ᠲᠥᠷᠥ ᠶ᠋ᠢᠨ ᠶᠡᠬᠡ ᠨᠡᠭᠦᠳᠡᠯ - ᠰᠤᠩᠷᠠᠢ Төрийн их нүүдэл - Сунрай
418ᠲᠥᠷᠥ ᠶ᠋ᠢᠨ ᠶᠡᠬᠡ ᠨᠡᠭᠦᠳᠡᠯ
ᠰᠤᠩᠷᠠᠢ
— ᠶᠡᠬᠡ ᠶᠤᠸᠠᠨ ᠤ᠋ ᠲᠥᠷᠥ ᠶ᠋ᠢᠨ ᠪᠣᠭᠣᠮᠲᠠ ᠡᠴᠡ ᠭᠠᠷᠤᠭᠰᠠᠨ ᠤ᠋
640 ᠵᠢᠯ ᠦ᠋ᠨ ᠣᠢ ᠳ᠋ᠤ᠌ ᠵᠣᠷᠢᠭᠤᠯᠪᠠ ᠃
ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤᠨ ᠵᠢᠷᠠᠨ ᠨᠠᠢ᠍ᠮᠠᠨ ᠣᠨ ᠤ᠋ ᠢᠯᠡᠭᠦᠦ ᠳᠣᠯᠣᠭᠠᠨ ᠰᠠᠷᠠ ᠳ᠋ᠤ᠌
ᠮᠢᠨᠦ ᠡᠪᠦᠭᠡ ᠳᠠᠢᠳᠤ ᠡᠴᠡ ᠰᠠᠯᠵᠤ ᠰᠢᠷᠠ ᠲᠠᠯᠠ ᠶ᠋ᠢ ᠵᠣᠷᠢᠪᠠ
ᠮᠢᠨᠳᠠᠰᠤᠨ ᠵᠢᠯᠣᠭᠣ ᠡᠯᠡᠩᠬᠡᠢᠷᠡᠨ ᠰᠤᠨᠵᠤ ᠳᠥᠷᠥᠭᠡᠨ ᠰᠤᠷ ᠲᠠᠰᠤᠷᠬᠠᠢᠲᠠᠨ
ᠮᠠᠩᠨᠤᠭ ᠳᠡᠪᠡᠯ ᠰᠡᠮᠡᠷᠡᠨ ᠵᠤᠯᠠᠷᠠᠵᠤ ᠮᠠᠯᠠᠭᠠᠢ ᠭᠤᠲᠤᠯ ᠭᠬᠢᠷᠲᠦᠵᠦᠬᠦᠢ᠂
ᠮᠠᠩᠬᠠᠨ ᠵᠠᠮ ᠡᠯᠦᠢᠷᠡᠨ ᠡᠵᠡᠭᠦᠢᠷᠡᠵᠦ ᠠᠶᠠᠨ ᠤ᠋ ᠴᠤᠪᠤᠭᠠ ᠤᠷᠲᠤ
ᠮᠠᠯ ᠤᠨᠤᠭᠠ ᠮᠥᠭᠡᠷᠡᠨ ᠣᠷᠢᠯᠠᠯᠳᠤᠵᠤ ᠠᠮᠤ ᠬᠦᠨᠡᠰᠦ ᠬᠣᠮᠰᠠ
ᠮᠠᠭᠰᠢᠨ ᠪᠥᠵᠢᠭᠯᠡᠭᠰᠡᠨ ᠠᠭᠤᠯᠠ ᠤᠰᠤᠨ ᠡᠳᠦᠭᠡ ᠲᠣᠪ ᠳᠤᠭᠤᠢ ᠳᠦᠩᠰᠦᠢᠯᠴᠡᠨ
ᠮᠠᠨᠠᠷᠠᠭᠰᠠᠨ ᠪᠣᠷᠣ ᠲᠣᠭᠣᠰᠣᠨ ᠤ᠋ ᠳᠤᠮᠳᠠᠬᠢ ᠶᠡᠬᠡ ᠨᠡᠭᠦᠳᠡᠯ ᠢ᠋ ᠪᠠᠷᠠᠯᠠᠨᠠᠮ!
