ᠮᠣᠩᠭᠣᠯᠴᠤᠳ ᠳᠥᠷᠪᠡᠨ ᠨᠢᠳᠦ ᠲᠡᠢ ᠬᠠᠯᠲᠠᠷ ᠨᠣᠬᠠᠢ ᠲᠡᠵᠢᠭᠡᠳᠡᠭ ᠦ᠋ᠨ ᠤᠴᠢᠷМонголчууд дөрвөн нүдтэй халтар нохой тэжээдгийн очир
387ᠮᠣᠩᠭᠣᠯᠴᠤᠳ ᠳᠥᠷᠪᠡᠨ ᠨᠢᠳᠦ ᠲᠡᠢ ᠬᠠᠯᠲᠠᠷ ᠨᠣᠬᠠᠢ ᠲᠡᠵᠢᠭᠡᠳᠡᠭ ᠦ᠋ᠨ ᠤᠴᠢᠷ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠨᠢᠭᠡᠨ ᠵᠠᠯᠠᠭᠤ ᠭᠡᠷ ᠪᠦᠯᠢ ᠪᠠᠶ᠋ᠢᠵᠠᠢ ᠃ ᠲᠡᠳᠡ ᠪᠡᠶᠡ ᠪᠠᠶᠠᠨ ᠳ᠋ᠤ᠌ ᠪᠠᠨ ᠬᠠᠶ᠋ᠢᠷᠠᠲᠠᠢ ᠪᠣᠯᠪᠠᠴᠤ ᠵᠠᠷᠢᠮ ᠳ᠋ᠤ᠌ ᠪᠠᠨ ᠳᠠᠭᠠᠷᠠᠮᠵᠢ ᠮᠠᠭᠤᠲᠠᠢ ᠣᠷᠣᠢ ᠦᠳᠡᠰᠢ ᠪᠡᠷ ᠬᠡᠷᠡᠯᠳᠦᠵᠦ ᠰᠠᠯᠤᠨᠠ ᠪᠠᠷᠢᠨᠠ ᠭᠡᠵᠦ ᠬᠡᠦᠬᠡᠳ ᠰᠢᠤᠬᠠᠳ ᠢ᠋ᠶ᠋ᠠᠨ ᠠᠶᠤᠯᠭᠠᠳᠠᠭ ᠪᠠᠶ᠋ᠢᠵᠠᠢ ᠭᠡᠨᠡ ᠃
ᠡᠷᠲᠡ ᠳᠡᠭᠡᠷᠡ ᠦᠶᠡ ᠡᠴᠡ ᠮᠣᠩᠭᠣᠯᠴᠤᠳ ᠣᠷᠣᠢ ᠦᠳᠡᠰᠢ ᠨᠣᠬᠠᠢ ᠣᠯᠢᠬᠤ ᠬᠡᠢ ᠬᠤᠴᠠᠬᠤ ᠂ ᠡᠮᠡᠭᠲᠡᠢ ᠬᠥᠮᠦᠨ ᠤᠬᠢᠯᠠᠨ ᠭᠢᠩᠰᠢᠬᠦ ᠶ᠋ᠢ ᠮᠠᠭᠤ ᠢᠷᠣᠠ ᠭᠡᠵᠦ ᠴᠡᠭᠡᠷᠯᠡᠳᠡᠭ ᠶᠦ᠍ᠮ ᠃ ᠲᠡᠭᠡᠭᠡᠳ ᠨᠤᠲᠤᠭ ᠤ᠋ᠨ ᠨᠢᠭᠡᠨ ᠰᠠᠢᠨ ᠯᠠᠮᠠ ᠶ᠋ᠢ ᠵᠠᠯᠠᠵᠤ ᠠᠷᠭᠠ ᠴᠠᠷᠭᠠ ᠬᠢᠯᠭᠡᠬᠦ ᠪᠣᠯᠵᠠᠢ ᠃ ᠯᠠᠮᠠ ᠢᠷᠡᠵᠦ ᠨᠣᠮ ᠭᠦᠷᠢᠮ ᠤᠩᠰᠢᠵᠤ ᠮᠡᠷᠭᠡ ᠲᠥᠯᠭᠡ ᠦᠵᠡᠭᠡᠳ ᠄ 《 ᠲᠠ ᠬᠣᠶᠠᠷ ᠬᠡᠷᠡᠭᠦᠯ ᠶᠡᠬᠡ ᠬᠢᠳᠡᠭ ᠪᠣᠯᠤᠯᠲᠠᠢ ᠣᠷᠣᠢ ᠦᠳᠡᠰᠢ ᠬᠡᠦᠬᠡᠳ ᠰᠢᠤᠬᠠᠳ ᠢ᠋ᠶ᠋ᠠᠨ ᠠᠶᠤᠯᠭᠠᠵᠤ ᠬᠡᠷᠡᠭᠦᠯ ᠴᠤᠤᠭᠢᠶᠠᠨ ᠪᠤᠤ ᠬᠢ ! ᠳᠥᠷᠪᠡᠨ ᠨᠢᠳᠦᠲᠡᠢ ᠤᠯᠠᠭᠠᠨ ᠬᠠᠯᠲᠠᠷ ᠨᠣᠬᠠᠢ ᠣᠯᠵᠤ ᠰᠠᠢᠨ ᠬᠣᠭᠣᠯᠠᠯᠠᠵᠤ ᠲᠡᠵᠢᠭᠡᠪᠡᠯ ᠰᠠᠢᠨ ᠶᠤᠮ ᠳᠠ ! 》 ᠭᠡᠵᠦ ᠠᠶ᠋ᠢᠯᠠᠲᠤᠭᠠᠳ ᠶᠠᠪᠤᠵᠠᠢ ᠃ ᠲᠡᠭᠡᠭᠡᠳ ᠤᠭ ᠦᠭᠡ ᠶ᠋ᠢᠨ ᠶᠣᠰᠣᠭᠠᠷ ᠳᠥᠷᠪᠡᠨ ᠨᠢᠳᠦᠲᠡᠢ ᠤᠯᠠᠭᠠᠨ ᠬᠠᠯᠲᠠᠷ ᠨᠣᠬᠠᠢ ᠲᠡᠵᠢᠭᠡᠵᠡᠢ ᠃
ᠨᠢᠭᠡᠨ ᠣᠷᠣᠢ ᠲᠡᠳᠡᠨ ᠦ᠌ ᠳ᠋ᠦ᠍ ᠽᠠᠨᠳᠠᠨ ᠵᠣᠣ ᠳ᠋ᠤ᠌ ᠮᠥᠷᠭᠥᠯ ᠦᠢᠯᠡᠳᠴᠦ ᠣᠯᠠᠨ ᠵᠢᠯ ᠨᠣᠮ ᠦᠵᠡᠵᠦ ᠲᠠᠪᠤᠨ ᠤᠬᠠᠭᠠᠨ ᠳ᠋ᠤ᠌ ᠬᠡᠬᠡᠷᠡᠭᠰᠡᠨ ᠨᠢᠭᠡᠨ ᠯᠠᠮᠠ ᠬᠣᠨᠣᠭ ᠲᠥᠬᠥᠭᠡᠷᠦᠭᠦᠯᠬᠦ ᠪᠡᠷ ᠪᠣᠯᠵᠤ ᠪᠠᠭᠤᠳᠠᠯᠯᠠᠵᠠᠢ ᠃ ᠯᠠᠮᠠ ᠶ᠋ᠢ ᠴᠠᠢ ᠤᠤᠭᠤᠵᠤ ᠰᠠᠭᠤᠲᠠᠯᠠ ᠨᠣᠬᠠᠢ ᠨᠢ ᠭᠡᠷ ᠢ᠋ᠶ᠋ᠡᠨ ᠲᠣᠭᠣᠷᠢᠵᠤ ᠬᠤᠴᠠᠬᠤ ᠳ᠋ᠤ᠌ ᠭᠡᠷ ᠦ᠋ᠨ ᠡᠵᠡᠨ ᠠᠭᠤᠷᠯᠠᠵᠤ ᠮᠠᠭᠤ ᠢᠷᠣᠠ ᠶ᠋ᠢᠨ ᠭᠤᠳᠤᠷᠭᠠ ᠣᠷᠣᠢ ᠪᠣᠯᠬᠤ ᠪᠠᠷ ᠯᠠ ᠬᠤᠳᠠᠯ ᠬᠤᠴᠠᠭᠠᠳ ᠭᠡᠵᠦ ᠨᠣᠬᠠᠢ ᠪᠠᠨ ᠵᠣᠳᠣᠵᠤ ᠬᠥᠭᠡᠭᠡᠭᠡᠳ ᠣᠷᠣᠵᠤ ᠢᠷᠡᠵᠡᠢ ᠭᠡᠨᠡ ᠃ ᠭᠡᠲᠡᠯᠡ ᠲᠡᠳᠡᠨ ᠦ᠌ ᠨᠢᠯᠬᠠ ᠬᠡᠦᠬᠡᠳ ᠨᠢ ᠬᠠᠯᠠᠭᠤᠷᠠᠵᠤ ᠪᠠᠶ᠋ᠢᠭᠠ ᠪᠣᠯᠤᠯᠲᠠᠢ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠨ ᠠ᠋ᠴᠠ ᠰᠣᠴᠢᠨ ᠤᠬᠢᠯᠠᠬᠤ ᠳ᠋ᠤ᠌ ᠨᠣᠬᠠᠢ ᠨᠢ ᠪᠠᠰᠠ ᠯᠠ ᠭᠡᠷ ᠢ᠋ᠶ᠋ᠡᠨ ᠲᠣᠭᠣᠷᠢᠨ ᠪᠣᠷᠭᠣᠨ ᠬᠤᠴᠠᠵᠤ ᠡᠭᠦᠳᠡ ᠪᠡᠨ ᠳᠠᠷᠤᠭᠠᠳ ᠬᠡᠪᠲᠡᠴᠢᠬᠡᠵᠡᠢ ᠃ ᠡᠨᠡ ᠦᠶᠡ ᠳ᠋ᠦ᠍ ᠭᠠᠳᠠᠨᠠ ᠬᠣᠶᠠᠷ ᠴᠢᠳᠬᠥᠷ ᠢᠷᠡᠭᠡᠳ ᠡᠶ᠋ᠢᠨ ᠬᠦ ᠶᠠᠷᠢᠯᠴᠠᠬᠤ ᠶ᠋ᠢ ᠲᠡᠳᠡᠨ ᠦ᠌ ᠳ᠋ᠦ᠍ ᠢᠷᠡᠭᠰᠡᠨ ᠯᠠᠮᠠ ᠴᠢᠩᠨᠠᠨ ᠰᠠᠭᠤᠵᠠᠢ ᠃ ᠬᠣᠶᠠᠷ ᠴᠢᠳᠬᠥᠷ ᠦ᠋ᠨ ᠨᠢᠭᠡ ᠨᠢ 《ᠴᠢ ᠣᠷᠣᠭᠠᠳ ᠬᠦᠦ ᠶ᠋ᠢᠨ ᠬᠢᠨᠢ ᠰᠦᠨᠡᠰᠦ ᠶ᠋ᠢ ᠠᠪᠤᠭᠠᠳ ᠢᠷᠡ 》 ᠭᠡᠬᠦ ᠳ᠋ᠦ᠍ ᠨᠥᠭᠥᠭᠡᠳᠡᠬᠢ ᠨᠢ 《 ᠣᠷᠣᠬᠤ ᠳ᠋ᠤ᠌ ᠬᠡᠴᠡᠭᠦᠬᠡᠨ ᠪᠣᠯᠤᠭᠰᠠᠨ ᠪᠠᠶ᠋ᠢᠨᠠ ᠂ ᠡᠳᠡᠨ ᠦ᠌ ᠬᠡᠵᠢᠶᠡ ᠨᠢ ᠳᠥᠷᠪᠡᠨ ᠨᠢᠳᠦᠲᠡᠢ ᠤᠯᠠᠭᠠᠨ ᠬᠠᠯᠲᠠᠷ ᠨᠣᠬᠠᠢ ᠲᠠᠢ ᠪᠣᠯᠴᠢᠬᠠᠳᠠᠭ ᠪᠠᠶ᠋ᠢᠨᠠ ? ᠡᠭᠦᠳᠡ ᠪᠡᠨ ᠭᠣᠣᠯᠯᠠᠭᠠᠳ ᠴᠢ ᠪᠢᠳᠡ ᠬᠣᠶᠠᠷ ᠊ᠢ ᠬᠠᠷᠠᠭᠠᠳ ᠬᠡᠪᠲᠡᠵᠦ ᠪᠠᠶ᠋ᠢᠨᠠ ᠰᠢᠦ ! ᠪᠢ ᠨᠣᠬᠠᠢ ᠳ᠋ᠤ᠌ ᠤᠷᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠂ ᠴᠢ ᠣᠷᠣ ! 