ᠨᠠᠮᠤᠷ ᠤᠨ ᠲᠤᠬᠠᠢ ᠪᠣᠳᠣᠯ – ᠷ᠂ ᠴᠣᠢᠨᠣᠮ Намрын тухай бодол – Р᠂ Чойном
381ᠨᠠᠮᠤᠷ ᠤᠨ ᠲᠤᠬᠠᠢ ᠪᠣᠳᠣᠯ
ᠷ᠂ ᠴᠣᠢᠨᠣᠮ
ᠨᠠᠮᠤᠷ ᠡ ᠭᠡᠵᠦ ᠶᠠᠭᠤ ᠰᠠᠨ ᠪᠢᠯᠡ ?
ᠨᠠᠷᠠ ᠰᠢᠷᠠᠭᠰᠠᠨ ᠲᠠᠯᠠ ᠰᠠᠨ ᠪᠢᠯᠡ ᠤᠤ
ᠨᠠᠶ᠋ᠢᠷ ᠲᠤ᠌ ᠪᠠᠷᠢᠭᠰᠠᠨ ᠠᠶᠠ ᠰᠠᠨ ᠪᠢᠯᠡ ᠤᠤ
ᠨᠠᠬᠢᠢᠲᠠᠯᠠ ᠰᠣᠶ᠋ᠢᠬᠰᠠᠨ ᠮᠤᠷᠢ ᠰᠠᠨ ᠪᠢᠯᠡ ᠤᠤ ?
ᠠᠶᠠ ᠬᠥᠭᠡᠷᠦᠬᠦᠢ
ᠨᠠᠮᠤᠷ ᠡ ᠭᠡᠵᠦ ᠶᠠᠭᠤ ᠰᠠᠨ ᠪᠢᠯᠡ ?
ᠳᠠᠭᠤᠯᠠᠶᠠ ᠳ᠋ᠠ ᠪᠢ ᠂ ᠨᠠᠮᠤᠷ ᠶᠤᠭᠠᠨ
ᠳᠠᠭᠤᠯᠠᠩᠬᠠᠨ ᠪᠠᠶ᠋ᠢᠵᠤ ᠯᠡ ᠤᠬᠢᠯᠠᠶᠠ ᠳ᠋ᠠ !
ᠵᠡᠭᠦᠦ ᠰᠢᠭ᠌ ᠴᠡᠮᠴᠡᠭᠡᠷ ᠡᠵᠢ ᠡᠴᠡ ᠲᠦᠷᠦᠭᠰᠡᠨ
ᠵᠢᠷᠦᠬᠡ ᠰᠢᠭ᠌ ᠤᠯᠠᠭᠠᠨ ᠬᠥᠪᠡᠭᠦᠨ ᠶᠠᠪᠤᠬᠤ ᠳ᠋ᠠᠭᠠᠨ
ᠨᠠᠮᠤᠷ ᠡ ᠭᠡᠵᠦ ᠶᠠᠭᠤ ᠪᠠᠶ᠋ᠢᠳᠠᠭ ᠊ᠢ
ᠨᠠᠰᠤᠨ ᠳ᠋ᠠᠭᠠᠨ ᠮᠠᠷᠲᠠᠮᠠ ᠦᠭᠡᠢ ᠣᠶ᠋ᠢᠯᠠᠭᠠᠵᠤ ᠪᠢᠯᠡ !
ᠠᠯᠠᠭ ᠤᠲᠠᠰᠤ ᠪᠠᠷ ᠵᠠᠬᠠᠯᠠᠵᠤ ᠣᠶᠣᠭᠰᠠᠨ
ᠠᠯᠠᠭᠠ ᠲᠠᠷᠤᠮᠬᠠᠨ ᠠᠯᠴᠢᠭᠤᠷ ᠳᠣᠲᠣᠷᠠ
ᠳᠤᠮᠳᠠᠭᠤᠷᠬᠠᠨ ᠪᠣᠭᠣᠬᠤ ᠳ᠋ᠤ᠌ ᠴᠤ᠌ ᠪᠠᠭᠲᠠᠬᠤ ᠪᠠᠶ᠋ᠢᠭᠰᠠᠨ
ᠳᠤᠷᠠᠯᠠᠯ — ᠬᠠᠭᠠᠴᠠᠯ ᠮᠢᠨᠢ ᠤᠴᠠᠷᠠᠵᠤ ᠪᠢᠯᠡ