ᠲᠥᠷᠥ ᠶ᠋ᠢᠨ ᠲᠠᠮᠠᠭᠠ ᠵᠢᠷᠦᠬᠡᠨ ᠲᠦᠰᠢᠶᠡ ᠡᠪᠦᠷ ᠳᠣᠲᠣᠷᠠ ᠨᠢ ᠲᠦᠭᠳᠦᠢᠵᠦ
ᠲᠥᠷᠥᠭᠰᠡᠨ ᠨᠤᠲᠤᠭ ᠠᠯᠤᠰ ᠲᠡᠷᠲᠡᠭᠡ ᠬᠥᠬᠡᠷᠡᠨ ᠬᠦᠷᠡᠩᠲᠦᠨ ᠬᠠᠷᠠᠭᠳᠠᠨᠠᠮ
ᠲᠦᠮᠡ ᠳᠥᠷᠪᠡᠨ ᠮᠢᠩᠭᠠ ᠪᠤᠵᠢᠭᠢᠨᠠᠭᠰᠠᠨ ᠴᠠᠭ ᠲᠥᠷᠥ ᠶ᠋ᠢᠨ ᠦᠢᠮᠡᠭᠡᠨ ᠳ᠋ᠦ᠍
ᠲᠥᠪᠯᠡᠨ ᠰᠠᠭᠤᠷᠢᠰᠢᠭᠰᠠᠨ ᠨᠡᠢᠰᠯᠡᠯ ᠨᠢᠭᠡᠨᠲᠡ ᠲᠡᠢᠨ ᠦ᠌ ᠤᠲᠤᠭᠠᠨᠠ ᠵᠠᠯᠭᠢᠭᠳᠠᠪᠠᠢ
ᠤᠷᠢᠳᠤ ᠶ᠋ᠢᠨ ᠪᠠᠭᠠᠲᠤᠳ ᠤ᠋ᠨ ᠪᠦᠲᠦᠭᠡᠭᠰᠡᠨ ᠦᠢᠯᠡᠰ ᠬᠠᠷᠠᠬᠤ ᠶ᠋ᠢᠨ ᠵᠠᠭᠤᠷᠠ ᠬᠠᠵᠠᠢᠵᠤ
ᠤᠯᠠᠭᠠᠨ ᠴᠢᠰᠤ ᠪᠠᠷ ᠪᠤᠰᠬᠠᠭᠰᠠᠨ ᠲᠥᠷᠥ ᠦᠵᠡᠵᠦ ᠪᠠᠢᠲᠠᠯᠠ ᠵᠠᠳᠠᠷᠠᠪᠠ
ᠤᠬᠠᠭᠠᠨᠲᠤ ᠬᠠᠭᠠᠨ ᠤ᠋ ᠤᠬᠠᠭᠠᠨ ᠭᠡᠵᠦ ᠬᠡᠳᠦᠢ ᠪᠠᠢᠭᠰᠠᠨ ᠴᠤ᠌ ᠭᠦᠢᠴᠡᠭᠰᠡᠨ ᠦᠭᠡᠢ
ᠤᠯᠤᠰ ᠭᠦᠷᠦᠨ ᠵᠠᠰᠠᠭ ᠵᠠᠰᠠᠯᠲᠠ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠲᠠᠮᠲᠤᠭᠷᠠᠪᠠᠢ!
