ᠭᠠᠵᠠᠷ ᠰᠢᠷᠣᠢ ᠳᠤ ᠪᠠᠨ ᠪᠢ ᠬᠠᠶ᠋ᠢᠷᠠᠲᠠᠢ – ᠱᠠᠭᠲᠠᠷ ᠦ᠋ᠨ ᠳᠤᠯᠮᠠ Газар шороондоо би хайртай – Шагдрын Дулам
355ᠭᠠᠵᠠᠷ ᠰᠢᠷᠣᠢ ᠳᠤ ᠪᠠᠨ ᠪᠢ ᠬᠠᠶ᠋ᠢᠷᠠᠲᠠᠢ
ᠱᠠᠭᠲᠠᠷ ᠦ᠋ᠨ ᠳᠤᠯᠮᠠ
ᠬᠥᠯ ᠳᠦ ᠣᠷᠣᠬᠤ ᠳᠦ ᠪᠠᠨ ᠤᠨᠠᠵᠤ ᠪᠣᠰᠤᠨ ᠮᠥᠷ ᠶ᠋ᠢᠡᠨ ᠭᠠᠷᠭᠠᠵᠤ
ᠬᠦᠢᠲᠡᠨ ᠪᠤᠯᠠᠭ ᠦ᠋ᠨ ᠤᠰᠤᠨ ᠠ᠋ᠴᠠ ᠨᠢ ᠰᠢᠲᠦ ᠪᠡᠨ ᠲᠡᠰᠢᠲᠡᠯᠡ ᠵᠠᠯᠭᠢᠯᠠᠵᠤ
ᠲᠠᠯᠠ ᠶ᠋ᠢᠨ ᠲᠣᠭᠣᠷᠤᠤ ᠂ ᠨᠠᠭᠤᠷ ᠦ᠋ᠨ ᠠᠩᠭᠢᠷ ᠦᠷᠭᠦᠭᠡᠵᠦ
ᠳᠠᠭᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠴᠡᠴᠡᠭ ᠦ᠋ᠨ ᠳᠡᠯᠪᠢ ᠶ᠋ᠢ ᠲᠡᠭᠦᠵᠦ ᠶᠠᠪᠤᠭᠰᠠᠨ ᠪᠣᠯᠬᠣᠷ
ᠭᠠᠵᠠᠷ ᠰᠢᠷᠣᠢ ᠳᠦ ᠪᠠᠨ ᠪᠢ ᠬᠠᠶ᠋ᠢᠷᠠᠲᠠᠢ
ᠲᠤᠯᠤᠭᠠᠳ ᠦ᠋ᠨ ᠡᠩᠭᠡᠷ ᠶ᠋ᠢᠡᠷ ᠬᠤᠷᠠᠬ᠋ᠠ ᠬᠠᠷᠢᠭᠤᠯᠵᠤ ᠶᠠᠪᠤᠬᠤ ᠳᠦ ᠪᠠᠨ
ᠲᠣᠭᠣᠲᠣᠩ ᠳᠡᠪᠡᠯ ᠳᠦ ᠪᠡᠨ ᠴᠢᠯᠠᠭᠤ ᠬᠣᠷᠮᠣᠶ᠋ᠢᠯᠠᠵᠤ ᠭᠡᠷ ᠪᠠᠷᠢᠨ
ᠬᠥᠷᠥᠰᠥᠲᠦ ᠭᠠᠵᠠᠷ ᠊ᠢ ᠨᠢ ᠬᠣᠲᠣᠶ᠋ᠢᠲᠠᠯᠠ ᠬᠥᠯ ᠨᠢᠴᠦᠭᠦᠨ ᠭᠦᠶᠦᠵᠦ
ᠬᠥᠩᠭᠡᠨ ᠵᠠᠯᠠᠭᠤ ᠨᠠᠰᠤ ᠪᠠᠨ ᠲᠠᠯᠠ ᠳᠦ ᠦᠳᠡᠭᠰᠡᠨ ᠪᠣᠯᠬᠣᠷ
ᠭᠠᠵᠠᠷ ᠰᠢᠷᠣᠢ ᠳᠦ ᠪᠠᠨ ᠪᠢ ᠬᠠᠶ᠋ᠢᠷᠠᠲᠠᠢ
ᠡᠵᠢ ᠮᠢᠨᠢ ᠠᠮᠤᠭᠤᠯᠠᠩ ᠦᠶᠡ ᠳᠦ ᠪᠡᠨ ᠡᠷᠦᠬᠡ ᠶ᠋ᠢ ᠨᠢ ᠲᠠᠲᠠᠵᠤ
ᠡᠩᠭᠡᠷ ᠪᠠᠯ ᠳᠡᠭᠡᠷᠡ ᠴᠠᠮᠴᠠᠶ᠋ᠢᠨ ᠬᠠᠷᠠᠭᠲᠠᠲᠠᠭ ᠪᠠᠶ᠋ᠢᠬᠰᠠᠨ
