ᠴᠠᠭ ᠥᠭᠡᠷᠡ ᠪᠣᠯᠴᠢᠬᠠᠵᠤ – ᠭ ᠂ ᠴᠢᠩᠪᠠᠭᠠᠲᠤᠷ Цаг өөр болчхож – Г᠂ Чинбаатар
286ᠴᠠᠭ ᠥᠭᠡᠷᠡ ᠪᠣᠯᠴᠢᠬᠠᠵᠤ
ᠭ ᠂ ᠴᠢᠩᠪᠠᠭᠠᠲᠤᠷ
ᠴᠠᠭ ᠥᠭᠡᠷᠡ ᠪᠣᠯᠴᠢᠬᠠᠵᠤ
ᠴᠢᠮᠠ ᠳ᠋ᠤ᠌ ᠶᠠᠷᠢᠳᠠᠭ ᠦᠯᠢᠭᠡᠷ ᠪᠦᠷ ᠵᠡᠭᠦᠳᠦ ᠵᠦᠩ ᠦ᠋ᠨ ᠬᠢ ᠪᠣᠯᠴᠢᠬᠠᠵᠤ
ᠠᠶ᠋ᠢᠯ ᠭᠡᠷ ᠪᠣᠯᠵᠤ ᠨᠠᠭᠠᠳᠬᠤ ᠪᠠᠨ ᠬᠡᠦᠬᠡᠳ ᠦ᠋ᠳ ᠪᠦᠷ ᠮᠠᠷᠲᠠᠴᠢᠬᠠᠵᠤ
ᠠᠷᠭᠠᠯ ᠦ᠋ᠨ ᠨᠥᠮᠥᠷᠢ ᠳ᠋ᠦ᠍ ᠰᠢᠪᠡᠭᠡ ᠪᠠᠷᠢᠯᠳᠤᠭᠤᠯᠵᠤ ᠥᠰᠳᠡᠭ ᠶ᠋ᠢᠡᠨ ᠪᠠᠶ᠋ᠢᠴᠢᠬᠠᠵᠤ
ᠠᠷᠤᠭ ᠲᠤᠯᠬ᠋ᠠ ᠬᠣᠶᠠᠷ ᠬᠡᠷᠡᠭ ᠡᠴᠡ ᠪᠡᠨ ᠭᠠᠷᠴᠤ
ᠠᠳᠤᠭᠤᠳ ᠪᠦᠷ ᠵᠢᠷᠤᠭ ᠦ᠋ᠨ ᠬᠢ ᠂ ᠰᠢᠯᠦᠭ ᠦ᠋ᠨ ᠬᠢ ᠂ ᠲᠡᠦᠬᠡ ᠶ᠋ᠢᠨ ᠬᠢ ᠪᠣᠯᠴᠢᠬᠠᠵᠤ
ᠠᠶᠠ ᠴᠠᠭ ᠥᠭᠡᠷᠡ ᠪᠣᠯᠴᠢᠬᠠᠵᠤ
ᠬᠠᠮᠬᠤᠤᠯ ᠬᠡᠶ᠋ᠢᠰᠬᠦ ᠮᠡᠲᠦ ᠣᠨ ᠵᠢᠯ ᠥᠩᠭᠡᠷᠡᠴᠢᠬᠡᠵᠦ
ᠬᠠᠮᠢᠬ᠋ᠠ ᠨᠢᠭᠡᠲᠡᠭᠡ ᠡᠴᠡ ᠡᠯᠡᠰᠦᠨ ᠪ ᠨᠡᠭᠦᠳᠡᠯ ᠲᠠᠯᠠ ᠪᠠᠨ ᠬᠠᠷᠠᠮᠨᠠᠨ ᠬᠤᠴᠢᠴᠢᠬᠠᠵᠤ
ᠭᠡᠰᠡᠨᠡᠭ ᠲᠡᠢ ᠰᠤᠮᠤ ᠮᠢᠨᠢ ᠴᠢᠲᠥᠷ ᠲᠡᠢ ᠮᠣᠷᠢ ᠰᠢᠭ᠋ ᠨᠣᠮᠤᠬᠠᠷᠠᠴᠢᠬᠠᠵᠤ
ᠬᠡᠯᠡᠭᠡ ᠦᠭᠡᠢ ᠦᠭᠡ ᠂ ᠳᠡᠯᠪᠡᠷᠡᠭᠡ ᠦᠭᠡᠢ ᠠᠭᠤᠷ ᠣᠮᠣᠷᠬᠠᠭ ᠵᠢᠷᠦᠬᠡ ᠶ᠋ᠢ ᠮᠢᠨᠢ ᠲᠦᠯᠡᠴᠢᠬᠡᠵᠦ
