ᠢᠰᠢᠳᠠᠨᠽᠠᠨᠸᠠᠩᠵᠢᠯ ᠤ᠋ᠨ ᠢᠷᠡᠭᠡᠳᠦᠢ ᠳ᠋ᠦ᠍ ᠨᠡᠢᠲᠡᠯᠡᠬᠦ ᠰᠢᠯᠦᠭ-2-02 ишданзанваанжлийн ирээдүйд нийтлэх шүлэг-Хоёрдугаар бөлөг
230ᠢᠰᠢᠳᠠᠨᠽᠠᠨᠸᠠᠩᠵᠢᠯ ᠤ᠋ᠨ ᠢᠷᠡᠭᠡᠳᠦᠢ ᠳ᠋ᠦ᠍ ᠨᠡᠢᠲᠡᠯᠡᠬᠦ ᠰᠢᠯᠦᠭ-2-02
ᠬᠣᠶᠠᠳᠤᠭᠠᠷ ᠬᠡᠰᠡᠭ
ᠡᠷᠬᠢᠮ ᠴᠣᠭᠴᠠ ᠬᠥᠮᠦᠨ ᠭᠡᠮᠡᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠲᠥᠷᠥᠭᠡᠳ ᠂
ᠡᠷᠳᠡᠮ ᠴᠢᠳᠠᠯ ᠪᠦᠷᠢᠳᠬᠡᠬᠦ ᠬᠡᠷᠡᠭ ᠮᠠᠰᠢ ᠴᠢᠬᠤᠯᠠ ᠂
ᠡᠳᠦᠷ ᠰᠠᠷᠠ ᠶ᠋ᠢᠨ ᠬᠡᠯᠪᠡᠷᠢᠯ ᠊ᠢ ᠬᠣᠭᠣᠰᠣᠭᠣᠷ ᠥᠩᠭᠡᠷᠡᠪᠡᠯ ᠂
ᠡᠴᠦᠰ ᠬᠣᠶ᠋ᠢᠲᠤ ᠶ᠋ᠢᠨ ᠵᠢᠷᠭᠠᠯᠠᠩ ᠊ᠢ ᠶᠠᠭᠠᠬᠢᠵᠤ ᠪᠦᠷᠢᠳᠬᠡᠨᠡᠮ ᠃
ᠡᠷᠳᠡᠨᠢᠲᠦ ᠬᠠᠰ ᠨᠣᠮᠢᠨ ᠦᠵᠡᠰᠬᠦᠯᠡᠩ ᠪᠣᠯᠪᠠᠴᠤ ᠂
ᠡᠳ᠋ ᠪᠣᠯᠭᠠᠨ ᠵᠠᠰᠠᠯ ᠦᠭᠡᠢ ᠬᠡᠷᠡᠭ ᠦᠭᠡᠢ ᠴᠢᠯᠠᠭᠤᠨ ᠂
ᠡᠷᠬᠢᠮ ᠰᠠᠢᠬᠠᠨ ᠬᠥᠮᠦᠨ ᠪᠡᠶᠡ ᠵᠢᠪᠬᠤᠯᠠᠩᠲᠤ ᠪᠣᠯᠪᠠᠴᠤ ᠂
ᠡᠷᠳᠡᠮ ᠡᠰᠡ ᠰᠤᠷᠪᠠᠰᠤ ᠴᠢᠨᠠᠷ ᠦᠭᠡᠢ ᠮᠠᠬᠠᠪᠣᠳ ᠃
ᠪᠢᠴᠢᠭᠡᠴᠢ ᠪᠠ ᠲᠠᠷᠢᠶᠠᠴᠢ ᠬᠤᠳᠠᠯᠳᠤᠭᠴᠢ ᠤᠷᠠᠴᠤᠳ ᠂
ᠪᠢᠰᠢ ᠪᠠᠰᠠ ᠵᠠᠭᠤᠨ ᠵᠦᠢᠯ ᠦ᠋ᠨ ᠦᠢᠯᠡᠳᠬᠦ ᠶᠠᠪᠤᠳᠠᠯ ᠂
ᠪᠢᠯᠢᠭ ᠡᠷᠳᠡᠮ ᠠᠷᠭᠠ ᠴᠢᠳᠠᠯ ᠲᠥᠯᠥᠪ ᠥᠪᠡᠷᠡ ᠪᠣᠯᠪᠠᠴᠤ ᠂
ᠪᠡᠶᠡ ᠭᠡᠷ ᠊ᠢ ᠬᠥᠭᠵᠢᠭᠦᠯᠬᠦ ᠬᠡᠷᠡᠭ ᠪᠦᠷᠢᠨ ᠠᠳᠠᠯᠢ ᠃
ᠪᠠᠭᠠ ᠴᠠᠭ ᠤ᠋ᠨ ᠪᠠᠯᠠᠶ᠋ᠢᠷᠠᠯ ᠊ᠢ ᠪᠠᠭᠰᠢ ᠶᠡᠬᠡᠰ ᠭᠠᠷᠭᠠᠮᠤᠢ ᠂
ᠪᠠᠳᠠᠷᠠᠩᠭᠤᠢ ᠠᠯᠳᠠᠷ ᠨᠡᠷᠡ ᠶ᠋ᠢ ᠪᠤᠰᠤᠳ ᠠ᠋ᠴᠠ ᠦᠭᠭᠦᠮᠦᠢ ᠂
ᠪᠠᠭᠤᠷᠠᠬᠤ ᠶ᠋ᠢᠨ ᠳᠣᠷᠣᠶ᠋ᠢᠲᠠᠯ ᠊ᠢ ᠥᠪᠡᠷ ᠢ᠋ᠶ᠋ᠡᠨ ᠣᠯᠤᠮᠤᠢ ᠂
ᠪᠠᠶ᠋ᠢᠵᠢ ᠪᠠᠶ᠋ᠢᠵᠢ ᠪᠠᠭᠠ ᠭᠡᠪᠡᠯ ᠬᠣᠵᠢᠮᠳᠠᠬᠤ ᠪᠣᠯᠤᠮᠤᠢ ᠃
ᠠᠪᠤ ᠡᠵᠢ ᠪᠣᠯᠤᠭᠴᠢᠳ ᠢ᠋ᠶ᠋ᠠᠷ ᠲᠤᠰ ᠪᠦᠷᠢ ᠶ᠋ᠢᠨ ᠥᠪᠡᠷ ᠢ᠋ᠶ᠋ᠡᠨ ᠂
ᠠᠷᠪᠠᠨ ᠨᠠᠰᠤᠨ ᠠᠮᠢᠰᠬᠤᠯ ᠳ᠋ᠤᠷ ᠪᠢᠴᠢᠭ ᠨᠣᠮ ᠊ᠢ ᠰᠤᠷᠭᠠᠮᠤᠢ ᠂
ᠠᠯᠮᠠᠶ᠋ᠢᠲᠠᠨ ᠣᠰᠣᠯᠳᠠᠵᠤ ᠠᠷᠪᠠᠨ ᠲᠠᠪᠤᠨ ᠬᠦᠷᠬᠦᠯᠡ ᠂
ᠠᠬᠤᠯ ᠴᠢᠨᠠᠷ ᠰᠢᠯᠵᠢᠵᠦ ᠥᠪᠡᠷᠡ ᠤᠪ ᠊ᠢ ᠰᠢᠨᠤᠮᠤᠢ ᠃
ᠨᠤᠭᠤᠨ ᠥᠬᠢᠨ ᠦᠷᠡ ᠶᠦ᠍ᠭᠡᠨ ᠰᠤᠷᠭᠠᠬᠤᠢ ᠳ᠋ᠤᠷ ᠵᠣᠪᠠᠵᠤ ᠂
ᠨᠢᠭᠡᠮᠦᠰᠦᠨ ᠬᠠᠶ᠋ᠢᠷᠠᠯᠠᠭᠰᠠᠭᠠᠷ ᠵᠡᠷᠯᠢᠭ ᠠᠲᠠᠷ ᠪᠣᠯᠭᠠᠭᠠᠳ ᠂
ᠨᠢᠭᠡᠨ ᠨᠠᠰᠤᠨ ᠶᠠᠪᠤᠳᠠᠯ ᠊ᠢ ᠰᠠᠭᠠᠳ ᠬᠢᠬᠦ ᠶ᠋ᠢᠨ ᠳᠡᠭᠡᠷᠡ ᠂
ᠨᠡᠷᠡ ᠠᠰᠢᠭ ᠭᠤᠲᠤᠭᠠᠬᠤ ᠭᠡᠷᠦᠨ ᠳᠠᠶ᠋ᠢᠰᠤᠨ ᠪᠣᠯᠤᠮᠤᠢ ᠃
ᠪᠢᠷ ᠪᠡᠬᠡ ᠡᠷᠢᠶᠡᠯᠡᠨ ᠤᠳᠬᠠ ᠬᠢᠭᠡᠳ ᠤᠶᠠᠩᠭᠠ ᠂
