ᠬᠥᠨᠵᠢᠯᠡ ᠶᠢᠨ ᠢᠶᠡᠨ ᠬᠢᠷᠢ ᠪᠠᠷ ᠢᠰᠬᠦᠯᠵᠦ ᠠᠳᠤᠭᠤᠨ ᠦ ᠪᠡᠨ ᠬᠢᠷᠢ ᠪᠠᠷ ᠢᠰᠬᠡᠷХөнжлийнхөө хирээр өшиглөж адууныхаа хирээр исгэр ᠰᠢᠯᠦᠭ ᠢᠷᠠᠭᠤ ᠨᠠᠢᠷᠠᠭ

ᠰᠠᠶ᠋ᠢᠨ ᠪᠠᠶ᠋ᠢᠨ᠎ᠠ ‍ᠤᠤ  ? ᠨᠠᠷᠠᠨ ‍ᠤ ᠪᠣᠷᠣ ᠮᠠᠯᠴᠢᠳ ᠮᠢᠨᠢ ᠂ ᠰᠠᠯᠬᠢ ᠪᠣᠷᠣᠭᠠᠨ ‍ᠳᠤ ᠵᠦᠳᠡᠷᠡᠵᠦ ᠶᠠᠪᠤᠭ᠎ᠠ ᠢᠷᠭᠡᠳ ᠂ ᠰᠠᠶ᠋ᠢᠬᠠᠨ ᠮᠣᠩᠭᠣᠯ ᠨᠤᠲᠤᠭ ‍ᠤᠨ ‍ᠢᠶ᠋ᠠᠨ ᠬᠠᠳᠠᠨ ᠪᠠᠲᠤ ᠰᠠᠬᠢᠭᠤᠰᠤ ᠎ᠨᠤᠭᠤᠳ ᠮᠢᠨᠢ ᠂ ᠰᠦᠨ ᠴᠠᠭᠠᠨ ᠰᠡᠳᠬᠢᠯ ᠎ᠲᠡᠢ ᠬᠠᠶ᠋ᠢᠷ᠎ᠠ ‍ᠶ᠋ᠢᠨ ᠪᠤᠷᠬᠠᠨ ᠰᠢᠲᠦᠭᠡᠨ ᠎ᠨᠤᠭᠦᠳ ᠮᠢᠨᠢ ᠂ ᠲᠠ ᠨᠠᠷ ᠰᠠᠶ᠋ᠢᠨ ᠪᠠᠶ᠋ᠢᠵᠠᠭᠠᠨ᠎ᠠ ‍ᠤᠤ ?

ᠦᠬᠡᠷ ᠬᠣᠨᠢᠨ ‍ᠤ ᠬᠠᠩᠰᠢ ᠨᠢ ᠪᠠᠭᠤᠷᠠᠭᠠᠳ ᠂

ᠡᠪᠡᠰᠦ ᠪᠣᠷᠳᠣᠭᠠᠨ ‍ᠤ ᠦᠨ᠎ᠡ ᠨᠢ ᠥᠰᠦᠭᠡᠳ ᠂

ᠥᠷᠢ ᠥᠭᠴᠡᠭᠡ ᠵᠢᠯ ᠳᠣᠳᠣᠮ ᠨᠡᠮᠡᠭᠳᠡᠭᠡᠳ ᠂

ᠪᠠᠩᠬᠢ ᠢᠲᠡᠭᠡᠮᠵᠢ ᠨᠢ ᠪᠠᠶ᠋ᠢᠨ ᠳᠠᠬᠢᠨ ᠱᠠᠭᠠᠷᠳᠠᠭᠠᠳ ᠂

ᠠᠮᠢᠳᠤᠷᠠᠬᠤ ᠭᠡᠵᠦ ᠬᠡᠴᠡᠭᠦᠦ ᠪᠣᠯᠤᠭ᠎ᠠ ‍ᠤᠤ ?

ᠠᠶ᠋ᠢᠯ ᠰᠠᠭᠠᠬᠠᠯᠲᠠ ᠎ᠪᠠᠷ ‍ᠢᠶ᠋ᠠᠨ ᠰᠡᠳᠬᠢᠯ ᠳᠡᠷᠪᠡᠭᠡ ‍ᠦᠦ ?

ᠰᠢᠭᠦᠬᠦ ‍ᠳᠦ ᠳᠠᠭᠤᠳᠠᠬᠤ ᠭᠡᠵᠦ ᠵᠠᠷᠭᠤ ‍ᠳᠤ ᠳᠠᠭᠤᠳᠠᠭᠳᠠᠭᠠᠳ ᠂

ᠡᠳᠦᠷ ᠰᠥᠨᠢ ᠎ᠪᠡᠷ ᠶᠠᠭᠠᠷᠠᠵᠤ ᠶᠠᠪᠤᠭ᠎ᠠ ‍ᠤᠤ ?

ᠬᠤᠷᠤᠭᠤ ᠳᠠᠷᠤᠪᠠᠯ ᠮᠠᠰᠢᠨ ᠠᠪᠤᠭᠠᠳ ᠂

ᠬᠣᠲᠠ ᠎ᠲᠠᠢ ᠮᠠᠯ ‍ᠢᠶ᠋ᠠᠨ ᠬᠣᠭᠣᠰᠣᠯᠠᠵᠤ ᠣᠷᠬᠢᠭᠠᠳ ᠂

ᠬᠡᠳᠦᠭᠦᠯᠡ ᠨᠡᠶ᠋ᠢᠯᠡᠪᠡᠯ ᠵᠢᠭᠡᠯᠡᠯᠭᠡ ᠠᠪᠤᠭᠠᠳ ᠂

ᠭᠠᠭᠴᠠ ᠡᠳᠦᠷ ᠬᠠᠭᠠᠨ ᠰᠢᠬ ᠵᠢᠷᠭᠠᠵᠤ ᠂

ᠵᠠᠭᠤᠨ ᠡᠳᠦᠷ ‍ᠢᠶ᠋ᠡᠷ ᠪᠣᠭᠣᠯ ᠰᠢᠬ ᠵᠢᠳᠬᠦᠭᠰᠡᠨ ᠂

ᠮᠢᠨᠦ ᠬᠠᠶ᠋ᠢᠷᠠᠲᠠᠢ ᠮᠠᠯᠴᠢᠨ ᠲᠦᠮᠡᠨ ᠮᠠᠨᠢ ᠂

ᠮᠥᠩᠭᠥᠨ ‍ᠦ ᠡᠷᠢᠯ ‍ᠳᠦ ᠵᠦᠳᠡᠷᠡᠵᠦ ᠶᠠᠪᠤᠭ᠎ᠠ ‍ᠤᠤ ?

ᠥᠷᠢ ‍ᠶ᠋ᠢᠨ ᠳᠠᠩᠰᠠ ‍ᠶ᠋ᠢ ᠪᠣᠳᠣᠵᠤ ᠦᠵᠡᠭᠡᠳ

ᠡᠳᠦᠷ ᠰᠥᠨᠢ ᠎ᠪᠡᠷ ᠨᠣᠶ᠋ᠢᠷ ᠬᠤᠯᠵᠢᠭ᠎ᠠ ‍ᠤᠤ ?

ᠮᠠᠰᠢᠨ ‍ᠤ ᠳᠠᠭᠤ ᠎ᠪᠠᠷ ᠵᠢᠷᠦᠬᠡ ᠲᠦᠭᠰᠢᠵᠦ ᠂

ᠥᠷᠢ ‍ᠶ᠋ᠢᠨ ᠡᠵᠡᠳ ᠎ᠡᠴᠡ ᠬᠠᠷᠠᠴᠠ ᠬᠠᠯᠢᠷᠠᠵᠤ ᠂

ᠭᠠᠭᠴᠠ ‍ᠬᠦ ᠰᠥᠨᠢ ᠎ᠪᠡᠷ ᠠᠯᠠᠭ᠎ᠠ ᠪᠣᠯᠤᠭᠠᠳ ᠂

ᠭᠠᠵᠠᠷ ᠭᠠᠵᠠᠷ ‍ᠢᠶ᠋ᠠᠷ ᠴᠠᠭᠠᠴᠢᠯᠠᠵᠤ ᠲᠡᠨᠦᠭᠡ ‍ᠦᠦ ?

