ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ – ᠫ᠂ ᠣᠶᠤᠨᠭᠡᠷᠡᠯ <ᠠᠪᠤ ᠶᠢᠨ ᠳᠦᠷᠢ ᠲᠠᠢ ᠡᠭᠦᠯᠡ> Элсэнд булагдсан сувдаа – П.Оюунгэрэл <Аавын дүртэй үүл>
6ᠠᠪᠤ ᠶ᠋ᠢᠨ ᠳᠦᠷᠢ ᠲᠡᠢ ᠡᠭᠦᠯᠡ
ᠳᠥᠴᠢᠨ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠬᠠᠪᠤᠷ ᠤ᠋ᠨ ᠨᠢᠭᠡ ᠡᠳᠦᠷ ᠪᠠᠢᠯᠠ᠃
ᠤᠮᠠᠷᠠᠲᠤ ᠣᠷᠣᠨ ᠤ᠋ ᠬᠥᠳᠡᠭᠡ ᠨᠤᠲᠤᠭ ᠤ᠋ᠨ ᠴᠡᠩᠬᠡᠷ ᠣᠭᠲᠠᠷᠭᠤᠢ ᠳ᠋ᠤ᠌ ᠬᠥᠪᠥᠩ ᠴᠠᠭᠠᠨ ᠡᠭᠦᠯᠡᠰ ᠬᠥᠪᠦᠯᠵᠡᠩᠬᠡᠨ ᠨᠡᠭᠦᠳᠡᠯᠯᠡᠵᠦ᠂ ᠤᠷᠢᠬᠠᠨ ᠬᠠᠪᠤᠷ ᠤ᠋ᠨ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠡᠬᠡ ᠭᠠᠵᠠᠷ ᠢ᠋ ᠢᠪᠡᠭᠡᠨ ᠳᠤᠯᠠᠢᠨᠠ᠃
ᠮᠥᠩᠬᠡ ᠤᠷᠤᠰᠬᠠᠯᠲᠤ ᠰᠡᠩᠰᠡᠨ ᠪᠤᠯᠠᠭ ᠤ᠋ᠨ ᠲᠤᠩᠭᠠᠯᠠᠭ ᠤᠷᠤᠰᠬᠠᠯ ᠴᠡᠯᠡᠭᠡᠷ ᠲᠠᠯᠠ ᠶ᠋ᠢ ᠡᠮᠵᠢᠶᠡᠷᠢᠯᠡᠨ ᠴᠡᠩᠬᠡᠷ ᠳᠣᠯᠭᠢᠶᠠᠨ ᠮᠢᠷᠠᠯᠵᠠᠭᠤᠯᠤᠨ ᠡᠮᠦᠨᠡᠰᠢ ᠤᠷᠤᠰᠤᠨᠠ᠃ ᠪᠤᠯᠠᠭ ᠤ᠋ᠨ ᠤᠰᠤ ᠬᠠᠯᠢᠶᠠᠯᠠᠨ ᠲᠡᠯᠡᠵᠦ᠂ ᠲᠡᠭᠡᠭ ᠭᠡᠳᠡᠭ ᠬᠣᠯᠪᠣᠭᠠ ᠬᠣᠶᠠᠷ ᠲᠣᠯᠣᠭᠠᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠲᠤᠯᠲᠠᠯᠠ ᠲᠣᠯᠢ ᠰᠢᠭ᠋ ᠲᠤᠩᠭᠠᠯᠠᠭ ᠨᠠᠭᠤᠷ ᠲᠣᠭᠲᠠᠵᠠᠢ᠃ ᠰᠡᠩᠰᠡᠨ ᠪᠤᠯᠠᠭ ᠤ᠋ᠨ ᠠᠳᠠᠭ ᠭᠡᠵᠦ ᠲᠡᠮᠡᠭᠡ ᠲᠡᠢ ᠬᠥᠮᠦᠨ ᠦᠵᠡᠭᠳᠡᠮᠡ ᠦᠭᠡᠢ ᠥᠨᠳᠥᠷ ᠳᠠᠷᠠᠰᠤ ᠲᠠᠢ ᠥᠷᠭᠡᠨ ᠲᠠᠯᠠ ᠪᠠᠢᠳᠠᠭ ᠪᠠᠢᠯᠠ᠃
ᠤᠰᠤᠨ ᠤ᠋ ᠰᠤᠷᠪᠤᠯᠵᠢ ᠰᠠᠢᠲᠠᠢ ᠡᠨᠡ ᠨᠤᠲᠤᠭ ᠵᠢᠯ ᠪᠦᠷᠢ ᠡᠷᠲᠡ ᠬᠠᠪᠤᠷ ᠢ᠋ ᠤᠭᠲᠤᠳᠠᠭ ᠪᠠᠢᠯᠠ᠃ ᠬᠠᠭᠳᠠ ᠬᠥᠬᠡᠷᠡᠵᠦ ᠢᠷᠭᠤᠢ ᠨᠢᠳᠦᠯᠡᠭᠡᠳ ᠴᠠᠬᠢᠯᠳᠠᠭ ᠤ᠋ᠨ ᠬᠥᠬᠡ ᠴᠡᠴᠡᠭ ᠳᠡᠯᠪᠢ ᠪᠡᠨ ᠳᠡᠯᠭᠡᠨ ᠮᠦᠰᠢᠶᠡᠨᠡ᠃
ᠨᠣᠮᠢᠨ ᠴᠡᠩᠬᠡᠷ ᠥᠩᠭᠡ ᠪᠡᠷ ᠬᠠᠨᠠᠷᠠᠭᠰᠠᠨ ᠨᠠᠭᠤᠷ ᠤ᠋ᠨ ᠤᠰᠤᠨ ᠳ᠋ᠤ᠌ ᠭᠠᠯᠠᠭᠤ ᠠᠩᠭᠢᠷ ᠭᠡᠳ ᠵᠦᠢᠯ ᠪᠦᠷᠢ ᠶ᠋ᠢᠨ ᠰᠢᠪᠠᠭᠤᠳ ᠡᠬᠡ ᠪᠠᠢᠭᠠᠯᠢ ᠶ᠋ᠢᠨ ᠢᠷᠠᠭᠤ ᠰᠠᠢᠬᠠᠨ ᠠᠶᠠ ᠡᠭᠡᠰᠢᠭ ᠢ᠋ ᠤᠶᠠᠩᠭᠠᠯᠠᠨ ᠳᠣᠩᠭᠣᠳᠤᠨᠠ᠃ ᠨᠡᠭᠦᠳᠡᠯ ᠦ᠋ᠨ ᠴᠠᠭᠠᠨ ᠬᠤᠨ ᠢᠷᠡᠵᠦ ᠪᠤᠴᠠᠬᠤ ᠳ᠋ᠠᠭᠠᠨ ᠵᠠᠪᠠᠯ ᠡᠨᠡ ᠨᠠᠭᠤᠷ ᠲᠤ᠌ ᠪᠠᠭᠤᠵᠤ ᠠᠮᠠᠷᠠᠭᠠᠳ ᠶᠠᠪᠤᠳᠠᠭ ᠪᠠᠢᠯᠠ᠃
ᠬᠥᠨᠳᠡᠢ ᠭᠡᠳᠡᠭ ᠨᠡᠷᠡ ᠲᠡᠢ ᠬᠠᠳᠠ ᠲᠠᠢ ᠬᠤᠰᠢᠭᠤᠨ ᠤ᠋ ᠡᠩᠭᠡᠷ ᠲᠦ᠍ ᠬᠠᠪᠤᠷᠵᠢᠶᠠᠨ ᠳ᠋ᠠᠭᠠᠨ ᠪᠠᠢᠭᠠ ᠥᠨᠳᠡᠭᠡᠨ ᠴᠠᠭᠠᠨ ᠭᠡᠷ ᠦ᠋ᠳ ᠵᠡᠷᠭᠡᠯᠭᠡᠨ ᠳᠤᠮᠳᠠ ᠠᠯᠤᠰᠠ᠋ᠴᠠ ᠴᠠᠢᠯᠵᠠᠨ ᠬᠠᠷᠠᠭᠳᠠᠨᠠ᠃
ᠬᠠᠪᠤᠷ ᠤ᠋ᠨ ᠤᠷᠢᠬᠠᠨ ᠰᠠᠯᠬᠢᠨ ᠳ᠋ᠤ᠌ ᠳᠠᠷᠠᠰᠤ ᠳᠠᠭᠠᠵᠤ ᠬᠤᠷᠠᠭᠠ ᠲᠠᠢ ᠬᠣᠨᠢᠳ ᠪᠡᠯᠴᠢᠭᠡᠷᠯᠡᠨᠡ᠃ ᠰᠦᠨ ᠳ᠋ᠡᠭᠡᠨ ᠴᠠᠳᠴᠤ ᠬᠥᠷᠥᠪᠡᠵᠢᠵᠦ ᠪᠠᠢᠭᠠ ᠢᠰᠢᠭᠡ ᠬᠤᠷᠠᠭᠠ ᠨᠤᠭᠤᠳ ᠦᠰᠦᠷᠦᠨ ᠲᠣᠩᠭᠣᠴᠢᠨ ᠲᠣᠭᠯᠠᠨᠠ᠃
ᠬᠤᠷᠠᠭᠠ ᠲᠠᠢ ᠬᠣᠨᠢ ᠬᠠᠷᠢᠭᠤᠯᠵᠤ ᠶᠠᠪᠤᠭᠠ ᠨᠢ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠵᠢᠭᠠᠯ ᠥᠬᠢᠨ᠃
ᠰᠠᠯᠠᠭᠠᠯᠠᠵᠤ ᠬᠦᠷᠦᠭᠰᠡᠨ ᠰᠢᠷᠠᠮᠠᠩ ᠭᠡᠵᠢᠭᠡ᠂ ᠮᠠᠷᠢᠶᠠᠯᠢᠭ ᠪᠣᠨᠲᠣᠭᠣᠷ ᠤᠯᠠᠭᠠᠨ ᠬᠠᠴᠠᠷ᠂ ᠰᠡᠷᠭᠦᠯᠡᠩ ᠪᠣᠷᠣ ᠨᠢᠳᠦ ᠲᠡᠢ᠂ ᠴᠢᠪᠠᠭᠠᠨ ᠤᠯᠠᠭᠠᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠴᠢᠩᠭᠠ ᠵᠢᠮᠢᠢᠭᠰᠡᠨ ᠨᠢ ᠨᠠᠰᠤᠨ ᠳ᠋ᠠᠭᠠᠨ ᠲᠣᠬᠢᠷᠠᠮᠠ ᠦᠭᠡᠢ ᠲᠥᠪᠯᠡᠭᠦᠨ ᠬᠠᠷᠠᠭᠳᠠᠨᠠ᠃