ᠪᠢᠯᠢᠭ ᠡᠷᠳᠡᠮ ᠲᠡᠭᠦᠰᠬᠡᠬᠦ ᠶᠣᠰᠣ ᠨᠣᠮᠯᠠᠯ ᠢᠯᠡᠷᠬᠡᠢ ᠂
ᠪᠡᠶᠡ ᠭᠡᠷᠦᠨ ᠶᠠᠪᠤᠳᠠᠯ ᠪᠠ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ᠷ ᠂
ᠪᠢᠴᠢᠭ ᠨᠣᠮ ᠤ᠋ᠨ ᠠᠴᠢ ᠲᠤᠰᠠ ᠲᠦᠮᠡᠨ ᠦᠶᠡ ᠲᠣᠳᠣᠷᠬᠠᠢ ᠃
ᠴᠢᠬᠢᠨ ᠳ᠋ᠡᠭᠡᠨ ᠰᠢᠩᠭᠡᠭᠦᠯᠵᠦ ᠨᠢᠳᠦᠨ ᠳ᠋ᠡᠭᠡᠨ ᠰᠢᠷᠲᠡᠭᠡᠳ ᠂
ᠴᠡᠭᠡᠵᠢᠨ ᠳ᠋ᠦ᠍ᠷ ᠠᠭᠤᠯᠠᠵᠤ ᠰᠡᠳᠬᠢᠯ ᠳ᠋ᠡᠭᠡᠨ ᠲᠡᠮᠳᠡᠭᠯᠡᠨ ᠂
ᠴᠢᠩᠭᠠ ᠵᠣᠷᠢᠭ ᠡᠭᠦᠰᠬᠡᠵᠦ ᠪᠢᠰᠢᠯᠭᠠᠬᠤ ᠪᠣᠯᠪᠠᠰᠤ ᠂
ᠴᠢᠩ ᠦᠨᠡᠨ ᠰᠤᠷᠤᠯᠭᠠ ᠶ᠋ᠢ ᠲᠡᠭᠦᠰᠬᠡᠵᠦ ᠪᠣᠯᠤᠮᠤᠢ ᠃
ᠱᠸᠩᠽᠦ ᠬᠤᠸᠠᠩᠳᠢ ᠪᠣᠭᠳᠠ ᠬᠠᠳ ᠤ᠋ᠨ ᠵᠣᠬᠢᠶᠠᠵᠤ ᠭᠠᠷᠭᠠᠭᠰᠠᠨ ᠂
ᠰᠢᠩ ᠢᠦᠢ ᠺᠤᠸᠠᠩ ᠰᠢᠶᠦᠩ ᠬᠡᠮᠡᠭᠲᠡᠬᠦ ᠠᠷᠪᠠᠨ ᠵᠢᠷᠭᠤᠭᠠᠨ ᠪᠦᠯᠦᠭ ᠂
ᠰᠢᠨᠡ ᠴᠠᠭ ᠤ᠋ᠨ ᠪᠣᠳᠣᠷᠣᠣᠯ ᠪᠠ ᠰᠡᠳᠬᠦᠯ ᠪᠢᠴᠢᠭ ᠦ᠋ᠳ ᠊ᠢ ᠂
ᠱᠠᠯᠠᠮᠠᠭᠠᠶ᠋ᠢᠯᠠᠨ ᠠᠯᠢ ᠰᠠᠶ᠋ᠢᠲᠤᠷ ᠦᠢᠯᠡᠳᠪᠡᠰᠦ ᠵᠣᠬᠢᠮᠤᠢ ᠃
ᠲᠤᠶ᠋ᠢᠯ ᠤ᠋ᠨ ᠪᠣᠭᠳᠠ ᠺᠦᠩᠽᠢ ᠬᠢᠭᠡᠳ ᠳᠥᠷᠪᠡᠨ ᠪᠣᠭᠳᠠ ᠶ᠋ᠢᠨ ᠵᠣᠬᠢᠶᠠᠯ ᠂
ᠳᠥᠷᠪᠡᠨ ᠪᠢᠴᠢᠭ ᠲᠡᠭᠦᠨᠴᠢᠯᠡᠨ ᠲᠠᠪᠤᠨ ᠨᠣᠮ ᠦᠯᠡᠮᠵᠢ ᠂
ᠲᠦᠮᠡᠨ ᠣᠨ ᠤ᠋ ᠲᠡᠦᠬᠡ ᠨᠠᠮᠲᠠᠷ ᠤᠳᠬᠠ ᠰᠢᠯᠦᠭ ᠦ᠋ᠳ ᠪᠠ ᠂
ᠲᠥᠷᠥ ᠶᠣᠰᠣ ᠬᠠᠤᠯᠢ ᠴᠠᠭᠠᠵᠠ ᠶ᠋ᠢ ᠦᠵᠡᠪᠡᠰᠦ ᠵᠣᠬᠢᠰᠲᠠᠢ ᠃
ᠬᠡᠳᠦᠢ ᠶᠡᠬᠡ ᠪᠢᠴᠢᠭ ᠰᠤᠳᠤᠷ ᠲᠡᠭᠦᠰᠦᠭᠰᠡᠨ ᠪᠣᠯᠪᠠᠴᠤ ᠂
ᠬᠡᠷᠡᠭᠯᠡᠵᠦ ᠴᠢᠳᠠᠬᠤ ᠶ᠋ᠢ ᠡᠷᠳᠡᠮ ᠭᠡᠮᠡᠨ ᠮᠡᠳᠡᠯᠲᠡᠢ ᠂
ᠭᠡᠷᠦᠨ ᠶᠣᠰᠣ ᠲᠥᠷᠥ ᠶ᠋ᠢᠨ ᠵᠠᠷᠴᠢᠮ ᠊ᠢ ᠨᠡᠪᠲᠡᠷᠡᠭᠰᠡᠨ ᠪᠣᠯᠪᠠᠴᠤ ᠂
ᠬᠢᠴᠢᠶᠡᠩᠭᠦᠢ ᠰᠢᠳᠤᠷᠭᠤ ᠶ᠋ᠢ ᠭᠣᠣᠯᠴᠢ ᠪᠣᠯᠭᠠᠨ ᠶᠠᠪᠤᠯᠲᠠᠢ ᠃
ᠭᠤᠷᠪᠠᠨ ᠮᠢᠩᠭᠠ ᠵᠢᠷᠭᠤᠭᠠᠨ ᠵᠠᠭᠤᠨ ᠱᠠᠪᠢᠨᠠᠷ ᠤ᠋ᠨ ᠳᠣᠲᠣᠷᠠ ᠂
ᠭᠣᠣᠯᠴᠢ ᠪᠠᠲᠤ ᠪᠣᠭᠳᠠ ᠮᠡᠷᠡᠭᠡᠳ ᠳᠠᠯᠠᠨ ᠬᠣᠶᠠᠷ ᠡᠷᠳᠡᠮᠲᠡᠨ ᠂
ᠬᠤᠷᠴᠠ ᠣᠨᠣᠯ ᠦᠨᠡᠨ ᠰᠤᠷᠲᠠᠯ ᠭᠠᠲᠠᠭᠤᠤᠠᠬᠠᠨ ᠭᠠᠷᠭᠠᠵᠤ ᠂
ᠬᠣᠶ᠋ᠢᠴᠢ ᠦᠶᠡ ᠶ᠋ᠢᠨ ᠰᠤᠷᠤᠭᠴᠢᠳ ᠲᠤᠷ ᠤᠳᠤᠷᠢᠳᠤᠯ ᠪᠣᠯᠵᠤᠬᠤᠢ ᠃
ᠬᠥᠭᠡᠷᠦᠬᠦᠶ᠋ᠢᠯᠡᠨ ᠴᠢᠳᠠᠪᠠᠰᠤ ᠥᠷᠥᠰᠢᠶᠡᠯ ᠪᠢᠰᠢ ᠦᠦ ᠂
ᠬᠦᠨᠳᠦᠯᠡᠵᠦ ᠴᠢᠳᠠᠪᠠᠰᠤ ᠵᠢᠷᠤᠮ ᠪᠤᠰᠤ ᠶᠠᠭᠤᠨ ᠪᠣᠢ ᠂
ᠬᠦᠩᠭᠡᠮᠰᠦᠩᠯᠡᠨ ᠴᠢᠳᠠᠪᠠᠰᠤ ᠶᠣᠰᠣᠯᠠᠯᠲᠠᠢ ᠪᠤᠰᠤ ᠤᠤ ᠂
ᠬᠦᠯᠢᠴᠡᠵᠦ ᠴᠢᠳᠠᠪᠠᠰᠤ ᠮᠡᠷᠭᠡᠨ ᠪᠤᠰᠤ ᠶᠠᠭᠤᠨ ᠪᠣᠢ ᠃
ᠪᠠᠭᠰᠢ ᠯᠤᠭᠠ ᠰᠢᠳᠠᠷᠯᠠᠵᠤ ᠨᠥᠬᠥᠷ ᠯᠤᠭᠡ ᠨᠠᠶ᠋ᠢᠷᠠᠮᠲᠠᠨ ᠂
ᠪᠠᠯᠠᠢ ᠭᠡᠮᠡᠨ ᠠᠰᠠᠭᠤᠵᠤ ᠰᠡᠴᠡᠨ ᠭᠡᠮᠡᠨ ᠰᠣᠷᠣᠯᠲᠠᠢ ᠂
