮᠢᠨᠦ ᠰᠡᠳᠬᠢᠯ ᠡᠴᠡ ᠠᠷᠪᠠᠨ ᠲᠠᠪᠤ ᠤᠨᠠᠴᠢᠬᠠᠭᠰᠠᠨ ᠰᠢᠦ
ᠡᠳᠦᠷ ᠬᠤᠨᠤᠭ ᠭᠡᠭᠴᠢ
ᠥᠩᠭᠡᠲᠦ ᠶᠢᠷᠲᠢᠨᠴᠦ ᠶ᠋ᠢᠨ ᠱᠦᠭᠦᠷ ᠪᠢᠯᠡ
ᠥᠨᠦ ᠶ᠋ᠢᠨ ᠢᠶᠡᠨ ᠥᠩᠭᠡᠷᠡᠭᠰᠡᠨ ᠤᠷᠤᠭᠤ
ᠡᠳᠦᠷ ᠪᠣᠯᠭᠠᠨ ᠱᠦᠭᠦᠷᠳᠡᠳᠡᠭ ᠪᠢᠯᠡ
ᠡᠪᠦᠭᠡ ᠮᠢᠨᠢ ᠡ
ᠭᠠᠭᠴᠠ ᠬᠦ ᠲᠠᠨ ᠤ ᠳᠤᠬᠠᠢ ᠳᠤᠷᠠᠳᠬᠠᠯ ᠯᠠ
ᠭᠠᠵᠠᠷ ᠤᠨ ᠠᠮᠢᠳᠤ ᠬᠠᠳᠠᠭᠠᠰᠤ ᠰᠢᠭ᠋ ᠲᠦᠮᠡᠨ ᠦᠯᠢᠭᠡᠷ ᠳᠣᠪᠴᠢᠯᠠᠵᠤ
ᠡᠪᠬᠡᠨ ᠬᠤᠷᠢᠶᠠᠬᠤ ᠱᠦᠭᠦᠷ ᠤᠨ ᠦᠵᠦᠭᠦᠷ ᠲᠤ ᠵᠤᠯᠭᠠᠷᠠᠭᠠ ᠦᠭᠡᠢ
ᠡᠷᠭᠢᠴᠡᠭᠦᠯᠦᠨ ᠰᠠᠨᠠᠬᠤ ᠮᠢᠨᠦ ᠳᠡᠯᠡᠬᠡᠢ ᠳ᠋ᠤ᠌
ᠤᠯᠠᠮ ᠤᠯᠠᠮ ᠦᠨᠳᠦᠷ ᠪᠣᠯᠵᠤ ᠤᠷᠭᠤᠭᠰᠠᠨ ᠶᠤᠮ ᠰᠢᠦ
ᠲᠡᠢᠮᠦ ᠰᠢᠦ ᠂ ᠡᠪᠦᠭᠡ ᠮᠢᠨᠢ ᠡ
ᠲᠡᠭᠷᠢ ᠮᠢᠨᠢ ᠴᠢᠨᠦ ᠲᠠᠯᠪᠢᠭᠤᠨ ᠰᠡᠳᠬᠢᠯ ᠰᠢᠭ᠌ ᠴᠡᠩᠬᠡᠷᠯᠡᠨᠡ ᠪᠣᠯᠬᠣᠷ
ᠲᠡᠷᠲᠡᠭᠡ ᠬᠣᠯᠠᠬᠢ ᠠᠭᠤᠯᠠᠰ ᠮᠢᠨᠢ
ᠴᠢᠨᠦ ᠳᠤᠭᠤᠢᠬᠠᠨ ᠪᠠᠷᠠ ᠰᠢᠭ᠋ ᠬᠠᠷᠠᠭᠳᠠᠨᠠ ᠪᠣᠯᠬᠣᠷ
ᠳᠦᠰᠢᠵᠦ ᠶᠠᠪᠤᠬᠤ ᠡᠨᠡ ᠭᠠᠵᠠᠷ ᠰᠢᠷᠤᠢ
ᠲᠦᠮᠡᠨ ᠳ᠋ᠡᠭᠡᠨ ᠡᠭᠡᠯᠢᠲᠡᠢ ᠡᠪᠦᠭᠡ ᠲᠠᠨ ᠤ ᠮᠢᠨᠢ
ᠬᠦᠳᠡᠭᠡ ᠪᠣᠷᠣᠭᠵᠢᠭᠤᠨ ᠠᠷᠠᠨᠰᠢᠨ ᠠᠳᠠᠯᠢ ᠰᠠᠨᠠᠭᠳᠠᠨᠠ ᠪᠣᠯᠬᠣᠷ
ᠮᠢᠨᠦ ᠪᠣᠳᠣᠯ ᠠ᠋ᠴᠠ ᠲᠠᠨ ᠤ ᠳᠤᠬᠠᠢ ᠳᠤᠷᠠᠳᠬᠠᠯ ᠭᠡᠷᠬᠢᠨ ᠪᠠᠯᠠᠷᠠᠬᠤ ᠪᠢᠯᠡ?
