ᠰᠠᠷᠢᠰᠤᠨ ᠪᠠᠭᠪᠠᠬᠠᠢ ᠳᠣᠮᠣᠭ ᠦᠯᠢᠭᠡᠷ 12Сарьсан багваахай домог үлгэрҮлгэр 12
383ᠰᠠᠷᠢᠰᠤᠨ ᠪᠠᠭᠪᠠᠬᠠᠢ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠭᠡᠨᠡ᠃
ᠬᠠᠨ ᠭᠠᠷᠤᠳᠢ ᠰᠢᠪᠠᠭᠤ ᠵᠢᠭᠦᠷᠲᠡᠨ ᠦ᠌ ᠬᠠᠭᠠᠨ ᠪᠣᠯᠤᠭᠠ ᠦᠭᠡᠢ ᠲᠡᠷᠡ ᠯᠠ ᠴᠠᠭ ᠲᠤ᠌ ᠭᠡᠨᠡ᠃
ᠰᠢᠪᠠᠭᠤᠳ ᠬᠡᠨ ᠨᠢ ᠬᠠᠮᠤᠭ ᠤ᠋ᠨ ᠥᠨᠳᠥᠷ ᠲᠦ᠍ ᠨᠢᠰᠴᠦ ᠭᠠᠷᠤᠭᠠᠳ
ᠬᠠᠮᠤᠭ ᠤ᠋ᠨ ᠬᠤᠷᠳᠤᠨ ᠳᠣᠭᠣᠭᠰᠢ ᠪᠠᠨ ᠪᠠᠭᠤᠵᠤ ᠴᠢᠳᠠᠬᠤ ᠨᠢ ᠪᠣᠢ? ᠲᠡᠭᠦᠨ ᠢ᠋ ᠪᠡᠨ ᠬᠠᠭᠠᠨ ᠪᠣᠯᠭᠠᠶᠠ ᠭᠡᠵᠦ ᠪᠣᠯᠵᠣᠭᠠᠳ ᠬᠠᠮᠲᠤ ᠳᠤ ᠪᠠᠨ ᠳᠡᠭᠡᠭᠰᠢ ᠪᠡᠨ ᠨᠢᠰᠴᠡᠭᠡᠵᠡᠢ ᠭᠡᠨᠡ᠃ ᠲᠡᠭᠡᠭᠰᠡᠨ ᠴᠢᠨᠢ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ ᠡᠯᠢᠭᠡᠨ ᠳ᠋ᠦ᠍ ᠪᠡᠨ ᠬᠦᠨᠳᠦ ᠴᠢᠯᠠᠭᠤ ᠲᠡᠪᠡᠷᠢᠭᠡᠳ ᠬᠠᠨ ᠭᠠᠷᠤᠳᠢ ᠰᠢᠪᠠᠭᠤᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠭᠠᠷᠤᠭᠠᠳ ᠰᠠᠭᠤᠴᠢᠬᠠᠵᠠᠢ ᠭᠡᠨᠡ᠃
ᠬᠠᠨ ᠭᠠᠷᠤᠳᠢ ᠲᠡᠭᠦᠨ ᠢ᠋ ᠠᠩᠵᠠᠭᠠᠷᠠᠭᠰᠠᠨ ᠦᠭᠡᠢ᠂ ᠶᠡᠷᠦ ᠨᠢ ᠪᠤᠰᠤᠳ ᠰᠢᠪᠠᠭᠤ ᠴᠣ ᠠᠵᠢᠭ ᠰᠡᠵᠢᠭ ᠠᠪᠤᠭᠰᠠᠨ ᠥᠬᠡᠢ᠂ ᠪᠦᠭᠦᠳᠡ ᠯᠡ ᠳᠡᠭᠡᠭᠰᠢ ᠪᠡᠨ ᠥᠨᠳᠥᠷ ᠡᠴᠡ ᠥᠨᠳᠥᠷ ᠲᠦ᠍ ᠳᠡᠭᠦᠯᠢᠨ ᠨᠢᠰᠴᠡᠭᠡᠵᠡᠢ᠃