ᠪᠠᠭᠤᠷᠠᠢ ᠶ᠋ᠢ ᠲᠤᠰᠠᠯᠠᠵᠤ ᠬᠦᠴᠦᠷᠬᠡᠭ ᠊ᠢ ᠠᠷᠭᠠᠳᠠᠨ ᠂
ᠪᠠᠶᠠᠯᠢᠭ ᠴᠤ᠌ ᠶᠣᠰᠣᠯᠠᠯᠲᠠᠢ ᠦᠭᠡᠶ᠋ᠢᠭᠦᠦ ᠴᠦ᠍ ᠴᠡᠩᠭᠡᠯᠲᠡᠢ ᠃
ᠪᠢ ᠭᠡᠮᠡᠨ ᠭᠠᠶ᠋ᠢᠬᠠᠭᠤᠯᠬᠤ ᠪᠠᠷᠳᠠᠮ ᠵᠠᠩ ᠊ᠢ ᠬᠡᠭᠡᠯᠲᠡᠢ ᠂
ᠪᠢᠰᠢᠷᠡᠯᠲᠡᠢ ᠵᠥᠪᠰᠢᠶᠡᠮᠡᠷ ᠪᠣᠯᠭᠣᠮᠵᠢᠲᠠᠢ ᠪᠣᠯᠤᠭᠲᠤᠨ ᠂
ᠪᠢᠯᠢᠭ ᠡᠷᠳᠡᠮ ᠪᠠᠶᠠᠨ ᠨᠣᠶᠠᠨ ᠬᠡᠳᠦᠢ ᠡᠷᠬᠢᠮ ᠪᠣᠯᠪᠠᠴᠤ ᠂
ᠪᠡᠶᠡ ᠳᠣᠣᠷᠠ ᠰᠡᠳᠬᠢᠯ ᠬᠥᠩᠭᠡᠨ ᠶᠠᠪᠤᠪᠠᠰᠤ ᠵᠣᠬᠢᠮᠤᠢ ᠃
ᠭᠠᠶ᠋ᠢᠬᠠᠮᠰᠢᠬᠲᠤ ᠲᠤᠰᠠᠯᠠᠩ ᠊ᠢ ᠬᠦᠷᠲᠡᠭᠡᠭᠰᠡᠨ ᠪᠣᠯᠪᠠᠴᠤ ᠂
ᠬᠠᠷᠢᠭᠤᠯᠤᠨ ᠠᠴᠢᠯᠠᠬᠤ ᠶ᠋ᠢ ᠡᠷᠢᠵᠦ ᠶᠠᠭᠠᠬᠢᠨᠠᠮ ᠂
ᠭᠠᠪᠢᠶᠠ ᠲᠠᠢ ᠬᠦᠴᠦᠨ ᠵᠢᠳᠬᠦᠯ ᠪᠠᠶ᠋ᠢᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠂
ᠭᠠᠶ᠋ᠢᠬᠠᠭᠤᠯᠤᠨ ᠡᠵᠡᠷᠬᠡᠵᠦ ᠡᠷᠡᠮᠰᠢᠵᠦ ᠶᠠᠭᠠᠬᠢᠨᠠᠮ ᠃
ᠬᠡᠷᠡᠭᠯᠡᠭᠳᠡ ᠪᠡᠷ ᠥᠷᠨᠢᠪᠡᠰᠦ ᠰᠢᠳᠤᠷᠭᠤ ᠪᠠᠷ ᠵᠢᠳᠬᠦᠵᠦ ᠂
ᠬᠢᠴᠢᠶᠡᠩᠭᠦᠢ ᠪᠣᠯᠭᠣᠮᠵᠢᠲᠠᠢ ᠪᠠᠷ ᠲᠤᠰᠠ ᠪᠤᠶᠠᠨ ᠲᠦᠭᠡᠭᠡᠯᠲᠡᠢ ᠂
ᠬᠡᠷᠡᠭ ᠦᠭᠡᠢ ᠡᠩ ᠦ᠋ᠨ ᠴᠠᠭ ᠲᠤᠷ ᠭᠡᠮ ᠦ᠋ᠳ ᠢ᠋ᠶ᠋ᠡᠨ ᠭᠡᠮᠰᠢᠵᠦ ᠂
ᠬᠡᠵᠢᠶᠡᠳᠡ ᠰᠢᠯᠤᠭᠤᠬᠠᠨ ᠬᠡᠪ ᠢ᠋ᠶ᠋ᠡᠨ ᠰᠠᠬᠢᠯᠲᠠᠢ ᠃
ᠤᠬᠠᠭᠠᠨ ᠤ᠋ ᠮᠡᠷᠭᠡᠨ ᠣᠨᠣᠯ ᠬᠡᠳᠦᠢ ᠬᠤᠷᠴᠠ ᠪᠣᠯᠪᠠᠴᠤ ᠂
ᠤᠰᠬᠠᠯ ᠢ᠋ᠶ᠋ᠠᠷ ᠨᠥᠬᠥᠷ ᠨᠠᠶ᠋ᠢᠵᠠ ᠲᠠᠲᠠᠪᠠᠰᠤ ᠵᠣᠬᠢᠮᠤᠢ ᠂
ᠣᠯᠠᠨ ᠨᠡᠶ᠋ᠢᠲᠡ ᠶ᠋ᠢᠨ ᠲᠤᠰᠠᠯᠠᠩ ᠊ᠢ ᠡᠷᠢᠬᠦ ᠪᠣᠯᠪᠠᠰᠤ ᠂
ᠣᠨᠴᠠ ᠪᠡᠶᠡ ᠶ᠋ᠢᠨ ᠬᠡᠷᠡᠭ ᠦᠢᠯᠡᠰ ᠠᠶᠠᠨᠳᠠᠭᠠᠨ ᠪᠦᠲᠦᠮᠦᠢ ᠃
ᠡᠷᠡᠰ ᠪᠠᠲᠤ ᠢᠲᠡᠭᠡᠮᠵᠢᠲᠡᠢ ᠠᠬᠤᠭᠤᠯᠬᠤ ᠪᠣᠯᠪᠠᠰᠤ ᠂
ᠡᠷᠬᠢᠮ ᠨᠤᠲᠠ ᠵᠢᠷᠤᠮᠲᠠᠨ ᠢ᠋ᠶ᠋ᠠᠷ ᠨᠥᠬᠥᠷᠯᠡᠷᠡ ᠢᠷᠡᠮᠦᠢ ᠂
ᠡᠭᠡᠨᠡᠭᠲᠡ ᠬᠠᠭᠤᠮᠠᠭᠠᠢ ᠪᠠᠷ ᠮᠡᠬᠡᠯᠡᠬᠦ ᠪᠣᠯᠪᠠᠰᠤ ᠂
ᠡᠨᠡᠷᠢᠵᠦ ᠲᠤᠰᠠᠯᠠᠬᠤ ᠬᠠᠨᠢ ᠨᠥᠬᠥᠷ ᠬᠠᠮᠢᠭᠠ ᠃
ᠠᠳᠠᠭ ᠴᠠᠭ ᠤ᠋ᠨ ᠠᠮᠢᠲᠠᠨ ᠊ᠢ ᠠᠵᠢᠭᠯᠠᠵᠤ ᠦᠵᠡᠪᠡᠯ ᠂
ᠠᠬᠤᠢ ᠪᠦᠬᠦᠢ ᠠᠬᠠ ᠳᠡᠭᠦᠦ ᠨᠠᠶ᠋ᠢᠷᠠᠮᠲᠠᠯ ᠦᠭᠡᠢ ᠠᠲᠠᠯᠠ ᠂
ᠠᠷᠢᠬᠢ ᠮᠢᠬᠠᠨ ᠤ᠋ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠪᠤᠰᠤᠳ ᠯᠤᠭᠠ ᠠᠨᠳᠠᠯᠠᠨ ᠂
ᠠᠰᠤᠷᠤ ᠬᠤᠷᠴᠠ ᠬᠠᠲᠠᠭᠤᠵᠢᠯ ᠤ᠋ᠨ ᠲᠠᠩᠭᠠᠷᠢᠭ ᠊ᠢ ᠡᠪᠳᠡᠮᠦᠢ ᠃
ᠠᠩᠬᠠ ᠴᠠᠭ ᠲᠤᠷ ᠠᠬᠠ ᠳᠡᠭᠦᠦ ᠪᠠᠷᠢᠯᠳᠤᠬᠤ ᠤᠳᠠᠭᠠ ᠂
ᠠᠨᠲᠠᠭᠠᠶ᠋ᠢᠯᠠᠨ ᠬᠠᠨᠢᠯᠠᠬᠤ ᠲᠤᠬᠠᠢ ᠤᠴᠢᠷ ᠶᠠᠭᠤᠨ ᠪᠣᠢ ᠂
ᠠᠰᠠᠷᠠᠯᠴᠠᠨ ᠲᠤᠰᠠᠯᠠᠬᠤ ᠰᠡᠳᠬᠢᠯ ᠦᠭᠡᠢ ᠪᠣᠯᠵᠤ ᠭᠡᠮᠡᠨ ᠂