ᠪᠤᠴᠠᠨ ᠰᠠᠨᠠᠬᠤ ᠵᠡᠭᠦᠳᠦᠨ ᠳ᠋ᠤ᠌ ᠮᠢᠨᠢ ᠲᠠ ᠦᠷᠭᠦᠯᠵᠢ ᠬᠠᠷᠠᠭᠳᠠᠨᠠ
ᠪᠤᠭᠤᠷᠤᠯ ᠴᠠᠭᠠᠨ ᠰᠠᠨᠴᠢᠭ᠋ ᠤᠨ ᠴᠢᠨᠢ ᠦᠰᠦ
ᠪᠣᠳᠣᠯ ᠳᠦᠭᠦᠷᠡᠩ ᠨᠠᠮᠢᠷᠠᠵᠤ
ᠪᠣᠰᠤᠭᠠ ᠬᠠᠳᠠᠨ ᠤ ᠠᠩ ᠰᠢᠭ᠋ ᠮᠠᠩᠨᠠᠢ ᠶ᠋ᠢᠨ ᠴᠢᠷᠠᠢ ᠠᠲᠤᠷᠢᠶᠠᠳ
ᠪᠣᠷᠣᠭᠠ ᠰᠠᠯᠬᠢᠨ ᠤ ᠦᠯᠢᠭᠡᠷ ᠰᠢᠪᠡᠨᠡᠨ
ᠠᠯᠲᠠᠩᠬᠠᠨ ᠪᠡᠶᠡ ᠶ᠋ᠢᠨ ᠴᠢᠨᠢ
ᠠᠨᠵᠢᠰᠤᠨ ᠪᠦᠬᠦ ᠰᠢᠭ᠌ ᠪᠦᠭᠳᠦᠷᠬᠡᠨ ᠪᠠᠷᠠ
ᠠᠯᠤᠰ ᠬᠤᠯᠠ ᠶ᠋ᠢᠨ ᠳᠤᠷᠠᠳᠬᠠᠯ ᠤᠷᠤᠭᠤ
ᠨᠠᠮᠠᠶ᠋ᠢ ᠬᠦᠲᠦᠯᠦᠭᠡᠳ ᠪᠠᠢᠨᠠ ᠡ !