ᠨᠠᠮᠤᠭᠤᠬᠠᠨ ᠵᠢᠷᠦᠬᠡ ᠶ᠋ᠢ ᠮᠢᠨᠢ ᠠᠩᠬᠠ ᠰᠦᠯᠪᠡᠭ᠍ᠰᠡᠨ
ᠨᠠᠭᠠᠯᠢᠩᠬᠠᠢ ᠬᠠᠷᠠᠴᠠᠨ ᠪ ᠲᠣᠷᠭᠠᠨ ᠦᠵᠦᠭᠦᠷ ᠊ᠢ
ᠨᠠᠨᠲᠢᠩᠨᠠᠩᠬᠠᠨ ᠳᠤᠷᠠᠯᠠᠬᠤ ᠳ᠋ᠠᠭᠠᠨ ᠪᠢ
ᠨᠠᠮᠤᠷ ! ᠭᠡᠵᠦ ᠰᠡᠭᠦᠷᠡᠰᠦ ᠠᠯᠳᠠᠨᠠᠮ ᠪᠢ ᠃
ᠨᠠᠮᠠᠶ᠋ᠢ ᠪᠠᠨ ᠣᠷᠬᠢᠭᠠᠳ ᠰᠢᠪᠠᠭᠤ ᠰᠢᠭ᠋ ᠪᠤᠴᠠᠭᠰᠠᠨ
ᠨᠠᠰᠤᠨ ᠪᠠᠭᠠ ᠶ᠋ᠢᠨ ᠠᠮᠠᠷᠠᠭ ᠶ᠋ᠢᠠᠨ ᠪᠣᠳᠣᠬᠤ ᠠ᠋ᠴᠠ
ᠨᠠᠶ᠋ᠢᠳᠠᠪᠤᠷᠢ ᠦᠭᠡᠢ ᠬᠠᠭᠠᠴᠠᠯ ᠊ᠢ
ᠠᠩᠬᠠ ᠦᠵᠡᠭᠦᠯᠦᠭᠰᠡᠨ
ᠨᠠᠮᠤᠷ ᠦ᠋ᠨ ᠰᠠᠯᠬᠢ ᠠᠮᠲᠠᠭᠲᠠᠨᠠᠮ ᠳ᠋ᠠ᠃
ᠳᠠᠭᠤᠯᠠᠶᠠ ᠳ᠋ᠠ ᠪᠢ᠂ ᠨᠠᠮᠤᠷ ᠶᠤᠭᠠᠨ
ᠳᠠᠭᠤᠯᠠᠩᠬᠠᠨ ᠪᠠᠶ᠋ᠢᠵᠤ ᠯᠠ ᠤᠬᠢᠯᠠᠶᠠ ᠳ᠋ᠠ !
ᠬᠠᠨᠠᠭᠠᠷ ᠲᠠᠯᠠ ᠲᠣᠭᠣᠰᠣᠷᠠᠩᠬᠠᠨ ᠪᠠᠶ᠋ᠢᠨᠠ
ᠬᠠᠮᠬᠤᠤᠯ ᠡᠪᠡᠰᠦ ᠲᠣᠷᠣᠯᠵᠠᠩᠬᠠᠨ ᠭᠦᠶᠦᠨᠡ ᠯᠠ
ᠬᠠᠲᠠᠭᠰᠠᠨ ᠴᠡᠴᠡᠭ ᠦ᠋ᠳ ᠲᠠᠰᠤᠷᠠᠩᠬᠠᠨ ᠬᠡᠶ᠋ᠢᠰᠦᠨᠡ ᠯᠡ
ᠬᠠᠶ᠋ᠢᠷᠠᠨ ᠴᠢᠭ᠌ ᠵᠤᠨ ᠪ ᠮᠢᠨᠢ ᠭᠤᠷᠪᠠᠨ ᠰᠠᠷᠠ ᠡ !
ᠠᠢ ᠬᠥᠭᠡᠷᠦᠬᠦᠢ
ᠠᠯᠳᠠᠩᠬᠠᠨ ᠰᠢᠷᠭᠠᠯ ᠮᠥᠷᠲᠡᠭᠡᠨ
ᠶᠠᠭᠤ ᠪᠠᠷ ᠴᠤ᠌ ᠴᠡᠴᠡᠭᠯᠡᠭᠦᠯᠦᠰᠢ ᠦᠭᠡᠢ ᠨᠠᠮᠤᠷ
ᠶᠠᠭᠤᠲᠡᠢ ᠴᠤ᠌ ᠤᠶ᠋ᠢᠤᠠᠬᠠᠷᠲᠠᠢ ᠶᠤᠮ ᠪᠣᠢ ?