ᠠᠭᠤᠤ ᠨᠢᠭᠲᠠ ᠲᠠᠩᠭᠠᠷᠢᠭ ᠊ᠢ ᠬᠠᠮᠢᠭᠠ ᠳ᠋ᠤᠷ ᠬᠡᠭᠡᠮᠦᠢ ᠃
ᠦᠵᠡᠮᠡᠭᠴᠡ ᠰᠣᠨᠢᠷᠬᠠᠵᠤ ᠡᠶᠡᠪᠡᠷᠭᠦᠦ ᠶ᠋ᠢ ᠨᠢ ᠦᠵᠡᠪᠡᠯ ᠂
ᠥᠪᠡᠷ ᠦ᠋ᠨ ᠪᠡᠶᠡ ᠢᠯᠠᠩᠭᠤᠶᠠ ᠡᠷᠬᠢᠮᠯᠡᠬᠦ ᠮᠡᠲᠦ ᠰᠢᠭ ᠂
ᠤᠳᠠᠯ ᠦᠭᠡᠢ ᠵᠢᠭᠰᠢᠮᠵᠢᠯᠡᠨ ᠬᠠᠷᠰᠢᠯᠳᠤᠬᠤ ᠶ᠋ᠢ ᠨᠢ ᠪᠣᠳᠣᠪᠠᠯ
ᠥᠰᠢᠶᠡᠲᠡᠨ ᠳᠠᠶ᠋ᠢᠰᠤᠨ ᠠ᠋ᠴᠠ ᠳᠣᠣᠷᠠᠳᠠᠬᠤ ᠶᠠᠭᠤᠨ ᠪᠣᠢ ᠃
ᠠᠭᠤᠤ ᠰᠠᠢᠬᠠᠨ ᠠᠭᠠᠯᠢ ᠪᠠᠷ ᠡᠪᠰᠡᠯᠳᠦᠬᠦ ᠶ᠋ᠢᠨ ᠪᠠᠶ᠋ᠢᠲᠠᠯ ᠊ᠢ ᠂
ᠠᠮᠠᠷᠬᠠᠯᠠᠨ ᠨᠠᠶ᠋ᠢᠷᠠᠮᠲᠠᠵᠤ ᠬᠠᠩᠬᠤ ᠦᠭᠡᠢ ᠭᠠᠶ᠋ᠢᠬᠠᠮᠰᠢᠬ ᠂
ᠠᠪᠤᠷᠢ ᠮᠠᠭᠤ ᠠᠭᠠᠰᠢ ᠪᠠᠷ ᠡᠪᠳᠡᠷᠡᠬᠦ ᠶ᠋ᠢᠨ ᠲᠥᠯᠥᠪ ᠊ᠢ ᠂
ᠠᠮᠢᠳᠤ ᠪᠠᠷ ᠵᠠᠯᠭᠢᠪᠠᠴᠤ ᠴᠠᠳᠬᠤ ᠦᠭᠡᠢ ᠭᠤᠲᠤᠮᠰᠢᠭ ᠃
ᠪᠠᠶᠠᠨ ᠡᠷᠬᠢᠮ ᠨᠡᠷᠡ ᠠᠰᠢᠭ ᠮᠠᠨᠳᠤᠵᠤ ᠪᠠᠶ᠋ᠢᠬᠤ ᠶ᠋ᠢᠨ ᠦᠶᠡᠰ ᠲᠦ᠍ ᠂
ᠪᠠᠭᠠᠰᠤᠨ ᠳ᠋ᠤᠷ ᠪᠠᠯᠪᠠᠪᠠᠴᠤ ᠰᠠᠶ᠋ᠢᠮᠰᠤᠷᠠᠬᠤ ᠶ᠋ᠢᠨ ᠠᠶᠠᠰᠲᠠᠢ ᠂
ᠪᠠᠭᠤᠷᠠᠵᠤ ᠦᠭᠡᠶ᠋ᠢᠭᠦᠷᠡᠨ ᠳᠣᠷᠣᠶ᠋ᠢᠲᠠᠬᠤ ᠶ᠋ᠢᠨ ᠬᠢᠷᠢ ᠳ᠋ᠦ᠍ᠷ ᠂
ᠪᠠᠯ ᠰᠢᠬᠢᠷ ᠰᠦᠷᠴᠢᠪᠡᠴᠦ ᠮᠠᠭᠤᠬᠠᠶ᠋ᠢᠯᠠᠬᠤ ᠮᠠᠶᠢᠬᠲᠠᠢ ᠃
ᠵᠢᠷᠭᠠᠯ ᠬᠢᠭᠡᠳ ᠵᠣᠪᠠᠯᠠᠩ ᠊ᠢ ᠨᠡᠶ᠋ᠢᠯᠡᠭᠦᠯᠦᠨ ᠰᠠᠨᠠᠵᠤ ᠂
ᠵᠢᠯ ᠪᠦᠷᠢ ᠰᠠᠷᠠ ᠲᠤᠲᠤᠮ ᠨᠢᠭᠡᠨ ᠵᠠᠩ ᠊ᠢ ᠪᠠᠷᠢᠵᠤ ᠂
ᠵᠢᠮᠡ ᠬᠣᠭᠣᠰᠣᠨ ᠬᠡᠯᠪᠡᠷᠢᠯ ᠢ᠋ᠶ᠋ᠡᠷ ᠥᠩᠭᠡ ᠨᠢᠭᠤᠷ ᠬᠥᠭᠡᠭᠡᠭᠴᠢ ᠂
ᠵᠡᠷᠭᠡᠯᠭᠡᠨ ᠪᠠ ᠵᠡᠭᠦᠳᠦᠨ ᠳ᠋ᠦ᠍ᠷ ᠠᠳᠠᠯᠢᠬᠠᠨ ᠬᠡᠮᠡᠮᠦᠢ ᠃
ᠥᠩᠭᠡ ᠦᠵᠡᠯ ᠵᠠᠰᠠᠪᠤᠷᠢ ᠶ᠋ᠢᠨ ᠬᠤᠳᠠᠯ ᠴᠢᠨᠠᠷ ᠪᠠᠷᠢᠵᠤ ᠂
ᠦᠭᠡᠶ᠋ᠢᠭᠦᠷᠡᠨ ᠭᠠᠴᠢᠭᠳᠠᠬᠤ ᠳᠣᠷᠣᠶ᠋ᠢᠲᠠᠯ ᠊ᠢ ᠰᠡᠷᠭᠡᠶ᠋ᠢᠯᠡ ᠂
ᠥᠪᠡᠷᠡ ᠤᠪ ᠤ᠋ᠨ ᠬᠥᠪᠰᠥᠷ ᠪᠠᠷᠳᠠᠮ ᠬᠣᠬᠢᠷᠠᠯ ᠊ᠢ ᠵᠢᠭᠰᠢᠵᠦ ᠂
ᠦᠨᠳᠦᠰᠦᠨ ᠦ᠌ ᠬᠥᠷᠥᠩᠭᠡ ᠳ᠋ᠦ᠍ᠷ ᠴᠡᠩᠭᠡᠯᠳᠦᠬᠦ ᠬᠡᠷᠡᠭᠲᠡᠢ ᠃
ᠴᠢᠩᠭᠠ ᠵᠣᠷᠢᠭ ᠡᠭᠦᠰᠬᠡᠵᠦ ᠬᠦᠴᠦᠯᠡᠬᠦ ᠶ᠋ᠢᠨ ᠣᠨᠣᠯ ᠳ᠋ᠤᠷ ᠂
ᠴᠢᠳᠠᠯ ᠥᠪᠯᠡᠯ ᠨᠡᠮᠡᠭᠲᠡᠵᠦ ᠪᠠᠶᠠᠯᠢᠭ ᠲᠤᠷ ᠣᠴᠢᠮᠤᠢ ᠂
ᠴᠢᠨᠠᠷ ᠦᠭᠡᠢ ᠥᠷᠢ ᠭᠡᠵᠦ ᠵᠢᠭᠡᠯᠡᠬᠦ ᠠᠯᠳᠠᠯ ᠢ᠋ᠶ᠋ᠠᠷ ᠂
ᠴᠢᠷᠦᠭᠲᠡᠬᠦ ᠵᠣᠪᠠᠯᠠᠩ ᠊ᠢ ᠭᠡᠷᠦᠨ ᠬᠠᠮᠲᠤ ᠠᠮᠰᠠᠮᠤᠢ ᠃
ᠠᠪᠤ ᠡᠵᠢ ᠶ᠋ᠢᠨ ᠬᠡᠰᠢᠭ ᠬᠠᠶ᠋ᠢᠷᠠ ᠦᠨᠡᠨ ᠴᠠᠭᠠᠨ ᠥᠪ ᠮᠠᠯ ᠂
ᠠᠷᠪᠢᠳᠬᠠᠬᠤ ᠴᠢᠳᠠᠯ ᠦᠭᠡᠢ ᠪᠦᠷᠢᠯᠭᠡᠬᠦ ᠵᠠᠷᠢᠮ ᠦ᠋ᠳ ᠂
ᠠᠴᠢᠯᠠᠬᠤ ᠲᠡᠵᠢᠭᠡᠬᠦ ᠠᠷᠭᠠ ᠬᠦᠴᠦᠨ ᠮᠣᠬᠣᠪᠠᠯ ᠂
ᠠᠯᠮᠠᠶ᠋ᠢᠲᠠᠵᠤ ᠠᠯᠳᠠᠷ ᠨᠡᠷᠡ ᠵᠢᠷᠤᠮ ᠢ᠋ᠶ᠋ᠠᠨ ᠠᠯᠳᠠᠮᠤᠢ ᠃
