ᠬᠤᠭᠤᠷ ᠦ᠋ᠨ ᠲᠥᠷᠪᠡᠨ ᠤᠲᠠᠰᠤ - ᠲ ᠂ ᠭᠣᠮᠪᠣᠵᠠᠪ Хуурийн дөрвөн утас - Т ᠂ Гомбожав
319ᠬᠤᠭᠤᠷ ᠦ᠋ᠨ ᠲᠥᠷᠪᠡᠨ ᠤᠲᠠᠰᠤ
ᠲ ᠂ ᠭᠣᠮᠪᠣᠵᠠᠪ
ᠶᠠᠳᠠᠭᠤᠷᠠᠯ
ᠰᠦᠨᠢ ᠲᠤᠩ ᠬᠠᠷᠠᠩᠭᠤᠢ
ᠰᠡᠭᠦᠳᠡᠷ ᠦ᠋ᠨ ᠴᠠᠭᠠᠨᠠ ᠠ᠋ᠴᠠ
ᠬᠠᠶᠠ ᠬᠠᠶᠠ ᠣᠳᠣᠳ ᠦ᠋ᠨ ᠭᠡᠷᠡᠯ ᠴᠣᠩᠬᠣ᠌ ᠲᠣᠭᠰᠢᠵᠤ ᠪᠠᠢᠯᠠ
ᠪᠢ
ᠲᠡᠷᠭᠡᠯᠬᠡᠨ ᠵᠡᠭᠦᠳᠦ ᠮᠠᠨᠠᠶᠠ ᠭᠡᠵᠦ
ᠲᠡᠷᠲᠡᠭᠡ ᠬᠣᠯᠠ ᠶ᠋ᠢᠨ
ᠡᠯᠡᠰᠦ ᠤᠶᠠᠷᠠᠭᠤᠯᠤᠭᠰᠠᠨ ᠲᠡᠮᠡᠭᠡᠨ ᠬᠣᠩᠬᠣ᠌ ᠴᠢᠩᠨᠠᠨ ᠬᠡᠪᠲᠡᠵᠦ ᠪᠢᠯᠡ
ᠥᠷᠯᠦᠭᠡ ᠨᠢ
ᠥᠯᠥᠰᠭᠦᠯᠡᠩ ᠲᠡᠨᠦᠭᠰᠡᠨ ᠨᠢᠭᠡ ᠪᠣᠳᠣᠯ
ᠡᠷᠭᠦᠵᠦ ᠶᠠᠳᠠᠮᠠ ᠬᠦᠨᠳᠦ ᠪᠠᠢᠯᠠ
ᠬᠦᠯᠢᠶᠡᠯᠲᠡ
ᠨᠠᠪ ᠨᠠᠷᠢᠬᠠᠨ
ᠡᠳᠦᠷ ᠰᠦᠨᠢ ᠶ᠋ᠢᠨ ᠵᠠᠪᠰᠠᠷ ᠳᠡᠭᠡᠷᠡ ᠥᠯᠮᠡᠢᠳᠡᠨ ᠵᠣᠭᠰᠣᠯᠠ
ᠮᠢᠨᠦ ᠬᠦᠰᠡᠯ ᠂ ᠴᠡᠴᠡᠭᠯᠡᠭᠡ ᠦᠭᠡᠢ ᠪᠠᠷ ᠶ᠋ᠢᠠᠨ ᠰᠢᠷᠭᠠᠯᠲᠤᠨ
ᠨᠠᠮᠤᠷ ᠦ᠋ᠨ ᠬᠦᠨᠳᠦ ᠭᠤᠨᠢᠭ᠋᠂ ᠨᠠᠷᠠ ᠳᠠᠭᠠᠵᠤ ᠤᠨᠠᠯᠠ
ᠥᠪ ᠪᠣᠯᠵᠣ᠌ ᠦᠯᠡᠳᠡᠭᠰᠡᠨ ᠨᠢ
ᠬᠦᠰᠡᠷᠳᠡᠯ
ᠲᠤᠶ᠋ᠢᠯ ᠦᠭᠡᠢ ᠬᠣᠯᠠ ᠵᠠᠢ ᠤᠷᠤᠭᠤ
ᠲᠡᠯᠡᠭᠡ ᠬᠦᠢᠴᠡᠭᠰᠡᠨ ᠨᠣᠮ ᠦ᠋ᠨ ᠬᠦᠪᠴᠢ ᠡᠴᠡ
ᠱᠤᠤᠭᠢᠵᠤ ᠭᠠᠷᠬᠤ ᠰᠤᠮᠤ ᠶᠤᠮ ᠪᠢᠯᠡ
