ᠰᠢᠷᠬᠠ - ᠲ ᠂ ᠭᠣᠮᠪᠣᠵᠠᠪ Шарх - Т ᠂ Гомбожав
255ᠰᠢᠷᠬᠠ
ᠲ ᠂ ᠭᠣᠮᠪᠣᠵᠠᠪ
ᠬᠣᠯᠠ ᠶ᠋ᠢᠨ ᠵᠡᠭᠦᠳᠦ
ᠬᠠᠪᠤᠷ ᠪᠣᠳᠣᠭᠳᠠᠨᠠᠮ
ᠬᠠᠩᠭᠠᠢ ᠰᠢᠷᠭᠠᠯᠲᠤᠭᠰᠠᠨ ᠨᠠᠮᠤᠷ ᠤᠨ ᠡᠨᠡ ᠡᠳᠦᠷ
ᠬᠠᠪᠤᠷ ᠶᠠᠭᠤᠨ ᠳ᠋ᠤ᠌ ᠪᠣᠳᠣᠭᠳᠠᠨᠠᠮ ?
ᠬᠠᠪᠤᠷ
ᠬᠠᠩᠭᠠᠢ ᠶ᠋ᠢᠨ ᠵᠢᠵᠢᠭᠬᠡᠨ ᠨᠠᠭᠤᠷ ᠤᠨ ᠤᠰᠤᠨ ᠳ᠋ᠤ᠌
ᠬᠣᠶᠠᠷ ᠬᠤᠨ ᠵᠤᠰᠠᠵᠤ ᠪᠠᠶ᠋ᠢᠵᠠᠢ
ᠲᠣᠩ ᠴᠠᠭᠠᠨ ᠣᠩᠭᠣᠴᠠ
ᠳᠤᠭᠤᠶ᠋ᠢᠬᠠᠨ ᠪᠤᠳᠤᠯ ᠦᠢᠮᠡᠭᠦᠯᠦᠨ
ᠳᠤᠷᠠᠯᠠᠯ ᠤᠮᠪᠠᠵᠤ ᠪᠠᠶ᠋ᠢᠵᠠᠢ
ᠬᠠᠶ᠋ᠢᠷᠠ ᠶ᠋ᠢᠨ ᠠᠯᠢᠶᠠᠬᠠᠨ ᠠᠷᠠᠨᠰᠢ ᠳᠠᠭᠠᠵᠤ
ᠬᠠᠨᠢ ᠶ᠋ᠢᠨ ᠰᠡᠳᠬᠢᠯ
ᠳᠣᠯᠭᠢᠶᠠ ᠬᠥᠩᠭᠡᠬᠡᠨ ᠤᠶ᠋ᠢᠯᠤᠰᠴᠤ ᠪᠠᠶ᠋ᠢᠵᠠᠢ
ᠳᠡᠷᠡᠰᠥ ᠨᠣᠭᠣᠭᠠᠬᠠᠨ ᠵᠢᠷᠭᠢᠵᠦ ᠪᠠᠶ᠋ᠢᠵᠠᠢ
ᠬᠠᠩᠭᠠᠢ ᠠᠭᠤᠳᠠᠮ ᠨᠤᠲᠤᠭ ᠤᠨ ᠢᠶ᠋ᠠᠨ ᠡᠨᠡᠬᠦ
ᠬᠤᠷᠤᠠ ᠦᠩᠭᠡᠰᠢᠭᠦᠯᠥᠭᠰᠡᠨ ᠵᠠᠢ ᠳ᠋ᠤ᠌
ᠬᠤᠨ ᠲᠠᠢ ᠨᠠᠭᠤᠷ ᠤᠨ ᠵᠡᠭᠦᠳᠦ
ᠬᠣᠨᠣᠭ ᠬᠣᠨᠣᠭ ᠲᠡᠷᠭᠡᠯᠬᠡᠨ ᠪᠠᠶ᠋ᠢᠵᠠᠢ ᠡ
ᠬᠠᠪᠤᠷ ᠪᠣᠳᠣᠭᠳᠠᠨᠠᠮ
ᠬᠠᠩᠭᠠᠢ ᠰᠢᠷᠭᠠᠯᠲᠤᠭᠰᠠᠨ ᠨᠠᠮᠤᠷ ᠤᠨ ᠡᠨᠡ ᠡᠳᠦᠷ
ᠬᠠᠪᠤᠷ ᠶᠠᠭᠤᠨ ᠳ᠋ᠤ᠌ ᠮᠠᠷᠲᠠᠭᠳᠠᠨᠠᠮ !