ᠬᠠᠨ ᠭᠠᠷᠤᠳᠢ ᠰᠢᠪᠠᠭᠤ ᠪᠦᠬᠦ ᠵᠢᠭᠦᠷᠲᠡᠨ ᠡᠴᠡ ᠬᠠᠮᠤᠭ ᠤ᠋ᠨ ᠥᠨᠳᠥᠷ ᠲᠦ᠍ ᠴᠣᠢᠯᠠᠵᠤ ᠭᠠᠷᠤᠭᠠᠳ ᠪᠢ ᠬᠠᠮᠤᠭ ᠤ᠋ᠨ ᠥᠨᠳᠥᠷ ᠲᠦ᠍ ᠭᠠᠷᠴᠢᠬᠠᠯᠠ ᠰᠢᠦ ᠳᠡ᠂ ᠶᠡᠷᠦ ᠨᠢ ᠨᠠᠳᠠ ᠠ᠋ᠴᠠ ᠳᠡᠭᠡᠭᠰᠢ ᠥᠨᠳᠥᠷ ᠲᠦ᠍ ᠭᠠᠷᠴᠤ ᠴᠢᠳᠠᠭᠰᠠᠨ ᠰᠢᠪᠠᠭᠤ ᠪᠠᠢᠨᠠ ᠤᠤ? ᠲᠠ ᠨᠠᠷ ᠤ᠋ᠨ ᠳᠣᠲᠣᠷᠠ ᠭᠡᠵᠦ ᠬᠠᠰᠬᠢᠷᠤᠭᠰᠠᠨ ᠳ᠋ᠤ᠌
ᠰᠠᠷᠢᠰᠤᠨ ᠪᠠᠭᠪᠠᠬᠠᠢ᠄
ᠪᠢ ᠪᠠᠢᠨᠠ᠁
ᠪᠢ ᠲᠠᠨ ᠠ᠋ᠴᠠ ᠳᠡᠭᠡᠷᠡ ᠭᠠᠷᠴᠢᠬᠠᠭᠰᠠᠨ ᠪᠠᠢᠨᠠ ᠰᠢᠦ ᠳᠡ᠂ ᠬᠠᠷᠢᠨ ᠣᠳᠣ ᠪᠢ ᠳᠣᠭᠣᠭᠰᠢ ᠪᠠᠨ ᠱᠤᠩᠪᠠᠭᠠᠳ ᠪᠠᠭᠤᠴᠢᠬᠠᠬᠤ ᠶᠤᠮ ᠪᠣᠯ ᠪᠣᠯᠬᠤ ᠭᠡᠳ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠡᠳ
ᠡᠯᠢᠭᠡᠨ ᠳ᠋ᠦ᠍ ᠪᠡᠨ ᠴᠢᠯᠠᠭᠤ ᠪᠠᠨ ᠪᠠᠲᠤ ᠭᠡᠭᠴᠢ ᠲᠡᠪᠡᠷᠢᠭᠡᠳ ᠬᠠᠨ ᠭᠠᠷᠤᠳᠢ ᠶ᠋ᠢᠨ ᠨᠢᠷᠤᠭᠤᠨ ᠠ᠋ᠴᠠ ᠦᠰᠦᠷᠦᠭᠡᠳ ᠭᠠᠵᠠᠷ ᠤᠷᠤᠭᠤ ᠱᠤᠩᠪᠠᠨ ᠪᠠᠭᠤᠵᠠᠢ ᠭᠡᠨᠡ᠃
ᠲᠡᠭᠡᠭᠡᠳ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ ᠶᠢ ᠡᠯᠳᠡᠪ ᠠᠵᠢᠯ ᠠ᠋ᠴᠠ ᠴᠢᠯᠥᠭᠡᠯᠡᠵᠦ ᠡᠷᠬᠡ ᠳᠠᠷᠬᠠ ᠲᠠᠢ ᠪᠣᠯᠭᠠᠵᠤ ᠰᠢᠪᠠᠭᠤ ᠨᠤᠭᠤᠳ ᠲᠡᠭᠦᠨ ᠳ᠋ᠦ᠍ ᠡᠭᠦᠷ ᠵᠠᠰᠠᠵᠤ ᠥᠭᠴᠡᠭᠡᠵᠡᠢ ᠭᠡᠨᠡ ᠰᠢᠦ᠃
ᠡᠢᠮᠦ ᠪᠣᠯᠬᠣᠷ ᠰᠢᠪᠠᠭᠤᠨ ᠤ᠋ ᠡᠭᠦᠷ ᠢ᠋
ᠪᠠᠭᠪᠠᠬᠠᠢ ᠶ᠋ᠢᠨ ᠡᠭᠦᠷ ᠭᠡᠳᠡᠭ ᠪᠣᠯᠵᠠᠢ᠃