ᠭᠡᠷ ᠪᠠᠶ᠋ᠢᠲᠠᠯ᠎ᠠ ᠎ᠪᠠᠨ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ ᠂

ᠨᠤᠲᠤᠭ ᠪᠠᠶ᠋ᠢᠲᠠᠯ᠎ᠠ ᠎ᠪᠠᠨ ᠬᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠂

ᠨᠡᠷ᠎ᠡ ᠎ᠪᠡᠨ ᠨᠢᠭᠤᠵᠤ ᠮᠥᠷ ‍ᠢᠶ᠋ᠡᠨ ᠪᠠᠯᠠᠯᠤᠭᠰᠠᠨ ᠂

ᠨᠤᠲᠤᠭ ᠤᠰᠤᠨ ‍ᠤ ᠲᠠᠨᠢᠯ ᠬᠥᠮᠦᠰ ᠮᠢᠨᠢ ᠂

ᠤᠤᠭᠤᠬᠤ ᠪᠣᠯᠭᠠᠨ ᠰᠣᠭᠲᠣᠵᠤ ᠪᠠᠶ᠋ᠢᠨ᠎ᠠ ‍ᠤᠤ ?

ᠰᠣᠭᠲᠣᠬᠤ ᠪᠣᠯᠭᠠᠨ ᠳᠠᠭᠤᠯᠠᠵᠤ ᠪᠠᠶ᠋ᠢᠨ᠎ᠠ ‍ᠤᠤ ?

ᠳᠠᠭᠤᠯᠠᠬᠤ ᠪᠣᠯᠭᠠᠨ ᠤᠬᠢᠯᠠᠵᠤ ᠪᠠᠶ᠋ᠢᠨ᠎ᠠ ‍ᠤᠤ ?

ᠳᠣᠭᠳᠣᠯᠵᠤ ᠮᠡᠯᠮᠡᠷᠡᠩᠬᠡᠨ ᠰᠠᠭᠤᠵᠤ ᠪᠠᠶ᠋ᠢᠨ᠎ᠠ ‍ᠤᠤ ?

