ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ – ᠫ᠂ ᠣᠶᠤᠨᠭᠡᠷᠡᠯ <ᠵᠡᠭᠦᠳᠦᠨ ᠦ᠌ ᠶᠢᠷᠲᠢᠨᠴᠦ ᠳ᠋ᠦ᠍ ᠪᠣᠳᠣᠯ ᠡᠷᠭᠢᠴᠡᠨᠡ> Элсэнд булагдсан сувдаа – П.Оюунгэрэл <Зүүдний ертөнцөд бодол эргэцнэ>
5ᠵᠡᠭᠦᠳᠦᠨ ᠦ᠌ ᠶᠢᠷᠲᠢᠨᠴᠦ ᠳ᠋ᠦ᠍ ᠪᠣᠳᠣᠯ ᠡᠷᠭᠢᠴᠡᠨᠡ
ᠭᠠᠯᠲᠤ ᠲᠡᠷᠭᠡᠨ ᠦ᠌ ᠸᠠᠭᠣᠨ ᠳ᠋ᠤ᠌ ᠲᠠᠩᠳᠠ ᠵᠢᠰᠦ ᠪᠤᠷᠤᠭᠤ ᠬᠥᠮᠦᠰ ᠪᠠᠢᠬᠤ ᠶᠤᠮ᠃ ᠮᠠᠳᠠᠢ ᠰᠢᠭᠤᠳᠠᠢ᠂ ᠲᠣᠮᠣ ᠲᠣᠮᠣ ᠰᠦᠯᠢᠶᠣᠣ ᠤᠭᠤᠲᠠ ᠸᠠᠭᠣᠨ ᠳᠦᠭᠦᠷᠡᠩ ᠦᠷᠦᠭᠡᠰᠦᠲᠡᠢ᠃ ᠬᠥᠭᠡᠴᠦᠷᠡᠭᠰᠡᠨ ᠳᠣᠷᠰᠣᠭᠣᠷ ᠰᠢᠷᠠ ᠰᠢᠲᠦ᠂ ᠥᠷᠪᠥᠭᠡᠷ ᠰᠡᠭᠰᠡᠭᠡᠷ ᠦᠰᠦ ᠰᠠᠬᠠᠯ ᠤᠬᠤᠷᠬᠠᠢ ᠳ᠋ᠠᠭᠠᠨ ᠰᠢᠷᠭᠢᠭᠰᠡᠨ ᠥᠯᠥᠨ ᠬᠤᠯᠴᠢᠭᠠᠷ ᠨᠢᠳᠦ ᠲᠡᠢ᠃ ᠴᠣᠬᠣᠮ ᠬᠥᠮᠦᠨ ᠴᠦ᠍ ᠶᠦᠮ ᠤᠤ ᠠᠯᠪᠢᠨ ᠰᠦᠭ ᠴᠦ᠍ ᠶᠦᠮ ᠤᠤ ᠪᠦᠦ ᠮᠡᠳᠡ᠃ ᠲᠡᠭᠡᠭᠡᠳ ᠪᠠᠰᠠ ᠰᠣᠩᠭᠢᠨᠠ ᠰᠠᠷᠢᠮᠰᠠᠭ ᠤ᠋ᠨ᠂ ᠲᠠᠮᠠᠬᠢᠨ ᠤ᠋᠂ ᠬᠥᠯᠥᠰᠥ ᠬᠤᠩᠭᠤᠰᠤᠨ ᠤ᠋ ᠦᠨᠦᠷ ᠭᠡᠵᠦ ᠵᠢᠭᠲᠡᠢᠬᠡᠨ᠃ ᠳᠣᠲᠣᠷᠠ ᠳᠤᠷᠠ ᠪᠤᠯᠭᠢᠵᠤ ᠪᠥᠭᠡᠯᠵᠢᠰᠦ ᠬᠤᠳᠬᠤᠨᠠ᠃