ᠭᠡᠮᠰᠢᠯ ᠰᠢᠯᠦᠭ ᠢ᠋ᠶ᠋ᠡᠨ ᠲᠡᠷᠡ ᠮᠠᠨᠢ ᠂ ᠮᠣᠷᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠢᠴᠢᠵᠦ
ᠭᠡᠷ ᠦ᠋ᠨ ᠴᠠᠳᠢᠭ ᠤ᠋ᠨ ᠢ᠋ᠶ᠋ᠠᠨ ᠬᠠᠭᠤᠳᠠᠰᠤᠨ ᠳ᠋ᠤ᠌ ᠬᠠᠪᠴᠢᠭᠤᠯᠵᠤ ᠲᠠᠯᠪᠢᠭᠰᠠᠨ ᠬᠡᠷᠡᠭ
ᠭᠡᠨᠡᠳᠡᠯ ᠂ ᠡᠨᠳᠡᠯ ᠂ ᠬᠠᠭᠠᠴᠠᠯ ᠡᠴᠡ ᠪᠣᠯᠤᠭᠰᠠᠨ ᠮᠢᠩᠭᠠᠨ ᠣᠨ ᠤ᠋ ᠬᠠᠷᠠᠮᠰᠠᠯ ᠨᠢ
ᠭᠡᠭᠡᠨ ᠮᠡᠷᠭᠡᠨ ᠬᠣᠢᠴᠢᠰ ᠲᠤᠨᠢ ᠰᠤᠷᠭᠠᠮᠵᠢ ᠪᠣᠯᠤᠭ ᠠ᠋ ᠭᠡᠰᠡᠨ ᠪᠢᠵᠡ!
ᠶᠤᠸᠠᠨ ᠤ᠋ ᠲᠥᠷᠥ ᠶ᠋ᠢᠨ ᠤᠮᠠᠷᠠᠰᠢ ᠨᠡᠭᠦᠭᠰᠡᠨ ᠤᠭ ᠦᠨᠳᠦᠰᠦ ᠶ᠋ᠢ ᠰᠢᠨᠵᠢᠯᠡᠪᠡᠯ
ᠶᠠᠮᠠᠷ ᠨᠢᠭᠡᠨ ᠭᠡᠨᠡᠳᠲᠡ ᠶ᠋ᠢᠨ ᠬᠦᠴᠦᠨᠡ ᠢᠪ ᠲᠦᠯᠬᠢᠭᠳᠡᠭᠰᠡᠨ ᠪᠤᠰᠤ
ᠢᠯᠵᠠᠷᠠᠯ ᠳᠣᠷᠣᠢᠲᠠᠯ ᠬᠦᠨᠳᠦ ᠨᠣᠴᠢᠲᠠᠢ ᠂ ᠳᠣᠲᠣᠭᠠᠳᠤ ᠵᠥᠷᠢᠴᠡᠯ ᠶᠡᠬᠡ
ᠶᠠᠷᠰᠢᠭ ᠲᠦᠪᠡᠭ ᠳᠠᠪᠬᠤᠷ ᠳᠠᠪᠬᠤᠷ ᠶᠠᠪᠤᠳᠠᠯ ᠪᠦᠬᠦᠨᠡ ᠴᠠᠯᠠᠭᠠᠢᠳᠠᠪᠠ ᠃
ᠲᠥᠷᠥ ᠶ᠋ᠢᠨ ᠡᠵᠡᠨ ᠲᠥᠷᠥ ᠳ᠋ᠡᠭᠡᠨ ᠬᠠᠨᠳᠤᠬᠤ ᠦᠭᠡᠢ ᠲᠡᠮᠦᠷ ᠴᠠᠭᠠᠷᠢᠭ ᠤᠷᠠᠯᠠᠵᠤ
ᠲᠦᠰᠢᠮᠡᠯ ᠰᠠᠢᠳ ᠵᠠᠰᠠᠭ ᠲᠤᠷ ᠦᠢᠯᠡᠴᠢᠯᠡᠬᠦ ᠦᠭᠡᠢ ᠨᠠᠮ ᠰᠦᠯᠪᠡᠭᠡ ᠪᠠᠢᠭᠤᠯᠤᠨᠠ ᠃
ᠲᠦᠮᠡᠨ ᠢᠷᠭᠡᠳ ᠦ᠋ᠨ ᠣᠷᠣᠰᠢᠨ ᠲᠣᠭᠲᠠᠨᠢᠯ ᠲᠡᠳᠡᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠫᠠᠳ ᠦᠭᠡᠢ
