ᠲᠡᠮᠡᠭᠡ-ᠪ᠂ ᠶᠠᠪᠤᠭᠤᠬᠤᠯᠠᠨ Тэмээ-Б. Явуухулан ᠰᠢᠯᠦᠭ ᠢᠷᠠᠭᠤ ᠨᠠᠢᠷᠠᠭ

           ᠪ᠂ ᠶᠠᠪᠤᠭᠤᠬᠤᠯᠠᠨ  

ᠴᠡᠩᠬᠡᠷᠯᠡᠨ ᠪᠠᠶ᠋ᠢᠬ᠋᠎ᠠ ᠠᠯᠤᠰ ᠦ᠋ᠨ ᠠᠯᠤᠰ  ᠲᠦ
ᠴᠡᠯᠡᠯᠵᠡᠨ ᠪᠠᠶ᠋ᠢᠬ᠋᠎ᠠ ᠲᠠᠩᠭᠢᠰ ᠊ᠢ ᠴᠢ ᠬᠠᠷᠠᠭᠠᠴᠢ !
ᠬᠥᠬᠡ ᠲᠩᠷᠢ ᠶ᠋ᠢᠨ ᠬᠠᠶᠠᠬ᠋᠎ᠠ ᠪᠠᠭᠤᠬᠤ ᠰᠠᠪᠰᠠᠯᠭᠠᠨ ᠳᠦ
ᠬᠥᠪᠦᠨ ᠶᠠᠪᠤᠬ᠋᠎ᠠ ᠣᠩᠭᠣᠴᠠ ᠨᠤᠭᠤᠳ ᠊ᠢ ᠪᠠᠰᠠ ᠠᠵᠢᠭᠠᠴᠢ !

ᠡᠨᠡ ᠴᠢᠨᠢ ᠥᠨᠥᠬᠢ ᠶᠡᠬᠡ ᠭᠣᠪᠢ ᠶ᠋ᠢᠨ
ᠶᠸᠯᠧᠢ ᠶ᠋ᠢᠨ ᠭᠠᠶ᠋ᠢᠬᠠᠮᠰᠢᠬᠲᠤ ᠴᠡᠩᠬᠡᠷ ᠵᠡᠷᠭᠡᠯᠭᠡᠨ
《 ᠡᠯᠡᠰᠦᠨ ᠴᠦᠯ ᠦ᠋ᠨ ᠣᠩᠭᠣᠴᠠ 》ᠭᠡᠵᠦ ᠠᠯᠲᠠᠷᠰᠢᠬᠰᠠᠨ
ᠢᠲᠡᠰᠢᠯᠡᠵᠦ ᠶᠠᠪᠤᠬ᠋᠎ᠠ ᠣᠯᠠᠨ ᠲᠡᠮᠡᠭᠡ ᠃

ᠵᠡᠯᠢᠭᠦᠳ ᠬᠡᠭᠡᠷ᠎ᠡ ᠶ᠋ᠢᠨ ᠲᠠᠪᠠᠬᠠᠶ᠋ᠢᠲᠤ ᠰᠦᠷᠦᠭ
ᠵᠡᠷᠭᠡᠯᠭᠡᠲᠦ ᠭᠣᠪᠢ ᠶ᠋ᠢᠨ ᠳᠠᠷᠪᠠᠭᠤᠯᠲᠤ ᠬᠥᠯᠭᠡ
ᠲᠡᠮᠡᠭᠡ ᠭᠡᠲᠡᠭ ᠰᠠᠶ᠋ᠢᠬᠠᠨ ᠠᠮᠢᠲᠠᠨ
ᠲᠡᠷᠡ ᠴᠢᠭ᠌ ᠶ᠋ᠢᠡᠷ ᠶ᠋ᠢᠡᠨ ᠡᠷᠲᠡᠨᠢ ᠰᠢᠭ᠌ ᠪᠡᠶᠡᠲᠡᠨ ᠃

ᠥᠩᠭᠡ ᠵᠢᠰᠦ ᠨᠢ ᠪᠠᠤᠠᠮᠠᠷᠠᠬ᠋᠎ᠠ ᠤᠯᠠᠭᠠᠨ
ᠦᠰᠦ ᠨᠣᠣᠰᠣ ᠨᠢ ᠮᠢᠨᠲᠠᠰᠤ ᠵᠥᠭᠡᠯᠡᠨ
ᠲᠣᠮᠣ ᠪᠡᠶᠡᠲᠡᠨ ᠳᠦ ᠵᠠᠶᠠᠭᠠᠮᠠᠷ ᠦᠭᠡᠢ ᠨᠣᠮᠣᠬᠠᠨ
ᠲᠣᠷᠮᠣᠭᠣᠷ ᠨᠢᠲᠦ ᠨᠢ ᠵᠦᠢᠷᠯᠡᠰᠢ ᠦᠭᠡᠢ ᠠᠮᠤᠭᠤᠯᠠᠩ ᠃

ᠪᠦᠬᠦ ᠭᠡᠲᠡᠭ  ᠨᠢ ᠬᠥᠯᠭᠡ ᠶ᠋ᠢᠨ ᠳᠠᠷᠪᠠᠭᠤᠯ
ᠪᠢᠷ᠎ᠠ ᠭᠡᠲᠡᠭ  ᠨᠢ ᠳᠠᠯᠠᠢ ᠶ᠋ᠢᠨ ᠣᠩᠭᠣᠴᠠ
ᠮᠥᠷᠥᠭᠡᠰᠴᠦ ᠪᠤᠶ᠋ᠢᠯᠠᠬᠤ ᠨᠢ ᠮᠣᠷᠢᠨ ᠬᠤᠭᠤᠷ
ᠮᠥᠷ ᠨᠢ ᠬᠦᠷᠲᠡᠯ᠎ᠡ ᠤᠨᠠᠭᠰᠠᠨ ᠨᠠᠪᠴᠢ ᠃

ᠭᠠᠩᠭᠠᠩ ᠤᠯᠠᠭᠠᠨ ᠲᠡᠮᠡᠭᠡ ᠪᠡᠨ ᠤᠨᠤᠭᠠᠳ
ᠭᠠᠯᠪᠠ ᠶ᠋ᠢᠨ ᠭᠣᠪᠢ ᠶ᠋ᠢ ᠲᠤᠭᠤᠯᠬᠤ ᠴᠤ᠌ ᠵᠢᠷᠭᠠᠯ
ᠭᠠᠩ ᠡᠪᠴᠢᠭᠦᠲᠦ ᠣᠩᠭᠣᠴᠠᠨ ᠳᠦ ᠰᠠᠭᠤᠭᠠᠳ
ᠭᠠᠲᠠᠭᠠᠲᠤ ᠳᠠᠯᠠᠢ ᠶ᠋ᠢ ᠭᠠᠲᠤᠯᠬᠤ ᠴᠤ᠌ ᠵᠢᠷᠭᠠᠯ ᠃

ᠵᠡᠯᠢᠭᠦᠳ ᠬᠡᠭᠡᠷ᠎ᠡ ᠶ᠋ᠢᠨ ᠲᠠᠪᠠᠬᠠᠶ᠋ᠢᠲᠤ ᠰᠦᠷᠦᠭ
ᠵᠡᠷᠭᠡᠯᠭᠡᠲᠦ ᠭᠣᠪᠢ ᠶ᠋ᠢᠨ ᠳᠠᠷᠪᠠᠭᠤᠯᠲᠤ ᠬᠥᠯᠭᠡ
ᠤᠯᠠᠭᠠᠨ ᠲᠡᠮᠡᠭᠡ ᠭᠣᠪᠢ ᠶ᠋ᠢᠨ ᠴᠢᠮᠡᠭ
ᠤᠨᠤᠵᠤ ᠡᠲᠯᠡᠬᠦ ᠳᠦ ᠬᠥᠮᠦᠨ ᠪ ᠴᠢᠮᠡᠭ

ᠲᠡᠮᠡᠭᠡ ᠭᠡᠲᠡᠭ  ᠰᠠᠶ᠋ᠢᠬᠠᠨ ᠠᠮᠢᠲᠠᠨ
ᠲᠢᠪ ᠳᠡᠯᠡᠬᠡᠢ ᠳᠦ ᠬᠣᠪᠣᠷ ᠠᠮᠢᠲᠠᠨ
ᠲᠡᠨᠢᠭᠡᠷ ᠭᠣᠪᠢ ᠦᠭᠡᠢ ᠪᠣᠯ ᠲᠡᠮᠡᠭᠡ ᠂ ᠲᠡᠮᠡᠭᠡ ᠪᠢᠰᠢ
ᠲᠡᠮᠡᠭᠡ ᠦᠭᠡᠢ ᠪᠣᠯ ᠭᠣᠪᠢ ᠴᠤ᠌ ᠭᠣᠪᠢ ᠪᠢᠰᠢ ᠃ 

  ᠦᠰᠦᠭ ᠠᠮᠢᠯᠠᠭᠴᠢ ᠄ ᠣᠳᠬᠠᠨᠰᠸ᠎ᠠ

  ᠦᠰᠦᠭ ᠬᠢᠨᠠᠭᠴᠢ ᠄ ᠪᠠᠶᠠᠷᠴᠡᠴᠡᠭ