ᠲᠡᠭᠡᠪᠡᠴᠦ ᠶᠠᠭᠤᠨ ᠳ᠋ᠤ᠌ ᠴᠤ᠌ ᠶᠤᠮ ᠵᠣᠷᠢᠵᠤ ᠶᠠᠪᠤᠭᠠ ᠪᠣᠯᠬᠣᠷ ᠲᠡᠰᠪᠦᠷᠢᠯᠡᠬᠦ ᠯᠡ ᠬᠡᠷᠡᠭ᠃
ᠭᠠᠯᠲᠤ ᠲᠡᠷᠭᠡ ᠤᠭᠤᠬᠢᠯᠠᠨ ᠳᠠᠪᠬᠢᠭᠰᠠᠭᠠᠷ᠃ ᠦᠷ ᠬᠠᠶᠠᠭᠠᠷᠠᠵᠤ ᠳᠣᠷᠣᠨᠠᠲᠤ ᠲᠡᠭᠷᠢ ᠶ᠋ᠢᠨ ᠬᠢᠵᠠᠭᠠᠷ ᠲᠤ᠌ ᠤᠯᠠᠪᠤᠷ ᠰᠢᠷᠭᠠᠯ ᠭᠡᠭᠡ ᠲᠠᠲᠠᠯᠠ᠃ ᠡᠵᠡᠭᠦᠢ ᠬᠡᠭᠡᠷᠡ ᠪᠡᠷ ᠶᠠᠪᠤᠵᠤ ᠪᠠᠢᠬᠤ ᠶᠤᠮ᠃ ᠴᠣᠬᠣᠮ ᠡᠪᠦᠯ ᠴᠦ᠍ ᠶᠦᠮ ᠤᠤ ? ᠵᠤᠨ ᠴᠤ᠌ ᠶᠤᠮ ᠤᠤ? ᠢᠯᠭᠠᠭᠠ ᠨᠢ ᠣᠯᠳᠠᠬᠤ ᠦᠭᠡᠢ᠃ ᠬᠣᠵᠢᠭᠢᠷ ᠰᠢᠷᠠᠩᠭᠤᠢ ᠡᠯᠡᠰᠦ ᠮᠠᠩᠬᠠ ᠤᠯᠠᠭᠠᠨ ᠬᠠᠯᠴᠠᠭᠠᠢ ᠬᠡᠭᠡᠷᠡ ᠲᠠᠯᠠ ᠦᠷᠭᠦᠯᠵᠢᠯᠡᠨᠡ᠃
ᠡᠵᠡᠨ ᠦᠭᠡᠢ ᠬᠠᠶᠠᠭᠳᠠᠭᠰᠠᠨ ᠰᠤᠮᠤ ᠭᠠᠴᠠᠭᠠᠨ ᠤ᠋ ᠪᠠᠷᠢᠯᠭᠠ ᠪᠣᠯᠤᠯᠲᠠᠢ᠂ ᠬᠠᠭᠤᠴᠢᠷᠠᠵᠤ ᠡᠪᠳᠡᠷᠡᠭᠰᠡᠨ ᠭᠡᠷ ᠪᠠᠢᠰᠢᠩ ᠤ᠋ᠳ ᠬᠠᠷᠠᠭᠳᠠᠨᠠ᠃ ᠲᠡᠳᠡᠭᠡᠷ ᠪᠠᠷᠢᠯᠭᠠ ᠶ᠋ᠢᠨ ᠳᠤᠮᠳᠠ ᠨᠡᠯᠢᠶᠡᠳ ᠬᠡᠳᠦᠨ ᠲᠣᠭᠣᠰᠬᠠᠨ ᠠᠰᠠᠷ ᠪᠠᠢᠵᠤ ᠬᠠᠵᠠᠭᠤᠳᠠᠬᠢ ᠥᠨᠳᠥᠷ ᠲᠣᠮᠣ ᠬᠤᠯᠠᠩ ᠠ᠋ᠴᠠ ᠥᠳᠬᠡᠨ ᠬᠠᠷᠠ ᠤᠲᠤᠭᠠ ᠪᠤᠷᠭᠢᠯᠤᠨᠠ᠃ ᠲᠣᠭᠣᠰᠬᠠ ᠰᠢᠲᠠᠭᠠᠳᠠᠭ ᠭᠠᠵᠠᠷ ᠪᠣᠯᠤᠯᠲᠠᠢ᠃