ᠲᠥᠷᠥᠭᠰᠡᠨ ᠪᠡᠶᠡ ᠶ᠋ᠢᠨ ᠠᠮᠤᠷ ᠵᠢᠷᠭᠠᠯ ᠢ᠋ ᠶᠠᠭᠤᠨ ᠡᠴᠡ ᠴᠤ᠌ ᠡᠷᠬᠢᠮ ᠪᠣᠯᠭᠠᠵᠤᠬᠤᠢ ᠃
ᠡᠴᠢᠭᠡ ᠬᠥᠪᠡᠭᠦᠨ ᠡᠰᠡᠷᠭᠦᠯᠡᠨ ᠲᠤᠯᠵᠤ ᠬᠡᠨ ᠬᠡᠨ ᠢ᠋ᠶ᠋ᠡᠨ ᠲᠠᠭᠠᠰᠢᠶᠠᠬᠤ ᠦᠭᠡᠢ
ᠡᠨᠳᠡ ᠲᠡᠨᠳᠡᠬᠢ ᠵᠠᠩᠵᠤᠨ ᠲᠦᠰᠢᠮᠡᠳ ᠠᠯᠢ ᠠᠯᠢᠨ ᠢ᠋ᠶ᠋ᠠᠨ ᠲᠣᠭᠣᠬᠤ ᠦᠭᠡᠢ
ᠡᠢᠮᠦ ᠲᠡᠢᠮᠦ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠨᠢᠭᠡᠳᠦᠯ ᠲᠥᠪᠯᠡᠷᠡᠯ ᠪᠠᠢᠬᠤ ᠦᠭᠡᠢ
ᠢᠲᠡᠭᠡᠯ ᠵᠢᠷᠤᠮ ᠂ ᠬᠠᠤᠯᠢ ᠵᠠᠷᠯᠠᠯ ᠭᠡᠵᠦ ᠵᠠᠰᠠᠭ ᠨᠣᠶᠠᠳ ᠣᠢᠰᠢᠶᠠᠬᠤ ᠦᠭᠡᠢ ᠃
ᠭᠠᠯᠵᠠᠭᠤ ᠡᠲᠡᠭᠡᠳ ᠲᠣᠬᠢᠶᠠᠯ ᠢ᠋ ᠵᠠᠪᠰᠢᠨ ᠵᠢᠳᠠ ᠰᠡᠯᠡᠮᠡ ᠡᠷᠭᠦᠯᠴᠡᠵᠦ
ᠭᠠᠵᠢᠭᠤ ᠰᠤᠷᠭᠠᠯ ᠢ᠋ᠶ᠋ᠠᠷ ᠬᠥᠮᠦᠰ ᠢ᠋ ᠮᠡᠬᠡᠯᠡᠨ ᠦᠨᠳᠦᠰᠦᠲᠡᠨ ᠦ᠌ ᠵᠥᠷᠢᠴᠡᠯ ᠢ᠋ ᠬᠤᠷᠴᠠᠳᠬᠠᠪᠠ
ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠬᠠᠮᠰᠠᠭᠠ ᠨᠡᠢᠯᠡᠨ ᠳᠠᠢᠳᠤ ᠶ᠋ᠢ ᠪᠤᠯᠢᠶᠠᠨ ᠡᠵᠡᠯᠡᠵᠦ
ᠭᠠᠯ ᠤᠲᠤᠭᠠ ᠲᠡᠭᠷᠢ ᠳ᠋ᠦ᠍ ᠲᠤᠯᠵᠤ ᠶᠠᠯᠠ ᠨᠢᠭᠦᠯ ᠤᠯᠠᠩᠭᠠᠰᠪᠠ
ᠱᠠᠩᠳᠤ ᠬᠣᠲᠠ ᠶ᠋ᠢ ᠭᠠᠯᠳᠠᠨ ᠳᠠᠭᠤᠰᠬᠠᠵᠤ ᠢᠩᠴᠠᠩ ᠪᠠᠯᠭᠠᠰᠤᠨ ᠢ᠋ ᠲᠦᠢᠪᠡᠭᠡᠨ