ᠪᠠᠴᠢᠮᠳᠠᠬᠤ ᠶ᠋ᠢᠨ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠬᠤᠳᠠᠯᠴᠢ ᠪᠠ ᠬᠤᠶᠠᠯᠢᠴᠢ ᠂
ᠪᠠᠰᠠ ᠪᠠᠬᠠᠨ ᠰᠢᠯᠲᠠᠪᠠᠯᠠ ᠬᠤᠯᠠᠭᠠᠢ ᠪᠠ ᠳᠡᠭᠡᠷᠡᠮ ᠂
ᠪᠠᠰᠤᠭᠳᠠᠬᠤ ᠶ᠋ᠢᠨ ᠬᠠᠶ᠋ᠢᠷᠠ ᠪᠠᠷ ᠪᠠᠭᠠᠲᠤᠷ ᠰᠢᠬ ᠶᠠᠪᠤᠵᠤ ᠂
ᠪᠠᠲᠤ ᠲᠥᠷᠥ ᠶ᠋ᠢᠨ ᠴᠠᠭᠠᠵᠠ ᠳ᠋ᠤᠷ ᠭᠢᠰᠭᠢᠭᠲᠡᠬᠦ ᠪᠣᠯᠤᠮᠤᠢ ᠃
ᠡᠷᠲᠡ ᠴᠠᠭ ᠤ᠋ᠨ ᠱᠦᠨ ᠬᠠᠭᠠᠨ ᠲᠠᠷᠢᠶᠠᠨ ᠊ᠢ ᠲᠠᠷᠢᠵᠤ ᠂
ᠡᠷᠬᠡᠰᠢᠶᠡᠯᠳᠦ ᠬᠤᠸᠠᠩ ᠲᠠᠶ᠋ᠢᠬᠡᠦ ᠪᠣᠯ ᠢᠯᠠᠮᠠ ᠲᠡᠭᠦᠵᠦ ᠂
ᠡᠪᠦᠭᠡᠳ ᠊ᠢ ᠳᠠᠭᠤᠷᠢᠶᠠᠨ ᠡᠷᠲᠡ ᠶ᠋ᠢᠨ ᠡᠰᠢ ᠲᠠᠲᠠᠵᠤ ᠂
ᠢᠳᠡᠬᠦ ᠪᠠ ᠡᠮᠦᠰᠬᠦᠢ ᠳ᠋ᠦ᠍ᠷ ᠬᠦᠴᠦᠯᠡᠪᠡᠯ ᠵᠣᠬᠢᠮᠤᠢ ᠃
ᠡᠷᠡᠰ ᠢᠨᠦ ᠲᠠᠷᠢᠶᠠᠨ ᠳ᠋ᠤᠷ ᠬᠦᠴᠦᠯᠡᠬᠦ ᠪᠣᠯᠪᠠᠰᠤ ᠂
ᠢᠳᠡᠭᠡᠨ ᠢ᠋ᠶ᠋ᠡᠷ ᠡᠯᠪᠡᠭ ᠪᠣᠯᠤᠨ ᠡᠳ᠋ ᠦ᠋ᠨ ᠶᠡᠬᠡ ᠪᠠᠶᠠᠯᠢᠭ ᠪᠣᠢ ᠂
ᠡᠮᠡᠰ ᠢᠨᠦ ᠡᠮᠦᠰᠬᠦᠢ ᠳ᠋ᠦ᠍ᠷ ᠤᠷᠠᠯᠠᠬᠤ ᠪᠣᠯᠪᠠᠰᠤ ᠂
ᠡᠪᠦᠯ ᠵᠤᠨ ᠤ᠋ ᠳᠡᠪᠡᠯ ᠬᠤᠪᠴᠠᠰᠤ ᠴᠠᠭ ᠢ᠋ᠶ᠋ᠠᠷ ᠪᠡᠯᠡᠬᠡᠨ ᠃
ᠬᠤᠷᠢᠶᠠᠭᠰᠠᠨ ᠡᠯᠪᠡᠭ ᠵᠢᠯ ᠳ᠋ᠦ᠍ᠷ ᠬᠠᠳᠠᠭᠠᠯᠠᠨ ᠭᠠᠮᠨᠠᠵᠤ ᠂
ᠬᠣᠪᠣᠷ ᠴᠠᠭ ᠤ᠋ᠨ ᠦᠶᠡᠷ ᠭᠠᠩ ᠊ᠢ ᠰᠡᠷᠭᠡᠶ᠋ᠢᠯᠡᠬᠦ ᠬᠡᠷᠡᠭᠲᠡᠢ ᠂
ᠬᠣᠨᠵᠢᠯ ᠣᠯᠵᠠ ᠶᠡᠬᠡ ᠴᠠᠭ ᠲᠤᠷ ᠬᠤᠷᠢᠶᠠᠵᠤ ᠠᠷᠪᠢᠳᠬᠠᠨ ᠂
ᠬᠣᠵᠢᠮ ᠲᠤᠶ᠋ᠢᠯ ᠤ᠋ᠨ ᠮᠤᠬᠤᠷᠳᠠᠯ ᠳ᠋ᠤᠷ ᠤᠷᠢᠳ ᠠ᠋ᠴᠠ ᠪᠡᠯᠡᠳᠭᠡ ᠃
ᠳᠥᠷᠪᠡᠨ ᠳᠠᠯᠠᠢ ᠲᠠᠪᠤᠨ ᠮᠥᠷᠡᠨ ᠳᠥᠷᠪᠡᠯ ᠦᠭᠡᠢ ᠰᠠᠨᠰᠠᠷ ᠲᠤ᠌ ᠂
ᠲᠥᠷᠥ ᠱᠠᠵᠢᠨ ᠬᠣᠣᠰᠯᠠᠨ ᠠᠵᠤ ᠤᠯᠤᠰ ᠭᠡᠮᠡᠨ ᠨᠡᠷᠡᠶ᠋ᠢᠤᠠᠪᠡ ᠂
ᠲᠦᠮᠡᠨ ᠣᠨ ᠤ᠋ ᠴᠠᠭ ᠤ᠋ᠨ ᠪᠠᠶ᠋ᠢᠲᠠᠯ ᠵᠦᠢᠯ ᠢ᠋ᠶ᠋ᠡᠷ ᠬᠤᠪᠢᠰᠤᠮᠤᠢ ᠂
ᠲᠦᠪᠰᠢᠨ ᠵᠢᠷᠤᠮ ᠰᠠᠮᠠᠭᠤᠷᠠᠵᠤ ᠤᠯᠠᠷᠢᠬᠤ ᠶᠣᠰᠣ ᠊ᠶ ᠠ᠋ ᠃
ᠠᠷᠪᠠᠨ ᠵᠦᠭ ᠦ᠋ᠨ ᠶᠡᠬᠡ ᠣᠷᠣᠨ ᠲᠠᠪᠤᠨ ᠵᠧᠦ ᠶ᠋ᠢᠨ ᠳᠣᠲᠣᠷᠠ ᠂
ᠠᠷᠠᠳ ᠤ᠋ᠨ ᠡᠷᠬᠡ ᠪᠠᠶ᠋ᠢᠭᠤᠯᠤᠭᠰᠠᠨ ᠨᠢᠭᠡᠨ ᠶᠡᠬᠡ ᠤᠯᠠᠷᠢᠯ ᠂
ᠠᠯᠳᠠᠷᠰᠢᠭᠰᠠᠨ ᠪᠤᠰᠤᠳ ᠤᠯᠤᠰ ᠠᠷᠪᠢᠨ ᠭᠡᠬᠦ ᠪᠣᠯᠪᠠᠴᠤ ᠂
ᠠᠩᠬᠠᠨᠠ ᠮᠠᠨ ᠤ᠋ ᠤᠯᠤᠰ ᠳᠥᠷᠪᠡᠨ ᠳ᠋ᠦ᠋ᠩᠰᠢᠭᠤᠷ ᠬᠡᠮᠡᠮᠦᠢ ᠃
ᠢᠷᠭᠡᠨ ᠮᠠᠨᠵᠤ ᠮᠣᠩᠭᠣᠯ ᠬᠣᠲᠣᠩ ᠲᠥᠪᠡᠳ ᠠᠶ᠋ᠢᠮᠠᠭ ᠨᠡᠶ᠋ᠢᠲᠡ ᠪᠡᠷ ᠂
ᠢᠯᠡᠷᠬᠡᠶ᠋ᠢᠶᠡ ᠡᠨᠡ ᠴᠠᠭ ᠤ᠋ᠨ ᠲᠠᠪᠤᠨ ᠶᠡᠬᠡ ᠤᠭᠰᠠᠭᠠ ᠂
ᠡᠵᠡᠨ ᠡᠷᠬᠡ ᠪᠠᠭᠤᠷᠠᠵᠤ ᠨᠠᠮ ᠤ᠋ᠨ ᠬᠤᠷᠠᠯ ᠪᠣᠯᠤᠭᠠᠳ ᠂
ᠡᠷᠳᠡᠮᠲᠡᠨ ᠊ᠢ ᠡᠷᠭᠦᠮᠵᠢᠯᠡᠨ ᠠᠷᠠᠳ ᠤ᠋ᠨ ᠲᠥᠷᠥ ᠬᠡᠮᠡᠪᠡᠢ ᠃
ᠣᠷᠣᠨ ᠭᠠᠵᠠᠷ ᠳᠡᠯᠡᠬᠡᠢ ᠪᠡᠷ ᠴᠡᠷᠢᠭ ᠰᠡᠯᠲᠡ ᠳᠥᠭᠥᠷᠦᠨ ᠂