ᠪᠢ ᠤᠭ ᠨᠢ ᠡᠨᠡ ᠭᠠᠵᠠᠷ ᠲᠤ᠌ ᠢᠷᠡᠵᠦ ᠪᠠᠢᠭᠰᠠᠨ ᠴᠤ᠌ ᠰᠢᠭ᠋ ᠪᠣᠳᠣᠭᠳᠠᠨᠠ᠃ ᠲᠡᠭᠡᠪᠡᠴᠦ ᠴᠣᠬᠣᠮ ᠶᠠᠮᠠᠷ ᠭᠠᠵᠠᠷ ᠪᠣᠯᠬᠤ ᠶ᠋ᠢ ᠪᠣᠳᠣᠵᠤ ᠣᠯᠬᠤ ᠦᠭᠡᠢ ᠶᠦᠮ᠃ ᠰᠡᠳᠬᠢᠯ ᠨᠢᠭᠡ ᠯᠡ ᠤᠢᠳᠬᠠᠷ ᠭᠤᠨᠢᠭ ᠲᠠᠢ᠂ ᠦᠭᠡᠢ ᠶᠡᠷᠦᠨᠢ ᠬᠠᠷᠠᠩᠭᠤᠢ ᠰᠥᠨᠢ ᠥᠨᠥᠴᠢᠨ ᠭᠠᠭᠴᠠᠭᠠᠷ ᠡᠢᠮᠦ ᠣᠯᠠᠨ 《ᠠᠯᠪᠢᠨ ᠰᠦᠭ》 ᠦ᠋ᠳ ᠲᠡᠢ ᠬᠠᠮᠢᠭᠠ ᠶᠠᠭᠤᠨ ᠳ᠋ᠤ᠌ ᠶᠠᠪᠤᠭᠠ ᠪᠢᠯᠡ ᠭᠡᠵᠦ ᠥᠪᠡᠷ ᠢ᠋ ᠪᠡᠨ ᠬᠠᠴᠢᠷᠬᠠᠨᠠ᠃
ᠪᠣᠳᠣᠪᠠᠯ ᠶᠠᠮᠠᠷ ᠨᠢᠭᠡ ᠥᠷᠲᠡᠭᠡᠨ ᠳ᠋ᠦ᠍ ᠬᠦᠷᠴᠢᠬᠡᠭᠰᠡᠨ ᠪᠣᠯᠤᠯᠲᠠᠢ᠃ ᠭᠠᠯᠲᠤ ᠲᠡᠷᠭᠡ ᠵᠣᠭᠰᠣᠵᠤ ᠨᠥᠭᠦᠭᠡ ᠮᠠᠳᠠᠢ ᠡᠭᠦᠷᠦᠭᠰᠡᠨ 《ᠠᠯᠪᠢᠨ》 ᠨᠤᠭᠤᠳ ᠪᠠᠭᠤᠵᠠᠭᠠᠵᠤ ᠴᠠᠷᠴᠠᠬᠠᠢ ᠶ᠋ᠢᠨ ᠰᠦᠷᠦᠭ ᠰᠢᠭ ᠨᠢᠭᠡ ᠲᠠᠰᠢ ᠪᠠᠨ ᠨᠥᠮᠥᠷᠦᠭᠡᠳ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠠᠯᠠᠭᠠ ᠪᠣᠯᠪᠠ᠃