ᠮᠥᠭᠥ ᠲᠡᠭᠦᠳᠡᠭ ᠳᠥᠭᠥᠮ ᠮᠢᠨᠢ ᠳᠣᠮᠣᠭ ᠦ᠋ᠨ ᠶᠤᠮ ᠰᠢᠭ᠋ ᠡᠯᠡᠷ ᠪᠠᠯᠠᠷ ᠪᠣᠯᠴᠢᠬᠠᠵᠤ
ᠮᠥᠷᠥᠭᠡᠲᠦᠯ ᠳ᠋ᠦ᠍ ᠮᠢᠨᠢ ᠨᠤᠲᠤᠭ ᠦ᠋ᠨ ᠲᠤᠬᠠᠢ ᠳᠤᠷᠠᠳᠬᠠᠯ ᠯᠡ ᠳᠠᠭᠤᠤ ᠶ᠋ᠢᠨ ᠠᠶᠠᠯᠭᠤ ᠰᠢᠭ᠋ ᠤᠷᠭᠤᠨᠠ ᠁
ᠬᠠᠭᠤᠴᠢ ᠶᠠᠷᠢᠳᠠᠭ ᠰᠠᠶ᠋ᠢᠬᠠᠨ ᠰᠠᠶ᠋ᠢᠬᠠᠨ ᠪᠤᠭᠤᠷᠤᠯ ᠦ᠋ᠳ ᠣᠳᠣ ᠪᠣᠯᠴᠢᠬᠠᠵᠤ
ᠬᠤᠷᠢᠮ ᠲᠥᠷᠥ ᠶ᠋ᠢᠨ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠳᠣᠯᠣᠭᠠᠨ ᠨᠣᠲ ᠠ᠋ᠴᠠ ᠠᠷᠢᠯᠴᠢᠬᠠᠵᠤ
ᠭᠠᠯ ᠶ᠋ᠢᠠᠨ ᠲᠠᠬᠢᠬᠤ ᠪᠠᠨ ᠣᠭᠣᠷᠴᠢᠬᠠᠵᠤ
ᠭᠠᠳᠠᠨᠠ ᠳᠠᠯᠠᠩ ᠲᠠᠢ ᠠᠷᠭᠠᠯ ᠳᠡᠭᠡᠷᠡ ᠪᠥᠪᠡᠭᠡᠯᠵᠢ ᠳᠤᠤᠭᠠᠷᠬᠤ ᠪᠠᠨ ᠴᠤ᠌ ᠪᠠᠶ᠋ᠢᠴᠢᠬᠠᠵᠤ
ᠰᠠᠭᠠᠬᠠᠯᠲᠠ ᠶ᠋ᠢᠨ ᠮᠠᠯ ᠶ᠋ᠢᠠᠨ ᠪᠡᠯᠴᠢᠭᠡᠷ ᠡᠴᠡ ᠪᠡᠨ ᠡᠯᠳᠡᠳᠡᠭ ᠪᠣᠯᠵᠤ
ᠲᠣᠭᠣᠨᠣ ᠪᠠᠷ ᠥᠩᠭᠡᠶ᠋ᠢᠭᠰᠡᠨ ᠨᠠᠷᠠ
ᠲᠣᠭᠣᠷᠢᠭᠤᠯ ᠰᠢᠷᠢᠳᠡᠭ ᠳᠡᠭᠡᠭᠦᠷ ᠬᠣᠶ᠋ᠢᠮᠣᠷ ᠲᠡᠮᠲᠡᠷᠢᠨ ᠠᠶᠠᠯᠠᠬᠤ ᠪᠠᠨ ᠪᠠᠶ᠋ᠢᠴᠢᠬᠠᠵᠤ
ᠴᠠᠢ ᠪᠠᠨ ᠤᠤᠭᠤᠬᠤ ᠳ᠋ᠤ᠌ ᠪᠠᠨ ᠠᠪᠤ ᠮᠢᠨᠢ ᠰᠠᠨᠠᠭᠠ ᠠᠯᠳᠠᠳᠠᠭ ᠪᠣᠯᠵᠤ
ᠴᠢᠯᠥᠭᠡ ᠯᠡ ᠭᠠᠷᠪᠠᠯ ᠣᠪᠣᠭᠠ ᠱᠠᠩᠰᠢ ᠪᠠᠨ ᠲᠣᠭᠣᠷᠢᠨ ᠠᠯᠬᠤᠳᠠᠭ ᠪᠣᠯᠵᠤ
ᠪᠤᠷᠭᠠᠰᠤᠨ ᠮᠣᠷᠢ ᠲᠠᠢ ᠬᠡᠦᠬᠡᠳ ᠨᠠᠰᠤ ᠮᠢᠨᠢ ᠳᠡᠩᠳᠡᠭᠦᠦ ᠡᠷᠢᠭᠳᠡᠳᠡᠭ ᠪᠣᠯᠵᠤ
ᠪᠤᠩᠬᠤᠨ ᠡᠩᠭᠡᠷ ᠦ᠋ᠨ ᠮᠢᠨᠢ ᠪᠣᠲᠠᠨ ᠪ ᠬᠦᠷᠪᠡᠯ ᠦᠶᠡ ᠶ᠋ᠢᠨ ᠪᠠᠭᠠᠴᠤᠤᠯ ᠰᠢᠭ᠋ ᠰᠠᠨᠠᠭᠳᠠᠳᠠᠭ ᠪᠣᠯᠵᠤ
ᠬᠣᠯᠠ ᠶ᠋ᠢᠨ ᠪᠠᠷᠠ ᠬᠠᠷᠠᠬᠤ ᠪᠠᠷ ᠡᠪᠦᠯᠵᠢᠶᠡᠨ ᠪ ᠮᠢᠨᠢ ᠪᠣᠷᠣ ᠭᠡᠷ ᠦᠭᠡᠢᠯᠡᠭᠳᠡᠳᠡᠭ ᠪᠣᠯᠵᠤ
ᠬᠣᠵᠢᠮ ᠦ᠋ᠨ ᠲᠤᠬᠠᠢ ᠪᠣᠳᠣᠬᠤ ᠠ᠋ᠴᠠ ᠪᠠᠨ ᠬᠠᠷᠠ ᠳᠠᠷᠤᠲᠠᠯᠠ ᠠᠶᠤᠳᠠᠭ ᠪᠣᠯᠵᠤ
ᠬᠤᠭᠤᠷ ᠦ᠋ᠨ ᠬᠣᠶᠠᠷ ᠤᠲᠠᠰᠤ ᠳᠤᠷᠠᠳᠬᠠᠯ ᠳ᠋ᠠᠭᠠᠨ ᠪᠦᠳᠦᠴᠢᠨ ᠲᠠᠰᠤᠷᠠᠳᠠᠭ ᠪᠣᠯᠵᠤ
ᠨᠠᠭᠤᠷ ᠦ᠋ᠨ ᠬᠣᠶᠠᠷ ᠠᠩᠭᠢᠷ ᠬᠠᠭᠠᠴᠠᠯ ᠳ᠋ᠠᠭᠠᠨ ᠭᠤᠨᠢᠨ ᠤᠬᠢᠯᠠᠳᠠᠭ ᠪᠣᠯᠵᠤ
ᠬᠠᠨᠠ ᠶ᠋ᠢᠨ ᠦᠲᠡᠭᠡᠷᠢ ᠬᠤᠷᠢᠶᠠᠯᠬ᠋ᠠ ᠳᠣᠲᠣᠷᠠ ᠪᠠᠨ ᠲᠠᠰᠤᠷᠠᠳᠠᠭ ᠪᠣᠯᠵᠤ
ᠬᠠᠶ᠋ᠢᠴᠢᠨ ᠪ ᠠᠮᠠ ᠡᠷᠭᠢᠨᠡᠭ ᠳᠣᠣᠭᠤᠷ ᠠᠩᠭᠠᠶ᠋ᠢᠳᠠᠭ ᠴᠤ᠌ ᠪᠣᠯᠵᠤ
ᠴᠠᠭᠠᠨ ᠢᠰᠡᠭᠡᠢ ᠭᠤᠲᠤᠯ ᠦ᠋ᠨ ᠤᠯᠠ ᠳ᠋ᠤ᠌ ᠳᠡᠪᠰᠡᠭᠳᠡᠳᠡᠭ ᠪᠣᠯᠵᠤ
ᠴᠠᠭ ᠥᠭᠡᠷᠡ ᠪᠣᠯᠴᠢᠬᠠᠵᠤ ᠁
2003 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠿᠦᠩ ᠰᠢ
ᠬᠢᠨᠠᠭᠴᠢ ᠄ ᠪᠠᠯᠵᠢ ᠪᠠᠭ᠍ᠰᠢ