ᠵᠠᠷᠢᠮ ᠣᠷᠣᠢ – ᠷ · ᠴᠣᠢᠨᠣᠮ Зарим орой – Р · Чойном
299ᠵᠠᠷᠢᠮ ᠣᠷᠣᠢ
ᠲᠠᠷᠴᠢᠯᠠᠵᠤ ᠨᠠᠮᠠᠶ᠋ᠢ ᠶᠠᠭᠠᠬᠢᠵᠤ ᠵᠣᠪᠠᠵᠤ ᠪᠠᠶ᠋ᠢᠭᠠ ᠶ᠋ᠢ
ᠲᠠᠨᠢᠯ ᠪᠦᠰᠡᠭᠦᠢ ᠮᠢᠨᠢ ᠮᠡᠳᠡᠳᠡᠭ ᠴᠦ᠍ ᠪᠣᠯᠤᠭᠠᠰᠠᠢ
ᠲᠠᠶ᠋ᠢᠪᠤᠩ ᠰᠠᠶ᠋ᠢᠬᠠᠨ ᠣᠷᠣᠢ ᠂ ᠭᠠᠳᠠᠭᠠ ᠠᠭᠤᠯᠵᠠᠭᠠᠳ
— ᠲᠠ ᠶᠠᠭᠠᠬᠢᠭᠠ ᠪᠣᠢ? ᠭᠡᠵᠦ ᠠᠰᠠᠭᠤᠳᠠᠭ ᠴᠤ᠌ ᠪᠣᠯᠤᠭᠠᠰᠠᠢ
ᠬᠥᠨᠳᠡᠯᠡᠨ ᠡᠴᠡ ᠨᠢ ᠴᠢᠮᠠᠶ᠋ᠢ ᠬᠠᠷᠠᠬᠤ ᠳ᠋ᠤ᠌
ᠬᠥᠯ ᠴᠢᠨᠢ ᠭᠠᠵᠠᠷ ᠬᠦᠷᠬᠦ ᠥᠬᠡᠢ ᠯᠠ ᠶᠠᠪᠤᠬᠤ ᠶᠤᠮ
ᠬᠥᠭᠵᠢᠯᠲᠡᠢ ᠴᠣᠪᠣᠭᠣ ᠠᠭᠠᠰᠢᠨ ᠪ ᠴᠢᠨᠢ ᠴᠠᠭᠠᠨᠠ
ᠬᠦᠨᠲᠡᠭᠦᠷ ᠭᠤᠨᠢᠬ ᠪᠠᠶ᠋ᠢᠳᠠᠭ ᠶᠤᠮ ᠤᠤ ᠂ ᠬᠡᠨ ᠮᠡᠳᠡᠬᠦ ᠪᠣᠢ?
ᠪᠦᠰᠡᠲᠡᠢ ᠪᠦᠰᠡᠭᠦᠢ ᠬᠥᠮᠦᠨ ᠂ ᠪᠡᠶᠡ ᠪᠡᠶᠡ ᠶ᠋ᠢᠨ ᠶ᠋ᠢᠡᠨ
ᠪᠦᠷ ᠨᠠᠷᠢᠨ ᠊ᠢ ᠶᠠᠮᠠᠷ ᠮᠡᠳᠡᠬᠦ ᠪᠢᠰᠢ!
ᠠᠯᠠᠭ ᠵᠢᠷᠦᠬᠡᠨ ᠪ ᠪᠡᠨ ᠢᠷᠣᠭᠠᠯ ᠊ᠢ ᠰᠢᠪᠬᠠᠵᠤ
ᠠᠯᠢ ᠠᠯᠢᠨ ᠳ᠋ᠠᠭᠠᠨ ᠶᠠᠮᠠᠷ ᠬᠡᠯᠡᠬᠦ ᠪᠢᠰᠢ ᠁
ᠬᠠᠷᠢᠨ ᠪᠢ ᠯᠠ ᠴᠢᠮᠠ ᠳ᠋ᠤ᠌ ᠶᠠᠷᠢᠮᠠᠷ ᠪᠠᠶ᠋ᠢᠨᠠ ᠂
ᠬᠠᠶ᠋ᠢᠬᠤᠷᠴᠤ ᠬᠡᠷᠪᠡ ᠰᠣᠨᠣᠰᠳᠠᠭ ᠰᠠᠨ ᠪᠣᠯ ᠴᠢᠨᠢ
ᠤᠷᠢᠳᠤ ᠬᠠᠷᠢᠨ ᠂ ᠰᠣᠨᠣᠰᠤᠶᠠ ᠬᠡᠰᠡᠨ ᠬᠥᠮᠦᠨ ᠪᠠᠶ᠋ᠢᠬᠤ ᠳ᠋ᠤ᠌
ᠠᠭᠤᠳᠠᠯᠵᠤ ᠶᠠᠷᠢᠬᠤ ᠳᠤᠷᠠ ᠥᠬᠡᠢ ᠯᠡ ᠪᠠᠶ᠋ᠢᠵᠤ ᠪᠢᠯᠡ ᠁
ᠣᠳᠣ ᠪᠢ ᠂ ᠭᠡᠷ ᠶ᠋ᠢᠡᠨ ᠰᠠᠨᠠᠭᠰᠠᠨ ᠬᠡᠦᠬᠡᠳ ᠰᠢᠭ᠌
ᠣᠷᠣᠢ ᠪᠣᠯᠬᠤ ᠪᠠᠷ ᠭᠠᠳᠠᠨᠠ ᠭᠠᠭᠴᠠ ᠪᠡᠷ ᠵᠣᠭᠰᠣᠬᠤ ᠶᠤᠮ
ᠪᠤᠲᠠᠷᠬᠠᠢ ᠮᠥᠩᠭᠥ ᠪᠡᠨ ᠴᠤᠪᠤᠭᠤᠯᠵᠤ ᠭᠡᠭᠡᠭᠰᠡᠨ ᠬᠥᠮᠦᠨ ᠰᠢᠭ᠌
