ᠬᠡᠦᠬᠡᠨ ᠳᠦ ᠪᠡᠨ ᠵᠠᠬᠢᠬᠤ ᠦᠭᠡ – ᠭᠠᠮᠠᠯ Хүүхэндээ захих үг – Гамал
392 ᠬᠡᠦᠬᠡᠨ ᠳ᠋ᠦ᠍ ᠪᠡᠨ ᠵᠠᠬᠢᠬᠤ ᠦᠭᠡ (1)
ᠭᠠᠮᠠᠯ
[ ᠤᠩᠰᠢᠯᠬ᠋ᠠ ᠶ᠋ᠢᠨ ᠬᠥᠲᠥᠴᠢ ]
ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠰᠤᠷᠭᠠᠯ ᠭᠡᠳᠡᠭ ᠥᠪ ᠰᠣᠶᠣᠯ ᠦ᠋ᠨ ᠮᠠᠨᠢ ᠨᠡᠯᠦᠭᠡᠷ ᠳᠠᠯᠠᠢ ᠳᠣᠲᠣᠷᠠᠬᠢ ᠮᠥᠩᠬᠡ ᠭᠢᠯᠠᠯᠵᠠᠬᠤ ᠰᠤᠪᠤᠳ ᠡᠷᠲᠡᠨᠢ ᠶᠤᠮ ᠡ !
ᠮᠣᠩᠭᠣᠯᠴᠤᠳ ᠶᠡᠷᠦ ᠨᠢ 《 ᠠᠪᠤ ᠶ᠋ᠢᠨ ᠰᠤᠷᠭᠠᠯ ᠠᠯᠲᠠ ᠂ ᠡᠵᠢ ᠶ᠋ᠢᠨ ᠰᠤᠷᠭᠠᠯ ᠡᠷᠲᠡᠨᠢ 》 ᠭᠡᠵᠦ ᠥᠰᠬᠡᠵᠦ ᠲᠥᠷᠥᠭᠦᠯᠦᠭᠰᠡᠨ ᠠᠪᠤ ᠡᠵᠢ ᠶ᠋ᠢᠨ ᠶ᠋ᠢᠡᠨ ᠵᠠᠬᠢᠶᠠ ᠰᠤᠷᠭᠠᠯ ᠊ᠢ ᠨᠠᠨᠲᠢᠩᠨᠠᠨ ᠵᠢᠷᠤᠮᠯᠠᠵᠤ ᠶᠠᠪᠤᠲᠠᠭ ᠪᠢᠯᠡ ᠃ ᠪᠢᠲᠡ ᠨᠣᠮ ᠦ᠋ᠨ ᠡᠬᠢᠨ ᠳ᠋ᠦ᠍ 《 ᠬᠡᠦᠬᠡᠨ ᠳ᠋ᠦ᠍ ᠪᠠᠨ ᠵᠠᠬᠢᠬᠤ ᠦᠭᠡ 》 ᠭᠡᠬᠦ ᠰᠢᠯᠦᠭ ᠶ᠋ᠢᠡᠷ ᠬᠠᠭᠤᠲᠠᠰᠤ ᠰᠡᠬᠦᠯᠡ ᠃ ᠡᠨᠡ ᠰᠢᠯᠦᠭ ᠪᠣᠯ ᠰᠢᠯᠦᠭᠴᠢ ᠭᠠᠭᠴᠠᠬᠠᠨ ᠥᠪᠡᠷ ᠦ᠋ᠨ ᠬᠡᠦᠬᠡᠨ ᠳ᠋ᠦ᠍ ᠪᠠᠨ ᠪᠢᠰᠢ ᠂ ᠬᠠᠷᠢᠨ ᠤᠩᠰᠢᠬᠴᠢ ᠪᠦᠬᠦᠨ ᠳ᠋ᠦ᠍ ᠪᠡᠯᠡᠭᠯᠡᠭᠰᠡᠨ ᠨᠠᠨᠲᠢᠨ ᠬᠠᠶ᠋ᠢᠷᠠ ᠶ᠋ᠢᠨ ᠦᠨᠡᠲᠦ ᠰᠤᠷᠭᠠᠯ ᠰᠢᠦ ᠳ᠋ᠠ ! ᠬᠠᠶ᠋ᠢᠷᠠᠲᠤ ᠰᠤᠷᠤᠭᠴᠢᠳ ᠮᠢᠨᠢ ᠰᠢᠯᠦᠭ ᠊ᠢ ᠤᠩᠰᠢᠨ ᠰᠣᠨᠢᠷᠬᠠᠬᠤ ᠶ᠋ᠢᠨ ᠳᠠᠭᠠᠤ ᠠᠯᠲᠠ ᠠ᠋ᠴᠠ ᠦᠨᠡᠲᠡᠢ ᠰᠤᠷᠭᠠᠯ ᠵᠠᠬᠢᠶᠠ ᠶ᠋ᠢ ᠨᠢ ᠥᠷᠥ ᠵᠢᠷᠦᠬᠡᠨ ᠳ᠋ᠦ᠍ ᠪᠠᠨ ᠰᠢᠩᠭᠡᠭᠡᠵᠦ ᠂ ᠰᠣᠶᠣᠯ ᠪᠣᠯᠪᠠᠰᠤᠷᠠᠯ ᠲᠠᠢ ᠂ ᠶᠣᠰᠣ ᠮᠣᠷᠠᠯ ᠲᠠᠢ ᠬᠥᠮᠦᠨ ᠪᠣᠯᠵᠤ ᠪᠣᠶ᠋ᠢᠵᠢᠭᠠᠷᠠᠢ !
ᠰᠢᠯᠦᠭ ᠊ᠢ ᠴᠡᠭᠡᠵᠢᠯᠡᠭᠡᠳ ᠂ ᠤᠤᠠᠬᠠ ᠶ᠋ᠢ ᠨᠢ ᠰᠤᠪᠢᠵᠤ ᠤᠬᠠᠭᠠᠷᠠᠢ ᠃
ᠭᠦᠷᠦᠪᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠬᠤᠷᠠᠬ᠋ᠠ ᠴᠦ᠍ ᠭᠡᠳ
ᠬᠥᠯ ᠶ᠋ᠢᠡᠨ ᠰᠥᠭᠥᠤᠠᠴᠦ ᠬᠦᠬᠦᠳᠡᠭ ᠶᠤᠮ ᠂
ᠬᠥᠮᠦᠨ ᠪ ᠲᠥᠷᠥᠭᠰᠡᠨ ᠦᠷᠡ ᠭᠡᠭᠴᠢ
ᠬᠥᠭᠡᠷᠦᠬᠦᠶ᠋ᠢᠯᠡᠵᠦ ᠬᠡᠯᠡᠳᠡᠭ ᠊ᠢ ᠮᠡᠳᠡᠳᠡᠭ ᠶᠤᠮ ᠃
ᠤᠷᠤᠭᠯᠠᠵᠤ ᠮᠣᠷᠲᠠᠭᠰᠠᠨ ᠬᠡᠦᠬᠡᠨ ᠳ᠋ᠦ᠍ ᠪᠡᠨ
ᠤᠴᠢᠷ ᠲᠠᠢ ᠦᠭᠡ ᠪᠡᠨ ᠵᠠᠬᠢᠶᠠ ᠂
ᠠᠭᠤᠰᠬᠢ ᠵᠢᠷᠦᠬᠡᠨ ᠳᠣᠲᠣᠷᠠ ᠪᠠᠨ
ᠤᠬᠠᠭᠠᠷᠠᠵᠤ ᠶᠠᠪᠤ ᠳ᠋ᠠ ᠬᠡᠦᠬᠡᠨ ᠮᠢᠨᠢ ᠃
ᠬᠤᠷᠮᠤᠰᠲᠠ ᠡᠵᠡᠨ ᠲᠩᠷᠢ ᠳ᠋ᠦ᠍ ᠪᠡᠨ
ᠬᠤᠷᠤᠳ ᠰᠦ᠋ ᠪᠡᠨ ᠡᠷᠭᠦᠵᠦ ᠶᠠᠪᠤ ᠂
ᠬᠠᠭᠤᠴᠢᠨ ᠳᠡᠭᠡᠳᠦᠰ ᠦ᠋ᠨ ᠰᠢᠲᠦᠭᠡᠨ ᠳ᠋ᠦ᠍ ᠪᠠᠨ
ᠬᠠᠭᠤᠷᠮᠠᠭ ᠦᠭᠡᠢ ᠰᠦᠵᠢᠭᠯᠡᠵᠦ ᠶᠠᠪᠤ !
ᠠᠪᠤ ᠡᠵᠢ ᠪᠡᠨ ᠬᠦᠨᠲᠦᠯᠡᠵᠦ
ᠠᠰᠠᠷᠠᠯ ᠬᠠᠶ᠋ᠢᠷᠠ ᠶ᠋ᠢ ᠨᠢ ᠬᠦᠷᠲᠡᠵᠦ ᠶᠠᠪᠤ ᠂
ᠠᠬᠠ ᠳᠡᠭᠦᠦ ᠨᠡᠷ ᠶ᠋ᠢᠡᠨ ᠲᠡᠤᠠᠬᠦᠵᠦ
ᠠᠮᠤᠷ ᠲᠡᠨᠢᠭᠦᠨ ᠨᠠᠶ᠋ᠢᠷ ᠲᠠᠢ ᠶᠠᠪᠤ !
ᠰᠢᠨᠡ ᠴᠠᠭ ᠊ᠢ ᠳᠠᠭᠤᠷᠢᠶᠠᠭᠠᠳ
ᠤᠤᠵᠢ ᠦᠭᠡᠢ ᠪᠢᠲᠡᠭᠡᠢ ᠶᠠᠪᠤᠭᠠᠷᠠᠢ !
ᠰᠢᠷᠬᠡᠭ ᠦᠰᠦ ᠪᠡᠨ ᠬᠠᠶ᠋ᠢᠷᠠᠯᠠᠭᠠᠳ
ᠰᠦᠢᠬᠡ ᠦᠭᠡᠢ ᠪᠢᠲᠡᠭᠡᠢ ᠭᠠᠷᠤᠭᠠᠷᠠᠢ !
ᠠᠯᠤᠰ ᠣᠶ᠋ᠢᠷᠠ ᠶ᠋ᠢᠨ ᠭᠡᠶ᠋ᠢᠴᠢᠨ ᠳ᠋ᠦ᠍ ᠪᠡᠨ
ᠠᠶᠠᠬ᠋ᠠ ᠴᠠᠢ ᠪᠠᠨ ᠲᠦᠷᠭᠡᠯᠡᠵᠦ ᠶᠠᠪᠤ ᠂
ᠠᠶ᠋ᠢᠮᠠᠭ ᠤᠰᠤᠨ ᠪ ᠣᠯᠠᠨ ᠳ᠋ᠦ᠍ ᠪᠠᠨ
ᠠᠭᠠᠰᠢ ᠵᠠᠩ ᠶ᠋ᠢᠠᠨ ᠡᠪ ᠲᠡᠢ ᠶᠠᠪᠤ !
ᠬᠣᠨᠢᠨ ᠪ ᠮᠠᠨᠠᠭᠠᠨ ᠳ᠋ᠦ᠍ ᠭᠠᠷᠬᠤ ᠳ᠋ᠦ᠍ ᠪᠠᠨ
ᠬᠣᠪᠢᠨ ᠪ ᠨᠣᠶ᠋ᠢᠷ ᠶ᠋ᠢᠠᠨ ᠬᠢᠴᠢᠶᠡᠵᠦ ᠶᠠᠪᠤ ᠂
ᠬᠣᠭᠣᠯᠠ ᠴᠠᠢ ᠪᠠᠨ ᠳᠡᠭᠡᠵᠢᠯᠡᠬᠦ ᠦᠭᠡᠢ
ᠬᠣᠵᠢᠳ ᠰᠡᠭᠦᠯ ᠳ᠋ᠦ᠍ ᠨᠢ ᠬᠦᠷᠲᠡᠵᠦ ᠶᠠᠪᠤ !
ᠭᠠᠲᠠᠨᠠ ᠪᠡᠯᠴᠢᠭᠰᠡᠨ ᠮᠠᠯ ᠦ᠋ᠨ ᠶ᠋ᠢᠠᠨ
ᠭᠠᠷᠤᠭᠰᠠᠨ ᠵᠦᠭ ᠊ᠢ ᠠᠵᠢᠬᠯᠠᠵᠤ ᠶᠠᠪᠤ ᠂
ᠭᠠᠩᠲᠠᠮᠠᠯ ᠡᠪᠡᠰᠦ ᠲᠡᠢ ᠴᠠᠭ ᠲᠤ ᠨᠢ
ᠭᠠᠯ ᠲᠠᠢ ᠦᠨᠡᠰᠦ ᠶ᠋ᠢ ᠰᠡᠷᠡᠮᠵᠢᠯᠡᠵᠦ ᠶᠠᠪᠤ !