ᠪᠢ ᠭᠠᠭᠴᠠᠭᠠᠷ ᠬᠣᠴᠣᠷᠤᠭᠰᠠᠨ ᠪᠠᠢᠪᠠ᠃ ᠠᠢᠩᠭᠤᠷᠢ ᠲᠥᠷᠥᠵᠦ᠂ ᠵᠢᠷᠦᠬᠡ ᠲᠦᠭᠰᠢᠨᠡ᠃ ᠭᠡᠨᠡᠳᠲᠡ ᠲᠡᠷᠡ ᠬᠣᠯᠠ ᠠᠨᠠᠪᠠᠳ ᠳᠠᠯᠠᠢ ᠶ᠋ᠢᠨ ᠳᠤᠮᠳᠠᠬᠢ ᠥᠨᠥᠴᠢᠨ ᠠᠷᠠᠯ ᠰᠢᠭ᠋ ᠴᠡᠩᠬᠡᠷ ᠤᠨᠢᠶᠠᠷ ᠲᠠᠲᠠᠭᠰᠠᠨ ᠬᠡᠰᠡᠭᠬᠡᠨ ᠨᠣᠭᠣᠭᠠᠨ ᠳᠡᠨᠵᠢ ᠬᠠᠷᠠᠭᠳᠠᠯᠠ᠃ ᠮᠠᠩᠭᠢᠷ ᠳᠠᠭᠠᠨᠠ ᠶ᠋ᠢᠨ ᠠᠩᠬᠢᠯᠤᠮᠠ ᠦᠨᠦᠷ ᠰᠡᠩᠭᠢᠨᠡᠵᠦ ᠵᠤᠰᠠᠯᠠᠩ ᠤ᠋ᠨ ᠰᠡᠷᠢᠭᠦᠨ ᠳᠡᠨᠵᠢᠨ ᠳ᠋ᠦ᠍ ᠣᠭᠣᠰᠣᠷ ᠪᠦᠴᠡ ᠦᠭᠡᠢ ᠣᠷᠳᠣᠨ ᠴᠠᠭᠠᠨ ᠭᠡᠷ ᠦ᠋ᠳ ᠵᠡᠷᠭᠡᠯᠭᠡᠨ ᠳᠤᠮᠳᠠ ᠵᠢᠷᠢᠯᠵᠡᠨ ᠴᠠᠢᠯᠵᠠᠨᠠ᠃
ᠦᠨᠢᠶᠡ ᠲᠤᠭᠤᠯ ᠮᠥᠭᠡᠷᠡᠯᠳᠦᠵᠦ ᠪᠤᠬᠠ ᠤᠷᠤᠮᠳᠠᠨ ᠬᠣᠨᠢ ᠢᠮᠠᠭᠠ ᠮᠠᠢᠯᠠᠯᠳᠤᠨ ᠠᠳᠤᠭᠤᠳ ᠢᠨᠴᠠᠭᠠᠯᠳᠤᠵᠤ ᠤᠨᠠᠭᠠ ᠰᠠᠷᠪᠠ ᠲᠣᠩᠭᠣᠴᠢᠨ ᠲᠣᠭᠯᠠᠨᠠ᠃ ᠠᠨᠢᠷ ᠬᠣᠯᠠ ᠠ᠋ᠴᠠ ᠮᠣᠷᠢᠨ ᠬᠤᠭᠤᠷ ᠤ᠋ᠨ ᠢᠷᠠᠭᠤ ᠵᠥᠭᠡᠯᠡᠨ ᠠᠶᠠᠰ ᠡᠬᠡ ᠪᠡᠨ ᠰᠠᠨᠠᠭᠰᠠᠨ ᠥᠨᠥᠴᠢᠨ ᠪᠣᠲᠣᠭᠣ ᠶ᠋ᠢᠨ ᠪᠤᠢᠯᠠᠭᠠ ᠰᠢᠭ᠋ ᠡᠷᠲᠡ ᠶ᠋ᠢᠨ ᠠᠭᠠᠷ ᠠ᠋ᠴᠠ ᠳᠣᠯᠭᠢᠶᠠᠯᠠᠨ ᠨᠠᠭᠠᠰᠢᠯᠠᠨᠠ᠃ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠲᠣᠮᠣ ᠴᠠᠭᠠᠨ ᠭᠡᠷ ᠦ᠋ᠨ ᠳᠡᠷᠭᠡᠳᠡ ᠡᠴᠡ ᠪᠢᠷᠠᠭᠤ ᠰᠢᠭ᠋ ᠮᠣᠩᠭᠣᠯ ᠭᠠᠷᠵᠢ ᠠᠷᠬᠢᠷᠠᠭᠰᠠᠭᠠᠷ ᠥᠭᠡᠳᠡ ᠡᠴᠡ ᠭᠦᠶᠦᠵᠦ ᠢᠷᠡᠪᠡ᠃ 《ᠨᠣᠬᠠᠢ ᠬᠣᠷᠢ》 ᠭᠡᠵᠦ ᠴᠢᠨᠡᠭᠡ ᠮᠡᠳᠡᠨ ᠬᠠᠰᠬᠢᠷᠤᠭᠰᠠᠨ ᠴᠤ᠌ ᠭᠠᠷᠴᠤ ᠢᠷᠡᠭᠰᠡᠨ ᠬᠥᠮᠦᠨ ᠦᠭᠡᠢ᠃
ᠪᠢ ᠨᠣᠬᠠᠢ ᠶ᠋ᠢ ᠵᠠᠩᠳᠠᠴᠢᠨ ᠪᠠᠢᠵᠤ ᠭᠡᠷ ᠲᠦ᠍ ᠣᠷᠣᠪᠠᠯ ᠬᠠᠳᠠᠮ ᠨᠠᠭᠠᠴᠤ ᠡᠵᠢ ᠵᠤᠤᠬᠠᠨ ᠤ᠋ ᠪᠠᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠵᠤ᠂ ᠲᠣᠮᠣ ᠰᠢᠷᠡᠮᠦᠨ ᠲᠣᠭᠣᠭᠠ ᠲᠠᠢ ᠴᠠᠢ ᠪᠠᠨ ᠤᠷᠲᠤ ᠡᠰᠢ ᠲᠡᠢ ᠭᠠᠤᠯᠢᠨ ᠰᠢᠨᠠᠭᠠ ᠪᠠᠷ ᠰᠠᠮᠤᠷᠴᠤ᠂ ᠨᠠᠭᠠᠴᠤ ᠠᠪᠤ ᠬᠣᠢᠮᠣᠷ ᠲᠠᠭᠠᠨ ᠭᠡᠳᠡᠢᠨ ᠰᠠᠭᠤᠭᠠᠳ ᠬᠠᠰ ᠰᠢᠯᠪᠢ ᠲᠡᠢ ᠤᠷᠲᠤ ᠳ᠋ᠠᠢ ᠪᠠᠨ ᠰᠣᠷᠣᠵᠤ ᠰᠢᠩᠭᠡᠨ ᠴᠡᠩᠬᠡᠷ ᠤᠲᠤᠭᠠ ᠮᠠᠨᠠᠷᠠᠭᠤᠯᠤᠨᠠ᠃
ᠪᠦᠯᠦ ᠳᠡᠭᠦᠦ ᠪᠠᠷᠠᠭᠤᠨ ᠬᠠᠶᠠᠭᠠᠨ ᠳ᠋ᠤ᠌ ᠰᠠᠭᠤᠵᠤ ᠤᠷᠭᠠ ᠶ᠋ᠢᠨ ᠴᠡᠭᠡᠵᠢ ᠵᠠᠰᠠᠵᠤ ᠪᠠᠢᠬᠤ ᠶᠤᠮ᠃ ᠲᠥᠭᠡᠷᠢᠵᠦ ᠶᠠᠪᠤᠭᠰᠠᠭᠠᠷ ᠲᠥᠷᠥᠯ ᠳ᠋ᠡᠭᠡᠨ ᠭᠡᠭᠴᠢ ᠪᠡᠷ ᠪᠢ ᠶᠣᠰᠣᠲᠠᠢ ᠶᠡᠬᠡ ᠪᠠᠶᠠᠷᠯᠠᠵᠤ ᠨᠠᠭᠠᠴᠤ ᠠᠪᠤ ᠡᠵᠢ ᠳ᠋ᠦ᠍ ᠡᠪᠦᠳᠦᠭ ᠳᠠᠷᠤᠨ ᠠᠮᠤᠷ ᠡᠷᠢᠵᠦ᠂ ᠪᠦᠯᠦ ᠳᠡᠭᠦᠦ ᠲᠡᠢ ᠮᠠᠨᠳᠤᠯᠠᠪᠠᠯ ᠬᠡᠨ ᠨᠢ ᠴᠦ᠍ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠬᠥᠮᠦᠨ ᠣᠷᠣᠵᠤ ᠣᠴᠢᠭᠰᠠᠨ ᠢ᠋ ᠬᠠᠷᠠᠭᠠ ᠦᠭᠡᠢ ᠶᠦᠮ ᠰᠢᠭ ᠰᠠᠭᠤᠵᠠᠭᠠᠨᠠ᠃
ᠪᠢ ᠪᠦᠷ ᠭᠠᠢᠬᠠᠵᠤ ᠬᠣᠴᠣᠷᠪᠠ᠃ ᠨᠠᠭᠠᠴᠤ ᠡᠵᠢ ᠪᠣᠯ ᠮᠢᠨᠦ ᠬᠠᠳᠠᠮ ᠡᠵᠢ ᠲᠡᠢ ᠢᠬᠡᠷᠡ ᠲᠥᠷᠥᠭᠰᠡᠨ ᠡᠭᠡᠴᠢ ᠳᠡᠭᠦᠦ᠃ ᠮᠠᠰᠢ ᠡᠨᠡᠷᠢᠩᠭᠦᠢ ᠰᠡᠳᠬᠢᠯ ᠲᠡᠢ ᠰᠠᠢᠬᠠᠨ ᠡᠵᠢ ᠶᠤᠮᠰᠠᠨ᠃ ᠥᠪᠡᠷ ᠦ᠋ᠨ ᠰᠠᠳᠤᠨ ᠲᠥᠷᠥᠯ ᠦ᠋ᠨ ᠬᠡᠦᠬᠡᠳ ᠠᠴᠢᠨᠠᠷ ᠢ᠋ᠶ᠋ᠠᠨ ᠭᠡᠪᠡᠯ ᠶᠣᠰᠣᠲᠠᠢ ᠥᠨᠥᠴᠢᠨ ᠡᠯᠢᠭᠡ ᠨᠢ ᠲᠠᠲᠠᠯᠳᠤᠨ ᠲᠤᠩ ᠴᠤ᠌ ᠬᠠᠢᠷᠠᠯᠠᠳᠠᠭ ᠪᠢᠯᠡ᠃ ᠨᠠᠮᠠᠶ᠋ᠢ ᠣᠴᠢᠬᠤ ᠪᠣᠯᠭᠠᠨ《ᠪᠣᠣᠷᠠᠢ (ᠡᠨᠳᠡᠬᠢ ᠶ᠋ᠢᠨ ᠬᠥᠮᠦᠰ ᠬᠡᠦᠬᠡᠳ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠡᠩᠬᠦᠷᠡᠢᠯᠡᠵᠦ ᠳᠠᠭᠤᠳᠠᠳᠠᠭ ᠳᠠᠭᠤᠳᠠᠯᠭᠠ) ᠪᠡᠷᠢ ᠬᠣᠶᠠᠷ ᠮᠢᠨᠢ ᠢᠷᠡᠴᠢᠬᠡᠯᠡ 》 ᠭᠡᠳ ᠰᠦᠢᠳ ᠪᠣᠯᠵᠤ ᠠᠯᠢ ᠪᠠᠢᠭᠰᠠᠨ ᠠᠮᠲᠠ ᠰᠢᠮᠲᠡᠲᠡᠢ ᠪᠡᠨ ᠭᠠᠷᠭᠠᠵᠤ ᠳᠠᠢᠯᠠᠨᠠ᠃ ᠪᠦᠯᠦ ᠳᠡᠭᠦᠦ ᠶ᠋ᠢ ᠨᠡᠩ ᠶᠠᠭᠤ ᠬᠡᠯᠡᠬᠦᠪ᠃ ᠠᠬᠠ ᠲᠠᠢ ᠪᠠᠨ ᠪᠦᠯᠦ ᠪᠡᠷ ᠪᠠᠷᠠᠬᠤ ᠦᠭᠡᠢ ᠤᠨᠠᠭᠠᠨ ᠪᠠᠭᠠ ᠶ᠋ᠢᠨ ᠨᠠᠢᠵᠠ ᠪᠣᠯᠳᠠᠭ᠃ ᠲᠡᠷᠡ ᠬᠣᠶᠠᠭᠤᠯᠠ ᠳ᠋ᠤ᠌ ᠬᠡᠯᠡᠵᠦ ᠶᠠᠷᠢᠳᠠᠭ ᠦᠭᠡᠢ ᠨᠢᠭᠤᠴᠠ ᠭᠡᠵᠦ ᠶᠡᠷᠦ ᠪᠠᠢᠳᠠᠭ ᠦᠭᠡᠢ᠃ 《ᠰᠠᠢᠨ ᠪᠡᠷᠭᠡᠨ ᠡᠵᠢ ᠡᠴᠡ ᠠᠬᠠᠳᠠᠨᠠ》 ᠭᠡᠳᠡᠭ ᠶᠦᠮ᠃ ᠲᠡᠭᠡᠭᠡᠳ ᠴᠦ᠍《ᠪᠡᠷᠭᠡᠨ ᠬᠥᠮᠦᠨ ᠪᠡᠯᠡᠨ ᠰᠠᠢᠬᠠᠨ》ᠭᠡᠭᠴᠢ ᠪᠡᠷ《ᠭᠡᠭᠡᠨ ᠮᠡᠷᠭᠡᠨ ᠪᠡᠷᠭᠡᠨ ᠲᠠᠨ ᠤ᠋ ᠠᠮᠤᠷ ᠢ᠋ ᠡᠷᠢᠶᠡ》 ᠭᠡᠵᠦ ᠨᠠᠳᠠ ᠪᠠᠷ ᠲᠠᠩᠳᠠ ᠱᠣᠭᠯᠠᠳᠠᠭ᠃
ᠣᠳᠣ ᠲᠡᠭᠡᠭᠡᠳ ᠡᠳᠡ ᠨᠠᠷ ᠮᠠᠨᠢ ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠲᠡᠷᠡ ᠪᠣᠢ᠂ ᠮᠡᠨᠳᠦ ᠰᠠᠢᠨ ᠤᠤ ᠴᠦ᠍ ᠦᠭᠡᠢ᠃ ᠨᠥᠬᠥᠷ ᠮᠢᠨᠢ ᠡᠷᠲᠡ ᠨᠥᠭᠴᠢᠵᠦ᠂ ᠡᠳᠡᠨᠥᠰ ᠮᠢᠨᠢ ᠨᠠᠳᠠ ᠠ᠋ᠴᠠ ᠵᠠᠢᠳᠠᠵᠤ ᠬᠥᠨᠳᠡᠢᠷᠡᠭᠡ ᠦᠭᠡᠢ ᠪᠢᠵᠡ ᠬᠥᠭᠡᠷᠦᠬᠦᠢ ᠭᠡᠵᠦ ᠪᠣᠳᠣᠭᠳᠠᠨ ᠰᠡᠳᠬᠢᠯ ᠬᠠᠴᠢᠨ ᠡᠮᠵᠡᠭᠯᠡᠨ ᠭᠣᠮᠣᠳᠠᠨᠠ᠃ ᠦᠭᠡᠢ᠂ ᠨᠢᠭᠡ ᠪᠣᠳᠣᠪᠠᠯ ᠡᠳᠡᠨᠥᠰ ᠮᠠᠨᠢ ᠲᠠᠯᠢᠢᠭᠴᠢ᠂ ᠪᠣᠯᠤᠭᠠᠳ ᠤᠳᠠᠵᠤ ᠪᠠᠢᠭᠠ ᠪᠢᠰᠢ ᠪᠢᠯᠡ ᠤᠤ? ᠪᠢ ᠶᠡᠷᠦᠨᠢ ᠳ᠋ᠧᠪᠠᠵᠠᠨ ᠳ᠋ᠤ᠌ ᠶᠠᠪᠤᠭᠠ ᠶᠤᠮ ᠤᠤ? ᠡᠷᠯᠢᠭ ᠲᠠᠮᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠲᠡᠨᠦᠵᠦ ᠶᠠᠪᠤᠨᠠ ᠤᠤ? ᠲᠠᠩᠳᠠ ᠯᠠ ᠥᠩᠭᠡᠷᠡᠵᠦ ᠲᠡᠯᠢᠢᠭᠰᠡᠨ ᠬᠥᠮᠦᠰ ᠲᠡᠢ ᠪᠡᠨ ᠤᠴᠠᠷᠠᠭᠠᠳ ᠪᠠᠢᠳᠠᠭ ᠴᠢᠨᠢ?
ᠨᠢᠳᠦᠨ ᠡᠮᠦᠨᠡᠭᠦᠷ ᠭᠣᠵᠣᠭᠣᠷ ᠴᠠᠭᠠᠨ ᠶᠠᠭᠤᠮᠠᠰ ᠪᠥᠷᠲᠥᠯᠵᠡᠨ ᠬᠥᠳᠡᠯᠦᠭᠡᠳ ᠪᠠᠢᠬᠤ ᠰᠢᠭ᠋ ᠶᠦᠮ᠃
— ᠬᠠᠯᠠᠭᠤᠨ ᠨᠢ ᠳᠥᠴᠢᠨ ᠭᠷᠠᠳᠦ᠋ᠰ ᠬᠦᠷᠴᠦ ᠪᠠᠢᠨᠠ᠃
— ᠰᠤᠳᠠᠯ ᠤ᠋ᠨ ᠵᠡᠭᠦᠦ ᠶᠡᠭᠦᠯᠡᠵᠦ ᠲᠠᠷᠢᠯᠭᠠ ᠬᠢ!
— ᠬᠠᠯᠠᠭᠤᠨ ᠨᠢ ᠪᠠᠭᠤᠷᠠᠬᠤ ᠦᠭᠡᠢ ᠭᠤᠷᠪᠠ ᠬᠣᠨᠣᠯᠠ ᠭᠡᠬᠦ ᠳᠠᠭᠤᠨ ᠭᠠᠵᠠᠷ ᠤ᠋ᠨ ᠲᠤᠢᠯ ᠠ᠋ᠴᠠ ᠭᠠᠷᠴᠤ ᠪᠠᠢᠬᠤ ᠰᠢᠭ᠋ ᠪᠦᠷᠦᠭ ᠬᠣᠯᠠ ᠰᠣᠨᠣᠰᠳᠠᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠭᠦᠯᠡᠩᠬᠤᠸᠠᠷ᠂ ᠪᠠᠢ᠂ ᠰᠠᠷᠠᠨᠠ᠂ ᠮᠥᠩᠭᠥᠨ
ᠬᠢᠨᠠᠭᠴᠢ ᠪᠠᠭᠰᠢ᠄ ᠠᠯᠲᠠᠨᠴᠢᠮᠡᠭ᠂ ᠬᠡᠯᠡᠰᠣᠶᠣᠯ᠂ ᠰᠣᠨᠢᠨᠪᠠᠶᠠᠷ᠂ ᠪᠠᠯ᠂ ᠭᠠᠷᠮᠠ᠂ ᠣᠳᠬᠠᠨᠰᠣᠠ