ᠨᠠᠳᠠ ᠳ᠋ᠠᠭᠠᠨ ᠪᠣᠯ ᠲᠠ ᠮᠢᠨᠢ ᠪᠦᠳᠦᠭᠦᠨ ᠮᠤᠳᠤ ᠪᠢᠯᠡ
ᠨᠠᠷᠠᠨ ᠦ ᠭᠡᠷᠡᠯ ᠰᠢᠷᠭᠤᠬᠤ ᠵᠠᠢ ᠦᠭᠡᠢ
ᠨᠠᠪᠴᠢᠰ ᠵᠤᠵᠠᠭᠠᠨ ᠥᠮᠥᠭ ᠪᠢᠯᠡ
ᠨᠠᠮᠤᠷ ᠡᠪᠦᠯ ᠤᠨ ᠵᠢᠬᠡᠭᠦᠨ ᠲᠡᠭᠷᠢ ᠦᠵᠡᠭᠦᠯᠬᠦ ᠦᠭᠡᠢ ᠭᠡᠵᠦ
ᠨᠠᠮᠠᠭᠠ ᠪᠠᠨ ᠳᠡᠯᠭᠡᠭᠰᠡᠨ ᠰᠢᠭᠦᠷᠡᠳᠡᠭ ᠪᠢᠯᠡ
ᠦᠷᠡ ᠶ᠋ᠢᠨ ᠴᠢᠨᠢ ᠦᠷᠡ ᠪᠣᠯᠵᠣ᠌
ᠥᠭᠡᠳᠡ ᠲᠠᠢ ᠭᠡᠷ ᠤᠨ ᠴᠢᠨᠢ ᠴᠤᠩᠬᠤ ᠶ᠋ᠢ ᠪᠢ ᠲᠣᠭᠰᠢᠬᠤ ᠳ᠋ᠤ᠌
ᠡᠪᠦᠭᠡ ᠮᠢᠨᠢ ᠲᠠ ᠶᠠᠭᠠᠬᠢᠨ ᠪᠠᠶᠠᠷᠯᠠᠭᠰᠠᠨ ᠠᠵᠢ
ᠡᠪᠦᠯ ᠦᠨ ᠬᠦᠢᠲᠡᠨ ᠰᠠᠯᠬᠢ
ᠥᠷᠥᠭᠡ ᠶ᠋ᠢ ᠮᠢᠨᠢ ᠴᠠᠷᠴᠠᠭᠠᠮᠠᠷ ᠴᠠᠷᠴᠠᠭᠠᠮᠠᠷ᠂ ᠲᠠᠨ ᠳ᠋ᠤ᠌ ᠰᠠᠨᠠᠭᠳᠠᠵᠤ
ᠦᠷᠡ ᠶ᠋ᠢᠨ ᠢᠶᠡᠨ ᠲᠥᠯᠦᠭᠡ ᠡᠨᠡ ᠭᠡᠷ ᠢᠶᠡᠨ ᠳᠤᠯᠠᠭᠠᠯᠠᠬᠤ ᠭᠡᠵᠦ
ᠦᠷ ᠦᠨ ᠴᠠᠢᠪᠤᠷ ᠭᠡᠭᠡ ᠪᠡᠷ
ᠡᠮᠦᠨᠡ ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ ᠠ᠋ᠴᠠ ᠲᠦᠯᠡᠭᠡ ᠡᠭᠦᠷᠦᠭᠰᠡᠭᠡᠷ ᠢᠷᠡᠨᠡ ᠭᠡᠳᠡᠭ
ᠡᠪᠦᠭᠡ ᠮᠢᠨᠢ ᠡ ! ᠡᠪᠦᠭᠡ ᠮᠢᠨᠢ
ᠦᠷᠡ ᠪᠡᠨ ᠭᠡᠰᠡᠨ ᠲᠠᠨ ᠤ ᠰᠡᠳᠬᠢᠯ
ᠡᠪᠦᠯ ᠦᠭᠡᠢ ᠳᠤᠯᠠᠭᠠᠨ ᠲᠡᠭᠷᠢ ᠪᠠᠢᠵᠤ ᠪᠢᠯᠡ
ᠬᠥᠭᠡᠷᠦᠬᠦᠢ ᠣᠮᠪᠣᠯ ᠢᠶᠠᠨ ᠲᠠ ᠮᠢᠨᠢ