ᠣᠷᠣᠢ ᠦᠲᠡᠰᠢ ᠲᠥᠭᠡᠷᠢᠮᠡᠷ ᠪᠣᠯ
ᠣᠲᠣᠨ ᠪ ᠴᠢᠭ᠌ ᠊ᠢ ᠠᠰᠯᠠᠵᠤ ᠶᠠᠪᠤ ᠂
ᠣᠷᠴᠢᠯᠠᠩ ᠦ᠋ᠨ ᠰᠠᠯᠬᠢᠨ ᠬᠥᠲᠡᠯᠦᠮᠡᠷ ᠪᠣᠯ
ᠣᠭᠣᠰᠣᠷ ᠪᠦᠴᠡ ᠪᠡᠨ ᠴᠢᠩᠭᠠᠯᠠᠵᠤ ᠶᠠᠪᠤ !
ᠠᠶᠤᠩᠭᠠᠲᠤ ᠪᠣᠷᠣᠭᠠᠨ ᠣᠶ᠋ᠢᠷᠠᠤᠠᠪᠠᠯ
ᠠᠷᠵᠠᠶ᠋ᠢᠬᠤ ᠦᠰᠦ ᠪᠡᠨ ᠳᠠᠷᠤᠵᠤ ᠶᠠᠪᠤ ᠂
ᠠᠷᠢᠶᠠᠲᠠᠨ ᠬᠣᠣᠷᠲᠠᠨ ᠲᠣᠬᠢᠶᠠᠯᠲᠤᠪᠠᠯ
ᠠᠶᠤᠵᠤ ᠰᠣᠴᠢᠬᠤ ᠦᠭᠡᠢ ᠯᠠᠪᠲᠠᠭᠤᠨ ᠶᠠᠪᠤ !
ᠡᠰᠬᠡᠵᠦ ᠣᠶᠣᠬᠤ ᠪᠠᠨ ᠴᠢᠲᠠᠬᠤ ᠦᠭᠡᠢ ᠪᠣᠯ
ᠡᠵᠢ ᠳ᠋ᠦ᠍ ᠪᠡᠨ ᠬᠡᠯᠡᠭᠡᠳ ᠵᠢᠭᠠᠯᠭᠠᠵᠤ ᠶᠠᠪᠤ ᠂
ᠡᠲᠯᠡᠵᠦ ᠵᠠᠷᠤᠬᠤ ᠪᠠᠨ ᠮᠡᠲᠡᠬᠦ ᠦᠭᠡᠢ ᠪᠣᠯ
ᠡᠴᠢᠭᠡ ᠳ᠋ᠦ᠍ ᠪᠡᠨ ᠠᠶ᠋ᠢᠯᠠᠤᠠᠬᠠᠭᠠᠳ ᠰᠤᠷᠴᠤ ᠠᠪ !
ᠭᠡᠷ ᠲᠤ ᠪᠡᠨ ᠭᠠᠭᠴᠠᠭᠠᠷ ᠰᠠᠭᠤᠬᠤ ᠳ᠋ᠦ᠍ ᠪᠠᠨ
ᠭᠡᠮ ᠲᠡᠢ ᠡᠰᠡᠬᠦ ᠪᠡᠨ ᠲᠤᠩᠭᠠᠵᠤ ᠪᠣᠲᠣ ᠂
ᠬᠡᠷᠰᠡᠦ ᠲᠣᠮᠣᠬ᠋ᠠ ᠲᠠᠢ ᠠᠬᠠᠮᠠᠳ ᠦ᠋ᠨ ᠶ᠋ᠢᠠᠨ
ᠬᠢᠴᠢᠶᠡᠯ ᠰᠤᠷᠭᠠᠯ ᠊ᠢ ᠬᠦᠯᠢᠶᠡᠵᠦ ᠠᠪ !