ᠡᠨᠡ ᠶᠠᠪᠤᠳᠠᠯ ᠠ᠋ᠴᠠ ᠬᠣᠢᠰᠢ ᠣᠯᠠᠨ ᠴᠣ ᠵᠢᠯ ᠥᠩᠭᠡᠷᠡᠵᠦ ᠬᠠᠨ ᠭᠠᠷᠤᠳᠢ ᠥᠲᠡᠯᠵᠦ ᠤᠳᠤᠮ ᠤᠭᠰᠠᠭᠠ ᠪᠠᠨ ᠵᠠᠯᠭᠠᠬᠤ ᠦᠷᠡ ᠲᠡᠢ ᠪᠣᠯᠤᠶᠠ ᠭᠡᠵᠦ ᠪᠣᠳᠣᠭᠠᠳ ᠪᠠᠭᠠ ᠬᠠᠲᠤᠨ ᠵᠠᠯᠠᠵᠠᠢ ᠭᠡᠨᠡ᠃
ᠥᠯᠥᠰᠦᠭᠰᠡᠨ ᠴᠠᠭ ᠲᠤ᠌ ᠬᠣᠭᠣᠯᠠ ᠪᠣᠯᠭᠠᠨ ᠨᠢ ᠠᠮᠲᠠ ᠲᠠᠢ᠂ ᠥᠲᠡᠯᠬᠦ ᠶᠢᠨ ᠴᠠᠭ ᠲᠤ᠌ ᠡᠬᠡᠨᠡᠷ ᠪᠣᠯᠭᠠᠨ ᠰᠠᠢᠬᠠᠨ ᠭᠡᠭᠴᠢ ᠶ᠋ᠢᠨ ᠦᠯᠢᠭᠡᠷ ᠢᠶᠡᠷ ᠬᠠᠨ ᠭᠠᠷᠤᠳᠢ ᠬᠣᠷᠸᠠ ᠳ᠋ᠤ᠌ ᠬᠣᠣᠰ ᠦᠭᠡᠢ ᠰᠠᠢᠬᠠᠨ ᠡᠬᠡᠨᠡᠷ ᠲᠡᠢ ᠪᠣᠯᠤᠯᠠ ᠭᠡᠵᠦ ᠪᠣᠳᠣᠭᠠᠳ ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠪᠠᠨ ᠠᠮᠠᠷᠠᠭ ᠬᠠᠢᠷᠠ ᠲᠠᠢ ᠴᠤ᠌ ᠭᠡᠵᠦ ᠤᠴᠢᠷ ᠦᠭᠡᠢ᠃ ᠠᠮᠠᠨ ᠠ᠋ᠴᠠ ᠨᠢ ᠭᠠᠷᠤᠭᠰᠠᠨ ᠦᠭᠡ ᠪᠣᠯᠭᠠᠨ ᠢ᠋ ᠠᠯᠳᠠᠯ ᠦᠭᠡᠢ ᠳᠠᠭᠠᠳᠠᠭ ᠪᠣᠯᠵᠠᠢ ᠭᠡᠨᠡ᠃
ᠲᠡᠭᠡᠵᠦ ᠪᠠᠢᠲᠠᠯᠠ ᠬᠠᠲᠤᠨ ᠨᠢ ᠨᠢᠷᠠᠢᠯᠠᠵᠤ ᠨᠢᠭᠡᠨ ᠨᠤᠭᠤᠨ ᠬᠦᠦ ᠲᠥᠷᠥᠭᠦᠯᠵᠡᠢ ᠭᠡᠨᠡ᠃
ᠬᠠᠨ ᠭᠠᠷᠤᠳᠢ ᠣᠳᠣ ᠶᠠᠭᠠᠬᠢᠬᠤᠪ? ᠡᠢᠬᠦᠪ? ᠪᠢ ᠴᠢᠨᠢ ᠴᠢᠮᠠ ᠳ᠋ᠤ᠌ ᠪᠠᠨ ᠶᠠᠭᠠᠬᠢᠵᠤ ᠲᠤᠰᠠᠯᠠᠬᠤ ᠪᠣᠢ? ᠭᠡᠳ ᠬᠠᠲᠤᠨ ᠳᠤ ᠪᠠᠨ ᠰᠥᠭᠥᠳᠴᠦ ᠮᠥᠷᠭᠥᠵᠡᠢ᠃ ᠬᠠᠲᠤᠨ ᠭᠠᠭᠴᠠ ᠬᠦᠦ ᠪᠡᠨ ᠭᠠᠵᠠᠷ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠢᠬᠤ ᠦᠭᠡᠢ
ᠰᠠᠢᠬᠠᠨ᠁
ᠥᠯᠥᠭᠡᠢ ᠯᠡ ᠬᠢᠯᠭᠡᠮᠡᠷ ᠪᠠᠢᠨᠠ ᠭᠡᠵᠦ ᠭᠡᠨᠡ᠃ ᠰᠢᠪᠠᠭᠤᠳ ᠤ᠋ᠨ ᠬᠠᠭᠠᠨ ᠬᠠᠷᠢᠭᠤ ᠳ᠋ᠤᠨᠢ᠄