》 ᠭᠡᠮᠡᠨ ᠲᠦᠯᠬᠢᠵᠦ ᠲᠠᠲᠠᠯᠴᠠᠭᠰᠠᠭᠠᠷ ᠬᠣᠯᠠᠳᠬᠤ ᠶ᠋ᠢ ᠴᠢᠩᠨᠠᠨ ᠰᠠᠭᠤᠭᠰᠠᠨ ᠯᠠᠮᠠ ᠄ 《ᠲᠠᠨ ᠤ᠋ ᠨᠣᠬᠠᠢ ᠴᠢᠨᠢ ᠠᠯᠪᠢᠨ ᠴᠢᠳᠬᠥᠷ ᠡᠴᠡ ᠬᠡᠦᠬᠡᠳ ᠦ᠋ᠨ ᠴᠢᠨᠢ ᠠᠮᠢ ᠶ᠋ᠢ ᠰᠠᠬᠢᠨ ᠬᠠᠮᠠᠭᠠᠯᠠᠳᠠᠭ ᠶᠤᠮ ᠪᠠᠶ᠋ᠢᠨᠠ ᠂ ᠰᠠᠢᠨ ᠬᠣᠭᠣᠯᠠᠯᠠᠵᠤ ᠬᠠᠶ᠋ᠢᠷᠠᠯᠠᠵᠤ ᠪᠠᠢ ! 》 ᠭᠡᠵᠦ ᠬᠡᠯᠡᠭᠰᠡᠨ ᠭᠡᠨᠡ ᠃
ᠳᠡᠭᠡᠷᠡ ᠦᠶᠡ ᠡᠴᠡ ᠮᠣᠩᠭᠣᠯᠴᠤᠳ ᠳᠥᠷᠪᠡᠨ ᠨᠢᠳᠦᠲᠡᠢ ᠤᠯᠠᠭᠠᠨ ᠬᠠᠯᠲᠠᠷ ᠵᠢᠷᠦᠬᠡ ᠴᠠᠭᠠᠨ ᠬᠠᠷᠠ ᠨᠣᠬᠠᠢ ᠶ᠋ᠢ ᠬᠡᠢ ᠮᠠᠢ ᠬᠠᠷᠠᠵᠤ ᠵᠠᠶ᠋ᠢᠯᠠᠭᠤᠯᠲᠠᠭ ᠭᠡᠵᠦ ᠲᠡᠵᠢᠭᠡᠳᠡᠭ ᠦ᠋ᠨ ᠤᠴᠢᠷ ᠡᠨᠡ ᠠᠵᠢ ᠃ ᠬᠠᠷᠢᠨ ᠠᠯᠠᠭ ᠨᠣᠬᠠᠢ ᠶ᠋ᠢ ᠬᠡᠢ ᠶᠠᠭᠤᠮᠠ ᠳᠠᠭᠠᠭᠤᠯᠳᠠᠭ ᠵᠢᠰᠦ ᠮᠠᠭᠤᠲᠤ ᠭᠡᠵᠦ ᠦᠵᠡᠳᠡᠭ ᠪᠠᠶ᠋ᠢᠵᠠᠢ ᠃ ᠨᠣᠬᠠᠢ ᠡᠭᠦᠳᠡ ᠪᠡᠨ ᠳᠠᠷᠤᠵᠤ ᠬᠡᠪᠲᠡᠬᠦ ᠶ᠋ᠢ ᠭᠠᠷᠤᠵᠠ ᠭᠠᠷᠤᠯᠭᠠ ᠶ᠋ᠢᠨ ᠡᠭᠦᠳᠡ ᠬᠠᠭᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠵᠤ ᠰᠠᠢᠨ ᠭᠡᠵᠦ ᠪᠡᠯᠭᠡᠰᠢᠶᠡᠳᠡᠭ ᠶᠣᠰᠣᠨ ᠮᠣᠩᠭᠣᠯ ᠲᠤᠭᠤᠷᠭᠠᠲᠠᠨ ᠤ᠋ ᠳᠣᠲᠣᠷᠠ ᠣᠳᠣ ᠴᠤ᠌ ᠪᠣᠢ ᠃
ᠦᠰᠦᠭ ᠬᠠᠲᠠᠭᠰᠠᠨ ᠨᠢ ᠄ ᠮᠥᠩᠭᠦᠨᠴᠡᠴᠡᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠮᠥᠩᠭᠦᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ ᠄ ᠠᠵᠠᠵᠠᠶᠠᠭᠠ