ᠪᠤᠷᠤᠭᠤ ᠵᠥᠪ ᠦᠭᠡᠢ ᠭᠠᠵᠠᠷ ᠱᠠᠭᠠᠶ᠋ᠢᠭᠠᠳ ᠬᠡᠯᠲᠦᠷᠢᠬᠦ ᠶᠤᠮ᠃
ᠬᠡᠨ ᠨᠢᠭᠡᠨ ᠳ᠋ᠦ᠍ ᠣᠷᠣ ᠠᠯᠳᠠᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋
ᠭᠡᠩᠬᠢᠨᠡᠲᠡᠯᠡ ᠪᠡᠨ ᠰᠠᠨᠠᠭᠠ ᠠᠯᠳᠠᠬᠤ ᠶᠤᠮ
ᠬᠡᠨᠲᠡᠢ ᠳ᠋ᠤ᠌ ᠪᠢᠰᠢ᠂ ᠴᠦᠯᠡᠯᠭᠡ ᠳ᠋ᠦ᠍ ᠪᠠᠶ᠋ᠢᠭᠠ ᠶᠤᠮ ᠰᠢᠭ᠋
ᠬᠡᠴᠡᠭᠦᠬᠡᠨ ᠭᠠᠭᠴᠠᠭᠠᠷᠲᠠᠵᠠᠢ ᠳ᠋ᠠ ᠂ ᠪᠢ ᠴᠢᠨᠢ᠃
ᠵᠢᠷᠤᠭ ᠂ ᠰᠢᠯᠦᠭ ᠂ ᠨᠣᠮ ᠴᠤ᠌ ᠬᠡᠷᠡᠭ ᠦᠭᠡᠢ ᠂
ᠵᠠᠭᠤᠨ ᠨᠥᠬᠥᠳ ᠪᠠᠶ᠋ᠢᠭᠠᠳ ᠴᠤ᠌ ᠬᠡᠷᠡᠭ ᠦᠭᠡᠢ ᠂
ᠬᠠᠶᠠ ᠢᠩᠭᠢᠵᠦ ᠭᠠᠭᠴᠠᠭᠠᠷᠳᠠᠨ ᠭᠡᠶᠦᠷᠡᠬᠦ
ᠬᠠᠴᠢᠨ ᠡᠪᠡᠳᠴᠢᠨ ᠣᠷᠴᠢᠯᠠᠩ ᠳ᠋ᠤ᠌ ᠪᠠᠶ᠋ᠢᠳᠠᠭ ᠶᠤᠮ᠃
ᠣᠷᠴᠢᠯᠠᠩ ᠲᠡᠭᠡᠲᠡᠯᠡ ᠂ ᠠᠲᠠᠷᠠᠮᠠ ᠭᠠᠷᠭᠠᠭᠠᠳ
ᠣᠶ᠋ᠢᠷᠠᠲᠤᠭᠤᠯᠵᠤ ᠪᠢᠳᠡᠨ ᠊ᠢ ᠳᠠᠰᠬᠠᠬᠤ ᠥᠬᠡᠢ ᠶᠤᠮ ᠂
ᠣᠷᠣᠢ ᠣᠷᠣᠢ ᠳ᠋ᠠᠭᠠᠨ ᠴᠢ ᠪᠢᠳᠡ ᠬᠣᠶᠠᠷ
ᠨᠢᠭᠡ ᠨᠢ ᠭᠢᠯᠠᠯᠵᠠᠵᠤ᠂ ᠨᠢᠭᠡ ᠨᠢ ᠪᠦᠦᠲᠡᠶ᠋ᠢᠵᠦ ᠶᠠᠪᠤᠬᠤ ᠶᠤᠮ᠃
1974.6.10
《 ᠷ · ᠴᠣᠶ᠋ᠢᠨᠣᠮ ᠤᠨ ᠰᠢᠯᠦᠭ ᠵᠣᠬᠢᠶᠠᠯ ᠤᠨ ᠬᠤᠷᠢᠶᠠᠬᠤᠢ — 》
— ᠤᠶᠠᠩᠭᠠ ᠶ᠋ᠢᠨ ᠰᠢᠯᠦᠭ ᠠ᠋ᠴᠠ ᠬᠠᠭᠤᠯᠪᠠ ᠃
ᠪᠢ᠊ · ᠳᠠᠮᠳᠢᠨᠰᠦ᠋ᠷᠦᠩ ᠡᠮᠬᠢᠳᠬᠡᠨ ᠨᠠᠶ᠋ᠢᠷᠠᠭᠤᠯᠪᠠ ᠃
ᠬᠠᠷᠢᠭᠤᠴᠠᠭᠰᠠᠨ ᠨᠠᠶ᠋ᠢᠷᠠᠭᠤᠯᠤᠭᠴᠢ ᠄ ᠪᠣᠷᠣᠨᠣᠳ ᠳᠣᠷᠵᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠲᠣᠳᠣᠭᠡᠷᠡᠯ
ᠬᠢᠨᠠᠭᠴᠢ ᠄ ᠣᠳᠬᠠᠨᠰᠸᠠ