ᠣᠯᠠᠨ ᠪ ᠴᠤᠭᠯᠠᠭᠠᠨᠲᠤ ᠭᠠᠵᠠᠷ ᠲᠤ ᠨᠢ
ᠣᠷᠭᠢᠶᠠ ᠪᠢᠲᠡᠭᠡᠢ ᠶᠠᠷᠢᠭᠠᠴᠢ ᠂
ᠣᠯᠢᠬ ᠦᠭᠡᠢ ᠠᠭᠠᠰᠢᠲᠠᠨ ᠊ᠢ ᠳᠠᠭᠠᠯᠳᠤᠵᠤ
ᠣᠨᠴᠠᠭᠠᠶ᠋ᠢᠷᠠᠵᠤ ᠪᠢᠲᠡᠭᠡᠢ ᠵᠠᠩᠨᠠᠭᠠᠴᠢ ᠳ᠋ᠠ !
ᠲᠥᠷᠬᠥᠮ ᠦ᠋ᠨ ᠭᠡᠷ ᠦ᠋ᠨ ᠰᠠᠲᠤᠨ ᠶ᠋ᠢᠠᠨ ᠭᠡᠵᠦ
ᠲᠦᠯᠬᠢᠭᠦᠦ ᠪᠢᠲᠡᠭᠡᠢ ᠰᠠᠨᠠᠭᠠᠷᠠᠢ !
ᠲᠥᠭᠥᠷᠢᠭ ᠢᠷᠥᠭᠡᠯ ᠲᠡᠢ ᠬᠠᠲᠠᠮ ᠴᠢᠨᠢ
ᠲᠦᠰᠢᠵᠦ ᠠᠮᠢᠲᠤᠷᠠᠬᠤ ᠭᠠᠵᠠᠷ ᠰᠢᠦ ᠃
ᠬᠣᠩᠭᠣᠷ ᠵᠢᠭᠠᠬᠠᠨ ᠬᠡᠦᠬᠡᠨ ᠮᠢᠨᠢ
ᠬᠣᠶ᠋ᠢᠰᠢᠲᠠ ᠪᠠᠨ ᠰᠠᠶ᠋ᠢᠬᠠᠨ ᠰᠠᠭᠤᠭᠠᠷᠠᠢ !
ᠬᠣᠯᠪᠣᠵᠤ ᠬᠡᠯᠡᠭᠰᠡᠨ ᠵᠠᠬᠢᠶᠠ ᠶ᠋ᠢ ᠮᠢᠨᠢ
ᠬᠣᠴᠣᠷᠭᠠᠯ ᠦᠭᠡᠢ ᠰᠠᠬᠢᠭᠠᠷᠠᠢ !
(1) ᠲᠤᠰ ᠰᠢᠯᠦᠭ ᠊ᠢ 《 ᠳᠤᠮᠳᠠᠳᠤ ᠤᠯᠤᠰ ᠦ᠋ᠨ ᠮᠣᠩᠭᠣᠯ ᠦᠨᠲᠦᠰᠦᠲᠡᠨ ᠪ ᠣᠶ᠋ᠢᠷᠠ ᠣᠲᠣ ᠦᠶᠡ ᠶ᠋ᠢᠨ ᠤᠷᠠᠨ ᠵᠣᠬᠢᠶᠠᠯ ᠦ᠋ᠨ ᠳᠡᠭᠡᠵᠢ ᠪᠢᠴᠢᠭ 》( ᠥᠪᠥᠷ ᠮᠣᠩᠭᠣᠯ ᠦ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠂ 2011 ᠣᠨ) ᠠ᠋ᠴᠠ ᠰᠣᠩᠭᠣᠪᠠ ᠃
ᠠᠩᠬᠠ ᠵᠡᠷᠭᠡ ᠶ᠋ᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠤᠷᠤᠭᠴᠢᠳ ᠦ᠋ᠨ ᠳᠣᠯᠣᠳᠤᠭᠠᠷ ᠣᠨ ( ᠳᠡᠭᠡᠳᠦ ) ᠨᠡᠮᠡᠯᠲᠡ ᠤᠩᠰᠢᠭᠤ ᠡᠴᠡ ᠰᠣᠩᠭᠣᠪᠠ ᠃
ᠬᠠᠭᠤᠯᠤᠭᠰᠠᠨ ᠨᠢ ᠄ ᠮᠢᠩᠭᠠᠳ · ᠴᠢᠮᠡᠭ
ᠬᠢᠨᠠᠭᠰᠠᠨ ᠨᠢ ᠄ ᠣᠶᠣᠨᠲᠤᠨᠠᠯ