ᠰᠢᠷᠠ ᠲᠠᠯᠠ ᠶ᠋ᠢ ᠭᠢᠰᠬᠢᠯᠡᠨ ᠲᠠᠯᠬᠢᠵᠤ ᠬᠤᠯᠠᠨ ᠰᠢᠷᠭᠠ ᠶ᠋ᠢ ᠰᠣᠴᠢᠭᠠᠪᠠ
ᠱᠠᠰᠢᠨ ᠰᠢᠲᠦᠯᠭᠡ ᠨᠣᠮ ᠰᠤᠳᠤᠷ ᠠᠯᠢ ᠪᠦᠬᠦᠨ ᠢ᠋ ᠴᠥᠯᠪᠡᠵᠦ
ᠰᠢᠷᠬᠠᠯᠠᠵᠤ ᠬᠣᠴᠣᠷᠤᠭᠰᠠᠨ ᠬᠥᠮᠦᠨ ᠴᠢᠯᠠᠭᠤᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠬᠦᠷᠲᠡᠯᠡ ᠴᠠᠪᠴᠢᠵᠤᠬᠤᠢ
ᠬᠠᠯᠠᠭᠤᠨ ᠵᠠᠭᠤᠷᠠ ᠪᠠᠨ ᠨᠢᠭᠡᠳᠬᠦ ᠦᠭᠡᠢ ᠬᠤᠪᠢ ᠬᠤᠪᠢ ᠪᠠᠨ ᠬᠥᠭᠡᠭᠡᠴᠡᠯᠳᠦᠪᠡᠯ
ᠬᠠᠮᠤᠭ ᠪᠦᠬᠦᠨ ᠢ᠋ᠶ᠋ᠡᠨ ᠠᠯᠳᠠᠬᠤ ᠶ᠋ᠢᠨ ᠳᠠᠭᠠᠤ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠵᠠᠯᠭᠢᠭᠳᠠᠨᠠᠮ!
ᠬᠠᠷᠢ ᠭᠦᠷᠦᠨ ᠢ᠋ ᠲᠦᠪᠰᠢᠳᠬᠡᠬᠦ ᠳᠤᠮᠳᠠ ᠬᠠᠷᠭᠢᠰ ᠵᠠᠯᠢᠬᠠᠢ ᠶ᠋ᠢ ᠦᠯᠡᠳᠡᠭᠡᠪᠡᠯ
ᠬᠠᠷᠢᠨ ᠴᠤ᠌ ᠬᠣᠣᠷ ᠤ᠋ᠨ ᠦᠨᠳᠦᠰᠦ ᠪᠣᠯᠵᠤ ᠬᠠᠲᠠᠭᠤ ᠬᠠᠷᠢᠭᠤ ᠣᠯᠬᠤ ᠶᠤᠮ ᠪᠠᠢᠨᠠ ᠃
ᠲᠥᠷᠥ ᠶ᠋ᠢᠨ ᠶᠡᠬᠡ ᠣᠰᠣᠯ ᠡᠴᠡ ᠶᠡᠬᠡ ᠨᠡᠭᠦᠳᠡᠯ ᠬᠥᠳᠡᠯᠵᠦ
ᠲᠡᠦᠬᠡ ᠶ᠋ᠢᠨ ᠨᠢᠭᠡᠨ ᠬᠠᠭᠤᠳᠠᠰᠤᠨᠠ ᠭᠡᠮᠰᠢᠯ ᠪᠣᠯᠤᠨ ᠬᠣᠴᠣᠷᠪᠠᠢ
ᠲᠡᠷᠡ ᠶᠡᠬᠡ ᠭᠡᠮᠰᠢᠯ ᠡᠴᠡ ᠶᠡᠬᠡ ᠤᠬᠠᠭᠠᠷᠠᠯ ᠤᠷᠭᠤᠵᠤ
ᠲᠦᠷᠢᠮᠡᠬᠡᠢ ᠬᠠᠷᠭᠢᠰ ᠤ᠋ᠨ ᠡᠰᠡᠷᠭᠦ ᠬᠡᠷᠡᠮ ᠪᠣᠯᠤᠨ ᠬᠥᠨᠳᠡᠯᠢᠰᠪᠡᠢ!