ᠬᠥᠮᠦᠨ ᠦ ᠵᠡᠷᠭᠡ ᠲᠠᠢ ᠶᠠᠪᠤᠭᠤᠯᠬᠤ ᠰᠠᠨ ᠭᠡᠵᠦ ᠶᠠᠮᠠᠷᠬᠠᠨ ᠴᠢᠩᠭᠠ ᠬᠦᠰᠡᠵᠦ ᠪᠠᠢᠭ᠍ᠰᠠᠨ ᠠᠵᠢ
ᠬᠡᠦᠬᠡᠳ ᠤᠨ ᠬᠡᠷᠡᠭᠦᠯ ᠢᠶᠠᠷ ᠪᠠᠭ᠍ᠰᠢ ᠪᠠᠨ ᠬᠠᠷᠢᠶᠠᠭᠠᠳ
ᠬᠦᠮᠦᠨ ᠠᠶᠤᠯᠭᠠᠨ ᠭᠡᠷ ᠲᠡᠭᠡᠨ ᠪᠤᠴᠠᠬᠤ ᠳ᠋ᠤ᠌
ᠬᠦᠮᠦᠰᠭᠡ ᠴᠢᠨᠢ ᠠᠩᠬᠠ ᠤᠳᠠᠭᠠ ᠠᠭᠤᠯᠠ ᠰᠢᠭ᠋ ᠵᠠᠩᠭᠢᠷᠠᠭᠰᠠᠨ ᠪᠢᠯᠡ
ᠬᠦᠢᠲᠡᠨ ᠡᠪᠦᠯ ᠤᠨ ᠲᠡᠭᠷᠢ ᠰᠢᠭ᠌ ᠲᠠᠨ ᠤ ᠴᠢᠷᠠᠢ ᠪᠠᠷᠤᠢᠨ
ᠬᠦᠴᠦᠲᠡᠢ ᠬᠦᠴᠦᠲᠡᠢ ᠠᠯᠠᠭᠠᠳᠠᠨ ᠲᠠᠭᠤᠭᠰᠠᠭᠠᠷ ᠨᠠᠮᠠᠶ᠋ᠢ ᠪᠠᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠬᠦᠷᠭᠡᠭᠰᠡᠨ ᠪᠢᠯᠡ
ᠡᠪᠦᠭᠡ ᠮᠢᠨᠢ
ᠠᠯᠠᠭᠠᠨ ᠤ ᠴᠢᠨᠢ ᠲᠡᠷᠡ ᠳᠤᠰᠤᠯᠲᠠ ᠶᠠᠭᠠᠬᠢᠭ᠍ᠰᠠᠨ ᠬᠦᠨᠳᠦ ᠶ᠋ᠢ ᠮᠡᠳᠡᠬᠦ ᠦᠭᠡᠢ
ᠠᠢᠯ ᠭᠡᠷ ᠤᠨ ᠢᠶᠠᠨ ᠨᠢᠷᠤᠭᠤ ᠰᠢᠭ᠋
ᠡᠨᠡ ᠪᠡᠶᠡ ᠥᠰᠴᠦ
ᠠᠮᠠᠷᠠᠭ ᠰᠠᠢᠬᠠᠨ ᠭᠡᠷ ᠦᠷᠡ ᠲᠠᠢ
ᠠᠪᠤ ᠪᠣᠯᠣᠭᠰᠠᠨ ᠦᠨᠦᠳᠦᠷ ᠴᠤ᠌
ᠠᠷᠤ ᠠ᠋ᠴᠠ ᠳᠠᠯᠠᠢᠭ᠍ᠰᠠᠨ ᠲᠠᠨ ᠤ ᠲᠤᠮᠤ ᠠᠯᠠᠭᠠ ᠪᠠᠭᠤᠭᠠᠳ ᠢᠷᠡᠮᠡᠷ ᠰᠠᠨᠠᠭᠳᠠᠵᠤ
ᠠᠵᠢᠯ ᠰᠤᠷᠤᠯᠭᠠ ᠬᠣᠶᠠᠷ ᠤᠷᠤᠭᠤ
ᠨᠠᠮᠠᠶ᠋ᠢ ᠲᠠᠭᠤᠭᠰᠠᠭᠠᠷ ᠪᠠᠢᠨᠠ ᠡ!