ᠵᠢᠭᠠᠯ ᠥᠬᠢᠨ ᠰᠠᠴᠤᠮᠠᠯ ᠬᠡ ᠲᠡᠢ ᠪᠣᠷᠣ ᠥᠩᠭᠡᠲᠡᠢ ᠬᠥᠪᠥᠩ ᠳᠡᠪᠡᠯ ᠡᠮᠦᠰᠴᠦ ᠴᠡᠩᠬᠡᠷ ᠳᠤᠷᠳᠤᠩ ᠪᠦᠰᠡ ᠶ᠋ᠢ ᠴᠢᠪᠬᠢᠲᠡᠯᠡ ᠪᠦᠰᠡᠯᠡᠵᠦ ᠭᠤᠷᠪᠠ ᠪᠠᠷ ᠰᠠᠷᠢᠰᠤᠯᠠᠭᠰᠠᠨ ᠡᠭᠡᠲᠡᠨ ᠬᠣᠩᠰᠢᠶᠠᠷ ᠲᠠᠢ ᠪᠤᠯᠢᠭᠠᠷᠢ ᠭᠤᠲᠤᠯ ᠡᠮᠦᠰᠴᠦ ᠬᠤᠷᠤᠭᠤᠳ ᠤ᠋ᠨ ᠬᠢᠨᠢ ᠦᠶᠡ ᠪᠡᠷ ᠬᠣᠩᠬᠣᠷ ᠭᠠᠷᠤᠭᠰᠠᠨ ᠮᠠᠷᠢᠶᠠᠯᠢᠭ ᠪᠤᠯᠪᠠᠷᠠᠢ ᠭᠠᠷ ᠲᠠᠭᠠᠨ ᠰᠤᠷ ᠬᠤᠢᠪᠢ ᠲᠠᠢ ᠰᠢᠯᠪᠢᠭᠦᠷ ᠠᠳᠬᠤᠵᠤ᠂ ᠨᠠᠷᠠᠨ ᠡᠭᠡᠪᠦᠷ ᠲᠦ᠍ ᠰᠠᠭᠤᠭᠠᠳ ᠰᠢᠨᠡ ᠨᠣᠭᠣᠭᠠ ᠴᠢᠮᠬᠢᠯᠡᠨ ᠲᠠᠪᠠᠲᠠᠢ ᠢᠳᠡᠰᠢᠯᠡᠬᠦ ᠬᠣᠨᠢᠨ ᠰᠦᠷᠦᠭ ᠢ᠋ᠶ᠋ᠡᠨ ᠨᠢᠳᠦ ᠲᠠᠯᠪᠢᠨ ᠬᠠᠷᠠᠵᠤ ᠪᠠᠢᠯᠠ᠃
《ᠬᠤᠷᠠᠭᠠ ᠢᠰᠢᠭᠡ ᠤᠨᠲᠠᠭᠠᠳ ᠬᠣᠴᠣᠷᠬᠤ ᠪᠣᠢ》 ᠭᠡᠵᠦ ᠡᠵᠢ ᠨᠢ ᠵᠠᠬᠢᠭᠰᠠᠨ ᠪᠠᠢᠵᠠᠢ᠃
ᠲᠡᠭᠡᠪᠡᠴᠦ ᠬᠠᠶᠠ ᠬᠠᠶᠠᠬᠠᠨ ᠬᠣᠯᠠ ᠶ᠋ᠢ ᠬᠠᠷᠠᠨ ᠮᠡᠯᠡᠷᠡᠵᠦ᠂ ᠠᠯᠤᠰ ᠤ᠋ᠨ ᠠᠯᠤᠰ ᠲᠤ᠌ ᠳᠤᠨᠢᠶᠠᠷᠲᠤᠨ ᠴᠡᠩᠬᠡᠷᠲᠦᠬᠦ ᠠᠭᠤᠳᠠᠮ ᠲᠠᠯᠠ᠂ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠴᠤᠪᠤᠭᠠ ᠰᠢᠭ᠋ ᠬᠦᠪᠦᠷᠡᠨ ᠣᠢᠯᠬᠤ ᠠᠭᠤᠯᠠ ᠲᠤᠯᠤᠭᠠᠳ ᠤ᠋ᠨ ᠪᠠᠷᠠ ᠶ᠋ᠢ ᠰᠢᠷᠳᠡᠨ᠂ ᠨᠢᠳᠦᠨ ᠳ᠋ᠦ᠍ᠨᠢ ᠮᠥᠷᠥᠭᠡᠳᠦᠯ ᠦ᠋ᠨ ᠭᠠᠰᠢᠭᠤᠨ ᠭᠤᠨᠢᠭ ᠲᠤᠨᠤᠷᠠᠵᠤ ᠤᠷᠲᠤᠬᠠᠨ ᠰᠢᠭ᠋ ᠰᠠᠨᠠᠭᠠ ᠠᠯᠳᠠᠪᠠ᠃