ᠠ᠁ ᠲᠡᠷᠡ ᠶᠠᠭᠤᠬᠠᠨ ᠪᠠᠢᠬᠤᠪ ᠳᠠ ᠬᠦ᠂ ᠱ᠌ᠢᠷᠦ ᠰᠤᠪᠤᠳ ᠢ᠋ᠶ᠋ᠠᠷ ᠥᠯᠥᠭᠡᠢ ᠬᠢᠯᠭᠡᠬᠦ ᠤᠤ? ᠰᠢᠵᠢᠷ ᠠᠯᠲᠠ ᠪᠠᠷ ᠥᠯᠥᠭᠡᠢ ᠬᠢᠯᠭᠡᠬᠦ ᠤᠤ? ᠬᠠᠯᠢᠶᠠ ᠮᠥᠩᠭᠥ ᠪᠡᠷ ᠥᠯᠥᠭᠡᠢ ᠬᠢᠯᠭᠡᠬᠦ ᠤᠤ? ᠬᠠᠲᠠᠭᠤ ᠽᠠᠨᠳᠠᠨ ᠢ᠋ᠶ᠋ᠠᠷ ᠥᠯᠥᠭᠡᠢ ᠬᠢᠯᠭᠡᠬᠦ ᠤᠤ? ᠭᠡᠬᠦ ᠳᠦᠨᠢ ᠬᠠᠲᠤᠨ ᠨᠢ᠄
ᠡᠨᠡ ᠶᠢᠷᠲᠢᠨᠴᠦ ᠳᠦ ᠠᠯᠲᠠ ᠮᠥᠩᠭᠥᠨ ᠥᠯᠥᠭᠡᠢ ᠪᠢᠰᠢᠭᠦᠢ ᠯᠡ ᠪᠠᠢᠭᠠ ᠪᠢᠵᠡ ᠲᠠ ᠴᠢᠨᠢ ᠬᠠᠮᠤᠭ ᠵᠢᠭᠦᠷᠲᠡᠨ ᠦ᠌ ᠬᠠᠭᠠᠨ ᠪᠣᠯᠬᠣᠷ ᠰᠢᠪᠠᠭᠤᠨ ᠤ᠋ ᠵᠦᠢᠯ ᠢ᠋ᠶ᠋ᠡᠷ ᠯᠡ ᠬᠢᠯᠭᠡᠪᠡᠯ ᠤᠭᠰᠠᠭᠠ ᠶᠠᠰᠤᠨ ᠳ᠋ᠤ᠌ ᠴᠢᠨᠢ ᠲᠠᠭᠠᠷᠠᠬᠤ ᠶᠤᠮ ᠪᠢᠰᠢ ᠤᠤ ᠭᠡᠵᠦ ᠨᠠᠭᠠᠯᠢᠩᠬᠠᠢᠲᠤᠵᠠᠢ ᠭᠡᠨᠡ᠃
ᠬᠠᠭᠠᠨ᠄
ᠵᠠ ᠪᠠᠢᠵᠠ
ᠦᠭᠡᠢ᠂ ᠲᠡᠭᠡᠭᠡᠳ ᠰᠢᠪᠠᠭᠤᠨ ᠤ᠋ ᠶᠠᠭ ᠶᠠᠭᠤ ᠪᠠᠷ ᠨᠢ ᠬᠢᠯᠭᠡᠪᠡᠯ ᠵᠦᠭᠡᠷ ᠪᠣᠢ? ᠰᠢᠪᠠᠭᠤᠨ ᠤ᠋ ᠥᠳᠥ ᠪᠡᠷ ᠬᠢᠯᠭᠡᠬᠦ ᠤᠤ? ᠡᠪᠴᠢᠭᠦᠦ ᠪᠡᠷ ᠨᠢ ᠤᠤ? ᠡᠰᠡᠬᠦᠯᠡ ᠬᠠᠪᠢᠰᠤ ᠪᠠᠷ ᠨᠢ ᠤᠤ? ᠬᠠᠲᠤᠨ ᠮᠢᠨᠢ ᠴᠢ ᠵᠣᠪᠠᠯᠲᠠ ᠦᠭᠡᠢ ᠬᠡᠯᠡ ᠠ᠋ ᠭᠡᠵᠦ ᠭᠡᠨᠡ᠃
ᠰᠢᠪᠠᠭᠤᠨ ᠤ᠋ ᠬᠣᠰᠢᠭᠤ ᠪᠠᠷ ᠨᠢ ᠬᠢᠯᠭᠡᠬᠦ ᠶᠦᠮ ᠪᠣᠯ ᠥᠩᠭᠡ ᠦᠵᠡᠮᠵᠢ ᠰᠠᠢᠨᠲᠠᠢ ᠦᠨᠡᠬᠡᠷ ᠪᠠᠲᠤ ᠪᠡᠬᠢ ᠥᠯᠥᠭᠡᠢ ᠪᠣᠯᠤᠨᠠ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍ ᠬᠠᠨ ᠭᠠᠷᠤᠳᠢ ᠵᠠᠷᠯᠢᠭ ᠪᠣᠯᠭᠠᠵᠤ ᠵᠦᠭ ᠵᠦᠭ ᠲᠡᠢᠰᠢ ᠨᠢ ᠡᠯᠴᠢ ᠶ᠋ᠢ ᠵᠠᠷᠤᠵᠤ ᠬᠠᠮᠤᠭ ᠰᠢᠪᠠᠭᠤ ᠶ᠋ᠢ ᠳᠠᠭᠤᠳᠠᠭᠤᠯᠵᠤ ᠢᠷᠡᠭᠡᠳ ᠬᠣᠰᠢᠭᠤ ᠶ᠋ᠢ ᠨᠢ ᠨᠦᠬᠡᠯᠡᠵᠦ ᠬᠠᠮᠠᠷ ᠢ᠋ᠶ᠋ᠠᠷ ᠨᠢ ᠳᠥᠷᠥᠯᠡᠨ ᠬᠢᠯᠭᠡᠵᠦ ᠭᠠᠷᠴᠠᠢ᠃ ᠢᠷᠡᠭᠰᠡᠨ ᠰᠢᠪᠠᠭᠤᠳ ᠢ᠋ ᠪᠦᠷᠢᠳᠬᠡᠵᠦ ᠦᠵᠡᠪᠡᠯ ᠬᠠᠮᠤᠭ ᠰᠢᠪᠠᠭᠤᠳ ᠢᠷᠡᠵᠦ ᠬᠠᠷᠢᠨ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ ᠯᠠ ᠠᠯᠠᠭᠠ ᠪᠠᠢᠨᠠ ᠭᠡᠨᠡ᠃ ᠬᠠᠨ ᠭᠠᠷᠤᠳᠢ ᠶ᠋ᠢᠨ ᠠᠭᠤᠷ ᠣᠮᠣᠭ ᠨᠢ ᠪᠠᠳᠠᠷᠠᠵᠤ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ ᠶ᠋ᠢ ᠬᠠᠮᠢᠭᠠ ᠪᠠᠢᠭᠠ ᠭᠠᠵᠠᠷ ᠠ᠋ᠴᠠ ᠨᠢ ᠱᠠᠯᠠᠪᠬᠠᠨ ᠠᠪᠤᠭᠠᠳ ᠢᠷᠡ ᠭᠡᠳ ᠲᠤᠰᠬᠠᠢ ᠡᠯᠴᠢ ᠶ᠋ᠢ ᠵᠠᠷᠤᠵᠠᠢ᠃
ᠬᠠᠨ ᠭᠠᠷᠤᠳᠢ ᠶ᠋ᠢᠨ ᠡᠯᠴᠢ ᠶᠠᠪᠤᠵᠤ ᠣᠴᠢᠭᠠᠳ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠠᠢᠯᠠᠳᠬᠠᠭᠰᠠᠨ ᠳ᠋ᠤ᠌ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ᠄ ᠪᠢ ᠡᠨᠡ ᠡᠳᠦᠷ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠶᠡᠬᠡ ᠪᠣᠳᠣᠯᠭᠠ ᠶ᠋ᠢ ᠪᠣᠳᠣᠭᠠᠳ ᠦᠨᠡᠬᠡᠷ ᠯᠡ ᠵᠠᠪ ᠪᠣᠯᠤᠭᠰᠠᠨ ᠦᠭᠡᠢ᠂ ᠪᠣᠳᠣᠯᠭᠠ ᠪᠠᠨ ᠪᠣᠳᠣᠵᠤ ᠳᠠᠭᠤᠰᠬᠠᠭᠠᠳ ᠮᠠᠷᠭᠠᠰᠢ ᠣᠴᠢᠶᠠ ᠭᠡᠳ ᠬᠠᠭᠠᠨᠲᠠᠨ ᠳ᠋ᠤ᠌ ᠠᠢᠯᠠᠳᠬᠠᠵᠤ ᠪᠠᠢᠭᠠᠷᠠᠢ ᠭᠡᠳ ᠪᠤᠴᠠᠭᠠᠵᠠᠢ ᠭᠡᠨᠡ᠃ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ ᠮᠠᠷᠭᠠᠰᠢ ᠨᠢ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠲᠤᠷᠰᠢᠲᠠ ᠭᠤᠷᠪᠠᠨ ᠶᠡᠬᠡ ᠪᠣᠳᠣᠯᠭᠠ ᠪᠣᠳᠣᠭᠠᠳ ᠳᠥᠩᠭᠡᠵᠦ ᠳᠠᠩᠭᠠᠵᠤ ᠳᠠᠭᠤᠰᠬᠠᠭᠠᠳ ᠢᠷᠡᠯᠡ ᠰᠢᠦ ᠳᠡ᠂ ᠬᠠᠭᠠᠨᠲᠠᠨ ᠭᠤᠸᠠᠢ ᠭᠡᠳ ᠰᠠᠨᠳᠤᠷᠴᠤ ᠲᠡᠪᠡᠳᠡᠭᠰᠡᠨ ᠴᠢᠷᠠᠢ ᠭᠠᠷᠭᠠᠵᠤ ᠰᠡᠷ ᠰᠤᠷ ᠬᠢᠭᠰᠡᠭᠡᠷ ᠬᠦᠷᠴᠦ ᠢᠷᠡᠵᠡᠢ ᠭᠡᠨᠡ᠃
ᠬᠠᠨ ᠭᠠᠷᠤᠳᠢ
ᠵᠠ ᠲᠡᠭᠡᠭᠡᠳ ᠶᠠᠮᠠᠷ ᠭᠤᠷᠪᠠᠨ ᠪᠣᠳᠣᠯᠭᠠ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠪᠤᠰᠢᠭᠤᠬᠠᠨ ᠬᠡᠯᠡ ᠭᠡᠵᠦ ᠭᠡᠨᠡ᠃
ᠨᠢᠭᠡᠳᠡᠬᠢ ᠨᠢ ᠪᠣᠯ ᠡᠨᠡ ᠶᠢᠷᠲᠢᠨᠴᠦ ᠶ᠋ᠢᠨ ᠡᠳᠦᠷ ᠨᠢ ᠣᠯᠠᠨ ᠪᠠᠢᠨᠠ ᠤᠤ? ᠠ ᠰᠥᠨᠢ ᠨᠢ ᠣᠯᠠᠨ ᠪᠠᠢᠨᠠ ᠤᠤ? ᠭᠡᠳᠡᠭ ᠢ᠋ ᠪᠢ ᠲᠣᠭᠠᠯᠠᠵᠤ ᠪᠣᠳᠣᠭᠠᠳ ᠢᠷᠡᠯᠡ ᠭᠡᠵᠡᠢ᠃
ᠲᠡᠭᠡᠭᠡᠳ ᠠᠯᠢ ᠨᠢ ᠣᠯᠠᠨ ᠪᠠᠢᠨᠠ ᠳᠠ? ᠭᠡᠵᠦ ᠬᠠᠨ ᠭᠠᠷᠤᠳᠢ ᠶ᠋ᠢ ᠠᠰᠠᠭᠤᠬᠤ ᠳ᠋ᠤ᠌ ᠄
ᠦᠦᠷ ᠦ᠋ᠨ ᠬᠠᠷᠠᠩᠭᠤᠢ ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠲᠡᠢ ᠨᠠᠷᠠ ᠦᠭᠡᠢ ᠡᠳᠦᠷ ᠢ᠋ᠶ᠋ᠡᠷ ᠦᠵᠡᠬᠦ ᠶᠦᠮ ᠪᠣᠯ ᠰᠥᠨᠢ ᠨᠢ ᠬᠠᠪᠢ ᠦᠭᠡᠢ ᠣᠯᠠᠨ ᠶᠤᠮ ᠳᠠ ᠭᠡᠵᠦ ᠭᠡᠨᠡ᠃