ᠭᠥᠭᠰᠢᠨ ᠪᠤᠭᠤᠷᠤᠯ ᠪᠣᠯᠣᠭᠰᠠᠨ ᠬᠦᠮᠦᠨ
ᠬᠦᠨᠳᠦᠯᠡᠯ ᠡᠳ᠋ᠯᠡᠨᠡ ᠭᠡᠬᠦ ᠳ᠋ᠤ᠌
ᠬᠦᠭᠡᠷᠦᠬᠦᠢ ᠮᠢᠨᠦ ᠡᠪᠦᠭᠡ ᠲᠠ ᠮᠢᠨᠢ
ᠬᠦᠢᠲᠡᠨ ᠰᠡᠭᠦᠷᠡᠰᠦ ᠵᠠᠯᠭᠢᠵᠤ ᠶᠠᠪᠤᠭᠰᠠᠨ ᠰᠢᠦ
ᠰᠠᠢᠨᠢ ᠨᠢ ᠦᠵᠡᠵᠦ ᠰᠠᠭᠤᠨᠠ ᠳᠠ ᠭᠡᠵᠦ
ᠰᠠᠨᠠᠵᠤ ᠶᠠᠪᠤᠭᠰᠠᠨ ᠦᠷᠡ ᠶ᠋ᠢ ᠴᠢᠨᠢ
ᠰᠠᠮᠠᠭᠤᠷᠠᠯ ᠪᠠᠴᠢᠯᠠᠵᠤ
ᠲᠡᠩᠭᠡᠭᠡ ᠪᠡᠨ ᠪᠠᠷᠠᠭᠰᠠᠨ ᠡᠪᠦᠭᠡ ᠲᠠᠨ ᠢ ᠮᠢᠨᠢ
ᠲᠡᠭᠷᠢ ᠰᠢᠭ᠌ ᠢᠶᠠᠨ ᠳᠠᠬᠢᠵᠤ ᠶᠠᠪᠤᠬᠤ ᠬᠦᠦ ᠶ᠋ᠢ ᠴᠢᠨᠢ ᠭᠢᠨᠳᠠᠨ ᠣᠨᠢᠰᠤᠯᠠᠵᠤ
ᠤᠷᠤᠭᠤ ᠳᠠᠭᠠᠷᠢᠭ᠍ᠰᠠᠨ ᠭᠡᠷ ᠤᠨ ᠮᠢᠨᠢ ᠣᠷᠣᠢ ᠳ᠋ᠤ᠌
ᠤᠷᠠᠩᠬᠠᠢ ᠴᠠᠭᠠᠨ ᠲᠤᠭ ᠬᠠᠳᠬᠤᠭᠰᠠᠨ ᠪᠢᠯᠡ
ᠲᠡᠭᠡᠬᠦ ᠳ᠋ᠤ᠌᠂ ᠡᠪᠦᠭᠡ ᠲᠠ ᠮᠢᠨᠢ
ᠲᠡᠷᠢᠭᠦᠨ ᠢᠶᠠᠨ ᠡᠷᠭᠦᠵᠦ ᠴᠢᠳᠠᠮᠠ ᠦᠭᠡᠢ
ᠭᠠᠯ ᠨᠢ ᠤᠨᠲᠠᠷᠠᠭᠰᠠᠨ ᠬᠣᠪᠣᠩ ᠤᠨ ᠳᠡᠷᠭᠡᠳᠡ
ᠭᠠᠩᠰᠠ ᠪᠠᠨ ᠪᠠᠷᠢᠨ ᠰᠠᠭᠤᠴᠢᠭᠠᠳ ᠰᠡᠳᠬᠢᠯ ᠢ ᠮᠢᠨᠢ ᠴᠠᠷᠴᠠᠲᠠᠯᠠ
ᠰᠡᠷᠭᠦᠯᠡᠩ ᠡᠨᠡ ᠬᠣᠷᠸᠠ ᠶ᠋ᠢᠨ ᠠᠭᠠᠷ ᠠᠮᠢᠰᠬᠤᠯ ᠢ ᠴᠠᠷᠴᠠᠲᠠᠯᠠ