ᠪᠢᠴᠢᠬᠠᠨ ᠥᠬᠢᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠳᠡᠷᠡᠯᠡᠨ ᠬᠡᠪᠲᠡᠭᠡᠳ ᠥᠨᠳᠥᠷ ᠣᠭᠲᠠᠷᠭᠤᠢ ᠳ᠋ᠤ᠌ ᠬᠥᠪᠦᠯᠵᠡᠬᠦ ᠡᠭᠦᠯᠡᠰ ᠢ᠋ ᠮᠡᠯᠡᠷᠡᠨ ᠰᠢᠷᠳᠡᠨᠡ᠃
ᠪᠥᠭᠡᠮ ᠪᠥᠭᠡᠮ ᠴᠠᠭᠠᠨ ᠡᠭᠦᠯᠡᠰ ᠬᠤᠷᠠᠨ ᠴᠤᠭᠯᠠᠷᠠᠨᠠ᠂ ᠳᠠᠬᠢᠭᠠᠳ ᠪᠠᠰᠠ ᠵᠠᠳᠠᠷᠠᠨ ᠪᠤᠲᠠᠷᠠᠨᠠ᠃ ᠠᠩ ᠤ᠋ᠨ ᠨᠣᠬᠠᠳ ᠰᠢᠭ᠋᠂ ᠵᠡᠭᠡᠷᠡ ᠢᠨᠵᠠᠭᠠ ᠴᠤ᠌ ᠶᠤᠮ ᠰᠢᠭ᠋᠂ ᠬᠡᠪᠲᠡᠭᠡ ᠲᠡᠮᠡᠭᠡ ᠴᠦ᠍ ᠶᠦᠮ ᠰᠢᠭ᠂ ᠤᠷᠤᠯᠳᠤᠭᠠᠨ ᠤ᠋ ᠮᠣᠷᠢᠳ᠂ ᠤᠨᠠᠭᠠ ᠲᠤᠭᠤᠯ ᠴᠤ᠌ ᠶᠤᠮ ᠰᠢᠭ᠋ ᠁
ᠭᠡᠨᠡᠳᠲᠡ ᠡᠭᠦᠯᠡᠨ ᠦ᠌ ᠳᠤᠮᠳᠠᠠ᠋ᠴᠠ ᠠᠪᠤ ᠶ᠋ᠢᠨ ᠬᠢᠨᠢ ᠳᠦᠷᠢ ᠢᠯᠡᠷᠡᠯᠡ᠃ 《ᠠᠪᠤ》 ᠭᠡᠵᠦ ᠵᠢᠭᠠᠯ ᠥᠬᠢᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠠᠰᠬᠢᠷᠤᠯᠠ᠃ ᠥᠷᠭᠡᠨ ᠮᠥᠷᠥ ᠰᠦᠷᠯᠢᠭ ᠪᠡᠶᠡ ᠲᠡᠢ ᠠᠪᠤ ᠨᠢ ᠵᠢᠷᠪᠢᠰᠬᠢᠨ ᠦᠵᠡᠭᠳᠡᠭᠡᠳ ᠲᠣᠣᠷᠬᠠᠭ ᠢ᠋ᠶ᠋ᠠᠨ ᠠᠯᠠᠭᠠ ᠪᠣᠯᠪᠠ᠃ ᠠᠪᠤ ᠪᠠᠨ ᠠᠬᠢᠭᠠᠳ ᠨᠢᠭᠡ ᠬᠠᠷᠠᠬᠤ ᠶᠤᠮᠰᠠᠨ ᠭᠡᠵᠦ ᠬᠦᠰᠡᠵᠦ ᠬᠦᠯᠢᠶᠡᠭᠰᠡᠨ ᠵᠢᠭᠠᠯ ᠥᠬᠢᠨ ᠳ᠋ᠦ᠍ ᠥᠩᠭᠡᠷᠡᠭᠰᠡᠨ ᠬᠠᠪᠤᠷ ᠤ᠋ᠨ ᠠᠶᠤᠮᠰᠢᠭᠲᠤ ᠤᠴᠠᠷᠠᠯ ᠰᠠᠨᠠᠭᠠᠨ ᠳ᠋ᠤᠨᠢ ᠪᠠᠭᠤᠵᠤ ᠪᠢᠯᠡ᠃ ᠲᠣᠭ ᠳᠠᠯᠪᠠᠭᠠ ᠡᠷᠭᠦᠭᠰᠡᠨ ᠠᠷᠪᠠᠭᠠᠳ ᠬᠥᠮᠦᠰ ᠭᠡᠷ ᠲᠦ᠋ᠨᠢ ᠢᠪᠡ ᠳᠠᠭᠠᠷᠢᠨ ᠣᠷᠣᠵᠤ ᠢᠷᠡᠭᠡᠳ ᠠᠪᠤ ᠶ᠋ᠢ ᠨᠢ ᠪᠠᠷᠢᠪᠠ᠃ ᠲᠡᠭᠡᠭᠡᠳ ᠨᠢᠷᠤᠭᠤᠨ ᠳ᠋ᠤᠨᠢ ᠬᠠᠲᠠᠭᠰᠠᠨ ᠳᠠᠪᠤᠤ ᠳᠡᠭᠡᠷᠡ ᠬᠡᠳᠦᠨ ᠶᠠᠩᠵᠦ ᠶᠢᠨ ᠶᠠᠯᠠ ᠶ᠋ᠢᠨ ᠭᠡᠷᠡᠴᠢ ᠶ᠋ᠢ ᠲᠣᠳᠣᠷᠬᠠᠢᠯᠠᠵᠤ ᠠᠯᠠᠰᠢᠨ ᠤ᠋ ᠦᠬᠡᠷ ᠲᠠᠭᠤᠵᠤ ᠪᠠᠢᠬᠤ ᠰᠢᠭ᠋ ᠮᠣᠷᠢ ᠪᠠᠷ ᠬᠥᠭᠡᠭᠡᠭᠡᠳ ᠵᠡᠷᠭᠡᠯᠡᠳᠡᠭᠡ ᠰᠤᠮᠤᠨ ᠳ᠋ᠤ᠌ ᠪᠠᠢᠳᠠᠭ ᠳᠡᠭᠡᠳᠦᠰ ᠦ᠋ᠨ ᠬᠢᠨᠢ ᠨᠤᠲᠤᠭ ᠲᠤ᠌ ᠠᠪᠠᠴᠢᠨ ᠲᠡᠮᠡᠴᠡᠬᠦ ᠭᠡᠵᠦ ᠠᠪᠴᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠪᠦᠲᠦᠨ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠵᠦ ᠣᠭᠲᠣ ᠴᠢᠮᠡᠭᠡ ᠠᠯᠠᠭᠠ᠃《ᠮᠡᠨᠳᠦ ᠬᠠᠷᠢᠵᠤ ᠢᠷᠡᠵᠦ ᠴᠢᠳᠠᠳᠠᠭ ᠴᠤ᠌ ᠪᠣᠯᠪᠠ ᠤᠤ》 ᠭᠡᠵᠦ ᠡᠵᠢ ᠨᠢ ᠲᠠᠩᠳᠠ ᠨᠢᠯᠪᠤᠰᠤᠷᠠᠨ ᠥᠭᠦᠯᠡᠳᠡᠭ ᠪᠠᠢᠯᠠ᠃ ᠡᠨᠡ ᠤᠴᠢᠷᠠ᠋ᠴᠠ ᠬᠣᠢᠰᠢ ᠲᠡᠷᠡ ᠬᠦ᠌ ᠬᠠᠷᠠᠩᠭᠠ ᠬᠡᠩᠭᠡᠷᠭᠡᠨ ᠦ᠌ ᠳᠠᠭᠤ᠂ ᠤᠷᠢᠶᠠ ᠯᠣᠽᠦ᠋ᠩ ᠦ᠋ᠨ ᠬᠠᠰᠬᠢᠷᠤᠯᠲᠠ ᠨᠢ ᠵᠢᠭᠠᠯ ᠥᠬᠢᠨ ᠦ᠌ ᠨᠢᠯᠬᠠ ᠪᠠᠯᠴᠢᠷ ᠣᠶᠤᠨ ᠳ᠋ᠤ᠌ ᠲᠦᠭᠰᠢᠭᠦᠷᠢ ᠶ᠋ᠢᠨ ᠬᠠᠷᠠ ᠮᠠᠨᠠᠨ ᠪᠣᠯᠵᠤ ᠮᠠᠨᠠᠭᠳᠠᠵᠠᠢ᠃
ᠵᠢᠭᠠᠯ ᠥᠬᠢᠨ ᠬᠥᠪᠦᠯᠵᠡᠬᠦ ᠡᠭᠦᠯᠡ ᠶ᠋ᠢ ᠪᠠᠷᠠᠯᠠᠭᠰᠠᠭᠠᠷ ᠃ ᠠᠪᠤ ᠶ᠋ᠢᠨ ᠬᠢᠨᠢ ᠲᠥᠷᠬᠦ ᠳᠠᠬᠢᠭᠠᠳ ᠢᠯᠡᠷᠡᠭᠰᠡᠨ ᠦᠭᠡᠢ᠃ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠮᠡᠯᠲᠡᠯᠵᠡᠨ ᠤᠷᠤᠭᠤᠯ ᠨᠢ ᠥᠮᠥᠯᠵᠡᠨ ᠡᠬᠡᠷ ᠲᠠᠲᠠᠪᠠ᠃ ᠭᠡᠨᠡᠳᠲᠡ ᠶᠠᠭᠤ ᠪᠣᠳᠣᠭᠰᠠᠨ ᠢ᠋ ᠪᠤᠤ ᠮᠡᠳᠡ᠂ ᠭᠣᠰ ᠦᠰᠦᠷᠦᠨ ᠪᠣᠰᠴᠤ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠨᠢᠯᠪᠤᠰᠤ ᠪᠠᠨ ᠵᠣᠷᠢᠮᠠᠭ ᠵᠦᠯᠭᠦᠭᠰᠡᠨ ᠢ᠋ᠶ᠋ᠡᠨ 《ᠮᠢᠨᠦ ᠠᠪᠤ ᠮᠠᠭᠤ ᠬᠥᠮᠦᠨ ᠪᠢᠰᠢ᠂ ᠠᠪᠤ ᠮᠢᠨᠢ ᠯᠠᠪᠲᠠᠢ ᠬᠠᠷᠢᠵᠤ ᠢᠷᠡᠨᠡ》 ᠭᠡᠵᠦ ᠴᠢᠨᠡᠭᠡ ᠮᠡᠳᠡᠨ ᠬᠠᠰᠬᠢᠷᠤᠯᠠ᠃