ᠠᠶᠠᠯᠠᠯ ᠦ᠋ᠨ ᠲᠤᠬᠠᠢ ᠪᠠᠷᠲᠠᠭᠠ ᠵᠢᠰᠢᠨ
ᠠᠮᠢᠰᠬᠤᠭᠠ ᠡᠰᠡ ᠲᠡᠭᠡᠷᠡᠳᠡᠨᠡ
ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ
ᠡᠨᠡ ᠰᠦᠨᠢ ᠰᠠᠷᠠ ᠲᠡᠷᠭᠡᠯᠯᠡᠬᠦ ᠤᠴᠢᠷ ᠲᠠᠢ ᠡ ᠁
ᠨᠠᠮᠤᠷ ᠦ᠋ᠨ ᠬᠣᠲᠠ ᠶ᠋ᠢᠨ ᠰᠠᠭᠤᠭᠳᠠᠯ
ᠣᠢ ᠵᠤᠵᠠᠭᠠᠨ ᠬᠣᠷᠣᠭᠣᠳᠤᠨ ᠵᠠᠪᠰᠠᠷ ᠶ᠋ᠢᠠᠷ
ᠨᠣᠶ᠋ᠢᠷ ᠵᠤᠵᠠᠭᠠᠨ ᠮᠠᠨᠠᠨ ᠰᠡᠩᠰᠡᠷᠡᠵᠦ
ᠨᠠᠷᠠ ᠮᠠᠨᠳᠤᠨᠠ
ᠤᠮᠠᠷᠠ ᠶ᠋ᠢᠨ ᠰᠠᠯᠬᠢ
ᠤᠨᠠᠬᠤ ᠨᠠᠪᠴᠢ ᠶ᠋ᠢᠨ ᠵᠡᠮᠲᠡᠭ᠍ᠷᠡᠭ᠍ᠰᠡᠨ ᠵᠡᠭᠦᠳᠦᠨ ᠳ᠋ᠦ᠍ ᠪᠦᠳᠦᠴᠢᠨ
ᠤᠷᠤᠰᠬᠠᠯ ᠰᠢᠭ᠋ ᠬᠦᠮᠦᠰ ᠦ᠋ᠨ ᠴᠣᠪᠣᠭᠠ
ᠶᠠᠮᠠᠷ ᠨᠢᠭᠡ ᠭᠣᠨᠢᠭ᠋ ᠲᠤ ᠳᠠᠷᠤᠭᠳᠠᠨ
ᠲᠣᠯᠣᠭᠠᠢ ᠪᠠᠨ ᠡᠷᠭᠦᠵᠦ ᠳᠡᠢᠯᠬᠦ ᠦᠭᠡᠢ
ᠲᠡᠷᠭᠡᠴᠢᠨ ᠳ᠋ᠡᠭᠡᠨ ᠰᠢᠲᠤᠷᠭᠤ
ᠲᠡᠷᠭᠡ ᠨᠤᠭᠦᠳ ᠯᠠ ᠬᠠᠮᠢᠶᠠ ᠦᠭᠡᠢ ᠰᠢᠭ᠌
ᠲᠡᠩᠬᠡᠬᠡ ᠰᠢᠯᠭᠠᠯᠴᠠᠨᠠ
ᠲᠡᠭᠡᠬᠦ ᠳ᠋ᠦ᠍ ᠳᠠᠭᠤ ᠨᠢ
ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠭᠠᠵᠠᠷ ᠤᠨᠠᠵᠤ ᠰᠢᠷᠭᠠᠯᠳᠤᠨᠠ ᠪᠢᠯᠡ
ᠠᠰᠠᠷ ᠦ᠋ᠳ ᠦ᠋ᠨ ᠴᠣᠩᠬᠣ᠌ ᠪᠠᠷ ᠰᠢᠷᠠᠩᠭᠤᠢ ᠰᠠᠬᠠᠯ ᠨᠠᠮᠢᠷᠠᠵᠤ
ᠠᠵᠢᠨ ᠪ ᠬᠥᠮᠦᠨ ᠨᠢᠭᠡ ᠪᠣᠲᠣᠯ ᠳ᠋ᠦ᠍ ᠭᠤᠨᠢᠶᠠᠨ
ᠠᠲᠠᠭᠠᠷᠯᠠᠨ ᠪᠤᠴᠠᠬᠤ ᠭᠠᠯᠠᠭᠤᠨ ᠪ ᠲᠠᠭᠤᠨ ᠶ᠋ᠢᠠᠷ
ᠮᠥᠷᠦᠭᠡᠰᠦᠯ ᠳ᠋ᠦ᠍ ᠤᠨᠠᠨ ᠮᠡᠯᠮᠡᠷᠡᠨᠡ ᠡ
ᠭᠤᠲᠤᠮᠵᠢᠨ ᠳ᠋ᠦ᠍
ᠣᠨ ᠪ ᠳᠡᠭᠵᠢᠨ ᠬᠦᠰᠡᠯ ᠦ᠋ᠳ
ᠤᠨᠠᠴᠢᠭᠠᠳ᠂ ᠱᠠᠷ ᠱᠠᠷ ᠪᠥᠮᠪᠥᠷᠢᠨ
ᠣᠢ ᠤᠬᠠᠭᠠᠨ ᠳ᠋ᠦ᠍
ᠪᠥᠮᠪᠥᠷᠴᠡᠭ ᠦ᠋ᠨ ᠨᠢᠭᠡ ᠢᠨᠢᠶᠡᠯ ᠲᠡᠭᠦᠰᠭᠡᠯ ᠬᠤᠷᠢᠶᠠᠬᠤ ᠬᠠᠷᠠᠭᠳᠠᠨᠠ
ᠠᠩ ᠳ᠋ᠠᠭᠠᠨ ᠮᠣᠷᠳᠠᠶᠠ ᠭᠡᠬᠦ ᠪᠣᠳᠣᠯ
ᠠᠭᠠᠵᠢᠮ ᠠᠭᠠᠵᠢᠮ ᠶ᠋ᠢᠠᠷ ᠠᠭᠠᠷ ᠪᠣᠯᠵᠤ ᠲᠡᠯᠡᠷᠡᠨᠡ ᠪᠢᠯᠡ᠁
ᠬᠣᠲᠠ ᠶ᠋ᠢᠨ ᠳᠠᠭᠳᠠᠭᠠ
ᠬᠣᠲᠠ ᠶ᠋ᠢᠨ ᠲᠡᠭᠷᠢ ᠤᠨᠢᠶᠠᠷ ᠶ᠋ᠢᠠᠷ ᠠᠮᠢᠰᠬᠤᠯᠯᠠᠨᠠ
ᠬᠣᠶᠠᠷ ᠴᠠᠭᠠᠨ ᠳᠠᠭᠳᠠᠭᠠ ᠲᠥᠭᠡᠷᠢᠴᠢᠭᠡᠳ
ᠵᠢᠭᠦᠷ ᠶ᠋ᠢᠠᠨ ᠬᠥᠰᠢᠲᠡᠯᠡ ᠨᠢᠰᠦᠭᠰᠡᠭᠡᠷ ᠨᠢᠰᠦᠭᠰᠡᠭᠡᠷ
ᠬᠣᠷᠸ᠋ᠠ ᠭᠠᠯᠯᠠᠭᠰᠠᠨ ᠫᠣᠣ
ᠬᠣᠯᠠᠩ ᠦ᠋ᠨ ᠬᠠᠷᠠ ᠠᠮᠠᠰᠠᠷ ᠳᠡᠭᠡᠷᠡ ᠰᠠᠭᠤᠴᠢᠬᠠᠯᠠ
ᠬᠣᠶᠠᠷ ᠳᠤᠰᠤᠯ ᠬᠥᠢᠪ ᠬᠦᠢᠲᠡᠨ ᠨᠢᠯᠪᠤᠰᠤ
ᠬᠤᠪᠢ ᠵᠠᠶᠠᠭᠠ ᠴᠣᠬᠣᠷᠳᠠᠵᠤ ᠪᠠᠢᠨᠠ᠁
1986
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠲᠤᠭᠴᠢ ᠰᠠᠷᠠᠨᠠ
ᠬᠢᠨᠠᠭᠴᠢ ᠄ ᠴᠣᠯᠮᠣᠨᠲᠤᠶᠠᠭᠠ
2023 ᠂ 4 ᠂ 26 ᠪ ᠡᠲᠦᠷ