ᠰᠡᠭᠦᠷᠡᠰᠦᠯᠡᠨ ᠰᠡᠭᠦᠷᠡᠰᠦᠯᠡᠭᠰᠡᠭᠡᠷ ᠰᠠᠯᠵᠤ ᠤᠳᠤᠭᠰᠠᠨ ᠪᠢᠯᠡ ᠡ ᠁
ᠡᠪᠦᠭᠡ ᠮᠢᠨᠢ ᠡ ᠂ ᠡᠪᠦᠭᠡ ᠮᠢᠨᠢ
ᠡᠳᠯᠡᠯᠯᠲᠡᠢ ᠪᠠᠢᠭ᠍ᠰᠠᠨ ᠵᠢᠷᠭᠠᠯ ᠢ ᠴᠢᠨᠢ ᠡᠳ᠋ᠯᠡᠭᠦᠯᠦᠭᠡ ᠦᠭᠡᠢ
ᠡᠴᠦᠰ ᠪᠣᠯᠬᠤ ᠥᠲᠡᠯᠦᠭᠡ ᠲᠠᠨ ᠤ ᠮᠢᠨᠢ ᠰᠡᠳᠬᠢᠯ ᠢ
ᠡᠷᠢᠶᠡᠨ ᠬᠣᠷᠸᠠ ᠶ᠋ᠢᠨ ᠬᠦᠢᠲᠡᠨ ᠮᠦᠰᠦ ᠪᠠᠷ ᠳᠠᠷᠣᠭᠰᠠᠨ
ᠲᠡᠷᠡ ᠡᠪᠦᠯ ᠣᠳᠣ᠌ ᠨᠢᠭᠡᠨᠲᠡ ᠥᠩᠭᠡᠷᠡᠭᠰᠡᠨ ᠰᠢᠦ
ᠲᠡᠭᠷᠢ ᠳᠤᠯᠠᠭᠠᠷᠠᠵᠤ᠂
ᠲᠡᠨᠢᠭᠡᠷ ᠭᠣᠸᠠ ᠨᠤᠲᠤᠭ ᠲᠤ ᠮᠢᠨᠢ ᠬᠠᠪᠤᠷ ᠲᠠᠬᠢᠭᠠᠳ ᠢᠷᠡᠭᠰᠡᠨ ᠰᠢᠦ
ᠲᠡᠨᠡᠭ ᠭᠡᠨᠡᠨ ᠦᠷᠡ ᠬᠡᠦᠬᠡᠳ ᠴᠢᠨᠢ ᠰᠢᠦ
ᠲᠡᠦᠬᠡ ᠶ᠋ᠢᠨ ᠨᠢᠳᠦ ᠪᠠᠷ ᠤᠬᠠᠭᠠᠵᠢᠨ
ᠳᠡᠳᠬᠦᠵᠦ ᠰᠠᠨᠠᠬᠤ ᠡᠬᠡ ᠣᠷᠣᠨ ᠤ ᠪᠠᠨ
ᠲᠡᠮᠡᠭᠡ ᠨᠢ ᠰᠢᠭ᠌ ᠪᠠᠷᠳᠠᠮᠬᠠᠨ ᠠᠯᠬᠤᠬᠤ ᠪᠣᠯᠣᠭᠰᠠᠨ ᠰᠢᠦ
ᠭᠡᠲᠡᠯᠡ
ᠡᠨᠡ ᠪᠦᠬᠦᠨ ᠢ ᠦᠵᠡᠬᠦ ᠰᠠᠨ ᠭᠡᠵᠦ
ᠡᠷᠡᠭᠦᠯ ᠤᠨ ᠬᠣᠲᠣᠭ ᠬᠦᠰᠡᠵᠦ ᠶᠠᠪᠤᠭᠰᠠᠨ ᠡᠪᠦᠭᠡ ᠲᠠ ᠮᠢᠨᠢ ᠬᠠᠷᠢᠨ