ᠵᠠ᠂ ᠲᠡᠢᠮᠦ ᠪᠠᠢᠳᠠᠭ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠬᠣᠶᠠᠳᠠᠬᠢ ᠨᠢ ᠶᠠᠮᠠᠷ ᠪᠣᠳᠣᠯᠭᠠ ᠪᠠᠢᠪᠠ ᠳᠠ? ᠭᠡᠬᠦ ᠳ᠋ᠦ᠍ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ᠄ ᠶᠢᠷᠲᠢᠨᠴᠦ ᠶ᠋ᠢᠨ ᠰᠢᠪᠠᠭᠤᠳ ᠢ᠋ ᠦᠬᠦᠭᠰᠡᠨ ᠨᠢ ᠣᠯᠠᠨ ᠶᠤᠮ ᠤᠤ? ᠠᠮᠢᠳᠤ ᠨᠢ ᠣᠯᠠᠨ ᠶᠤᠮ ᠤᠤ? ᠭᠡᠳᠡᠭ ᠢ᠋ ᠪᠣᠳᠣᠯᠠ᠁
ᠲᠡᠭᠡᠭᠰᠡᠨ ᠴᠢᠨᠢ ᠤᠨᠲᠠᠵᠤ ᠪᠠᠢᠭᠠ ᠰᠢᠪᠠᠭᠤ ᠶ᠋ᠢ ᠦᠬᠦᠭᠰᠡᠨ ᠳ᠋ᠦ᠍ ᠲᠣᠭᠠᠴᠠᠬᠤ ᠶᠤᠮ ᠪᠣᠯ ᠠᠮᠢᠳᠤ ᠠ᠋ᠴᠠ ᠪᠠᠨ ᠦᠬᠦᠭᠰᠡᠨ ᠨᠢ ᠬᠠᠪᠢ ᠦᠭᠡᠢ ᠣᠯᠠᠨ ᠶᠤᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠯᠠ ᠭᠡᠵᠦ ᠭᠡᠨᠡ᠃ ᠲᠡᠭᠡᠲᠡᠯᠡ ᠬᠠᠨ ᠭᠠᠷᠤᠳᠢ
ᠵᠠ᠂ ᠲᠡᠢᠮᠦ ᠪᠠᠢᠳᠠᠭ ᠪᠠᠢᠵᠠᠢ ᠃ ᠲᠡᠭᠡᠪᠡᠯ ᠭᠤᠷᠪᠠᠳᠠᠬᠢ ᠨᠢ ᠶᠠᠮᠠᠷ ᠪᠣᠳᠣᠯᠭᠠ ᠪᠠᠢᠪᠠ ᠳᠠ? ᠭᠡᠵᠦ ᠭᠡᠨᠡ᠃
ᠵᠠ᠁ ᠭᠤᠷᠪᠠᠳᠠᠬᠢ ᠨᠢ ᠪᠣᠯ᠄
ᠡᠨᠡ ᠶᠢᠷᠲᠢᠨᠴᠦ ᠶ᠋ᠢᠨ ᠰᠢᠪᠠᠭᠤᠳ ᠤ᠋ᠨ ᠡᠷᠡ ᠨᠢ ᠣᠯᠠᠨ ᠶᠤᠮ ᠪᠣᠯᠪᠠ ᠤᠤ? ᠡᠮᠡ ᠨᠢ ᠣᠯᠠᠨ ᠶᠤᠮ ᠪᠣᠯᠪᠠ ᠤᠤ? ᠭᠡᠳᠡᠭ ᠢ᠋ ᠪᠣᠳᠣᠵᠤ ᠭᠠᠷᠭᠠᠯᠠ ᠳᠠ᠂ ᠲᠡᠭᠡᠭᠡᠳ ᠡᠮᠡ ᠳ᠋ᠦ᠍ ᠪᠡᠨ ᠵᠠᠬᠢᠷᠤᠭᠳᠠᠭᠰᠠᠨ ᠡᠷᠡ ᠶ᠋ᠢ ᠡᠮᠡ ᠰᠢᠪᠠᠭᠤᠨ ᠳ᠋ᠤ᠌ ᠲᠣᠭᠠᠴᠠᠬᠤ ᠶᠤᠮ ᠪᠣᠯ ᠡᠮᠡ ᠨᠢ ᠬᠠᠪᠢ ᠦᠭᠡᠢ ᠣᠯᠠᠨ ᠪᠠᠢᠳᠠᠭ ᠶᠤᠮ ᠪᠠᠢᠨᠠ ᠁ ᠭᠡᠵᠦ ᠭᠡᠨᠡ᠃ ᠬᠠᠨ ᠭᠠᠷᠤᠳᠢ ᠢᠩᠭᠢᠵᠦ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ ᠳ᠋ᠤ᠌ ᠳᠥᠩᠭᠡᠭᠦᠯᠦᠭᠰᠡᠨ ᠳ᠋ᠦ᠍ ᠪᠡᠨ ᠢᠴᠢᠵᠦ ᠬᠣᠰᠢᠭᠤ ᠶ᠋ᠢ ᠨᠢ ᠴᠣᠭᠣᠯᠵᠤ ᠳᠥᠷᠥᠯᠡᠭᠰᠡᠨ ᠪᠦᠬᠦ ᠰᠢᠪᠠᠭᠤᠳ ᠢ᠋ ᠰᠤᠯᠠᠯᠠᠵᠤ ᠶᠠᠪᠤᠭᠤᠯᠵᠠᠢ᠃
ᠡᠨᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠰᠢᠪᠠᠭᠤᠳ ᠥᠨᠳᠡᠭᠡᠯᠡᠬᠦ ᠳ᠋ᠦ᠍ ᠪᠡᠨ ᠥᠯᠥᠭᠡᠢ ᠪᠡᠯᠡᠳᠬᠡᠳᠡᠭ ᠦᠭᠡᠢ ᠵᠥᠪᠬᠡᠨ ᠡᠭᠦᠷ ᠵᠠᠰᠠᠳᠠᠭ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ᠃ ᠰᠢᠪᠠᠭᠤᠳ ᠬᠠᠨ ᠭᠠᠷᠤᠳᠢ ᠳ᠋ᠤ᠌ ᠬᠠᠮᠠᠷ ᠢ᠋ᠶ᠋ᠠᠨ ᠳᠥᠷᠥᠯᠡᠭᠦᠯᠦᠭᠰᠡᠨ ᠦ ᠤᠴᠢᠷ ᠰᠢᠪᠠᠭᠤᠳ ᠤ᠋ᠨ ᠬᠣᠰᠢᠭᠤ ᠨᠦᠬᠡ ᠲᠡᠢ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ᠃
ᠬᠠᠷᠢᠨ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ ᠬᠠᠮᠠᠷ ᠢ᠋ᠶ᠋ᠠᠨ ᠳᠥᠷᠥᠯᠡᠭᠦᠯᠦᠭᠡ ᠦᠭᠡᠢ ᠤᠴᠢᠷ ᠠ᠋ᠴᠠ ᠬᠣᠰᠢᠭᠤ ᠨᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠦᠲᠦᠨ ᠦᠯᠡᠳᠡᠭᠰᠡᠨ ᠶᠦᠮ ᠰᠠᠨᠵᠠᠢ᠃
ᠦᠰᠦᠭ ᠬᠢᠨᠠᠭᠴᠢ᠄ ᠮᠥᠴᠢᠷ
ᠦᠰᠦᠭ ᠬᠠᠲᠠᠭᠴᠢ᠄ ᠴᠧᠨ ᠬᠤᠪᠢᠰᠬᠠᠯ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠴᠧᠨ ᠬᠤᠪᠢᠰᠬᠠᠯ