ᠤᠯᠤᠰ ᠪᠦᠬᠦᠨ ᠤᠯᠠᠭᠠᠨ ᠴᠠᠭᠠᠨ ᠬᠣᠶᠠᠷ ᠠᠩᠭᠢ ᠪᠣᠯᠤᠭᠠᠳ ᠂
ᠣᠭᠲᠠᠷᠭᠤᠢ ᠪᠠ ᠭᠠᠵᠠᠷ ᠢ᠋ᠶ᠋ᠠᠷ ᠬᠤᠷᠴᠠ ᠮᠡᠰᠡ ᠪᠦᠷᠬᠦᠵᠦ ᠂
ᠣᠯᠠᠨ ᠲᠦᠮᠡᠨ ᠪᠦᠭᠦᠳᠡᠭᠡᠷ ᠦᠢᠮᠡᠯᠳᠦᠬᠦ ᠪᠣᠯᠬᠤ ᠪᠣᠢ ᠃
ᠣᠷᠣᠨ ᠭᠠᠵᠠᠷ ᠡᠷᠬᠢᠯᠡᠬᠦ ᠲᠤᠰᠢᠶᠠᠯᠲᠠᠨ ᠲᠦᠰᠢᠮᠡᠳ ᠂
ᠤᠯᠤᠰ ᠭᠡᠷ ᠦ᠋ᠨ ᠪᠠᠭᠠᠨᠠ ᠪᠠ ᠶᠡᠬᠡ ᠨᠢᠷᠤᠭᠤ ᠂
ᠣᠶᠤᠨ ᠬᠤᠷᠴᠠ ᠭᠣᠣᠯᠴᠢ ᠮᠡᠷᠭᠡᠨ ᠵᠢᠪᠬᠤᠯᠠᠩᠲᠤ ᠪᠣᠯᠪᠠᠴᠤ ᠂
ᠣᠯᠠᠨ ᠲᠦᠮᠡᠨ ᠠᠩᠬᠠᠷᠴᠤ ᠠᠮᠤᠭᠤᠯᠠᠩ ᠪᠣᠯᠤᠮᠤᠢ ᠃
ᠲᠦᠭᠰᠢᠭᠦᠷᠢᠲᠡᠢ ᠡᠨᠡ ᠴᠠᠭ ᠤ᠋ᠨ ᠡᠵᠡᠷᠬᠡᠭ ᠪᠠ ᠮᠡᠳᠡᠷᠬᠡᠭ ᠂
ᠲᠥᠷᠥ ᠶ᠋ᠢᠨ ᠡᠷᠬᠡ ᠪᠤᠯᠢᠶᠠᠯᠳᠤᠨ ᠲᠡᠮᠡᠴᠡᠯ ᠳ᠋ᠦ᠍ᠷ ᠬᠦᠷᠴᠦᠬᠦᠢ ᠂
ᠲᠦᠢᠪᠡᠭᠡᠯᠳᠦ ᠰᠠᠮᠠᠭᠤᠷᠠᠯ ᠦᠷᠭᠦᠯᠵᠢᠯᠡᠨ ᠲᠠᠭᠳᠠᠵᠤ ᠂
ᠲᠦᠮᠡᠨ ᠲᠦᠮᠡᠨ ᠪᠦᠭᠦᠳᠡᠭᠡᠷ ᠠᠶᠤᠯ ᠭᠠᠮᠰᠢᠭ ᠦᠵᠡᠪᠡ ᠃
ᠭᠠᠳᠠᠭᠠᠳᠤ ᠮᠣᠩᠭᠣᠯ ᠠᠶ᠋ᠢᠮᠠᠭ ᠴᠢᠭᠤᠯᠭᠠᠨ ᠪᠠ ᠬᠤᠰᠢᠭᠤᠳ ᠂
ᠬᠠᠨ ᠵᠠᠰᠠᠭ ᠬᠦᠩ ᠰᠠᠶ᠋ᠢᠳ ᠤ᠋ᠨ ᠪᠣᠱᠣᠭ ᠰᠤᠷᠲᠠᠯ ᠳᠡᠭᠡᠷᠡᠩᠭᠦᠢ ᠂
ᠬᠠᠷᠰᠢᠯᠳᠤᠬᠤ ᠴᠠᠭ ᠤ᠋ᠨ ᠪᠠᠶ᠋ᠢᠲᠠᠯ ᠬᠤᠪᠢᠰᠬᠠᠯ ᠊ᠢ ᠦᠵᠡᠵᠦ ᠂
ᠬᠠᠮᠤᠭ ᠮᠣᠩᠭᠣᠯ ᠤᠭᠰᠠᠭᠠ ᠪᠠᠨ ᠲᠡᠳᠬᠦᠮᠵᠢᠯᠡᠨ ᠬᠠᠶ᠋ᠢᠷᠠᠯᠠᠯᠲᠤᠶᠠ ᠃
ᠴᠢᠩᠭᠢᠰ ᠪᠣᠭᠳᠠ ᠶ᠋ᠢᠨ ᠦᠷᠡᠰ ᠭᠡᠮᠡᠨ ᠡᠷᠬᠡ ᠬᠦᠴᠦᠨ ᠮᠠᠨᠳᠤᠵᠤ ᠂
ᠴᠢᠳᠠᠯ ᠡᠷᠬᠡ ᠪᠤᠶᠠᠨ ᠴᠡᠩᠭᠡᠯ ᠡᠳᠦᠭᠡ ᠳ᠋ᠦ᠍ᠷ ᠬᠦᠷᠴᠦᠬᠦᠢ ᠂
ᠴᠢᠩ ᠪᠠᠲᠤ ᠦᠨᠳᠦᠰᠦᠨ ᠦ᠌ ᠰᠠᠯᠠᠭᠠ ᠪᠠ ᠰᠠᠯᠪᠤᠷᠢ ᠂
ᠴᠢᠨᠠᠷ ᠬᠦᠨᠳᠦ ᠤᠭᠰᠠᠭᠠ ᠪᠠᠨ ᠬᠦᠨᠳᠦᠳᠬᠡᠵᠦ ᠬᠠᠶ᠋ᠢᠷᠠᠯᠠ ᠃
ᠰᠦᠰᠦᠭ ᠪᠤᠶᠠᠨᠲᠤ ᠮᠠᠨ ᠤ᠋ ᠮᠣᠩᠭᠣᠯ ᠪᠡᠯᠴᠢᠭᠡᠷ ᠲᠦ᠍ ᠰᠢᠲᠦᠵᠦ ᠂
ᠰᠦᠷᠦᠭ ᠮᠠᠯ ᠤ᠋ᠨ ᠦᠷᠡᠵᠢᠯ ᠢ᠋ᠶ᠋ᠡᠷ ᠠᠮᠢᠳᠤᠷᠠᠯ ᠪᠣᠯᠤᠮᠤᠢ ᠂
ᠰᠦᠯᠳᠡ ᠲᠡᠭᠷᠢ ᠢᠪᠡᠭᠡᠵᠦ ᠬᠡᠰᠢᠭ ᠪᠤᠶᠠᠨ ᠬᠠᠶ᠋ᠢᠷᠠᠯᠠᠭᠰᠠᠨ ᠂
ᠰᠠᠭᠠᠬᠠᠯᠲᠠ ᠣᠯᠠᠨ ᠡᠶᠡᠰᠴᠦ ᠠᠶ᠋ᠢᠯ ᠠᠶ᠋ᠢᠮᠠᠭ ᠪᠣᠯᠤᠭᠰᠠᠨ ᠃
ᠮᠠᠭᠤ ᠵᠢᠰᠤᠷ ᠬᠣᠷᠣᠰᠤᠯᠳᠤ ᠬᠠᠷᠢᠳᠠᠨ ᠤ᠋ ᠡᠵᠡᠷᠬᠡᠭ ᠂
ᠮᠠᠨ ᠤ᠋ ᠮᠣᠩᠭᠣᠯ ᠪᠠᠭᠤᠷᠠᠬᠤ ᠶ᠋ᠢᠨ ᠴᠠᠭ ᠪᠣᠯᠤᠭᠠᠳ ᠂
ᠮᠠᠰᠢ ᠬᠣᠪᠳᠣᠭ ᠤᠷᠠᠨ ᠠᠷᠭᠠ ᠮᠡᠬᠡ ᠶ᠋ᠢ ᠬᠡᠷᠡᠭᠯᠡᠨ ᠂
ᠮᠠᠭᠠᠳ ᠢ᠋ᠶ᠋ᠠᠷ ᠡᠵᠡᠯᠡᠬᠦ ᠶ᠋ᠢᠨ ᠲᠣᠬᠢᠶᠠᠯ ᠳ᠋ᠤᠷ ᠭᠥᠷᠥᠴᠦᠬᠦᠢ ᠃
ᠬᠠᠷᠢ ᠶ᠋ᠢᠨ ᠬᠠᠷᠭᠢᠰ ᠣᠶ᠋ᠢᠷᠠᠲᠤᠪᠠᠯ ᠬᠣᠣᠷᠯᠠᠯ ᠳᠠᠶ᠋ᠢᠰᠤᠨ ᠪᠣᠯᠤᠮᠤᠢ ᠂
ᠭᠠᠵᠠᠷ ᠣᠷᠣᠨ ᠴᠢᠬᠤᠯᠳᠠᠪᠠᠯ ᠠᠷᠠᠳ ᠦᠯᠦ ᠲᠣᠭᠲᠠᠮᠤᠢ ᠂
ᠬᠠᠮᠤᠭ ᠲᠦᠮᠡᠨ ᠦᠢᠮᠡᠪᠡᠰᠦ ᠬᠠᠮᠲᠤ ᠵᠣᠪᠠᠯ ᠠᠮᠰᠠᠮᠤᠢ ᠂