ᠤᠤᠭᠤᠭᠰᠠᠨ ᠠᠷᠢᠬᠢ ‍ᠶ᠋ᠢ ᠴᠢᠨᠢ ᠠᠮᠰᠠᠭ᠎ᠠ ᠦᠭᠡᠢ ᠪᠣᠯᠪᠠᠴᠤ

ᠭᠠᠰᠢᠭᠤᠨ ᠪᠠᠶ᠋ᠢᠳᠠᠭ ‍ᠢ ᠪᠢ ᠮᠡᠳᠡᠨ᠎ᠡ ᠂

ᠤᠬᠢᠯᠠᠭᠰᠠᠨ ᠳᠠᠭᠤ ‍ᠶ᠋ᠢ ᠴᠢᠨᠢ ᠰᠣᠨᠣᠰᠤᠭ᠎ᠠ ᠦᠭᠡᠢ ᠪᠣᠯᠪᠠᠴᠤ

ᠭᠤᠨᠢᠬ ᠎ᠲᠠᠢ ᠪᠠᠶ᠋ᠢᠳᠠᠭ ‍ᠢ ᠪᠢ ᠮᠡᠳᠡᠨ᠎ᠡ ᠂

ᠥᠩᠭᠡᠷᠡᠭᠰᠡᠨ ‍ᠳᠦ ᠨᠤᠲᠤᠭ ᠮᠢᠨᠢ ᠰᠠᠶ᠋ᠢᠬᠠᠨ ᠪᠠᠶ᠋ᠢᠬᠰᠠᠨ ᠂

ᠥᠷᠢ ᠥᠭᠴᠡᠭᠡ ᠦᠭᠡᠢ ᠲᠠᠶ᠋ᠢᠪᠤᠩ ᠪᠠᠶ᠋ᠢᠬᠰᠠᠨ ᠂

ᠮᠠᠰᠢᠨ ᠎ᠲᠠᠢ ᠡᠷᠦᠬᠡ ᠪᠠᠶ᠋ᠢᠭ᠎ᠠ ᠦᠭᠡᠢ ᠴᠦ᠍

ᠮᠣᠷᠢ᠎ᠲᠠᠢ ᠠᠶ᠋ᠢᠯ ‍ᠤᠳ ᠪᠠᠶ᠋ᠢᠬᠰᠠᠨ ᠶᠤᠮ ᠂

ᠠᠰᠠᠷ᠎ᠲᠠᠢ ᠡᠷᠦᠬᠡ ᠪᠠᠶ᠋ᠢᠭ᠎ᠠ ᠦᠭᠡᠢ ᠴᠦ᠍

ᠠᠳᠤᠭᠤ ᠎ᠲᠠᠢ ᠠᠶ᠋ᠢᠯ ‍ᠤᠳ ᠪᠠᠶ᠋ᠢᠬᠰᠠᠨ ᠶᠤᠮ ᠂

ᠢᠲᠡᠭᠡᠮᠵᠢ ‍ᠶ᠋ᠢᠨ ᠵᠢᠭᠡᠯᠡᠯᠭᠡ ᠪᠠᠶ᠋ᠢᠭ᠎ᠠ ᠦᠭᠡᠢ ᠴᠦ᠍

ᠡᠭᠦᠳᠡ ᠎ᠪᠡᠨ ᠬᠠᠭᠠᠭᠰᠠᠨ ᠡᠷᠦᠬᠡ ᠪᠠᠶ᠋ᠢᠬᠰᠠᠨ ᠦᠭᠡᠢ ᠂

ᠪᠠᠩᠬᠢ ‍ᠶ᠋ᠢᠨ ᠮᠥᠩᠭᠥ ᠣᠯᠤᠭ᠎ᠠ ᠦᠭᠡᠢ ᠴᠦ᠍

ᠭᠣᠯᠣᠮᠲᠠ ᠎ᠪᠠᠨ ᠬᠠᠷᠠᠯᠠᠭᠤᠯᠤᠭᠰᠠᠨ ᠠᠶ᠋ᠢᠯ ᠪᠠᠶ᠋ᠢᠬᠰᠠᠨ ᠦᠭᠡᠢ ᠂

ᠬᠥᠨᠵᠢᠯᠡ ‍ᠶ᠋ᠢᠨ ‍ᠢᠶ᠋ᠡᠨ ᠬᠢᠷᠢ ᠎ᠪᠡᠷ ᠢᠰᠬᠦᠯᠵᠦ ᠂

ᠠᠳᠤᠭᠤᠨ ‍ᠤ ᠎ᠪᠠᠨ ᠬᠢᠷᠢ ᠎ᠪᠡᠷ ᠢᠰᠬᠡᠷᠴᠦ ᠂

ᠬᠥᠷᠥᠩᠭᠡ ᠨᠢᠮᠭᠡᠨ ᠴᠦ᠍ ᠰᠡᠳᠬᠢᠯ ᠪᠠᠶᠠᠨ ᠂

ᠬᠥᠮᠦᠨ ‍ᠢ ᠴᠢᠷᠠᠶ᠋ᠢᠳᠠᠵᠤ ᠠᠯᠠᠭ᠎ᠠ ᠲᠣᠰᠤᠯ ᠦᠭᠡᠢ ᠂

ᠠᠵᠢᠯ ᠠᠮᠢᠳᠤᠷᠠᠯ ‍ᠢᠶ᠋ᠠᠨ ᠬᠢᠵᠦ ᠂

ᠨᠡᠭᠦᠳᠡᠯ ᠰᠣᠶᠣᠯ ‍ᠢᠶ᠋ᠠᠨ ᠬᠥᠭᠵᠢᠭᠦᠯᠵᠦ ᠢᠷᠡᠭᠰᠡᠨ

ᠮᠣᠩᠭᠣᠯ ᠨᠤᠲᠤᠭ ‍ᠤᠨ ᠰᠣᠳᠣᠨ ᠮᠠᠯᠴᠢᠳ

ᠣᠳᠣ ᠬᠠᠮᠢᠭ᠎ᠠ ᠨᠢ ᠣᠷᠣᠪᠠ ?!