ᠡᠪᠬᠡᠵᠦ ᠪᠠᠷᠠᠬᠤ ᠦᠭᠡᠢ ᠳᠤᠷᠠᠳᠬᠠᠯ
ᠡᠭᠰᠢᠵᠦ ᠴᠢᠳᠠᠬᠤ ᠦᠭᠡᠢ ᠬᠠᠷᠠᠮᠰᠠᠯᠤᠨ
ᠡᠭᠦᠷᠢᠳᠠ ᠬᠣᠭᠣᠰᠣᠨ ᠣᠷᠣ᠌ ᠣᠷᠬᠢᠨ
ᠡᠬᠡ ᠳᠡᠯᠡᠬᠡᠢ ᠶ᠋ᠢᠨ ᠢᠶᠡᠨ ᠠᠷᠤ ᠴᠠᠭᠠᠭᠤᠷ
ᠡᠷᠭᠢᠰᠢ ᠦᠭᠡᠢ ᠬᠣᠯᠠᠳᠠᠯᠠ ᠪᠢᠯᠡ ᠁
ᠳᠤᠷᠠᠳᠬᠠᠯ ᠴᠢᠨᠢ ᠯᠠ
ᠳᠠᠭᠤᠤ ᠪᠠ ᠰᠢᠯᠦᠭ ᠤᠨ ᠮᠢᠨᠢ ᠬᠣᠶᠠᠷ ᠳᠠᠯᠠᠪᠴᠢ
ᠳᠤᠷᠠᠲᠠᠢ ᠦᠢᠯᠡᠰ ᠢ ᠴᠢᠨᠢ ᠪᠦᠲᠦᠭᠡᠵᠦ ᠶᠠᠪᠤᠬᠤ ᠶ᠋ᠢᠨ ᠳᠠᠭᠤᠳᠠᠯᠭᠠ ᠪᠣᠯᠵᠤ
ᠡᠬᠡ ᠣᠷᠣᠨ ᠳ᠋ᠠᠭᠠᠨ ᠭᠡᠬᠦ ᠲᠦᠮᠡᠨ ᠠᠵᠢᠯ ᠤᠷᠤᠭᠤ ᠨᠠᠮᠠᠶ᠋ᠢ ᠬᠡᠢᠷᠬᠡᠭᠦᠯᠵᠦ
ᠡᠨᠡ ᠠᠮᠢᠳᠤ ᠨᠠᠰᠤᠨ ᠦ ᠰᠠᠢᠨ ᠰᠠᠢᠬᠠᠨ ᠬᠦᠰᠡᠯ ᠤᠨ ᠮᠢᠨᠢ
ᠡᠯᠢᠭᠡ ᠵᠢᠷᠦᠬᠡ ᠪᠣᠯᠣᠨ ᠴᠣᠬᠢᠯᠵᠤ ᠪᠠᠢᠨᠠ ᠡ!
ᠡᠪᠦᠭᠡ ᠮᠢᠨᠢ ᠡ
ᠬᠥᠮᠦᠨ ᠮᠥᠩᠬᠡᠷᠡᠬᠦ ᠦᠭᠡᠢ
ᠬᠥᠮᠦᠨ ᠦ ᠲᠤᠬᠠᠢ ᠳᠤᠷᠠᠳᠬᠠᠯ ᠮᠥᠩᠬᠡᠷᠡᠨᠡ ᠭᠡᠳᠡᠭ
ᠦᠨᠡᠨ ᠪᠠᠢᠨᠠ ᠰᠢᠦ ᠦᠨᠡᠨ ᠪᠠᠢᠨᠠ ᠡ !
1987᠂ 5
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