ᠬᠠᠶ᠋ᠢᠷᠠᠨ ᠣᠯᠠᠨ ᠠᠷᠠᠳ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠨ ᠬᠠᠶ᠋ᠢᠷᠠᠯᠠᠯᠲᠤᠶᠠ ᠃
ᠠᠯᠪᠠ ᠥᠷᠢ ᠶ᠋ᠢ ᠥᠰᠬᠡᠵᠦ ᠬᠥᠷᠥᠩᠭᠡ ᠶ᠋ᠢ ᠬᠣᠷᠣᠭᠠᠨ ᠂
ᠠᠷᠠᠳ ᠊ᠢ ᠪᠤᠯᠢᠶᠠᠵᠤ ᠦᠢᠮᠡᠭᠡᠨ ᠊ᠢ ᠳᠡᠭᠳᠡᠭᠡᠨ ᠂
ᠠᠷᠭᠠ ᠪᠠᠰᠢᠷ ᠡᠭᠦᠰᠬᠡᠵᠦ ᠠᠰᠢᠭ ᠡᠳ᠋ ᠪᠤᠯᠢᠶᠠᠭᠴᠢ ᠂
ᠠᠶᠤᠮᠰᠢᠭᠲᠤ ᠵᠣᠪᠠᠯᠠᠩ ᠊ᠢ ᠨᠢᠮᠭᠡᠳᠬᠡᠵᠦ ᠬᠠᠶ᠋ᠢᠷᠠᠯᠠ ᠃
ᠬᠣᠣᠷᠯᠠᠯᠲᠠᠨ ᠊ᠢ ᠭᠡᠶ᠋ᠢᠰᠭᠡᠵᠦ ᠬᠤᠯᠠᠭᠠᠢ ᠶ᠋ᠢ ᠠᠷᠢᠯᠭᠠ ᠂
ᠬᠤᠭᠤᠴᠠᠭᠠ ᠶ᠋ᠢ ᠠᠯᠳᠠᠷᠠᠭᠠᠵᠤ ᠭᠤᠪᠴᠢᠭᠤᠷ ᠊ᠢ ᠬᠥᠩᠭᠡᠳᠬᠡ ᠂
ᠬᠣᠯᠠᠳᠠᠬᠢ ᠶ᠋ᠢ ᠬᠤᠷᠢᠶᠠᠵᠤ ᠣᠶ᠋ᠢᠷᠲᠠᠬᠢ ᠶ᠋ᠢ ᠳᠠᠪᠰᠢᠭᠤᠯ ᠂
ᠬᠠᠤᠯᠢ ᠳᠦᠷᠢᠮ ᠴᠠᠭᠠᠵᠠ ᠊ᠢ ᠠᠬᠤᠶ᠋ᠢᠯᠠᠨ ᠬᠠᠶ᠋ᠢᠷᠠᠯᠠ ᠃
ᠡᠷᠳᠡᠮ ᠢ᠋ᠶ᠋ᠡᠷ ᠤᠳᠤᠷᠢᠳᠴᠤ ᠡᠨᠲᠡᠭᠲᠡᠯ ᠊ᠢ ᠠᠯᠳᠠᠷᠠᠭᠠᠨ ᠂
ᠡᠷᠬᠡ ᠬᠦᠴᠦᠨ ᠊ᠢ ᠬᠤᠷᠴᠠᠳᠬᠠᠵᠤ ᠡᠷᠡᠭᠦᠦ ᠬᠣᠣᠷ ᠊ᠢ ᠬᠥᠩᠭᠡᠯᠡ ᠂
ᠡᠨᠡᠷᠢᠯᠲᠦ ᠵᠠᠰᠠᠭ ᠢ᠋ᠶ᠋ᠠᠷ ᠢᠷᠭᠡᠨ ᠢ᠋ᠶ᠋ᠡᠨ ᠲᠡᠳᠬᠦᠪᠡᠯ ᠂
ᠡᠴᠢᠭᠡ ᠡᠬᠡ ᠨᠣᠶᠠᠨ ᠭᠡᠮᠡᠨ ᠡᠷᠭᠦᠭᠲᠡᠬᠦ ᠪᠥᠯᠥᠭᠡ ᠃
ᠭᠠᠭᠴᠠ ᠪᠥᠭᠡᠳ ᠥᠨᠥᠴᠢᠨ ᠪᠠ ᠭᠣᠣᠨᠢ ᠪᠡᠯᠪᠡᠰᠦᠨ ᠂
ᠭᠠᠰᠠᠯᠠᠩᠲᠤ ᠶᠢᠷᠲᠡᠴᠦᠰ ᠦ᠋ᠨ ᠳᠥᠷᠪᠡᠯ ᠦᠭᠡᠢ ᠶᠠᠳᠠᠭᠤ ᠂
ᠬᠠᠶ᠋ᠢᠷᠠ ᠬᠡᠰᠢᠭ ᠦᠯᠡᠳᠡᠭᠡᠵᠦ ᠠᠰᠠᠷᠠᠯ ᠊ᠢ ᠦᠢᠯᠡᠳᠪᠡᠯ ᠂
ᠬᠠᠮᠤᠭ ᠲᠦᠮᠡᠨ ᠪᠢᠰᠢᠷᠡᠵᠦ ᠬᠤᠷᠢᠶᠠᠭᠳᠠᠨ ᠢᠷᠡᠮᠦᠢ ᠃
ᠵᠢᠤᠠᠬᠦᠮᠵᠢᠲᠡᠢ ᠶᠠᠪᠤᠭᠴᠢᠳ ᠊ᠢ ᠥᠷᠨᠢᠭᠦᠯᠦᠨ ᠱᠠᠩᠨᠠᠵᠤ ᠂
ᠵᠢᠭᠰᠢᠭᠦᠷᠢᠲᠡᠢ ᠶᠠᠪᠤᠭᠴᠢᠳ ᠊ᠢ ᠵᠠᠯᠬᠠᠭᠠᠬᠤ ᠪᠣᠯᠪᠠ ᠤᠤ ᠂
ᠵᠢᠷᠤᠮᠲᠠᠨ ᠊ᠢ ᠰᠠᠶ᠋ᠢᠰᠢᠶᠠᠵᠤ ᠡᠷᠳᠡᠮᠲᠡᠨ ᠊ᠢ ᠡᠷᠭᠦᠪᠡᠯ ᠂
ᠵᠢᠪᠬᠤᠯᠠᠩᠲᠤ ᠡᠷᠬᠡ ᠬᠦᠴᠦᠨ ᠴᠤᠭᠯᠠᠷᠠᠵᠤ ᠮᠠᠨᠳᠤᠮᠤᠢ ᠃
ᠬᠣᠪᠴᠢ ᠵᠢᠰᠤᠷ ᠪᠠᠲᠤ ᠦᠭᠡᠢ ᠳᠡᠭᠡᠷᠡᠩᠬᠡᠢ ᠵᠠᠷᠤᠳᠠᠰᠤ ᠂
ᠬᠤᠳᠠᠯ ᠪᠢᠰᠢᠷ ᠬᠤᠪᠢᠰᠤᠭᠴᠢ ᠶ᠋ᠢ ᠲᠤᠩᠭᠠᠬᠤ ᠪᠣᠯᠪᠠ ᠤᠤ ᠂
ᠬᠤᠳᠬᠤᠬᠤ ᠪᠠ ᠬᠣᠴᠢᠯᠠᠬᠤ ᠪᠢᠯᠲᠠᠤᠠᠴᠢ ᠬᠥᠮᠦᠨ ᠊ᠢ ᠂
ᠬᠣᠯᠠ ᠪᠣᠯᠭᠠᠨ ᠲᠡᠪᠴᠢᠪᠡᠰᠦ ᠤᠷᠰᠢᠭ ᠦᠯᠦ ᠭᠠᠷᠤᠮᠤᠢ ᠃
ᠠᠯᠳᠠᠭᠳᠠᠬᠤ ᠭᠡᠨᠡᠳᠡᠬᠦ ᠣᠰᠣᠯᠳᠠᠬᠤ ᠠᠯᠢᠨ ᠊ᠢ ᠂
ᠠᠩᠬᠠ ᠠ᠋ᠴᠠ ᠴᠢᠩᠳᠠᠯᠠᠵᠤ ᠤᠬᠠᠭᠤᠯᠬᠤ ᠪᠣᠯᠪᠠ ᠤᠤ ᠂
ᠠᠪᠤᠷᠠᠭᠰᠠᠨ ᠠᠯᠳᠠᠷᠰᠢᠵᠤ ᠡᠷᠡᠮᠰᠢᠬᠦ ᠪᠣᠯᠪᠠᠰᠤ ᠂
ᠠᠶᠤᠬᠤ ᠪᠠ ᠭᠡᠮᠰᠢᠬᠦ ᠶ᠋ᠢ ᠤᠮᠠᠷᠲᠠᠬᠤ ᠪᠣᠯᠤᠮᠤᠢ ᠃
ᠲᠡᠮᠳᠡᠭ ᠦᠭᠡᠢ ᠤᠴᠢᠷ ᠡᠪᠯᠡᠭᠦᠯᠵᠦ ᠵᠣᠬᠢᠶᠠᠨ ᠂