ᠵᠦᠭ ᠦᠭᠡᠢ ᠨᠠᠰᠤ ᠪᠠᠨ ᠣᠷᠬᠢᠭᠠᠳ ᠢᠷᠡᠭᠰᠡᠨ
ᠵᠡᠭᠦᠨ ᠵᠦᠭ ᠦ᠋ᠨ ᠠᠭᠤᠳᠠᠮ ᠲᠠᠯᠠ ᠳ᠋ᠤ᠌ ᠮᠢᠨᠢ
ᠵᠢᠷᠦᠬᠡ ᠨᠢ ᠡᠮᠲᠡᠷᠡᠭᠰᠡᠨ ᠮᠣᠩᠭᠣᠯ ᠨᠠᠶ᠋ᠢᠷᠠᠭ
ᠵᠦᠢᠲᠡᠶ᠋ᠢᠬᠡᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨ ᠭᠡᠬᠢᠯᠵᠡᠵᠦ
ᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠰᠢᠷᠲᠡᠳᠡᠭ ᠰᠠᠨ ᠳ᠋ᠠ
ᠠᠭᠤᠯᠠ ᠶ᠋ᠢᠨ ᠲᠡᠷᠡ ᠣᠷᠣᠢ ᠳ᠋ᠤ᠌ ᠭᠡᠰᠢᠭᠦᠦ ᠶ᠋ᠢᠨ
ᠤᠯᠠᠭᠠᠬᠠᠨ ᠨᠠᠪᠴᠢ ᠂ ᠵᠢᠷᠦᠬᠡ ᠰᠢᠭ᠌
ᠤᠨᠠᠨ ᠲᠣᠰᠣᠨ ᠰᠡᠷᠴᠢᠬᠢᠨᠡᠨᠡᠮ ᠪᠢᠯᠡ᠃
ᠳᠠᠭᠤᠯᠠᠶᠠ ᠳ᠋ᠠ ᠪᠢ ᠂ ᠨᠠᠮᠤᠷ ᠶᠤᠭᠠᠨ
ᠳᠠᠭᠤᠯᠠᠩᠬᠠᠨ ᠪᠠᠶ᠋ᠢᠵᠤ ᠯᠠ ᠤᠬᠢᠯᠠᠶᠠ ᠳ᠋ᠠ᠃
ᠬᠤᠰᠤᠨ ᠮᠣᠳᠣᠨ ᠪ ᠨᠠᠷᠢᠨ ᠦᠵᠦᠭᠦᠷ
ᠬᠠᠭᠤᠷᠠᠢ ᠰᠠᠯᠬᠢᠨ ᠳ᠋ᠤ᠌ ᠣᠬᠢᠯᠠᠩᠬᠠᠨ ᠪᠠᠶ᠋ᠢᠨᠠ ᠤᠤ
ᠬᠤᠨ ᠴᠠᠨ ᠪ ᠴᠠᠭᠠᠬᠠᠨ ᠵᠢᠭᠦᠷ
ᠡᠭᠦᠯᠡᠨ ᠴᠠᠭᠠᠭᠤᠷ ᠳᠡᠪᠢᠩᠬᠡᠨ ᠣᠳᠤᠨᠠ ᠤᠤ ᠳ᠋ᠠ ᠃
ᠪᠠᠶᠠᠷ ᠪᠠᠶᠠᠷ ᠦ᠋ᠨ ᠬᠢᠨᠢ ᠣᠬᠢ ᠮᠠᠩᠯᠠᠢ
ᠪᠠᠲᠤ ᠰᠡᠳᠬᠢᠯ ᠦ᠋ᠨ ᠬᠢᠨᠢ ᠣᠩᠭᠣᠨ ᠰᠠᠬᠢᠭᠤᠰᠤ !
ᠪᠠᠤᠠᠮᠠ ᠶ᠋ᠢᠨ ᠲᠠᠯᠮᠢᠨ ᠨᠢᠲᠦ ᠲᠠᠢ ᠲᠦᠷᠦᠭᠰᠡᠨ
ᠮᠢᠨᠦ ᠯᠡ ᠨᠢᠭᠡᠨ ᠠᠯᠳᠠᠷᠠᠢ᠃
ᠴᠠᠭ ᠶ᠋ᠢᠠᠨ ᠢᠷᠡᠬᠦ ᠳ᠋ᠦ᠍ ᠬᠤᠨ ᠪ ᠳᠠᠯᠠᠪᠴᠢ ᠰᠢᠭ᠋
ᠴᠠᠶ᠋ᠢᠷᠠᠩᠬᠠᠨ ᠳᠠᠯᠠᠯᠤᠩᠬᠠᠨ ᠣᠳᠬᠤ ᠪᠣᠯᠪᠠ ᠤᠤ ᠳ᠋ᠠ
ᠰᠡᠷᠢᠭᠦᠨ ᠪᠦᠰᠡ ᠶ᠋ᠢᠨ ᠨᠠᠭᠤᠷ ᠰᠢᠭ᠋ ᠪᠢ
ᠰᠡᠩᠭᠢᠨᠡᠨ ᠦᠢᠷᠡᠮᠡᠭᠳᠡᠭᠡᠳ ᠦᠯᠡᠳᠡᠬᠦ ᠪᠣᠯᠪᠠ ᠤᠤ ᠳ᠋ᠠ᠃
ᠠᠢ ᠬᠥᠭᠡᠷᠦᠬᠦᠢ
ᠨᠠᠮᠤᠷ ᠡ ᠭᠡᠵᠦ ᠶᠠᠭᠤ ᠰᠠᠨ ᠪᠢᠯᠡ ?
ᠵᠢᠷᠭᠠᠯ ᠦᠰᠦᠭ ᠠᠮᠢᠯᠠᠭᠤᠯᠪᠠ
ᠬᠢᠨᠠᠭᠴᠢ ᠄ ᠪᠠᠶᠠᠷᠴᠡᠴᠡᠭ ᠪᠠᠭᠰᠢ