ᠵᠠᠢ
ᠪᠢ ᠨᠠᠭᠠᠨᠠ ᠠ᠋ᠴᠠ ᠂ ᠴᠢ ᠴᠠᠭᠠᠨᠠ ᠠ᠋ᠴᠠ
ᠪᠢᠳᠡ ᠬᠣᠶᠠᠷ ᠥᠭᠡᠳᠡ ᠥᠭᠡᠳᠡ ᠡᠴᠡ ᠪᠠᠨ ᠶᠠᠪᠤᠵᠤ ᠪᠠᠶ᠋ᠢᠯᠠ !
ᠬᠥᠯ ᠦᠨ ᠮᠢᠨᠢ ᠳᠣᠣᠷᠠ ᠵᠠᠮ ᠭᠢᠰᠬᠢᠭᠳᠡᠨᠡ
ᠬᠥᠬᠡᠷᠡᠭᠰᠡᠨ ᠡᠨᠡ ᠡᠬᠡ ᠭᠠᠵᠠᠷ ᠤᠨ ᠰᠤᠳᠠᠰᠤᠨ ᠳᠡᠭᠡᠷᠡ
ᠬᠡᠦᠬᠡᠳ ᠦᠶᠡ ᠶ᠋ᠢᠨ ᠨᠠᠭᠠᠳᠤᠮ
ᠬᠥᠲᠥᠯ ᠦᠨ ᠡᠩᠭᠡᠷ ᠲᠦ᠍ ᠪᠠᠷᠢᠭᠰᠠᠨ ᠪᠢᠴᠢᠬᠠᠨ ᠭᠡᠷ ᠮᠢᠨᠢ ᠭᠢᠰᠬᠢᠭᠳᠡᠨᠡ
ᠬᠥᠳᠡᠭᠡ ᠶ᠋ᠢᠨ ᠲᠡᠷᠡ ᠂ ᠨᠠᠮᠤᠷ ᠤᠨ ᠰᠠᠷᠠᠨ ᠤ ᠳᠣᠣᠷᠠ
ᠬᠥᠰᠡᠷᠳᠡᠭᠰᠡᠨ ᠰᠢᠷᠠ ᠳᠤᠷᠠᠳᠬᠠᠯ ᠨᠠᠪᠴᠢ ᠰᠢᠭ ᠭᠢᠰᠬᠢᠭᠳᠡᠨᠡ
ᠬᠥᠮᠦᠨ ᠳ᠋ᠤ᠌ ᠨᠠᠰᠤ ᠥᠷᠥᠵᠦ
ᠬᠥᠳᠡᠯᠦᠭᠰᠡᠨ ᠬᠣᠶᠠᠷ ᠨᠣᠭᠣᠭᠠᠨ ᠣᠩᠭᠣᠴᠠᠨ ᠤ
ᠬᠦᠰᠡᠯ ᠦᠨ ᠴᠠᠭᠠᠨ ᠳᠠᠷᠪᠠᠭᠤᠯ ᠪᠣᠯᠭᠠᠵᠤ ᠣᠩᠭᠣᠯᠠᠭᠰᠠᠨ ᠣᠨ ᠵᠢᠯ ᠦᠳ ᠭᠢᠰᠬᠢᠭᠳᠡᠨᠡ ᠡ
ᠠᠢ ᠳ᠋ᠠ ᠂ ᠨᠠᠶ᠋ᠢᠵᠢ ᠮᠢᠨᠢ
ᠠᠮᠢᠳᠤᠷᠠᠯ ᠤᠨ ᠡᠨᠡ ᠪᠢᠴᠢᠬᠠᠨ ᠠᠯᠠᠭᠠᠨ ᠳᠡᠭᠡᠷᠡ
ᠪᠢ ᠨᠠᠭᠠᠰᠢ ᠪᠠᠨ ᠂ ᠴᠢ ᠴᠠᠰᠢ ᠪᠠᠨ
ᠪᠢᠳᠡ ᠬᠣᠶᠠᠷ ᠤᠯᠠᠮ ᠤᠯᠠᠮ ᠬᠣᠯᠠᠳᠴᠤ ᠪᠠᠶ᠋ᠢᠨᠠ ᠡ !
ᠰᠢᠷᠬᠠ
ᠰᠢᠷᠬᠠ
ᠰᠢᠷᠭᠠᠯᠬᠠᠨ ᠪᠣᠳᠣᠯ ᠢᠶ᠋ᠠᠷ ᠲᠣᠷᠣᠶ᠋ᠢᠭᠰᠠᠨ ᠮᠤᠳᠤ
ᠰᠢᠯᠢ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠱᠤᠤᠬᠢᠨᠠᠮ
ᠣᠯᠠᠨ ᠣᠯᠠᠨ ᠴᠡᠴᠡᠭ ᠯᠡ ᠡᠷᠬᠡ ᠳᠠᠷᠬᠠᠯᠠᠵᠤ
ᠤᠤᠯ ᠳ᠋ᠠᠭᠠᠨ ᠮᠣᠳᠣ ᠠᠯᠠᠭᠠ ᠡᠨᠡ ᠰᠢᠯᠢ ᠶ᠋ᠢᠨ ᠣᠷᠣᠢ ᠳ᠋ᠤ᠌
ᠣᠩᠭᠣᠨ ᠳᠤᠷᠠᠯᠠᠯ ᠬᠥᠲᠥᠯᠦᠭᠰᠡᠨ ᠬᠣᠶᠠᠷ ᠵᠠᠯᠠᠭᠤ ᠬᠥᠮᠦᠨ ᠣᠲᠣᠷᠯᠠᠵᠤ ᠂ ᠨᠢᠭᠡ ᠡᠳᠦᠷ ᠢᠷᠡᠭᠰᠡᠨ ᠪᠠᠶ᠋ᠢᠵᠤ ᠪᠢᠯᠡ
ᠬᠤᠯᠠᠨ ᠰᠢᠭ᠋ ᠰᠡᠳᠬᠢᠯ
ᠬᠤᠷᠤᠠ ᠶ᠋ᠢᠨ ᠡᠨᠡ ᠨᠣᠭᠣᠭᠠᠨ ᠥᠷᠲᠡᠭᠡᠨ ᠳ᠋ᠦ᠍ ᠪᠠᠭᠤᠵᠤ
ᠬᠤᠶᠠᠷ ᠬᠥᠮᠦᠨ
ᠬᠤᠶᠠᠷ ᠰᠠᠭᠤᠷᠢ ᠮᠤᠳᠤ ᠰᠢᠯᠢ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠬᠥᠬᠡᠷᠡᠵᠦ ᠪᠠᠶ᠋ᠢᠭᠰᠠᠨ ᠪᠢᠯᠡ
ᠣᠷᠴᠢᠯᠠᠩ ᠂ ᠲᠡᠳᠡᠨ ᠦ ᠨᠠᠮᠠᠭᠠᠨ ᠳ᠋ᠤ᠌ ᠰᠠᠶ᠋ᠢᠬᠠᠨ ᠵᠡᠭᠦᠳᠦ ᠲᠡᠢ ᠡᠭᠦᠷᠯᠡᠨ
ᠤᠯᠠᠨ ᠤᠯᠠᠨ ᠡᠳᠦᠷ ᠦᠳ
ᠤᠢ ᠰᠢᠭ᠋ ᠢᠭᠴᠤᠷᠠᠬᠤ ᠳ᠋ᠤ᠌
ᠤᠶ᠋ᠢᠳᠤᠭᠴᠢ ᠪᠣᠯᠵᠤ ᠂ ᠨᠢᠭᠡ ᠨᠢ
ᠣᠩᠭᠣᠨ ᠡᠨᠡᠬᠦ ᠰᠢᠯᠢ ᠶ᠋ᠢᠨ ᠣᠷᠣᠢ ᠠ᠋ᠴᠠ ᠪᠠᠨ ᠰᠠᠯᠴᠢᠭᠰᠠᠨ ᠪᠢᠯᠡ
ᠨᠥᠭᠦᠭᠡ ᠨᠢ ᠲᠡᠭᠡᠬᠦ ᠳ᠋ᠦ᠍ ᠂ ᠬᠥᠭᠡᠷᠦᠬᠦᠢ
ᠨᠢᠭᠡ ᠰᠠᠭᠤᠷᠢ ᠣᠷᠣᠢ ᠨᠢ ᠰᠢᠷᠠᠯᠠᠭᠰᠠᠨ ᠤᠳᠠ
ᠰᠢᠯᠢ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠱᠤᠤᠭᠢᠭᠰᠠᠭᠠᠷ ᠬᠣᠴᠣᠷᠴᠠᠢ ᠡ !
ᠮᠥᠷᠥᠭᠡᠳᠦᠯ
ᠴᠢᠨᠤ ᠳᠡᠯᠡᠬᠡᠢ ᠳ᠋ᠦ᠍ ᠪᠢ ᠪᠠᠶ᠋ᠢᠷᠢ ᠦᠭᠡᠢ
ᠴᠢ ᠂ ᠮᠢᠨᠤ ᠳᠡᠯᠡᠬᠡᠢ ᠳ᠋ᠦ᠍ ᠲᠣᠮᠣ ᠪᠠᠶ᠋ᠢᠷᠢ ᠂ ᠴᠡᠴᠡᠷᠯᠢᠭ ᠡᠵᠡᠯᠡᠵᠦ ᠪᠠᠶ᠋ᠢᠨᠠ
ᠲᠡᠷᠡ ᠠᠷᠢᠭᠤᠨ ᠳᠠᠷᠬᠠᠨ ᠵᠠᠢ
ᠲᠡᠭᠦᠨ ᠢ ᠬᠡᠨ ᠳ᠋ᠦ᠍ ᠴᠦ᠍ ᠨᠡᠭᠡᠭᠡᠬᠦ ᠶᠣᠰᠣ ᠦᠭᠡᠢ
ᠲᠦᠯᠬᠢᠭᠦᠷ ᠢ ᠨᠢ ᠪᠢ ᠭᠠᠭᠴᠠ ᠪᠡᠶᠡ ᠳ᠋ᠡᠭᠡᠨ ᠡᠵᠡᠮᠰᠢᠨᠡ
ᠲᠡᠭᠡᠭᠡᠳ ᠤᠶ᠋ᠢᠳᠪᠠᠯ ᠨᠢᠭᠡ
ᠤᠷᠤᠢ ᠦᠳᠡᠰᠢ ᠨᠣᠶ᠋ᠢᠷ ᠬᠤᠯᠵᠢᠪᠠᠯ ᠨᠢᠭᠡ
ᠳᠣᠲᠣᠷᠠ ᠨᠢ ᠣᠷᠣᠵᠤ ᠴᠡᠴᠡᠭ ᠬᠡᠳᠦ ᠲᠡᠭᠦᠭᠡᠳ
ᠳᠣᠪᠣ ᠪᠦᠷᠬᠦᠭᠰᠡᠨ ᠡᠪᠡᠰᠦ ᠶ᠋ᠢ ᠨᠢ ᠬᠡᠳᠦ ᠳᠠᠰᠤᠯᠴᠢᠭᠠᠳ
ᠲᠠᠭᠤ ᠨᠢ ᠬᠣᠯᠠᠳᠠᠭᠰᠠᠨ ᠰᠠᠷᠠᠨ ᠤ ᠪᠡᠨ ᠭᠡᠷᠡᠯ ᠢ
ᠳᠤᠭᠤᠶ᠋ᠢᠬᠠᠨ ᠳᠤᠷᠠᠰᠴᠤ ᠰᠠᠭᠤᠨᠠ ᠡ
1985
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠴᠣᠯᠮᠣᠨᠲᠤᠶᠠᠭᠠ
ᠬᠢᠨᠠᠭᠴᠢ ᠄ ᠲᠤᠭ᠍ᠴᠢ ᠰᠠᠷᠠᠨᠠ
2023 ᠂ 4 ᠂ 23 ᠪ ᠡᠲᠦᠷ