ᠲᠥᠷᠦᠭᠰᠡᠨ ᠭᠡᠷ ᠦ᠋ᠨ ᠮᠢᠨᠢ ᠪᠠᠭᠤᠷᠢ ᠮᠥᠬᠥᠨ ᠬᠦᠷᠢᠶᠡ ᠲᠠᠲᠠᠵᠤ
ᠲᠥᠭᠡ ᠵᠠᠢ ᠦᠭᠡᠢ ᠠᠮᠢᠲᠤᠷᠠᠯ ᠦ᠋ᠨ ᠢᠯᠴᠢ ᠰᠢᠩᠭᠡᠭᠡᠵᠦ ᠪᠠᠶ᠋ᠢᠲᠠᠭ ᠲᠤ ᠨᠢ
ᠭᠠᠵᠠᠷ ᠰᠢᠷᠣᠢ ᠳᠦ ᠪᠠᠨ ᠪᠢ ᠬᠠᠶ᠋ᠢᠷᠠᠲᠠᠢ
ᠠᠶ᠋ᠢᠮᠠᠭ ᠦ᠋ᠨ ᠰᠤᠷᠭᠠᠭᠤᠯᠢ ᠳᠦ ᠢᠷᠡᠴᠢᠬᠡᠭᠡᠳ ᠭᠡᠷ ᠶ᠋ᠢᠡᠨ ᠰᠠᠨᠠᠨ ᠭᠠᠨᠢᠬᠠᠷᠠᠵᠤ
ᠠᠷᠤ ᠪᠡᠯ ᠦ᠋ᠨ ᠬᠥᠲᠥᠯ ᠶ᠋ᠢᠡᠷ ᠬᠥᠮᠦᠨ ᠪ ᠪᠠᠷᠠ ᠰᠢᠷᠲᠡᠨ
ᠠᠰᠬᠠᠷᠠᠬᠤ ᠨᠢᠯᠪᠤᠰᠤ ᠲᠠᠢ ᠨᠢᠲᠦᠨ ᠳᠦ ᠵᠤᠷᠠᠶ᠋ᠢᠨ ᠬᠠᠷᠠᠭᠲᠠᠲᠠᠭ ᠪᠠᠶ᠋ᠢᠬᠰᠠᠨ
ᠠᠯᠲᠠᠨ ᠰᠢᠷᠭᠠᠯ ᠵᠠᠮ ᠊ᠢ ᠣᠲᠣ ᠪᠣᠯᠲᠠᠯᠠ ᠰᠠᠨᠠᠲᠠᠭ ᠲᠤ ᠪᠠᠨ
ᠭᠠᠵᠠᠷ ᠰᠢᠷᠣᠢ ᠳᠦ ᠪᠠᠨ ᠪᠢ ᠬᠠᠶ᠋ᠢᠷᠠᠲᠠᠢ
ᠠᠭᠤᠯᠠ ᠲᠤᠯᠤᠭᠠᠳ ᠦ᠋ᠨ ᠳᠡᠭᠡᠭᠦᠷ ᠡᠭᠦᠯᠡᠰ ᠰᠤᠭᠤᠨᠠᠭᠯᠠᠨ ᠨᠡᠭᠦᠵᠦ
ᠤᠨᠠᠭᠰᠠᠨ ᠮᠣᠷᠢᠨ ᠪ ᠲᠤᠭᠤᠷᠠᠢ ᠭᠠᠵᠠᠷ ᠬᠣᠲᠣᠶ᠋ᠢᠲᠠᠯᠠ ᠴᠠᠪᠴᠢᠯᠠᠵᠤ
ᠤᠴᠠᠷᠠᠬᠤ ᠶ᠋ᠢᠨ ᠰᠠᠶ᠋ᠢᠬᠠᠨ ᠢᠷᠥᠭᠡᠯ ᠶ᠋ᠢᠡᠷ ᠬᠣᠣᠰ ᠵᠢᠷᠦᠬᠡᠨ ᠴᠣᠬᠢᠯᠠᠵᠤ
ᠠᠭᠤᠲᠠᠮ ᠬᠡᠭᠡᠷᠡ ᠶ᠋ᠢᠨ ᠪᠡᠯᠴᠢᠭᠡᠷ ᠲᠤ ᠬᠠᠶ᠋ᠢᠷᠠ ᠠᠮᠲᠠᠯᠠᠭᠰᠠᠨ ᠪᠣᠯᠬᠣᠷ
ᠭᠠᠵᠠᠷ ᠰᠢᠷᠣᠢ ᠳᠦ ᠪᠠᠨ ᠪᠢ ᠬᠠᠶ᠋ᠢᠷᠠᠲᠠᠢ
ᠬᠠᠷᠢ ᠶ᠋ᠢᠨ ᠳᠠᠶ᠋ᠢᠰᠤᠨ ᠬᠠᠯᠲᠠᠬᠤ ᠳᠦ ᠭᠠᠯ ᠭᠣᠯᠣᠮᠲᠠ ᠪᠠᠨ ᠥᠮᠥᠭᠯᠡᠵᠦ
ᠬᠠᠲᠠᠨ ᠵᠣᠷᠢᠬᠲᠤ ᠡᠷᠡᠴᠦᠳ ᠫᠤᠤ ᠮᠥᠷᠥᠯᠡᠵᠦ ᠮᠣᠷᠲᠠᠬᠤ ᠳᠦ ᠪᠠᠨ
ᠬᠠᠲᠤᠨ ᠲᠤᠤᠯᠠ ᠶ᠋ᠢᠨ ᠤᠰᠤ ᠶ᠋ᠢ ᠷᠠᠰᠢᠶᠠᠨ ᠭᠡᠵᠦ ᠠᠮᠲᠠᠯᠠᠨ
ᠬᠠᠶ᠋ᠢᠷᠭᠤ ᠴᠢᠯᠠᠭᠤᠨ ᠰᠢᠷᠣᠢ ᠶ᠋ᠢ ᠨᠢ ᠠᠯᠴᠢᠭᠤᠷ ᠲᠤ ᠪᠠᠨ ᠪᠣᠭᠣᠵᠤ ᠶᠠᠪᠤᠭᠰᠠᠨ ᠳᠦ ᠨᠢ
ᠭᠠᠵᠠᠷ ᠰᠢᠷᠣᠢ ᠳᠦ ᠪᠠᠨ ᠪᠢ ᠬᠠᠶ᠋ᠢᠷᠠᠲᠠᠢ
ᠠᠷᠪᠠᠨ ᠲᠥᠭᠡ ᠪᠡᠶᠡ ᠶ᠋ᠢᠨ ᠶ᠋ᠢᠡᠨ ᠠᠯᠵᠢᠶᠠᠨ ᠶᠠᠲᠠᠷᠠᠬᠤ ᠶ᠋ᠢ ᠮᠠᠲᠠᠯ ᠦᠭᠡᠢ
ᠠᠷᠪᠠᠢ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠠᠭᠤᠲᠠᠮ ᠳᠦ ᠴᠤᠤᠷᠢᠶᠠ ᠬᠠᠲᠠᠲᠠᠯᠠ ᠳᠠᠭᠤᠯᠠᠵᠤ
ᠠᠭᠠᠭ ᠲᠠᠢ ᠵᠠᠯᠠᠭᠤ ᠨᠠᠰᠤᠨ ᠪ ᠪᠠᠨ ᠢᠲᠡ ᠪᠠᠬᠠ ᠶ᠋ᠢ ᠦᠵᠡᠬᠦ ᠭᠡᠵᠦ
ᠠᠲᠠᠷ ᠦ᠋ᠨ ᠣᠩᠭᠣᠨ ᠬᠥᠷᠥᠰᠥᠨ ᠳᠦ ᠦᠷᠡ ᠰᠠᠭᠤᠯᠭᠠᠯᠴᠠᠭᠰᠠᠨ ᠪᠣᠯᠬᠣᠷ
ᠭᠠᠵᠠᠷ ᠰᠢᠷᠣᠢ ᠳᠦ ᠪᠠᠨ ᠪᠢ ᠬᠠᠶ᠋ᠢᠷᠠᠲᠠᠢ
ᠵᠠᠭᠤᠷᠠ ᠬᠣᠨᠣᠭᠰᠠᠨ ᠰᠠᠷᠠᠨ ᠪ ᠲᠡᠷᠭᠡᠯ ᠲᠤᠶᠠᠬ᠋ᠠ ᠶ᠋ᠢ ᠣᠷᠣᠯᠠᠬᠤ
ᠵᠠᠭᠤᠨ ᠲᠦᠮᠡᠨ ᠵᠤᠯᠠ ᠡᠬᠡ ᠭᠠᠵᠠᠷ ᠲᠤ ᠪᠠᠨ ᠠᠰᠠᠭᠠᠵᠤ
ᠲᠡᠩᠬᠡᠭᠡᠲᠦ ᠪᠠᠶᠠᠨ ᠪ ᠪᠠᠨ ᠬᠥᠯᠥᠰᠥ ᠶ᠋ᠢ ᠳᠤᠰᠤᠯ ᠳᠤᠰᠤᠯ ᠶ᠋ᠢᠠᠷ ᠰᠢᠩᠭᠡᠭᠡᠬᠦ ᠭᠡᠵᠦ
ᠲᠡᠭᠷᠢᠯᠢᠭ ᠰᠠᠶ᠋ᠢᠬᠠᠨ ᠣᠷᠣᠨ ᠪ ᠪᠠᠨ ᠡᠵᠡᠨ ᠪᠣᠯᠵᠤ ᠲᠥᠷᠥᠭᠰᠡᠨ ᠳᠦ ᠪᠡᠨ
ᠭᠠᠵᠠᠷ ᠰᠢᠷᠣᠢ ᠳᠦ ᠪᠠᠨ ᠪᠢ ᠬᠠᠶ᠋ᠢᠷᠠᠲᠠᠢ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠪᠤᠤ ᠿᠦᠩ ᠬᠤᠸᠠ
ᠬᠢᠨᠠᠭᠴᠢ ᠄ ᠮᠥᠴᠢᠷ ᠪᠠᠭ᠍ᠰᠢ