ᠤᠨᠲᠠᠵᠤ ᠪᠠᠢᠭᠰᠠᠨ ᠬᠤᠷᠠᠭᠠ ᠢᠰᠢᠭᠡ ᠨᠦ᠍ᠭᠦᠳ ᠦᠷᠭᠦᠨ ᠪᠣᠰᠴᠤ᠂ ᠪᠡᠯᠴᠢᠵᠦ ᠪᠠᠢᠭᠰᠠᠨ ᠬᠣᠨᠢᠳ ᠵᠢᠷᠢᠰᠬᠢᠨ ᠨᠡᠰᠢ ᠡᠷᠭᠢᠨ ᠪᠥᠭᠡᠮᠨᠡᠷᠡᠨ ᠵᠣᠭᠰᠣᠪᠠ᠃ ᠵᠢᠭᠠᠯ ᠥᠬᠢᠨ ᠥᠨᠳᠥᠷ ᠳᠠᠷᠠᠰᠤ ᠲᠠᠢ ᠳᠣᠪᠣᠴᠠᠭ ᠤ᠋ᠨ ᠣᠷᠣᠢ ᠳ᠋ᠤ᠌ ᠭᠠᠷᠴᠤ ᠵᠣᠭᠰᠣᠭᠠᠳ᠂ ᠵᠢᠷᠪᠢᠯᠵᠡᠬᠦ ᠵᠡᠷᠭᠡᠯᠭᠡᠨ ᠳᠤᠮᠳᠠ ᠥᠨᠳᠥᠷ ᠪᠣᠭᠣᠨᠢ ᠪᠣᠯᠵᠤ ᠬᠠᠷᠠᠭᠳᠠᠬᠤ ᠬᠣᠶᠠᠷ ᠲᠡᠭᠡᠭ ᠦ᠋ᠨ ᠳᠤᠮᠳᠠᠭᠤᠷ ᠰᠤᠨᠤᠯᠵᠠᠬᠤ ᠲᠠᠯᠠ ᠶ᠋ᠢᠨ ᠰᠢᠷᠠ ᠵᠠᠮ ᠢ᠋ ᠤᠳᠠᠲᠠᠯᠠ ᠪᠠᠷᠠᠯᠠᠨ ᠵᠣᠭᠰᠣᠯᠠ᠃
ᠳᠥᠷᠪᠡᠲᠡᠢ ᠪᠠᠢᠭᠰᠠᠨ ᠵᠢᠯ ᠳ᠋ᠦ᠍ᠨᠢ ᠠᠪᠤ ᠨᠢ ᠨᠢᠭᠡ ᠤᠳᠠᠭᠠ ᠳᠠᠪᠤᠰᠤᠨ ᠤ᠋ ᠠᠶᠠᠨ ᠳ᠋ᠤ᠌ ᠶᠠᠪᠤᠭᠠᠳ ᠶᠡᠬᠡ ᠤᠳᠠᠭᠰᠠᠨ ᠪᠠᠢᠵᠠᠢ᠃ ᠲᠡᠷᠡ ᠨᠠᠮᠤᠷ ᠤ᠋ᠨ ᠨᠠᠷᠠ ᠰᠢᠷᠭᠠᠯᠳᠠᠭᠰᠠᠨ ᠲᠤᠩᠭᠠᠯᠠᠭ ᠡᠳᠦᠷ ᠭᠠᠳᠠᠨᠠ ᠰᠠᠭᠤᠭᠠᠳ ᠬᠤᠷᠤᠳ ᠵᠦᠰᠦᠵᠦ ᠪᠠᠢᠭᠰᠠᠨ ᠡᠵᠢ ᠨᠢ《ᠠᠶᠠᠨ ᠤ᠋ ᠬᠥᠮᠦᠨ ᠢᠷᠡᠯᠡ᠂ ᠠᠪᠤ ᠨᠢ ᠢᠷᠡᠯᠡ》 ᠭᠡᠵᠦ ᠥᠬᠢᠨ ᠢ᠋ᠶ᠋ᠡᠨ ᠳᠠᠭᠤᠳᠠᠪᠠ᠃ ᠵᠢᠭᠠᠯ ᠥᠬᠢᠨ ᠭᠣᠳ ᠦᠰᠦᠷᠦᠨ ᠭᠠᠷᠴᠤ ᠢᠷᠡᠭᠡᠳ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠢᠷᠡᠵᠦ ᠶᠠᠪᠤᠭᠠ ᠵᠦᠭ ᠬᠠᠷᠠᠢᠯᠭᠠᠪᠠ᠃ ᠠᠰᠠᠷ ᠪᠠᠰᠠᠷ ᠬᠣᠶᠠᠷ ᠨᠣᠬᠠᠢ ᠨᠢ ᠴᠦ᠍ ᠥᠬᠢᠨ ᠢ᠋ ᠳᠠᠭᠠᠭᠠᠳ ᠰᠤᠮᠤᠳᠠᠨ ᠭᠦᠶᠦᠯᠡ᠃ ᠭᠠᠯ ᠠᠶᠠᠨ ᠤ᠋ ᠠᠬᠠᠯᠠᠭᠴᠢ ᠠᠪᠤ ᠨᠢ ᠲᠡᠮᠡᠭᠡᠳ ᠢ᠋ᠶ᠋ᠡᠨ ᠬᠥᠲᠥᠯᠦᠨ᠂ ᠬᠠᠩᠬᠠᠯᠵᠠᠨ ᠠᠯᠬᠤᠭᠰᠠᠭᠠᠷ ᠣᠢᠷᠠᠲᠤᠨ ᠢᠷᠡᠪᠡ᠃ ᠠᠪᠤ ᠨᠢ ᠥᠬᠢᠨ ᠢ᠋ᠶ᠋ᠡᠨ ᠲᠡᠪᠡᠷᠢᠨ ᠠᠪᠴᠤ ᠪᠥᠨᠲᠥᠭᠡᠷ ᠮᠠᠩᠨᠠᠢ᠂ ᠪᠣᠨᠲᠣᠭᠣᠷ ᠬᠠᠴᠠᠷ ᠢ᠋ ᠨᠢ ᠡᠭᠡᠯᠵᠢᠯᠡᠨ ᠦᠨᠦᠰᠦᠭᠡᠳ《ᠮᠢᠨᠦ ᠮᠠᠭᠤ ᠰᠢᠷᠠ ᠠᠪᠤ ᠪᠠᠨ ᠰᠠᠨᠠᠪᠠ ᠤᠤ》 ᠭᠡᠬᠦ ᠳ᠋ᠦ᠍ ᠵᠢᠭᠠᠯ ᠥᠬᠢᠨ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠯ ᠦᠭᠡᠢ ᠠᠪᠤ ᠪᠠᠨ ᠬᠦᠵᠦᠭᠦᠳᠡᠨ ᠲᠡᠪᠡᠷᠢᠵᠦ ᠥᠳᠬᠡᠨ ᠰᠠᠬᠠᠯ ᠲᠠᠢ ᠥᠷᠭᠡᠨ ᠲᠦᠭᠦᠰᠢᠨ ᠳ᠋ᠦ᠍ᠨᠢ ᠵᠥᠭᠡᠯᠡᠨ ᠬᠠᠴᠠᠷ ᠢ᠋ᠶ᠋ᠠᠨ ᠨᠠᠭᠠᠯᠳᠤᠭᠤᠯᠤᠨ ᠡᠷᠡᠭᠡᠯᠡᠪᠡ᠃ ᠠᠰᠠᠷ ᠪᠠᠰᠠᠷ ᠬᠣᠶᠠᠷ ᠨᠣᠬᠠᠢ ᠨᠢ ᠴᠦ᠍ ᠡᠵᠡᠨ ᠦ᠌ ᠪᠡᠨ ᠡᠩᠭᠡᠷ ᠬᠣᠷᠮᠣᠢ ᠵᠦᠭ ᠦᠰᠦᠷᠦᠨ ᠬᠠᠷᠠᠢᠵᠤ《ᠲᠠ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠤᠳᠠᠪᠠ》 ᠭᠡᠬᠦ ᠰᠢᠭ ᠬᠢᠩᠭᠢᠨᠡᠨ ᠭᠠᠰᠠᠯᠵᠤ ᠰᠠᠩᠭᠤᠷᠴᠠᠭ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠯᠵᠠᠭᠤᠯᠤᠨᠠ᠃
ᠠᠪᠤ ᠨᠢ ᠳᠠᠯᠢᠩ ᠢ᠋ᠶ᠋ᠠᠨ ᠰᠣᠢᠯᠠᠨ ᠥᠬᠢᠨ ᠳ᠋ᠡᠭᠡᠨ ᠬᠣᠶᠠᠷ ᠬᠡᠰᠡᠭ ᠣᠷᠣᠰ ᠰᠢᠬᠢᠷ ᠠᠳᠬᠤᠭᠤᠯᠤᠨ ᠲᠡᠮᠡᠭᠡᠨ ᠳᠡᠭᠡᠷᠡ ᠪᠡᠨ ᠡᠷᠭᠦᠨ ᠲᠠᠯᠪᠢᠯᠠ᠃ ᠲᠡᠮᠡᠭᠡᠨ ᠦ᠌ ᠪᠦᠬᠦ ᠡᠴᠡ ᠲᠡᠪᠡᠷᠢᠵᠦ ᠰᠠᠭᠤᠭᠰᠠᠨ ᠵᠢᠭᠠᠯ ᠥᠬᠢᠨ ᠵᠠᠪᠠᠵᠢᠨ ᠡᠴᠡ ᠪᠡᠨ ᠰᠢᠯᠦᠰᠦ ᠭᠣᠭᠣᠵᠢᠭᠤᠯᠤᠨ ᠰᠢᠬᠢᠷ ᠰᠢᠮᠡᠵᠦ᠂ ᠰᠦᠷᠯᠢᠭ ᠥᠨᠳᠥᠷ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠭᠰᠢ ᠰᠠᠢᠬᠠᠨ ᠨᠢᠷᠤᠭᠤ ᠶ᠋ᠢ ᠪᠠᠬᠠᠷᠬᠠᠨ ᠬᠠᠷᠠᠵᠤ᠂《ᠠᠪᠤ ᠠ᠋》 ᠭᠡᠵᠦ ᠨᠢᠯᠬᠠ ᠬᠣᠩᠭᠣᠷ ᠳᠠᠭᠤ ᠪᠠᠷ ᠳᠠᠭᠤᠳᠠᠬᠤ ᠳ᠋ᠤ᠌ ᠠᠪᠤ ᠨᠢ 《ᠦᠶᠢ᠂ ᠮᠢᠨᠦ ᠥᠬᠢᠨ》 ᠭᠡᠵᠦ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ ᠲᠡᠢ ᠲᠣᠮᠣ ᠠᠯᠠᠭ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠥᠬᠢᠨ ᠢ᠋ᠶ᠋ᠡᠨ ᠥᠬᠥᠭᠡᠷᠳᠡᠨ ᠬᠠᠷᠠᠵᠤ᠂ ᠠᠳᠤᠭᠤᠨ ᠤ᠋ ᠬᠢ ᠰᠢᠭ ᠴᠠᠭᠠᠨ ᠰᠢᠲᠦ ᠪᠡᠨ ᠢᠷᠠᠯᠵᠠᠭᠤᠯᠤᠨ ᠬᠦᠩᠭᠢᠨᠡᠲᠡᠯᠡ ᠢᠨᠢᠶᠡᠨᠡ᠃
ᠲᠡᠷᠡ ᠬᠦ᠌ ᠴᠠᠭᠯᠠᠰᠢ ᠦᠭᠡᠢ ᠪᠠᠶᠠᠷ ᠵᠢᠷᠭᠠᠯ ᠲᠠᠢ ᠡᠳᠦᠷ ᠢ᠋ ᠡᠷᠭᠢᠴᠡᠭᠦᠯᠦᠨ ᠰᠠᠨᠠᠬᠤ ᠳ᠋ᠤ᠌ ᠵᠢᠭᠠᠯ ᠥᠬᠢᠨ ᠦ᠌ ᠵᠠᠪᠠᠵᠢᠨ ᠳ᠋ᠤ᠌ ᠠᠵᠠ ᠵᠢᠷᠭᠠᠯ ᠤ᠋ᠨ ᠮᠦᠰᠢᠶᠡᠳᠦ ᠲᠣᠳᠣᠷᠠᠪᠠ᠃ ᠭᠦᠨ ᠴᠡᠩᠬᠡᠷ ᠣᠭᠲᠠᠷᠭᠤᠢ ᠳ᠋ᠤ᠌ ᠤᠰᠤᠨ ᠴᠡᠩᠬᠡᠷ ᠡᠭᠦᠯᠡᠰ ᠬᠦᠪᠦᠷᠡᠭᠰᠡᠭᠡᠷ᠁ ᠠᠯᠤᠰ ᠲᠡᠭᠷᠢ ᠶ᠋ᠢᠨ ᠬᠢᠵᠠᠭᠠᠷᠠ᠋ᠴᠠ ᠠᠪᠤ ᠨᠢ ᠠᠶᠠᠨ ᠵᠢᠩ ᠦ᠋ᠨ ᠲᠡᠮᠡᠭᠡᠳ ᠬᠥᠲᠥᠯᠦᠭᠡᠳ ᠨᠡᠰᠢ ᠠᠢᠰᠤᠢ ᠰᠢᠭ᠋᠃ ᠤᠷᠢᠬᠠᠨ ᠰᠠᠯᠬᠢᠨ ᠤ᠋ ᠠᠶᠠᠰ ᠢ᠋ᠶ᠋ᠠᠷ ᠵᠢᠩ ᠦ᠋ᠨ ᠬᠣᠩᠬᠣᠨ ᠤ᠋ ᠴᠠᠩᠭᠢᠨᠠᠮᠠ ᠳᠠᠭᠤᠨ ᠵᠢᠭᠠᠯ ᠥᠬᠢᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠲᠣᠳᠣᠬᠠᠨ ᠰᠣᠨᠣᠰᠳᠠᠨᠠ᠃
2009 ᠣᠨ ᠳ᠋ᠤ᠌ ᠬᠥᠬᠡᠬᠣᠲᠠᠨᠠ
2010 ᠣᠨ ᠳ᠋ᠤ᠌ 《ᠬᠤᠨ ᠭᠠᠯᠠᠭᠤ》 ᠰᠡᠳᠬᠦᠯ ᠦ᠋ᠨ ᠱᠠᠩᠨᠠᠯᠲᠤ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠬᠣᠶᠠᠳᠤᠭᠠᠷ ᠳᠡᠰ ᠦ᠋ᠨ ᠱᠠᠩᠨᠠᠯ ᠬᠦᠷᠲᠡᠵᠡᠢ᠃
ᠦᠰᠦᠭ ᠬᠥᠷᠪᠡᠭᠦᠯᠦᠭᠰᠡᠨ ᠨᠢ᠄ ᠮᠥᠩᠭᠥᠨ ᠪᠠᠢ· ᠰᠠᠷᠠᠨᠠ᠂ ᠬᠡᠯᠡᠰᠣᠶᠣᠯ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠰᠣᠨᠢᠨᠪᠠᠶᠠᠷ᠂ ᠭᠠᠷᠮᠠ