ᠶᠤᠸᠠᠨ ᠤ᠋ ᠲᠥᠷᠥ ᠳᠠᠢᠳᠤ ᠡᠴᠡ ᠨᠡᠭᠦᠭᠰᠡᠨ ᠴᠦ᠍ ᠮᠣᠩᠭᠣᠯ ᠤ᠋ᠨ ᠥᠨᠳᠥᠷᠯᠢᠭ ᠲᠦ᠍ ᠲᠥᠪᠯᠡᠨ
ᠶᠡᠷᠦ ᠪᠤᠰᠤ ᠰᠦᠷ ᠬᠦᠴᠦᠨ ᠢ᠋ᠶ᠋ᠡᠷ ᠬᠡᠳᠦᠨ ᠵᠠᠭᠤᠨ ᠢ᠋ ᠳᠡᠮᠵᠢᠪᠡ
ᠢᠩᠽᠦ᠋ᠩ ᠬᠠᠭᠠᠨ ᠢ᠋ ᠪᠠᠷᠢᠴᠠᠭᠠᠯᠠᠨ ᠮᠢᠩ ᠦ᠋ᠨ ᠰᠠᠭᠤᠷᠢ ᠶ᠋ᠢ ᠭᠤᠢᠪᠢᠭᠤᠯᠵᠤ
ᠶᠢᠷᠲᠢᠨᠴᠦ ᠶ᠋ᠢᠨ ᠬᠠᠭᠠᠰ ᠢ᠋ ᠡᠵᠡᠷᠬᠡᠨ 《 ᠤᠮᠠᠷᠠᠲᠤ ᠶᠤᠸᠠᠨ 》 ᠭᠡᠮᠡᠨ ᠠᠯᠳᠠᠷᠰᠢᠪᠠᠢ
ᠬᠣᠵᠢᠮ ᠤ᠋ᠨ ᠦᠷᠡᠰ ᠨᠢ ᠲᠡᠦᠬᠡ ᠶ᠋ᠢᠨ ᠬᠡᠷᠡᠭ ᠢ᠋ᠶ᠋ᠡᠷ ᠰᠤᠷᠭᠠᠮᠵᠢ ᠠᠪᠤᠭᠰᠠᠨ ᠪᠥᠭᠡᠰᠦ
ᠬᠣᠢᠨᠠ ᠂ ᠡᠮᠦᠨᠡ ᠂ ᠵᠡᠭᠦᠨ ᠂ ᠪᠠᠷᠠᠭᠤᠨ ᠭᠡᠵᠦ ᠵᠦᠭ ᠵᠦᠭ ᠲᠡᠭᠡᠨ ᠵᠢᠳᠬᠦᠯᠳᠦᠬᠦ ᠤᠤ?
ᠬᠣᠭᠣᠷᠣ ᠬᠣᠭᠣᠷᠣᠨᠳᠣ ᠪᠠᠨ ᠬᠠᠭᠠᠴᠠᠨ ᠵᠠᠳᠠᠷᠠᠵᠤ ᠡᠷᠬᠡ ᠠᠰᠢᠭ ᠲᠡᠮᠡᠴᠡᠯᠳᠦᠭᠰᠡᠨ ᠡᠴᠡ
ᠬᠤᠢᠬᠤᠷ ᠮᠠᠨᠵᠤ ᠶ᠋ᠢᠨ ᠤᠷᠠᠬᠠᠨ ᠳ᠋ᠤ᠌ ᠤᠨᠠᠵᠤ ᠬᠠᠷᠢ ᠶ᠋ᠢᠨ ᠪᠣᠭᠣᠯ ᠪᠣᠯᠵᠤᠬᠤᠢ!