ᠲᠡᠮᠡᠴᠡᠬᠦ ᠵᠠᠭᠠᠯᠳᠤᠬᠤ ᠶ᠋ᠢ ᠴᠥᠭᠡᠳᠬᠡᠬᠦ ᠪᠣᠯᠪᠠ ᠤᠤ ᠂
ᠲᠡᠰᠬᠡᠯ ᠦᠭᠡᠢ ᠬᠢᠯᠢᠰᠳᠡᠨ ᠦ᠌ ᠮᠤᠰᠬᠢᠬᠤ ᠶ᠋ᠢ ᠴᠠᠭᠠᠳᠬᠠᠨ ᠂
ᠲᠡᠭᠦᠨᠴᠢᠯᠡᠨ ᠵᠠᠷᠭᠤ ᠵᠠᠯᠢ ᠶ᠋ᠢ ᠪᠠᠶ᠋ᠢᠯᠭᠠᠪᠠᠰᠤ ᠵᠣᠬᠢᠮᠤᠢ ᠃
ᠬᠠᠮᠤᠭ ᠮᠠᠭᠤ ᠴᠠᠭ ᠤ᠋ᠨ ᠲᠦᠪᠳᠡᠯ ᠦᠭᠡᠢ ᠵᠠᠷᠢᠮ ᠦ᠋ᠳ ᠂
ᠬᠠᠲᠠᠭᠤ ᠣᠮᠣᠭ ᠢ᠋ᠶ᠋ᠠᠷ ᠬᠣᠷᠣᠰᠤᠯ ᠊ᠢ ᠵᠠᠩᠭᠢᠳᠤᠮᠤᠢ ᠂
ᠬᠠᠪᠢ ᠪᠠᠷ ᠦᠳᠲᠡᠷ ᠬᠣᠭᠣᠷᠣᠨᠳᠣ ᠲᠡᠮᠡᠴᠡᠯ ᠊ᠢ ᠡᠭᠦᠰᠬᠡᠨ ᠂
ᠬᠠᠭᠠᠴᠠᠯᠳᠤᠨ ᠬᠥᠨᠥᠭᠡᠭᠲᠡᠬᠦ ᠰᠢᠯᠲᠠᠭᠠᠨ ᠳ᠋ᠤᠷ ᠬᠥᠷᠥᠮᠦᠢ ᠃
ᠶᠠᠯᠢᠯ ᠦᠭᠡᠢ ᠶᠠᠪᠤᠳᠠᠯ ᠳ᠋ᠤᠷ ᠬᠦᠯᠢᠴᠡᠬᠦ ᠦᠭᠡᠢ ᠪᠡᠷ ᠂
ᠶᠠᠮᠤ ᠲᠥᠷᠥ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ᠷ ᠰᠢᠭᠦᠬᠦᠯᠭᠡᠶᠡ ᠬᠡᠮᠡᠮᠦᠢ ᠂
ᠶᠠᠰᠤ ᠮᠢᠬᠠ ᠬᠡᠮᠬᠡᠷᠡᠵᠦ ᠭᠠᠴᠢᠭᠳᠠᠯ ᠳ᠋ᠤᠷ ᠬᠦᠷᠬᠦᠯᠡ ᠂
ᠶᠠᠭᠤᠨ ᠊ᠢ ᠡᠷᠢᠪᠡᠴᠦ ᠪᠣᠯᠬᠤ ᠦᠭᠡᠢ ᠲᠥᠯᠥᠪᠲᠡᠢ ᠃
ᠵᠠᠷᠭᠤ ᠵᠠᠯᠢ ᠡᠭᠦᠰᠬᠡᠵᠦ ᠠᠮᠠ ᠨᠢᠭᠤᠷ ᠲᠤᠯᠤᠯᠴᠠᠨ ᠂
ᠵᠠᠩᠳᠤᠷᠬᠤ ᠵᠠᠨᠤᠭᠤᠯᠬᠤ ᠭᠥᠪᠰᠢᠭᠦᠯᠬᠦ ᠶ᠋ᠢᠨ ᠳᠡᠭᠡᠷᠡ ᠂
ᠵᠠᠪᠰᠢᠶᠠᠨᠠ ᠤᠨᠤᠪᠠᠴᠤ ᠨᠢᠭᠡᠨ ᠦᠭᠡᠨ ᠦ᠌ ᠲᠡᠳᠦᠢ ᠳ᠋ᠦ᠍ᠷ ᠂
ᠵᠠᠭᠤᠨ ᠵᠦᠢᠯ ᠦ᠋ᠨ ᠰᠢᠳᠬᠡᠯ ᠢ᠋ᠶ᠋ᠡᠷ ᠦᠷᠡᠭᠲᠡᠬᠦ ᠪᠢᠰᠢ ᠦᠦ ︖
ᠬᠣᠶᠠᠷ ᠬᠥᠮᠦᠨ ᠲᠡᠮᠡᠴᠡᠬᠦ ᠮᠥᠨ ᠪᠤᠰᠤ ᠶ᠋ᠢᠨ ᠬᠡᠷᠡᠭ ᠲᠦ᠍ᠷ ᠂
ᠬᠣᠯᠢᠴᠠᠯᠳᠤᠨ ᠨᠣᠴᠣᠭᠳᠠᠬᠤ ᠭᠡᠷᠡᠴᠢ ᠪᠠ ᠬᠥᠨᠳᠡᠯᠡᠨ ᠂
ᠬᠣᠯᠪᠣᠭᠳᠠᠬᠤ ᠵᠣᠪᠠᠯᠠᠩ ᠊ᠢ ᠪᠦᠭᠦᠳᠡᠭᠡᠷ ᠠᠮᠰᠠᠭᠠᠳ ᠂
ᠬᠣᠶ᠋ᠢᠴᠢ ᠡᠳᠦᠷ ᠬᠣᠷᠣᠰᠤᠯ ᠤ᠋ᠨ ᠬᠠᠷᠢᠶᠠᠯ ᠊ᠢ ᠬᠦᠷᠲᠡᠮᠦᠢ ᠃
ᠤᠯᠤᠰ ᠭᠡᠷᠦᠨ ᠶᠠᠪᠤᠳᠠᠯ ᠪᠠ ᠲᠥᠷᠥ ᠶ᠋ᠢᠨ ᠠᠯᠪᠠ ᠶ᠋ᠢ ᠂
ᠣᠯᠢᠭ ᠦᠭᠡᠢ ᠳᠣᠣᠷᠠᠳᠤᠰ ᠤ᠋ᠨ ᠰᠢᠭᠦᠮᠵᠢᠯᠡᠯ ᠪᠤᠰᠤ ᠴᠤ᠌ ᠂
ᠣᠯᠠᠨ ᠨᠡᠶ᠋ᠢᠲᠡ ᠶ᠋ᠢᠨ ᠲᠤᠰᠠ ᠬᠣᠣᠷ ᠲᠤᠷ ᠬᠣᠯᠪᠣᠭᠳᠠᠬᠤ ᠪᠣᠯᠬᠤᠯᠠ ᠂
ᠤᠳᠬᠠ ᠴᠢᠨᠠᠷ ᠨᠡᠶ᠋ᠢᠯᠡᠭᠦᠯᠵᠦ ᠬᠡᠳᠦᠨ ᠵᠤᠷᠪᠤᠰ ᠪᠡᠴᠡᠪᠡ ᠃
ᠪᠠᠭᠤᠷᠠᠬᠤ ᠶ᠋ᠢᠨ ᠤᠯᠠᠷᠢᠯ ᠢ᠋ᠶ᠋ᠠᠷ ᠴᠠᠭ ᠤ᠋ᠨ ᠪᠠᠶ᠋ᠢᠲᠠᠯ ᠬᠤᠪᠢᠰᠤᠨ ᠂
ᠪᠠᠲᠤ ᠲᠥᠷᠥ ᠶ᠋ᠢᠨ ᠬᠡᠯᠬᠢᠶᠡᠰᠦ ᠠᠯᠳᠠᠷᠠᠭᠰᠠᠨ ᠡᠭᠦᠨ ᠊ᠢ ᠂
ᠪᠠᠭᠰᠢ ᠮᠠᠷᠠᠭᠡᠳ ᠲᠦᠪᠰᠢᠳᠬᠡᠵᠦ ᠦᠯᠦ ᠪᠣᠯᠬᠤ ᠠᠲᠠᠯᠠ ᠂
ᠪᠠᠯᠠᠢ ᠮᠤᠩᠬᠠᠭ ᠮᠢᠨᠦ ᠮᠡᠲᠦᠰ ᠪᠠᠴᠢᠮᠳᠠᠭᠰᠠᠨ ᠭᠤᠲᠤᠮᠰᠢᠭ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠱᠠᠨᠰᠠᠯ
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣ ᠠ᠋