ᠢᠷᠭᠤᠢ - ᠲ ᠂ ᠭᠣᠮᠪᠣᠵᠠᠪ Яргуй - Т ᠂ Гомбожав
235ᠢᠷᠭᠤᠢ < ᠤᠤᠭᠠᠨ ᠦᠷᠡ ᠶ᠋ᠢᠨ ᠪᠦᠪᠡᠢ >
ᠢᠷᠭᠤᠢ
ᠮᠢᠨᠦ ᠳᠡᠯᠡᠬᠡᠢ ᠶ᠋ᠢᠨ ᠣᠨ ᠲᠣᠭᠠᠯᠠᠯ ᠨᠣᠭᠣᠭᠠᠷᠠᠯᠠ !
ᠬᠠᠶ᠋ᠢᠷᠠ ᠶ᠋ᠢᠨ ᠪᠠᠶᠠᠨ ᠡᠭᠡᠰᠢᠭ
ᠬᠠᠶᠠᠭ ᠵᠠᠭᠤᠵᠤ
ᠬᠠᠮᠢᠬ᠋ᠠ ᠬᠣᠯᠠ ᠠ᠋ᠴᠠ ᠤᠷᠠᠨ ᠰᠢᠪᠠᠭᠤ ᠢᠷᠡᠨᠡ
ᠴᠡᠩᠬᠡᠷ ᠰᠢᠪᠡᠨᠡᠬᠦ ᠵᠡᠭᠦᠲᠦ
ᠳᠤᠩ ᠴᠠᠭᠠᠨ ᠥᠷᠥᠭᠡᠨ ᠪ
ᠲᠣᠷᠭᠠᠨ ᠬᠥᠰᠢᠭᠡ ᠶ᠋ᠢ ᠢᠷᠡᠨ
ᠳᠤᠷᠠᠯᠠᠯ ᠭᠡᠷᠡᠯᠲᠦᠭᠰᠡᠨ ᠮᠢᠨᠦ ᠮᠠᠩᠨᠠᠢ ᠳ᠋ᠤ᠌ ᠦᠨᠦᠰᠦᠯᠲᠡ ᠢᠷᠡᠵᠦ ᠡᠭᠦᠷᠯᠡᠯᠡ
ᠢᠷᠭᠤᠢ ᠮᠢᠨᠢ ᠂ ᠴᠢ
ᠡᠶ᠋ᠢᠮᠦ ᠯᠡ ᠠᠯᠢᠶᠠᠬᠠᠨ ᠬᠥᠯ ᠦ᠋ᠨ ᠴᠢᠮᠡᠭᠡ ᠪᠡᠷ
ᠮᠢᠨᠦ ᠳᠡᠯᠡᠬᠡᠢ ᠶ᠋ᠢ ᠬᠥᠭᠵᠢᠮᠳᠡᠨ ᠢᠷᠡᠵᠦ
ᠢᠨᠢᠶᠡᠲᠦ ᠳᠠᠭᠤᠤ ᠂ ᠢᠲᠡᠭᠡᠯ ᠬᠦᠰᠡᠯ ᠂ ᠵᠡᠭᠦᠲᠦ ᠪᠣᠲᠣᠯ ᠦ᠋ᠨ
ᠢᠷᠠᠭᠤᠬᠠᠨ ᠢᠷᠭᠤᠢ ᠶ᠋ᠢ ᠮᠢᠨᠢ ᠴᠡᠴᠡᠭᠯᠡᠭᠦᠯᠴᠢᠭᠡᠯᠡ
ᠴᠣᠩᠬᠣ ᠮᠢᠨᠢ ᠨᠡᠭᠡᠭᠡᠭᠲᠡᠨᠡ
ᠴᠣᠮᠣ ᠳᠦᠭᠦᠷᠡᠩ ᠠᠷᠢᠬᠢ ᠪᠠᠨ ᠪᠠᠷᠢᠬᠰᠠᠭᠠᠷ
ᠨᠠᠷᠠ ᠂ ᠭᠡᠷ ᠲᠤ ᠮᠢᠨᠢ ᠢᠷᠡᠨᠡ
ᠰᠡᠭᠦᠲᠡᠷ ᠦ᠋ᠳ ᠪᠤᠯᠤᠩ ᠤᠷᠤᠭᠤ ᠠᠲᠤᠷᠢᠵᠤ
ᠰᠥᠨᠢ ᠶ᠋ᠢᠨ ᠲᠡᠲᠡᠭᠡᠷ ᠬᠠᠷᠠ ᠳᠠᠷᠤᠭᠰᠠᠨ ᠵᠡᠭᠦᠲᠦ
ᠰᠦᠩᠨᠡᠯᠵᠡᠬᠦ ᠠᠷᠢᠬᠢᠨ ᠪ ᠵᠠᠭᠤᠰᠢ ᠪᠣᠯᠵᠤ ᠥᠷᠥᠭᠳᠡᠨᠡ
ᠭᠡᠷᠡᠯ ᠳ᠋ᠤᠨᠢ ᠂ ᠴᠢ
ᠬᠡᠨᠡᠨ ᠬᠣᠩᠭᠣᠷ ᠢᠨᠢᠶᠡᠲᠦ ᠵᠡᠭᠦᠲᠦ ᠬᠣᠶᠠᠷ ᠶ᠋ᠢᠠᠷ ᠶ᠋ᠢᠠᠨ
ᠮᠢᠨᠦ ᠨᠢᠲᠦᠨ ᠳ᠋ᠤ᠌ ᠦᠷᠡ ᠶ᠋ᠢᠨ ᠡᠩᠬᠦᠷᠡᠢ ᠪᠣᠲᠣᠯ ᠰᠢᠪᠡᠨᠡᠨᠡ
ᠮᠢᠨᠦ ᠳᠡᠯᠡᠬᠡᠢ ᠳ᠋ᠤ᠌ ᠥᠪᠡᠷ ᠦ᠋ᠨ ᠴᠡᠩᠬᠡᠷ ᠬᠠᠶᠠᠭ ᠶ᠋ᠢᠠᠨ ᠵᠢᠷᠤᠨᠠ ᠡ !
ᠪᠢ ᠂ ᠡᠯᠲᠡᠪ ᠊ᠢ ᠪᠣᠲᠣᠬᠤ ᠪᠣᠯᠤᠯᠠ
ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ ᠂ ᠡᠮᠴᠢ ᠬᠣᠶᠠᠷ ᠪᠣᠲᠣᠯ ᠳ᠋ᠤ᠌ ᠣᠷᠣᠨᠠ
ᠡᠮ ᠦ᠋ᠨ ᠣᠯᠠᠨ ᠲᠥᠪᠡᠳ ᠨᠡᠷᠡᠰ ᠪᠣᠲᠣᠯ ᠳ᠋ᠤ᠌ ᠣᠷᠣᠨᠠ
ᠡᠨᠡ ᠡᠪᠦᠯ ᠦ᠋ᠨ ᠴᠠᠰᠤ ᠰᠠᠯᠬᠢ ᠂ ᠴᠠᠭ ᠠᠭᠤᠷ ᠦ᠋ᠨ ᠪᠠᠶ᠋ᠢᠲᠠᠯ ᠪᠣᠲᠣᠯ ᠳ᠋ᠤ᠌ ᠣᠷᠣᠨᠠ
ᠡᠷᠬᠡ ᠴᠢᠯᠥᠭᠡ ᠂ ᠡᠩᠬᠡ ᠲᠠᠶ᠋ᠢᠪᠤᠩ
ᠡᠬᠡ ᠣᠷᠣᠨ ᠂ ᠡᠵᠢ ᠂ ᠡᠯᠡᠰᠦ ᠮᠠᠩᠬᠠ ᠁
ᠡᠨᠡ ᠣᠯᠠᠨ ᠶᠠᠭᠤᠮᠠ ᠪᠣᠲᠣᠯ ᠳ᠋ᠤ᠌ ᠣᠷᠣᠨᠠ
ᠡᠨᠡ ᠣᠯᠠᠨ ᠶᠠᠭᠤᠮᠠᠨ ᠳ᠋ᠤ᠌ ᠪᠣᠲᠣᠯ ᠳᠠᠷᠤᠭᠳᠠᠨᠠ ᠡ
ᠳᠠᠪᠠᠬ᠋ᠠ ᠥᠨᠲᠥᠷ ᠪᠠᠶ᠋ᠢᠵᠢ ᠪᠢᠯᠡ
ᠳᠠᠮᠨᠠᠵᠤ ᠶᠠᠪᠤᠬᠤ ᠬᠠᠶ᠋ᠢᠷᠠ ᠬᠦᠨᠲᠦ ᠪᠠᠶ᠋ᠢᠵᠢ ᠪᠢᠯᠡ
ᠳᠠᠯᠠ ᠨᠣᠭᠣᠭᠠᠷᠠᠭᠰᠠᠨ ᠰᠡᠤᠠᠬᠢᠯ ᠦ᠋ᠨ ᠪᠣᠷᠣ ᠵᠠᠮ ᠶ᠋ᠢᠠᠷ
ᠳᠠᠮᠨᠠᠭᠤᠷᠴᠢᠨ ᠂ ᠵᠢᠷᠭᠠᠯ ᠲᠤᠯᠵᠤ
ᠬᠣᠯᠠ ᠶᠠᠪᠤᠭᠰᠠᠨ ᠪᠢᠯᠡ !
ᠬᠣᠷᠸ᠋ᠠ ᠲᠠᠨᠢᠬᠰᠠᠨ ᠪᠢᠯᠡ !
ᠲᠡᠷᠡᠬᠦ ᠮᠥᠷ ᠨᠢ ᠂ ᠬᠠᠪᠤᠷ ᠦ᠋ᠨ ᠬᠦᠬᠡᠷᠬᠡᠭ ᠲᠠᠯᠠ
ᠲᠡᠮᠲᠡᠭ ᠡᠷᠭᠦᠵᠦ ᠴᠡᠩᠬᠡᠷ ᠢᠷᠭᠤᠢ ᠪᠤᠲᠠᠯᠠᠭᠤᠯᠴᠢᠬᠠᠯᠡ
ᠢᠷᠭᠤᠢ ᠪᠠᠨ ᠲᠡᠪᠡᠷᠢᠵᠦ
ᠲᠠᠯᠠ ᠂ ᠳᠡᠯᠡᠬᠡᠢ ᠶ᠋ᠢ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠤᠷᠭᠤᠭᠤᠯᠤᠨᠠ
ᠲᠠᠯᠠ ᠪᠠᠨ ᠲᠠᠨᠢᠵᠤ
ᠢᠷᠭᠤᠢ ᠂ ᠬᠣᠷᠸ᠋ᠠ ᠶ᠋ᠢ ᠡᠯᠢᠭᠡᠨ ᠳᠣᠣᠷᠠ ᠪᠠᠨ ᠥᠮᠴᠢᠷᠬᠡᠨᠡ
ᠲᠠᠯᠠ ᠂ ᠴᠡᠴᠡᠭ ᠬᠣᠶᠠᠭᠤᠯᠠ ᠶ᠋ᠢ ᠡᠬᠡ ᠣᠷᠣᠨ ᠤᠩᠰᠢᠨᠠ ᠡ !
ᠮᠢᠨᠦ ᠂ ᠭᠣᠯᠣᠮᠲᠠ ᠡᠷᠭᠦᠬᠦ ᠪᠣᠲᠣᠯ
ᠮᠠᠷᠭᠠᠰᠢ ᠲᠩᠷᠢ ᠨᠥᠬᠥᠬᠦ ᠬᠦᠰᠡᠯ
ᠢᠷᠭᠤᠢ ᠭᠡᠵᠦ ᠴᠢᠮᠠ ᠪᠠᠨ ᠪᠢ
ᠢᠷᠠᠭᠤ ᠨᠠᠶ᠋ᠢᠷᠠᠭ ᠶ᠋ᠢᠠᠷ ᠶ᠋ᠢᠠᠨ ᠳᠠᠭᠤᠳᠠᠨᠠ
ᠢᠲᠡᠭᠡᠯ ᠨᠢ ᠶᠤᠮ ᠭᠡᠵᠦ ᠨᠤᠲᠤᠭ ᠲᠠᠭᠠᠨ ᠪᠢ
ᠢᠨᠢᠶᠡᠬᠦ ᠨᠢᠲᠦ ᠪᠡᠷ ᠶ᠋ᠢᠠᠨ ᠶᠠᠷᠢᠨᠠ ᠁
ᠪᠢ ᠥᠯᠥᠭᠡᠢ ᠪᠣᠯᠴᠢᠯᠡ
ᠪᠠᠯᠲᠤ ᠰᠠᠶ᠋ᠢᠬᠠᠨ ᠨᠣᠶ᠋ᠢᠷ ᠤᠷᠤᠭᠤ
ᠪᠠᠶᠠᠨ ᠭᠤᠸ᠋ᠠ ᠵᠡᠭᠦᠲᠦ ᠤᠷᠤᠭᠤ ᠴᠢᠮᠠᠶ᠋ᠢ ᠬᠥᠲᠥᠯᠦᠨ ᠰᠠᠵᠢᠯᠤᠨᠡ ᠪᠢᠯᠡ
ᠪᠢ ᠰᠦ᠋ ᠪᠣᠯᠴᠢᠯᠡ
ᠭᠦᠬᠦᠨ ᠲᠣᠪᠴᠢ ᠶ᠋ᠢᠨ ᠵᠢᠵᠢᠭᠬᠡᠨ ᠵᠠᠪᠰᠠᠷ ᠶ᠋ᠢᠠᠷ
ᠬᠥᠯᠥᠭ ᠦ᠋ᠨ ᠠᠯᠲᠠᠨ ᠳᠥᠷᠥᠭᠡ ᠥᠭᠡᠲᠡ ᠴᠢᠮᠠ ᠶ᠋ᠢ ᠡᠷᠭᠦᠨ ᠢᠪᠡᠯᠦᠨ ᠪᠢᠯᠡ
ᠪᠢ ᠳᠠᠭᠤᠤ ᠪᠣᠯᠴᠢᠯᠡ
ᠥᠬᠦᠭᠡᠷᠲᠡᠯ ᠦ᠋ᠨ ᠨᠠᠮᠤᠭᠤᠬᠠᠨ ᠡᠭᠡᠰᠢᠭ ᠶ᠋ᠢᠡᠷ
ᠥᠩᠭᠡᠲᠦ ᠠᠮᠢᠲᠤᠷᠠᠯ ᠦ᠋ᠨ ᠵᠢᠷᠭᠠᠯ ᠤᠷᠤᠭᠤ ᠴᠢᠮᠠ ᠪᠠᠨ ᠢᠷᠥᠭᠡᠨ ᠬᠠᠩᠭᠢᠨᠠᠨᠠ ᠪᠢᠯᠡ !
ᠪᠢ ᠨᠠᠷᠠ ᠪᠣᠯᠴᠢᠯᠡ
ᠭᠡᠶ᠋ᠢᠭᠦᠯᠵᠦ ᠴᠢᠲᠠᠬᠤ ᠪᠦᠬᠦᠨ ᠶ᠋ᠢᠡᠨ ᠭᠡᠶ᠋ᠢᠭᠦᠯᠬᠦ
ᠭᠡᠷ ᠡᠴᠡ ᠦᠢᠯᠡᠰ ᠬᠦᠷᠬᠦ ᠵᠠᠮ ᠊ᠢ ᠴᠢᠨᠢ ᠭᠡᠷᠡᠯ ᠶ᠋ᠢᠡᠷ ᠶ᠋ᠢᠡᠨ ᠳᠡᠪᠢᠰᠬᠦ
ᠨᠠᠷᠠ ᠪᠣᠯᠴᠢᠯᠡ ᠪᠢ !
ᠡᠬᠡ ᠣᠷᠣᠨ ᠪ ᠪᠡᠨ ᠨᠡᠷᠡ ᠶ᠋ᠢᠨ ᠡᠮᠦᠨᠡ ᠡᠴᠡ
ᠡᠴᠢᠭᠡ ᠶ᠋ᠢᠨ ᠰᠠᠶ᠋ᠢᠬᠠᠨ ᠠᠯᠲᠠᠷ ᠡᠷᠭᠦᠬᠦ
ᠡᠩᠬᠡ ᠶ᠋ᠢᠨ ᠬᠠᠷᠠᠭᠤᠯ
ᠡᠷᠡᠭᠦᠯ ᠦ᠋ᠨ ᠮᠠᠨᠠᠬ᠋ᠠ
ᠡᠷᠬᠡ ᠴᠢᠯᠥᠭᠡᠨ ᠪ ᠴᠡᠷᠢᠭ ᠁
ᠨᠠᠷᠠ ᠪᠣᠯᠴᠢᠯᠡ ᠪᠢ ᠂ ᠨᠠᠷᠠ ᠪᠣᠯᠴᠢᠯᠡ ᠡ !
ᠮᠠᠨᠠᠨ
ᠴᠢ ᠮᠢᠨᠢ ᠵᠡᠭᠦᠲᠦᠯᠡᠨᠡ
ᠴᠢᠩᠬᠢᠭᠡᠳ ᠣᠬᠢᠯᠠᠨᠠ ᠂ ᠢᠨᠢᠶᠡᠨᠡ
ᠶᠠᠭᠤ ᠴᠤ᠌ ᠦᠵᠡᠭᠳᠡᠬᠦ ᠦᠭᠡᠢ
ᠶᠠᠭᠤ ᠴᠤ᠌ ᠬᠠᠷᠠᠭᠲᠠᠬᠤ ᠦᠭᠡᠢ
ᠴᠡᠴᠡᠭ ᠬᠢᠰᠬᠢᠯᠡᠵᠦ ᠰᠢᠭᠤᠷᠬ᠋ᠠ ᠢᠰᠭᠡᠷᠦᠨᠡ
ᠰᠡᠤᠠᠬᠢᠯ ᠴᠠᠷᠴᠠᠭᠠᠵᠤ ᠮᠥᠰᠦ ᠵᠤᠵᠠᠭᠠᠷᠠᠨᠠ
ᠪᠡᠯᠴᠢᠭᠡᠷ ᠦ᠋ᠨ ᠥᠷᠥ ᠰᠦᠪᠡᠯᠡᠵᠦ
ᠪᠢᠯᠡᠭᠦᠲᠡᠭᠰᠡᠨ ᠬᠢᠲᠤᠭᠠᠨ ᠢᠷ ᠂ ᠵᠠᠮ ᠬᠠᠷᠠᠯᠠᠨᠠ
ᠬᠥᠯ ᠮᠢᠨᠢ ᠡᠰᠭᠡᠭᠳᠡᠯᠡ
ᠬᠦᠷᠡᠩ ᠴᠢᠰᠤ ᠨᠡᠯᠦᠢ ᠬᠠᠯᠤᠢ
ᠪᠢ ᠣᠬᠢᠯᠠᠴᠢᠬᠠᠯᠠ
ᠮᠠᠨᠠᠨ ᠳ᠋ᠤ᠌ ᠲᠦᠭᠡᠷᠢᠵᠤ ᠪᠢ ᠂ ᠮᠠᠷᠭᠠᠰᠢ ᠥᠭᠡᠲᠡ ᠪᠡᠨ ᠶᠠᠪᠤᠯᠠ
ᠰᠠᠯᠬᠢ ᠰᠡᠷ ᠰᠡᠷ
ᠪᠣᠷᠤᠬ᠋ᠠ ᠰᠢᠪᠡᠷ ᠰᠢᠪᠡᠷ
ᠪᠣᠲᠣᠯ ᠶ᠋ᠢᠠᠨ ᠳᠠᠭᠠᠨ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠪᠢ
ᠪᠥᠮᠪᠥᠷᠴᠡᠭ ᠦ᠋ᠨ ᠮᠠᠩᠨᠠᠢ ᠳ᠋ᠤ᠌ ᠭᠠᠷᠴᠢᠬᠠᠯᠠ
ᠬᠦᠳᠡᠭᠳᠡᠭᠰᠡᠨ ᠬᠠᠷᠠ ᠰᠦᠨᠢ ᠶ᠋ᠢᠨ ᠲᠡᠭᠷᠢ ᠶ᠋ᠢ ᠠᠷᠴᠢᠬᠰᠠᠭᠠᠷ
ᠬᠦᠷᠲᠦᠨ ᠤᠯᠠᠭᠠᠨ ᠠᠯᠴᠢᠭᠤᠷ ᠮᠥᠷᠥ ᠰᠢᠭᠦᠷᠦᠨ ᠪᠠᠭᠤᠨᠠ
ᠬᠦᠯᠢᠶᠡᠭᠳᠡᠭᠰᠡᠨ ᠠᠮᠠᠷᠠᠭ ᠲᠡᠷᠭᠡᠯᠭᠡᠨ ᠵᠡᠭᠦᠲᠦ ᠰᠠᠮᠨᠠᠭᠰᠠᠭᠠᠷ
ᠬᠦᠷᠢᠶᠡ ᠴᠠᠭᠠᠨ ᠬᠠᠲᠠᠭ ᠠᠯᠠᠬ᠋ᠠ ᠥᠨᠥᠰᠦᠨ ᠰᠠᠭᠤᠨᠠ
ᠣᠲᠣ ᠦᠰᠦᠨ ᠳ᠋ᠤ᠌ ᠮᠢᠨᠢ ᠰᠢᠭᠠᠯᠠ
ᠣᠯᠠᠨ ᠠᠷᠪᠢᠨ ᠭᠠᠷ ᠨᠠᠮᠠᠶ᠋ᠢ ᠭᠡᠲᠡᠭᠡᠯᠡᠨᠡ ᠂
ᠪᠢ ᠢᠨᠢᠶᠡᠴᠢᠭᠡᠯᠡ!
ᠴᠢ ᠵᠡᠭᠦᠲᠦᠯᠡᠨᠡ
ᠴᠢᠩᠬᠢᠭᠡᠳ ᠣᠬᠢᠯᠠᠨᠠ ᠂ ᠢᠨᠢᠶᠡᠨᠡ
ᠴᠢᠷᠠᠢ ᠴᠢᠨᠢ ᠲᠣᠲᠣᠷᠠᠨ ᠲᠣᠲᠣᠷᠠᠭᠰᠠᠭᠠᠷ
ᠴᠠᠪ ᠴᠠᠭᠠᠨ ᠰᠢᠯᠦᠭ ᠪᠣᠯᠴᠢᠯᠠ!
ᠲᠡᠩᠬᠡᠯᠢᠭ
ᠬᠦᠮᠦᠨ ᠦ ᠬᠣᠩᠭᠣᠷᠬᠠᠨ ᠦᠷᠡ
ᠬᠦᠰᠡᠯ ᠦᠨ ᠰᠠᠢᠬᠠᠨ ᠲᠡᠩᠬᠡᠯᠢᠭ ᠪᠠᠢᠨᠠᠮ ᠴᠢ!
ᠵᠦᠭ ᠵᠣᠪᠬᠢᠰ ᠤᠨ ᠲᠥᠪ
ᠲᠠᠯᠠ ᠥᠨᠴᠥᠭ ᠦᠨ ᠳᠣᠪᠴᠢ
ᠴᠢᠮᠠᠶ᠋ᠢ ᠵᠠᠨᠤᠵᠦ ᠬᠦᠷᠳᠦ ᠳᠤᠭᠤᠢᠷᠠᠨᠠ
ᠴᠢᠮᠠᠶ᠋ᠢ ᠡᠮᠬᠦᠵᠦ ᠪᠥᠮᠪᠦᠷᠴᠡᠭ ᠬᠡᠯᠪᠡᠷᠢᠵᠢᠨᠡ
ᠪᠢᠳᠠ ᠣᠯᠠᠭᠤᠯᠠ ᠴᠢᠮᠠᠶ᠋ᠢ ᠲᠣᠭᠣᠷᠢᠵᠤ ᠭᠠᠷ ᠭᠠᠷ ᠢᠶᠠᠨ ᠬᠣᠯᠪᠣᠯᠴᠠᠨᠠ
ᠪᠢᠳᠠᠨ ᠤ ᠠᠮᠢᠳᠤᠷᠠᠯ ᠴᠢᠮᠠ ᠪᠠᠷ ᠲᠥᠪᠯᠡᠵᠦ ᠡᠷᠭᠢᠯᠭᠡ ᠪᠣᠰᠣᠨᠠ
ᠪᠢ᠂ ᠴᠢᠮᠠ ᠪᠠᠨ ᠬᠠᠷᠠᠵᠤ ᠣᠯᠠᠨ ᠶᠠᠭᠤᠮᠠ ᠵᠡᠭᠦᠳᠦᠯᠡᠨᠡ ᠪᠢᠯᠡ
ᠴᠢᠮᠠ ᠠ᠋ᠴᠠ ᠨᠤᠭᠲᠣ ᠪᠠᠨ ᠤᠶᠠᠵᠤ
ᠪᠢᠳᠠ ᠲᠡᠮᠡᠭᠡ ᠰᠢᠭ᠌ ᠤᠯᠠᠭᠠᠨ ᠡᠯᠡᠰᠦᠨ ᠳ᠋ᠤ᠌ ᠨᠣᠭᠤᠭᠠᠨ ᠪᠣᠳᠣᠯ ᠬᠢᠰᠬᠢᠨᠡᠮ
ᠴᠢᠮᠠ ᠠ᠋ᠴᠠ ᠲᠠᠲᠠᠯᠭᠠ ᠪᠠᠨ ᠬᠠᠳᠠᠵᠤ
ᠪᠢᠳᠠ ᠦᠬᠡᠷ ᠰᠢᠭ᠌ ᠵᠥᠭᠡᠯᠡᠨ ᠬᠡᠪᠲᠡᠷᠢ ᠳ᠋ᠤ᠌ ᠬᠠᠲᠠᠭᠤ ᠬᠦᠰᠡᠯ ᠬᠡᠪᠢᠨᠡᠮ
ᠴᠢᠮᠠ ᠠ᠋ᠴᠠ ᠬᠠᠢᠷᠠ ᠪᠠᠨ ᠤᠶᠠᠵᠤ
ᠪᠢᠳᠠ ᠣᠯᠠᠭᠤᠯᠠ᠂ ᠡᠪᠦᠯᠵᠢᠶᠡ ᠡᠴᠡ ᠬᠠᠪᠤᠷᠵᠢᠶᠠ ᠵᠦᠭ
ᠡᠩᠨᠡᠭᠡ ᠪᠣᠯᠵᠤ ᠣᠲᠣᠷᠯᠠᠨᠠᠮ ᠪᠢᠯᠡ
ᠲᠡᠨᠢᠭᠦᠬᠡᠨ ᠬᠠᠷᠠᠭᠳᠠᠬᠤ
ᠲᠡᠷᠡ ᠬᠠᠪᠤᠷᠵᠢᠶᠠ ᠬᠣᠯᠠᠬᠠᠨ ᠪᠠᠢᠨᠠ
ᠲᠡᠷᠭᠡ ᠴᠣᠴᠠᠭᠠᠬᠤ ᠴᠢᠯᠠᠭᠤ ᠬᠡᠪᠲᠡᠭᠰᠡᠨ ᠵᠠᠮ ᠢᠶᠠᠷ
ᠲᠡᠩᠬᠡᠯᠢᠭ ᠢᠶᠠᠨ ᠬᠦᠷᠢᠶᠡᠯᠡᠵᠦ
ᠬᠦᠷᠳᠦ ᠰᠢᠭ᠌ ᠪᠢᠳᠠ᠂ ᠬᠦᠴᠦ ᠬᠦᠴᠦ ᠪᠠᠨ ᠭᠠᠩᠨᠠᠵᠦ ᠶᠠᠪᠤᠨᠠ ᠡ
ᠥᠭᠭᠦᠨᠡᠮ
ᠴᠢᠮᠠ ᠳ᠋ᠠᠭᠠᠨ ᠪᠢ
ᠰᠦᠨ ᠴᠠᠭᠠᠨ ᠳᠡᠯᠡᠬᠡᠢ᠂ ᠡᠬᠡ ᠶ᠋ᠢᠨ ᠬᠠᠢᠷᠠ ᠥᠭᠭᠦᠨᠡᠮ
ᠰᠦᠯᠳᠡ ᠶ᠋ᠢᠨ ᠦᠨᠳᠦᠷ ᠬᠠᠢᠷᠠᠬᠠᠨ ᠂ ᠡᠴᠢᠭᠡ ᠶ᠋ᠢᠨ ᠬᠡᠰᠢᠭ ᠥᠭᠭᠦᠨᠡᠮ
ᠭᠣᠪᠢ ᠶ᠋ᠢᠨ ᠴᠡᠩᠬᠡᠷᠬᠡᠨ ᠵᠡᠷᠭᠡᠯᠡᠭᠡ ᠨᠠᠭᠠᠳᠬᠤ
ᠰᠤᠭᠤ ᠶ᠋ᠢᠨ ᠠᠯᠢᠶᠠᠬᠠᠨ ᠪᠣᠳᠣᠯ ᠂ ᠵᠡᠭᠦᠳᠦ ᠥᠭᠭᠦᠨᠡᠮ
ᠲᠠᠯᠠ ᠶ᠋ᠢᠨ ᠭᠣᠪᠠᠢᠬᠠᠨ ᠳᠡᠷᠡᠰᠦ ᠦᠰᠦᠷᠬᠦ
ᠭᠣᠯᠢᠶᠠ ᠶ᠋ᠢᠨ ᠢᠷᠠᠭᠤᠬᠠᠨ ᠵᠢᠷᠦᠬᠡ᠂ ᠢᠨᠢᠶᠡᠳᠦ ᠥᠭᠭᠦᠨᠡᠮ
ᠴᠢᠮᠠ ᠳ᠋ᠤ᠌ ᠥᠭᠭᠦᠨᠡᠮ
ᠴᠢᠮᠠ ᠳ᠋ᠠᠭᠠᠨ ᠪᠢ
ᠴᠠᠩ ᠨᠢ ᠠᠷᠢᠯᠤᠭᠰᠠᠨ ᠂ ᠳᠤᠷᠠᠨ ᠬᠠᠷᠠᠭᠠ ᠥᠭᠭᠦᠨᠡᠮ
ᠴᠠᠴᠤᠭ ᠨᠢ ᠳᠡᠯᠭᠡᠷᠡᠭᠰᠡᠨ ᠴᠡᠴᠡᠭ ᠂ ᠤᠷᠠᠨ ᠰᠠᠨᠠᠭᠠ ᠥᠭᠭᠦᠨᠡᠮ
ᠤᠴᠠᠷᠠᠨ ᠵᠠᠶᠠᠭᠠᠭᠰᠠᠨ ᠠᠭᠤᠯᠠ ᠤᠰᠤᠨ ᠳ᠋ᠠᠭᠠᠨ
ᠤᠷᠢᠬᠠᠨ ᠬᠠᠪᠤᠷ
ᠤᠷᠠᠨ ᠠᠷᠪᠠᠨ ᠬᠤᠷᠤᠭᠤ ᠪᠠᠷ ᠢᠶᠠᠨ
ᠤᠭᠠᠯᠵᠠᠲᠤ ᠲᠡᠷᠯᠢᠭ ᠣᠶᠣᠨᠠ ᠪᠢᠯᠡ ᠭᠡᠬᠦ ᠰᠠᠢᠬᠠᠨ ᠦᠯᠢᠭᠡᠷ ᠥᠭᠭᠦᠨᠡᠮ
ᠡᠷᠡ ᠬᠥᠮᠦᠨ ᠲᠡᠭᠷᠢ ᠳᠡᠭᠡᠷᠡ
ᠡᠮᠨᠢᠭ ᠰᠠᠨᠠᠭᠠᠨ ᠤ ᠳᠥᠷᠥᠭᠡ ᠶ᠋ᠢ ᠬᠠᠩᠭᠢᠨᠠᠭᠤᠯᠵᠤ
ᠡᠵᠢ ᠶ᠋ᠢᠨ ᠬᠦᠰᠡᠯ ᠲᠡᠭᠦᠨᠡ ᠪᠢᠯᠡ ᠭᠡᠬᠦ ᠰᠤᠷᠭᠤᠭᠬᠠᠨ ᠳᠣᠮᠣᠭ ᠥᠭᠭᠦᠨᠡᠮ
ᠴᠢᠮᠠ ᠳ᠋ᠤ᠌ ᠥᠭᠭᠦᠨᠡᠮ
ᠴᠢᠮᠠ ᠳ᠋ᠠᠭᠠᠨ ᠪᠢ
ᠤᠨᠲᠠᠷᠠᠳᠠᠭ ᠦᠭᠡᠢ ᠭᠡᠷᠡᠯ ᠂ ᠵᠠᠯᠠᠭᠤᠬᠠᠨ ᠨᠠᠷᠠ ᠥᠭᠭᠦᠨᠡᠮ
ᠤᠷᠤᠭᠤᠳᠠᠳᠠᠭ ᠦᠭᠡᠢ ᠵᠠᠮ ᠂ ᠥᠭᠡᠳᠡᠷᠡᠭ ᠵᠠᠶᠠᠭᠠ ᠥᠭᠭᠦᠨᠡᠮ
ᠰᠠᠢᠬᠠᠨ ᠴᠢᠮᠠ ᠶ᠋ᠢ ᠨᠠᠳᠠ ᠣᠯᠭᠣᠭᠰᠠᠨ
ᠰᠠᠨᠠᠯ ᠬᠠᠢᠷᠠ ᠶ᠋ᠢᠨ ᠠᠮᠢᠳᠤ ᠰᠠᠬᠢᠭᠤᠯᠰᠤᠨ᠂ ᠡᠬᠡ ᠣᠷᠣᠨ ᠢᠶᠠᠨ ᠥᠭᠭᠦᠨᠡᠮ
ᠡᠩᠬᠡ ᠶ᠋ᠢᠨ ᠲᠠᠪᠢᠯᠠᠩ ᠢᠶᠠᠨ ᠪᠢᠳᠠᠨ ᠳ᠋ᠤ᠌ ᠳᠤᠰᠢᠶᠠᠭᠰᠠᠨ
ᠡᠷᠭᠢᠬᠦ ᠬᠣᠷᠸᠠ ᠶ᠋ᠢᠨ ᠴᠡᠩᠬᠡᠷ ᠳᠣᠪᠴᠢ᠂ ᠡᠨᠡ ᠳᠡᠯᠡᠬᠡᠢ ᠪᠡᠨ ᠥᠭᠭᠦᠨᠡᠮ
ᠡᠩᠬᠦᠷᠡᠢ ᠬᠠᠢᠷᠠᠲᠤ ᠦᠷᠡ ᠮᠢᠨᠢ ᠡ
ᠡᠴᠢᠭᠡ ᠴᠢᠨᠢ ᠴᠢᠮᠠᠳᠤ ᠠᠯᠢᠪᠠ ᠪᠠᠨ ᠥᠭᠭᠦᠨᠡᠮ ᠪᠢᠯᠡ !
1985᠂ 11᠂ 21 - 12᠂ 31
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ : ᠳᠠᠪᠰᠢᠯᠲᠦ ᠂ ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 5᠂ 1 ᠪ ᠡᠲᠦᠷ