ᠣᠷᠴᠢᠮ ᠤ᠋ᠨ ᠵᠢᠯ ᠡᠴᠡ ᠮᠣᠩᠭᠣᠯ ᠣᠷᠣᠨ ᠶᠠᠪᠤᠬᠤ ᠳᠣᠳᠣᠮ ᠢᠪᠴᠤᠷᠠᠵᠤ
ᠣᠳᠣ ᠪᠣᠯᠬᠤ ᠳ᠋ᠤ᠌ ᠲᠥᠷᠥ ᠪᠠᠢᠲᠤᠭᠠᠢ ᠭᠡᠷ ᠨᠡᠭᠦᠬᠦ ᠳ᠋ᠦ᠍ ᠴᠦ᠍ ᠬᠦᠴᠢᠷᠳᠡᠪᠡ
ᠣᠷᠣᠰᠢᠨ ᠰᠠᠭᠤᠷᠢᠰᠢᠭᠴᠢ ᠮᠠᠯᠴᠢᠳ ᠬᠦᠷᠲᠡᠯᠡ ᠰᠣᠶᠣᠯ ᠠᠬᠤᠢ ᠪᠠᠨ ᠠᠯᠳᠠᠵᠤ
ᠣᠷᠣᠨ ᠨᠤᠲᠤᠭ ᠡᠴᠡ ᠪᠡᠨ ᠠᠯᠪᠠ ᠪᠠᠷ ᠰᠢᠬᠠᠭᠳᠠᠨ ᠲᠡᠨᠦᠭᠦᠯ ᠢᠷᠭᠡᠳ ᠪᠣᠯᠵᠤ ᠪᠣᠢ!
ᠪᠦᠯᠬᠦᠮᠳᠡᠯ ᠨᠢᠭᠲᠠᠷᠠᠯ ᠰᠤᠯᠠᠷᠠᠭᠰᠠᠭᠠᠷ ᠡᠢᠮᠦ ᠪᠣᠯᠳᠠᠭ ᠤ᠋ᠨ ᠰᠢᠯᠲᠠᠭᠠᠨ ᠢ᠋
ᠪᠤᠭᠤᠷᠤᠯ ᠲᠡᠦᠬᠡ ᠮᠠᠨ ᠳ᠋ᠤ᠌ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠰᠢᠪᠡᠨᠡᠭᠰᠡᠭᠡᠷ
ᠪᠣᠭᠳᠠ ᠶ᠋ᠢᠨ ᠠᠷᠢᠭᠤᠨ ᠰᠤᠷᠭᠠᠯ ᠢ᠋ᠶ᠋ᠠᠷ ᠦᠢᠯᠡᠰ ᠦ᠋ᠨ ᠮᠥᠷ ᠢ᠋ᠶ᠋ᠡᠨ ᠬᠥᠲᠥᠯᠬᠦ ᠶ᠋ᠢ
ᠪᠣᠰᠤᠭᠠ ᠰᠣᠶᠣᠯᠲᠤ ᠤᠭᠰᠠᠭᠠᠲᠠᠨ ᠮᠠᠨᠢ ᠠᠩᠬᠠᠷᠤᠨ ᠠᠵᠢᠶᠠᠪᠠᠰᠤ ᠵᠣᠬᠢᠮᠤᠢ!
ᠨᠡᠷᠡ ᠬᠦᠨᠳᠦᠲᠦ ᠲᠡᠦᠬᠡ ᠶ᠋ᠢᠨ ᠠᠪᠤᠷᠭᠤ ᠰᠣᠩᠷᠠᠢ ᠪᠠᠭᠰᠢ ᠶ᠋ᠢᠨ
ᠪᠢᠴᠢᠵᠦ ᠦᠯᠡᠳᠡᠭᠡᠭᠰᠡᠨ ᠪᠦᠲᠦᠭᠡᠯ ᠢ᠋ ᠬᠦᠷᠭᠡᠪᠡ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠪᠤᠤ ᠴᠢᠩ ᠬᠤ᠌
ᠬᠢᠨᠠᠭᠴᠢ ᠄ ᠮᠥᠴᠢᠷ ᠪᠠᠭᠰᠢ